Yu Ken Stap Amamas Tru

 1. Yumi mas mekim wanem na bai yumi ken stap amamas tru?

MAN i stap amamas tru i no save pilim amamas inap sotpela taim tasol na bihain dispela amamas i pinis, nogat. Em bai stap amamas long laip olgeta bilong em. Hau yumi ken kisim kain amamas olsem? Long Bikpela Tok Long Maunten, Jisas i tok: “Ol man i hangre long kisim save long God, ol i ken amamas.” (Mat. 5:3) Jisas i save olsem yumi ol man i laik tru long kisim save long Krieta bilong yumi, God Jehova, na lotu long em. Yumi olgeta i “hangre long kisim save long God.” Jehova em i “God bilong amamas,” olsem na ol man i lotuim em, ol tu i ken amamas.​—1 Tim. 1:11.

2-3. (a) Jisas i tok husat ol man tu i ken stap amamas? (b) Yumi bai stori long wanem samting long dispela atikol, na bilong wanem?

² Yu ting yumi bai stap amamas tru sapos i no gat ol hevi? Nogat. Long bikpela tok Jisas i bin mekim, em i mekim wanpela narakain tok. Em i tok olsem “ol man i bel hevi tru” ol i ken amamas, maski ol i bel hevi long ol rong ol i bin mekim o ol i karim ol narapela bikpela hevi long laip bilong ol. Jisas i mekim wankain tok long “ol man em ol arapela i mekim nogut long ol bikos ol i bihainim stretpela pasin” na ol man em ol narapela i “krosim” ol bikos ol i stap disaipel bilong Krais. (Mat. 5:4, 10, 11) Tasol olsem wanem ol man inap stap amamas tru maski ol i bungim ol kain hevi olsem?

³ Jisas i skulim yumi olsem yumi inap stap amamas tru taim yumi kisim save long God na go klostu long em, na i no bikos yumi no gat ol hevi. (Jems 4:8) Hau yumi ken stap amamas tru? Long dispela atikol, yumi bai stori long 3-pela samting yumi ken mekim na bai yumi stap amamas tru.

 4. Wanem namba 1 rot bilong stap amamas tru? (Buk Song 1:1-3)

⁴ NAMBA 1 ROT: Bilong stap amamas tru, yumi mas kisim kaikai bilong strongim bilip. Ol man na ol animal i mas kisim kaikai bilong stap laip. Tasol yumi ol manmeri tasol inap kisim kaikai bilong strongim bilip. Na em samting yumi nidim. Jisas i tok: “Man i no inap stap laip long bret tasol, nogat. Em i mas bihainim tu olgeta tok i kamap long maus bilong Jehova.” (Mat. 4:4) Olsem na long olgeta de, yumi mas kisim kaikai bilong strongim bilip long rot bilong ritim Tok Bilong God, em Baibel. Man bilong raitim song i tok: ‘Man i save amamas long lo bilong Jehova na em i ritim dispela lo long san na long nait, dispela man i ken amamas.’​—Ritim Buk Song 1:1-3.

5-6. (a) Yumi kisim wanem save long Baibel? (b) Taim yumi ritim Baibel, olsem wanem dispela i helpim yumi?

⁵ Long Baibel, Jehova i tokim yumi long ol bikpela samting yumi mas mekim na bai yumi ken stap amamas. Yumi kisim save long ol samting God i tingting pinis long mekim long yumi. Yumi kisim save long olsem wanem yumi ken go klostu long em na ol samting yumi mas mekim na bai God i ken fogivim yumi. Na tu, yumi kisim save long ol gutpela samting em God i tok promis long givim long yumi long bihain. (Jer. 29:11) Yumi kisim save long ol dispela tok i tru taim yumi stadi long Baibel na dispela i mekim yumi amamas tru!

⁶ Yumi save olsem Baibel i pulap long planti gutpela tok bilong stiaim ol samting yumi mekim long olgeta de. Taim yumi bihainim ol dispela tok, yumi bai stap amamas. Taim yu pilim olsem ol wari bilong laip i daunim yu, lusim bikpela haptaim moa long ritim Tok Bilong Jehova na tingim tingim long bel ol dispela tok. Jisas i tok: “Ol man i harim tok bilong God na bihainim, ol i ken amamas!”​—Luk 11:28.

 7. Taim yu ritim Tok Bilong God, yu ken mekim wanem na bai yu kisim gutpela helpim tru?

⁷ Taim yu ritim Tok Bilong God, yu mas lusim sampela haptaim long pilim tru ol tok yu ritim. Tingim dispela tok piksa, ating dispela samting i bin kamap long yu. Wanpela i kukim wanpela kaikai em yu save laikim tru. Tasol ating yu gat sampela wok long mekim o yu tingting long narapela samting, olsem na yu kaikai hariap tru na yu no pilim swit bilong kaikai. Bihain long yu pinis long kaikai, yu luksave olsem yu bin pinisim kaikai hariap tru na nau yu tingting olsem em bai gutpela moa sapos yu bin kaikai isi isi na enjoim teis bilong kaikai. Olsem wanem? Sampela taim yu hariap long ritim Baibel na yu no pilim tru ol tok bilong en? Lusim sampela haptaim long ritim Tok Bilong God na amamas long ol dispela tok. Piksaim long tingting ol samting i kamap, traim long tingim krai bilong nek bilong man i olsem wanem, na tingim tingim ol tok yu ritim. Taim yu mekim olsem, yu bai amamas tru.

 8. Olsem wanem “gutpela wokboi i gat savetingting” i inapim wok bilong em long nau? (Lukim tu futnot.)

⁸ Jisas i makim “gutpela wokboi i gat savetingting” long givim yumi kaikai bilong strongim bilip long taim stret, na yumi kisim planti kaikai tru bilong strongim bilip bilong yumi.b (Mat. 24:45) Ol tok bilong Baibel em as bilong olgeta tok i stap long ol buk na nius na vidio samting em gutpela wokboi i kamapim. (1 Tes. 2:13) Dispela kaikai bilong strongim bilip i helpim yumi long save long tingting bilong Jehova i stap long Baibel. Em risen na yumi save ritim ol nius Wastaua na Kirap! na ol atikol long jw.org. Na tu, yumi redim ol hap bilong miting i save kamap namel long wik na long wiken. Na yumi watsim program bilong JW Broadcasting^® long olgeta wan wan mun. Taim yumi wok long kisim planti kaikai bilong strongim bilip long olgeta taim, dispela bai helpim yumi long mekim namba 2 samting bilong stap amamas tru.

 9. Wanem namba 2 rot bilong stap amamas tru?

⁹ NAMBA 2 ROT: Bilong stap amamas tru, yumi mas bihainim ol lo bilong Jehova. Man bilong raitim song i tok: “Ol man i pret long Jehova, ol i ken amamas, ol i save wokabaut long rot bilong em.” (Sng. 128:1) Taim yumi pret long Jehova, dispela i makim olsem yumi gat bikpela rispek long em na yumi no laik mekim wanpela samting i mekim em i bel hevi. (Prov. 16:6) Olsem na oltaim yumi wok long bihainim ol lo bilong God long wanem samting i stret na wanem samting i no stret olsem Baibel i tokim yumi long en. (2 Kor. 7:1) Yumi bai stap amamas taim yumi mekim ol pasin Jehova i laikim na sakim ol pasin em i heitim.​—Sng. 37:27; 97:10; Rom 12:9.

10. Olsem Rom 12:2 i kamapim, yumi mas mekim wanem?

¹⁰ Ritim Rom 12:2. Wanpela man inap save olsem Jehova i gat namba long makim wanem samting i stret na wanem samting i no stret, tasol em yet tu i mas bihainim ol dispela lo bilong God. Olsem, wanpela man i save olsem gavman i gat rait long putim ol spit limit em ol man i mas bihainim taim ol i draiv long rot. Tasol ating em i no laik bihainim ol dispela spit limit. Olsem na em i draiv spit tru winim mak bilong spit limit em gavman i putim. Olsem tasol, long ol pasin yumi mekim yumi mas soim olsem yumi bilip tru olsem ol lo bilong Jehova i gutpela tru na ol i bilong lukautim yumi. (Prov. 12:28) Devit i bin pilim olsem, na em i mekim dispela tok long Jehova olsem: “Yu soim mi rot i go long laip. Yu amamas long mi na dispela i mekim mi belgut; mi stap long rait sait bilong yu na dispela i mekim mi i stap amamas inap oltaim oltaim.”​—Sng. 16:11.

11-12. (a) Taim yumi wari o bel hevi tru, yumi mas was gut long wanem samting? (b) Olsem wanem tok bilong Filipai 4:8 i ken helpim yumi long makim ol amamas yumi laik kisim?

¹¹ Taim yumi wari o bel hevi tru, yumi inap pilim olsem yumi mas mekim sampela samting na bai yumi lusim tingting long ol hevi bilong yumi. I no gat rong long mekim olsem, tasol yumi mas was gut olsem yumi no mekim wanpela samting em Jehova i heitim.​—Efe. 5:10-12, 15-17.

¹² Long pas em aposel Pol i raitim long ol Filipai, em i kirapim ol Kristen long wok yet long tingim “ol samting i stretpela, ol samting i klin, ol samting i kirapim pasin laikim, [na] ol samting i gutpela.” (Ritim Filipai 4:8.) Em tru olsem Pol i no stori long ol samting yumi mekim bilong kisim amamas, tasol ol tok em i raitim i ken stiaim yumi long ol amamas yumi laik kisim. Yu ken mekim olsem: Taim yu lukim dispela tok “ol samting” long dispela ves, senisim wantaim dispela tok “ol singsing,” “ol muvi,” “ol buk,” o “ol vidio gem.” Taim yu mekim olsem, dispela bai helpim yu long luksave long wanem ol samting God i orait long en na wanem ol samting em i no orait long en. Yumi laik mekim ol samting i stret wantaim ol stretpela lo bilong Jehova. (Sng. 119:1-3) Taim maus bilong bel bilong yumi i stap klin, dispela bai helpim yumi long mekim namba 3 samting bilong stap amamas tru.​—Apo. 23:1.

13. Wanem namba 3 rot bilong stap amamas tru? (Jon 4:23, 24)

¹³ NAMBA 3 ROT: Putim lotu bilong Jehova i stap nambawan samting long laip bilong yu. Jehova em i Krieta bilong yumi, olsem na i stret tru long yumi lotu long em. (Rev. 4:11; 14:6, 7) Em i bikpela samting long yumi mas lotu long em long pasin em i orait long en, olsem “long strong bilong holi spirit na long pasin i tru.” (Ritim Jon 4:23, 24.) Yumi laik bai holi spirit bilong God i stiaim lotu bilong yumi na bai lotu bilong yumi i stret wantaim ol tok i tru i stap long Baibel. Lotu bilong yumi i mas stap nambawan samting long laip bilong yumi, maski yumi stap long kantri we ol i pasim o tambuim wok lotu bilong yumi. Long nau, winim 100 brata na sista bilong yumi i stap long kalabus bikos ol i holim nem olsem ol Witnes Bilong Jehova.c Maski i olsem, ol i amamas long mekim ol samting ol inap mekim olsem beten, stadi, na tokim ol narapela long God bilong yumi na Kingdom bilong em. Taim ol man i krosim yumi o mekim nogut long yumi, yumi ken amamas long save olsem Jehova i stap wantaim yumi na em bai givim gutpela pe long yumi.​—Jems 1:12; 1 Pita 4:14.

14. Wanem samting i kamap long wanpela yangpela brata long Tajikistan, na bilong wanem?

¹⁴ Ol ekspiriens bilong ol bratasista i soim olsem taim yumi bihainim 3-pela rot em yumi stori pinis long en, yumi bai stap amamas tru, maski yumi bungim kain kain hevi long laip bilong yumi. Tingim stori bilong Jovidon Bobojonov, em i bilong Tajikistan na em i gat 19 krismas. Em i bin tok nogat long insait long ami. Olsem na long Oktoba 4, 2019, ol i kidnepim em long haus bilong em na putim em long kalabus inap sampela mun, na ol i mekim pasin long em olsem wanpela kriminal. Planti niuslain bilong sampela kantri i bin stori long dispela pasin i no stret em ol i bin mekim long em. Ol i tok ol i bin paitim Jovidon bilong subim em long mekim tok promis bilong insait long ami na long werim yunifom bilong ol ami. Bihain kot i tok em i gat asua na ol i salim em long wok kalabus long kem i go inap long presiden bilong Tajikistan i tok Jovidon i no mekim wanpela rong na em i givim oda long rilisim em. Insait long dispela haptaim, Jovidon i holimpas pasin bilong em long stap gut long God na em i stap amamas yet. Wanem samting i helpim em long mekim olsem? Oltaim em i mekim ol samting bilong strongim bilip bilong em.

15. Olsem wanem Jovidon i kisim kaikai bilong strongim bilip taim em i stap long kalabus?

¹⁵ Taim Jovidon i stap long kalabus, em i kisim kaikai bilong strongim bilip maski em i no gat Baibel na ol pablikesen bilong yumi. Hau em i bin mekim olsem? Taim ol asples bratasista i bringim kaikai long em, ol i save raitim teks bilong de antap long ol beg em ol i karim ol kaikai i kam long en. Olsem na em inap long ritim Baibel na tingim tingim ol tok bilong en long olgeta de. Bihain long em i lusim kalabus, em i givim dispela edvais long ol manmeri em ol i no karim yet ol bikpela hevi. Em i tok: “Em i bikpela samting tru long yusim gut fridom bilong yu long nau long kisim planti save moa long Jehova long rot bilong ritim Baibel na ol pablikesen bilong yumi.”

16. Jovidon i putim tingting i go long wanem ol samting?

¹⁶ Brata bilong yumi i bihainim ol lo bilong Jehova. Em i no tingim tingim ol laik nogut bilong em na mekim ol pasin nogut, nogat. Em i putim tingting olgeta i go long Jehova na ol samting Em i tingim olsem bikpela samting. Jovidon i amamas long lukim ol naispela samting God i bin wokim. Long olgeta moning em i kirap na amamas long harim ol pisin i singsing. Long nait em i lukluk long mun na ol sta. Em i tok: “Ol dispela presen i kam long Jehova i mekim mi amamas na i strongim mi.” Taim yumi pilim tru ol samting Jehova i givim long yumi long sait bilong bilip na skin, yumi bai belgut na amamas, na dispela amamas bai strongim yumi long sanap strong na karim ol hevi.

17. Olsem wanem tok bilong 1 Pita 1:6, 7 i stret long man i karim wankain hevi olsem Jovidon i bin karim?

¹⁷ Jovidon i putim lotu bilong Jehova i stap nambawan samting. Em i save olsem em i bikpela samting long holimpas pasin bilong stap gut long God tru. Jisas i tok: “Yu mas lotu long Jehova, God bilong yu, na yu mas mekim wok bilong em wanpela tasol.” (Luk 4:8) Ol komanda bilong ami na ol soldia i laik bai Jovidon i lusim bilip bilong em. Tasol oltaim em i beten strong long san na nait na em i askim Jehova long helpim em long holimpas bilip na no ken givap. Maski ol i mekim pasin i no stret long Jovidon, em i holimpas bilip bilong em. Long nau em i amamas tru bikos ol traim i mekim na em i gat strongpela bilip, em samting em i no bin gat paslain long ol i kidnepim em, paitim em, na kalabusim em.​—Ritim 1 Pita 1:6, 7.

18. Olsem wanem yumi ken holimpas amamas bilong yumi?

¹⁸ Jehova i save long ol samting yumi mas mekim na bai yumi ken stap amamas tru. Sapos yu bihainim dispela 3-pela rot bilong stap amamas tru, yu bai holimpas yet amamas bilong yu, maski yu bungim ol bikpela hevi. Na yu tu bai mekim dispela tok: “Ol manmeri God bilong ol em Jehova, ol i ken amamas!”​—Sng. 144:15.