Sapta 13
Man i Bihainim Pasin Bilong God Em i Ken Amamas
1. Olsem wanem yumi inap tok, man i bihainim pasin Jehova i laikim em i ken amamas?
JEHOVA em i “as bilong pasin tru bilong amamas,” na em i laik bai yu stap amamas. (1 Timoti 1:11) Sapos yu bihainim pasin Jehova i laikim, dispela inap helpim yu na bai yu stap bel isi, olsem wara i ran oltaim na i no save pinis. Na taim yu bihainim pasin God i laikim, bai yu wok long mekim stretpela pasin oltaim “olsem solwara i save bruk long nambis.” Em rot bilong i stap amamas tru.—Aisaia 48:17, 18.
2. Olsem wanem ol Kristen inap i stap amamas, maski sampela taim ol man i mekim nogut long ol?
2 Tasol ating sampela man bai tok, ‘Sampela taim man i mekim pasin i stret na em i kisim hevi long dispela.’ Em i stret. Kain samting olsem i bin painim ol aposel bilong Jisas. Tasol maski ol man i mekim nogut long ol, ol i amamas na ol i “no lusim wok bilong autim gutnius.” (Aposel 5:40-42) Dispela inap lainim yumi long sampela bikpela samting. Wanpela em olsem: Taim yumi bihainim pasin bilong God, i no olsem ol man bai mekim gut long yumi long olgeta taim. Aposel Pol i tok: “Olgeta man i laik pas wantaim Krais Jisas na i bihainim pasin bilong God, ol man bai i mekim nogut long ol.” (2 Timoti 3:12) As bilong dispela i olsem Satan na lain bilong em i birua long ol man i bihainim pasin bilong God. (Jon 15:18, 19; 1 Pita 5:8) Tasol ol samting bilong skin i no as bilong i stap amamas tru. Bilong i stap amamas olsem, yumi mas save yumi mekim pasin i stret na God i orait long yumi.—Matyu 5:10-12; Jems 1:2, 3; 1 Pita 4:13, 14.
3. Taim man i lotu long Jehova, dispela i mas mekim wanem long wokabaut bilong em?
3 I gat sampela man i save ting ol inap mekim sampela pasin bilong lotu long wan wan taim na bai God i orait long ol, maski ol i no tingim em long ol narapela taim. Tasol pasin tru bilong lotu long God Jehova i no olsem. Man i lotu long God Jehova, lotu bilong em i mas bosim olgeta pasin em i mekim long olgeta de na long olgeta yia. Olsem na ol i kolim olsem “Rot bilong Bikpela.” (Aposel 19:9; Aisaia 30:21) Bilong lotu tru long Jehova, yumi mas bihainim pasin bilong God long olgeta wokabaut bilong yumi, olsem olgeta tok na pasin bilong yumi i mas stret wantaim Tok Bilong God, em Baibel.
4. Sapos yumi senisim pasin bilong yumi bambai yumi ken bihainim pasin God i laikim, dispela bai helpim yumi olsem wanem?
4 Taim man i kirap lainim tok bilong Baibel na em i save em i mas stretim sampela pasin bambai Jehova i ken amamas long em, em inap ting olsem, ‘Sapos mi bihainim pasin bilong God, dispela inap helpim mi tru?’ Yu inap bilip tru olsem dispela bai helpim yu. God “em i as bilong dispela pasin bilong laikim ol arapela,” olsem na olgeta pasin Jehova i laik bai yumi bihainim i bilong helpim yumi. (1 Jon 4:8) Na tu, God i gat gutpela save na tingting na em i save wanem rot yumi mas bihainim bilong helpim yumi tru. God Jehova i gat olgeta strong, olsem na em inap strongim yumi long lusim pasin nogut bambai yumi ken mekim pasin em i laikim. (Filipai 4:13) Orait, nau yumi ken skelim sampela stiatok bilong God yumi mas bihainim, na olsem wanem yumi ken amamas sapos yumi bihainim ol dispela stiatok.
STRETPELA PASIN I KAMAPIM AMAMAS
5. Baibel i tok wanem long pasin bilong mekim tok giaman na pasin stil?
5 Jehova em i “God bilong mekim pasin tru tasol.” (Song 31:5) Tru, ating yu laik bihainim pasin bilong em na kisim nem olsem man bilong mekim tok i tru na pasin i stret. Man i mekim stretpela pasin em i no save sem long pasin bilong em na em i stap belgut. Tasol pasin i no stret i pulap long dispela graun na planti manmeri i save giaman na stil, olsem na ol Kristen i mas tingim gut tok bilong Baibel olsem: “Yupela olgeta i mas mekim tok tru tasol . . . Ol stilman i no ken stil moa. . . . Ol i mas mekim gutpela wok . . . na ol bai i kisim planti samting, inap long ol i ken helpim ol man i sot long ol samting.” (Efesus 4:25, 28) Ol Kristen i save mekim gut wok bilong ol; ol i no save giaman na lusim nating taim bilong wok. Ol i no save kisim samting long ples wok sapos bos i no tok orait pastaim. Man i lotu long Jehova, maski em i stap long ples wok, o long skul, o long haus, em i mas “wokabaut stret long olgeta taim.” (Hibru 13:18) God i no laikim ol man bilong tok giaman o stil.—Lo 5:19; KTH 21:8.
6. Man i bihainim pasin bilong God na em i no giaman o stil, olsem wanem dispela inap givim biknem long God Jehova?
6 Man i mekim stretpela pasin em i save kisim planti blesing. Tingim Selina, em wanpela meri wanpis long Afrika em i stap rabis, tasol em i laikim tumas God Jehova na ol stretpela stiatok bilong em. Wanpela taim em i lukim wanpela paus i gat pasbuk na bikpela mani i stap insait. Em i lukim buk bilong telefon na bihain em i painim pinis papa bilong paus, em wanpela man i gat stua na ol raskol i bin stilim dispela mani bilong em. Maski Selina i gat bikpela sik, em i go lukim dispela man na man hia i kirap nogut tru taim Selina i bekim paus wantaim olgeta samting i stap insait. Em i tok: “Gutpela pasin olsem i mas i gat pe bilong en,” na em i givim sampela mani long Selina. Tasol bikpela samting moa, dispela man i litimapim lotu bilong Selina. Tru tumas, ol man i lotuim Jehova, taim ol i mekim stretpela pasin dispela i save givim biknem long tok bilong Baibel ol i autim, na i givim biknem long Jehova, na i mekim ol yet i amamas.—Taitus 2:10; 1 Pita 2:12.
MAN I GIVIM SAMTING EM I AMAMAS
7. Olsem wanem na pasin bilong pilai laki i no stret?
7 Ol man i save givim ol samting ol i save amamas, tasol ol man i save mangal ol “i no inap i go insait long kingdom bilong God.” (1 Korin 6:10) Wanpela pasin mangal planti manmeri i save mekim em pilai laki. Ol i laik kisim mani long rot bilong man i lus long pilai. Jehova i no orait long ol man i “pulim mani samting bilong ol man.” (1 Timoti 3:8) Maski lo bilong gavman i orait long olkain pilai laki na man i pilai bilong amamas tasol, dispela pasin inap kalabusim em na em i helpim wanpela pasin i bin bagarapim tru sindaun bilong planti man. Man i pilai laki, dispela inap givim bikpela hevi long famili bilong em, na bai ol i sot long mani bilong baim kaikai na klos samting.—1 Timoti 6:10.
8. Olsem wanem Jisas i stap gutpela piksa long pasin bilong givim ol samting? Olsem wanem yumi ken givim ol samting bilong helpim ol man?
8 Tasol ol Kristen i save sori long ol man na givim ol samting bilong helpim ol, na ol i tingting moa yet long helpim ol wanlotu i sot long samting, na long dispela rot ol i kisim bikpela amamas. (Jems 2:15, 16) Taim Jisas i no kam daun yet long graun, em i lukim God i givim planti samting long ol man bilong helpim ol. (Aposel 14:16, 17) Jisas yet em i bin givim taim na strong na laip bilong em bilong helpim ol man. Olsem na em inap tru long tok olsem: “Amamas bilong man i givim samting long ol arapela man, dispela i winim amamas bilong man i kisim samting bilong em yet.” (Aposel 20:35) Na taim wanpela rabismeri i tromoi tupela liklik mani long bokis mani bilong tempel, Jisas i litimapim nem bilong em, long wanem, em i “tromoi olgeta mani bilong en. Em i no gat mani moa i stap bilong baim kaikai.” (Mak 12:41-44) Ol Israel bilong bipo na ol Kristen bilong pastaim i makim gutpela pasin bilong amamas long givim ol samting bilong helpim kongrigesen na wok bilong Kingdom. (1 Stori 29:9; 2 Korin 9:11-14) Ol Kristen bilong nau i givim mani samting bilong helpim ol dispela wok na ol i amamas tu long givim biknem long God na givim laip bilong ol bilong mekim wok bilong em. (Rom 12:1; Hibru 13:15) Jehova i save mekim gut long ol, long wanem, ol i givim taim na strong na mani samting bilong ol bilong helpim lotu i tru na wok bilong autim gutnius bilong Kingdom long olgeta hap bilong graun.—Sindaun 3:9, 10.
SAMPELA SAMTING MOA I KAMAPIM AMAMAS
9. Bilong wanem i no stret yumi dring planti tumas?
9 Bilong i stap amamas, ol Kristen i mas was gut na holim strong “gutpela tingting.” (Sindaun 5:1, 2) Bilong mekim olsem, ol i mas kaunim Baibel na ol gutpela buk bilong Baibel na tingim gut long bel ol tok ol i kaunim. Tasol i gat sampela samting ol i mas abrusim. Tingim dispela: Man i dring planti tumas em i no inap bosim tingting bilong em. Dispela inap mekim na bai em i pamuk, o pait, o bamim man long ka na kilim em i dai. Olsem na yumi no kirap nogut taim Baibel i tok, ol man i save spak ol i no inap i go insait long Kingdom bilong God! (1 Korin 6:10) Ol Kristen tru i strong long “bihainim ol gutpela tingting tasol,” olsem na ol i klia long pasin bilong spak, na dispela i helpim ol long i stap amamas wantaim.—Taitus 2:2-6.
10. (a) Bilong wanem ol Kristen i no save smok? (b) Sapos man i lusim smok na ol narapela samting i kalabusim em, dispela inap helpim em olsem wanem?
10 Sapos skin i stap klin, dispela inap helpim man long i stap amamas. Tasol planti man i kalabus long ol samting em inap bagarapim skin bilong ol. Tingim pasin bilong smok. Wanpela lain, em Wol Helt Oganaisesen, i tok, pasin bilong smok “i save kilim i dai 3 milion manmeri long olgeta yia.” I hatwok long lusim pasin bilong smok, long wanem, pastaim bai skin i krai long smok na i pen. Tasol planti manmeri i lusim pinis smok na ol i lukim olsem dispela i helpim skin bilong ol long kamap gutpela na ol i gat sampela mani moa bilong baim kaikai samting. Tru tumas, sapos yu lusim smok o narapela samting nogut yu kalabus long en, bai skin bilong yu i stap klin, olsem gutpela, na bel i no gat tok, na bai yu stap amamas tru.—2 Korin 7:1.
AMAMAS INSAIT LONG MARIT
11. Man na meri i mas mekim wanem na bai marit bilong tupela i stret long lo, na i stap klin, na i no ken bruk?
11 Man na meri i sindaun wantaim olsem tupela marit, marit bilong ol i mas stret long lo bilong gavman. (Mak 12:17) Na ol i mas tingim marit bilong ol i wanpela bikpela samting. Tru, sapos long laik bilong man yet em i no lukautim meri pikinini long samting bilong skin, o em i save mekim nogut tru long meri, o em i wok long bagarapim tru meri long ol samting bilong spirit, orait i gat as na meri inap lusim man. (1 Timoti 5:8; Galesia 5:19-21) Tasol long 1 Korin 7:10-17 aposel Pol i laik kirapim ol marit long i stap wantaim. Sapos tupela i laik i stap amamas tru wantaim, narapela i mas stap gut long narapela. Pol i tok: “Yupela ol marit i mas lukautim gut marit bilong yupela, bai em i stap klin tru long ai bilong God. Yupela i save, God bai i bekim pe nogut long ol manmeri i mekim ol kain kain pasin pamuk.” (Hibru 13:4) Dispela tok “marit” i makim man na meri i marit tru long lo bilong gavman o bilong ples na ol i slip wantaim. Sapos ol i slip wantaim narapela, olsem sapos man i maritim planti meri, dispela i no stret o “klin tru long ai bilong God.” Na Baibel i tambuim man na meri singel long slip wantaim, na pasin sodom, olsem man i mekim pasin i gat sem wantaim narapela man.—Rom 1:26, 27; 1 Korin 6:18.
12. Pasin pamuk i kamapim wanem ol hevi?
12 Ating pasin pamuk inap givim amamas bilong skin long man inap sotpela taim, tasol i no kamapim amamas tru. Man o meri i pamuk, em i mekim pasin nogut long ai bilong God, na bagarapim maus bilong bel bilong em yet. (1 Tesalonaika 4:3-5) Pasin pamuk inap kamapim bikpela hevi—man o meri i pamuk, sik AIDS o narapela sik bilong pamuk inap kisim em. Wanpela ripot bilong ol dokta i tok: “Ol i ting sik gonoria i save kisim 250 milion manmeri long olgeta yia, na sik sifilis i kisim olsem 50 milion.” Na i gat hevi tu long meri i kisim bel nating na i no laik kamapim pikinini. Wanpela lain (International Planned Parenthood Federation) i tok, long olgeta hap bilong graun, long olgeta yia, inap olsem 15 milion yangpela meri i gat 15 i go inap 19 krismas ol i pamuk na kisim bel na inap 5 milion ol i rausim bel. I gat ripot olsem long wanpela kantri long Afrika, long olgeta yangpela meri i dai, bikpela hap lain (72 pesen) ol i bin rausim bel na sampela hevi i kamap na ol i dai. Tru sampela man i pamuk na sik i no kisim ol, o meri i pamuk na em i no kisim bel, tasol ol i no inap abrusim bel hevi bilong dispela pasin ol i bin mekim. Planti ol i save sem tru na i no laikim ol yet.
13. Pasin bilong bagarapim marit i kamapim wanem sampela hevi moa? Wanem samting bai painim ol singel na marit i no laik lusim pasin pamuk?
13 Sapos man o meri marit i trabel, poroman inap lusim rong bilong em, tasol lo bilong Baibel i orait long poroman i no gat rong em i ken katim marit long dispela as. (Matyu 5:32; skelim wantaim Hosea 3:1-5.) Taim kain pasin olsem i mekim na marit i bruk, dispela i save nogutim tru poroman i no gat asua na ol pikinini. Bilong helpim ol manmeri long i stap gutpela, Baibel i tok God bai mekim save long ol singel na marit i pamuk na ol i no tanim bel. Na Baibel i tokaut klia olsem, ol manmeri i save mekim pasin pamuk o pasin sem, ol i “no inap i go insait long kingdom bilong God.”—Galesia 5:19, 21.
“NO BILONG DISPELA GRAUN”
14. (a) Man i bihainim pasin bilong God em i mas klia long wanem ol pasin i olsem pasin bilong lotuim god giaman? (b) Tok bilong Jon 17:14 na Aisaia 2:4 i givim wanem tingting long yumi?
14 Ol man i laik mekim pasin Jehova i laikim na kisim ol blesing bilong Kingdom, ol i klia long olkain pasin bilong lotuim god giaman. Baibel i tambuim pasin bilong wokim piksa na lotu long en—piksa bilong Krais na mama bilong em Maria tu. (Kisim Bek 20:4, 5; 1 Jon 5:21) Olsem na ol Kristen tru i no save adorim piksa bilong lotu, o kruse, o imis. Na ol i klia long ol pasin i olsem pasin bilong lotuim piksa, olsem salut long plak na mekim singsing bilong litimapim kantri. Taim ol man i laik subim ol long mekim kain pasin olsem, ol i tingim tok Jisas i bin mekim long Satan, olsem: “Buk bilong God i tok, ‘Yu mas aninit long God, Bikpela bilong yu. Na yu mas lotu long em wanpela tasol.’ ” (Matyu 4:8-10) Jisas i tok, ol disaipel bilong em “i no bilong dispela graun.” (Jon 17:14) Ol i no save insait long ol wok politik bilong dispela graun; ol i save sindaun gut wantaim ol man olsem Aisaia 2:4 i tok: “Bikpela bai i stretim tok bilong olgeta lain manmeri na bai ol i sindaun gut wantaim. Na bai ol i paitim ol bainat bilong ol i kamap olsem ol ain bilong brukim graun, na bai ol i paitim ol spia bilong ol i kamap olsem ol naip. Na olgeta lain manmeri bai i no ken pait moa, na bai ol i no skul moa long pait.”
15. Bikpela Babilon em wanem samting? Planti nupela man i stadi long Baibel ol i mekim wanem bilong lusim Bikpela Babilon?
15 Na ol i mas lusim tru “Bikpela taun Babilon,” em olgeta lotu giaman, na bai ol “i no bilong dispela graun.” Lotu giaman bilong taun Babilon bilong bipo i bin go kamap long olgeta hap bilong graun na i bosim nogut ol manmeri long ol samting bilong lotu. Dispela tok “Bikpela taun Babilon” i makim olgeta lotu em ol tok na pasin bilong ol i no stret wantaim save Jehova i bin givim long ol man bambai ol inap save long em. (KTH 17:1, 5, 15) Ol man i stap gut long lotuim Jehova, ol i klia long ol narapela lotu; ol i no save bung wantaim wanpela lotu bilong ‘Bikpela Babilon’ long ol samting bilong lotu, o pren wantaim ol olsem ol i brata spirit bilong ol. (Namba 25:1-9; 2 Korin 6:14) Olsem na planti nupela man i stadi long Baibel ol i save raitim pas long misin bilong ol na tokaut olsem ol i lusim pinis. Dispela i helpim ol long i go klostu moa long God tru, olsem em i tok promis pinis: “Yupela i mas lusim ol, na i go i stap long narapela hap. Na yupela i mas lukaut gut, nogut yupela i pas long ol samting i no klin long ai bilong God. Na bai mi yet mi kisim yupela.” (2 Korin 6:17; KTH 18:4, 5) Yu laik tru bai Papa bilong yumi long heven i orait long yu, olsem kisim yu, a?
SKELIM GUT OL BIKPELA DE BILONG YIA
16. Bilong wanem ol Kristen tru i no save mekim Krismas?
16 Sapos yumi bihainim pasin bilong God, bai yumi no karim ol hevi bilong bihainim ol bikpela de bilong dispela graun. Olsem: Baibel i no kolim de stret mama i bin karim Jisas. Tasol ating sampela bai tok, ‘Mi ting mama i karim Jisas long Disemba 25!’ Dispela i no inap, long wanem, Jisas i gat 33 na hap krismas taim em i dai long kirap bilong mun Epril long yia 33. Na taim mama i karim em, ol wasman bilong sipsip “i stap ausait long taun, na ol i was long ol sipsip bilong ol long nait.” (Luk 2:8) Long kantri Israel, long pinis bilong mun Disemba, i gat taim bilong kol na ren, na ol sipsip i no save stap ausait long nait—ol i save stap insait long ol liklik haus bilong sipsip bambai ol i no ken bagarap long bikpela kol na ren. Disemba 25 em i de ol Rom i makim olsem betde bilong god bilong san. Sampela handet yia bihain long taim Jisas i stap long graun, ol Kristen i lusim pinis lotu i tru na ol i kisim dispela de olsem de mama i karim Jisas na ol i kirap mekim Krismas. Olsem na ol Kristen tru i no save mekim Krismas o insait long ol narapela bikpela de em ol bilip kranki bilong lotu giaman i as bilong en. Na ol i save lotu long God Jehova wanpela tasol, olsem na ol i no save mekim ol bikpela de bilong givim biknem long sampela sinman bilong dispela graun o bilong litimapim kantri.
17. Ol man i bihainim pasin bilong God, bilong wanem ol i no save mekim pati bilong betde? Olsem wanem na ol pikinini Kristen i save amamas, maski ol i no save insait long ol dispela kain pati?
17 Baibel i stori long tupela betde tasol, em bilong tupela man i no bin lotu long God. (Stat 40:20-22; Matyu 14:6-11) Baibel i no tokim yumi long betde bilong Jisas, em man i gutpela olgeta, olsem na i no gat as long yumi mekim betde bilong ol man i no gutpela olgeta, a? (Saveman 7:1) Ol papamama i aninit long God, ol i no save wetim wanpela bikpela de na bai ol i mekim gut long ol pikinini bilong ol. Nogat. Wanpela yangpela meri Kristen i gat 13 krismas, em i tok: “Mipela famili i save amamas planti taim. . . . Mi pas gut wantaim papamama, na taim ol narapela yangpela i askim mi, i gat wanem as na mi no save insait long ol amamas bilong ol bikpela de, mi tokim ol, mi save kisim amamas long olgeta de.” Wanpela yangpela Kristen i gat 17 krismas, em i tok: “Long famili bilong mipela, narapela i save praisim narapela planti taim long yia.” Sapos man i givim samting long laik bilong em na i no olsem narapela i subim em long givim, dispela i kamapim bikpela amamas moa.
18. Jisas i tokim ol disaipel long bung bilong tingim wanem de tasol long yia? Dispela bung i kirapim yumi long tingim gen wanem samting?
18 Tasol ol man i bihainim pasin bilong God, i gat wanpela bikpela de long olgeta yia ol i save tingim. Em Kaikai Bilong Bikpela, o Memorial bilong tingim dai bilong Krais. Jisas i tokim ol disaipel long mekim dispela kaikai, em i tok: “Yupela i mas mekim olsem bilong tingim mi.” (Luk 22:19, 20; 1 Korin 11:23-25) Taim Jisas i kirapim dispela kaikai long Nisan 14 long yia 33, em i kisim bret i no gat yis bilong makim bodi bilong em i no gat sin, na retpela wain bilong makim blut bilong em i gutpela olgeta. (Matyu 26:26-29) Ol Kristen em God i makim ol long spirit holi ol tasol i save kisim bret na wain long taim bilong Memorial, long wanem, ol i insait long nupela kontrak na kontrak bilong Kingdom, na ol i bilong kisim laip long heven. (Luk 12:32; 22:20, 28-30; Rom 8:16, 17; KTH 14:1-5) Tasol olgeta man i bung long de bilong tingim dai bilong Jisas, em Nisan 14 long kalenda bilong ol Juda, ol i save kisim blesing. Ol i tingim gen bikpela pasin sori God Jehova na Krais Jisas i bin mekim—long rot bilong ofa bilong tekewe sin ol man inap i stap gutpela long ai bilong God na kisim laip i stap oltaim.—Matyu 20:28; Jon 3:16.
WOK MANI NA AMAMAS
19. Wanem hevi inap painim ol Kristen long mekim wok mani?
19 Ol Kristen tru i mas wok strong na lukautim ol yet long kaikai samting. Taim papa i lukautim gut famili olsem, em i stap belgut. (1 Tesalonaika 4:11, 12) Tasol sapos wok mani bilong Kristen i no stret wantaim Baibel, em i no inap i stap amamas. Sampela taim i hatwok long painim wok i stret wantaim lo bilong Baibel. Olsem: Sampela bos i save tokim ol wokboi ol i mas giamanim ol man i kam baim samting. Tasol sapos wokboi i save mekim stret wok bilong em, planti bos i orait long em i bihainim tok bilong maus bilong bel, long wanem, ol i no laik bai gutpela wokboi olsem i lusim wok. Tasol maski wanem samting i kamap, yu ken save tru olsem God bai blesim ol wok yu mekim bilong painim wanpela wok em bel bilong yu i no gat tok long en.—2 Korin 4:2.
20. Bilong wanem yumi mas skelim gut ol samting yumi mekim bilong painim amamas?
20 God Jehova i laik bai ol wokboi bilong em i stap amamas, olsem na yumi mas i gat taim tu bilong malolo na painim gutpela amamas. (Mak 6:31; Saveman 3:12, 13) Dispela graun bilong Satan i kamapim ol amamas i no stret long ai bilong God. Tasol sapos yumi laik mekim pasin God i laikim, yumi mas skelim gut ol buk yumi kaunim, na ol tok yumi harim long redio, na musik yumi harim; na yumi mas skelim gut ol bung bilong harim musik na singsing yumi laik go long en, na wanem kain piksa wokabaut, na pilai, na piksa long televisen, na video, yumi laik lukim. Sapos bipo yumi laikim ol amamas i no stret wantaim tok bilong Lo 18:10-12, na Sindaun 3:31, 32, na Efesus 5:3-5, na nau yumi senisim pasin bilong yumi, bai Jehova i amamas na bai yumi tu i amamas.
TINGIM GUT LAIP NA BLUT
21. Sapos yumi tingim gut laip bilong man, dispela i mas givim wanem tingting long yumi long pasin bilong rausim bel? Na yumi mas ting olsem wanem long ol pasin bilong yumi?
21 Bilong i stap amamas tru, yumi mas tingim laip bilong man i samting holi, olsem Jehova i mekim. Baibel i tambuim yumi long kilim man i dai. (Matyu 19:16-18) Lo God i givim long ol Israel i makim olsem laip bilong pikinini i stap yet long bel, dispela tu i holi—yumi no ken bagarapim. (Kisim Bek 21:22, 23) Na yumi no ken ting laip bilong yumi i samting nating na yumi bagarapim bodi bilong yumi long rot bilong smok, na kisim ol drak, na dring planti tumas, o mekim sampela samting yumi inap kisim bagarap long en. Yumi no ken insait long sampela pasin em inap kilim man i dai, o slek long mekim samting em inap lukautim man na bai em i no kisim bagarap, nogut yumi gat asua long man i dai.—Lo 22:8.
22. (a) God i ting olsem wanem long blut na pasin bilong mekim wok long en? (b) Blut bilong husat tasol inap helpim yumi tru long i stap laip?
22 Jehova i tokim Noa wantaim lain bilong em, blut i olsem laip. Olsem na God i tambuim ol long kaikai blut. (Stat 9:3, 4) Yumi lain tumbuna pikinini bilong ol, olsem na dispela lo i stap yet long yumi olgeta. Jehova i tokim ol Israel, ol i mas kapsaitim blut long graun na ol i no ken mekim sampela wok bilong ol yet long en. (Lo 12:15, 16) Ol i kolim gen lo bilong God long blut taim ol i tokim ol Kristen, “Yupela i no ken kaikai . . . blut.” (Aposel 15:28, 29) Ol man i bihainim pasin bilong God ol i save tingim laip em i samting holi, olsem na ol i no save kisim blut long haus sik, maski ol narapela i strong long tok dispela pasin inap helpim man long i stap laip. I gat planti narapela samting ol dokta inap mekim bilong helpim sikman na ol Witnes Bilong Jehova i orait long en. Ol dispela samting i bin helpim tru planti sikman na ol i abrusim ol hevi inap painim man taim em i kisim blut. Ol Kristen i save, blut bilong Krais em i bin kapsaitim, dispela tasol inap helpim ol tru long i stap laip. Man i bilip long en, sin bilong em inap tekewe na em inap kisim laip i stap oltaim.—Efesus 1:7.
23. Wanem sampela gutpela samting i painim man i bihainim pasin bilong God?
23 Tru tumas, yumi mas wok strong bambai yumi inap bihainim pasin bilong God. Ating bai ol famili o pren i tok bilas long yu. (Matyu 10:32-39; 1 Pita 4:4) Tasol sapos yu bihainim pasin bilong God, gutpela samting bai yu kisim i winim tru ol hevi inap painim yu. Bel bilong yu bai i no gat tok, na bai yu kisim ol gutpela poroman, em ol tu i lotuim Jehova. (Matyu 19:27, 29) Na tingim dispela gutpela samting: Bai yu inap i stap oltaim long nupela taim God bai kamapim. (Aisaia 65:17, 18) Na sapos yu bihainim tok bilong Baibel, bai yu yet yu stap belgut na bai yu mekim Jehova i amamas tru! (Sindaun 27:11) Tru tumas, sapos yu bihainim pasin bilong God, yu ken amamas!—Song 128:1, 2.
TRAIM SAVE BILONG YU
Wanem sampela samting i mekim na man i bihainim pasin bilong God em i ken amamas?
Man i mas senisim wanem ol pasin bilong em bambai em i ken bihainim pasin bilong God?
Bilong wanem yu laik bihainim pasin bilong God?
[Piksa long pes 124, 125]
Ol man i bihainim pasin bilong God ol i save mekim ol wok bilong God na ol i gat taim bilong malolo tu, olsem na ol i stap amamas