Tok Bilong Jehova i Gat Laip
Sampela Bikpela Tok Bilong Buk Stat—Namba Wan
BUK STAT long Baibel i stori long olsem wanem heven na graun i kamap, na olsem wanem ol samting i bin kamap bilong redim graun bambai ol man i ken i stap long en, na olsem wanem ol man i kamap na i stap long graun. Moses i raitim dispela buk long ples drai nating bilong Sainai, na ating em i pinisim dispela buk long yia 1513 B.C.E.
Buk Stat i stori long ol samting paslain long Bikpela Tait, na wanem samting i kamap bihain long Bikpela Tait, na ol samting Jehova i mekim long Abraham, Aisak, Jekop, na Josep. Dispela stori bai kamapim sampela bikpela tok bilong Stat 1:1–11:9, na i go inap long taim Jehova i kirap mekim ol samting long Abraham.
PASLAIN LONG BIKPELA TAIT
Dispela tok “bipo bipo tru” long kirap bilong ves 1 long Stat i makim planti bilion yia bipo. Ol i raitim stori long ol samting i bin kamap long dispela 6-pela, “de” o haptaim God i bin wokim ol samting long pasin i olsem wanpela man i bin stap long graun long dispela taim na i lukim ol samting i kamap. Long pinis bilong de namba 6, God i wokim man. Maski Paradais i lus, long wanem, namba wan man i no bihainim tok, tasol Jehova i tok promis long givim ol man ol gutpela samting ol i ken wet long kisim. Namba wan tok profet bilong Baibel i toktok long wanpela “lain” husat bai pinisim olgeta samting sin i kamapim na krungutim het bilong Satan.
Insait long 1,600 yia bihain long dispela, Satan i mekim na olgeta man i givim baksait long God, tasol i gat sampela i stap gut long God olsem, Abel, Enok, na Noa. Kein i kilim i dai brata bilong em, Abel, em i stretpela man. “Long dispela taim ol man i stat long kolim nem bilong Bikpela na lotu long em” long pasin i no stret. Lamek i kamapim pasin nogut long taim bilong em taim em i kamapim wanpela liklik stori long olsem wanem em i bin kilim wanpela yangpela man, na em i tok em i mekim olsem bilong lukautim em yet. Ol samting i go nogut moa taim ol bikhet ensel i kisim ol meri bilong graun olsem meri bilong ol na kamapim ol traipela pikinini man ol i kolim Nefilim. Maski i olsem, gutpela man Noa i wokim sip, na em i no pret long givim tok lukaut long ol man long Bikpela Tait bai kamap, na em wantaim famili bilong em i abrusim bagarap.
Bekim Bilong Ol Askim Bilong Baibel:
1:16—Olsem wanem God inap mekim lait i kamap long de namba wan sapos em i no bin wokim yet ol sta samting inap long de namba 4? Tok Hibru long ves 16, em Buk Baibel i tanim olsem “mekim kamap,” i no wankain long dispela tok Hibru long Stat sapta 1, ves 1, 21, na 27, em Buk Baibel i tanim olsem “mekim kamap” na “wokim.” God i bin wokim “skai,” olsem san, mun na ol sta samting, longtaim i go pinis paslain long dispela “de namba wan” i kirap. Tasol lait bilong ol dispela sta samting i no bin givim lait long graun. Long de namba wan “lait i kamap,” long wanem, lait i sut i kam ausait long ol klaut na i go long olgeta hap bilong graun. Olsem na taim graun i tanim tanim i gat taim bilong tulait na tudak. (Stat 1:1-3, 5) Tasol ol samting i kamapim dispela lait i no stap ples klia yet. Long de namba 4 wanpela senis i kamap. San, mun na ol sta nau i ken “givim lait long graun.” (Stat 1:17) “God i mekim kamap” san, mun na sta i stap ples klia na sapos i gat ol man i stap long graun ol inap lukim ol.
3:8, 9—Yu ting God Jehova i bin toktok stret long Adam? Baibel i tokaut olsem taim God i laik toktok long ol man em i save mekim olsem long rot bilong ensel. (Stat 16:7-11; 18:1-3, 22-26; 19:1; Hetman 2:1-4; 6:11-16, 22; 13:15-22) Nambawan mausman bilong God, em dispela wanpela Pikinini Man bilong em, Baibel i kolim “Tok.” (Jon 1:1) Ating God i bin toktok long Adam na Iv long rot bilong “Tok.”—Stat 1:26-28; 2:16; 3:8-13.
3:17—Olsem wanem God i bagarapim graun? Dispela strongpela tok God i mekim long graun i stap inap long wanem taim? God i bagarapim graun na dispela i makim olsem bai i hatwok long wokim gaden na kamapim kaikai. Graun i pulap tru long ol rop i gat nil na ol gras nogut na ol tumbuna pikinini bilong Adam i pilim hatwok tru taim ol i wokim gaden, olsem na papa bilong Noa, em Lamek, em i tok olsem “Bikpela i bin mekim strongpela tok bilong bagarapim graun na mipela i mas hatwok tru long mekim kaikai i kamap gut.” (Stat 5:29) Bihain long Bikpela Tait, Jehova i blesim Noa na ol pikinini man bilong em, na em i tokaut long laik bilong em olsem ol i mas pulapim dispela graun. (Stat 9:1) Olsem na dispela i soim olsem God i rausim dispela strongpela tok em i mekim long graun na graun i no bagarap moa.—Stat 13:10.
4:15—Olsem wanem Jehova “i putim wanpela mak long Kein”? Baibel i no tok olsem God i putim wanpela mak long skin bilong Kein, nogat. Ating dispela mak i olsem wanpela tambu ol man i save long en na ol i bihainim na bai ol i no ken kilim em i dai bilong bekim pasin birua em i bin mekim.
4:17—Kein i kisim we meri bilong em? Adam i “gat ol arapela pikinini man na meri tu.” (Stat 5:4) Olsem na Kein i maritim susa bilong em o ating pikinini bilong wanpela brata o susa bilong em. Bihain, Lo God i givim long ol Israel i no orait long brata na susa tru i marit.—Wok Pris 18:9.
5:24—Long wanem rot God i “kisim” Enok? Ol man i laik kilim i dai Enok, tasol God i no larim ol birua bilong em i bagarapim em. Aposel Pol i tok, “God i kisim em i go . . . bai em i no ken i dai.” (Hibru 11:5) Dispela i no makim olsem God i kisim em i go long heven na bai em i ken i stap laip, nogat. Jisas i bin i go long heven paslain long ol narapela man. (Jon 3:13; Hibru 6:19, 20) Yumi ken ting olsem dispela tok “God i kisim em i go . . . bai em i no ken i dai” i makim olsem God i mekim na long tingting Enok i kisim wanpela kain driman, na taim em i stap olsem, God i pinisim laip bilong em. Taim God i mekim olsem, Enok i no pilim pen bilong i dai long han bilong ol birua bilong em.
6:6—Olsem wanem na i stret Jehova “i ting i gutpela sapos em i no bin wokim ol manmeri”? Tok Hibru ol i tanim long dispela hap bilong ves i makim man i senisim tingting o laik bilong em. Jehova em i stretpela olgeta olsem na em i no bin popaia long wokim ol man. Tasol em i senisim tingting bilong em long ol dispela man nogut i stap paslain long taim bilong Bikpela Tait. Pastaim God i stap Man Bilong Wokim ol man tasol bihain em i senisim tingting bilong em na em i kamap olsem man bilong bagarapim ol man, long wanem, em i bel hevi long pasin nogut bilong ol. Tasol em i bin lukautim sampela manmeri na dispela i kamapim klia olsem em i ting i gutpela sapos em i no bin wokim ol manmeri em ol i bin kamap manmeri nogut.—2 Pita 2:5, 9.
7:2—Wanem samting i stap olsem mak bilong soim olsem animal i klin na i no klin? Ol animal ol i save mekim wok long en bilong mekim ofa long lotu, dispela i olsem mak i soim olsem animal i klin o i no klin. Na i no wanem kain animal i bilong kaikai na wanem kain animal i no bilong kaikai. Ol man i no bin kaikai mit bilong animal paslain long Bikpela Tait. Dispela tupela tok “klin” na “i no klin” em ol i kolim long ol kaikai, i kamap taim Lo Bilong Moses i stap, na ol i pinis taim dispela Lo i pinis. (Aposel 10:9-16; Efesus 2:15) Ating Noa i save long wanem kain animal i stret bilong mekim ofa long Jehova. Olsem na taim em i lusim sip, em i “wokim wanpela alta bilong lotu long Bikpela. Na em i kisim wanpela wanpela long olgeta kain animal na pisin i klin long ai bilong Bikpela, na em i kilim ol bilong mekim ofa. Na em i kukim ol antap long alta.”—Stat 8:20.
7:11—Wara i kamapim Bikpela Tait i kam long we? Long de namba 2 bilong wokim ol samting, God i tok “wanpela banis i mas kamap bilong banisim wara,” long “antap” na long “daunbilo.” (Stat 1:6, 7) Wara “daunbilo” em ol wara i stap pinis long graun. Wara “antap” em i stap antap tru long skai na em i “bikpela wara.” Dispela bikpela wara i stap antap i pundaun long graun long taim bilong Noa.
Skul Yumi Kisim:
1:26. God i wokim yumi i kamap olsem em yet, olsem na yumi inap long bihainim ol pasin bilong em. Yumi mas wok long kisim ol kain pasin olsem, pasin bilong laikim narapela, marimari, helpim ol man, mekim gutpela pasin long ol, na no ken les kwik, na long dispela rot yumi bihainim pasin bilong dispela Man i wokim yumi.
2:22-24. Marit em samting God yet i kamapim. Marit em i bilong i stap oltaim na em i samting holi, na man marit em i het bilong famili.
3:1-5, 16-23. Yumi inap i stap amamas sapos yumi tingim wok king bilong Jehova long i stap bilong yumi.
3:18, 19; 5:5; 6:7; 7:23. Olgeta tok bilong Jehova i save kamap tru.
4:3-7. Jehova i laikim ofa bilong Abel, long wanem, em i stretpela man i gat bilip. (Hibru 11:4) Tasol pasin bilong Kein i kamapim klia olsem em i no gat bilip. Em i jeles na bel nogut na bihain em i kilim brata bilong em, dispela i kamapim klia olsem pasin bilong em i nogut. (1 Jon 3:12) Na tu, em i no tingim tumas ofa bilong em na em i givim nating tasol. Yumi mas mekim ol ofa bilong litimapim nem bilong Jehova long bel olgeta na yumi mas i gat stretpela tingting taim yumi mekim olsem.
6:22. Maski Noa i lusim planti yia bilong wokim sip, em i bihainim tok bilong God na mekim ol samting God i tokim em long mekim. Olsem na Noa na famili bilong em i abrusim Bikpela Tait. Jehova i save toktok wantaim yumi long rot bilong Baibel na em i save stiaim yumi long rot bilong oganaisesen bilong em. Sapos yumi harim na bihainim dispela bai helpim yumi.
7:21-24. Jehova i no inap bagarapim ol stretpela man wantaim ol man nogut.
OL MAN I KAMAP LONG WANPELA NUPELA TAIM
Taim Bikpela Tait i pinis, ol man i kamap long wanpela nupela taim. God i givim tok orait long ol man i ken kaikai mit bilong animal tasol em i putim tambu long ol i no ken kaikai blut. Jehova i orait long ol man i ken kilim i dai ol man husat i kilim i dai narapela, na em i kamapim kontrak bilong renbo, na em i tok promis olsem em bai i no inap kamapim gen narapela Bikpela Tait wara. Ol tripela pikinini man bilong Noa ol i kamap tumbuna bilong olgeta manmeri, tasol tumbuna pikinini bilong Noa, em Nimrot, em i “bikhet long Jehova na em i strongpela man bilong raunim ol animal.” Ol man i no go long olgeta hap bilong graun na pulimapim graun, nogat, ol i kirap na wokim wanpela taun ol i kolim Babel na wanpela longpela taua bambai ol man i lukim ol dispela samting ol i wokim na givim biknem long ol. Jehova i pasim samting ol i laik mekim taim em i paulim tok ples bilong ol na em i mekim ol i bruk nabaut na i go long olgeta hap bilong graun.
Bekim Bilong Ol Askim Bilong Baibel:
8:11—Sapos olgeta diwai i bagarap long taim bilong Bikpela Tait, pisin balus i kisim we dispela lip bilong diwai oliv? I gat tupela rot. Diwai oliv em i strongpela diwai, olsem na ating em i no kisim bagarap taim em i stap aninit long wara inap sampela mun long taim bilong Bikpela Tait. Na taim wara i go daun, diwai oliv i stap gen long graun i drai na em inap long kamapim ol nupela lip. O ating pisin balus i kisim wanpela nupela kru bilong diwai oliv i go long Noa, em dispela kru nau tasol i kamap bihain long tait wara i go daun.
9:20-25—Bilong wanem Noa i tok bikpela hevi i ken painim Kenan? Ating Kenan i bin mekim sampela kain pasin sem long bubu papa bilong em, Noa. Maski papa bilong Kenan, em Ham, i lukim dispela pasin Kenan i mekim, em i no pasim Kenan, nogat, ating em i stori long dispela samting long ol narapela. Tasol tupela narapela pikinini bilong Noa, em Siem na Jafet, tupela i karamapim papa bilong tupela long laplap. Tupela i kisim blesing long dispela pasin tupela i bin mekim, tasol Noa i tok bikpela hevi i ken painim Kenan, na Ham tu i kisim hevi long pasin em pikinini bilong em i mekim.
10:25—Olsem wanem na long taim bilong Pelek ol manmeri bilong graun i “bruk bruk nabaut”? Pelek i bin stap long yia 2269 i go 2030 B.C.E. Long “taim Pelek i stap” Jehova i paulim tok ples bilong ol man i wokim taun Babel na ol i go long olgeta hap bilong graun. (Stat 11:9) Olsem na “ol manmeri bilong graun i bruk bruk nabaut” long taim bilong Pelek.
Skul Yumi Kisim:
9:1; 11:9. I no gat wanpela samting o wok ol man i mekim inap pasim Jehova long kamapim ol samting em i tingting pinis long mekim.
10:1-32. Tupela lista bilong ol lain tumbuna i stap long sapta 5 na sapta 10 i soim olsem olgeta lain man i kamap bihain long Bikpela Tait i kam long namba wan man Adam long rot bilong tripela pikinini man bilong Noa. Ol lain Asiria, Kaldia, Hibru, Siria, na sampela lain bilong Arebia, ol i tumbuna pikinini bilong Siem. Ol lain Itiopia, Isip, Kenan, na sampela lain bilong Afrika na Arebia ol i tumbuna pikinini bilong Ham. Ol lain Indo-Yuropian ol i tumbuna pikinini bilong Jafet. Olgeta manmeri i bin kamap long wanpela tumbuna tasol, na taim mama i karim ol, ol i wankain tasol long ai bilong God. (Aposel 17:26) Dispela tok i tru i mas stiaim tingting na pasin yumi mekim long ol narapela.
Tok Bilong God i Gat Strong
Namba wan hap bilong Buk Stat i kolim stret ol samting i bin kamap long pastaim tru. Long ol dispela ves, yumi kisim save long wanem as na God i putim ol man long graun. Yumi amamas long save olsem i no gat wanpela samting ol man i mekim, olsem Nimrot i bin mekim, inap pasim God long truim tok bilong em!
Taim yu ritim hap bilong Baibel ol i makim bilong ritim bilong redi long Skul Tiokratik Bilong Autim Tok, skelim ol tok i stap aninit long dispela hap, “Bekim Bilong Ol Askim Bilong Baibel” na dispela bai helpim yu long klia gut long sampela tok bilong Baibel i hatwok long kisim insait bilong en. Ol tok i stap aninit long dispela hap, “Skul Yumi Kisim” bai stori long olsem wanem Baibel ritim bilong wan wan wik bai helpim yu. Sapos i stret long mekim, ol i ken mekim wok long ol dispela tok long Miting Bilong Wok taim ol i mas kamapim sampela tok bilong helpim kongrigesen. Tru tumas, Tok Bilong God i gat laip na em inap wok strong long laip bilong yumi.—Hibru 4:12.