Baibel i Save Senisim i Stap Bilong Man
BILONG WANEM wanpela meri i winim pinis 60 krismas i lusim pasin bilong lotuim ol imis? Wanem samting i kirapim wanpela pris bilong lotu Sinto long lusim wok long tempel na kamap wanpela wokman Kristen? Olsem wanem wanpela meri inap karim bel hevi long papamama i bin lusim em na ol narapela i adoptim em taim em i bon? Skelim tok ol dispela manmeri i mekim.
“Mi no stap moa olsem wokmeri bilong ol imis.”—ABA DANSOU
YIA MI BON: 1938
KANTRI: BENIN
BIPO: MERI BILONG LOTUIM OL IMIS
LAIP BILONG MI LONG BIPO: Mi kamap bikpela long So-Tchahoué, wanpela viles i stap long ples tais klostu long wanpela raunwara. Ol manmeri bilong viles i save kisim pis, lukautim ol bulmakau, meme, sipsip, pik, na ol pisin. I no gat ol rot long dispela ples, olsem na ol manmeri i save yusim ol bot na kanu long i go i kam. Ol i save wokim haus long ol diwai na gras, na sampela i wokim long ol brik. Planti manmeri long dispela hap ol i stap rabis. Maski i olsem, i no gat planti pasin raskol olsem i stap long ol biktaun.
Taim mi liklik, Papa i salim mi na susa bilong mi i go long wanpela skul bilong lotuim ol spirit nogut we ol i mekim ol pasin bilong makim mipela long i go insait long dispela bilip bilong ol tumbuna. Taim mi kamap bikpela, mi bihainim pasin bilong ol Yoruba na mi kisim Dudua (Oduduwa) olsem god bilong mi. Mi wokim wanpela haus bilong dispela god, na oltaim mi save sakrifaisim ol yam, oil pam, demdem, kakaruk, ol pisin balus, na sampela narapela animal. Mi save tromoi bikpela mani long mekim ol dispela sakrifais; planti taim dispela i pinisim olgeta mani bilong mi.
BAIBEL I SENISIM I STAP BILONG MI: Taim mi kirap stadi long Baibel, mi kisim save olsem Jehova wanpela tasol em i God tru. Mi kisim save tu olsem em i no orait long pasin bilong lotuim ol imis. (Kisim Bek 20:4, 5; 1 Korin 10:14) Mi luksave long samting mi mas mekim. Olsem na mi tromoi olgeta imis na klinim haus bilong mi na rausim olgeta samting bilong lotuim ol imis. Mi lusim pasin bilong toktok wantaim ol glasman, na mi no insait moa long ol pasin bilong ples na ol kastam bilong planim man em Baibel i no orait long en.
Em i no isi long mi—wanpela meri i winim pinis 60 krismas—long mekim ol dispela senis. Ol pren, ol wanblut, na ol neiba, ol i birua na tok bilas long mi. Tasol mi beten askim Jehova long givim strong long mi long mekim ol samting i stret. Tok bilong Sindaun 18:10 i mekim gut bel bilong mi, em i tok: “Bikpela i olsem wanpela strongpela haus. Ol stretpela man i ken ran i go long en na i stap gut.”
Narapela samting i helpim mi, em pasin bilong go oltaim long ol miting bilong ol Witnes Bilong Jehova. Long ol dispela miting mi pilim tru pasin laikim Kristen na mi amamas long lukim olsem ol dispela manmeri i save bihainim ol stretpela lo bilong Baibel. Samting mi lukim i kirapim mi long bilip tru olsem ol Witnes Bilong Jehova i lotu tru long God.
GUTPELA SAMTING I PAINIM MI: Pasin bilong bihainim ol stiatok bilong Baibel i helpim mi long pas gut moa wantaim ol pikinini bilong mi. Na tu, mi pilim olsem wanpela hevi mi bin karim i no stap moa. Mi bin westim nating ol samting bilong mi long ol imis i no gat laip na i no helpim mi liklik. Nau mi lotuim Jehova, em Man husat inap tru long stretim olgeta hevi bilong yumi. (Revelesen 21:3, 4) Mi amamas tru long mi no stap moa olsem wokmeri bilong ol imis, nogat, nau mi wokmeri bilong Jehova! Jehova i save lukautim mi na mi stap bel isi.
“Mi bin wok long painim God kirap long taim mi liklik yet.”—SHINJI SATO
YIA MI BON: 1951
KANTRI: JAPAN
BIPO: PRIS BILONG LOTU SINTO
LAIP BILONG MI LONG BIPO: Mi kamap bikpela long wanpela liklik taun long provins Fukuoka. Papamama bilong mi ol i save tingim tru lotu, na taim mi liklik yet ol i skulim mi long lotuim ol god bilong ol Sinto. Taim mi yangpela, planti taim mi save tingting olsem God bai kisim bek mi na mi gat laik tru long helpim ol manmeri i gat hevi. Mi tingim wanpela taim long elementri skul, tisa i askim ol sumatin long wanem samting ol i laik mekim taim ol i kamap bikpela. Ol wanklas bilong mi i tingting strong long samting ol i laik mekim, olsem kamap saientis samting. Mi tok olsem mi gat bikpela laik long mekim wok bilong God. Olgeta i lap long mi.
Bihain long pinisim haiskul, mi go long wanpela skul bilong kamap tisa bilong lotu. Taim mi wok long kisim dispela skul, mi bungim wanpela pris bilong lotu Sinto husat i wok long yusim fri taim bilong em long ritim wanpela buk i gat blakpela karamap. Wanpela taim em i askim mi: “Sato, yu save dispela buk em i wanem samting?” Mi bin luksave long karamap bilong buk, olsem na mi tok, “Em Baibel.” Em i tok: “Olgeta man husat i laik kamap pris bilong lotu Sinto i mas ritim dispela buk.”
Wantu mi kirap i go baim wanpela Baibel. Mi putim Baibel long nambawan gutpela hap long kabot bilong mi na lukautim gut tru. Tasol mi no save painim taim bilong ritim, long wanem, mi bisi tru long skul na ol skul wok. Taim mi pinis long skul, mi kirap wok olsem pris long wanpela tempel bilong lotu Sinto. Samting mi gat laik tru long mekim taim mi liklik, dispela i kamap tru.
Tasol i no longtaim na mi luksave olsem wok bilong mi olsem pris bilong lotu Sinto i no wankain olsem samting mi bin tingting long en. Planti pris i no save laikim tumas o tingim ol narapela man. Na tu, planti i no gat strongpela bilip. Wanpela bosman bilong mi i tokim mi: “Sapos yu laik mekim gut wok long hia, yu mas toktok tasol long olkain savetingting bilong dispela graun. I tambu long toktok long bilip.”
Kain tok olsem i mekim na mi no amamas long lotu Sinto. Maski mi wok yet long tempel, mi kirap skelim ol narapela lotu. Tasol i no gat wanpela lotu i skulim ol man long samting i gutpela moa. Taim mi wok long skelim planti lotu moa, dispela i mekim mi bel hevi moa yet. Mi pilim olsem i no gat tok i tru long olgeta lotu.
BAIBEL I SENISIM I STAP BILONG MI: Long 1988, mi bungim wanpela man bilong lotu Buda na em i kirapim mi long ritim Baibel. Mi tingim dispela pris bilong lotu Sinto husat i bin kirapim mi long mekim wankain samting inap sampela yia i go pinis. Mi tingting long bihainim dispela tok. Taim mi kirap ritim Baibel, wantu mi laikim tru ol tok bilong en. Sampela taim mi bin ritim Baibel long nait olgeta inap long san bilong moningtaim i kam insait long windo.
Ol tok mi ritim i kirapim laik bilong mi long beten long dispela God bilong Baibel. Mi kirap mekim Beten Bilong Bikpela i stap long Matyu 6:9-13. Mi save kolim dispela beten long olgeta 2-pela 2-pela aua—na long taim mi wok long tempel bilong ol Sinto tu.
Mi gat planti askim long samting mi ritim. Long dispela taim mi marit pinis, na mi save olsem ol Witnes Bilong Jehova i save skulim ol man long Baibel, long wanem, ol i bin visitim meri bilong mi long bipo. Mi painim pinis wanpela Witnes na mi givim planti askim long em. Mi kirap nogut taim em i yusim Baibel long bekim olgeta askim. Em i stretim rot bilong ol Witnes i ken stadi wantaim mi long Baibel.
Liklik taim bihain, mi kirap go long ol miting bilong ol Witnes Bilong Jehova. Pastaim mi no luksave, tasol namel long ol Witnes i gat sampela em bipo mi bin kros tru long ol. Maski i olsem, ol i toktok gut wantaim mi na amamas long mi.
Long ol dispela miting, mi kisim save olsem God i laik ol man marit i mas mekim pasin laikim na givim ona long ol wanfamili bilong ol. I kam inap long dispela taim, mi bin tingim tumas wok bilong mi olsem pris na mi no tingim meri na tupela pikinini bilong mi. Mi luksave olsem mi bin putim gut yau long tok bilong ol man i kam long tempel bilong lotu, tasol i no gat wanpela taim mi bin putim yau long tok bilong meri bilong mi.
Taim mi wok long stadi i go, mi kisim planti save long Jehova na dispela i helpim mi long i go klostu long em. Mi pilim tru tok bilong Rom 10:13, em i tok: “Olgeta manmeri i singaut long nem bilong Jehova, em bai kisim bek ol.” Mi bin wok long painim God kirap long taim mi liklik yet, na nau mi painim em pinis!
Mi pilim olsem mi no bilong dispela tempel moa. Pastaim mi wari olsem ol narapela bai i gat wanem tingting sapos mi lusim lotu Sinto. Tasol long olgeta taim mi bin tokim mi yet olsem mi bai lusim dispela lotu sapos mi painim pinis God tru. Olsem na long 1989 mi bihainim maus bilong bel bilong mi. Mi lusim tempel na mi putim mi yet long han bilong Jehova.
I hatwok tru long lusim tempel. Ol bos bilong mi i krosim mi na ol i strong long mi mas stap bek. Tasol samting i hatwok moa em long tokim papamama long disisen bilong mi. Taim mi wok long i go long haus bilong ol, mi tingting planti tru na dispela i mekim bros bilong mi pen na ol lek bilong mi i no gat strong moa! Mi stop planti taim long rot na mi beten long Jehova i ken givim strong long mi.
Taim mi kamap long haus bilong papamama, pastaim mi pret tru long kamapim samting mi laik stori long en. Planti aua i lus. Mi beten planti tru, na bihain mi tokim papa bilong mi long olgeta samting. Mi tokim em olsem mi painim pinis God tru, olsem na mi lusim lotu Sinto bambai mi ken mekim wok bilong Em. Papa i kirap nogut tru na em i bel hevi. Ol narapela wanblut i kam long haus na ol i laik senisim tingting bilong mi. Mi no laik bagarapim bel bilong famili bilong mi, tasol long wankain taim, mi save olsem pasin bilong mekim wok bilong Jehova em i stretpela samting mi mas mekim. Bihain, famili bilong mi i rispektim mi long ol disisen mi mekim.
Tru, mi no go moa long tempel, tasol mi mas wok yet long senisim tingting bilong mi. Laip olsem wanpela pris i pas strong long tingting bilong mi. Mi wok strong long lusim tingting long en, tasol long olgeta hap mi lukluk long en, i gat ol samting i kirapim mi long tingim laip bilong mi long bipo.
Tupela samting i helpim mi long lusim tingting olgeta long dispela laip bilong mi long bipo. Namba wan samting, mi sekim gut olgeta samting insait long haus na mi rausim olgeta samting bilong olpela lotu bilong mi. Na mi kukim olgeta dispela samting—ol buk, ol piksa, na ol narapela samting i gat bikpela pe. Namba tu samting, mi painim planti rot bilong bung wantaim ol Witnes. Pasin pren na gutpela sapot bilong ol i helpim mi tru. Isi isi, mi wok long lusim tingting long ol samting mi save mekim bipo.
GUTPELA SAMTING I PAINIM MI: Mi no bin tingim tumas meri na ol pikinini bilong mi, dispela i mekim na ol i pilim olsem ol i stap wanpis tru. Tasol taim mi wok long lusim haptaim wantaim ol—em samting Baibel i skulim ol man marit long mekim—mipela i pas gut wantaim. Bihain, meri bilong mi i joinim mi long mekim wok bilong Jehova. Nau mitupela meri, pikinini man, na pikinini meri wantaim man bilong em, mipela olgeta i insait long lotu i tru.
Taim mi tingim bek laik bilong mi long mekim wok bilong God na helpim ol narapela manmeri, mi luksave olsem mi kisim pinis olgeta samting mi wok long painim—na planti samting moa. Mi laik tok tenkyu tru long ol gutpela samting Jehova i givim long mi.
“Mi pilim olsem mi sot long wanpela samting.”—LYNETTE HOUGHTING
YIA MI BON: 1958
KANTRI: SAUT AFRIKA
BIPO: BEL HEVI OLSEM PAPAMAMA TRU I LUSIM MI
LAIP BILONG MI LONG BIPO: Mi bon long Germiston, wanpela taun i gat main we ol man i gat gutpela sindaun na i no gat planti pasin raskol. Papamama bilong mi i pilim olsem ol i no inap lukautim mi, olsem na ol i givim mi long ol narapela bilong adoptim mi. Taim mi gat 14 de tasol, tupela marit i adoptim mi na ol i kamap olsem mama na papa bilong mi. Tasol taim mi kisim save olsem ol i bin adoptim mi, mi hatwok long daunim bel hevi olsem papamama tru i bin lusim mi. Mi kirap pilim olsem mi no pikinini tru bilong tupela waspapamama na ol i no pilim tru tingting bilong mi.
Taim mi gat 16 krismas, mi save go long ol ba we mi wantaim ol pren bilong mi i save danis na harim ol man i pilaim ol laiv musik. Taim mi gat 17 krismas, mi kirap long smok. Mi laik kamap bun nating olsem ol model mi lukim long ol edvetaismen bilong smok. Taim mi gat 19 krismas, mi kirap wok long Johannesburg, na wantu tasol mi kirap bung wantaim ol bikhetlain. I no longtaim na mi tok swea, smok planti tru, na dring planti alkohol long ol wiken.
Maski i olsem, mi gat strong long mekim planti samting. Mi save mekim ol eksasais, pilai skwas, na soka bilong ol meri. Na tu, mi givim bel tru long wok bilong mi, na mi kamap savemeri long olkain wok bilong kompiuta. Dispela i mekim na mi gat planti mani na gutpela sindaun, na planti man i ting olsem laip bilong mi i gutpela tru. Tasol tru tru, mi no stap amamas—mi no gat helpim na mi bel hevi long laip bilong mi. Mi pilim olsem mi sot long wanpela samting.
BAIBEL I SENISIM I STAP BILONG MI: Taim mi kirap stadi long Baibel, mi kisim save olsem Jehova em i God bilong pasin laikim. Mi kisim save tu olsem em i kamapim dispela pasin laikim long rot bilong givim Baibel long yumi. I olsem em i raitim wanpela pas long yumi wan wan bilong stiaim wokabaut bilong yumi. (Aisaia 48:17, 18) Mi luksave olsem sapos mi laik kisim helpim long gutpela pasin bilong Jehova long stiaim mi, mi mas mekim sampela bikpela senis long laip bilong mi.
Wanpela samting mi mas senisim em ol lain mi save poromanim. Mi pilim tru tok bilong Sindaun 13:20, em i tok: “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.” Dispela stiatok i kirapim mi long lusim ol olpela pren bilong mi na kisim ol nupela pren namel long ol Witnes Bilong Jehova.
Samting i hatwok tru long mi mekim em long lusim pasin bilong smok; em samting mi bin kalabus tru long en. Taim mi lusim pinis dispela pasin, i gat narapela hatwok mi mas winim. Mi lusim smok na skin bilong mi i go patpela, mi putim 13.6 kilo moa! Dispela i mekim na mi pilim olsem mi luk nogut tru, na mi wok strong inap 10-pela yia bilong lusim ol dispela ekstra kilo. Tasol mi save olsem pasin bilong lusim smok em stretpela samting mi mekim. Mi beten long Jehova long olgeta taim, na em i givim strong long mi long winim dispela hatwok.
GUTPELA SAMTING I PAINIM MI: Nau mi gat gutpela helt moa. Na tu, mi amamas long ol samting mi holim pinis—mi no wok strong moa long painim ol amamas em wok mani, biknem, na mani kago i promis long kamapim, nogat. Mi amamas long tokim ol narapela man long ol tok i tru bilong Baibel. Dispela i mekim na 3-pela wanwok bilong mi long bipo, ol i mekim wok bilong Jehova wantaim mi na man bilong mi. Paslain long ol waspapamama bilong mi i dai, mi bin tokim ol long gutpela tok promis bilong Baibel long ol man i dai pinis ol bai kirap bek long wanpela paradais long graun.
Pasin bilong i go klostu long Jehova i helpim mi long karim bel hevi bilong papamama tru i bin lusim mi. Jehova i mekim na mi pilim olsem mi insait long wanpela gutpela famili wanbilip i stap wanbel long olgeta hap. Namel long ol mi gat planti mama, papa, brata, na susa.—Mak 10:29, 30.
[Piksa long pes 12]
Mi pilim tru pasin laikim Kristen namel long ol Witnes Bilong Jehova
[Piksa long pes 13]
Tempel bilong lotu Sinto we mi bin lotu long en