Mining Bilong Sampela Nem

Wanpela meri Itiopia i karim wanpela pikinini man. Tasol amamas bilong em i pinis taim em i lukim pikinini i no meknais liklik. Taim bubu meri i kisim bodi i go bilong wasim, pikinini i meknais na pulim win na krai! Mining bilong nem bilong papa bilong bebi em “Mirakel,” olsem na papamama i bungim dispela nem wantaim narapela tok i kam long tok Amharik na kolim pikinini, Wanpela Mirakel i Kamap.

Long Barundi, wanpela yangpela man i ranawe long ol soldia i laik kilim em i dai. Taim em i hait i stap long wanpela gaden, em i tok promis olsem sapos God i lukautim em, em bai kolim fesbon bilong em Manirakiza, mining bilong en “God Em i Seivia.” Dispela man i amamas tru long em i stap laip, na faipela yia bihain em i givim dispela nem long fesbon bilong em.

PASIN bilong kolim pikinini long wanpela nem i gat wanpela mining stret bilong en, em wanpela pasin i bin i stap bipo yet. Long Baibel i gat planti nem olsem, inap sampela handet. Taim yu kliagut long mining bilong ol nem, dispela bai helpim yu long amamas long ritim Baibel. Skelim sampela eksampel.

Ol Nem Long Ol Skripsa Hibru

Namel long ol namba wan lain em Baibel i kolim nem bilong ol, em dispela nem Set, mining bilong en “Givim.” Mama bilong Set, em Iv, i stori long as na em i givim dispela nem. Em i tok: “God i givim narapela pikinini long mi bilong kisim ples bilong Abel, long wanem, Kein i bin kilim em i dai.” (Stat 4:​25) Tumbuna pikinini bilong Set, Lamek, em i kolim pikinini man bilong em, Noa, mining bilong en “Malolo.” Lamek i tok as na em i kolim em long dispela nem, i olsem: “Bipo Bikpela i bin mekim strongpela tok bilong bagarapim graun na mipela i mas hatwok tru long mekim kaikai i kamap gut. Tasol dispela pikinini bai i mekim kaikai i kamap long graun na bai yumi malolo liklik long hatwok bilong yumi.”​​—⁠Stat 5:​29.

God yet i bin senisim nem bilong sampela man na meri taim em i laik tok profet long wanpela samting. Em i senisim nem Abram, mining bilong en “Papa i Gat Biknem,” na kolim em Abraham, mining bilong en “Papa Bilong Planti Lain.” Olsem nem bilong em i makim, Abraham i kamap tumbuna bilong planti lain manmeri. (Stat 17:​5, 6) Tingim tu meri bilong Abraham, Sarai, mining bilong en “Tok Pait.” Ating em i amamas tru taim God i givim nupela nem long em na kolim em “Sara,” mining bilong en “Prinses,” na i makim olsem em bai kamap tumbuna meri bilong sampela king.​​—⁠Stat 17:​15, 16.

Na tu, God yet i givim nem long sampela pikinini. Em i tokim Abraham na Sara long kolim nem Aisak long pikinini bilong ol, mining bilong en “Lap.” Oltaim dispela nem bai kirapim tupela long tingim olsem ol i bin lap taim ol i harim tok olsem ol bai kamapim wanpela pikinini man taim ol i lapun pinis. Taim Aisak i go bikpela na i kamap wanpela gutpela wokman bilong God, ating nem bilong em i wok yet long mekim Abraham na Sara i amamas na lap liklik.​​—⁠Stat 17:​17, 19; 18:​12, 15; 21:⁠6.

I gat wanpela narapela as na tambu bilong Aisak, em Resel, i givim nem long laspela pikinini bilong em. Taim Resel i laik i dai, em i kolim em Benoni, mining bilong en “Pikinini Mi Karim Wantaim Planti Pen.” Bihain, man bilong em Jekop i kolim em Benjamin, mining bilong en “Pikinini Bai i Gat Biknem.” Dispela nem i makim tu olsem em bai givim sapot long narapela.​​—⁠Stat 35:​16-​19; 44:⁠20.

Sampela taim, nem em narapela i givim long narapela o long em yet, em i stret wantaim lukluk bilong man i kisim dispela nem. Olsem: Aisak na Rebeka i kamapim wanpela pikinini i gat planti gras i ret tru, olsem na ol i givim nem Iso long em. Bilong wanem? Long tok Hibru, mining bilong nem Iso em “Planti Gras.” (Stat 25:25) Long Buk Rut, yumi ritim stori bilong Naomi em i gat tupela pikinini man, nem bilong ol, Malon na Kilion. Mining bilong nem Malon, em “Sikman,” na mining bilong nem Kilion em “Skin i No Gat Strong.” Baibel i no tokaut olsem tupela i kisim nem bilong ol taim ol i bon o bihain long en, tasol ating ol dispela nem i stret, long wanem, tupela i dai taim ol i stap yangpela yet.​​—⁠Rut 1:⁠5.

Narapela, em pasin bilong senisim nem. Taim Naomi i go bek long Betlehem, em i no gat wanpela samting, long wanem, man bilong em wantaim tupela pikinini man bilong em i dai pinis. Dispela i mekim na em i no laik holim moa dispela nem Naomi, mining bilong en “Belgut.” Em i tok: “Yupela i no ken kolim mi Naomi, em i olsem meri bilong belgut. Nogat. God I Gat Olgeta Strong i bin mekim nogut long mi, olsem na yupela i mas kolim mi Mara [mining bilong en, “Bel Nogut”].”​​—⁠Rut 1:​20, 21.

Na narapela, em pasin bilong kolim pikinini long wanpela nem bilong tingim wanpela bikpela samting i bin kamap. Mining bilong nem bilong profet Hagai, em “Mama i Karim Long Bikpela De.”a

Ol Nem Long Taim Bilong Ol Kristen

Mining bilong nem Jisas i makim bikpela wok em bai mekim. Paslain long em i bon, God i tokim wanpela ensel long tokim papamama bilong em olsem: “Yu mas kolim nem bilong en Jisas,” mining bilong dispela nem em “Jehova i Kisim Bek.” Wanem as na em i kisim nem olsem? Ensel i tokim Josep: “Em bai i lusim sin bilong ol manmeri bilong en na kisim bek ol.” (Matyu 1:​21) Taim Jisas i kisim baptais na holi spirit i makim em, ol i bungim dispela nem Jisas wantaim wanpela biknem Hibru, “Mesaia.” Long tok Grik, dispela biknem em “Krais.” Mining bilong tupela biknem em “Man God i Makim.”​​—⁠Matyu 2:⁠4.

Jisas yet i kolim sampela disaipel bilong em long ol nem i makim pasin bilong ol. Em i kolim Saimon long nem Sifas, em wanpela nem i kam long tok Aram, mining bilong en, “Ston.” Dispela nem Sifas long tok Grik em “Pita.” (Jon 1:​42) Jisas i kolim tupela brata wanblut, Jems na Jon, olsem “Boanerges,” mining bilong en, “Ol man i olsem klaut i pairap.”​​—⁠Mak 3:​16, 17.

Ol disaipel bilong Jisas ol tu i bihainim pasin bilong givim narapela nem. Wanpela em disaipel Josep. Ol aposel i givim narapela nem Barnabas long em, mining bilong en “Man bilong strongim bel.” Barnabas i bihainim mining bilong dispela nem, na em i save strongim bel bilong planti man.​​—⁠Aposel 4:​34-​37; 9:​27; 15:​25, 26.

Nem Bilong Yu i Bikpela Samting

Taim mama i karim yumi, yumi no makim nem yumi kisim. Tasol yumi kisim gutnem o nogat, em samting yumi yet tasol inap makim. (Sindaun 20:11) Askim yu yet: ‘Sapos Jisas o ol aposel inap mekim, ol bai givim wanem nem long mi? Wanem nem i gutpela bilong makim nambawan pasin bilong mi?’

I stret yumi tingim gut dispela askim. Bilong wanem? Saveman King Solomon i tok: “Sapos ol man i ting yu gutpela man na ol i givim biknem long yu, orait dispela i winim tru olgeta mani samting bilong ol maniman.” (Sindaun 22:⁠1) Tru tumas, sapos yumi kisim gutnem long komiuniti yumi stap long en, yumi holim wanpela gutpela samting tru. Tasol samting i bikpela samting moa em olsem: Sapos yumi kisim gutnem long ai bilong God, bai yumi kisim samting bilong i stap oltaim oltaim. Long wanem rot? God i tok promis olsem em bai raitim long “wanpela buk” nem bilong ol man i stap aninit long em, na em bai givim laip i stap oltaim oltaim long ol.​​—⁠Malakai 3:​16; KTH 3:5; 20:​12-​15.

[Futnot]

[Rait long pes 15]

Wanem nem inap stret long pasin bilong mi?

[Blok/Piksa long pes 14]

Emanuel Em i Husat?

Nem bilong sampela man long Baibel i gat tok profet long en na i makim wok em ol dispela man bai mekim. Olsem: Profet Aisaia i tok: “Wanpela yangpela meri i gat bel, na bai em i karim wanpela pikinini man na kolim nem bilong en Emanuel.” (Aisaia 7:​14) Mining bilong dispela nem em “God i Stap Wantaim Yumi.” Sampela man bilong skelim tok bilong Baibel ol i tok, namba wan truim bilong dispela tok profet i makim wanpela king bilong Israel o wanpela pikinini man bilong Aisaia. Tasol tok bilong Matyu, man bilong raitim Gutnius, i soim olsem tok profet bilong Aisaia i bin kamap tru olgeta long Jisas.​​—⁠Matyu 1:​22, 23.

Sampela man i bin tok olsem taim Baibel i kolim Jisas olsem Emanuel, dispela i makim olsem Jisas i God. Tasol sapos olsem, orait yumi ken tok yangpela man Elihu, em i mekim gut bel bilong Jop na i stretim em, em tu i God. Bilong wanem yumi ken tok olsem? Long wanem, mining bilong nem Elihu i olsem, “Em i God Bilong Mi.”

Jisas i no tok em yet i God, nogat. (Jon 14:28) Tasol pasin bilong Jisas i bihainim stret pasin bilong Papa bilong em, na em inapim olgeta promis God i bin mekim bilong Mesaia. (Jon 14:9; 2 Korin 1:​20) Nem Emanuel i makim stret wok bilong Jisas olsem Mesaia, em wanpela tumbuna pikinini bilong Devit, na man i kamapim klia olsem God i save stap wantaim ol man i lotu long Em.

[Piksa]

EMANUEL “God i Stap Wantaim Yumi”

[Blok/Piksa long pes 15]

Nambawan Gutpela Nem Tru

Nem bilong God i stap olsem 7,000 taim long Baibel. Fopela leta Hibru יהוה i makim nem bilong God, na long Tok Pisin ol i save raitim olsem “Jehova.” Wanem mining bilong dispela nem? Taim Moses i askim God long dispela nem, Jehova i tok: “Bai Mi Kamap wanem wanem kain mi yet mi laikim.” (Kisim Bek 3:​14, The Emphasised Bible, bilong J. B. Rotherham) Olsem na nem bilong God i makim olsem em bai kamap wanem wanem kain em i mas kamap bilong inapim ol samting em i tingting pinis long mekim. (Aisaia 55:​8-​11) Taim God i mekim wanpela promis, yumi inap bilip tru long en na larim dispela i stiaim ol samting yumi mekim. Bilong wanem? Long wanem, nem bilong God, em Jehova.

[Piksa long pes 13]

ABRAHAM “Papa Bilong Planti Lain”

[Piksa long pes 13]

SARA “Prinses”