Yu Save Pret Long Ol Man i Dai Pinis?

PLANTI bai bekim dispela askim olsem, “Nogat, i no gat as na mi mas pret.” Ol i bilip olsem man i dai, em i pinis olgeta na em i no stap laip moa. Tasol planti milion manmeri i bilip olsem taim man i dai, spirit bilong em i stap laip yet.

Long Benin, long Wes Afrika, planti man i bilip olsem daiman inap kam bek na kilim ol narapela long famili bilong em yet. Ol manmeri i save salim ol samting bilong ol o kisim dinau mani bilong baim ol animal bilong wokim sakrifais na ol bung samting bilong mekim kol bel bilong ol wanblut bilong ol i dai pinis. Sampela i mekim wok bilong ol spirit, olsem toktok wantaim spirit bilong man i dai pinis em ol i bilip olsem em i stap laip yet na i ken toktok wantaim ol man i stap laip. Long sampela narapela, ol narakain samting i save painim ol na ol i ting spirit bilong ol man i dai pinis i as bilong en.

Kain samting olsem i bin painim Agboola, em wanpela man i save sindaun klostu long boda namel long Benin na Naijiria. Em i tok: “Pasin bilong mekim wok bilong ol spirit, dispela pasin i pulap long hap bilong mipela. Em pasin bilong ples long mekim sampela kain pasin bilong lotu long wasim bodi bilong ol daiman bilong redim ol long i go i stap long ples spirit. Mi save kisim ol hap sop ol i bin wasim ol bodi long en na mi miksim wantaim sampela kain lip. Orait nau mi kisim dispela na rapim antap long gan bilong painim abus, na bihain mi save tokaut strong long wanem abus mi laik kilim. Planti i save mekim kain pasin olsem na sampela taim dispela i save wok gut. Tasol sampela narapela wok bilong ol spirit i bin mekim mi pret nogut tru.

“Taim tupela pikinini man bilong mi i dai nating, mi saspek olsem wanpela man i bin mekim sanguma long ol pikinini bilong mi. Bilong painimaut, mi go lukim wanpela lapun glasman i gat nem long dispela wok. Em i tok samting mi saspek long en em i tru. Samting i nogut moa i olsem, em i tok tupela pikinini man bilong mi i stap long ples spirit na ol i wet long kamap wokboi bilong man i bin kilim ol, bihain long taim dispela man i dai. Dispela lapun man i tok, namba 3 pikinini man bilong mi, em tu bai i dai. Sampela de bihain, dispela pikinini man tu i dai.”

Bihain, Agboola i bungim John, wanpela Witnes Bilong Jehova em man Naijiria. John i kamapim ol tok bilong Baibel bilong stori long wanem samting tru i painim ol man i dai pinis. Dispela stori i bin senisim i stap bilong Agboola. Na i ken senisim i stap bilong yu tu.

Ol Man i Dai Pinis Ol i Stap Laip Yet o Nogat?

Husat inap tru long bekim dispela askim? I no wanpela man bilong graun inap bekim dispela askim, maski em i gat bikpela pawa o i gat nem long wok bilong ol spirit nogut. Jehova, em Man i kamapim olgeta samting i gat laip “long heven na long graun” na “i wokim olgeta samting yumi save lukim na samting yumi no inap lukim,” em tasol inap bekim. (Kolosi 1:16) Em i wokim ol ensel bilong i stap long ples spirit na ol man na ol animal bilong i stap long graun. (Song 104:​4, 23, 24; Hibru 1:7) Em i bin wokim olgeta samting na ol i stap long strong bilong em tasol. (KTH 4:11) Orait skelim tok em Baibel​—Tok Bilong God yet​—i mekim long wanem samting i painim ol man i dai pinis.

Jehova em i namba wan Man i kolim dispela tok dai. Em i givim tok lukaut long Adam na Iv olsem sapos ol i sakim tok bilong em ol bai dai. (Stat 2:17) Dispela i makim wanem samting? Jehova i tok: “Mi bin wokim yu long graun, na bai yu go bek gen long graun.” (Stat 3:​18, 19) Taim man i dai, bodi bilong em i tanim i kamap graun gen. Laip i pinis.

Adam na Iv, long laik bilong ol yet ol i bin bikhet long God, olsem na God i tok ol i mas i dai. Tasol ol i no namba wan lain long dai. Pikinini man bilong ol Abel em i namba wan man long dai. Bikbrata bilong em Kein i kilim em i dai. (Stat 4:8) Kein i no pret olsem dispela brata bilong em i dai bai i kirap na mekim nogut long em, nogat. Tasol Kein i tingting planti long samting em ol man i stap laip inap mekim long em.​​—Stat 4:​10-16.

Planti handet yia bihain, King Herot i tingting planti long taim ol man bilong skelim ol sta i tokim em olsem mama i karim pinis “king bilong ol Juda” insait long hap em i bosim. Herot i tingting strong long pinisim dispela man husat inap kamap king bihain, olsem na em i tok long ol i mas kilim i dai olgeta pikinini man long Betlehem em ol i gat tupela krismas na aninit long en. Tasol wanpela ensel i tokim Josep long kisim Maria na Jisas na “ranawe i go long Isip.”​​—Matyu 2:​1-16.

Taim Herot i dai, ensel i tokim Josep long i go bek long Israel, long wanem, “ol man i laik kilim pikinini, ol i dai pinis.” (Matyu 2:​19, 20) Dispela ensel em i wanpela spirit, na em i save olsem Herot i no stap moa bilong bagarapim Jisas. Josep i no pret long King Herot husat i dai pinis. Tasol Josep i pret long samting em dispela pikinini nogut bilong Herot em Arkelaus inap mekim. Olsem na Josep i go sindaun long Galili, em ausait long ples Arkelaus i bosim.​​—Matyu 2:22.

Dispela ol stori i helpim yumi long save olsem ol man i dai pinis ol i no inap mekim wanpela samting. Orait, olsem wanem long ol samting i bin painim Agboola na ol narapela?

“Ol Spirit Nogut”

Taim Jisas i kamap bikpela man pinis, em i bin toktok wantaim ol spirit nogut. Ol i luksave long Jisas na kolim em “Pikinini Bilong God.” Jisas tu i save long ol i husat. Ol i no spirit bilong ol daiman, nogat. Jisas i tok ol i “spirit nogut.”​​—Matyu 8:​29-31; 10:8; Mak 5:8.

Baibel i stori long ol spirit i stap gut long God na ol spirit i bikhet long em. Buk Stat i stori olsem taim Jehova i rausim tupela bikhetman Adam na Iv long gaden Iden, em i putim ol strongpela ensel bilong sanap na was i stap long hap sankamap bilong gaden na bai i no gat wanpela man i ken go insait long en. (Stat 3:24) Dispela em i namba wan taim ol man inap lukim ol spirit.

Bihain sampela ensel i kam long graun na i tanim i kamap man. Jehova i no bin salim ol i kam bilong mekim wanpela wok long graun, nogat. Ol yet i bin “lusim ples bilong ol” long ples spirit. (Jut 6) Ol i tingting tasol long inapim laik bilong ol yet. Ol i kisim ol meri na ol i kamapim ol hapkas pikinini man em ol i kisim nem Nefilim. Ol Nefilim na ol bikhet papa bilong ol, ol i inapim dispela graun long pasin bilong pait na ol narapela pasin nogut tru. (Stat 6:​1-5) Jehova i stretim dispela hevi long rot bilong kamapim Bikpela Tait wara long taim bilong Noa. Bikpela Tait i pinisim tru ol man na meri nogut wantaim ol dispela hapkas man. Wanem samting i kamap long ol ensel?

Taim Bikpela Tait i kamap, ol i mas go bek long ples bilong ol. Tasol Jehova i pasim ol na ol i no kisim bek “dispela wok God i bin givim ol.” (Jut 6) Baibel i tok: “God i no larim ol. Nogat. Em i kalabusim ol i stap long hel [tok Grik, Tarʹta·rus], long dispela hul i tudak nogut tru. Na ol i kalabus i stap yet na wetim De bilong bikpela kot bilong God.”​—2 Pita 2:4.

Tartarus em i no wanpela ples tru, nogat, em i makim olsem God i daunim ol tru na ol i no inap mekim moa ol wok ol i save mekim bipo. Ol dispela spirit nogut i no inap tanim i kamap man moa, tasol ol i gat strong yet long mekim samting long tingting na laip bilong ol man. Ol inap bosim ol man na ol animal. (Matyu 12:​43-45; Luk 8:​27-33) Na tu, ol i save giamanim ol manmeri olsem ol i spirit bilong ol man i dai pinis. Bilong wanem ol i mekim olsem? Bilong pasim tingting bilong ol manmeri na bai ol i no ken lotuim Jehova long pasin we em i orait long en, na bilong paulim tingting bilong ol man long wanem samting tru i save painim man i dai.

Rot Bilong Daunim Pret

Agboola i kisim save olsem ol tok Baibel i mekim long man i dai pinis i stap olsem wanem, na ol spirit ol i husat, ol dispela tok i stret. Em i save olsem em i mas kisim sampela save moa. Em i kirap ritim Baibel na ol buk na nius bilong Baibel wantaim John. Agboola i amamas long kisim save olsem ol pikinini man bilong em, ol i slip long matmat, na ol i no stap long ples spirit bilong kamap wokboi bilong dispela man i bin kilim ol.​​—Jon 11:​11-13.

Agboola i kisim save tu olsem em i mas lusim olgeta pasin bilong mekim wok bilong ol spirit nogut. Em i kukim olgeta samting em i save yusim bilong mekim kain kain marila samting. (Aposel 19:19) Sampela long hap bilong em i tokim em olsem ol spirit bai mekim sampela samting nogut long em. Tasol Agboola i no pret. Em i bihainim tok bilong Efesus 6:​11, 12, olsem: “Pasim olgeta klos pait God i save givim long yumi, . . . [long wanem] yumi pait long olgeta spirit nogut.” Sampela hap bilong dispela klos pait, em tok i tru, stretpela pasin, gutnius bilong pasin wanbel, bilip, na bainat bilong holi spirit, em Tok Bilong God. Kain klos pait olsem i kam long God na i gat bikpela strong.

Taim Agboola i lusim ol pasin bilong ples em wok bilong ol spirit nogut i insait long en, ol pren na wanblut bilong em i givim baksait long em. Tasol long Haus Kingdom bilong ol Witnes Bilong Jehova, em i kisim ol nupela pren husat i bilip long ol tok bilong Baibel.

Nau Agboola i save olsem klostu nau Jehova bai klinim graun na rausim strong bilong ol spirit nogut na ol bai i no inap mekim moa wanpela wok. Na bihain Em bai pinisim ol. (KTH 20:​1, 2, 10) “Olgeta manmeri i stap long matmat,” God bai kirapim bek ol hia long graun. (Jon 5:​28, 29) Dispela i makim olsem Abel, na planti pikinini i no gat asua em King Herot i bin kilim ol i dai, na planti milion narapela em ol i dai, ol bai i kirap bek. Agboola i bilip olsem ol 3-pela pikinini man bilong em, ol tu bai i kirap bek. Ol famili bilong yu i dai pinis, ating ol tu bai i kirap bek. Olgeta dispela lain i kirap bek bai i stori olsem, kirap long taim ol i dai na i go inap long taim ol i kirap bek, ol i no gat save long wanpela samting, na tu, ol i no bin save long ol bung samting ol man i bin mekim bilong tingim ol.

Olsem na i no gat as na yu mas pret long ol daiman. Tasol yu ken amamas long wetim dispela taim yu bai bung gen wantaim ol man i dai pinis. Insait long dispela haptaim i stap yet, i gutpela sapos yu stadi long Baibel bilong strongim bilip bilong yu. Bung wantaim ol manmeri i bilip long ol tok bilong Baibel. Sapos yu mekim wok bilong ol spirit nogut, maski em liklik samting tasol yu mekim, yu mas lusim wantu. Sakim ol spirit nogut na lukautim yu yet long rot bilong “pasim olgeta klos pait God i save givim long yumi.” (Efesus 6:11) Ol Witnes Bilong Jehova bai amamas long helpim yu. Ol i save stadi long Baibel wantaim ol man, no gat pe, long rot bilong yusim buk Tru Tru Baibel i Tok Wanem?a

Agboola i no pret moa long ol man i dai pinis, na em i save long olsem wanem em i ken sakim ol spirit nogut. Em i tok: “Mi no save husat i kilim ol 3-pela pikinini man bilong mi. Tasol kirap long taim mi mekim wok bilong Jehova, mi gat narapela 7-pela pikinini. I no gat wanpela man i stap long ples spirit i bin bagarapim ol.”

[Futnot]

[Rait long pes 13]

Agboola i no pret moa long ol man i dai pinis, na em i save long olsem wanem em i ken sakim ol spirit nogut

[Piksa long pes 12]

Kein i no pret olsem dispela brata bilong em i dai bai i kirap na mekim nogut long em