Pasin Bilong Ol Pikinini Inap Lainim Yu Long Wanem Samting?

“YU MEKIM pasin olsem pikinini!” Sapos ol i sutim dispela kain tok long yumi, ating bai yumi bel hevi. Tru, yumi save amamas long ol liklik pikinini, tasol ol i no gat pasin olsem man i bikpela pinis, na ol i no gat planti save long ol samting, na ol i no gat savetingting bilong man i gat planti krismas.​—Jop 12:12.

Tasol wanpela taim Jisas i bin tokim ol disaipel: “Mi tok tru long yupela, sapos yupela i no senis na kamap olsem ol liklik pikinini, bai yupela i no inap i go insait long kingdom bilong heven.” (Matyu 18:3) Wanem mining bilong dispela tok bilong Jisas? Ol pikinini i gat wanem ol pasin ol man i bikpela pinis i mas bihainim?

Kisim Pasin Daun Olsem Pikinini

Tingim samting i bin kirapim Jisas long mekim dispela tok. Em i bin wokabaut longwe na nau em i kam kamap long Kaperneam, na em i askim ol disaipel: “Long rot yupela i mekim wanem toktok?” Ol disaipel i sem na ol i no toktok, long wanem, ol i bin tok pait long husat em i namba wan bilong ol. Orait bihain ol i strongim bel na ol i askim Jisas: “Husat bai i gat biknem tru long kingdom bilong heven?”​—Mak 9:​33, 34; Matyu 18:1.

Ol disaipel i bin raun wantaim Jisas inap 3-pela yia pinis, olsem na yumi kirap nogut long ol i tok pait long husat bai stap namba wan. Tasol ol i bin i go bikpela insait long lotu Juda we ol man i save ting pasin bilong i stap namba wan em i bikpela samting tru. Ating lotu bilong ol na sin i stap long skin, i bin stiaim tingting bilong ol disaipel.

Orait Jisas i sindaun, na em i singautim ol disaipel i kam, na em i tok: “Sapos wanpela man i laik i stap namba wan, orait em i mas i stap las tru, olsem wokman bilong helpim olgeta man.” (Mak 9:35) Ating ol i kirap nogut tru long dispela tok. Tok bilong Jisas i narapela kain tru long tingting bilong ol Juda long i stap namba wan! Orait nau Jisas i singautim wanpela liklik pikinini i kam long em. Long pasin sori Jisas i holim pikinini na i tokim ol disaipel: “Mi tok tru long yupela, sapos yupela i no senis na kamap olsem ol liklik pikinini, bai yupela i no inap i go insait long kingdom bilong heven. Man i daunim em yet na i kamap olsem dispela liklik pikinini, dispela man bai i gat biknem tru long kingdom bilong heven.”​—Matyu 18:​3, 4.

Man! Ol i kisim gutpela skul tru long pasin daun! Yumi ken tingim ol. Wanpela lain man i bikpela pinis, ol i sanap i stap na wanpela liklik pikinini i sanap namel long ol, na ol i lukluk strong long pikinini. Em i gat pasin daun na i trastim ol. Em i no bel nogut o laik resis wantaim ol! Em i daun long ol na i stap isi tasol! Tru tumas, pikinini hia em i piksa tru bilong pasin daun.

Tok bilong Jisas i klia. Yumi olgeta i mas kisim pasin daun olsem pikinini sapos yumi laik i stap aninit long Kingdom Bilong God. Insait long famili bilong Jehova, narapela i no ken resis long winim narapela o mekim pasin antap. (Galesia 5:26) Em ol dispela pasin yet i bin kirapim Satan long bikhet long God. Olsem na Jehova i nolaik tru long ol dispela kain pasin!​—Sindaun 8:13.

Ol Kristen tru i laik mekim wok bilong helpim ol man​—ol i no laik bosim ol man. Maski yumi mekim wok i no gutpela long mekim, o yumi helpim wanpela man i no gat nem, pasin daun tru bai kirapim yumi long helpim ol narapela. Kain wok olsem yumi mekim long pasin daun i gat gutpela pe tru bilong en. Jisas i tok: “Man i tingting long mi na i helpim wanpela liklik pikinini olsem dispela pikinini, em i helpim mi. Na man i helpim mi . . . em i helpim Papa, em i bin salim mi na mi kam.” (Mak 9:37) Taim yumi kisim pasin bilong givim samting na pasin daun olsem pikinini i save mekim, yumi save pas gut wantaim Nambawan Bikpela Man i stap long heven na Pikinini bilong em. (Jon 17:​20, 21; 1 Pita 5:5) Na bai yumi kisim amamas i save kamap long pasin bilong givim. (Aposel 20:35) Na yumi strongim bel isi na pasin wanbel i stap namel long lain bilong God.​—Efesus 4:​1-3.

Yumi Inap Skulim Ol na Ol i Trastim Man

Orait nau Jisas i kamapim narapela samting em pasin bilong ol pikinini inap lainim ol man long en: “Sapos wanpela man i no kisim kingdom bilong God olsem ol liklik pikinini i save kisim, em i no inap i go insait long en.” (Mak 10:15) Ol pikinini i no gat pasin daun tasol; ol i amamas long narapela i skulim ol. Wanpela mama i tok: “Ol i kisim kwik save long ol samting, kain olsem spans i save pulim wara.”

Olsem na bilong i stap aninit long Kingdom Bilong God, yumi mas kisim save long tok bilong Kingdom na bihainim dispela tok. (1 Tesalonaika 2:13) Olsem ol nupela pikinini, yumi mas “laikim tumas long kisim gutpela susu i kam long God . . . em dispela kain susu i save helpim spirit bilong [yumi] i kamap bikpela na strongpela long nupela laip God i givim long [yumi].” (1 Pita 2:2) Orait olsem wanem sapos yumi hatwok long kisimgut wanpela tok bilong Baibel? Wanpela man bilong lukautim ol pikinini i tok: “Oltaim ol pikinini i save askim, ‘Bilong wanem?’ na ol i save askim askim inap long taim ol i kisim bekim ol i amamas long en. Yumi mas bihainim pasin bilong ol. Olsem na yu mas wok yet long stadi. Toktok wantaim ol Kristen i gat save pinis long ol samting. Askim Jehova long givim savetingting long yu. (Jems 1:5) Sapos yu strong long beten na yu no les, bihain bai yu kisim gutpela samting long en.​—Matyu 7:​7-​11.

Tasol ating sampela bai tingting, ‘Ol manmeri yumi inap skulim ol, ating i no hatwok long giamanim ol, a?’ Tru, tasol man i no inap giamanim ol sapos ol i kisim stretpela tok bilong stiaim ol. Tingim ol pikinini, ol i save go long papamama bilong kisim ol tok bilong stiaim ol. Wanpela papa i tok: “Ol papamama i kamapim klia olsem ol i save was gut long ol pikinini na givim ol samting ol i mas kisim long olgeta de, olsem na ol pikinini inap bilip tru long ol.” Na i gat wankain as na yumi tu inap bilip long Papa bilong yumi long heven, Jehova. (Jems 1:17; 1 Jon 4:​9, 10) Oltaim Jehova i save stiaim yumi long rot bilong ol tok bilong em long Baibel. Holi spirit na oganaisesen bilong em i save mekim gut bel bilong yumi na helpim yumi. (Matyu 24:​45-​47; Jon 14:26) Sapos yumi mekim wok long ol dispela samting Jehova i givim long yumi, bai yumi no inap kisim bagarap long ol samting bilong spirit.​—Song 91:​1-​16.

Sapos yumi kisim pasin bilong bilip long God olsem ol pikinini, tingting na bel bilong yumi bai stap isi. Wanpela saveman bilong Baibel i tok: “Taim yumi pikinini yet yumi raun long wanpela hap na yumi no gat mani bilong baim rot, na yumi no save dispela ples i stap we, tasol yumi no tingting planti olsem papamama bai bringim yumi gut long dispela ples o nogat.” Olsem wanem long yumi? Yumi save bilip olsem long Jehova long olgeta wokabaut bilong yumi?​—Aisaia 41:10.

Pasin bilong bilip strong long God i helpim yumi long abrusim ol tingting na pasin inap nogutim yumi long ol samting bilong spirit. Yumi bilip tru long tok bilong Jisas olsem Papa bilong yumi long heven i save long ol samting yumi mekim, na sapos yumi wok oltaim long painim Kingdom na stretpela pasin bilong God, orait God bai lukautim yumi. Dispela bai helpim yumi long sakim pasin bilong tingim tingim ol samting bilong skin na lusim ol wok bilong God.​—Matyu 6:​19-​34.

‘Long Pasin Nogut Stap Olsem Ol Liklik Pikinini’

Tru, sin i stap long skin bilong ol pikinini taim mama i karim ol, tasol bel na tingting bilong ol i no gat ol tingting nogut long en. Olsem na Baibel i tokim ol Kristen: “Long olgeta kain pasin nogut yupela i mas i stap olsem ol liklik pikinini.”​—1 Korin 14:20.

Tingim Monique i gat 5-pela krismas, em i amamas na tokim mama: “Nupela pren bilong mi, Sara, gras bilong em i tanim tanim olsem bilong mi!” Pikinini i no toktok long skin bilong Sara i narapela kala na em i bilong narapela lain. Wanpela mama i tok: “Ol liklik pikinini i no save lukim kala bilong skin. Ol i no gat save long ol man i bilong wanem wanem lain o tingting nogut long ol.” Long dispela samting ol pikinini i save bihainim wankain tingting olsem God bilong yumi, em i save laikim ol manmeri bilong olgeta lain.​—Aposel 10:​34, 35.

Na ol pikinini i gat pasin bilong lusim rong ol narapela i mekim. Wanpela papa i tok: “Taim tupela mangi, Jack na Levi, i pait, mipela i tokim tupela long tok sori, na i no longtaim na tupela i save amamas na pilai gen wantaim. Ol i no save bel nogut i stap na narapela i no save kamapim gen rong narapela i mekim long em bipo, o tok long samting narapela i mas mekim pastaim na bai em i ken lusim rong bilong em. Ol i stap pren yet na pilai gut wantaim.” Ol i gutpela piksa tru long ol manmeri i bikpela pinis i ken bihainim!​—Kolosi 3:13.

Na tu, ol liklik pikinini i save tokaut kwik olsem God i stap tru. (Hibru 11:6) Ol i save tokaut stret, olsem na ol i no pret long autim tok long ol man. (2 King 5:​2, 3) Na taim ol i beten na kamapim bel bilong ol, man i save pilim tru, maski em i gat hatpela pasin. Na taim ol traim i painim ol, ol i save holimpas stretpela pasin. Tru tumas, ol liklik pikinini i gutpela presen tru yumi kisim!​—Song 127:​3, 4.

Kisim Bek Naispela Pasin

Ating bai yu tingting olsem, ‘Ol manmeri i bikpela pinis ol inap kisim bek ol naispela pasin bilong ol pikinini?’ Yumi ken tok, ol inap! Na tok bilong Jisas long yumi mas “kamap olsem ol liklik pikinini” i kamapim klia olsem yumi inap mekim.​—Matyu 18:3.

Yumi ken tok piksa olsem: Wanpela lain i gat wok long stretim bek piksa wanpela man i bin wokim na i gat bikpela pe tru bilong en. Ol i wok long rausim ol pipia das samting i pas strong long piksa na stretim gut sampela popaia ol man i bin mekim bipo taim ol i laik stretim dispela piksa. Ol i wok strong i go na bihain ol gutpela kala bilong piksa i kamap ples klia. Na olsem tasol, sapos yumi wok strong na i no les, na yumi kisim helpim long holi spirit bilong Jehova na long kongrigesen Kristen, yumi inap kisim bek ol naispela pasin yumi bin holim taim yumi stap pikinini yet.​—Efesus 5:1.

[Piksa long pes 9]

Ol pikinini i gat pasin daun

[Piksa long pes 10]

Ol pikinini i no save bel nogut long narapela lain, na ol i save lusim tingting tru long rong bilong narapela