Larim “Tok” Bilong Jehova i Lukautim Yu
LONG 490 B.C.E. long bikpela pait bilong Maraton, inap 10 tausen i go 20 tausen soldia bilong Atens i redi long pait long strongpela ami bilong Persia. Ol Grik i mekim savepasin tru—ol soldia i sanap klostu klostu olsem wanpela strongpela banis na ol i mats i go wantaim. Olgeta wan wan i holim plang bilong pait na i luk olsem wanpela traipela banis i pas olgeta na i gat planti spia long en. Dispela i mekim na ol Atens i winim pait, maski ami bilong Persia i bikpela tru.
Ol Kristen tru i insait long pait bilong spirit. Ol i pait wantaim ol strongpela birua yumi no inap lukim ol na ol i bosim dispela graun, em Baibel i kolim ol olsem “ol strongpela spirit . . . i save bosim graun long dispela taim bilong tudak,” em “olgeta spirit nogut i stap antap.” (Efesus 6:12; 1 Jon 5:19) Lain bilong God i wok long winim pait, tasol i no long strong bilong ol yet—em strong bilong Jehova, em i save lukautim na skulim ol, olsem Song 18:30 i tok: “Tok bilong en em i tru olgeta. Bikpela i olsem hap plang bilong pait, na em i save lukautim gut olgeta man i go long em na ol i hait long ol birua.”
Em nau, long rot bilong “tok” i stap long Baibel, Jehova i save banisim ol wokman bilong em i stap gut long em na ol i no inap kisim bagarap long ol samting bilong spirit. (Song 19:7-11; 119:93) Solomon i stori long ol savetingting i stap long Baibel, olsem: “Yu no ken lusim gutpela tingting. Nogat. Yu mas laikim em tumas na bai em i lukautim yu gut.” (Sindaun 4:6; Saveman 7:12) Olsem wanem savetingting bilong God i lukautim yumi na ol samting nogut i no painim yumi? Yumi ken tingim ol Israel bilong bipo.
Savetingting Bilong God i Lukautim Ol
Lo Bilong Jehova i bin lukautim na stiaim ol Israel long olgeta wokabaut bilong ol. Olsem: I gat ol lo bilong kaikai, stap klin long skin, na ol man i gat sik lepra samting i mas i stap ol yet. Dispela i lukautim ol na ol i no kisim planti sik i bagarapim ol narapela lain. Inap 150 yia samting i go pinis, ol saveman i kisim save olsem ol jem i save kamapim sik, tasol Lo Bilong God i bin kamapim dispela save long bipo yet. I gat ol lo bilong husat i papa bilong graun, baim bek graun samting, lusim dinau, na kisim winmani long dinau man i bekim—ol dispela lo i bin helpim gut sindaun bilong ol Israel na i no gat sampela i sot long ol samting. (Lo 7:12, 15; 15:4, 5) Lo Bilong Jehova i helpim tu graun bilong ol Israel na oltaim graun i gat gutpela gris! (Kisim Bek 23:10, 11) Ol lo i tambuim pasin bilong lotuim ol god giaman i lukautim ol na ol spirit nogut i no bosim ol, na ol i no givim ol pikinini olsem ol ofa long ol god giaman, na ol i no brukim skru long ol piksa bilong ol god giaman, na ol i no mekim planti ol narapela pasin nogut.—Kisim Bek 20:3-5; Song 115:4-8.
Em i klia tru olsem “tok” bilong Jehova “i no toktok nating” long ol Israel, nogat. Ol man i bihainim tok ol bai stap laip na i stap longpela taim. (Lo 32:47) Na i wankain tu long ol manmeri i bihainim ol savetok bilong Jehova long nau, maski ol Kristen i no aninit moa long kontrak bilong Lo. (Galesia 3:24, 25; Hibru 8:8) Ol Kristen i no gat planti lo, ol i gat planti stiatok bilong Baibel bilong soim rot na lukautim ol.
Ol Stiatok i Lukautim Ol
Ating ol lo i no stret long olgeta lain na ol i stap liklik taim tasol. Tasol ol stiatok bilong Baibel, em ol bikpela tok i tru, ol i bilong planti lain na ol i bilong i stap oltaim. Tingim stiatok i stap long Jems 3:17, hap tok bilong en i olsem: “Ol man i kisim kain gutpela tingting na save i kam long God, ol i save . . . bihainim klinpela tingting. Na . . . ol i save stap wanbel wantaim ol arapela.” Olsem wanem dispela bikpela tok i tru inap lukautim lain bilong God long nau?
Man i gat klinpela tingting i save bihainim stretpela pasin. Olsem na ol man i ting dispela pasin i bikpela samting, ol i wok strong long abrusim pasin pamuk na ol samting i save kirapim man long mekim dispela pasin, olsem tingim tingim ol samting bilong maritpasin na lukim ol pamuk piksa. (Matyu 5:28) Na tu, man na meri i tingting long marit na ol i tingim tru stiatok i stap long Jems 3:17, ol i save abrusim ol pasin i kirapim bel na inap mekim na ol i no inap bosim gut skin. Ol i laikim tumas ol stiatok bilong Baibel, olsem na ol i no larim dispela kain samting i pulim ol na ol i lusim stretpela pasin—ol i sakim dispela kain tingting olsem sapos ol i no brukim stret lo bilong God, Jehova bai orait long pasin ol i mekim. Ol i save Jehova i “save lukim tingting na laik bilong man” na em i skelim ol. (1 Samuel 16:7; 2 Stori 16:9) Ol manmeri i bihainim savetingting, ol i no ken kisim ol sik nogut bilong pamuk i pulap tru long graun, na tingting na bel bilong ol i stap isi.
Jems 3:17 i tok, man i kisim gutpela tingting na save i kam long God, em “i save stap wanbel wantaim ol arapela.” Yumi save, Satan i laik putim ol tingting bilong pait na bagarapim man long bel bilong yumi na bai Jehova i no orait long yumi, na Satan i mekim olsem long rot bilong ol buk, piksa, musik, na ol kompiuta gem, em sampela i save kirapim man long bagarapim nogut tru ol man na kilim ol i dai! (Sindaun 6:16, 17) Ol pasin nogut bilong bagarapim man i go bikpela tru na dispela i kamapim klia olsem wok bilong Satan i karim kaikai. Bipo wanpela niuspepa bilong Australia (The Sydney Morning Herald) i kamapim tok bilong Robert Ressler, em i tok, ol pamuk piksa i bin kirapim tru bel bilong ol kilman em i bin toktok wantaim ol namel long 1970 na 1979, tasol “long nau ol pamuk piksa i nogut moa yet.” Olsem na Ressler i tok “taim nogut bai kamap bihain—ol kilman i save kilim i dai planti man, ol bai kamap planti moa.”
Na tru tumas, sampela mun bihain long dispela tok i kamap long niuspepa, wanpela man i sutim na kilim i dai 16 liklik pikinini wantaim tisa bilong ol long wanpela pilai skul long Dunblane, Skotlan, na bihain em i kilim i dai em yet. Wanpela mun bihain, wanpela man i sutim na kilim i dai 32 manmeri long taun Port Arthur, long Tasmania. Nau long dispela taim long Amerika, ol man i bin sutim na kilim i dai ol skulmangi na ol narapela, na dispela i mekim na ol Amerika i askim, Bilong wanem ol i mekim olsem? Long Japan long Jun 2001, wanpela man tingting bilong en i paul em i holim naip na i go insait long wanpela skul na i kilim i dai 8-pela pikinini i mekim gret 1 na 2 na em i katim nabaut skin bilong 15 moa. Tru, i gat kain kain as na ol man i mekim ol dispela pasin nogut, tasol planti ol i ting pasin bilong pait na bagarapim man i kamap long TV samting em i wanpela as bilong dispela. Wanpela man bilong raitim nius long Australia, em Phillip Adams, em i tok: ‘Sapos ol kampani i edvetaisim ol samting bilong ol long TV inap wanpela minit tasol na dispela i kirapim planti man long baim samting, orait yumi save, wanpela piksa long TV em inap 2-pela aua na ol i tromoi planti milion dola long wokim, em bai stiaim moa yet tingting na pasin bilong ol man.’ Long haus bilong dispela kilman long Port Arthur, ol polis i kisim 2,000 vidio bilong pait na bagarapim man na ol vidio bilong pasin pamuk.
Ol man i bihainim ol stiatok bilong Baibel ol i lukautim tingting na bel bilong ol na sakim ol amamas i kirapim bel long laikim tumas pait na bagarapim man. Olsem na ol i no larim tingting bilong dispela graun i stiaim tingting na laik bilong ol, nogat. ‘Holi Spirit [bilong God] i skulim’ ol, na ol i wok strong long kisim ol pasin em spirit i save kamapim, wanpela em bel isi. (1 Korin 2:12, 13; Galesia 5:22, 23) Bilong mekim olsem, ol i save stadi oltaim long Baibel, beten, na tingim tingim long bel ol samting bilong strongim ol. Na ol i no poroman wantaim ol lain i save laikim pasin bilong pait; ol i save poroman wantaim ol man i olsem ol yet—em ol i laikim tru nupela taim Jehova bai kamapim na i gat bel isi long en. (Song 1:1-3; Sindaun 16:29) Tru tumas, savetingting i kam long God i save lukautim gut yumi!
Larim “Tok” Bilong Jehova i Was Long Bel Bilong Yu
Taim Satan i traim Jisas long ples drai nating, Jisas i kamapim stret ol tok bilong Baibel bilong daunim tok bilong Satan. (Luk 4:1-13) Tasol em i no tok resis wantaim Satan bilong lukim husat bai win. Taim Jisas i mekim wok long Baibel bilong bekim tok long Satan, em i kamapim ol tok i stap long bel bilong em, na long dispela as pasin trik bilong Satan i no inap pulim Jisas maski dispela pasin trik i bin wok gut long Iden. Ol pasin trik bilong Satan bai i no inap pundaunim yumi tu sapos yumi pulimapim bel bilong yumi long ol tok bilong Jehova. Em i nambawan bikpela samting, long wanem, “gutpela tingting bilong stiaim laip bilong yu, em i save kamap long tingting [olsem bel] bilong yu.”—Sindaun 4:23.
Na yumi mas wok yet long was gut long bel na no ken slek long mekim. Satan i no inap pulim Jisas long ples drai nating, tasol em i no givap long traim Jisas. (Luk 4:13) Na oltaim em bai strong long traim yumi tu, na em bai traim kain kain rot na bai yumi no stap gut long Jehova. (KTH 12:17) Olsem na yumi mas bihainim pasin bilong Jisas na kisim pasin bilong laikim tumas Baibel, na beten oltaim long God i ken givim holi spirit na savetingting long yumi. (1 Tesalonaika 5:17; Hibru 5:7) Ol man i go long Jehova bilong em i ken lukautim ol, em i tok promis olsem i no gat wanpela samting inap bagarapim ol long ol samting bilong spirit.—Song 91:1-10; Sindaun 1:33.
Tok Bilong God i Lukautim Kongrigesen
Satan i no inap pasim rot bilong “planti manmeri tru” long abrusim bagarap long taim bilong bikpela hevi. (KTH 7:9, 14) Tasol em i wok strong yet long pundaunim sampela Kristen na bai Jehova i no ken orait moa long ol. Satan i bin pulim planti Israel long bipo, na 24,000 i bin dai taim ol i stap klostu pinis long Graun Bilong Promis. (Namba 25:1-9) Tru, ol Kristen i mekim rong na ol i kamapim klia ol i tanim bel tru, kongrigesen i save helpim ol na bai ol i ken kamap gutpela gen long ol samting bilong spirit. Tasol ol sinman i no tanim bel, olsem Simri long bipo, ol inap bagarapim ol narapela long ol samting bilong spirit na stretpela pasin. (Namba 25:14) Ol i kain olsem ol soldia i sanap klostu klostu na ol i tromoi ol hap plang bilong pait, na nau ol birua inap bagarapim ol wantaim ol poroman i stap klostu long ol.
Olsem na Baibel i tok: “Sapos wanpela man yupela i save kolim brata long Krais, em i mekim pasin pamuk o em i mangal long ol samting bilong ol arapela man o em i lotu long ol giaman god o em i tok bilas o em i spak o em i stilim samting bilong narapela man, orait yupela i no ken i stap wantaim em. Nogat. Na tu, yupela i no ken kaikai wantaim kain man olsem. . . . Yupela i mas rausim dispela man nogut i stap namel long yupela.” (1 Korin 5:11, 13) Dispela “tok” i gat savetingting long en i lukautim kongrigesen na bai em i stap stret na stap klin tru long ol samting bilong spirit.
Tasol planti lotu bilong Kristendom na ol apostet i ting yumi no gat wok moa long bihainim ol tok bilong Baibel i pait wantaim tingting bilong nau long wanem pasin i stret o i no stret. Olsem na maski wanpela rong i bikpela tru, ol i ting em i no wanpela sin, na sampela pris pasto bilong lotu, ol tu i ting olsem. (2 Timoti 4:3, 4) Tok bilong Sindaun 30:5, em tu i stori long “tok” bilong Jehova i olsem hap plang bilong soldia, tasol ves 6 i kam bihain long en i tok: “Yu no ken autim tok bilong yu yet na tok dispela em i tok bilong God. Nogut em i krosim yu na bihain olgeta manmeri i save, yu man bilong giaman.” Tru tumas, ol man i paulim tok bilong Baibel, ol i man bilong giaman long ol samting bilong spirit—na ol kain man olsem i gat bikpela asua moa yet! (Matyu 15:6-9) Olsem na yumi mas tenkyu tru long yumi insait long wanpela oganaisesen i save daun tru long Tok Bilong God.
“Gutpela Smel” i Lukautim Yumi
Lain bilong God i holimpas tok bilong Baibel na autim gutpela tok bilong en long ol man, olsem na ol i save kamapim samting i olsem smok i gat “gutpela smel” bilong laip na Jehova i amamas long en. Tasol long ol man i no gat stretpela pasin, ol man i autim dispela tok ol i kamapim smel i olsem “smel bilong dai.” Tru tumas, i olsem dispela graun bilong Satan i mekim na nus bilong ol man nogut i paul tru long smelim samting, olsem na taim ol i stap klostu long ol lain i kamapim ‘gutpela smel bilong Krais,’ bel bilong ol i no stap isi—na ol i birua tu long ol. Tasol ol man i wok strong long autim gutnius ol i kamap olsem ‘smel bilong laip namel long ol man [“God bai i kisim bek ol,” NW ].’ (2 Korin 2:14-16) Ol dispela manmeri i gat stretpela bel ol i les tru long pasin bilong tupela maus na ol tok giaman bilong ol lotu giaman. Olsem na taim yumi opim Baibel na givim tok bilong Kingdom long ol, dispela tok i pulim ol i go klostu long Krais na ol i laik kisim sampela save moa.—Jon 6:44.
Olsem na sapos sampela i no laik harim tok bilong Kingdom, yu no ken bel hevi. Yu mas tingim “gutpela smel” bilong Krais i wanpela samting i lukautim yumi long ol samting bilong spirit na dispela smel i pasim planti man nogut long kam insait long paradais bilong spirit em lain bilong God i stap long en, tasol dispela “gutpela smel” i pulim ol man i gat gutpela bel i kam long en.—Aisaia 35:8, 9.
Ol soldia Grik long Maraton ol i sanap klostu klostu na holim strong hap plang bilong pait, olsem na ol i winim pait maski ol birua i bikpela lain moa. Na olsem tasol, ol Witnes Bilong Jehova i stap gut long em ol i ken bilip olsem ol bai winim tru pait bilong spirit, long wanem, Jehova bai “mekim ol i win.” (Aisaia 54:17) Olsem na yumi olgeta wan wan i mas wok yet long “holimpas tok i gat laip” na go long Jehova bilong painim ples hait.—Filipai 2:16.
[Ol Piksa long pes 31]
‘Gutpela tingting na save i kam long God i save bihainim klinpela tingting na i save stap wanbel wantaim ol arapela’