Ol Witnes Bilong Jehova i Save Yusim Ol Meri Long Skulim Ol Narapela?

Yes, long olgeta hap bilong graun i gat sampela milion meri em ol i Witnes Bilong Jehova na ol i save skulim ol narapela. Ol i planti tru na ol i save autim gutnius bilong Kingdom Bilong God. Buk Song 68:11 i tok profet olsem: “Bikpela i givim tok long ol manmeri bilong en, na planti meri i go autim dispela tok.”

Tasol wok bilong skulim ol narapela em ol meri Witnes Bilong Jehova i mekim, dispela i no wankain long wok em ol pasto meri bilong ol narapela lotu i save mekim. I gat sampela samting i mekim na wok bilong ol i narapela kain tru. Wanem ol samting i mekim na ol i narapela kain?

Ol manmeri ol i save skulim i narapela narapela. Ol pasto meri bilong lotu Kristendom, ol i save mekim wok lida insait long ol kongrigesen bilong ol, na lain ol i save skulim em ol manmeri insait long kongrigesen yet. Long ol meri Witnes Bilong Jehova, lain ol i save skulim em ol manmeri ausait long kongrigesen, olsem ol pablik, na ol manmeri ol i bungim taim ol i autim tok long ol haus na long ol narapela hap.

Narapela samting i mekim na ol meri Witnes Bilong Jehova i narapela kain long ol narapela lotu, em wok ol i mekim insait long kongrigesen. Ol pasto meri bilong Kristendom na ol narapela lotu, ol i save lukautim ol manmeri insait long kongrigesen na skulim ol long ol bilip bilong lotu bilong ol. Tasol ol meri Witnes Bilong Jehova, ol i no save skulim ol manmeri insait long kongrigesen taim ol man husat i baptais pinis ol i stap. Ol man i gat wok tisa, ol tasol i save skulim ol narapela insait long kongrigesen.—1 Timoti 3:2; Jems 3:1.

Baibel i tok ol man tasol i gat wok bilong lukautim kongrigesen. Tingim pasin bilong aposel Pol taim em i raitim pas long wanpela wanwok wasman, em Taitus olsem: “Mi bin lusim yu long Krit bai yu ken stretim ol samting i no stret na makim ol hetman long olgeta taun.” Pol i tok tu olsem ol man husat i kisim wok wasman em ol man we “ol arapela i no inap sutim tok long ol, na ol i mas i stap man bilong wanpela meri tasol.” (Taitus 1:5, 6) Pol i bin mekim wankain tok long pas em i bin raitim long Timoti olsem: “Sapos wanpela man i laik kamap wasman, em i laik kisim gutpela wok. Olsem na wasman i mas stap olsem man i no gat asua, na man bilong wanpela meri tasol, . . . na em i mas i gat save long skulim ol man.”—1 Timoti 3:1, 2.

Bilong wanem wok bilong lukautim kongrigesen em wok ol man tasol i mas holim? Pol i tok: “Mi no orait long ol meri i skulim o bosim ol man, nogat, ol i mas pasim maus. Long wanem, God i bin wokim Adam pastaim, na bihain em i wokim Iv.” (1 Timoti 2:12, 13) God i bin wokim man pastaim na bihain em i wokim meri, na dispela i kamapim klia as na God i givim wok bilong skulim narapela na wok wasman long ol man.

Ol wokboi bilong Jehova em ol i save autim gutnius, ol i bihainim eksampel bilong Lida bilong ol, Jisas Krais. Disaipel Luk i stori long wok autim tok bilong Jisas olsem: “Jisas i raun long ol bikpela taun na liklik taun na em i wok long autim gutnius bilong Kingdom bilong God.” Bihain Jisas i salim ol disaipel bilong em long i go mekim wankain wok: “Ol i raun long olgeta wan wan liklik taun, na ol i autim gutnius.”—Luk 8:1; 9:2-6.

Long nau, ol wokboi bilong Jehova em ol man na meri wantaim, olgeta i save wok wantaim bilong bihainim tok bilong Jisas olsem: “Ol bai autim dispela gutnius bilong Kingdom long olgeta hap bilong graun na bai olgeta lain man i ken harim, na bihain long dispela, pinis bai kamap.”—Matyu 24:14.