Ol Ensel​—‘Ol i Save Mekim Wok Bilong Helpim Ol Man’

“Ol ensel ol i spirit, na ol i save mekim wok bilong God. God i save salim ol i go bilong helpim ol man em i laik kisim bek ol.”​​—HI. 1:​14.

 1. Tok bilong Matyu 18:10 na Hibru 1:​14 i mekim gut bel bilong yumi olsem wanem?

JISAS KRAIS i no laik bai wanpela i pundaunim ol disaipel bilong em, olsem na em i tok: “Nogut yupela i ting wanpela namel long ol dispela liklik pikinini em i olsem samting nating. Nogat. Mi tokim yupela, long heven ol ensel bilong ol, oltaim ol i save stap long pes bilong Papa bilong mi em i stap long heven.” (Mt. 18:​10, 11) Aposel Pol i tok long ol gutpela ensel, olsem: “Ol ensel ol i spirit, na ol i save mekim wok bilong God. God i save salim ol i go bilong helpim ol man em i laik kisim bek ol.” (Hi. 1:​14) Dispela tok, God i save mekim wok long ol ensel bilong helpim ol man, dispela i mekim gut bel bilong yumi. Baibel i tok wanem long ol ensel? Ol i helpim yumi olsem wanem? Yumi inap kisim wanem skul long ol?

2, 3. Wanem sampela wok bilong ol ensel?

² I gat planti milion gutpela ensel long heven. Olgeta “i gat bikpela strong. [Ol] i save bihainim tok bilong [Bikpela].” (Sng. 103:20; ritim KTH 5:​11.) Ol dispela pikinini spirit bilong God ol i gat pasin bilong ol yet, na ol pasin wankain olsem God, na pasin bilong makim rot ol yet i laik bihainim. I gat kain kain ensel i stap na ol i gat narapela narapela wok. Nambawan ensel em Maikel (nem bilong Jisas long heven). (Dan. 10:13; Ju. 9) Dispela “namba wan pikinini bilong God” em “Tok,” o Mausman, bilong God na long rot bilong em Jehova i bin wokim olgeta narapela samting.​​—Kl. 1:​15-​17; Jo. 1:​1-3.

³ Aninit long dispela nambawan ensel i gat ol serafim, em ol i save tokaut long pasin holi bilong Jehova na helpim ol manmeri bilong God long bihainim ol lo bilong em. Na i gat ol serap, em ol i sambai long wok king bilong em. (Stt. 3:​24, NW; Ais. 6:​1-3, 6, 7) Na i gat sampela ensel moa, em ol i gat kain kain wok long mekim bilong kamapim laik bilong God.​​—Hi. 12:​22, 23.

 4. Ol ensel i pilim olsem wanem taim God i wokim graun? Sapos Adam na Iv i bin mekim stretpela wok long pasin bilong makim wanem rot ol i laik bihainim, dispela inap mekim wanem long ol manmeri?

⁴ Olgeta ensel i singaut amamas taim God i “wokim na strongim as bilong dispela graun” na ol i amamas long mekim wok God i givim long ol taim graun i wok long kamap gutpela ples bilong ol manmeri i ken i stap long en. (Jop 38:​4, 7) Tru, Jehova i wokim man i “stap aninit long ol ensel,” tasol em i wokim man olsem ‘em yet,’ olsem na ol man inap kamapim ol gutpela pasin bilong God. (Hi. 2:7; Stt. 1:​26) Sapos Adam tupela Iv i bin mekim stretpela wok long pasin bilong ol long makim wanem rot ol i laik bihainim, bai tupela wantaim ol tumbuna pikinini bilong ol inap stap laip yet long Paradais na stap insait yet long famili bilong Jehova.

5, 6. Wanem pasin bikhet i bin kamap long heven? God i mekim wanem?

⁵ Yumi ken ting olsem ol gutpela ensel i bin kirap nogut tru taim ol i lukim wanpela long famili bilong God long heven i bikhet. Wanpela ensel namel long ol em i no amamas moa long givim biknem long Jehova, em i laik bai ol narapela i mas lotuim em. Em i kamap Satan (olsem “Birua”) taim em i sutim tok olsem i no stret Jehova i stap bos, na em i wokim rot bilong em yet i ken kamap bos. Satan i mekim namba wan tok giaman na kirapim namba wan man na meri long bihainim em long bikhet long gutpela Man Bilong Wokim ol.​​—Stt. 3:​4, 5; Jo. 8:​44.

⁶ Kwiktaim Jehova i makim strafe bilong Satan. Long namba wan tok profet long Baibel em i tok: “Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain bilong meri. Bai ol i krungutim het bilong yu, na bai yu kaikaim lek bilong ol.” (Stt. 3:​15) Pasin birua bai stap namel long Satan na “meri” bilong God. Jehova i tingim oganaisesen bilong Em long heven, em ol gutpela ensel i insait long en, i olsem meri bilong Em. Dispela tok profet i as na ol man inap bilip na wetim gutpela samting i kamap, maski i gat sampela samting bilong en i stap “hait” em isi isi i wok long kamap ples klia. God i laik bai wanpela insait long oganaisesen bilong em long heven i mas bagarapim olgeta bikhetman na long rot bilong em God bai bungim “ol samting bilong heven na bilong graun” wantaim.​​—Ef. 1:​8-​10.

 7. Long taim bilong Noa, sampela ensel i mekim wanem? Jehova i mekim wanem long ol?

⁷ Long taim bilong Noa, sampela ensel i lusim “ples bilong ol” na ol i tanim i kamap man bilong kisim amamas long graun. (Ju. 6; Stt. 6:​1-4) Jehova i tromoi ol dispela bikhet ensel i go long bikpela tudak, na olsem Satan, ol tu i kamap “spirit nogut” na birua bilong ol wokboi bilong God.​​—Ef. 6:​11-​13; 2 Pi. 2:4.

Ol Ensel i Helpim Yumi Olsem Wanem?

8, 9. Jehova i bin mekim wanem wok long ol ensel bilong helpim ol man?

⁸ Abraham, Jekop, Moses, Josua, Aisaia, Daniel, Jisas, Pita, Jon, na Pol em sampela bilong ol man ol ensel i bin helpim ol. Ol gutpela ensel i bin karimaut strafe bilong God, na long rot bilong ol, God i bin givim ol tok profet, na ol tok i makim ol samting ol man i mas mekim, na Lo Bilong Moses tu. (2 Kin. 19:35; Dan. 10:​5, 11, 14; Ap. 7:​53; KTH 1:1) Long nau yumi gat Baibel olgeta, olsem na ating ol ensel i no gat wok moa long givim tok bilong God long ol man. (2 Ti. 3:​16, 17) Tasol long heven ol i save wok strong tru long mekim laik bilong God na helpim ol wokboi bilong em.

⁹ Baibel i tok: “Ensel bilong Bikpela i save stap klostu long ol manmeri i aninit long Bikpela, na em i save helpim ol bai ol i no kisim bagarap.” (Sng. 34:7; 91:11) Satan i bin sutim tok olsem ol man i no inap stap gut long God taim hevi i painim ol, olsem na Jehova i larim Satan i givim kain kain hevi long yumi. (Lu. 21:​16-​19) Tasol taim traim i painim yumi, God i save pinis long mak we yumi kamapim olsem yumi stap gut long em na em i no ken larim dispela traim i winim strong bilong yumi. (Ritim 1 Korin 10:13.) Ol ensel i stap redi long helpim yumi, na ol i save mekim olsem taim i stret wantaim laik bilong God. Ol i bin lukautim Satrak, Mesak, Abetnego, Daniel, na Pita, tasol ol i no pasim ol birua long kilim i dai Stiven na Jems. (Dan. 3:​17, 18, 28; 6:​22; Ap. 7:​59, 60; 12:​1-3, 7, 11) Ol samting i bin traim ol i no wankain. Na olsem tasol, sampela bilong ol brata bilong yumi long ol kalabus bilong ol Natsi ol i bin kisim bagarap, tasol Jehova i bin helpim planti bilong ol long abrusim bagarap.

10. Ol ensel inap helpim yumi, na wanem sampela helpim moa yumi inap kisim?

¹⁰ Baibel i no tok olsem olgeta wan wan man long graun i gat wasangelo bilong ol yet, nogat. Yumi bilip olsem “sapos yumi bihainim laik bilong God yet na yumi beten na askim em long wanpela samting, orait em i save harim beten bilong yumi.” (1 Jo. 5:​14) Tru, Jehova inap salim wanpela ensel i kam bilong helpim yumi, tasol helpim inap kam long narapela rot tu. Bel bilong ol brata Kristen inap kirapim ol long helpim yumi na mekim gut bel bilong yumi. God inap givim yumi savetingting na strong na bai yumi inap karim hevi bilong samting i olsem ‘nil i sutim skin’ na i olsem wanpela “wokboi bilong Satan” i mekim nogut long yumi.​​—2 Ko. 12:​7-​10; 1 Te. 5:​14.

Bihainim Pasin Bilong Jisas

11. God i bin mekim wanem wok long ol ensel bilong helpim Jisas? Jisas i stap gut long God na dispela i kamapim klia wanem samting?

¹¹ Tingim Jisas na ol wok Jehova i givim long ol ensel. Taim Jisas i bon na em i kirap bek, ol ensel i tokaut long dispela samting, na ol i bin helpim Jisas taim em i stap long graun. Ol ensel inap pasim ol birua long holim em na kilim em i dai, tasol ol i no mekim olsem. Tasol God i salim wanpela ensel i kam bilong strongim em. (Mt. 28:​5,6; Lu. 2:​8-​11; 22:43) I stret wantaim laik bilong Jehova, Jisas i bin i dai olsem ofa na dispela i kamapim klia olsem man i gutpela olgeta em inap stap gut long God maski em i kisim bikpela hevi tru. Olsem na Jehova i kirapim bek Jisas na givim em laip long heven na em i no inap i dai moa. Em i givim em “bikpela namba” na putim ol ensel i stap aninit long em. (Mt. 28:18; Ap. 2:​32; 1 Pi. 3:​22) Ol dispela samting i soim olsem Jisas em i “pikinini” bilong “meri” bilong God.​​—Stt. 3:​15; Ga. 3:​16.

12. Olsem wanem yumi inap bihainim pasin bilong Jisas long tingting gut?

¹² Jisas i save olsem i no stret sapos em i traim Jehova na ting ol ensel i mas lukautim em sapos em no bihainim gutpela tingting, nogat. (Ritim Matyu 4:​5-7.) Olsem na yumi mas bihainim pasin bilong Jisas na “tingting gut.” Yumi no ken insait long ol samting em inap bagarapim yumi sapos i no gat wok long yumi mekim olsem, tasol taim bilip bilong yumi i as na ol man i mekim nogut long yumi, yumi no ken pret na surik.​​—Ta. 2:​12.

Skul Yumi Inap Kisim Long Ol Gutpela Ensel

13. Yumi inap kisim wanem skul long ol gutpela ensel em 2 Pita 2:​9-​11 i stori long ol?

¹³ Taim aposel Pita i givim strongpela tok long ol man em ol i “tok nogut” long ol Kristen Jehova i bin makim, em i stori long pasin bilong ol gutpela ensel. Maski ol ensel i gat bikpela strong, ol i rispek long Jehova na ol i no mekim wok olsem jas na kotim ol man. (Ritim 2 Pita 2:​9-​11.) Olsem na yumi tu i no ken mekim wok olsem jas na kotim ol man; yumi mas rispek long ol man i gat wok long lukautim kongrigesen, na larim ol samting i stap long han bilong Jehova, em Nambawan Jas.​​—Ro. 12:​18, 19; Hi. 13:17.

14. Yumi inap kisim wanem skul long pasin daun bilong ol ensel?

¹⁴ Ol ensel bilong Jehova i stap gutpela piksa long mekim ol wok long pasin daun. Ol i no bin kamapim nem bilong ol long ol man i askim ol long nem bilong ol. (Stt. 32:29; Het. 13:​17, 18) Tru, Baibel i kamapim nem bilong Maikel na Gebriel, tasol em i no kamapim nem bilong ol arapela milion milion ensel i stap long heven. Dispela i helpim yumi na bai yumi no givim kain ona long ol ensel i no stret yumi givim long ol. (Lu. 1:​26; KTH 12:7) Taim aposel Jon i brukim skru na i laik lotu long wanpela ensel, ensel i tokim em: “Yu no ken mekim olsem! Mi tu mi wanwok bilong yu wantaim ol brata bilong yu.” (KTH 22:​8, 9) Lotu bilong yumi, na ol beten tu, i mas go long God wanpela tasol.​​—Ritim Matyu 4:​8-​10.

15. Olsem wanem ol ensel i stap gutpela piksa long pasin bilong stap isi na wet?

¹⁵ Ol ensel i stap gutpela piksa tu long pasin bilong stap isi na wet. Maski ol i gat bikpela laik long save long ol tok hait holi bilong God, ol i no save long olgeta dispela tok hait, nogat. Baibel i tok: “Ol ensel tu i laikim tumas long kisim save long ol dispela gutpela samting.” (1 Pi. 1:​12) Olsem na ol i mekim wanem? Ol i stap isi na wet long taim God i makim bilong “ol kain kain gutpela tingting na save” bilong em i kamap ples klia long rot bilong “sios,” olsem kongrigesen.​​—Ef. 3:​10, 11.

16. Olsem wanem pasin bilong yumi inap mekim sampela samting long ol ensel?

¹⁶ Ol Kristen em traim i painim ol, ol i stap long ‘ai bilong ol ensel.’ (1 Ko. 4:9) Ol ensel i amamas long lukim ol samting yumi mekim bilong stap gut long God na ol i amamas tu taim wanpela man bilong mekim sin i tanim bel. (Lu. 15:10) Ol ensel i lukim ol gutpela pasin ol meri Kristen i bihainim. Baibel i tok, “meri i mas karamapim het bilong en olsem mak bilong em i mekim wok bilong God [“daun long man bilong em,” NW], bai ol ensel i ken lukim.” (1 Ko. 11:​3, 10) Tru tumas, ol ensel i amamas long lukim ol meri Kristen na olgeta arapela wokboi bilong God long graun i bihainim pasin tiokratik na daun long ol man i gat wok long bosim ol. Dispela pasin i kirapim ol pikinini spirit bilong God long tingim wok bilong ol yet long daun long Jehova.

Ol Ensel i Helpim Wok Autim Tok

17, 18. Olsem wanem yumi inap tok olsem ol ensel i save helpim wok bilong yumi long autim tok?

¹⁷ Ol ensel i insait long sampela bikpela wok i kamap long “de bilong Bikpela.” Olsem: Kingdom i kamap long 1914, na “Maikel wantaim ol ensel bilong en” i rausim Satan na ol spirit nogut bilong em long heven. (KTH 1:​10; 11:15; 12:​5-9) Aposel Jon i lukim wanpela “ensel i flai i go namel long skai. Em i gat gutnius bilong i stap oltaim oltaim, na em i gat wok bilong autim dispela gutnius long ol manmeri i stap long graun.” Ensel i tokaut: “Taim i kamap pinis bilong God i skelim pasin bilong olgeta man long kot. Olsem na yupela i mas pret long em na litimapim nem bilong em. Yupela i mas lotu long God, em i bin wokim heven na graun na solwara na olgeta hul wara.” (KTH 14:​6, 7) Olsem na ol wokboi bilong Jehova i ken save olsem ol ensel bai helpim ol long taim ol i autim gutnius bilong Kingdom maski Satan i birua nogut tru long ol.​​—KTH 12:​13, 17.

¹⁸ Long nau, ol ensel i no save toktok wantaim yumi bilong stiaim yumi i go long ol man i gat gutpela bel, olsem wanpela ensel i bin toktok wantaim Filip na stiaim em i go long man bilong Itiopia. (Ap. 8:​26-​29) Tasol maski yumi no inap lukim ol ensel, planti samting i bin kamap long nau i soim olsem ol ensel i save helpim wok bilong yumi long autim tok bilong Kingdom na stiaim yumi i go long ol manmeri em bel bilong ol i gutpela “bilong kisim laip i stap gut oltaim.”a (Ap. 13:48) Em i bikpela samting long yumi mekim wok autim tok long olgeta taim na bai ol ensel inap mekim wok long yumi long painim ol man i gat laik long “lotu long Papa long strong bilong Holi Spirit na long pasin i tru”!​​—Jo. 4:​23, 24.

19, 20. Ol ensel i insait long wanem ol wok i makim taim bilong “las de bilong dispela graun”?

¹⁹ Jisas i tingim taim bilong yumi, na em i tok “long las de bilong dispela graun,” ol ensel bai rausim “ol man nogut i stap namel long ol stretpela man.” (Mt. 13:​37-​43, 49) Ol ensel i insait long wok bilong bungim na putim laspela mak long ol Kristen God i bin makim. (Ritim Matyu 24:31; KTH 7:​1-3) Na tu, ol ensel bai kam wantaim Jisas taim em i “tilim ol sipsip i go long hap na ol meme i go long hap.”​​—Mt. 25:​31-​33, 46.

²⁰ “Taim Bikpela Jisas wantaim olgeta strongpela ensel bilong en i lusim heven na i kamap ples klia,” olgeta “man i no laik save long God na i no bihainim gutnius bilong Jisas” ol bai bagarap. (2 Te. 1:​6-​10) Taim Jon i lukim dispela samting long wanpela visen, em i stori long Jisas na ol ensel long heven olsem ol i sindaun long ol waitpela hos bilong mekim pait long stretpela pasin.​​—KTH 19:​11-​14.

21. Ensel “i holim ki bilong hul i no gat as na bikpela sen tu,” em bai mekim wanem long Satan na ol spirit nogut bilong em?

²¹ Na tu, Jon i “lukim wanpela ensel i lusim heven na i kam daun. Long han bilong en em i holim ki bilong hul i no gat as. Na em i holim bikpela sen tu.” Dispela ensel em nambawan ensel Maikel, na em bai pasim Satan long sen na tromoi em​​—wantaim ol spirit nogut​​—i go daun long hul i no gat as. Ol bai lusim dispela hul inap sotpela taim long pinis bilong Taim Bilong Wan Tausen Yia Bilong Krais i Stap King, taim laspela traim i kamap long ol manmeri i gutpela olgeta. Bihain long dispela, Satan na olgeta bikhetman bai bagarap. (KTH 20:​1-3, 7-​10; 1 Jo. 3:8) Olgeta manmeri i bin bikhet long God ol bai i no stap moa.

22. Olsem wanem ol ensel i insait long ol samting em klostu nau bai kamap? Yumi mas i gat wanem tingting long dispela wok bilong ol?

²² Klostu nau, God bai kisim bek yumi long dispela taim nogut Satan i bosim. Ol ensel bai i gat bikpela wok tru long mekim insait long ol dispela samting i laik kamap, em ol samting bilong kamapim klia olsem i stret Jehova i stap bos na bilong mekim laik bilong God long dispela graun na ol manmeri i kamap tru. Tru tumas, ol gutpela ensel “i save mekim wok bilong God. God i save salim ol i go bilong helpim ol man em i laik kisim bek ol.” Olsem na i gutpela yumi tenkyu long God Jehova long mekim wok long ol ensel bilong helpim yumi long bihainim laik bilong em na kisim laip i stap gut oltaim.

[Futnot]

Bai Yu Bekim Olsem Wanem?

• I gat wanem kain ol ensel i stap na ol i gat wanem wok?

• Sampela ensel i bin mekim wanem long taim bilong Noa?

• God i bin mekim wanem wok long ol ensel bilong helpim yumi?

• Ol gutpela ensel i save insait long wanem ol wok long taim bilong yumi?

[Piksa long pes 21]

Ol ensel i amamas long bihainim laik bilong God

[Piksa long pes 23]

Samting i painim Daniel i soim olsem ol ensel i stap redi long helpim yumi, na ol i save mekim olsem taim em laik bilong God

[Piksa long pes 24]

Strongim bel na no ken pret, ol ensel i save helpim wok autim tok bilong Kingdom!

[Kredit Lain]

Globe: NASA photo