Wok Bos Bilong Jehova na Kingdom Bilong Em

“Yu gat olgeta strong na pawa. Yu gat biknem, na yu stap antap tru. Yu nambawan olgeta. . . . Yu stap bikpela king bilong olgeta samting.”​—1 STORI 29:11.

 1. Bilong wanem i stret Jehova tasol i stap King bilong heven na graun?

“BIKPELA i stap king long heven, na em i bos bilong olgeta samting.” (Song 103:19) Dispela tok bilong man bilong raitim song i kamapim klia husat tru i mas i stap bos bilong olgeta samting. God Jehova em i Man Bilong Wokim olgeta samting, olsem na i stret em i stap Nambawan King bilong heven na graun.

 2. Daniel i stori olsem wanem long ples spirit bilong Jehova?

² Bilong wanpela king i ken mekim wok bos bilong em, i mas i gat ol man i stap aninit long em. Namba wan samting Jehova i bosim em ol ensel em i bin wokim​—pastaim em i wokim dispela wanpela Pikinini na bihain ol narapela ensel. (Kolosi 1:​15-​17) Bihain tru, long driman profet Daniel i lukim ol samting long heven. Em i tok: “Mi lukim ol i kisim ol sia king i kam na putim i stap. Na wanpela Man bilong bipo bipo yet i kam sindaun long wanpela sia king. . . . I gat planti tausen manmeri [“ensel,” NW] i mekim wok bilong dispela Man, na planti milion manmeri [“ensel,” NW] i sanap klostu long em.” (Daniel 7:​9, 10) Inap planti bilion yia, Jehova, em “Man bilong bipo bipo yet,” i stap Nambawan King bilong bikpela lain famili spirit bilong em, em ol i “mekim wok” bilong em.​—Song 103:​20, 21.

 3. Olsem wanem Jehova i bosim ol samting long ples antap na long graun?

³ Bihain, Jehova i wokim ol samting bilong ples antap, na em i wokim tu dispela graun. (Jop 38:​4, 7) Taim yumi lukim olsem olgeta samting i stap antap i bihainim stret rot bilong en, yumi inap ting olsem i no gat wok long wanpela i bosim ol dispela samting. Tasol man bilong raitim song i tok: “[God] yet i tok na ol i kamap na i stap. Em i tok na ol i stap oltaim long hap bilong ol, na ol i no inap sakim tok bilong en.” (Song 148:​5, 6) Oltaim Jehova i save mekim wok bos bilong em long rot bilong stiaim na bosim ol samting long ples spirit na long graun.​—Nehemia 9:6.

 4. Jehova i bosim ol man olsem wanem?

⁴ Taim God i wokim namba wan man na meri, God i mekim wok bos bilong em long narapela rot. Jehova i givim ol man olgeta samting ol i mas i gat na bai ol i ken stap amamas na i stap bilong ol i gat as bilong en. Na tu, Jehova i givim wok long ol long bosim ol animal samting i stap long graun​—olsem em i makim sampela wok bos ol man yet i ken mekim. (Stat 1:​26-​28; 2:​8, 9) Dispela i kamapim klia olsem wok bos bilong God i gutpela na i save helpim ol man, na tu, i save givim biknem long ol. Sapos Adam na Iv i daun long wok bos bilong Jehova, ol inap kisim laip i stap oltaim long Paradais long graun.​—Stat 2:​15-​17.

 5. Yumi ken tok wanem long wok bos bilong Jehova?

⁵ Dispela ol samting yumi stori long en i givim wanem tingting long yumi? Namba wan samting, oltaim Jehova i save bosim olgeta samting em i wokim. Namba tu, wok bos bilong God i gutpela na i save givim biknem long olgeta samting em i bosim. Na laspela samting, taim yumi daun na stap gut long wok bos bilong God bai yumi kisim ol blesing i stap oltaim. Olsem na i stret King Devit bilong Israel long bipo i tok: “Yu gat olgeta strong na pawa. Yu gat biknem, na yu stap antap tru. Yu nambawan olgeta. Long wanem, olgeta samting i stap long heven na graun i bilong yu tasol. Na yu stap bikpela king bilong olgeta samting.”​—1 Stori 29:11.

Bilong Wanem i Mas i Gat Kingdom Bilong God?

 6. Olsem wanem long wok bos bilong God na Kingdom bilong em?

⁶ Jehova em i King Bilong Heven na Graun na oltaim em i save mekim wok long strong bilong em, olsem na bilong wanem i mas i gat Kingdom Bilong God? King i save mekim wok bilong em long rot bilong wanpela gavman em i putim bilong bosim ol man. Olsem na Kingdom Bilong God em i rot God i save mekim wok long en bilong bosim ol man.

 7. Bilong wanem Jehova i kamapim wanpela nupela rot bilong mekim wok bos bilong em?

⁷ Long narapela narapela taim Jehova i bin mekim wok bos bilong em long narapela narapela rot. Olsem na taim pasin bikhet i kamap, em i kamapim wanpela nupela rot bilong mekim wok bos bilong em. Wanpela pikinini spirit bilong God, Satan, em i pulim Adam na Iv long bikhet long wok bos bilong Jehova. Long rot bilong dispela pasin bikhet, ol i sutim tok long wok bos bilong Jehova. Olsem wanem ol i mekim olsem? Taim Satan i tokim Iv olsem em i “no inap i dai” sapos em i kaikai pikinini bilong diwai em God i tambuim, i olsem em i tok Jehova em man bilong tok giaman, olsem na ol i no ken bilipim tok bilong em. Satan i tok moa long Iv: “Sapos yutupela i kaikai pikinini bilong dispela diwai, bai ai bilong yutupela i op na yutupela i kisim save long wanem samting i gutpela, na wanem samting i nogut, na bai yutupela i kamap wankain olsem God.” Satan i tok olsem Adam na Iv bai i stap gutpela moa sapos ol i sakim tok bilong God na bihainim laik bilong ol yet. (Stat 3:​1-6) Long dispela rot Satan i sutim tok long God olsem i no stret em i stap bos na em i no bihainim stretpela pasin long bosim ol man. Jehova bai mekim wanem?

8, 9. (a) Wanpela king bai mekim wanem taim pasin bikhet i kamap insait long kingdom bilong em? (b) Jehova i mekim wanem long pasin bikhet i kamap long Iden?

⁸ Sapos pasin bikhet i kamap insait long kingdom bilong wanpela king, em bai mekim wanem? Ol man i save long ol samting i bin kamap bipo, ol inap tingim ol kain samting olsem i bin kamap long bipo. King bai i no inap larim dispela samting​—maski em i gutpela king​—em bai kotim ol man i bikhet long wok bos bilong em na em bai tok ol i gat asua long ol i laik daunim gavman. Bihain ating king bai makim wanpela man long givim strafe long ol dispela bikhet man na long kamapim gutaim gen. Olsem tasol, Jehova i kamapim klia olsem em i bosim gut olgeta samting taim em i kirap wantu long tokaut long strafe bai painim dispela bikhet lain. Em i tokaut olsem Adam na Iv i no inap i stap oltaim, na em i rausim tupela long gaden Iden.​—Stat 3:​16-​19, 22-​24.

⁹ Taim Jehova i tokaut long strafe bai painim Satan, em i kamapim wanpela nupela rot bilong mekim wok bos bilong em, na long dispela rot em bai kamapim gutaim na ol samting bai i stap gut. God i tok long Satan olsem: “Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain [“pikinini,” NW] bilong meri. Bai [em] i krungutim het bilong yu, na bai yu kaikaim lek bilong [em].” (Stat 3:15) Olsem na Jehova i tokaut olsem em i tingting pinis long givim strong long wanpela “pikinini” long bagarapim na pinisim Satan na lain bilong em, na kamapim klia olsem i stret God tasol i stap king bilong heven na graun.​—Song 2:​7-9; 110:​1, 2.

10. (a) Dispela “pikinini” em husat? Wanem dispela nupela rot bilong Jehova long mekim wok bos? (b) Pol i tok wanem long truim bilong namba wan tok profet?

¹⁰ Dispela “pikinini” em Jisas Krais na wanpela lain manmeri em ol bai wok king wantaim em. Olgeta bai wok bung wantaim long Kingdom Bilong God long han bilong Mesaia. (Daniel 7:​13, 14, 27; Matyu 19:28; Luk 12:32; 22:​28-​30) Tasol God i no kamapim klia ol dispela samting kwiktaim. Dispela namba wan tok profet i “stap hait” inap longtaim. (Rom 16:25) Inap planti handet yia, ol bilipman i wetim taim bilong dispela tok i “stap hait” bai kamap ples klia na truim bilong en bai kamapim long ples klia olsem i stret Jehova tasol i stap nambawan bos.​—Rom 8:​19-​21.

Samting i “Stap Hait” i Wok Long Kamap Ples Klia

11. Jehova i kamapim wanem samting long Abraham?

¹¹ Bihain isi isi Jehova i wok long kamapim sampela hap bilong “tok hait bilong kingdom bilong God.” (Mak 4:11) Wanpela bilong ol man em Jehova i kamapim dispela tok hait long em, em Abraham, em man Jehova i bin kolim olsem ‘pren bilong em.’ (Jems 2:23) Jehova i bin tok promis long Abraham olsem em bai ‘mekim ol lain tumbuna bilong em i kamap bikpela lain tru.’ Bihain, God i tok moa long Abraham olsem: “Sampela bai i kamap king” long lain bilong yu na “long rot bilong pikinini bilong yu olgeta lain bilong graun bai kisim blesing.”​—Stat 12:​2, 3; 17:6; 22:​17, 18; NW.

12. Bihain long Bikpela Tait, olsem wanem lain bilong Satan i kamap ples klia?

¹² I kam inap long taim bilong Abraham, ol man i bin traim pinis long bosim ol narapela. Olsem: Baibel i stori long tumbuna pikinini bilong Noa, em Nimrot, na i tok: “Nimrot i kamap namba wan man bilong graun long kamap strongpela hetman. Em i bikhet long Jehova na em i strongpela man bilong raunim ol animal.” (Stat 10:​8, 9; NW) Tru tumas, Satan i stiaim Nimrot na ol arapela hetman bilong graun long mekim wok bilong em. Ol dispela man na ol lain bilong ol i kamap lain bilong Satan.​—1 Jon 5:19.

13. Long rot bilong Jekop Jehova i tok profet long wanem samting?

¹³ Maski Satan i mekim ol samting na bai ol man i ken mekim wok bos, dispela i no pasim Jehova long mekim yet samting em i tingting pinis long mekim. Long rot bilong Jekop, em tumbuna pikinini bilong Abraham, Jehova i tok: “[Juda] i holim dispela stik i makim strong bilong king, na em bai i stap king oltaim. Em bai i holim dispela namba inap [Silo] em i kamap . . . na em bai i bosim olgeta lain manmeri.” (Stat 49:10) Dispela tok “Silo” i makim “Man Bilong Kisim Dispela Wok.” Olsem na dispela tok profet i kamapim klia olsem bai i gat wanpela man i kam na i stret em i kisim dispela “stik,” o em i holim namba bilong “bosim olgeta lain manmeri.” Dispela Man em i husat?

‘Inap Silo i Kamap’

14. Jehova i wokim wanem kontrak wantaim Devit?

¹⁴ Namba wan man Jehova i bin makim long ol tumbuna bilong Juda long kamap king na bosim ol manmeri bilong em, em Devit, pikinini man bilong Jesi na wasman bilong ol sipsip.a (1 Samuel 16:​1-​13) Maski Devit i mekim sin na popaia, Jehova i orait long em, long wanem, em i stap gut long wok bos bilong Jehova. Taim Jehova i mekim kontrak wantaim Devit, Jehova i kamapim sampela save moa long tok profet em i bin mekim long Iden, em i tok: “Bai mi mekim wanpela pikinini man bilong yu i kamap king, na bai em i kamap strongpela king na bai mi no larim wanpela samting i daunim em.” Dispela i no makim tasol pikinini bilong Devit, em Solomon husat i bin kisim ples bilong papa bilong em, nogat, long wanem, kontrak i tok moa: “Bai mi mekim ol man long lain bilong em tasol i kamap king oltaim oltaim.” Dispela kontrak bilong Devit i kamapim klia olsem dispela “pikinini” bilong Kingdom em God i tok promis long en bai kamap long lain tumbuna pikinini bilong Devit.​—2 Samuel 7:​12, 13.

15. Bilong wanem yumi inap tok olsem kingdom bilong Juda i makim Kingdom Bilong God?

¹⁵ Kirap long Devit na i kam, i gat ol man i kamap king long lain bilong em, na ol hetpris i bin kapsaitim wel long het bilong ol bilong makim ol i kamap king. Olsem na yumi inap kolim ol dispela king olsem ol man God i makim, o mesaia. (1 Samuel 16:13; 2 Samuel 2:4; 5:3; 1 King 1:39) Ol i sindaun long sia king bilong Jehova na mekim wok olsem king bilong Jehova long Jerusalem. (2 Stori 9:8) Long dispela rot, kingdom bilong Juda i makim Kingdom Bilong God, em rot Jehova i mekim wok long en bilong mekim wok bos.

16. Ol man i kamap king long lain bilong Juda ol i mekim wanem?

¹⁶ Taim king na ol manmeri i daun long wok bos bilong Jehova, em i lukautim ol na mekim gut long ol. Long taim Solomon i stap king, ol man i stap bel isi na ol i gat gutpela sindaun tru. Dispela i stap olsem piksa bilong makim taim Kingdom Bilong God bai bosim graun na Satan i no stap moa bilong pulim ol man, na Jehova tasol bai stap King bilong heven na graun. (1 King 4:​20, 25) Tasol sori tru, planti king long lain bilong Devit i no bihainim tok bilong Jehova, na ol manmeri i lotuim ol god giaman na mekim pasin pamuk. Bihain Jehova i larim ol Babilon i kam na bagarapim dispela kingdom bilong ol Juda long 607 B.C.E. Dispela samting i mekim na i luk olsem Satan i win na em i daunim wok bos bilong Jehova.

17. Wanem samting i soim olsem Jehova i stap king yet maski wok king long lain bilong Devit i pundaun?

¹⁷ Wok king bilong lain bilong Devit i pundaun​—na kingdom bilong ol Israel long hap not tu i pundaun​—tasol dispela i no makim olsem Jehova i no mekim gut wok king bilong em, nogat. Dispela i kamapim klia olsem samting nogut i save kamap taim Satan i stiaim ol man na taim ol man i laik bihainim laik bilong ol yet. (Sindaun 16:25; Jeremaia 10:23) Bilong soim olsem em i stap yet olsem king, long rot bilong profet Esekiel, Jehova i tokaut olsem: “Yu mas rausim hat king na dispela laplap i raunim het bilong yu. . . . Bai mi bagarapim Jerusalem olgeta, long pasin ol man i no bin lukim bipo. Na bai ples i stap nating inap long taim wanpela man i kam. Mi bin makim dispela man na em bai i bosim Jerusalem, na mi bai givim taun long em.” (Esekiel 21:​26, 27) Ol dispela tok i kamapim klia olsem dispela “pikinini” em Man Jehova i “makim” bilong i stap king em i no kam yet.

18. Ensel Gebriel i tok wanem long Maria?

¹⁸ Orait nau yumi stori long ol samting i kamap long yia 2 B.C.E. God i salim ensel Gebriel i kam long Maria, em wanpela meri i no bin slip wantaim man, na em i stap long Nasaret, em wanpela taun bilong Galili i stap long hap not bilong Palestain. Ensel i tok: “Harim. Yu bai kisim bel na karim wanpela pikinini man. Na yu mas kolim nem bilong en Jisas. Em bai i stap bikman. Na bai ol i kolim em Pikinini bilong God Antap Tru. Na God bai i putim em i stap king olsem tumbuna bilong en Devit. Em bai i stap king bilong ol lain bilong Jekop oltaim. Na wok king bilong en bai i no inap pinis.”​—Luk 1:​31-​33.

19. Taim bilong wanem samting i kamap klostu nau?

¹⁹ Nau taim i kamap bilong kamapim klia dispela tok i “stap hait.” Klostu nau nambawan “pikinini” long lain bilong meri, em God i bin tok promis long em, em bai kamap. (Galesia 4:4; 1 Timoti 3:16) Satan bai kaikaim lek bilong em. Tasol dispela “pikinini” bai krungutim het bilong Satan, na em bai bagarapim na pinisim Satan na lain bilong em olgeta. Na tu, em bai autim tok olsem long rot bilong Kingdom Bilong God, em bai stretim bek olgeta samting Satan i bin bagarapim na em bai kamapim klia olsem i stret Jehova tasol i stap bos. (Hibru 2:14; 1 Jon 3:8) Olsem wanem Jisas bai mekim olsem? Olsem wanem yumi ken bihainim pasin bilong em? Bai yumi stori long bekim bilong ol dispela askim long stadi i kamap bihain long dispela.

[Futnot]

Yu Inap Stori Long Dispela?

• Wanem samting i makim olsem i stret Jehova tasol i stap King bilong heven na graun?

• Bilong wanem Jehova i kamapim Kingdom?

• Olsem wanem isi isi Jehova i kamapim tok i “stap hait”?

• Wanem samting i soim olsem Jehova i bosim yet ol samting maski wok king long lain bilong Devit i pundaun?

[Piksa long pes 23]

Jehova i tokaut long wanem samting long rot bilong Abraham?

[Piksa long pes 25]

Wok king long lain bilong Devit i pundaun, bilong wanem dispela i no makim olsem Jehova i no mekim gut wok king bilong em?