Tupela Susa i Gat Bel Hevi, Tupela i Kamap ‘Tumbuna Mama Bilong Israel’

KLOSTU nau bai san i kam antap na Lea i save olsem tete bai Jekop i painimaut olsem ol i bin trikim em. Jekop bai luksave olsem meri i slip long han bilong em, em i no Resel, em liklik susa bilong Lea. Lea i bihainim tok bilong papa bilong em. Ating em i mas karamapim pes bilong em long wanpela hap laplap bambai Jekop i no ken luksave long em na long nait Lea i go slip long bet em ol i bin redim bilong Jekop na Resel.

Man! Tingim samting Jekop i mas pilim taim em i kisim save long moning olsem ol i bin trikim em. Em i belhat nogut tru na i kros wantaim papa bilong Lea. Na long wankain taim, ating Lea i tingting long pasin trik em i bin insait long en na long sindaun bilong em bai kamap olsem wanem long bihain. Stori bilong Lea na Resel i bikpela samting long stori bilong Baibel. Dispela stori i kamapim klia olsem em i savetingting long man na meri i mas i gat wanpela poroman marit tasol na stap gut long em.

Wanpela Man Long Hul Wara

Sevenpela yia i go pinis, Resel i bin ran i go long papa bilong em na tokim papa olsem em i bin bungim wanpela man long hul wara na dispela man i tok em i wanpela wanblut bilong ol. Dispela man em kasen bilong em, Jekop, em i pikinini man bilong susa bilong papa bilong Resel na em i wanpela man i save lotuim Jehova. Wanpela mun bihain, Jekop i askim Laban olsem em i laik wok long em inap 7-pela yia bambai em ken maritim Resel. Laban i lukim olsem kandere bilong em, em i man bilong wok hat, na em pasin bilong ples bilong ol long maritim ol wanfamili bilong ol yet, olsem na Laban i orait long Jekop i mekim olsem.​—Stat 29:​1-​19.

Bel bilong Jekop i no kirap nating na em i gat laik long Resel, nogat. Em i laikim tru Resel olsem na maski em i mas wet inap 7-pela yia bilong maritim Resel, em i “pilim olsem dispela 7-pela yia em i samting nating, olsem tripela o 4-pela de tasol, long wanem, em i laikim tumas Resel.” (Stat 29:20) Jekop i bin laikim tru Resel i go inap long taim Resel i dai. Dispela i soim olsem ating Resel i bin i gat ol naispela pasin.

Yu ting Lea tu i laik maritim wanpela man i lotuim Jehova? Baibel i no mekim wanpela tok long dispela. Baibel i stori tasol long samting Laban i mekim bambai Lea i marit. Taim dispela 7-pela yia bilong Resel i wetim Jekop, em i pinis, Laban i wokim wanpela kaikai bilong marit. Baibel i stori olsem, long nait em i bringim Lea i go long Jekop na “Jekop i slip wantaim em.”​—Stat 29:23.

Yu ting Lea i insait long plen bilong papa long trikim Jekop? O em i amamas tasol long bihainim tok bilong papa bilong em? Na Resel i stap we long dispela taim? Yu ting em i save long ol samting papa na susa bilong em i mekim? Sapos em i save, em i bin pilim olsem wanem? Yu ting papa bilong em i wanpela hatpela man olsem na Resel i no inap sakim tok bilong em? Baibel i no kamapim bekim bilong ol dispela askim. Yumi no save Resel na Lea i kisim wanem tingting long dispela samting. Tasol bihain Jekop i bin kros nogut tru long dispela samting. Jekop i kros wantaim Laban, i no wantaim tupela pikinini meri bilong em. Em i tok: “Mi bin mekim wok bilong yu bilong kisim Resel. Bilong wanem yu trikim mi?” Laban i tok wanem? “Pasin bilong mipela i olsem. Namba wan pikinini meri i mas marit pastaim, na bihain namba 2 pikinini i ken marit. Yu wet inap wanpela wik pastaim, inap kaikai bilong marit i pinis, na bai mipela i givim Resel tu long yu. Tasol bai yu mas wok 7-pela yia moa.” (Stat 29:​25-​27) Olsem na ol i bin trikim Jekop na em i maritim tupela meri na dispela i kamapim pasin jeles na bel nogut.

Famili i No Stap Amamas

Jekop i bin laikim tru Resel. Taim God i lukim olsem Jekop “i no laikim tumas” Lea, God i helpim Lea long kisim bel. Tasol Resel i no gat bel. Tasol Lea i laikim narapela samting moa winim pikinini, em i laik bai Jekop i laikim em. Em i lukim olsem Jekop i laikim Resel tasol, na em i bel hevi. Tasol Lea i ting Jekop bai laikim em nau taim em i karim namba wan pikinini man bilong Jekop. Nem bilong em Ruben, mining bilong en, “Lukim! Wanpela pikinini man.” I gat as na Lea i givim dispela nem long pikinini bilong em na em i tok: “Bikpela i lukim pinis bel hevi bilong mi, olsem na nau man bilong mi i ken laikim mi.” Maski i olsem Jekop i no laikim tumas em; taim Lea i karim gen narapela pikinini man, dispela i no senisim tingting bilong Jekop. Lea i kolim dispela pikinini, Simeon, mining bilong en, “Harim.” Em i bin skelim olsem: “Bikpela i givim narapela pikinini man long mi, long wanem, em i harim olsem, Jekop i no laikim mi.”​—Stat 29:​30-​33.

God i harim Lea, dispela i soim olsem Lea i bin beten long hevi bilong em. I luk olsem em i save bilip long God. Tasol bel hevi bilong em i stap yet, maski em i bin karim namba tri pikinini man, Livai. Nem bilong em i makim “Stap gut wantaim,” na tok bilong Lea i kamapim gut as bilong en: “Nau bai man bilong mi i laikim mi moa na bai em i stap gut wantaim mi, long wanem, mi karim pinis tripela pikinini man bilong em.” Tasol Jekop i no stap gut wantaim em. Ating Lea i luksave long dispela samting, long wanem, nem bilong namba foa pikinini man bilong em i no gat wanpela tok i soim olsem em i laik bai Jekop i laikim em. Em i givim nem Juda long pikinini bilong kamapim olsem em i tenkyu tru long God. Dispela nem “Juda” i makim “Litimapim,” o “Samting Bilong Litimapim.” Lea i tok: “Dispela taim bai mi litimapim nem bilong Bikpela.”​—Stat 29:​34, 35.

Em tru olsem Lea i bin bel hevi, tasol Resel tu i bel hevi. Em i tokim Jekop: “Yu givim pikinini long mi. Sapos nogat, bai mi dai.” (Stat 30:1) Resel i save olsem Jekop i laikim em, tasol Resel i laik tru long karim pikinini. Lea i gat ol pikinini, tasol em i laik tru long Jekop i laikim em. Tupela wantaim i laikim samting narapela i gat, dispela i mekim na tupela wantaim i no stap amamas. Tupela wantaim i laikim Jekop na i laik karim ol pikinini bilong em. Tupela wantaim i bel nogut long narapela narapela. Tarangu! Dispela i kamapim hevi long dispela famili.

Resel Bai i Gat Ol Pikinini?

Long bipo, taim meri i no karim pikinini, dispela em i olsem samting nogut. God i bin tok promis long Abraham, Aisak, na Jekop olsem famili bilong ol bai kamapim dispela “pikinini” na long rot bilong em olgeta famili bai kisim blesing. (Stat 26:4; 28:14) Tasol Resel i no gat pikinini. Jekop i save olsem God wanpela tasol inap givim ol pikinini man long Resel, na bai Resel tu i insait long dispela gutpela samting. Tasol Resel i no laik wet. Em i tok: “Yu kisim Bilha, wokmeri bilong mi. Yu slip wantaim em na bai em i karim pikinini bilong mi. Olsem na bai mi kamap mama bilong ol pikinini.”​—Stat 30:​2, 3.

I hatwok long yumi kliagut long as na Resel i mekim olsem. Tasol ol man i bin painim ol samting bilong kontrak bilong marit long hap bilong Midel Is em ol dispela samting i soim olsem em kastam ol man bilong bipo i save bihainim. Meri i no gat pikinini i save givim wanpela wokmeri long man bilong em na long dispela rot em i kamapim pikinini bilong man.a (Stat 16:​1-3) Long sampela marit olsem, ol pikinini bilong wokmeri bai kamap olsem ol pikinini bilong meri tru bilong dispela man.

Taim Bilha i karim wanpela pikinini man, Resel i amamas na tok: “God i skelim mi pinis na em i orait long pasin bilong mi. Na em i harim prea bilong mi, na em i givim wanpela pikinini man long mi.” Na em i kolim em, Dan, mining bilong en, “Jas.” Em tu i beten long hevi bilong em. Taim Bilha i karim namba tu pikinini man, Naptali, mining bilong en “Pait strong,” Resel i tok: “Mi bin pait strong wantaim susa bilong mi na nau mi win pinis.” Ol dispela nem i soim olsem i gat kros namel long tupela susa.​—Stat 30:​5-8.

Ating Resel i ting em i mekim ol samting i stret wantaim beten bilong em taim em i givim Bilha long Jekop. Tasol dispela i no rot bilong God long givim ol pikinini long em. I gat wanpela samting yumi lainim long dispela. Yumi no ken les kwik taim yumi askim Jehova long helpim yumi. Em bai bekim beten bilong yumi long ol narapela rot em yumi i no ting long en.

Lea i no laik bai Resel i winim em olsem na em tu i givim wokmeri bilong em, Silpa long Jekop. Pastaim Silpa i karim Gad na bihain em i karim Asa.​—Stat 30:​9-​13.

Wanpela samting i kamap na dispela i soim olsem i gat kros namel long Resel na Lea em olsem, pikinini man bilong Lea, em Ruben, em i bin kisim sampela pikinini bilong wanpela kain plaua ol i kolim mandrek. Ol i ting pikinini bilong dispela plaua bai helpim meri long karim pikinini. Taim Resel i askim Lea long sampela mandrek, Lea i tok strong olsem: “Yu kisim man bilong mi pinis, na yu ting em i samting nating, a? Na nau yu laik kisim tu ol dispela samting pikinini bilong mi i bringim i kam?” Sampela man i ting tok bilong em i makim olsem Jekop i lusim bikpela haptaim long i stap wantaim Resel winim Lea. Ating Resel i lukim olsem tok Lea i mekim em i tru. Olsem na em i tok: “Sapos yu givim mi ol dispela samting, orait yu ken slip wantaim Jekop long dispela nait.” Orait long apinun taim Jekop i kam long haus, Lea i tokim em: “Yu mas slip wantaim mi long nait, long wanem, mi baim yu pinis long samting pikinini bilong mi i bin bringim i kam.”​—Stat 30:​15, 16.

Lea i karim namba 5 na namba 6 pikinini man, em Isakar na Sebulun. Na em i tok: “Nau man bilong mi bai i givim biknem long mi, long wanem, mi karim pinis 6-pela pikinini man bilong em.”b​—Stat 30:​17-​20.

Ol pikinini mandrek i no bin helpim Resel long kisim bel. Sikspela yia bihain Resel i kisim bel na karim Josep, long wanem, Jehova i bin tingim Resel na bekim beten bilong em. Na nau Resel inap tok: “God i pinisim hevi bilong mi na bai mi no sem moa.”​—Stat 30:​22-​24.

Indai Bilong Tupela na Ol Samting Tupela i Givim

Resel i dai long taim em i karim namba 2 pikinini man, em Benjamin. Jekop i laikim tru Resel na tupela pikinini man bilong Resel i dia tumas long Jekop. Planti yia bihain klostu long taim Jekop i laik i dai, em i stori gen long dai bilong lewa bilong em Resel. (Stat 30:1; 35:​16-​19; 48:7) Yumi no save Lea i dai olsem wanem, tasol yumi save olsem Jekop i bin planim em long wanpela hul bilong ston we em i laik bai ol i planim em tu long en.​—Stat 49:​29-​32.

Long taim Jekop i kamap lapun, em i tokaut olsem laip bilong em​—bilong famili tu​—i bin i gat planti hevi. (Stat 47:9) Laip bilong Lea na Resel tu i gat planti hevi. Stori bilong ol i soim olsem hevi i save kamap taim man o meri i gat planti poroman marit. Dispela i as na Jehova i tok man i mas i gat wanpela meri tasol. (Matyu 19:​4-8; 1 Timoti 3:​2, 12) Pasin jeles i save kamap taim man o meri i laikim narapela o i slip wantaim narapela em i no poroman marit tru bilong em. Dispela em wanpela as na God i tambuim pasin pamuk na pasin bilong bagarapim marit.​—1 Korin 6:18; Hibru 13:4.

Olsem na long olgeta taim, Jehova i kamapim laik bilong em na em i wok yet long mekim olsem long rot bilong ol bilip man na meri em sin i stap yet long skin bilong ol. Wankain olsem yumi, dispela tupela susa i gat sampela pasin kranki. Tasol long rot bilong dispela tupela meri, Jehova i truim tok promis em i bin mekim long Abraham. Olsem na i stret yumi tok olsem Resel na Lea i kamap ‘tumbuna mama bilong Israel.’​—Rut 4:11.

[Ol Futnot]

[Piksa long pes 9]

Lea na Resel i laikim samting narapela i gat, na tupela wantaim i no stap amamas

[Piksa long pes 10]

Lain Israel i kamap long 12-pela pikinini man bilong Jekop