Tok Bilong Jehova i Gat Laip

Sampela Bikpela Tok Bilong Buk Aisaia​—Namba 2

AISAIA i mekim gut wok bilong em olsem profet. Ol tok em i mekim long bagarap bai painim 10-pela lain bilong Israel i bin kamap tru. Nau em i gat sampela tok moa long ol samting bai painim Jerusalem long bihain.

Jerusalem bai kisim bagarap, na ol manmeri bai i go kalabus. Tasol Jerusalem bai i no i stap nating oltaim, nogat. Bihain, lotu i tru bai kamap strong gen. Dispela tok i stap long Aisaia 36:1–66:24.a Taim yumi skelim ol tok i stap long ol dispela sapta dispela bai helpim yumi, long wanem, truim bilong ol dispela tok profet i wok long kamap long taim bilong yumi na sampela bai kamap tru long bihain. Ol dispela sapta tu i gat ol tok profet long Mesaia.

“WANPELA TAIM BAI KAMAP BIHAIN”

(Aisaia 36:1–39:8)

Long namba 14 yia bilong King Hesekia i stap king (732 B.C.E.), lain Asiria i kam bilong pait long ol Juda. Jehova i tok em bai lukautim Jerusalem. Ol Asiria i no pait long ol Juda, long wanem, wanpela ensel bilong Jehova i kilim i dai 185,000 soldia bilong Asiria.

Hesekia i kisim sik. Jehova i harim beten bilong Hesekia na i oraitim em, na larim em i stap laip 15 yia moa. Taim king bilong Babilon i salim ol man i kam bilong tok amamas long Hesekia, em i no bihainim savepasin na em i soim ol olgeta mani kago bilong em. Aisaia i go tokim Hesekia long tok bilong Jehova, em i tok: “Wanpela taim bai i kamap bihain, na bai ol Babilon i kam na kisim olgeta samting i stap long haus king, na olgeta samting bipo ol tumbuna bilong yu i bin bungim i stap long ol bakstua. Bai ol i no larim wanpela samting i stap. Nogat tru. Bai ol i kisim olgeta samting i go long Babilon.” (Aisaia 39:​5, 6) Dispela samting i kamap tru bihain long 100 yia.

Bekim Bilong Ol Askim Bilong Baibel:

38:8​—Dispela ‘lata ol i save kaunim ol aua bilong de long en,’ em i wanem samting? Long yia 800 B.C.E. samting, lain Isip na Babilon i save mekim wok long wanpela raunpela samting kain olsem plet ston i gat stik long en na taim lait bilong san i holim em, orait sedo bilong dispela stik bai makim ol aua bilong de. Ating Ahas, papa bilong Hesekia i bin kisim wanpela kain samting olsem i kam long Juda. O ating i gat wanpela lata i stap insait long haus bilong king na ol i wokim wanpela pos arere long en na taim lait bilong san i kisim, sedo bilong en i kamap long ol step bilong lata na ating dispela i makim ol aua bilong de.

Skul Yumi Kisim:

36:​2, 3, 22. Maski ol i rausim Sepna long wok bilong em olsem man i lukautim olgeta samting bilong haus king, ol i larim em i stap olsem kuskus bilong man i kisim ples bilong em. (Aisaia 22:​15, 19) Sapos i gat sampela as na ol i rausim yumi long wanpela wok yumi holim insait long oganaisesen bilong Jehova, em bai i gutpela sapos yumi mekim yet ol narapela wok we God i orait long yumi mekim.

37:​1, 14, 15; 38:​1, 2. Long taim bilong hevi, i gutpela yumi beten long Jehova long dispela samting na bilip tru long em.

37:​15-​20; 38:​2, 3. Taim ol Asiria i laik bagarapim Jerusalem, bikpela samting long tingting bilong Hesekia em i olsem, sapos Jerusalem i bagarap, dispela bai daunim nem bilong Jehova. Taim em i kisim save olsem sik bilong em bai mekim na em i dai, em i no tingim em yet, nogat. Bikpela samting long em, em i wari tru olsem em i no gat pikinini bilong kisim ples bilong em na bai i no gat wanpela i kamap king long lain bilong Devit. Na tu, em i tingting planti long husat bai go pas long pait long ol Asiria. Olsem Hesekia, yumi tingim wok bilong mekim nem bilong Jehova i stap holi na truim bilong ol samting em i tingting pinis long mekim i nambawan bikpela samting. Nambatu samting em ol samting God i mekim bilong kisim bek yumi.

38:​9-​20. Singsing bilong Hesekia long ol dispela ves i skulim yumi olsem nambawan bikpela samting long i stap bilong yumi, em long litimapim nem bilong Jehova.

“OL BAI I WOKIM JERUSALEM GEN”

(Aisaia 40:1–59:21)

Bihain long em i tok profet long bagarap bai painim Jerusalem na ol Juda bai go kalabus long Babilon, Aisaia i tok profet long ol Juda bai kam bek long as ples bilong ol. (Aisaia 40:​1, 2) Aisaia 44:28 i tok: “Ol bai i wokim Jerusalem gen.” Babilon bai kisim bagarap na ‘ol donki bai karim’ ol god giaman bilong ol i go. (Aisaia 46:1) Ol dispela samting i kamap tru bihain long 200 yia.

Jehova bai mekim wokman bilong em i “kamap olsem lait bilong olgeta kantri.” (Aisaia 49:6) Dispela “skai” o lain i bosim Babilon ol “bai pinis olgeta olsem smok,” na ol manmeri aninit long em “ol bai dai nabaut olsem ol lang”; tasol ‘Jerusalem i stap kalabus em bai rausim ol sen i pasim nek bilong em.’ (Aisaia 51:6; 52:2) Jehova i tokim ol man i kam na harim tok bilong em: “Bai mi mekim kontrak wantaim yupela, na dispela kontrak bai i stap oltaim. Na oltaim bai mi laikim yupela tumas na mekim gut long yupela, olsem bipo mi bin promis long King Devit.” (Aisaia 55:3) Taim yumi bihainim ol stretpela lo bilong God dispela bai mekim yumi i ‘amamas moa yet long Bikpela.’ (Aisaia 58:14) Tasol ol rong ol manmeri i mekim, dispela i ‘olsem banis i stap namel long ol na God bilong ol.’​—Aisaia 59:2.

Bekim Bilong Ol Askim Bilong Baibel:

40:​27, 28​—Bilong wanem ol Israel i tok: “Bikpela bilong mipela i no save lukim hevi bilong mipela. Mipela i bungim taim nogut, tasol em i no laik helpim mipela”? Ating sampela Juda long Babilon i pilim olsem Jehova i no lukim hevi i painim ol. Olsem na profet Aisaia i kirapim ol Juda long tingim olsem Man Bilong Wokim dispela graun, em strong bilong Em i no save slek na pinis, em i lukim ol hevi ol i karim.

43:​18-​21​—Bilong wanem Jehova i tokim ol Juda i go bek long ples long ol i ‘no ken tingim ol samting em i bin mekim bipo’? Dispela tok i no makim olsem ol i mas lusim tingting long ol wok Jehova i bin mekim long bipo bilong kisim bek ol, nogat. Jehova i laik bai ol i litimapim nem bilong em long ol “nupela samting” em ol yet bai pilim taim ol i go bek long Jerusalem, olsem hevi bai i no inap painim ol long rot maski ol bai wokabaut long ples drai nating. I gat ol nupela samting bai painim dispela “planti manmeri tru” em ol bai winim “bikpela hevi,” na dispela bai kirapim ol long litimapim nem bilong Jehova.​—KTH 7:​9, 14.

49:6​—Olsem wanem Mesaia i stap olsem “lait bilong olgeta kantri” maski em i autim tok tasol long ol Israel? Dispela i kamap bihain long taim Jisas i dai. Tok bilong Baibel long Aisaia 49:6 i makim ol disaipel bilong Jisas. (Aposel 13:​46, 47) Long nau, ol Kristen God i bin makim long holi spirit, na helpim bilong ol em bikpela lain manmeri, ol i stap olsem “lait bilong olgeta kantri,” ol i givim lait long ol manmeri “long olgeta hap bilong graun.”​—Matyu 24:14; 28:​19, 20.

53:10​—Olsem wanem Jehova i “amamas” (NW) long daunim Pikinini bilong em? God Jehova em man i gat pasin sori, olsem na em i kisim bikpela pen moa yet taim em i lukim Pikinini bilong em i karim bikpela pen. Maski i olsem, Jehova i amamas long pasin bilong Jisas long bihainim tok na ol samting em bikpela pen na i dai bilong Jisas bai kamapim.​—Sindaun 27:11; Aisaia 63:9.

53:11​—Mesaia bai mekim wok long wanem save bilong mekim ol manmeri i “kamap stretpela”? Jisas i kisim dispela save taim em i kam daun long graun na kamap man, na em i kisim bikpela pen na i dai. (Hibru 4:15) Olsem na em i givim laip bilong em olsem ofa bilong baim bek ol man, na dispela i helpim ol Kristen em God i bin makim ol long holi spirit na bikpela lain manmeri long kamap stretpela manmeri long ai bilong God.​—Rom 5:19; Jems 2:​23, 25.

56:6​—Husat ol dispela “manmeri bilong ol arapela kantri”? Olsem wanem ol i “bihainim olgeta tok bilong kontrak”? Ol “manmeri bilong ol arapela kantri” em “ol arapela sipsip” bilong Jisas. (Jon 10:16) Ol i bihainim ol lo bilong nupela kontrak na ol i bihainim ol pasin Jehova i putim long rot bilong dispela nupela kontrak. Ol i kisim wankain kaikai bilong spirit olsem ol Kristen God i bin makim long holi spirit, na ol i wok wantaim ol na helpim ol long mekim wok bilong autim tok bilong Kingdom na kamapim ol disaipel.

Skul Yumi Kisim:

40:​10-​14, 26, 28. Jehova em i strongpela God na em i gat pasin isi, em i gat olgeta strong na olgeta save, em i kliagut long olgeta samting na yumi no inap save long en.

40:​17, 23; 41:29; 44:9; 59:4. Ol lain politik na ol god giaman “ol i samting nating.” Ol i no inap helpim yumi.

42:​18, 19; 43:8. Sapos yumi no bihainim tok bilong God long Baibel na yumi no laik harim tok bilong em i kam long rot bilong “wokboi i gat gutpela tingting,” dispela i olsem yumi stap aipas na yaupas long ol samting bilong spirit.​—Matyu 24:45.

43:25. Jehova i save tingim biknem bilong em na rausim sin bilong ol man. Wok bilong mekim nem bilong Jehova i stap holi, em i nambawan bikpela samting, winim wok bilong mekim yumi i kamap fri long sin na indai na kisim laip oltaim.

44:8. Jehova em i olsem bikpela ston, em bai sambai long yumi. Olsem na yumi no ken pret long tokaut klia olsem em i God tru!​—2 Samuel 22:​31, 32.

44:​18-​20. Taim man i lotuim god giaman dispela i soim olsem tingting nogut i stap long bel bilong em. Yumi no ken larim wanpela samting i kisim ples bilong Jehova long bel na tingting bilong yumi.

46:​10, 11. Sapos Jehova i laik mekim wanpela samting, orait em i save mekim tasol, na dispela i kamapim klia olsem Jehova em i God tru.

48:​17, 18; 57:​19-​21. Sapos yumi wetim Jehova i kisim bek yumi, na yumi pas gut wantaim em, na bihainim ol lo bilong em, bai yumi stap gut olsem wara i ran oltaim na stretpela pasin bilong yumi bai i olsem solwara i save bruk long nambis. Ol man i no save bihainim tok bilong God ol i olsem “solwara i bruk oltaim.” Na ol i no stap gut.

52:​5, 6. Ol Babilon i kisim tingting kranki taim ol i ting olsem God tru em i no gat strong. Ol i no luksave olsem Jehova i no amamas long lain bilong em na dispela i as na em i larim ol i go kalabus. Taim hevi i painim ol narapela, i no gutpela long yumi hariap long kisim tingting kranki long as na dispela hevi i painim ol.

52:​7-9; 55:​12, 13. I gat tripela as na yumi amamas long insait long wok bilong autim tok bilong Kingdom na kamapim disaipel. Ol man i gat gutpela bel na ol i hangre long ol samting bilong spirit ol i amamas long lukim yumi i kam autim tok long ol. Yumi “lukim” Jehova, olsem yumi pas gut wantaim em. Na tu, yumi stap gut long ol samting bilong spirit.

52:​11, 12. Bilong yumi ken “karim ol dis na plet samting bilong haus bilong Bikpela,” olsem mekim wok holi bilong em, yumi mas i stap klin long ol samting bilong spirit na long pasin bilong yumi.

58:​1-​14. Pasin bilong giaman long lotuim God na bihainim stretpela pasin i no inap kamapim gutpela samting. Ol man i lotu tru ol i mas kamapim klia olsem ol i lotu long God na soim olsem ol i laikim ol brata bilong ol.​—Jon 13:35; 2 Pita 3:11.

59:15b-​19. Jehova i save lukim ol samting i painim ol man na long taim em yet i makim em i save mekim ol samting bilong helpim ol.

“EM BAI STAP OLSEM NAISPELA HAT KING”

(Aisaia 60:1–66:24)

Aisaia 60:1 i toktok long lotu i tru i kamap gen long bipo na long taim bilong yumi, na i tok: “Jerusalem, yu kirap na lait olsem san, long wanem, nau bikpela lait na strong bilong mi, Bikpela, i lait antap long yu.” Jerusalem “bai stap olsem naispela hat king Bikpela i holim long han bilong en.”​—Aisaia 62:3.

Aisaia i beten askim Jehova long helpim ol wanples bilong em, em ol bai tanim bel taim ol i stap kalabus long Babilon. (Aisaia 63:15–64:12) Aisaia i stori long ol man i save lotu tru long God ol i narapela kain long ol man i giaman long lotu. Na em i toktok long olsem wanem Jehova bai blesim ol man i lotu long Em.​—Aisaia 65:1–66:24.

Bekim Bilong Ol Askim Bilong Baibel:

61:​8, 9​—Wanem dispela “kontrak bai i stap oltaim”? Husat ol i dispela “lain tumbuna pikinini”? Dispela kontrak em nupela kontrak Jehova i wokim wantaim ol Kristen God i bin makim long holi spirit. Ol “lain tumbuna pikinini” em ol “arapela sipsip”​—em ol lain i harim tok bilong ol.​—Jon 10:16.

63:5​—God i save mekim wok long belhat bilong em olsem wanem? God i save bosim belhat bilong em​—belhat bilong em i gat as bilong en. Belhat bilong em i save sapotim na strongim em long kamapim stretpela kot bilong em.

Skul Yumi Kisim:

64:6. Ol sinman i no inap kisim bek ol yet. Ol gutpela wok ol i mekim i olsem hap laplap i doti nogut tru na ol i no inap tekewe sin bilong ol.​—Rom 3:​23, 24.

65:​13, 14. Jehova i save blesim ol man i stap gut long em, na em i inapim ol tru long ol samting bilong spirit.

66:​3-5. Jehova i no laikim tru pasin giaman.

“Yupela i Ken Belgut”

Ol tok profet olsem ol Juda bai go bek long as ples bilong ol i mas strongim bel bilong ol gutpela Juda em ol i stap kalabus long Babilon! Jehova i tok: “Yupela i ken bel gut na amamas oltaim long nupela samting nau mi wokim. Dispela nupela Jerusalem mi laik wokim, em bai i kamap ples ol manmeri i ken laikim tumas na amamas long en, na ol manmeri bilong en bai i stap bel gut tru.”​—Aisaia 65:18.

Yumi tu i stap long wanpela taim we tudak i karamapim graun olgeta na ol manmeri i stap long tudak. (Aisaia 60:2) Yumi stap long taim bilong “planti hevi nogut tru.” (2 Timoti 3:1) Olsem na dispela tok bilong Jehova long kisim bek yumi i stap long Buk Aisaia i gutpela bilong strongim yumi.​—Hibru 4:12.

[Futnot]

[Piksa long pes 8]

Yu save long nambawan as na Hesekia i beten long God i mas kisim em bek long ol Asiria?

[Piksa long pes 11]

“Bai ol manmeri i amamas tru long lukim wanpela man i ran i kam long ol ples maunten, bilong bringim gutpela tok”