Pinis Bilong Olgeta Pait—Em Inap Kamap?

“KAMAN! Yupela lukim wok Bikpela i mekim. Bai bel bilong yupela i kirap nogut long planti narakain samting em i mekim long graun. Em i save mekim i dai pait long olgeta hap graun. Em i save brukim olgeta banara na spia, na i save kukim ol hap plang long paia.”—Sam 46:8, 9.

Spirit bilong God i givim tingting long man bilong raitim dispela sam na em i raitim dispela tok i stret wantaim laik bilong ol man bilong bipo na bilong nau tu. Long wanem yumi olgeta yumi laik bai olgeta pait i ken pinis na bai i no gat pait moa, a? Yumi laik bai olgeta pait i pinis, tasol wok bilong ol man bilong mekim i dai pait em i lus nating. Pait i stap yet, na long nau, taim ol man i pait, ol i save mekim wok long ol samting nogut tru bilong pait em inap bagarapim olgeta manmeri na olgeta samting i stap laip hia long graun.

Bikpela bagarap tru i laik painim ol man, olsem na yumi laik save: Ol wok ol man i bin mekim bilong pasim pait, bilong wanem ol dispela wok i lus nating tasol? Olsem wanem? Ating i mas i gat pait? Bilong wanem i gat pait?

Bilong Wanem Wok Bilong Ol Man i Lus Nating?

Wanpela man bilong raitim tok long ol nius, Gwynne Dyer, em i tok: “Sapos yu stap long wanpela hap i no gat polis long en na olgeta man i gat gan na olgeta i pret, nogut narapela man i kirapim pait long ol, orait bai ol i sutim planti man long gan.” Na em i tok moa olsem: “Long nau olgeta kantri i stap olsem. I no gat polis bilong lukautim olgeta kantri wantaim, olsem na olgeta wan wan kantri i redim ol samting bilong pait, nogut narapela kantri i kirapim pait long ol.”

Em nau, pait i save kamap taim ol man i gat ol samting bilong mekim pait long en, na ol i gat laik long mekim pait. Na olsem dispela tok piksa i makim, sapos i no gat polis, olsem sapos i no gat strongpela lo bilong bosim ol man, orait bai pait i kamap. Tupela man i gat nem long raitim stori bilong ol samting i bin kamap long bipo, em Will na Ariel Durant, ol tu i makim ol dispela samting bilong kamapim pait. Tupela i raitim wanpela buk (The Lessons of History) na ol i tok: ‘Long nau i no gat lo bilong bosim olgeta lain wantaim na i no gat pasin sori, olsem na olgeta lain wan wan i mas redi oltaim long mekim pait bilong sakim narapela lain i laik kirapim pait long ol; na taim bagarap i laik painim wanpela lain, ol i ken mekim wanem wanem samting ol i ting i stret ol i mekim bambai ol i no ken bagarap. Long kain taim olsem ol i no ken tingim ol Tenpela Lo.’

Olsem na wok bilong mekim i dai pait i mas stretim ol dispela samting pastaim bambai dispela wok i ken kamap gutpela. Olsem wanem? I gat wanpela wok ol man i bin kamapim, em ol i ting em i gutpela wok bilong helpim tru ol man, na dispela wok i bin stretim ol dispela samting? Orait, nau yumi ken skelim dispela samting.

No Gat Lo Bilong Bosim Olgeta Lain Wantaim

Ol man i bin mekim planti wok bilong kamapim wanpela oganaisesen i gat strong bilong putim lo na bosim olgeta lain wantaim. Taim Namba Wan Pait Bilong Olgeta Hap i pinis, ol i bin kamapim Lig ov Nesen bilong pasim ol lain man bambai ol i no ken pait moa. Tasol Namba Tu Pait Bilong Olgeta Hap i kirap na dispela oganaisesen i pinis. Long 1945 ol i kamapim Yunaitet Nesen. Ol pris pasto bilong ol misin bilong Krisendom ol i litimapim tru nem bilong Yunaitet Nesen, ol i tok dispela samting tasol i rot bilong kamapim gutaim na pasin sekan long graun. Tasol olsem wanem long wok bilong dispela oganaisesen? Orait, skelim ol dispela samting i bin kamap: “Long dispela taim winim 4 milion ol i insait long 42 kain kain pait. ․․․ Ol dispela pait i bin kilim i dai planti man, inap olsem 1 milion o 5 milion samting.” Wanpela nius (The New York Times) i tok olsem long 1984. Long nau ol man i no bilip moa olsem Yunaitet Nesen inap pasim ol man na pait i no ken kamap. Dispela oganaisesen i stap, tasol ol man i pret yet, nogut namba tri pait bilong olgeta hap o wanpela pait nuklia i kirap.

Pasin Birua i Go Bikpela

Ol oganaisesen kain olsem Yunaitet Nesen ol i no gat strong bilong pasim pait na wanpela as bilong dispela samting em olsem: Ol lain man i givim bel long helpim lain bilong ol yet tasol. Ol i no tingim ol narapela lain o sori long ol; ol i no bihainim ol lo bilong helpim olgeta lain wantaim. Bilong mekim ol samting ol i laik mekim, sampela lain i ting i no gat rong long ol i kilim i dai planti man wantaim, o kilim i dai bikman bilong gavman, o stilim balus, o tromoi nating bom na kilim i dai ol man i no gat asua. Ol bikpela gavman i stap birua birua na planti samting ol i tok ol i mekim bambai lain bilong ol i no ken bagarap, ol dispela samting i subim narapela lain long kirapim pait long ol. Yu ting ol lain man bai pasim bel inap hamas yia o mun moa na ol dispela longlong pasin i no ken kirapim ol long pait? Ol samting i bin kamap long ol ailan Fauklan na long Afganistan na long Grenada na long balus 007 bilong Korea—ol dispela samting klostu kirapim bikpela pait. Orait, yu ting hamas moa kain samting olsem inap kamap na pait i no ken kamap? Tru tumas, ol lain man i tingim ples na lain bilong ol yet na ol i laik bosim ol yet na mekim laik bilong ol yet—ol dispela pasin bilong ol man i pasim rot bilong ol na ol i no inap pinisim pait olgeta.

Ol i Holim Pinis Ol Samting Bilong Pait na Ol i Redi i Stap

Olgeta man i save, ol bikpela gavman i hipim pinis planti bom nogut bilong nuklia inap long kilim i dai olgeta man meri pikinini long graun planti taim. Tasol olsem wanem long ol narapela gavman? Wanpela ripot bilong gavman bilong Amerika i tok, ol lain i stap rabis na i no gat planti wok bisnis, maski ol i no gat mani, tasol insait long 10-pela yia i go pinis ol i bin baim planti samting bilong pait. Ol i bin tromoi 230 bilion kina long baim ol balus bilong pait na ol roket-bom na ol strongpela ka ain samting. Na olsem wanem? Dispela ripot i tok: ‘Ol dispela lain i baim planti planti samting na ol i hatwok long save long olgeta nupela samting ol i bin kisim.’ Maski ol i no gat sampela bom nuklia samting, tasol ol i holim pinis planti narapela samting bilong pait na ol i no pret long mekim wok long en.

I Gat As Bilong Wetim Gutpela Samting i Kamap?

Wok bilong ol man i lus nating na ol i no bin pinisim pait. Olsem na tok bilong Baibel i stret, em i tok: “I no wok bilong man long bosim wokabaut bilong em.” (Jeremaia 10:23, NW) Ol man i laik tru long mekim i dai ol pait, tasol ol i no save long rot bilong mekim. Orait, olsem wanem long dispela tok promis bilong God long “mekim i dai pait long olgeta hap graun”? Em i mekim nating dispela tok na dispela samting i no inap kamap tru? Nogat. Jehova i tok olsem: “Tok i lusim maus bilong mi na i go ․․․ i no ken i kam bek nating long mi na i no bin kamapim wok; nogat.” (Aisaia 55:11, NW) Orait, olsem wanem ol samting bai kamap bilong truim dispela tok promis? I gat wanem as na yumi ken bilip tru olsem God inap mekim dispela wok ol man i lus long mekim?