“Lo Bilong Jehova Em i Stret Olgeta”

1, 2. Bilong wanem planti man i no laikim lo? Yumi inap kisim wanem kain tingting long lo bilong God?

“LO I olsem traipela hul i no gat as, em . . . i pinisim olgeta samting.” Dispela tok i stap long wanpela buk ol i wokim long 1712. Man i raitim dispela buk i toktok planti long pasin bilong kot long mekim wok, em sampela taim kot i skelim wanpela samting inap planti yia, na pinisim mani bilong ol man i laik bai kot i helpim ol. Long planti kantri, i hatwok long save gut long ol samting bilong lo na wok bilong kot, pasin i no stret i pulap long en, i gat pasin bilong bel nogut, na pasin bilong paulim ol samting, olsem na planti man i daunim lo.

² Tasol tingim tok wanpela man i bin raitim inap 2,700 yia i go pinis: “Mi laikim tru lo bilong yu!” (Buk Song 119:97) Bilong wanem man bilong raitim song i laikim tru dispela lo? Long wanem, lo em i litimapim i kam long Jehova God, na i no kam long wanpela gavman bilong graun. Taim yu stadi long ol lo bilong Jehova, yu inap kisim wankain tingting olsem dispela man bilong raitim song. Kain stadi olsem bai givim save long yu long tingting bilong nambawan gutpela man bilong wokim lo.

3, 4. Long wanem ol rot Jehova i kamapim olsem em i Man Bilong Givim Lo?

³ Baibel i tokim yumi olsem: “I gat wanpela man tasol em i Man Bilong Givim Lo na Jas.” (Jems 4:12) Tru tumas, Jehova tasol em i Man Bilong Givim Lo. Em i putim tu “ol lo” i bosim raun bilong ol samting bilong ples antap. (Jop 38:33) Ol lo bilong God i stiaim bikpela lain ensel holi bilong Jehova, em i makim wok bilong ol wan wan na ol i mekim wok aninit long wok bos bilong Jehova na stap olsem ol wokman bilong em.​—Buk Song 104:4; Hibru 1:7, 14.

⁴ Jehova i bin givim ol lo long ol manmeri tu. Yumi olgeta i gat maus bilong bel, em i olsem mak bilong stretpela pasin bilong Jehova. Em olsem lo i stap insait long yumi, maus bilong bel inap helpim yumi long save wanem pasin i stret na wanem pasin i no stret. (Rom 2:14) Maus bilong bel bilong namba wan tumbuna papamama bilong yumi i gutpela olgeta, olsem na ol i no gat wok long planti lo. (Stat 2:15-17) Tasol man i gat sin i mas i gat planti lo moa bilong stiaim em long mekim laik bilong God. Ol bilipman olsem Noa, Abraham, na Jekop, ol i bin kisim ol lo long Jehova God na bihain ol i kamapim long famili bilong ol. (Stat 6:22; 9:3-6; 18:19; 26:4, 5) Jehova i kamap Man Bilong Givim Lo long pasin i narapela kain taim em i givim Lo long lain Israel long rot bilong Moses. Long rot bilong dispela lo yumi inap kisim save moa long tingting bilong Jehova long wanem pasin i stret.

 5. Yu ting Lo Bilong Moses i gat planti lo tumas na i hatwok long kliagut long en? I gat wanem as na yu bekim olsem?

⁵ Planti i ting Lo Bilong Moses i gat planti lo tumas na i hatwok long kliagut long en. Kain tingting olsem i no tru. I gat winim 600 lo insait long Lo Bilong Moses. Yumi inap ting em planti lo, tasol tingim dispela: Klostu long yia 2000, ol lo bilong gavman bilong Yunaitet Stets i pulimapim inap 150,000 pes bilong ol buk bilong lo. Long olgeta tupela tupela yia, ol i kamapim 600 lo moa! Olsem na taim yumi skelim bikpela namba bilong ol lo bilong man, Lo Bilong Moses i no gat planti lo bilong en. Tasol Lo bilong God i stiaim lain Israel long ol samting bilong sindaun bilong ol em ol lo bilong nau i no save mekim. Yumi skelim sampela bilong ol.

6, 7. (a) Wanem samting i mekim na Lo Bilong Moses i narapela kain long olgeta narapela lo? Wanem lo i nambawan bikpela lo? (b) Olsem wanem lain Israel inap soim olsem ol i amamas long Jehova em i nambawan bos?

⁶ Lo i litimapim wok bos bilong Jehova. Olsem na Lo Bilong Moses i narapela kain long olgeta narapela lo. Nambawan bikpela lo bilong en i olsem: “Yupela ol Israel, harim: Jehova, em i God bilong yumi, na i gat wanpela Jehova tasol. Yupela i mas laikim Jehova, God bilong yupela. Yupela i mas laikim em long bel olgeta bilong yupela na long laip olgeta bilong yupela na long strong olgeta bilong yupela.” Olsem wanem lain bilong God i ken kamapim olsem ol i laikim em tru? Ol i mas mekim wok bilong em, na daun long wok bos bilong em.​—Lo 6:4, 5; 11:13.

⁷ Ol Israel i daun long ol man i gat namba long bosim ol na long dispela rot ol i soim olsem ol i amamas long wok bos bilong em. Ol papamama, ol hetman, ol jas, ol pris, na bihain ol king, olgeta i mekim wok bos God i givim ol. Jehova i tingim olsem pasin bilong bikhet long ol dispela man i gat namba i olsem pasin bilong bikhet long em yet. Tasol Jehova i belhat long ol man i gat namba sapos ol i hambak o mekim pasin i no stret long lain bilong em. (Kisim Bek 20:12; 22:28; Lo 1:16, 17; 17:8-20; 19:16, 17) Olsem na ol man i gat namba na ol man i daun long ol, ol i gat wok long stap gut long wok bos bilong God.

 8. Olsem wanem Lo i strongim pasin holi bilong Jehova?

⁸ Lo i strongim pasin holi bilong Jehova. Dispela tok “holi” i stap inap 280 taim long Lo Bilong Moses. Lo i helpim lain bilong God long save long wanem samting i klin na wanem samting i no klin, em i kolim 70 narapela narapela samting em inap mekim wanpela Israel i kamap doti long samting bilong lotu. Ol dispela lo i tok long pasin bilong stap klin long skin, ol samting bilong kaikai, na pasin bilong rausim pipia samting. Ol kain lo olsem i helpim tru ol man na ol i no sik planti.a Tasol ol dispela lo i gat bikpela wok moa—ol i bilong helpim ol manmeri long stap gut long ai bilong Jehova, na stap longwe long ol pasin nogut bilong ol lain i stap klostu long ol. Tingim wanpela bilong ol dispela lo.

9, 10. Lo i tok wanem long ol samting bilong maritpasin na pasin bilong karim pikinini? Ol dispela lo i kamapim wanem ol gutpela samting?

⁹ Lo i tok maritpasin—namel long ol lain i marit tu—na pasin bilong karim pikinini i mekim na ol i no stap klin inap sampela haptaim. (Wok Pris 12:2-4; 15:16-18) Ol dispela lo i no daunim ol dispela klinpela presen i kam long God. (Stat 1:28; 2:18-25) Nogat. Ol dispela lo i strongim pasin holi bilong Jehova, na i helpim ol man i lotuim em long ol i no ken kamap doti. Ol lain i stap klostu long lain Israel ol i bungim pasin bilong lotu wantaim maritpasin na ol pasin haiden bilong kamapim planti pikinini. Insait long lotu bilong ol Kenan i gat ol man na meri i mekim wok pamuk. Dispela i mekim na ol pasin sem i nogut tru i kamap na i go bikpela. Tasol Lo i mekim na ol samting bilong maritpasin i no insait liklik long pasin bilong lotuim Jehova.b Na Lo i kamapim ol narapela gutpela samting tu.

¹⁰ Ol dispela lo i lainim ol man long wanpela bikpela tok i tru.c Olsem wanem sin bilong Adam i kalap i go long olgeta lain man? Em long rot bilong maritpasin na pasin bilong karim pikinini, a? (Rom 5:12) Yes, Lo bilong God i kirapim lain bilong em long tingim olsem ol i gat sin. Taim mama i karim yumi, yumi olgeta i gat sin. (Buk Song 51:5) God i mas lusim rong bilong yumi na kisim bek yumi na bai yumi inap i go klostu long God holi bilong yumi.

11, 12. (a) Lo i kamapim wanem bikpela stiatok long wok bilong mekim kot long stretpela pasin? (b) Lo i gat wanem ol tok bilong pasim ol man long paulim kot?

¹¹ Lo i strongim stretpela pasin bilong Jehova. Lo Bilong Moses i strongim wanpela stiatok olsem strafe i mas stret long rong man i mekim. Lo i tok: “Laip em senis bilong laip, ai em senis bilong ai, tit em senis bilong tit, han em senis bilong han, na lek em senis bilong lek.” (Lo 19:21) Olsem na taim man i brukim lo, strafe bilong em i mas stret long samting em i bin mekim. Dispela stretpela pasin bilong God long mekim kot i stiaim Lo olgeta na i bikpela samting long nau bilong helpim ol man long save gut long wok bilong ofa Krais Jisas i givim bilong baim bek ol man, olsem Sapta 14 bai stori long en.​—1 Timoti 2:5, 6.

¹² Lo i gat ol tok i pasim ol man long paulim kot. Olsem: I mas i gat tupela man o moa olsem witnes bilong tokaut olsem ol samting i bin kamap tru. Man i giaman long kot i kisim strongpela strafe. (Lo 19:15, 18, 19) Lo i tambuim pasin korapsen na pasin bilong givim grismani. (Kisim Bek 23:8; Lo 27:25) Taim lain bilong God i mekim wok bisnis, ol i mas bihainim ol stretpela lo bilong Jehova. (Wok Pris 19:35, 36; Lo 23:19, 20) Dispela gutpela na stretpela lo i wanpela bikpela blesing bilong lain Israel!

13, 14. Olsem wanem Lo i strongim pasin bilong mekim stretpela pasin long stilman na man em i bin rongim?

¹³ Olsem wanem? Lo Bilong Moses i strong tumas, na i no marimari long ol man? Nogat tru! Holi spirit i kirapim King Devit long tok: “Lo bilong Jehova em i stret olgeta.” (Buk Song 19:7) Em i save gut olsem Lo i strongim pasin marimari na pasin bilong mekim wankain pasin long olgeta man. Lo i mekim dispela olsem wanem?

¹⁴ Long sampela kantri long nau, i luk olsem lo i isi liklik long ol man husat i brukim lo na i no tingim tumas ol man em narapela i rongim ol. Olsem: Ating ol stilman bai kalabus inap sampela haptaim. Tasol ol man em stilman i bin kisim ol samting bilong ol, ating ol i no kisim bek kago bilong ol, na ol i mas baim takis we gavman i yusim bilong baim haus kalabus we ol kain raskol man olsem i stap na bilong baim kaikai samting bilong ol insait long hap. Long Israel bilong bipo, i no gat ol haus kalabus olsem i gat long nau. Lo i putim ol mak long strafe ol inap givim long man, nogut strafe i strong tumas. (Lo 25:1-3) Stilman i mas bekim pe bilong ol samting em i bin stilim. Na tu, stilman i mas givim sampela samting moa long man em i bin stil long em. Hamas ol samting stilman i mas givim i no wankain long olgeta taim. I luk olsem ol jas i ken skelim kain kain samting, olsem man i mekim rong i tanim bel o nogat. Olsem na i gat as na long Wok Pris 6:1-7 pe em stilman i mas bekim i no bikpela olsem Kisim Bek 22:7 i tok stilman i mas bekim.

15. Lo i tok wanem na ol i mekim pasin marimari na stretpela pasin long man i popaia na kilim i dai narapela?

¹⁵ Lo i marimari na i tokaut olsem olgeta rong man i mekim i no olsem em i mekim long laik bilong em yet. Olsem: Taim man i popaia na kilim i dai narapela, i no olsem em i mas i dai bilong bekim dispela rong sapos em i ranawe i go long wanpela taun bilong hait em ol i stap long olgeta hap bilong Israel. Taim ol jas i skelim pinis ol samting man i bin mekim, em i mas i stap long taun bilong hait i go inap long taim hetpris i dai. Bihain long dispela em i fri long sindaun long wanem wanem hap em i laikim. Olsem na pasin marimari bilong God i helpim em. Na tu, dispela lo i kamapim klia olsem laip bilong man i bikpela samting.​—Namba 15:30, 31; 35:12-25.

16. Olsem wanem Lo i lukautim raits bilong ol man?

¹⁶ Lo i lukautim raits bilong man. Tingim olsem wanem Lo i lukautim ol man i gat dinau. Lo i tambuim ol man long go insait long haus bilong man i gat dinau na kisim nating sampela samting bilong em na holim dispela i go inap long man i bekim dinau. Man i bin givim dinau i mas wet i stap ausait long haus na larim man i gat dinau i bringim samting long em. Olsem na narapela i no inap i go nating insait long haus bilong man. Sapos man i givim dinau i kisim klos bilong man i gat dinau—olsem mak bilong em i mas bekim dinau—em i mas bringim dispela klos i kam bek taim san i go daun, long wanem, man i gat dinau i mas pasim long nait, nogut em bai kol.​—Lo 24:10-14.

17, 18. Long ol samting bilong pait, olsem wanem lain Israel i narapela kain long ol narapela lain man? Bilong wanem i olsem?

¹⁷ Lo i stiaim ol samting bilong woa tu. Lain bilong God i no ken pait bilong inapim laik bilong ol long kisim strong long bosim o daunim ol narapela, nogat, God i mekim wok long ol bilong mekim “Ol Pait Bilong Jehova.” (Namba 21:14) Planti taim ol Israel i mas givim rot pastaim long narapela lain i givim taun bilong ol long lain Israel. Sapos ol i no laik mekim olsem, orait ol Israel i ken kirapim pait na banisim taun—tasol ol i mas mekim long pasin lo bilong God i makim. Kirap long bipo yet i kam inap nau, planti soldia i save reipim ol meri o kilim nating ol man, tasol ol man long ami bilong Israel i no ken mekim olsem. Na tu, ol i mas tingim ol diwai samting, ol i no ken katim ol diwai prut bilong birua.d Ol narapela ami i no gat ol kain tambu olsem.​—Lo 20:10-15, 19, 20; 21:10-13.

¹⁸ Yu save pilim nogut tru taim yu harim olsem long sampela kantri ol i lainim ol pikinini long kamap soldia? Long Israel bilong bipo, ol i no singautim ol man i no winim 20 krismas i go insait long ami. (Namba 1:2, 3) Na sapos wanpela man i bikpela pinis i pret nogut tru, ol i orait long em i no ken insait long ami. Man i marit nupela i no ken go long ami inap wanpela yia na bai em inap lukim pikinini bilong em i kamap paslain long em i go mekim dispela wok i gat ol hevi bilong en. Lo i tok, long dispela rot, yangpela man marit inap “stap wantaim meri bilong em na amamasim em.”​—Lo 20:5, 6, 8; 24:5.

19. Lo i tok wanem bilong lukautim ol meri, ol pikinini, ol famili, ol wido meri, na ol pikinini i no gat papamama?

¹⁹ Lo i lukautim tu ol meri, ol pikinini, na famili. Lo i tokim ol papamama olsem oltaim ol i mas tingim ol pikinini na skulim ol long Jehova. (Lo 6:6, 7) Lo i tambuim pasin bilong slip wantaim wanblut, man i mekim dispela pasin, ol i mas kilim em i dai. (Wok Pris, sapta 18) Lo i tambuim tu ol marit long mekim pasin adaltri, em dispela pasin i save brukim planti famili na bagarapim bel isi na gutnem bilong ol. Lo i lukautim ol wido meri na ol pikinini i no gat papamama, na i mekim strongpela tok i tambuim pasin bilong mekim nogut long ol dispela lain.​—Kisim Bek 20:14; 22:22-24.

20, 21. (a) Bilong wanem Lo Bilong Moses i larim ol Israel i maritim planti meri? (b) Long pasin bilong katim marit, bilong wanem Lo i narapela kain long lo Jisas i kamapim gen long bihain?

²⁰ Tasol sampela inap tingting, ‘Bilong wanem Lo i larim man i maritim planti meri?’ (Lo 21:15-17) Yumi mas skelim ol dispela lo wantaim i stap bilong ol man long dispela taim. Ol man i skelim Lo Bilong Moses wantaim tingting na pasin bilong ol man long nau, ol bai kisim tingting kranki long dispela samting. (Provep 18:13) Jehova i kamapim lo bilong em long Iden, em i tok marit i bilong stap oltaim na i mas i gat wanpela man tasol na wanpela meri tasol. (Stat 2:18, 20-24) Tasol taim Jehova i givim Lo long lain Israel, ol man i bin insait long pasin bilong maritim planti meri inap planti handret yia pinis. Jehova i save gut olsem lain bilong em “i gat strongpela het,” ol bai pundaun planti taim long bihainim ol bikpela lo bilong em, olsem lo i tambuim pasin bilong lotuim ol god giaman. (Kisim Bek 32:9) Olsem na Jehova i bihainim savetingting na long dispela taim em i no stretim olgeta pasin bilong ol long ol samting bilong marit. Tasol tingim, Jehova i no kamapim pasin bilong maritim planti meri. Tasol long rot bilong Lo Bilong Moses em i bosim pasin bilong lain bilong em long maritim planti meri na i pasim ol man long mekim nabaut long dispela samting.

²¹ Na tu, Lo Bilong Moses i larim man i katim marit long kain kain bikpela rong samting. (Lo 24:1-4) Jisas i tok God i larim ol Juda i mekim olsem, long wanem, “het bilong [ol] i strong.” Tasol God i no larim ol i mekim olsem inap oltaim. Jisas i tokim ol disaipel bilong em long ol i mas bihainim lo bilong marit em Jehova i bin kamapim long pastaim.​—Matyu 19:8.

22. Olsem wanem Lo Bilong Moses i strongim pasin laikim? Ol i mas mekim dispela pasin long husat?

²² Olsem wanem? Yu inap tingim lo bilong wanpela kantri long nau i strongim pasin bilong laikim narapela? Lo Bilong Moses i strongim dispela pasin, winim olgeta narapela samting. Long Buk Lo long tok Hibru, tok i makim pasin laikim i stap winim 20 taim. Namba tu bikpela lo bilong Lo Bilong Moses i tok, “Yu mas laikim ol arapela man olsem yu laikim yu yet.” (Wok Pris 19:18; Matyu 22:37-40) Lain bilong God i mas kamapim pasin laikim namel long ol yet, na tu, ol i mas laikim ol man bilong narapela ples i stap wantaim ol, ol Israel i mas tingim olsem bipo ol tu i bin stap olsem ol man bilong narapela ples. Ol i mas kamapim olsem ol i laikim ol man i stap rabis na i gat hevi, ol i mas helpim ol long ol samting bilong skin na ol i no ken tingting long kisim ol samting bilong ol dispela man i gat hevi. Lo i tok tu olsem ol i mas tingim na mekim gutpela pasin long ol animal i save karim ol hevipela samting.​—Kisim Bek 23:6; Wok Pris 19:14, 33, 34; Lo 22:4,10; 24:17, 18.

23. Man bilong raitim Buk Song 119 i traim long mekim wanem? Yumi ken tingting long mekim wanem?

²³ Wanem narapela lain i bin kisim kain gutpela lo olsem? Yumi no kirap nogut long man bilong raitim song i tok: “Mi laikim tru lo bilong yu!” Tasol pasin bilong em long laikim lo i no wanpela samting tasol em i pilim long bel. Dispela pasin i kirapim em long mekim sampela samting, em i traim long bihainim dispela lo long wokabaut bilong em. Em i tok moa: “Mi save tingting strong long en long san na long nait.” (Buk Song 119:11, 97) Yes, oltaim em i save lusim haptaim bilong stadi long ol lo bilong Jehova. Yumi ken save tru olsem taim em i stadi, pasin bilong em long laikim ol dispela lo i go bikpela moa. Na pasin bilong em long laikim Man Bilong Givim Lo, God Jehova, dispela tu i go bikpela. Wok yu mekim bilong stadi yet long ol lo bilong God, inap helpim yu tu long i go klostu moa long Jehova, em Nambawan Man Bilong Givim Lo na God bilong stretpela pasin.