Yu Ting Lotu Em i As Bilong Ol Hevi Bilong Graun?
“TAIM lotu i no wok long kirapim kros pait, em i stap olsem wanpela drak i mekim i dai tingting bilong bel na i kirapim man long tingting tasol long ol samting i olsem driman nating na bai ol i no ken tingim ol hevi. . . . [Em] i mekim na tingting bilong man i pas, i bilip nating long kain kain tok giaman, mekim man i birua tru long narapela na pret.” Man husat i bin mekim dispela tok, bipo em wanpela misineri bilong lotu Metodis, em i tok moa olsem: “Ol dispela tok mi sutim long lotu em i tok tru. I gat gutpela lotu na lotu nogut.”—Start Your Own Religion.
Sampela inap tok ‘dispela tok i no stret.’ Tasol i luk olsem ol samting i bin kamap long graun i truim dispela tok. Wanpela dikseneri i tok lotu i makim “pasin bilong lotuim na mekim wok bilong God o long narapela samting bilong ples spirit.” Planti samting lotu i bin mekim i nogut tru. Gutpela sapos lotu i givim save long yumi na kirapim yumi. Tasol planti taim lotu i mekim kros i kamap, na i kamapim pasin bilong les long tingting bilong ol narapela, na pasin bilong bel nogut. Bilong wanem i olsem?
“Ensel Bilong Lait” i Giamanim Man
Olsem Baibel i tok, bekim bilong dispela askim i klia. Satan i giaman na stap olsem “ensel bilong lait,” na long dispela rot em i trikim planti milion manmeri na ol i bihainim ol tok bilong em, na bilong God, nogat. (2 Korin 11:14) Aposel Jon i soim olsem strong bilong Satan i bikpela tru inap long “graun olgeta em i stap aninit long strong bilong [em].” (1 Jon 5:19) Jon i save olsem Satan i wok long “giamanim olgeta manmeri bilong graun.”—KTH 12:9.
Dispela i mekim wanem? Satan i bin kamapim ol lotu we i luk olsem ol i samting holi. Ol i “bihainim pasin bilong God long skin tasol,” tasol pasin tru bilong ol i kamap ples klia long rot bilong ol wok nogut ol i kamapim. (2 Timoti 3:5; Matyu 7:15-20) Ol i no helpim wok bilong pinisim ol hevi bilong man, nogat, lotu i gat hap asua long ol dispela hevi.
No ken sakim dispela tok wantu, olsem tok i narapela kain tru o i no stret. Tingim, wok bilong giamanim narapela i olsem wanpela i giamanim man na man yet i no save. Aposel Pol i stori long dispela samting na tok: “Samting ol haiden i save ofaim, em ol i ofaim long ol spirit nogut. Ol i no ofaim long God.” (1 Korin 10:20) Ating ol dispela man bai i kirap nogut tru long save olsem ol i lotuim ol spirit nogut. Ol i ting ol i lotuim wanpela gutpela god, o sampela kain god. Tasol tru tru ol “spirit nogut i stap antap” i giamanim ol, ol spirit nogut i sapotim Satan na wok bilong em long trikim olgeta man.—Efesus 6:12.
Yumi ken skelim olsem wanem Satan i bin trikim na giamanim planti man husat i tok ol i Kristen, em ol i no laik tingim tok lukaut bilong aposel Jon long wok bilong ol dispela spirit nogut.—1 Korin 10:12.
Tok Jisas i Mekim i Kam Long God
Jisas i tok: “Dispela tok mi givim yupela, em i no bilong mi yet. Nogat. Em i bilong God.” (Jon 7:16) Yes, tok Jisas i mekim i kam long God i Gat Olgeta Strong. Olsem na tok Jisas i skulim ol man long en i givim strong na gutpela tingting long ol man i putim yau long em. Dispela tok i no “olsem wanpela drak i mekim i dai tingting bilong bel na i kirapim man long tingting tasol long ol samting i olsem driman nating.” Nogat. Ol tok bilong Jisas i helpim ol man na ol i no kalabus moa long lotu giaman na kain kain tingting bilong ol man bilong graun em “save bilong ol i olsem tudak,” long wanem, Satan i giamanim ol.—Efesus 4:18; Matyu 15:14; Jon 8:31, 32.
Tok tasol olsem ol i holi, dispela i no makim ol i trupela Kristen, nogat. Ol man inap luksave long ol trupela Kristen long rot bilong bilip i kamapim ol naispela pasin em holi spirit bilong God i as bilong en. (Galesia 5:22, 23; Jems 1:22; 2:26) Nambawan gutpela pasin bilong ol na i mak bilong Kristen tru em pasin laikim.—Jon 13:34, 35.
Tasol tingim dispela bikpela samting: Jisas na ol aposel i no bin ting kongrigesen Kristen bai stap wankain olsem long taim em i bin kamap nupela. Ol i save olsem pasin bilong tromoi lotu i tru bai kamap na trupela lotu bai i no stap ples klia inap sampela haptaim.
Trupela Lotu i Stap Hait Inap Longpela Taim Liklik
Long tok piksa bilong wit na gras nogut, Jisas i tok profet olsem bai i gat haptaim we trupela lotu i no stap ples klia. Ritim dispela long Matyu 13:24-30, 36-43. Long wanpela gaden Jisas i bin planim ol “gutpela pikinini wit,” em i makim ol gutpela disaipel bilong namba wan kongrigesen Kristen. Em i givim tok lukaut olsem wanpela “birua,” em Satan, bai i kam na planim ol “gras nogut” namel long wit, dispela gras nogut i makim ol man husat i tok ol i bihainim Jisas Krais tasol tru tru ol i sakim ol tok bilong em.
Sotpela taim bihain long ol aposel bilong Jisas i dai, i gat sampela man i kamap na ol i dispela “gras nogut,” ol i laikim moa tok giaman bilong ol man winim ‘tok bilong Bikpela.’ (Jeremaia 8:8, 9; Aposel 20:29, 30) Dispela i mekim na lotu Kristen giaman i gat ol bilip kranki i kamap long graun. Baibel i kolim lain i bosim dispela lotu olsem “man bilong sakim lo”—wanpela lain hetman bilong lotu we “olgeta giaman bilong pasin nogut” i pulap long en. (2 Tesalonaika 2:6-10) Jisas i tok profet olsem long taim bilong “las de” senis bai kamap. God bai bungim ol Kristen i olsem wit na mekim ol i stap wanbel na “ol gras nogut” bai bagarap.
Em nau, em dispela lotu Kristen giaman i gat asua long “ol pasin nogut ol man i insait long en inap planti handet yia” na tudak bilong spirit i karamapim lotu i gat nem Kristen inap planti handet yia. Aposel Pita i bin save olsem dispela samting bai kamap wantaim ol arapela stingpela pasin na pasin pait em lotu i as bilong en, olsem na tok profet bilong em i stret olsem “dispela [pasin bilong tok tasol ol i Kristen] bai i mekim ol man nabaut i tok nogut long Rot bilong pasin i tru.”—2 Pita 2:1, 2.
“Bilip i Kamapim Belhat na Bel Nogut”
I no ol lotu i gat nem Kristen tasol i bagarapim gutnem bilong lotu. Olsem: Tingim ol lain fandamental we “pasin bilong givim bel long lotu i kirapim ol long bikhet.” Karen Armstrong, bipo em i wanpela sister Katolik, em i tok “olgeta bikpela lotu bilong graun” i bin kamapim sampela man i bihainim bilip fandamental. Armstrong i tok, wanpela bikpela samting em lotu i mas kirapim man long “kamapim pasin sori.” Yu ting ol man i bihainim bilip fandamental na strong tumas long ol man i mas holimpas ol lo bilong lotu i mekim dispela bikpela samting o nogat? Em i tok: “Ol lotu i save strong tru long bihainim lo bilong lotu, maski ol i bilong lotu Juda, lotu Kristen, o lotu Muslim, ol i pundaun tru long dispela bikpela samting lotu i mas mekim sapos bilip i kamapim pasin bilong belhat na bel nogut.” (The Battle for God—Fundamentalism in Judaism, Christianity and Islam) Tasol olsem wanem? Dispela lain lotu tasol i pundaun long dispela bikpela samting na kamapim “bilip bilong belhat na bel nogut”? Ol samting i kamap long graun i kamapim klia i no olsem.
Satan i bin kamapim bikpela lain bilong lotu giaman i stap long olgeta hap bilong graun, na mak bilong en em pasin bilong belhat, bel nogut, na pait na kapsaitim blut. Baibel i tok dispela bikpela lain em “Bikpela taun Babilon, em mama . . . bilong olgeta pasin nogut tru i stap long graun,” na tok piksa i makim em olsem wanpela pamukmeri i sindaun long baksait bilong wel abus i makim wok politik. Samting bilong tingim i olsem, em i gat asua long “kilim i dai . . . olgeta man bilong graun ol birua i bin kilim i dai.”—KTH 17:4-6; 18:24.
I No Giamanim Olgeta Man
Ol samting i kamap long graun i soim klia olsem Satan i no bin giamanim olgeta man. Melvyn Bragg i stori olsem kirap long bipo yet na i kam inap long nau, long taim bilong hevi i bin i gat “planti gutpela man ol i mekim gutpela pasin maski bikpela lain ol i stap namel long ol i mekim pasin nogut.” Ol Kristen tru i bin mekim yet “lotu long Papa long strong bilong Holi Spirit na long pasin i tru.” (Jon 4:21-24) Ol i stap narapela kain long bikpela lain lotu i mekim pasin i olsem pamuk na i go long sait bilong “sapotim woa.” Ol i no orait long miksim wok bilong lotu na gavman wantaim, ol samting i kamap long graun i soim olsem dispela pasin “em i samting em Satan i as bilong em, i no Jisas bilong Nasaret.”—Two Thousand Years—The Second Millennium: From Medieval Christendom to Global Christianity.
Nau long taim bilong yumi, ol man i luksave olsem ol Witnes Bilong Jehova ol i strongim gutpela pasin. Ol i no laik kisim sampela bilip bilong lotu giaman, olsem na Tok bilong God em holi spirit i kamapim long Baibel em i as bilong ol bilip bilong ol na pasin ol i bihainim. (2 Timoti 3:16, 17) Na olsem ol Kristen long taim bilong ol aposel, ol i bihainim tok bilong Jisas na ol i “no man bilong dispela graun.” (Jon 15:17-19; 17:14-16) Long Natsi Jemani, ol i strong long holimpas ol stiatok bilong Baibel, olsem na gavman Natsi i no orait long ol. Hitler i bel nogut long ol long dispela samting. Wanpela skul buk i tok: “Ol Witnes Bilong Jehova . . . i bihainim tok bilong Baibel long no ken insait long pait. Olsem na ol i tok nogat long insait long ami o mekim narapela samting bilong sapotim sait bilong ol Natsi. Dispela i mekim na lain polis bilong Hitler i bin kalabusim sampela famili olgeta bilong ol Witnes Bilong Jehova. (Germany—1918-45) Tru tumas, planti handet Witnes Bilong Jehova long Jemani ol i bin dai, long wanem, ol Natsi i mekim nogut long ol.
Tru, i gat ol arapela man i gat strongpela bel i stap insait long narapela narapela lotu na ol i bin karim pen long ol i bin holimpas bilip bilong ol. Tasol ol Witnes Bilong Jehova i mekim olsem wanpela lain we olgeta bilong lotu i wanbel long mekim. Klostu olgeta bilong ol i bin holimpas dispela bikpela stiatok bilong Baibel: “Mipela i mas bihainim tok bilong God tasol. Mipela i no ken bihainim tok bilong ol man.”—Aposel 5:29; Mak 12:17.
As Bilong Hevi
Olsem na tok olsem lotu i as bilong ol hevi bilong graun i stret liklik. Em lotu giaman i as bilong ol dispela hevi. Tasol God i tokaut pinis olsem klostu nau em bai pinisim olgeta lotu giaman. (KTH 17:16, 17; 18:21) Tok em i mekim long man i laikim tru stretpela pasin i olsem: “Yupela i mas lusim dispela ples [em Bikpela taun Babilon i makim olgeta lotu giaman] na i kam ausait. Nogut yupela i poroman wantaim em long ol sin em i save mekim. Na nogut yupela bai i poroman wantaim em tu long taim em i kisim pe nogut bilong ol dispela sin. Em i hipim ol sin bilong en i kam antap inap long heven. Na God i tingim gut olgeta pasin nogut em i bin mekim.” (KTH 18:4, 5) Em nau, God yet i no amamas long ol lotu i ‘kirapim kros pait, i mekim i dai tingting bilong bel, i kirapim man long tingim ol samting i olsem driman na bai em i no ken tingim ol hevi, na mekim tingting bilong ol man i pas, i bilip nating long kain kain tok giaman, na pulap long pasin bilong bel nogut na pret’!
Long nau God i wok long bungim i kam insait long lotu i tru ol man husat i laikim tumas tok tru. Em lotu i bihainim ol stiatok na skul bilong dispela God i mekim pasin laikim, stretpela pasin, na pasin sori. (Maika 4:1, 2; Sefanaia 3:8, 9; Matyu 13:30) Yu inap insait long dispela lotu. Sapos yu laik kisim save long olsem wanem yu inap save long lotu i tru, plis raitim pas long ol man i wokim dispela nius o askim wanpela Witnes Bilong Jehova long helpim yu.
[Piksa long pes 7]
Ol manmeri bilong olgeta lain i kisim amamas long lotu i tru