Wai na Ol Natsi i Laik Pinisim Wanpela Lain Olgeta? Wai na God i No Stopim Dispela Samting?

Planti man husat i mekim ol dispela askim ol i karim bikpela pen na hevi long wanpela long famili i dai, na ol i laik kisim bekim bilong ol dispela askim, na tu, ol i laik kisim tok bilong mekim isi bel bilong ol. Ol narapela i tingim pasin bilong gavman Natsi long kilim i dai wanpela lain olgeta em i pasin nogut tru, na ol i hatwok long bilip long God.

Stori tru: Ol man i gat strongpela bilip ol i laik save wai na God i larim pasin nogut i stap. Olsem, profet Habakuk i bin askim God: “Bilong wanem yu larim pasin pait, pasin bilong sakim lo, pasin raskol, na pasin bilong mekim nogut long narapela i kamap long olgeta hap?” (Habakuk 1:3, Contemporary English Version) God i no krosim Habakuk, nogat, em i putim ol askim Habakuk i bin mekim long Baibel bilong olgeta man i ken ritim.

Stori tru: God i heitim tru pasin nogut na pen na hevi dispela i kamapim. (Provep 6:16-19) Long taim bilong Noa, “bel bilong [God] i hevi tru” bikos pasin bilong pait na bagarapim man i go bikpela long olgeta hap bilong graun. (Stat 6:5, 6) Tru tumas, God i pilim tu bikpela pen long pasin nogut lain Natsi i kamapim long kilim i dai planti manmeri.​—Malakai 3:6.

Stori tru: Long taim bilong ol Kristen bilong pastaim, God i no larim ol Rom i bagarapim Jerusalem olgeta. (Matyu 23:37–24:2) Kirap long dispela taim, God i no makim stret wanpela lain bilong mekim gut long ol, o bilong givim panismen long ol, nogat. Long tingting bilong God, “ol Juda na ol Grik ol i wankain” tasol.​—Rom 10:12, Buk Baibel.

Stori tru: God i no as bilong ol pen na hevi, tasol sampela taim em i larim ol dispela hevi i stap liklik taim.​—Jems 1:13; 5:11.

God i larim ol Natsi i kilim i dai planti milion manmeri olsem em i larim pen na hevi i stap: em bilong stretim bikpela tok i bin kamap long bipo long stretpela pasin bilong em long mekim wok bos. Baibel i tok klia olsem long nau Devil i bosim dispela graun, i no God. (Luk 4:1, 2, 6; Jon 12:31) Baibel i kamapim i tupela risen na God i larim dispela pasin bilong ol Natsi i kamap.

1. God i wokim yumi na givim yumi fridom long makim samting yumi yet i laik mekim. God i tokim fes man na meri, Adam na Iv, long samting em i laik ol i mas mekim, tasol em i no fosim ol long bihainim dispela tok. Ol yet i ken wokim disisen long makim wanem samting i gutpela, na wanem samting i nogut, na ol rong disisen ol i mekim—na ol wankain disisen ol man bilong bipo na i kam inap long nau i save mekim—i givim bikpela hevi long olgeta man. (Stat 2:17; 3:6; Rom 5:12) Olsem buk Statement of Principles of Conservative Judaism i tok: “Planti pen na hevi i kamap long graun bikos yumi no mekim gut wok long fridom God i givim long yumi.” God i no pasim yumi long yusim fridom bilong yumi, nogat, tasol em i givim taim long ol man yet i ken traim long stretim ol samting na em i no bosim ol.

2. God inap long stretim bek ol hevi em wok nogut bilong ol Natsi i kamapim, na em bai mekim olsem. God i tok promis long kirapim bek planti milion manmeri i bin dai, na tu, ol man em ol Natsi bin kilim ol i dai. Na em bai pinisim tu bel hevi em ol manmeri i bin abrusim dai long han bilong ol Natsi i bin pilim taim ol i tingim bek ol dispela samting nogut. (Aisaia 65:17; Aposel 24:15) God i laikim tru ol manmeri olsem na em bai inapim ol dispela tok promis bilong em.​—Jon 3:16.

Planti manmeri i kisim hevi long han bilong ol Natsi na sampela i abrusim dai, ol i holimpas bilip bilong ol na stap amamas bikos ol i kliagut long risen na God i larim pasin nogut i stap na ol i save long laik bilong em long stretim bek ol hevi dispela i kamapim.