Sapta 18
Ol Guria Long De Bilong Bikpela
1, 2. (a) Wanem ol samting i save kamap long taim bilong bikpela guria? (b) Olsem Jon i tok, wanem samting i kamap taim Jisas i rausim namba 6 gris kandel?
OLSEM WANEM? Yu bin stap long hap i gat bikpela guria i bin kamap? Em samting nogut, a? Pastaim graun i wok long meknais, na samting i krai olsem klaut i pairap. Graun i seksek moa, na ol man i traim ranawe hait samting, ating aninit long tebol o bet, nogut ol i kisim bagarap. O ating wantu graun i olsem kalap, na ol plet kap samting i pundaun o tebol i kapsait na sampela haus i pundaun na bikpela bagarap i kamap. Na sampela taim ol hap guria i wok long kamap yet na i bagarapim moa ol samting na putim hevi long ol man.
2 Yumi skelim dispela tok wantaim tok bilong Jon taim em i stori long Jisas i rausim namba 6 gris kandel. Jon i tok: “Orait Pikinini Sipsip i rausim namba 6 gris kandel i pasim buk, na mi lukluk gen, na mi lukim bikpela guria i kamap long graun.” (KTH 6:12a) Dispela guria i mas kamap long wankain taim olsem bilong ol narapela samting i kamap taim Jisas i rausim ol narapela 5-pela gris kandel. Orait, wanem taim stret insait long de bilong Bikpela na dispela guria i kamap? Na em i wanem kain guria?—KTH 1:10.
3. (a) Jisas i kolim wanem ol samting i mas kamap taim em i kirap long mekim wok king? (b) Skelim ol guria tru wantaim dispela bikpela guria em Kamapim Tok Hait 6:12 i stori long en.
3 Planti taim Baibel i stori long ol guria tru i kamap, na em i stori tu long ol hevi samting i save kamap na mekim ol man i olsem guria. Long bikpela tok profet bilong Jisas em i kolim ol samting i mas kamap bilong makim olsem em i kirap long mekim wok king, na em i tok, “long sampela hap . . . graun bai i guria,” na em i tok, dispela samting “em i olsem pen i save kamap pastaim long meri i laik karim pikinini.” Kirap long 1914 ol man long graun i wok long kamap moa moa yet inap planti tausen milion, na taim guria tru i kamap em i putim bikpela hevi long ol. (Matyu 24:3, 7, 8) Ol guria olsem em i samting bilong graun tasol na em i truim ol tok profet na em i putim hevi long ol man. Tasol ol dispela samting i mas kamap pastaim na bihain wanpela bikpela samting tru bai kamap, olsem bikpela hevi tru, na Kamapim Tok Hait 6:12 i tok piksa long en na i kolim olsem guria. Em i olsem wanpela bikpela bagarap na em bai kam bihain long ol narapela hevi i painim ol man ol i stap aninit long Satan na olgeta samting Satan i bin kamapim long graun.a
Ol Hevi i Mekim na Ol Man i Guria
4. (a) Kirap long wanem taim na lain bilong Jehova i bin wok long tingim ol bikpela samting bai kamap long 1914? (b) Taim bilong husat bai pinis long 1914?
4 Kirap long yia 1875 samting lain bilong Jehova i bin tingim ol bikpela hevi bai kamap long 1914 na dispela bai makim olsem taim bilong ol man bilong ol arapela lain bai pinis. Taim bilong ol i olsem “7-pela yia” (2,520 yia), kirap long taim kingdom bilong Devit long Jerusalem i bagarap long yia 607 paslain long Krais na i go inap long taim Jisas i kamap King long Jerusalem bilong heven long yia 1914.—Daniel 4:24, 25; Luk 21:24.b
5. (a) Long Oktoba 2, 1914, C. T. Russell i mekim wanem bikpela tok? (b) Kirap long 1914 wanem ol bikpela senis i bin kamap insait long wok politik na ol gavman na ol man i no sindaun gut, olsem long taim bilong guria?
5 Taim C. T. Russell i bung wantaim famili bilong Betel long Bruklin long Nu Yok long Oktoba 2, 1914, na ol i laik lotu long moningtaim, em i mekim wanpela bikpela tokaut, em i tok: “Taim bilong ol man bilong ol arapela lain i pinis; strong bilong ol king bilong ol tu i pinis.” Kirap long 1914 bikpela hevi i kamap long olgeta hap na planti pait i kamap na i daunim planti king na nau i no gat planti king i stap. Long 1917 ol Komyunis i daunim king bilong Rasia na ol i kamapim gavman komyunis. Long olgeta hap em wok politik i senis senis na dispela i mekim na ol man i no sindaun gut, olsem long taim bilong guria. Long nau tu, long olgeta hap bilong graun, ol gavman i no gat strong. Planti gavman i save stap inap wanpela o tupela yia tasol na i pinis na narapela i kamap; ol i no strong tumas. Dispela i kamap ples klia long Itali bihain long Namba 2 Pait—gavman bilong Itali i senis inap 47 taim insait long 42 yia. Ol dispela samting i olsem ol guria, tasol bihain wanpela bikpela guria bai painim ol gavman na pinisim ol. Na nau wanem samting bai kamap? Kingdom bilong God tasol bai bosim olgeta hap.—Aisaia 9:6, 7.
6. (a) H. G. Wells i stori olsem wanem long nupela kain pasin i wok long kamap long graun? (b) Wanpela saveman i tok wanem long ol samting i kirap long 1914? Wanpela bikman bilong gavman i stori olsem wanem long dispela taim bilong 1914?
6 Ol man bilong raitim stori bilong ol samting i bin kamap bipo na ol saveman na bikman bilong gavman i tok, nupela kain pasin i bin kamap long graun bihain long 1914. Na 17 yia bihain long 1914 wanpela saveman, em H. G. Wells, em i tok: “Profet i laik kolim ol gutpela samting bai kamap, tasol em i mas kolim ol samting em yet i save lukim. Em i lukim ol soldia na ol man bilong politik na man bilong pulim mani na man bilong wok bisnis ol i strong yet long bosim ol man; em i lukim ol man, em narapela i tingting nogut long narapela, na narapela i bel nogut long narapela, na i gat planti lo na tambu i pasim laik bilong ol man, na narapela lain i pait wantaim narapela lain, na ol i wok long redim ol nupela pait.” Na long 1953 narapela saveman, em Bertrand Russell, em i tok: ‘Kirap long 1914 ol man i gat tingting ol i bel hevi long pasin bilong ol man bilong graun ol i strong long mekim ol samting inap long kamapim bikpela bagarap moa. . . . Ol i olsem wanpela man, em ol Grik i stori long en—ol god i kros long em na ol i raunim em na em i no inap bosim moa laik bilong em.’ Long 1980 Harold Macmillan, em bikman bilong gavman, em i stori long yia 1900, na em i tok, long dispela taim i no gat pait samting, na ol man i stap bel isi. Em i tok: “Mi bin stap long dispela taim, na i olsem gutaim i laik kamap, . . . tasol long 1914, wantu dispela gutaim i pinis.”
7-9. (a) Bihain long 1914 wanem ol bikpela hevi i bin painim ol man na i olsem guria? (b) Ol hevi i kamap long graun long kambek bilong Jisas, ol bai go i go na bihain wanem samting bai painim ol man?
7 Namba 2 Pait i kirapim planti hevi moa, na i olsem guria samting. Planti pait na pasin teroris i wok long bagarapim dispela graun. Planti man i tingting planti, nogut sampela teroris o gavman i mekim wok long ol samting bilong pait em ol inap long bagarapim bikpela lain manmeri.
8 Na i no pait tasol i bagarapim sindaun bilong ol man bihain long 1914. Wanpela bikpela hevi i bin kamap long Oktoba 29, 1929, taim ol wok bisnis na mani i bagarap long Amerika. Bikpela hevi bilong mani i kirap na i kisim sampela ol narapela kantri tu. Long 1932 na 1934 dispela hevi bilong mani em i wok long slek, tasol hap hevi i stap yet inap nau. Bihain long 1929 ol gavman i bin mekim sampela ol samting bilong stretim dispela hevi, tasol planti man i sot yet long ol samting bilong skin. Ol gavman i laik stretim hevi bilong mani, tasol ol yet i no gat mani. Long 1973 hevi i kamap long ol wok mani bilong wel, na long 1987 hevi i painim planti kampani na ol i sot long mani, na ol dispela samting i olsem guria i kamap long ol samting bilong mani. Na planti milion man, taim ol i baim samting ol i save dinau. Na i gat ol samting bilong pulim mani bilong ol man, olsem trik na laki na winmoni. Gavman i save bosim planti samting olsem, na i paulim ol man, tasol wok bilong gavman em bilong lukautim ol man—no ken paulim ol olsem. Na sampela pasto bilong ol misin i gat nem Kristen na ol i mekim tok bilong lotu long televisen, ol tu i pulim planti milion kina long ol man!—Lukim Jeremaia 5:26-31.
9 Bipo i gat ol hevi long mani samting, na dispela i bin givim rot long Hitler na Mussolini long kisim wok gavman. Wantu Bikpela Babilon i kirap prenim ol, na long 1929 pop i wokim kontrak wantaim Itali na long 1933 em i mekim olsem long Jemani. (KTH 17:5) Bihain long dispela taim bikpela hevi i kamap long ol man na i truim tok profet bilong Jisas long kambek bilong em. Wanpela hap bilong dispela tok profet bai kamap bihain, em olsem: “Long graun tingting bilong olgeta lain man bai i bagarap tru . . . na ol bai i tingting planti na pret moa yet. Planti manmeri bai i tingting long ol samting i laik kamap long graun, na ol bai i pret tru na ai bilong ol bai i raun.” (Luk 21:7-9, 25-31)c Tru tumas, ol dispela hevi i bin kirap long 1914 i olsem guria i painim ol man, na ol hevi i stap yet na i olsem ol hap guria i kam bihain long bikpela guria.
Jehova i Meknaisim Ol Lain
10. (a) Wanem ol samting i mekim na ol man i no sindaun gut, na i olsem ol guria i mekim na ol i seksek? (b) Jehova i wok long mekim wanem? Em i redi long mekim wanem?
10 Ol man i no inap bosim gut wokabaut bilong ol, olsem na ol dispela hevi i painim ol. (Jeremaia 10:23) Na Satan, “em i man bilong giamanim olgeta manmeri bilong graun,” em i wok strong long mekim ol samting bilong kirapim olgeta man na bai ol i no ken lotuim Jehova. Long nau i gat ol telefon na redio na televisen samting bilong salim ol tok i go i kam long ol kantri, na dispela i mekim ol lain man i stap olsem klostu klostu long narapela narapela, na ol i litimapim lain bilong ol yet na bel nogut long ol narapela, na dispela ol samting i mekim na ol i no sindaun gut, na Yunaitet Nesen i no inap painim rot bilong helpim ol. Tru tumas, ol “bikman i wok long daunim ol arapela manmeri na mekim nogut long ol,” winim olgeta taim bipo. (KTH 12:9, 12; Saveman 8:9) Bikpela King Jehova em i bin wokim heven na graun, na nau klostu 90 yia em i wok long meknaisim ol lain man bilong graun—em i redim rot bilong stretim tru ol hevi bilong graun na bai hevi i no inap kamap gen. Em bai mekim olsem wanem?
11. (a) Wanem dispela guria em Hagai 2:6, 7 i stori long en? (b) Wanem samting i kamap na i truim dispela tok profet bilong Hagai?
11 Hagai 2:6, 7 i kolim wanpela tok bilong Jehova, em i tok: “Mi Bikpela, mi gat olgeta strong, mi tok olsem, i no longtaim na bai mi mekim ol samting i stap long skai na long graun na long solwara i guria moa yet. [Na bai mi meknaisim olgeta lain man, na ol gutpela samting bilong olgeta lain man bai kam insait, na bai mi mekim biknem bilong mi i pulap long dispela haus].” Kirap long 1919 na i kam inap nau Jehova i kirapim ol witnes bilong em long tokaut long olgeta man long kot bilong em. Dispela bikpela tokaut i bin go long olgeta man i stap aninit long Satan.d Dispela toksave i kamap strong, na “ol gutpela samting,” olsem ol man i pret long God, ol i harim na ol i lusim ol lain bilong graun. Oganaisesen bilong Satan i guria, tasol i no dispela i mekim ol i lusim pasin bilong graun, nogat. Ol i pilim ol samting i laik kamap, na dispela i kirapim ol yet long wok wantaim lain em God i bin makim na Jon i piksa bilong ol, na ol i wok wantaim long mekim biknem bilong Jehova i pulap long haus bilong Jehova. Ol i mekim olsem taim ol i wok strong long autim gutpela tok bilong Kingdom bilong God i kirap pinis. (Matyu 24:14) Jisas wantaim lain bilong em, em God i bin makim ol, ol i bosim dispela Kingdom, na dispela Kingdom i no ken bagarap—em bai stap na kamapim biknem bilong Jehova, olsem wanpela kingdom “em i no inap guria.”—Hibru 12:26-29.
12. Sapos yu kirap pinis long bihainim dispela tok ol i autim na i truim Matyu 24:14, wanem sampela samting moa yu mas mekim paslain long dispela bikpela guria em Kamapim Tok Hait 6:12 i tok long en?
12 Olsem wanem? Yu save bihainim dispela gutpela tok ol i autim? Yu bin bung wantaim ol planti milion manmeri em ol i bin bung long Memorial bilong tingim i dai bilong Jisas? Sapos yu bin mekim olsem, em gutpela, na yu mas wok yet long stadi moa long tok i tru bilong Baibel. (2 Timoti 2:15; 3:16, 17) Yu mas lusim olgeta pasin nogut bilong ol man bilong dispela graun em Satan i bosim, long wanem, klostu nau, lain bilong dispela graun i stap aninit long Satan ol bai bagarap! Kam insait tru long lain Kristen bilong nupela taim na wok strong wantaim ol long nau, taim dispela laspela bikpela “guria” i no yet—em bai bagarapim olgeta wok bilong Satan hia long graun. Wanem dispela bikpela guria? Nau yumi ken stori long en.
Dispela Bikpela Guria!
13. Olsem wanem na dispela bikpela guria i narapela kain?
13 Tru tumas, dispela laspela taim nau yumi stap long en em i taim nogut bilong planti guria—olsem guria tru bilong graun, na ol hevi i mekim ol man i guria. (2 Timoti 3:1) Tasol laspela bikpela guria Jon i lukim taim Jisas i rausim namba 6 gris kandel, em i narapela. Ol liklik guria i kamap paslain long bikpela guria, nau taim bilong ol i pinis! Bikpela guria tru i laik kamap, em i narapela kain samting, na i no inap metaim o makim strong bilong en long wanpela klok o masin samting—em i bikpela tumas, winim olgeta narapela guria bilong bipo. Dispela guria i no ken kamap long wanpela hap tasol—em bai kamap long olgeta hap na mekim save long olgeta man nogut bilong dispela graun na ol bai seksek nogut tru na kisim bagarap.
14. (a) Wanem tok profet i stori long wanpela bikpela guria na ol samting dispela guria i mekim? (b) Tok profet bilong Joel na Kamapim Tok Hait 6:12, 13, tupela i toktok long wanem taim?
14 Sampela ol narapela profet bilong Jehova tu i bin tok profet long dispela guria bai kamap na bagarapim ol samting. Long yia 820 paslain long Krais, Joel i stori long “De bilong Bikpela [bai] kamap. Long dispela bikpela De bai olgeta manmeri bai i pret nogut tru.” Na Joel i tok, long dispela taim “san bai i kamap tudak na mun bai i kamap retpela olsem blut.” Na bihain moa Joel i tok: “Planti tausen manmeri bai i bung long ples daun bilong mekim kot. Liklik taim tasol na De bilong Bikpela bai i kamap long dispela ples. Na bai san na mun i kamap tudak, na ol sta bai i no lait moa. Bikpela i stap long maunten Saion long Jerusalem na em i bikmaus moa yet. Singaut bilong en i pairap olsem klaut i pairap, na graun wantaim skai i guria. Tasol Bikpela bai i lukautim olgeta manmeri bilong en na ol i no inap bagarap.” (Joel 2:31; 3:14-16) Dispela guria i makim taim bilong bikpela hevi tru, em taim strafe bilong Jehova bai painim dispela graun. (Matyu 24:21) Kamapim Tok Hait 6:12, 13 i gat wankain tok na em tu i stori long dispela taim.—Lukim tu Jeremaia 10:10; Sefanaia 1:14, 15.
15. Profet Habakuk i stori olsem wanem long bikpela hevi bai kamap?
15 Inap 200 yia bihain long Joel, profet Habakuk i beten long God bilong em na i tok: “Bikpela [Jehova], mi bin harim tok long ol samting yu bin mekim long strong bilong yu na mi kirap nogut. Ol bikpela bikpela samting yu bin mekim bipo, mi laik bai yu mekim gen long taim bilong mipela, bai ol man bilong dispela taim tu i ken save long pasin bilong yu. Tru, yu gat kros long mipela, tasol yu God bilong sori, na mi askim yu long sori long mipela na helpim mipela.” Wanem dispela “kros”? Habakuk i stori long taim bilong bikpela hevi tru na i tok long Jehova olsem: “Long taim em i sanap olgeta graun i save guria. Long taim em i lukim ol manmeri ol i save surik na guria. . . . Yu gat bikpela kros long olgeta kantri na yu wokabaut antap long graun na krungutim olgeta ples. [Tasol] maski dispela olgeta hevi i kamap, bai mi amamas na belgut. Long wanem, Bikpela em i God na em i save kisim bek mi.” (Habakuk 3:1, 2, 6, 12, 18) Tru tumas, Jehova bai mekim bikpela hevi olsem guria i kamap long olgeta hap long taim em i mekim save long ol lain man na givim strafe long ol!
16. (a) Wanem samting bai kamap taim Satan i laik bagarapim lain bilong God, olsem Esekiel i tok? (b) Bikpela guria em Kamapim Tok Hait 6:12 i kolim, em bai mekim wanem?
16 Esekiel tu i tok profet taim Gok bilong Magok (em Satan taim em pundaun) i mekim laspela wok bilong em long bagarapim lain bilong God, na Esekiel i tok, Jehova bai mekim “guria” i kamap “long graun bilong Israel.” (Esekiel 38:18, 19) Tru, ating bai i gat ol guria tru i kamap, tasol Kamapim Tok Hait i save tok piksa long ol samting. Dispela tok profet bilong Esekiel na ol narapela tok profet yumi kamapim long hia ol tu i tok piksa tasol long ol samting. Olsem na dispela guria Jon i lukim taim Jisas i rausim namba 6 gris kandel, dispela i makim taim ol liklik guria o hevi bilong graun i pinis, na nau dispela bikpela guria tru bai kamap na painim ol man bilong dispela graun em ol i no laik bai God Jehova i stap King bilong ol na ol bai kisim bagarap.
Taim Bilong Tudak
17. Bikpela guria i mekim wanem long san na mun na ol sta?
17 Jon i tok, long taim bilong dispela bikpela guria ol samting nogut bai kamap long graun na long antap tu. Em i tok: “San i kamap blakpela olsem ol olpela bek. Na mun i kamap retpela olgeta olsem blut. Ol sta bilong skai ol i pundaun long graun, olsem win i sakim diwai fik na ol fik i no mau yet ol i pundaun.” (KTH 6:12b, 13) Em bikpela samting i narapela kain tru! Sapos san na mun na sta tru i mekim ol dispela samting na bikpela tudak tru i kamap, bai yumi pret nogut tru, a? Gutpela san i no ken lait moa na hatim graun, na gutpela mun i no ken lait moa long nait, na ol gutpela sta i no ken lait moa long antap! Bikpela kol na tudak tasol bai stap.—Lukim Matyu 24:29.
18. Olsem wanem ‘skai i kamap blakpela’ long Jerusalem long yia 607 paslain long Krais?
18 Jeremaia i tok profet long tudak bai karamapim ol Israel bilong bipo, olsem tudak bilong spirit. Em i tok: “Dispela graun olgeta bai i kamap ples nating, tasol mi [bai] bagarapim em olgeta. Long dispela as tasol, na graun bai i singsing sori, na skai bai i kamap blakpela.” (Jeremaia 4:27, 28) Truim bilong dispela tok profet i bin painim lain bilong Jehova long yia 607 paslain long Krais, na ol i stap nogut tru, olsem long tudak. Ol Babilon i daunim bikpela taun bilong ol, em Jerusalem, na haus lotu bilong ol i kisim bagarap, na ol i raus long graun bilong ol na graun i stap nating, no gat man. I olsem i no gat gutpela lait bilong antap i kam long ol bilong mekim gut bel bilong ol, nogat. Jeremaia i krai sori na tokim Jehova: “Yu bin belhat nogut tru long mipela na yu no marimari long mipela. Nogat. Yu bin ranim mipela na kilim mipela i dai. Yu belhat long mipela na yu pasim yau bilong yu. I olsem yu karamapim yu yet long bikpela klaut na ol [beten] bilong mipela i no inap kamap long yu.” (Krai 3:43, 44) Ol man long Jerusalem i pilim olsem God long heven i no salim lait moa long ol, na i olsem ol i dai pinis na ol i bagarap olgeta.
19. (a) Profet bilong God, em Aisaia, em i stori olsem wanem long lain Babilon bilong bipo ol i stap long tudak bilong antap? (b) Wanem taim truim bilong dispela tok profet i kamap? Wanem samting i bin kamap bilong truim dispela tok?
19 Bihain moa narapela tudak kain olsem dispela em i kamap long antap, na i makim olsem Babilon bilong bipo bai kisim bagarap. God i kirapim profet bilong em long raitim tok profet bilong dispela, olsem: “Tru tumas, dispela taim nogut tru i kam nau, em i taim Bikpela i bin makim bilong kam wantaim bikpela belhat bilong en na bagarapim olgeta hap bilong graun na pinisim tru olgeta man na meri i save mekim sin. Long dispela taim lait bilong olgeta sta bai i dai. Na san bai i kamap, tasol lait bilong en bai i go tudak, na mun bai i no moa lait. Bikpela i tok olsem, ‘Sin bilong ol manmeri i pulap long dispela graun, olsem na bai mi mekim save long ol bilong bekim sin bilong ol.’ ” (Aisaia 13:9-11) Truim bilong dispela tok profet i kamap long yia 539 paslain long Krais. Lain Midia na lain Persia i daunim ol Babilon, na olsem dispela tok profet i makim, i olsem tudak i painim ol na ol i no gat rot moa, na i no gat lait moa bilong mekim gut bel bilong ol. Babilon i pundaun olgeta na em i no kamap strong gen olsem nambawan gavman bilong graun.
20. Taim dispela bikpela guria i kamap bihain, olsem wanem long ol man bilong dispela graun wantaim ol wok samting bilong ol?
20 Olsem tasol, taim dispela bikpela guria i kamap, bel bilong olgeta man bai bagarap tru na i olsem ol i stap long tudak. Ol samting bilong Satan long givim lait, o save, long ol man, ol i no ken lait moa bilong helpim ol. Ol bikman bilong politik na bilong ol lotu i gat nem Kristen ol i save giaman na pamuk, na long nau ol man i save pinis long dispela samting. (Aisaia 28:14-19) Yumi no ken bilip moa long ol. Liklik taim lait, o biknem, na namba bilong ol bai pinis long taim Jehova i givim strafe long ol. Ol i bin stap olsem mun bilong givim lait long ol man na bosim ol samting bilong graun, tasol giaman bilong ol bai kamap ples klia na ol man bai save ol i man bilong kilim i dai man. Maski ol i bikpela man tru na ol i gat nem, ol bai pundaun olsem sta i save pundaun, na ol bai lus nabaut olsem ol pikinini fik taim bikpela win i sakim diwai fik na ol kaikai i no mau yet ol i lus na pundaun na win i tromoi nabaut. Graun olgeta bai guria, na “long dispela taim bai i gat bikpela hevi tru. Stat long taim graun i nupela yet na i kam inap long nau, kain hevi olsem i no bin kamap bipo. Na bihain tu bai i no gat kain hevi olsem i kamap gen.” (Matyu 24:21) Em bikpela taim nogut tru!
“Skai” i Pinis
21. Long driman Jon i lukim “skai” i mekim wanem? Na olsem wanem long “olgeta maunten na ailan”?
21 Jon i driman moa olsem: “Skai tu em i go pinis, olsem mat ol i raunim i go na pasim. Na olgeta maunten na ailan ol i lusim ples bilong ol, na ol i surik i go.” (KTH 6:14) Em i no toktok long skai o maunten o ailan tru, nogat. Orait yumi laik save, ol dispela samting i makim wanem samting?
22. Long Idom, wanem kain “skai” i “kamap olsem pepa ol man i raunim na pasim”?
22 Dispela tok long “skai” i insait long narapela tok profet i stori long Jehova i gat kros long olgeta lain man. Dispela tok profet i tok, “San na mun na ol sta bai i pundaun na pinis olgeta. Na skai bai i kamap olsem pepa ol man i raunim na pasim.” (Aisaia 34:4) Ol Idom bai kisim nogut. Na tru tumas, taim ol Babilon i bagarapim pinis Jerusalem long yia 607 paslain long Krais, bihain ol i daunim ol Idom. Long dispela taim i no gat sampela bikpela samting i bin kamap long san o mun o sta tru, olsem skai o ples antap, nogat; tasol samting nogut i bin painim ‘san na mun na ol sta’ bilong ol Idom, olsem ‘skai’ bilong ol.e Strongpela gavman bilong ol em i pundaun na i no stap antap moa olsem ples antap, olsem skai samting. (Aisaia 34:5) Em “i kamap olsem pepa ol man i raunim na pasim,” olsem wanpela olpela hap pepa i no gat wok moa.
23. Dispela “skai” em Baibel i tok em i mas ‘pinis olsem mat ol i raunim,’ em i makim wanem samting? Pita i tok wanem na em tu i strongim dispela tok?
23 Dispela “skai” i makim ol gavman i birua long God na ol i bosim ol kantri; ol i mas “pinis, olsem mat ol i raunim i go na pasim.” Dispela Man i raun long waitpela hos na daunim ol samting em bai daunim ol dispela gavman tu. (KTH 19:11-16, 19-21) Aposel Pita i tingim ol samting bai kamap long taim Jisas i rausim namba 6 gris kandel, na Pita i tok: “Skai na graun i stap na i wetim paia i kamap na i bagarapim ol. Skai na graun i wetim de bilong bikpela kot i kamap, na ol man i bin givim baksait long God, ol bai i bagarap olgeta.” (2 Pita 3:7) Tasol olsem wanem long dispela tok, “olgeta maunten na ailan ol i lusim ples bilong ol, na ol i surik i go”?
24. (a) Long wanem taim i olsem ol maunten na ailan i seksek na guria, olsem Baibel i tok profet? (b) Olsem wanem ‘maunten i guria’ taim Ninive i pundaun?
24 Sampela tok profet long Baibel i tok, long taim hevi i painim ol gavman o ol i laik bagarap samting, i olsem ol maunten na ailan i seksek na guria na i laik bagarap. Bipo Nahum i kolim strafe bilong Jehova bai painim Ninive na em i tok: “Olgeta maunten i save guria long pes bilong Bikpela, na i kamap olsem wara nating. Taim Bikpela i kamap, graun i save guria.” (Nahum 1:5) I no gat sampela stori bilong dispela taim bipo i tok, sampela maunten i bin pundaun taim Ninive i bagarap long yia 632 paslain long Krais, tasol Ninive yet i bin stap olsem wanpela strongpela gavman, kain olsem wanpela traipela maunten, na wantu em i kisim bagarap.—Lukim Jeremaia 4:24.
25. Long taim pasin bilong dispela graun i pinis, olsem wanem “olgeta maunten na ailan” bai lus?
25 Olsem na dispela “olgeta maunten na ailan” Jon i lukim long taim Jisas i rausim namba 6 gris kandel, ol i makim ol gavman na wok politik bilong dispela graun na ol oganaisesen bilong ol; long ai bilong planti man ol dispela samting i stap olsem strongpela samting, tasol ol bai seksek na guria na pundaun, na ol man i bilip long ol dispela gavman ol bai kirap nogut tru. Na dispela tok profet bilong Baibel i tok moa long bikpela de em Jehova na Pikinini bilong em i kamapim belhat bilong ol—dispela i olsem laspela bikpela guria i pinisim olgeta hap bilong oganaisesen bilong Satan—na Jehova bai mekim save long ol!
“Karamapim Mipela, na Haitim Mipela”
26. Ol dispela man i no laik bai God i stap King ol bai pret na mekim wanem? Ol bai pret na tok wanem?
26 Jon i stori moa na i tok: “Na ol king bilong graun wantaim ol man i gat nem na ol kepten bilong ol soldia na ol maniman na ol strongpela man na olgeta man i stap wokboi nating na olgeta man i stap fri, olgeta wantaim ol i ranawe i go hait insait long ol hul bilong ston na baksait long ol bikpela ston i stap long ol maunten. Na ol i singaut long olgeta maunten na ston olsem, ‘Yupela i mas karamapim mipela, na haitim mipela long pes bilong Man i sindaun long sia king bilong en, na bai Pikinini Sipsip i no ken kam wantaim bikpela belhat bilong en na mekim save long mipela. Long wanem, dispela bikpela De bilong tupela i belhat long ol manmeri na i bekim pe nogut long ol, nau em i kamap pinis. Na husat inap sakim strong bilong tupela na i stap gut?’ ”—KTH 6:15-17.
27. Ol bikhetlain bilong Israel long Samaria i pret na krai na i tok wanem? Wanem samting i kamap na i truim tok profet bilong Hosea?
27 Samaria em biktaun bilong lain Israel long hap bilong not, na taim Hosea i kolim strafe bilong Jehova bai painim Samaria em i tok: “Ol Israel i save lotu long ol giaman god long ol ples lotu antap long ol maunten, na God bai i bagarapim ol dispela ples. Na gras na ol rop i gat nil bai i kamap na karamapim ol alta. Na bai ol manmeri i laik hait long ol birua, olsem na bai ol i tokim ol maunten olsem, ‘Yupela karamapim mipela na haitim mipela.’ ” (Hosea 10:8) Truim bilong dispela tok i kamap olsem wanem? Ol Asiria i man nogut, na ol i daunim ol Israel long Samaria long yia 740 paslain long Krais na ol Israel i no gat ples bilong ranawe hait. Ol i lus long pait, na olsem Hosea i tok, ol i pret nogut tru na bel bilong ol i bagarap. Dispela samting i truim tok profet bilong Hosea. Ol maunten na ol bikpela oganaisesen bilong Samaria olsem maunten ol i no inap helpim ol, maski ol man i ting ol dispela samting i strongpela samting.
28. (a) Jisas i tok wanem long ol meri bilong Jerusalem? (b) Wanem samting i bin kamap na i truim tok bilong Jisas?
28 Taim ol soldia bilong Rom i kisim Jisas i go bilong kilim em i dai em i tokim ol meri bilong Jerusalem olsem: “Harim. Bihain wanpela taim bai i kamap na ol bai i tok olsem, ‘Ol meri i no inap karim pikinini, na ol meri i no bin karim pikinini, na ol meri i no bin givim susu long pikinini, em ol i ken amamas.’ Long dispela taim bai ol i tokim ol maunten olsem, ‘Yupela karamapim mipela na haitim mipela.’ ” (Luk 23:29, 30) Tok bilong Jisas i wankain olsem bilong Hosea, na long yia 70 ol Rom i daunim na bagarapim Jerusalem. Stori bilong dispela samting i stap long ol rait bilong bipo na ol man inap kaunim. Ol Juda i stap yet long Judia ol i no gat ples hait. Sampela i ranawe i go hait insait long taun Jerusalem, na sampela i laik hait long haus was antap long maunten Masada, tasol ol i no inap abrusim strafe bilong Jehova.
29. (a) Long De bilong Jehova, wanem samting bai painim ol man bilong dispela graun? (b) Taim Jehova i kamapim belhat bilong em, dispela bai truim wanem tok profet bilong Jisas?
29 Ol samting Jon i lukim long taim Jisas i rausim namba 6 gris kandel i makim wankain samting bai kamap long de bilong belhat bilong Jehova. Bihain Jehova bai mekim pasin bilong dispela graun i seksek, olsem guria, em laspela guria bilong ol, na long dispela taim ol man i insait long pasin bilong dispela graun ol bai wok strong long painim ples hait, tasol ol bai i no inap. Lotu giaman, olsem Bikpela Babilon, i no bin helpim ol liklik, na ol bai i no inap hait long ol hul insait long maunten, na ol bikpela oganaisesen politik o kampani tu i no inap haitim ol o helpim ol liklik. I no gat wanpela samting inap helpim ol long abrusim kros bilong Jehova. Ol bai pret nogut tru olsem Jisas i tok: “Long dispela taim mak bilong Pikinini Bilong Man bai i kamap long skai na olgeta lain manmeri bilong graun bai i krai. Na ol bai i lukim Pikinini Bilong Man i stap antap long ol klaut bilong heven na i kam wantaim bikpela strong na bikpela lait bilong en.”—Matyu 24:30.
30. (a) Olsem wanem na planti man bai tok: “Husat inap . . . i stap gut?” (b) Long taim Jehova i kamapim belhat bilong em na i strafim ol man nogut, sampela man bai stap gut o nogat?
30 Ol man i no laik daun long dispela Man i raun long waitpela hos na winim ol pait, bai ol i mas tokaut olsem ol i kranki tru. Ol dispela man i orait long i stap olsem lain bilong Satan ol bai bagarap wantaim pasin bilong graun em Satan i bosim. (Stat 3:15; 1 Jon 2:17) Long dispela taim bikpela hevi tru bai kamap, olsem na planti man bai tok: “Husat inap . . . i stap gut?” Ol bai tok olsem, long wanem, ol bai ting Jehova i no inap orait long sampela man long dispela taim em i kamapim belhat bilong em na givim strafe long ol man. Tasol tingting bilong ol i no stret, olsem sampela tok moa bilong Kamapim Tok Hait bai kamapim klia long yumi.
[Ol Futnot]
a Taim guria i laik kamap, sampela taim ol dok i singaut na mekim nabaut na kirapim ol narapela animal na pis, tasol ating ol man i no pilim inap long taim guria i kamap pinis.—Lukim Kirap!, Mas 8, 1983, pes 17.
b Pes 22 na 24 i stori gut long dispela.
c Inap 35 yia samting, olsem long 1895 i go inap 1931, tok bilong Luk 21:25, 28, 31 i bin stap long skin bilong ol magasin Wastaua, na i gat piksa bilong haus lait na blakpela klaut na bikpela si.
d Long 1931 ol Witnes Bilong Jehova i givim planti tausen buklet (The Kingdom, the Hope of the World) long olgeta pris na pasto na man bilong politik na bisnisman long olgeta hap.
e Dispela tok “skai” na “heven” i makim wankain samting, na namba wan truim bilong tok profet bilong Aisaia 65:17, 18 i stori long “nupela skai” i bin kamap long nupela gavman bilong ol Juda long Jerusalem taim ol i lusim kalabus long Babilon na ol i go bek long Ples Promis, na Hetman Serubabel na Hetpris Josua i holim wok.—2 Stori 36:23; Esra 5:1, 2; Aisaia 44:28.
[Box/Picture on page 105]
Ol Samting Ol i Save Bai Kamap Long 1914
‘Long yia 606 paslain long Krais kingdom bilong God i pinis, na hat king i tekewe, na ol man bilong ol arapela lain ol i bosim graun inap 2520 yia, na dispela bikpela hap taim bilong ol arapela lain bai pinis long yia 1914.’f—Buk The Three Worlds, pes 83; ol i bin wokim long 1877.
‘Baibel i tok klia olsem taim “bilong ol man bilong ol arapela lain” em inap 2520 yia, kirap long yia 606 paslain long Krais na i go inap long pinis bilong yia 1914.’—Buk Studies in the Scriptures, Volyum 2, pes 79, bilong 1889, em C. T. Russell i raitim.
Planti yia paslain long 1914, Charles Taze Russell na ol narapela sumatin bilong Baibel ol i save, taim “bilong ol man bilong ol arapela lain” bai pinis long 1914. (Luk 21:24) Tru ol i no save long olgeta samting bai kamap long 1914, tasol ol i save em bai bikpela yia na planti samting bai kamap. Tingting bilong ol i stret. Lukim dispela tok bilong wanpela nius:
‘Bikpela pait i kirap long Yurop na i truim wanpela bikpela tok profet. Taim 1914 i no yet, inap 25 yia samting wanpela lain (“International Bible Students” o “Millennial Dawners”) i bin autim tok long ol man, na putim tok long ol nius tu, na ol i bin tok, dispela De Bilong Belhat Bilong God em Baibel i tok profet long en, dispela De bai kirap long 1914. Planti handet evanjelis bilong ol i bin raun na i tok, “Lukaut Long 1914!” ’—Nius The World bilong Nu Yok, Ogas 30, 1914.
[Futnot]
f Pastaim ol Sumatin Bilong Baibel i ting i gat yia 0 bihain long yia 1 paslain long Krais, tasol bihain ol i kisim save olsem i no gat yia 0. Olsem na ol i senisim yia 606 paslain long Krais na ol i raitim yia 607 paslain long Krais, tasol yia 1914 i stret yet.—Lukim buk “The Truth Shall Make You Free,” pes 239, ol Witnes Bilong Jehova i wokim long 1943.
[Blok long pes 106]
1914—Ol Samting i Senis
Wanpela buk (Politikens Verdenshistorie—Historiens Magt og Mening) ol i wokim long Kopenhegen long 1987, long pes 40 em i tok:
‘Taim yia 1900 i kirap ol man i ting ol samting bai kamap gutpela, tasol 1914 i bagarapim dispela tingting. Taim pait i no kirap yet wanpela man bilong politik em man bilong raitim stori bilong ol samting i bin kamap long bipo, em Peter Munch bilong Denmak, em i raitim tok olsem: “Ol samting i kamapim klia olsem ol bikpela gavman bilong Yurop i no inap pait. Kirap long yia 1871, planti taim ol man i pret, nogut pait i kamap, tasol bihain moa dispela pret i pinis, na em bai mekim olsem long bihain tu.”
‘Tasol bihain Peter Munch i rait gen na i tok: “Pait i kirap long 1914 na dispela i kamapim bikpela senis. Taim 1914 i no yet ol samting i laik kamap gutpela na ol man i save givim bel long wok bilong ol na ol i no pret long wanpela samting, tasol nau em taim nogut na i gat planti hevi na pasin nogut na birua, na olgeta man i pret. Bihain long 1914, na long nau tu, ol man i no inap save, dispela hevi i bin kamap long 1914 bai bagarapim olgeta wok bilong ol man o nogat.” ’
[Piksa long pes 110]
‘Olgeta maunten i surik i go’
[Piksa long pes 111]
Ol i hait long ol hul long maunten