Mekim Gutpela Pasin Sori Long Ol Man i Sot Long Sampela Samting
“Yupela i mas marimari long ol wanlain bilong yupela na helpim [“gutpela pasin sori,” “NW”] ol.”—SEKARAIA 7:9.
1, 2. (a) I gat wanem as na yumi mas mekim gutpela pasin sori? (b) Bai yumi skelim wanem ol askim?
TOK Bilong God Jehova i strongim yumi long laikim tru “gutpela pasin sori.” (Maika 6:8, NW ) Na em i kamapim sampela as na yumi mas mekim olsem. Wanpela as i olsem: “Sapos yu sori long narapela man na yu mekim gut long em, orait long dispela pasin yu mekim gut long yu yet.” (Sindaun 11:17) Tru tumas, taim yumi mekim gutpela pasin sori long narapela, dispela i save helpim yumi long pas gut wantaim em. Long dispela rot bai yumi kisim ol gutpela pren i stap gut long yumi—em wanpela gutpela pe tru!—Sindaun 18:24.
2 Na tu, Baibel i tokim yumi: “Sapos man i bihainim stretpela pasin na pasin bilong laikim tru [“gutpela pasin sori,” NW ] ol arapela, em bai i stap gut.” (Sindaun 21:21) Yes, sapos yumi wok long kisim gutpela pasin sori, God bai laikim tru yumi, na rot bai op long yumi ken kisim ol gutpela blesing long bihain na laip i stap gut oltaim oltaim. Tasol olsem wanem yumi inap kamapim dispela gutpela pasin sori? Yumi mas mekim long husat? Na gutpela pasin sori i narapela kain long gutpela pasin man i save mekim long narapela o olsem wanem?
Gutpela Pasin na Gutpela Pasin Sori
3. Olsem wanem gutpela pasin sori i narapela kain liklik long gutpela pasin em man i save mekim long narapela?
3 Gutpela pasin man i save mekim long narapela em i narapela kain liklik long gutpela pasin sori. Olsem: Man i mekim gutpela pasin long narapela, i no olsem em i save long dispela man na em i mekim, nogat. Tasol taim yumi mekim gutpela pasin sori long narapela, yumi save pas gut wantaim em na laikim em. Baibel i stori long sampela man i bin mekim gutpela pasin sori long narapela, na as na ol i mekim i olsem: ol i save pinis long dispela man. (Stat 20:13; 2 Samuel 3:8; 16:17) O ol i bin mekim, long wanem, dispela man yet i bin mekim sampela gutpela pasin sori long ol. (Josua 2:1, 12-14; 1 Samuel 15:6; 2 Samuel 10:1, 2) Bilong helpim yumi long save olsem wanem dispela tupela pasin i narapela narapela kain liklik, yumi ken skelim tupela stori long Baibel. Wanpela i stori long gutpela pasin, na wanpela i stori long gutpela pasin sori.
4, 5. Olsem wanem dispela tupela stori bilong Baibel i helpim yumi long save olsem gutpela pasin em i narapela kain liklik long gutpela pasin sori?
4 Wanpela stori i makim gutpela pasin em man i mekim long narapela i olsem: Wanpela sip i bagarap, na ol man long sip, wantaim aposel Pol, ol i go sua long ailan Malta. (Aposel 27:37–28:1) Maski ol man bilong Malta i no bin pasim tok olsem ol bai helpim dispela lain bilong sip, na ol i no save liklik long ol, ol i kisim ol i go long haus bilong ol na lukautim gut ol—ol i mekim “gutpela pasin tru” long ol. (Aposel 28:2, 7) Tru, ol i mekim gutpela pasin long ol, tasol ol i mekim long ol man ol i no save liklik long ol, olsem na dispela i makim gutpela pasin tasol.
5 Orait nau yumi ken tingim pasin King Devit i bin mekim long Mefiboset, em pikinini man bilong pren bilong em, Jonatan. Devit i tokim Mefiboset: “Olgeta taim yu ken i kam kaikai wantaim mi.” Devit i kamapim as na em i laik mekim dispela samting. Em i tok: “Mi tingim yet papa bilong yu, Jonatan, olsem na mi laik mekim gutpela pasin [“gutpela pasin sori,” NW ] long yu.” (2 Samuel 9:6, 7, 13) I stret yumi ken tok pasin bilong Devit long singautim Mefiboset i go oltaim long haus bilong em, em i wanpela gutpela pasin sori, long wanem, dispela i makim olsem Devit i stap gut long dispela man em i save pinis long en, em Jonatan. (1 Samuel 18:3; 20:15, 42) Na i wankain tu long nau, ol wokboi bilong God i save mekim gutpela pasin long olgeta man bilong graun. Tasol ol i strong long mekim gutpela pasin sori long ol wanbilip bilong ol.—Matyu 5:45; Galesia 6:10.
6. Baibel i kamapim wanem 3-pela samting bilong gutpela pasin sori em man i mekim long narapela?
6 Bilong helpim yumi long save long sampela samting moa bilong dispela gutpela pasin sori, bai yumi stori liklik long 3-pela stori long Baibel i kamapim dispela pasin. Taim yumi skelim, bai yumi lukim olsem taim ol man i mekim gutpela pasin sori, ol i save (1) kirap mekim sampela samting, (2) ol i amamas long mekim, na (3) ol i mekim long ol man i sot long sampela samting. Na tu, ol dispela stori inap helpim yumi long save olsem wanem yumi ken kamapim dispela pasin long nau.
Wanpela Papa i Mekim
7. Wokboi bilong Abraham i tokim Betuel na Laban long wanem samting? Wokboi i kamapim wanem bikpela samting tupela i mas tingim?
7 Stat 24:28-67 i stori i go moa long wokboi bilong Abraham, em yumi bin toktok long em long stori i kamap paslain long dispela. Taim em i bungim pinis Rebeka, ol i singautim em i kam long haus bilong papa bilong Rebeka, em Betuel. (Ves 28-32) Long haus, wokboi i stori long ol samting em i bin mekim bilong painim wanpela meri em pikinini bilong Abraham i ken maritim. (Ves 33-47) Em i kamapim tingting bilong em olsem samting i kamap pinis, em samting Jehova yet i bin stiaim. Em i tok: “Em i bin bringim mi i kam stret long haus bilong brata bilong bikman bilong mi. Na bai mi inap kisim pikinini meri bilong en bilong maritim pikinini bilong bikman bilong mi.” (Ves 48) Ating dispela wokboi i bilip olsem sapos em i stori gut long ol samting i bin kamap, orait dispela bai helpim Betuel na pikinini man bilong em, Laban, long bilip olsem Jehova yet i bin helpim dispela wok. Orait nau wokboi i tok: “Sapos yupela i laik mekim gutpela [“gutpela pasin sori,” NW ] na stretpela pasin long bikman bilong mi, orait yupela tokim mi stret. Na sapos yupela i no laik, orait yupela tokim mi tu, na mi ken tingting long wanem samting bai mi mekim.”—Ves 49.
8. Betuel i mekim wanem long dispela samting bilong Rebeka?
8 Jehova i bin mekim pasin sori pinis long Abraham. (Stat 24:12, 14, 27) Olsem wanem? Bai Betuel tu i mekim gutpela pasin sori na larim Rebeka i go wantaim wokboi bilong Abraham? Bai gutpela pasin sori bilong man i helpim gutpela pasin sori bilong God na inapim tru wok bilong en? O yu ting hatwok bilong dispela wokboi bai lus nating? Ating wokboi bilong Abraham em i amamas tru taim em i harim Laban na Betuel i tok: “Bikpela yet i kamapim dispela samting.” (Ves 50) Ol i save Jehova yet i bin helpim dispela wok, olsem na kwiktaim ol i orait long dispela samting. Orait nau Betuel i kamapim klia gutpela pasin sori bilong em taim em i tok: “Rebeka i stap. Yu kisim em na yu go. Em i ken maritim pikinini bilong bikman bilong yu, olsem Bikpela i tok pinis.” (Ves 51) Rebeka i orait long go wantaim wokboi bilong Abraham, na bihain em i kamap meri bilong Aisak na Aisak i laikim em tru.—Ves 49, 52-58, 67.
Wanpela Pikinini Man i Mekim
9, 10. (a) Jekop i askim pikinini bilong em, Josep, long mekim wanem samting long em? (b) Josep i mekim wanem gutpela pasin sori long papa bilong em?
9 Tumbuna pikinini bilong Abraham, em Jekop, em tu i bin kisim helpim long gutpela pasin sori. Olsem Stat sapta 47 i tok, dispela samting i bin kamap taim Jekop i sindaun long Isip, na “em i save olsem klostu em i laik i dai.” (Ves 27-29) Em i tingting planti, long wanem, em bai dai ausait long kantri God i bin tok promis long givim long Abraham. (Stat 15:18; 35:10, 12; 49:29-32) Jekop i no laik bai ol i planim em long Isip, olsem na em i stretim rot bambai ol i ken kisim bodi bilong em i go long kantri Kenan. Pikinini man bilong em i gat namba, em Josep, em inap tru long mekim dispela samting papa i laikim, a?
10 Baibel i tok: “Olsem na [Jekop] i singautim pikinini bilong en Josep i kam, na i tokim em olsem, ‘Sapos yu laikim mi tru, orait . . . mekim strongpela promis olsem yu bai mekim gutpela pasin [“gutpela pasin sori,” NW ] long mi. Bai yu no ken planim mi long Isip. Taim mi pasim ai na mi go bilong i stap wantaim ol tumbuna bilong mi, mi laik bai yu karim bodi bilong mi i go lusim Isip, na planim mi long matmat bilong ol tumbuna bilong mi.’ ” (Stat 47:29, 30) Josep i tok promis long mekim olsem, na bihain liklik Jekop i dai. Josep na ol narapela pikinini man bilong Jekop ol i karim bodi bilong em i go “long graun Kenan na ol i planim em long hul bilong ston i stap long graun Makpela, klostu long ples Mamre. Abraham i bin baim dispela graun.” (Stat 50:5-8, 12-14) Long dispela rot Josep i bin mekim gutpela pasin sori long papa bilong em.
Wanpela Tambu Meri i Mekim
11, 12. (a) Rut i mekim wanem gutpela pasin sori long Naomi? (b) Olsem wanem gutpela pasin sori “nau [Rut] i mekim” i winim gutpela pasin sori em i “bin mekim long tambu mama”?
11 Buk Rut i stori long Rut i mekim gutpela pasin sori long tambu bilong em Naomi, em man bilong em i dai pinis. Rut i bilong lain Moap, na man bilong em tu i dai pinis. Taim Naomi i laik go bek long Betlehem long Juda, Rut i mekim gutpela pasin sori na i tok: “Olgeta ples yu go long en, mi tu bai mi go long en. Olgeta ples yu stap long en, mi tu bai mi stap long en. Lain bilong yu bai i kamap lain bilong mi. Na God bilong yu bai i kamap God bilong mi.” Rut i strong long mekim dispela samting. (Rut 1:16) Bihain long dispela, Rut i mekim gutpela pasin sori taim em i tokaut em i orait long maritim lapun Boas, em hap famili bilong Naomi.a (Lo 25:5, 6; Rut 3:6-9) Boas i tokim Rut: “Dispela pasin nau yu mekim, em i winim gutpela pasin [“gutpela pasin sori,” NW ] yu bin mekim long tambu mama bilong yu. Planti yangpela man i stap. Sampela i gat planti samting na sampela i no gat, tasol yu no tingting long maritim wanpela.”—Rut 3:10.
12 Dispela gutpela pasin sori Rut i “bin mekim long tambu mama” bilong em, em i mekim taim em i lusim lain bilong em na i go stap wantaim Naomi. (Rut 1:14; 2:11) Tasol gutpela pasin sori “nau [em] i mekim”—em i orait long maritim Boas—dispela i winim gutpela pasin sori em i bin mekim long tambu mama. Nau Rut inap kamapim wanpela pikinini bilong Naomi—Naomi i lapun pinis na i no inap karim moa pikinini. Rut i maritim Boas, na taim em i karim pikinini pinis, ol meri long Betlehem i singaut: “Naomi i holim pikinini man pinis.” (Rut 4:14, 17) Tru tumas, Rut em i wanpela “gutpela meri,” na em i kisim gutpela blesing long Jehova—em i kamap wanpela tumbuna meri bilong Jisas Krais.—Rut 2:12; 3:11; 4:18-22; Matyu 1:1, 5, 6.
Long Ol Samting Ol i Mekim
13. Betuel, Josep, na Rut i kamapim klia gutpela pasin sori bilong ol olsem wanem?
13 Olsem wanem? Yu tingim olsem wanem Betuel, Josep, na Rut i bin kamapim gutpela pasin sori bilong ol? Tru, ol i mekim sampela gutpela tok, tasol ol i kirap mekim sampela samting tu. Betuel i no tok “Rebeka i stap” na em tasol, nogat. Em i kirap mekim sampela samting—em i ‘salim Rebeka i go.’ (Stat 24:51, 59) Josep i no tok tasol, “Bai mi mekim olsem yu tok,” nogat. Em wantaim ol brata bilong em ol i “bihainim tok na mekim olsem [Jekop] i bin tokim ol.” (Stat 47:30; 50:12, 13) Na Rut i no tok tasol, “Olgeta ples yu go long en, mi tu bai mi go long en,” nogat. Em i lusim lain bilong em na i go wantaim Naomi, olsem na “tupela i wokabaut i go kamap long Betlehem.” (Rut 1:16, 19) Long kantri Juda, Rut i kirap gen na mekim sampela samting—em i “bihainim olgeta tok bilong Naomi.” (Rut 3:6) Yes, wankain olsem ol narapela, gutpela pasin sori bilong Rut i kamap ples klia long ol samting em i mekim.
14. (a) Olsem wanem ol wokboi bilong God long nau ol i save kamapim gutpela pasin sori long ol samting ol i mekim? (b) Wanem sampela gutpela pasin sori yu save long en, em ol Kristen long hap bilong yu i save mekim?
14 Em i gutpela samting tru long lukim olsem ol wokboi bilong God long nau ol tu i kamapim gutpela pasin sori long ol samting ol i mekim. Olsem: Tingim ol man i save mekim gut bel bilong ol wanbilip i gat sik, o i stap bel hevi, o bel bilong ol i bagarap stret. (Sindaun 12:25) O tingim planti ol Witnes Bilong Jehova i save kisim ol lapun long ka bilong ol na bringim ol i go long ol miting bilong kongrigesen long Haus Kingdom long olgeta wik. Anna, em i gat 82 krismas na i gat sik atraitis, em i kamapim tingting bilong planti man taim em i tok: “Ol i save kisim mi long ka na bringim mi i go long olgeta miting. Dispela em i wanpela gutpela blesing i kam long Jehova. Mi tenkyu tru long em i bin givim ol gutpela brata na sista long mi.” Olsem wanem? Yu tu i insait long kain gutpela wok olsem long kongrigesen bilong yu yet? (1 Jon 3:17, 18) Sapos olsem, orait yu ken bilip olsem ol i tingim tru dispela gutpela pasin sori yu mekim.
Ol i Amamas Long Mekim
15. Tripela stori bilong Baibel yumi skelim pinis i kamapim wanem samting bilong gutpela pasin sori?
15 Na ol stori long Baibel yumi skelim pinis ol i soim olsem ol man i mekim gutpela pasin sori, ol i amamas long mekim. Ol i no mekim long wanem narapela i subim ol, nogat. Betuel i amamas long helpim wokboi bilong Abraham, na Rebeka tu i amamas long mekim olsem. (Stat 24:51, 58) Josep i mekim gutpela pasin sori, tasol em i no mekim long wanem narapela i strong long em i mekim, nogat. (Stat 50:4, 5) Rut yet “i strong tumas long i go wantaim [Naomi].” (Rut 1:18) Taim Naomi i tok em i laik bai Rut i go lukim Boas, gutpela pasin sori i kirapim dispela meri Moap long tokaut olsem: “Gutpela. Bai mi bihainim olgeta tok bilong yu.”—Rut 3:1-5.
16, 17. Wanem samting i mekim na gutpela pasin sori bilong Betuel, Josep, na Rut em i bikpela samting? Wanem samting i kirapim ol long kamapim dispela pasin?
16 Gutpela pasin sori Betuel, Josep, na Rut i mekim em i bikpela samting, long wanem, Abraham, Jekop, na Naomi i no inap long subim ol long bihainim laik bilong ol. Olsem: I no gat lo i tok olsem Betuel i mas salim pikinini meri bilong em i go. Em inap tokim wokboi bilong Abraham: ‘Nogat, pikinini meri bilong mi i save wok strong na mi no laik salim em i go long longwe hap.’ (Stat 24:18-20) Na tu, bai Josep i bihainim dispela tok bilong papa bilong em o nogat, em samting bilong em yet, long wanem, taim Jekop i dai pinis, Jekop i no inap subim Josep long bihainim tok promis em i bin mekim. Na Naomi yet i bin tokim Rut long em i ken i stap long kantri Moap. (Rut 1:8) Na narapela samting, Rut inap long maritim wanpela “yangpela man,” na lapun Boas nogat.
17 Betuel, Josep, na Rut i gat laik tru long mekim dispela gutpela pasin sori; bel i kirapim ol long mekim olsem. Ol i pilim olsem ol i gat wok long kamapim dispela pasin long ol man ol i save long ol, wankain olsem King Devit long bihain em i pilim olsem em i mas kamapim dispela pasin long Mefiboset.
18. (a) Ol elda Kristen i gat wanem tingting taim ol i “lukautim gut” ol sipsip? (b) Wanpela elda i tok wanem long pasin bilong helpim ol wanbilip bilong em?
18 Gutpela pasin sori em i stap yet olsem mak bilong ol manmeri bilong God, na bilong ol man i was long ol sipsip bilong God. (Song 110:3; 1 Tesalonaika 5:12) Spirit holi i bin makim ol elda, olsem ol wasman, long holim wok wasman, olsem na ol i pilim olsem ol i mas mekim gut dispela wok. (Aposel 20:28) Tasol taim ol i mekim dispela wok wasman na sampela gutpela pasin sori moa bilong helpim kongrigesen, ol i save “amamas long mekim”—ol i no “bihainim laik bilong ol arapela tasol na mekim,” nogat. (1 Pita 5:2) Ol elda i save lukautim ol sipsip, long wanem, ol i gat wok long mekim, na ol i gat laik long mekim. Na ol i mekim gutpela pasin sori long ol sipsip bilong Krais, long wanem, i stret ol i mekim olsem, na ol i laik tru long mekim. (Jon 21:15-17) Wanpela Kristen elda i tok: “Mi amamas tru long go lukim ol brata long haus bilong ol o ring long ol bambai ol i ken save mi tingim ol. Taim mi helpim ol brata, dispela i givim bikpela amamas long mi!” Ol elda long olgeta hap i helpim gut ol sipsip, ol i wanbel tru long dispela tok.
Long Ol Man i Sot Long Ol Samting
19. Ol stori bilong Baibel yumi bin toktok long en ol i kamapim klia wanem samting bilong gutpela pasin sori?
19 Ol stori bilong Baibel yumi toktok pinis long en ol i kamapim klia olsem yumi mas mekim gutpela pasin sori long ol man i sot long sampela samting na ol i no inap helpim ol yet. Bilong lain famili bilong em i ken i stap yet, Abraham i mas kisim helpim long Betuel. Bilong bodi bilong Jekop i ken i go long Kenan, Josep i mas helpim em. Na bilong kamapim wanpela pikinini, Naomi i mas kisim helpim long Rut. Abraham, Jekop, na Naomi ol i no inap helpim ol yet long ol dispela samting. I mas i gat narapela bilong helpim ol. Na i wankain tu long nau, yumi mas mekim gutpela pasin sori moa yet long ol man i sot long sampela samting. (Sindaun 19:17) Yumi mas bihainim pasin bilong Jop, em i bin helpim ‘ol rabisman taim ol i singaut bilong kisim helpim; na ol pikinini, papa bilong ol i dai pinis, na i no gat man bilong helpim ol; na ol manmeri long taim ol i laik bagarap.’ Na tu, Jop i bin mekim gut bel bilong “ol meri, man bilong ol i dai pinis,” na em i bin stap olsem ‘ai bilong soim rot long ol aipas, na olsem lek bilong helpim ol lek nogut long wokabaut.’—Jop 29:12-15.
20, 21. Yumi mas mekim gutpela pasin sori long husat? Yumi olgeta wan wan i mas tingting strong long mekim wanem?
20 Long olgeta kongrigesen Kristen i gat ol man i karim hevi na “i singaut bilong kisim helpim.” Ating as bilong dispela samting i olsem: ol i pilim olsem ol i stap wanpis, o ol i stap bel hevi, o ol i pilim olsem ol i no inap mekim wanpela gutpela wok, o samting ol i wet long narapela i mekim, em i no mekim, o ol i gat bikpela sik, o wanpela man ol i laikim em tumas em i dai. Maski ol i gat wanem wanem hevi, olgeta dispela manmeri ol i sot long sampela samting, tasol yumi inap mekim sampela gutpela pasin sori bilong helpim ol, em yumi amamas long mekim, na i stret yumi mekim olsem.—1 Tesalonaika 5:14.
21 Olsem na yumi mas wok yet long bihainim pasin bilong God Jehova, em “gutpela pasin sori i pulap long em.” (Kisim Bek 34:6, NW; Efesus 5:1) Yumi ken mekim olsem taim yumi amamas long mekim sampela samting bilong helpim ol man, na moa yet long ol man i sot long sampela samting. Na taim yumi “marimari long ol wanlain bilong [yumi] na helpim [“gutpela pasin sori,” NW ] ol,” dispela bai givim biknem long Jehova na yumi bai kisim bikpela amamas.—Sekaraia 7:9.
[Futnot]
a Bilong kisim sampela save moa long dispela kain marit, lukim Volium 1, pes 370, bilong buk Insight on the Scriptures, em ol Witnes Bilong Jehova i wokim.
Bai Yu Bekim Olsem Wanem?
• Olsem wanem gutpela pasin sori em i narapela kain liklik long gutpela pasin em man i save mekim long narapela?
• Long wanem ol rot Betuel, Josep, na Rut i bin mekim gutpela pasin sori?
• Yumi mas i gat wanem kain tingting taim yumi mekim gutpela pasin sori?
• Yumi mas mekim ol gutpela pasin sori long wanem kain man?
[Piksa long pes 18]
Betuel i mekim gutpela pasin sori olsem wanem?
[Piksa long pes 21]
Rut i mekim gutpela pasin sori na dispela i helpim gut Naomi
[Ol Piksa long pes 23]
Taim man i mekim gutpela pasin sori, em i save amamas long mekim, na em i kirap mekim sampela samting, na em i save kamapim long ol man i sot long sampela samting