Tok Bilong Jehova i Gat Laip
Sampela Bikpela Tok Bilong Buk Kisim Bek
EM I wanpela trupela stori bilong God i kisim bek wanpela lain em ol narapela lain i bin mekim ol i “wok hat nogut tru.” (Kisim Bek 1:13) Na tu, em i stori long olsem wanem wanpela lain i kamap. Ol narapela kain mirakel, nambawan lo stret, na wok bilong wokim haus lotu sel, em ol gutpela stori insait long dispela buk. Em ol dispela samting Buk Kisim Bek i stori long en.
Profet Hibru Moses i bin raitim dispela buk, na Kisim Bek i stori long ol samting i bin painim Israel insait long 145 yia—kirap long taim Josep i dai long yia 1657 B.C.E. i go inap long taim ol i pinisim haus lotu sel long yia 1512 B.C.E. Tasol ol samting dispela buk i stori long en i no stori tasol long ol samting i bin kamap bipo, nogat. Em wanpela hap bilong tok bilong God i go long ol man. Olsem na “em i gat laip, na em i wok strong i stap.” (Hibru 4:12) Tok bilong Kisim Bek i gat mining tru long yumi.
“GOD I HARIM KRAI BILONG OL”
Ol lain tumbuna pikinini bilong Jekop i sindaun long Isip i kamap bikpela lain tru, olsem na king i tok long ol i mas wok hat tru olsem ol wokboi nating. Na Fero i givim lo tu long ol i mas kilim olgeta pikinini man bilong ol Israel. Wanpela pikinini i abrusim dispela bagarap, em Moses, em pikinini meri bilong Fero i adoptim em. Maski em i go bikpela long haus bilong king, taim em i gat 40 krismas, Moses i helpim ol lain bilong em na kilim i dai wanpela man Isip. (Aposel 7:23, 24) Em i mas ranawe, olsem na em i ranawe i go long Midian. Long Midian em i marit na em i stap olsem wasman bilong ol sipsip. Jehova i wokim mirakel na bus i paia, na em i tokim Moses long i go bek long Isip na bringim ol lain Israel i go lusim wok kalabus. Jehova i makim brata bilong em, Aron long i stap olsem mausman bilong em.
Bekim Bilong Ol Askim Bilong Baibel:
3:1—Jetro em i wanem kain pris? Long bipo ol het bilong famili i save stap olsem pris bilong famili. Jetro em i het bilong wanpela lain bilong Midian. Ol lain Midian ol i tumbuna pikinini bilong Abraham long rot bilong Ketura, na ating ol i save long lotu bilong Jehova.—Stat 25:1, 2.
4:11—Olsem wanem Jehova i save ‘mekim man i yaupas, mauspas, na aipas’? Tru sampela taim Jehova i bin mekim man i aipas na yaupas, tasol em i no as bilong olgeta bagarap i kamap long skin. (Stat 19:11; Luk 1:20-22, 62-64) Sin i as bilong ol dispela bagarap. (Jop 14:4; Rom 5:12) Tasol Jehova i bin larim dispela samting i stap, olsem na i stret em i tok long em yet olsem em i ‘mekim’ man i yaupas, mauspas, na aipas.
4:16—Olsem wanem Moses i “stap olsem God” long ai bilong Aron? Moses em i mausman bilong God. Olsem na Moses i stap “olsem God” long ai bilong Aron, na Aron i stap olsem mausman bilong Moses.
Skul Yumi Kisim:
1:7, 14. Jehova i bin helpim ol lain bilong em taim ol man i mekim nogut long ol long Isip. Long nau tu, em i save helpim ol Witnes bilong em na em i save mekim olsem taim ol man i mekim nogut tru long ol.
1:17-21. Jehova i save tingim ol gutpela samting yumi mekim na em i “mekim gut long” yumi.—Nehemia 13:31.
3:7-10. Jehova i save harim krai bilong ol manmeri bilong em.
3:14, NW. Jehova i save mekim ol samting em i tingting pinis long mekim. Olsem na yumi ken bilip tru olsem em bai mekim ol samting Baibel i stori long en na yumi bilip na wet long en.
4:10, 13. Moses i no bilip olsem em inap long toktok gut, na maski God i tok long helpim em, em i strong long God i mas salim narapela man long i go toktok long Fero. Maski i olsem, Jehova i yusim Moses na givim em gutpela tingting na save na strong inap long em i mekim wok God i givim em. Yumi no ken tingting tumas long ol samting yumi no inap long mekim, yumi mas bilip long Jehova na givim bel long mekim wok bilong yumi long autim tok na skulim ol man.—Matyu 24:14; 28:19, 20.
OL NARAPELA KAIN MIRAKEL I HELPIM OL
Moses na Aron i go lukim Fero, na tupela i askim em long larim ol Israel long i go long ples drai nating na mekim bikpela lotu bilong litimapim nem bilong Jehova. King bilong ol Isip i bikhet na i no orait long ol i go. Jehova i mekim wok long Moses long tokaut long olgeta wan wan hevi i bin painim ol. Bihain long namba 10 hevi Fero i larim ol Israel i go. Tasol i no longtaim bihain, Fero na ami bilong em i givim siksti i go bihainim ol. Tasol Jehova i wokim rot bilong ol manmeri bilong em long wokabaut namel long solwara Retsi na ol i abrusim bagarap. Ol Isip i bihainim ol i go na ol i dring wara na dai taim solwara i go bek gen long ples bilong en.
Bekim Bilong Ol Askim Bilong Baibel:
6:3—Olsem wanem Abraham, Aisak, na Jekop i no bin save long nem bilong God? Ol dispela man i bin yusim nem bilong God na ol i kisim ol tok promis long Jehova. Tasol ol i no bin save long Jehova olsem man bilong truim ol dispela tok promis em i bin mekim.—Stat 12:1, 2; 15:7, 13-16; 26:24; 28:10-15.
7:1—Olsem wanem Moses i stap olsem “God long ai bilong King”? God i givim Moses strong na namba i winim Fero. Olsem na i no gat as long em i pret long king.
7:22—Ol glasman bilong Isip i kisim we wara i no bin tanim i kamap blut? Ating ol i yusim sampela wara em ol i bin kisim paslain long wara Nail i tanim i kamap blut. Ol inap kisim gutpela wara bilong dring tu sapos ol i wokim hul wara klostu long wara Nail.—Kisim Bek 7:24.
8:26, 27—Bilong wanem Moses i tok olsem ol abus ol Israel bai mekim ofa long en bai ‘mekim ol Isip i bel nogut long ol’? Ol Isip i save lotuim planti kain kain animal. Taim Moses i toktok long ol ofa dispela i strongim tok bilong em long ol Israel i mas i go long narapela hap na mekim ofa long Jehova.
12:29—Husat ol i namba wan pikinini? Ol namba wan pikinini i makim ol pikinini man tasol. (Namba 3:40-51) Fero yet em i wanpela namba wan pikinini man, tasol em i no dai. Em i gat famili bilong em yet. I no papa bilong ol famili i dai taim namba 10 hevi i kamap, nogat, em namba wan pikinini man bilong famili i dai.
12:40—Ol Israel i stap hamas yia long Isip? Dispela 430 yia em dispela ves i kolim em i makim dispela haptaim ol Israel i stap long “Isip na long Kenan.” (Lukim sta long Kisim Bek 12:40, New World Translation of the Holy Scriptures—With References.) Long 1943 B.C.E. taim Abraham i gat 75 krismas, em i brukim wara Yufretis bilong i go long Kenan. (Stat 12:4) Kirap long dispela taim inap long taim Jekop husat i gat 130 krismas i go long Isip em inap 215 yia olgeta. (Stat 21:5; 25:26; 47:9) Dispela i makim olsem ol lain Israel i bin stap narapela 215 yia long Isip.
15:8—Olsem wanem? Taim Retsi i “kamap strong” dispela i makim olsem em i kamap ais? Tok Hibru ol i tanim olsem “kamap strong” i makim samting i kamap strong kain olsem nangu o plaua ol i tanim pinis. Olsem na, wara i kamap strong i no makim olsem wara i kamap ais, nogat. Sapos dispela “strongpela win i kamap long hap sankamap” em Kisim Bek 14:21 i toktok long en i bin kol nogut tru na em i mekim wara i kamap ais, orait ol bai stori long dispela samting. Ol man i no inap lukim wanem samting i pasim wara, tasol lukluk bilong en i olsem em i kamap strong.
Skul Yumi Kisim:
7:14–12:30. Ol dispela Tenpela Bikpela Hevi i no kamap nating tasol. Moses i bin tok profet olsem ol dispela hevi bai kamap na ol i kamap long taim stret olsem Moses i tok long en. Dispela Tenpela Bikpela Hevi i kamapim klia olsem Man Bilong Wokim olgeta samting i bosim wara, lait bilong san, ol binatang, na ol man! Na tu ol dispela hevi i soim olsem God inap bagarapim ol birua bilong em na long wankain taim em inap lukautim ol lain i lotuim em.
11:2; 12:36. Jehova i blesim ol manmeri bilong em. Em i mekim ol samting bambai ol Israel i kisim pe bilong wok ol i mekim long Isip. Taim ol i bin i go long Isip ol i stap fri, na i no olsem ol Isip i bin pait na kisim ol olsem kalabusman na bai ol i ken i stap olsem ol wokboi nating, nogat.
14:30. Yumi ken bilip tru olsem Jehova bai kisim bek ol man i lotuim em long taim bilong dispela “bikpela hevi tru” bai kamap.—Matyu 24:20-22; KTH 7:9, 14.
JEHOVA I KAMAPIM WANPELA GAVMAN TIOKRATIK
Tripela mun bihain long God i kisim bek ol long Isip, ol Israel i wokim kem klostu long maunten Sainai. Long dispela hap ol i kisim Tenpela Lo na ol narapela lo, na ol i wokim kontrak wantaim Jehova, na kamap wanpela gavman tiokratik, olsem gavman God i bosim. Moses i stap 40 de long maunten, na em i kisim ol tok long olsem wanem ol i ken lotu tru long God na wokim haus lotu sel bilong Jehova, em wanpela haus i no hatwok long karim raun. Long dispela taim, ol Israel i wokim wanpela bulmakau gol na lotu long en. Taim Moses i kam daun long maunten, em i lukim dispela pasin ol i mekim na em i belhat nogut tru na em i tromoi dispela tupela ston em God i givim em na tupela i bruk nabaut. Bihain long ol lain i bin mekim rong i kisim bagarap pinis, orait em i go bek gen long maunten na kisim gen narapela tupela ston i gat rait. Taim Moses i kam bek, ol i kirapim wok bilong wokim haus lotu sel. Long pinis bilong namba wan yia bilong ol Israel long i stap fri, ol i pinisim haus lotu sel na olgeta bilas bilong en. Orait Jehova i pulimapim haus lotu sel long bikpela lait bilong em.
Bekim Bilong Ol Askim Bilong Baibel:
20:5—Olsem wanem Jehova i save “mekim save long ol” manmeri i gat asua na long ol tumbuna bilong ol i kamap bihain? Taim wanpela man i kamap bikpela pinis, God i save skelim pasin na tingting bilong em. Tasol taim ol Israel i kirap lotuim ol giaman god, ol lain tumbuna bilong ol i kamap bihain i karim hevi bilong dispela samting. Ol Israel i stap gut long God ol tu i pilim hevi bilong dispela samting, long wanem, pasin bilong ol narapela Israel long i no bihainim stret lotu i tru i mekim na i hatwok long ol gutpela manmeri Israel long bihainim pasin bilong i stap gut long God.
23:19; 34:26—Bilong wanem em i bikpela samting long ol Israel i no ken kisim susu bilong meme na putim long sospen na kukim pikinini bilong dispela meme long en? Ol i tok pasin bilong boilim pikinini (pikinini bilong meme o ol narapela animal) insait long susu bilong mama bilong em, em i pasin ol haiden i save mekim na ol i ting dispela bai kamapim ren. Na tu, susu bilong mama i bilong helpim pikinini bilong em, na sapos man i boilim pikinini bilong en insait long susu bilong mama em wanpela pasin nogut tru. Dispela lo i helpim ol lain bilong God long save olsem ol i mas i gat pasin sori.
23:20-23—Husat dispela ensel em dispela ves i kolim? Na olsem wanem Jehova “i stap wantaim em”? Ating dispela ensel em Jisas taim em i no kam daun yet long graun. God i givim wok long em long stiaim ol Israel i go long Graun Bilong Promis. (1 Korin 10:1-4) Jehova “i stap wantaim em” i makim olsem Jisas em i nambawan man husat i bin stap gut long em na i givim biknem long Papa bilong em.
32:1-8, 25-35—Bilong wanem God i no givim strafe long Aron long em i bin wokim dispela bulmakau gol? Aron i no wanbel long lotuim dispela god giaman. Bihain em i bung wantaim ol narapela Levi na stap gut long God na bagarapim olgeta lain i no daun long Moses. Bihain long ol i kilim i dai olgeta man i bin mekim rong, Moses i tokim ol manmeri olsem sin ol i bin mekim i nogut tru, na dispela i soim olsem Jehova i bin marimari long sampela narapela manmeri tu, i no long Aron tasol.
33:11, 20—Olsem wanem God i bin toktok wantaim Moses “olsem man i save toktok wantaim pren bilong en”? Dispela tok i makim pasin bilong tupela man i toktok gut wantaim. Moses i toktok wantaim wanpela mausman bilong God na em i kisim tok bilong Jehova long rot bilong dispela mausman. Tasol Moses i no lukim Jehova, long wanem, ‘sapos wanpela man i lukim God em bai i dai.’ Jehova yet i no bin toktok wantaim Moses. Galesia 3:19 i tok long Lo olsem, “God i givim dispela lo long ol ensel na ol i autim long wanpela namelman na namelman em i givim long yumi.”
Skul Yumi Kisim:
15:25; 16:12. Jehova i save lukautim ol manmeri bilong em.
18:21. Ol man ol i makim bilong holim ol wok insait long kongrigesen Kristen i mas i gat save na i aninit long God, na ol narapela inap bilip long ol, na ol i no save tingim ol yet tasol.
20:1–23:33. Jehova em i nambawan Man Bilong Givim Lo. Taim ol Israel i bihainim ol lo bilong em, dispela i helpim ol long lotuim em wantaim amamas na long pasin i stret. Jehova i gat wanpela oganaisesen tiokratik i stap long nau. Taim yumi wok gut wantaim em dispela bai mekim yumi i stap amamas na i stap gut.
I Gat Bikpela Mining Bilong En Long Taim Bilong Yumi
Buk Kisim Bek i givim wanem save long yumi long Jehova? Em i soim olsem Jehova em i Man Bilong Givim ol gutpela samting long ol man, na Man Bilong Kisim Bek ol man, na Man Bilong Truim olgeta samting em i tingting pinis long mekim. Em i God bilong bihainim pasin tiokratik long bosim ol manmeri bilong em.
Taim yu mekim Baibel ritim bilong wan wan wik bilong redi long Skul Tiokratik Bilong Autim Tok, bai yu pilim tru ol samting yu lainim long Buk Kisim Bek. Taim yu skelim ol samting i stap aninit long dispela hap, “Bekim Bilong Ol Askim Bilong Baibel,” bai yu kisim gut insait bilong sampela tok bilong Baibel. Ol tok i stap aninit long dispela hap, “Skul Yumi Kisim” bai soim yu olsem wanem Baibel ritim bilong wan wan wik bai helpim yu.
[Piksa long pes 24, 25]
Jehova i tokim Moses, em man bilong mekim pasin daun, long bringim lain Israel i go lusim wok kalabus
[Piksa long pes 25]
Dispela Tenpela Bikpela Hevi i kamapim klia olsem Man Bilong Wokim olgeta samting i bosim wara, lait bilong san, ol binatang, animal, na ol man
[Piksa long pes 26, 27]
Long rot bilong Moses, Jehova i kamapim wanpela gavman tiokratik i bosim ol Israel