Mari—Strongpela Taun Bilong Ples Wesan Long Bipo

WANPELA saveman bilong painim ol samting bilong bipo insait long graun, em André Parrot bilong Frans, i tok: “Mi wantaim ol poroman bilong mi i mekim bung bilong amamas long samting mipela i bin painim, olsem na taim mi kamap long rum bilong mi long nait ai bilong mi i raun liklik.” Long Janueri 1934, long Tell Hariri, klostu long liklik taun Abu Kemal long wara Yufretis long Siria, Parrot wantaim lain bilong em i bin digim graun na painim wanpela ston ol i sapim olsem man na i gat rait olsem: “Lamgi-Mari, king bilong Mari, hetpris bilong Enlil.” Ol i amamas tru long samting ol i bin painim.

Em nau, ol i painim pinis taun Mari! Tasol bilong wanem ol man bilong stadi long Baibel i tingim dispela taun?

Bilong Wanem Ol i Tingim?

Sampela rait bilong bipo tru i bin stori long taun Mari, tasol ol man i no bin save long hap tru em i stap long en. Sampela saveman bilong Sumeria i bin tok, wanpela lain king i bin sindaun long Mari na ol i bin bosim olgeta hap bilong Mesopotemia. Ol i bin wokim taun Mari long arere bilong wara Yufretis, na em i stap long rot bung we ol bisnisman i karim ol kain kain kago bilong ol i go i kam, kirap long Persian Galf i go long Asiria, Mesopotemia, Anatolia, na nambis bilong solwara Mediterenian. Ol i save karim ol kago olsem diwai, olkain ain, na ston​—⁠em ol i sot tru long Mesopotemia​—⁠i go long dispela rot Mari i stap long en. Ol i mas tromoi takis bilong karim ol kago i go insait long Mari, olsem na taun hia i gat planti mani, dispela i givim bikpela strong long taun long bosim ol dispela hap. Tasol bihain Sargon bilong Akat i kam pait na daunim Siria, na strong bilong taun Mari i pinis.

Inap 300 yia samting bihain long Sargon i daunim Siria, i gat ol gavman bilong ami i bosim Mari. Taim Mari i stap aninit long ol, em i gat planti mani samting. Tasol long taim bilong laspela king bilong en, em Simri-Lim, strong bilong taun i laik pinis. Simri-Lim i laik strongim wok gavman bilong em long rot bilong pait na kisim ol narapela kantri, na wokim kontrak wantaim ol narapela lain, na maritim ol meri bilong ol narapela lain. Tasol long yia 1760 B.C.E., King Hamurabi bilong Babilon i bagarapim Mari olgeta, na olsem Parrot i tok, dispela i pinisim “wanpela lain i gat nambawan gutpela sindaun winim planti arapela lain bilong bipo.”

Taim ol ami bilong Hamurabi i bagarapim taun Mari, samting ol i mekim i helpim tru ol man bilong painim ol samting bilong bipo na ol man bilong raitim stori bilong ol samting i bin kamap bipo. Taim ol ami i pundaunim ol haus brik, ol i mekim na graun i karamapim ol haus i go antap inap 5-pela mita long sampela hap, olsem na ol samting bilong ol haus i stap gut insait long graun inap planti yia. Ol i bin painim ol brukpela tempel na haus king, na planti samting ol man i bin mekim wok long en na planti tausen olpela rait i tokaut long sindaun bilong ol lain bilong bipo yet.

Bilong wanem yumi laik save long ol samting bilong taun Mari? Tingim taim Abraham i bin stap. Mama i bin karim em long yia 2018 B.C.E., em 352 yia bihain long Bikpela Tait. Lain bilong Abraham em i namba 10 lain bihain long Noa. God i tokim Abraham long lusim as ples bilong em, Ur, na i go long Haran. Long 1943 B.C.E., taim Abraham i gat 75 krismas, em i lusim Haran na i wokabaut i go long Kenan. Wanpela saveman, em Paolo Matthiae bilong Itali, em i tok: “Abraham i mekim dispela bikpela raun bilong em kirap long Ur na i go long Jerusalem [long Kenan] long taim dispela taun Mari i stap.” Olsem na gutpela ol i bin painim taun Mari, long wanem, em inap helpim yumi long save long ol man i bin stap long taim bilong gutpela wokman bilong God, Abraham.a​—⁠Stat 11:10–12:⁠4.

Ol Brukpela Haus i Kamapim Wanem Samting?

Lotu i bikpela samting long Mari, olsem long ol narapela hap bilong Mesopotemia. Ol i ting i stret ol man i mekim wok bilong ol god. Taim ol i tingim ol bikpela samting ol i mas mekim, pastaim ol i askim ol god long laik bilong ol. Ol saveman i bin painim ol hap bilong 6-pela tempel. Wanpela em Tempel Bilong Ol Laion (sampela i ting em wanpela tempel bilong Dagan, em Baibel i kolim Dagon), na ol haus lotu bilong Ista, god meri bilong kamapim pikinini, na tempel bilong god bilong san, Samas. Pastaim ol dispela tempel i gat imis bilong ol god giaman ol i bin givim ofa long en na beten long en. Ol man i bin lotuim ol dispela god ol i bin wokim imis i makim ol yet olsem ol i beten i stap, na ol i putim long ol sia i stap long haus lotu, long wanem, ol i bilip olsem dispela i mekim na i olsem ol i mekim lotu inap longpela taim. Parrot i tok: “Imis, kain olsem kandel ol Katolik i save laitim long taim bilong lotu long nau . . . em i kamap olsem senis bilong dispela man.”

Bikpela samting tru ol i bin painim long Tell Hariri em ol hap bilong wanpela traipela haus king, ol i kolim long nem bilong laspela king i bin sindaun long en, em King Simri-Lim. Wanpela saveman bilong Frans, Louis-Hugues Vincent, i tok: ‘Ol i bin wokim long nambawan gutpela pasin tru bilong ol lain bilong Is.’ Dispela traipela haus i karamapim bikpela hap graun inap 2.5 hekta, na i gat 300 rum na ol ples bung ausait. Long taim bipo tu, dispela haus king em i wanpela bilong ol gutpela samting tru i gat nem long graun. Long buk bilong em Ancient Iraq, George Roux i tok: “Em i gat nem long planti hap, olsem na King bilong Ugarit, long nambis bilong Siria, em i bin salim pikinini man bilong em i go inap 600 kilomita longwe long nambis bilong lukim ‘haus bilong Simri-Lim.’ ”

Bilong go insait long strongpela banis i raunim dispela haus king, i gat wanpela dua tasol i stap namel long tupela taua, taim man i go insait em i kamap long wanpela bikpela ples bung. Laspela king bilong Mari, em Simri-Lim, em i sindaun long sia king i stap antap long pletfom, na em i bosim ol samting bilong ami, na bisnis, na wok politik bilong taun; na em i harim kot; na em i sekanim ol man i kam lukim em na bung wantaim ol mausman bilong ol narapela kantri. I gat ol rum bilong ol lain i kam lukim em, na king i save wokim bikpela kaikai bilong ol. Kaikai bilong ol em mit bilong bulmakau, sipsip, dia, pis, na kakaruk, ol i save kukim long aven o long paia o long sospen, na ol i redim tu kain kain sos i gat galik na ol kaikai bilong gaden na olkain sis. Bihain long en ol i save kaikai ol prut ol i kisim nupela, o ol i bin mekim drai, o wokim wantaim suga, na ol kek ol i kukim long ol plet i gat kain kain makmak. Taim nek bilong ol i drai, ol i save dring bia o wain.

Na insait long haus king ol i painim ol rum waswas i gat ol samting ol i wokim long simen bilong pulapim bikpela wara na ol toilet i no gat hap bilong sindaun long en. Long ol dispela rum, plua na arere bilong ol banis klostu long plua ol i penim long kolta. Na i gat ol baret ol i wokim long brik bilong karim doti wara i go, na i gat ol paip ol i wokim long graun na penim long kolta em ol i stap gutpela yet long nau, em 3,500 yia samting bihain long ol i bin wokim. Taim sik nogut bilong i dai i kisim 3-pela bilong lain meri bilong king, ol i putim strongpela lo i tok, kain meri olsem i mas i stap wanpis na ol narapela i no ken i go klostu long em. Lo i tok: “Ol narapela i no ken dring long kap bilong em, o kaikai long tebol bilong em, o sindaun long sia bilong em.”

Ol Rait i Givim Save Long Yumi

Parrot wantaim lain bilong em ol i painim 20,000 hap ston i gat rait long tok ples Akadian. Em ol pas ol man i bin raitim, ol i stori long ol wok bilong bosim ples na ol samting bilong bisnis. Tasol long ol dispela rait, i gat liklik hap tasol ol i stretim na bai ol man long nau i ken ritim. Ol i inap olsem 28 volium. Ol dispela rait i helpim yumi olsem wanem? Man bilong bosim wok bilong painim ol samting bilong taun Mari, em Jean-Claude Margueron, i tok: “Taim mipela i no painim yet ol dispela olpela rait bilong Mari, mipela i no save long ol wok na pasin na i stap bilong ol lain bilong Mesopotemia na Siria bihain liklik long yia 2000 B.C.E. Tasol ol dispela olpela rait i mekim na mipela inap kisim save long planti samting bilong dispela taim bipo.” Parrot i tok, ol dispela rait i “kamapim klia olsem planti samting long i stap bilong ol lain bilong dispela taim i wankain olsem stori bilong Olpela Testamen i kamapim long i stap bilong ol lain long taim bilong Abraham.”

Na ol rait long ston ol i bin painim long Mari i givim save long yumi long sampela tok bilong Baibel. Olsem: Ol dispela rait i makim olsem pasin bilong kisim ol lain meri bilong birua, dispela em i “pasin tru bilong ol king long dispela taim bipo.” Em nau, taim Ahitofel i lusim King Devit na i tokim pikinini bilong em Apsalom long slip wantaim ol namba 2 lain meri bilong papa, dispela i no nupela tingting.​—⁠2 Samuel 16:​21, 22.

Kirap long 1933 ol lain i bin digim graun long Tell Hariri inap 41 taim. Tasol ol i bin digim 8-pela hekta graun tasol bilong Mari, i gat 110 hekta ol i no digim yet. Ating bihain bai ol i painim planti gutpela samting i stap yet long Mari, em strongpela taun bilong ples wesan long bipo.

[Futnot]

[Mep long pes 10]

(Bilong save ol dispela rait i stap we long pes, lukim buk o magasin)

Persian Galf

Ur

MESOPOTEMIA

Wara Yufretis

MARI

ASIRIA

Haran

ANATOLIA

KENAN

Jerusalem

Solwara Mediterenian (Biksolwara)

[Piksa long pes 11]

Long dispela rait, King Iadun-Lim bilong Mari i hambak long ol samting em i bin wokim

[Piksa long pes 11]

Taim ol i painim dispela imis i makim Lamgi-Mari, ol i luksave long taun Mari

[Piksa long pes 12]

Ebi-Il, namba wan ofisa bilong Mari, em i beten

[Piksa long pes 12]

Liklik pletfom insait long haus king, ating imis bilong wanpela god meri i bin sanap long en

[Piksa long pes 12]

Ol brukpela samting bilong Mari i soim olsem ol i bin wokim ol haus long brik ol i no bin kukim long paia

[Piksa long pes 12]

Wanpela rum waswas bilong haus king

[Piksa long pes 13]

Hap ston i gat stori long Naram-Sin i bin pait na kisim taun Mari

[Piksa long pes 13]

Namel long ol hap pipia ston bilong haus king ol i bin painim 20,000 ston i gat rait long en

[Piksa Kredit Lain long pes 10]

© Mission archéologique française de Tell Hariri - Mari (Syrie)

[Ol Piksa Kredit Lain long pes 11]

Document: Musée du Louvre, Paris; statue: © Mission archéologique française de Tell Hariri - Mari (Syrie)

[Ol Piksa Kredit Lain long pes 12]

Statue: Musée du Louvre, Paris; podium and bathroom: © Mission archéologique française de Tell Hariri - Mari (Syrie)

[Ol Piksa Kredit Lain long pes 13]

Victory stele: Musée du Louvre, Paris; palace ruins: © Mission archéologique française de Tell Hariri - Mari (Syrie)