Rispek na Gutnem Aninit Long Lukaut Bilong God

TAIM Jisas i stap long graun, em i kamapim stret ol pasin bilong Papa bilong em long heven na wei bilong Em long mekim ol samting. Em i tok: “Mi no save mekim wanpela samting long tingting bilong mi yet, nogat. Tasol olsem Papa i bin skulim mi long en, mi save autim. . . . Oltaim mi save mekim ol samting em i laikim.” (Jon 8:28, 29; Kolosi 1:15) Taim yumi skelim pasin Jisas i mekim long ol meri na tingting em i gat long ol, dispela bai helpim yumi long kliagut moa long tingting God i gat long ol meri na samting em i laik ol i mas mekim.

Sampela saveman i skelim stori bilong ol Gutnius na ol i tok, tingting na pasin bilong Jisas long ol meri i narapela olgeta long tingting na pasin bilong ol man long dispela taim bipo. Olsem wanem pasin bilong Jisas i narapela kain? Na bikpela samting moa, yu ting tok bilong em inap helpim ol meri long nau tu long i stap fri?

Jisas i no tingim olsem wok bilong ol meri i bilong inapim tasol laik bilong ol man long mekim maritpasin. Ol lida bilong lotu Juda i ting olsem taim man i toktok wantaim meri, dispela inap kirapim strong bel bilong man long mekim pasin pamuk. Olsem na i tambu long ol meri i toktok wantaim ol man long pablik o wokabaut raun na i no haitim pes long hap laplap. Tasol Jisas i tokim ol man long daunim laik bilong ol yet na mekim pasin long ol meri olsem ol i gat biknem na ol i no ken pasim ol meri long toktok wantaim ol narapela long ol pablik ples.—Matyu 5:28.

Jisas i tok tu olsem: “Man i katim marit na maritim narapela meri, dispela man i mekim pasin adaltri, na em i rongim meri bilong en.” (Mak 10:11, 12) Jisas i sakim pasin em ol hetman bilong lotu Juda i lainim ol man long en olsem ol man i ken katim marit “long olgeta kain samting.” (Matyu 19:3, 9) Dispela tingting olsem man i mekim pasin adaltri em i rongim meri bilong em, dispela em samting planti Juda i no save long en. Ol tisa bilong lotu i ting olsem ol man marit i no inap mekim pasin adaltri; ol i ting ol meri tasol inap mekim pasin adaltri! Wanpela buk i stori long Baibel, i tok: “Taim Jisas i tok long man marit tu i mas bihainim wankain stretpela pasin olsem meri marit, dispela i soim olsem ol meri tu i gat wankain biknem olsem ol man.”

Tok bilong em i helpim yet ol man long nau: Long kongrigesen Kristen bilong ol Witnes Bilong Jehova, ol man na meri i save bung wantaim long taim bilong ol miting. Tasol i no gat wok long ol meri i pret long ol man i lukluk kranki long ol o mekim ol i pilim olsem ol i samting nating, long wanem, ol man Kristen i save was gut bambai ol i ‘mekim tok long ol meri i gat bikpela krismas olsem ol save mekim long mama bilong ol, na mekim tok long ol yangpela meri olsem ol save mekim long ol susa bilong ol na mekim long pasin i klin tru.’—1 Timoti 5:2.

Jisas i lusim haptaim long skulim ol meri. Tingting bilong ol rabai i pasim rot bilong ol meri long skul, tasol Jisas i skulim gut ol meri na kirapim ol long kamapim tingting bilong ol. Jisas i amamas long Maria i ken sindaun na kisim skul, na long dispela rot Jisas i soim olsem wok bilong ol meri i no bilong i stap long haus kuk tasol. (Luk 10:38-42) Ol tok em Jisas i bin skulim Maria long en i helpim tu susa bilong em Marta, na dispela i kamap ples klia long ol tok em Marta i bekim long Jisas bihain long dai bilong Lasarus.—Jon 11:21-27.

Jisas i amamas long harim tingting bilong ol meri. Long taim bilong Jisas, planti meri Juda i bilip olsem bilong ol i ken stap amamas, ol i mas i gat wanpela pikinini man i gat namba, olsem wanpela profet. Taim wanpela meri i singaut na tok: “Dispela mama i karim yu long bel bilong en na givim susu long yu, em i ken amamas!” Dispela i opim rot long Jisas i ken tokim em long samting i gutpela moa. (Luk 11:27, 28) Jisas i helpim em long luksave olsem pasin bilong bihainim tok bilong God em i bikpela samting moa, winim tru ol wok em ol man i tok long ol meri i mas mekim.—Jon 8:32.

Tok bilong em i helpim yet ol man long nau: Ol man i mekim wok tisa insait long kongrigesen Kristen ol i amamas long harim ol bekim samting em ol meri i givim long ol miting bilong kongrigesen. Ol i rispektim ol meri i gat bikpela krismas, long wanem, ol i save “skulim ol arapela long ol gutpela samting” long taim ol i toktok wantaim ol arapela na long pasin bilong ol. (Taitus 2:3) Ol man i bilip tu olsem ol meri inap autim gutnius bilong Kingdom Bilong God long olgeta kain man.—Song 68:11; lukim blok “Yu Ting Aposel Pol i Tambuim Ol Meri Long Toktok?” long pes 9.

Jisas i tingim gut ol meri. Long taim bilong ol man i bin raitim Baibel, ol man i save mekim gut moa long pikinini man, winim pikinini meri. Buk Talmut i kamapim wankain tingting na i tok: “Ol man i gat pikinini man ol i ken amamas, na sori tru long ol man i gat pikinini meri.” Sampela papamama i tingim pikinini meri olsem bikpela hevi—ol i mas painim man long maritim em, givim mani long famili bilong man, na ol i ting meri bai i no inap lukautim ol taim ol i kamap lapun.

Jisas i soim olsem laip bilong wanpela liklik gel i bikpela samting wankain olsem laip bilong wanpela liklik boi—em i kirapim bek pikinini meri bilong Jairus wankain olsem em i bin mekim long pikinini man bilong wido bilong Nain. (Mak 5:35, 41, 42; Luk 7:11-15) Taim Jisas i oraitim pinis wanpela meri “em spirit nogut i givim sik long em inap 18 yia,” em i kolim dispela meri “pikinini bilong Abraham,” em wanpela tok i no stap long ol rait bilong ol Juda. (Luk 13:10-16) Taim Jisas i mekim dispela tok, em i soim olsem dispela meri i wankain long olgeta narapela manmeri, na tu, em i luksave olsem meri i gat strongpela bilip.—Luk 19:9; Galesia 3:7.

Tok bilong em i helpim yet ol man long nau: Wanpela tok bilong Esia i tok: “Wok bilong mekim bikpela long pikinini meri i olsem wok bilong givim wara long gaden bilong neiba.” Ol papamama Kristen i no larim dispela tingting i stiaim ol, ol i mekim gutpela pasin long olgeta pikinini bilong ol, em ol pikinini man na ol pikinini meri wantaim. Ol papamama Kristen i save mekim ol samting na bai pikinini man na pikinini meri wantaim i kisim gutpela skul na gutpela helt.

Jisas i trastim ol meri. Long kot bilong ol Juda, sapos wanpela meri i autim wanpela tok, ol man i save tingim dispela olsem toktok bilong wanpela sleiv. Josifas em wanpela saveman long taim bilong ol aposel, em i tok: “No ken trastim tok bilong ol meri, long wanem, pasin bilong ol meri em long tok pilai tasol.”

Tasol samting Jisas i mekim i narapela kain tru, em i makim ol meri long tokaut long kirap bek bilong em. (Matyu 28:1, 8-10) Ol dispela meri i bin stap na lukim ol man i kilim i dai Bikpela bilong ol na planim em, tasol ol aposel i no bilipim tok bilong ol. (Matyu 27:55, 56, 61; Luk 24:10, 11) Tasol Krais i kirap bek na em i kamap long ol meri pastaim, long dispela rot em i soim olsem i stret long ol meri tu i ken autim tok wankain olsem ol narapela disaipel bilong em.—Aposel 1:8, 14.

Tok bilong em i helpim yet ol man long nau: Long ol kongrigesen bilong ol Witnes Bilong Jehova, ol man husat i gat wok insait long kongrigesen i save harim tingting bilong ol meri na long dispela rot ol i soim olsem ol i tingim gut ol meri. Ol man marit Kristen i save “givim ona” long ol meri bilong ol taim ol i putim gut yau long ol tok ol i kamapim.—1 Pita 3:7; Stat 21:12.

Taim ol man i bihainim pasin bilong Krais, ol i rispektim ol meri na larim ol i stap fri, em samting God i gat laik long en long pastaim tru. (Stat 1:27, 28) Ol man marit Kristen i no bihainim tingting olsem man tasol i stap namba 1, nogat, ol i larim ol stiatok bilong Baibel i stiaim ol na dispela i helpim meri bilong ol long i stap amamas.—Efesus 5:28, 29.

Taim Yelena i kirap stadi long Baibel, man bilong em i save mekim nogut long em, tasol em i no tokaut long dispela samting. Man bilong Yelena i bin kamap bikpela long hap we ol man i save kidnepim meri ol i laik maritim na paitim ol meri. Yelena i tok: “Ol samting mi lainim long Baibel i strongim mi. Mi save olsem i gat wanpela i laikim mi tru na i tingim mi na wari long mi. Mi save tu olsem, sapos man bilong mi i stadi long Baibel, em inap senisim ol pasin em i save mekim long mi.” Dispela samting i kamap tru taim man bilong Yelena i kirap stadi long Baibel na kisim baptais olsem wanpela Witnes Bilong Jehova. Yelena i tok: “Nau em i save bosim gut bel. Mipela i lain long fogivim narapela narapela.” Yelena i tok moa olsem: “Ol stiatok bilong Baibel i bin helpim mi long pilim olsem man bilong mi i nidim mi na em i lukautim mi gut.”—Kolosi 3:13, 18, 19.

Ol narapela tu i gat wankain ekspiriens olsem bilong Yelena. Planti milion meri Kristen i amamas, long wanem, ol wantaim man bilong ol i save wok strong long bihainim ol stiatok bilong Baibel insait long marit bilong ol. Ol i pilim olsem insait long lain Kristen ol narapela i rispektim ol, mekim gut bel bilong ol, na ol i stap fri long mekim ol samting.—Jon 13:34, 35.

Ol man na meri Kristen i luksave olsem ol i gat sin na ol i no gutpela olgeta, olsem na ol i bilong ‘i stap nogut na bagarap.’ Tasol sapos ol i pas gut wantaim gutpela God na Papa bilong ol Jehova, ol inap “lusim dispela kalabus bilong bagarap” na “kisim dispela pasin bilong i stap fri i nambawan tru olsem bilong ol pikinini bilong God.” Dispela em gutpela samting tru ol man na meri wantaim bai kisim aninit long lukaut bilong God!—Rom 8:20, 21.