Gavening Bodi i Narapela Long Koporesen Gavman i Orait Long En

KIRAP long Janueri 1885, ol i bin mekim ol miting bilong olgeta yia bilong Sosaiti Was Taua bilong Pensilvenia. Long yia 1890 samting taim ol i wok long bungim lain Kristen God i bin makim ol long spirit holi, ol dairekta na ofisa bilong dispela koporesen ol i bilong lain bilong i go long heven. Na klostu olgeta taim ol dairekta samting ol i bilong dispela lain God i bin makim.

Wanpela brata tasol i no bilong dispela lain. Long 1940, ol i makim Hayden C. Covington long kamap wanpela dairekta bilong Sosaiti. Em i wanpela loya bilong Sosaiti na wanpela bilong lain “arapela sipsip” i tingting long kisim laip oltaim long graun. (Jon 10:16) Em i namba tu bilong presiden bilong Sosaiti long 1942 i go inap 1945. Long 1945, Brata Covington i lusim wok dairekta bambai em i ken bihainim samting ol i ting long dispela taim em i laik bilong Jehova. Dispela tingting em olsem: God i laik bai ol Kristen em i bin makim ol long spirit holi, ol tasol i ken stap olsem ol dairekta na ofisa bilong Pensilvenia koporesen. Lyman A. Swingle i kisim ples bilong Hayden C. Covington long lain dairekta, na ol i makim Frederick W. Franz long kamap namba tu bilong presiden.

Bilong wanem ol wokboi bilong Jehova ol i bin ting olsem olgeta dairekta na ofisa bilong Sosaiti Was Taua bilong Pensilvenia ol i mas i stap long lain Kristen God i bin makim? Long wanem, long dispela taim bipo ol dairekta na ofisa bilong Pensilvenia koporesen ol i bilong Gavening Bodia Bilong Ol Witnes Bilong Jehova, em dispela lain olgeta ol i Kristen God i bin makim.

Wanpela Bikpela Miting Bilong Olgeta Yia

Long miting bilong olgeta yia long Oktoba 2, 1944, long Pitsbek, ol memba bilong Pensilvenia koporesen ol i kamapim 6-pela bikpela tokaut bilong stretim pepa i stori long ol lo bilong koporesen. Dispela lo pepa i bin tok, ol man i givim mani bilong helpim wok bilong Sosaiti ol inap vot, tasol namba tri tokaut i pinisim dispela pasin. Wanpela ripot bilong dispela miting bilong olgeta yia i tok: “Namba bilong ol memba bilong Sosaiti i no ken abrusim 500 . . . Olgeta memba i mas mekim wok bilong Sosaiti long olgeta de o mekim sampela wok bilong kongrigesen bilong ol Witnes Bilong Jehova, na em i mas bihainim pasin bilong Bikpela.”

Bihain long dispela, ol man i votim ol dairekta bilong Sosaiti, ol i man bilong givim bel tru long Jehova, maski hamas mani ol i bin givim bilong helpim wok bilong Kingdom. Dispela i stret wantaim Aisaia 60:​17, em i tok long wok bilong stretim ol samting bambai wok i ken kamap gutpela moa. Em i tok: “Bai mi senisim ol bras bilong yu wantaim gol, na ol ain bilong yu wantaim silva. Na bai mi senisim tu ol plang bilong yu wantaim bras na ol ston bilong yu wantaim ain. Na bai mi makim pasin bilong gutpela sindaun na bel isi bilong bosim yu, na stretpela pasin bai i stiaim wokabaut bilong yu. Na bai i no gat man moa i bosim yu na mekim nogut long yu.” Dispela tok profet i tok long ‘pasin bel isi bilong bosim yu’ na “stretpela pasin bai i stiaim wokabaut bilong yu,” em i tok long ol samting ol bai mekim bilong stretim wok bilong oganaisesen bilong lain bilong Jehova.

Dispela bikpela samting ol i mekim bambai oganaisesen i stret wantaim pasin tiokratik, i kamap long pinis bilong “2,300 de” em Daniel 8:14 i tok long en. Long dispela taim, ol i “stretim haus bilong God.”

Tasol bihain long dispela bikpela miting bilong olgeta yia long 1944 i pinis, wanpela bikpela askim i stap yet. Ol man i ting Gavening Bodi na 7-pela dairekta bilong Pensilvenia koporesen ol i wankain lain tasol. Olsem wanem? Dispela i makim olsem namba bilong ol Kristen God i bin makim na ol i stap long Gavening Bodi i no ken abrusim 7-pela man? Na tu, ol memba bilong dispela koporesen i save makim ol dairekta, olsem na dispela i makim olsem ol memba bilong koporesen i makim ol man bilong Gavening Bodi long dispela miting ol i mekim wanpela taim long olgeta yia? Ol dairekta na ofisa bilong Sosaiti Was Taua bilong Pensilvenia na ol memba bilong Gavening Bodi ol i wankain samting tasol o ol i narapela narapela samting?

Narapela Bikpela Miting Bilong Olgeta Yia

Ol i bekim ol dispela askim long miting bilong olgeta yia i kamap long Oktoba 1, 1971. Long dispela miting, wanpela brata bilong mekim tok em i kamapim olsem gavening bodi bilong lain “wokboi i gat gutpela tingting” i bin stap paslain long Sosaiti Was Taua bilong Pensilvenia inap planti handet yia. (Matyu 24:​45-47) Ol i bin kamapim wanpela lain hetman i lukautim wok bilong olgeta kongrigesen long de Pentikos bilong yia 33 C.E., winim 1,800 yia paslain long ol i bin kamapim Pensilvenia koporesen. Pastaim gavening bodi i gat 12-pela aposel long en, 7-pela man, nogat. Na bihain i luk olsem dispela lain i go bikpela moa, long wanem, “ol aposel na ol hetman” i go pas long wok.​—⁠Aposel 15:⁠2.

Long 1971 dispela brata bilong mekim tok em i tok, ol memba bilong Sosaiti Was Taua ol i no inap votim na makim ol memba bilong Gavening Bodi. Bilong wanem? Em i tok: “Long wanem, i no gat wanpela man inap makim ol memba bilong Gavening Bodi bilong lain ‘wokboi.’ Man i makim ol . . . em Jisas Krais, Het bilong kongrigesen Kristen tru na Bikpela bilong lain ‘wokboi i gat gutpela tingting.’ ” Olsem na ol memba bilong ol koporesen gavman i orait long en i no inap votim na makim ol memba bilong Gavening Bodi.

Man bilong mekim tok i kamapim dispela bikpela tok: “Gavening Bodi i no gat ol man i gat namba olsem ol Dairekta Bilong Sosaiti ol i gat, olsem presiden, namba tu bilong presiden, seketeri bilong lukautim mani, na namba tu bilong man bilong lukautim mani. Gavening Bodi i gat siaman tasol.” Inap planti yia presiden bilong Pensilvenia koporesen em i nambawan memba bilong Gavening Bodi. Ol bai no bihainim dispela pasin moa. Ol memba bilong Gavening Bodi ol i no gat wankain save long mekim ol samting, tasol ol i gat wankain namba long mekim wok. Man bilong mekim tok em i tok moa: “Olgeta memba bilong Gavening Bodi i ken mekim wok siaman, maski em i no presiden bilong . . . Sosaiti . . . Ol i gat sedyul na siaman bilong Gavening Bodi i save senis senis.”

Long dispela bikpela miting bilong olgeta yia long 1971, ol i kamapim klia olsem ol memba bilong Gavening Bodi em spirit holi i bin makim ol, na ol dairekta bilong Pensilvenia koporesen ol i narapela narapela samting. Tasol ol memba bilong Gavening Bodi ol i stap yet olsem ol dairekta na ofisa bilong Sosaiti. Tasol long nau wanpela askim i kamap: Baibel i kamapim as na ol dairekta bilong Sosaiti Was Taua bilong Pensilvenia ol i mas i stap olsem memba bilong Gavening Bodi?

Bekim bilong dispela askim em nogat. Pensilvenia koporesen em i wanpela koporesen gavman i orait long en na ol Witnes Bilong Jehova i save yusim. Tasol i gat ol narapela koporesen tu ol i save mekim wok long en. Wanpela em Sosaiti Wastaua bilong Nu Yok. Em i helpim wok bilong yumi long Amerika. Yumi inap luksave olsem Jehova i bin blesim dispela koporesen, maski planti dairekta na ofisa bilong en ol i bilong lain “arapela sipsip.” Ol i mekim wok long Intenesenel Baibel Stiudens Asosiesen long Briten. Long ol narapela kantri ol i mekim wok long ol narapela koporesen bilong helpim wok bilong Kingdom. Olgeta i wanbel long helpim wok na ol i gat hap wok bilong ol long helpim wok autim tok long olgeta hap. Maski ol i stap long wanem wanem hap na husat ol i mekim wok dairekta na ofisa, Gavening Bodi i save mekim wok long en na stiaim ol dispela koporesen long pasin tiokratik. Olsem na ol dispela koporesen gavman i orait long en ol i gat wok bilong helpim wok bilong Kingdom.

Ol dispela koporesen gavman i orait long en ol i save helpim yumi. Olsem na yumi laik bihainim ol lo bilong gavman, olsem Baibel i tok yumi mas mekim. (Jeremaia 32:11; Rom 13:⁠1) Ol koporesen gavman i orait long en ol i helpim wok bilong yumi long autim tok bilong Kingdom na prinim ol Baibel, ol buk, nius, buklet, na ol narapela samting. Ol kain koporesen olsem i mekim na wok bilong yumi i stret wantaim lo bilong gavman, olsem wok bilong baim hap graun o haus samting, wok bilong helpim lain man i kisim bagarap, wokim kontrak bilong mekim kibung long sampela haus, na kain wok olsem. Yumi laik tok tenkyu long wok ol dispela koporesen i save mekim.

Litimapim Nem Bilong Jehova

Long 1944, ol i stretim Hap 2 bilong lo pepa bilong Sosaiti Was Taua bilong Pensilvenia bilong kamapim klia ol samting dispela koporesen i laik mekim. Dispela lo pepa i tok, Sosaiti i laik mekim ol dispela bikpela wok: “Autim gutnius bilong Kingdom bilong God, em Krais Jisas i bosim, long olgeta lain man bambai ol i ken save long nem, na tok na bikpela namba bilong God i Gat Olgeta Strong, em JEHOVA.”

Kirap long 1926 “gutpela wokboi” i bin litimapim nem bilong Jehova. Bikpela samting i kamap long 1931, taim ol Sumatin Bilong Baibel i kisim nem ol Witnes Bilong Jehova. (Aisaia 43:​10-12) Ol buk na nius bilong Sosaiti i bin kamapim klia nem bilong God, olsem buk Jehovah (1934), “Let Your Name Be Sanctified” (1961), na “The Nations Shall Know That I Am Jehovah”​​—⁠How? (1971).

Mipela i mas tokaut long Baibel New World Translation of the Holy Scriptures, em ol i wokim dispela Baibel olgeta long tok Inglis long 1960. Nem bilong Jehova i stap long olgeta hap em dispela nem i stap long Ol Skripsa Hibru. Long dispela Baibel nem bilong God i stap long 237 hap long Ol Skripsa Grik. Ol i bin skelim gut ol skripsa na putim dispela nem long ol hap i stret long ol i ken putim. Yumi ken tok tenkyu tru long Jehova i bin larim “wokboi” na Gavening Bodi bilong en long mekim planti narapela narapela wok long ol koporesen gavman i orait long en bilong autim nem bilong em long olgeta hap!

Strongim Wok Bilong Tilim Tok Bilong God

Lain bilong Jehova i bin autim nem bilong em long olgeta taim, na ol i bin holim strong Tok bilong em long rot bilong wokim na tilim planti milion buk na nius em Baibel i as bilong en, na ol Baibel tu. Long 1902 samting, Sosaiti Was Taua i kisim tok orait long prinim The Emphatic Diaglott, em Ol Skripsa Grik Benjamin Wilson i bin kamapim. Long dispela Baibel tok Grik na tok Inglis i stap wantaim. Sosaiti i wokim King James Version em ol Sumatin Bilong Baibel i kamapim, em i gat sampela tok moa long baksait bilong en inap 500 pes. Long 1942 Sosaiti i kamapim King James Version i gat blok long namel bilong ol pes i kamapim ol narapela ves i tok long wankain samting. Long 1944, Sosaiti i kirap prinim Baibel American Standard Version bilong 1901, em i gat nem bilong God long en. Nem bilong Jehova i stap tu long The Bible in Living English, em Stephen T. Byington i wokim, na Sosaiti i prinim long 1972.

Ol koporesen gavman i orait long en na ol Witnes Bilong Jehova i save yusim, ol i bin helpim wok bilong prinim na tilim olgeta dispela Baibel. Tasol bikpela samting tru em olsem: Sosaiti Was Taua na wanpela lain Witnes Bilong Jehova em God i bin makim na ol i bilong komiti bilong tanim Baibel New World Translation, ol i gat gutpela pasin bilong wok wantaim. Yumi amamas, long wanem, i kam inap long nau ol i bin wokim 106,400,000 bilong dispela Baibel long 38 tok ples​—⁠sampela em Baibel olgeta na sampela em hap bilong en. Sosaiti Was Taua bilong Pensilvenia em i wanpela oganaisesen i save mekim bikpela wok long Baibel!

“Gutpela wokboi” i kisim namba long ‘bosim olgeta samting bilong Bikman.’ Em ol haus samting bilong hetkota long Nu Yok Stet, long Amerika, na 110 brens-ofis i wok long olgeta hap bilong graun. Ol memba bilong lain gutpela wokboi i save olsem God bai kotim ol long pasin bilong ol long mekim wok long ol samting ol i bin kisim. (Matyu 25:​14-30) Tasol dispela i no pasim ‘wokboi’ long larim ol wasman i gat save namel long lain “arapela sipsip” long lukautim sampela wok bilong koporesen, nogat. Dispela i opim rot long Gavening Bodi long lusim bikpela haptaim moa “long beten na long helpim ol manmeri long tok bilong God.”​—⁠Aposel 6:⁠4.

Sapos inap, mausman bilong “wokboi i gat gutpela tingting”​—⁠em Gavening Bodi​—⁠em bai mekim wok long ol koporesen gavman i orait long en. Ol i gutpela samting bilong helpim wok, tasol wok bai no pinis sapos ol i no stap. Sapos gavman i pinisim wanpela koporesen olsem, wok autim tok bai no pinis. Long nau tu, long ol kantri gavman i putim sampela tambu long wok bilong yumi na ol i no gat sampela koporesen gavman i orait long en, ol i autim tok bilong Kingdom, na kamapim ol disaipel, na wok i go bikpela yet. Dispela samting i kamap, long wanem, ol Witnes Bilong Jehova i planim kaikai na givim wara long en, na “God i save mekim kaikai i kamap.”​—⁠1 Korin 3:​6, 7.

Taim yumi wet long ol samting i kamap bihain, yumi bilip olsem Jehova bai lukautim lain bilong em long ol samting bilong spirit na skin. Em na Pikinini bilong em, Jisas Krais, em ol i stap long heven, ol bai wok yet long stiaim na helpim yumi long inapim wok bilong autim tok bilong Kingdom. Tru, ol wok yumi mekim olsem ol wokman bilong God, yumi ‘no inap mekim long strong bilong ami o long strong bilong yumi yet. Nogat. Em long strong bilong spirit bilong God.’ (Sekaraia 4:⁠6) Olsem na yumi beten askim God long helpim yumi, na yumi save olsem long strong Jehova i save givim, bai yumi inap pinisim wok em i bin givim long yumi bilong mekim long dispela taim bilong pinis!

[Futnot]