Kisim Pasin Daun
“Yu save kisim bek ol manmeri i daunim ol yet.”—2 SAMUEL 22:28.
1, 2. Planti bikman bilong dispela graun i bin bihainim wanem pasin i wankain?
OL PIRAMID bilong Isip i tokaut long ol bikman em ol i bin bosim dispela kantri long bipo. Sampela narapela man i gat nem long bipo em Senakerip bilong Asiria, Aleksander bilong Grik, na Julius Sisar bilong Rom. I gat wanpela pasin ol dispela bikman i save bihainim em i wankain, ol i no gat pasin daun.—Matyu 20:25, 26.
2 Yu ting wanpela bilong ol dispela bikman yumi bin stori long ol, ol i save raun long kantri bilong ol bilong painim ol man nating na mekim gut bel bilong ol? Ating nogat, a? Na yu no inap ting olsem ol bai go long haus bilong ol man i bel hevi na strongim ol. Pasin ol i mekim long ol man nating i narapela kain tru long pasin em Nambawan Bikpela King bilong heven na graun, em God Jehova, i mekim long ol man!
Man i Stap Nambawan Gutpela Piksa
3. Nambawan Bikpela King i save mekim wanem pasin long ol man i stap aninit long em?
3 Jehova i gat biknem tru, tasol em “i save was gut long ol manmeri i save aninit long em wanpela tasol, maski ol i stap long wanem hap bilong graun. Em i save helpim ol na strongim ol.” (2 Stori 16:9) Na Jehova i save mekim wanem taim em i lukim wanpela man i lotuim em i bel hevi, long wanem, kain kain hevi i painim em? Long rot bilong holi spirit, em i save “stap” wantaim “ol manmeri i save daunim ol yet na . . . [em i] save strongim bel bilong ol na mekim laip bilong ol i kamap gutpela gen.” (Aisaia 57:15) Olsem na taim ol man i lotuim em ol i kisim bek strong pinis, nau ol inap tru long mekim gen wok bilong em na amamas long mekim olsem. Tru tumas, God i save mekim pasin daun!
4, 5. (a) Man bilong raitim song i ting olsem wanem long pasin bilong God long bosim ol man? (b) Wanem mining bilong dispela tok olsem God “i lukluk i kam daun” bilong helpim “ol rabisman”?
4 I no gat narapela man i bin mekim pasin daun inap long mak olsem Nambawan Bikpela King i bin mekim, bilong helpim ol man i gat sin. Olsem na man bilong raitim song inap tok: “Bikpela i save bosim olgeta lain pipel. Biknem bilong en i winim olgeta samting long heven. I no gat wanpela man i olsem God, Bikpela bilong yumi. Em i stap antap tru. Em i save lukluk i kam daun na lukim heven na graun wantaim. Em i save helpim ol rabisman na ol i no i stap nogut moa. Ol i stap gut tasol. Em i save helpim ol man i sot long ol samting na ol i kisim inap.”—Song 113:4-7.
5 Jehova i holi, olsem na em i no save “hambak nabaut.” (Mak 7:22, 23) Dispela tok “lukluk i kam daun” inap makim olsem man i daunim em yet long mak bilong man i no gat namba, o em i lusim bikpela namba bilong em na i helpim man i stap aninit long em. Em nau, tok bilong Song 113:6 i kamapim gut pasin daun bilong God bilong yumi, em i save mekim pasin sori na helpim ol sinman i lotuim em!—2 Samuel 22:36.
Jisas i Gat Pasin Daun
6. Jehova i bin mekim wanem pasin daun na dispela i winim tru olgeta narapela pasin daun em i bin mekim?
6 God i salim namba wan Pikinini bilong em i kam long graun bilong kamap man na kisim bek ol manmeri, na dispela i makim nambawan bikpela samting God i bin mekim bilong kamapim pasin daun na pasin laikim bilong em. (Jon 3:16) Jisas i skulim yumi long Papa bilong em long heven na em i givim gutpela laip bilong em olsem man bilong rausim “sin bilong olgeta manmeri bilong graun.” (Jon 1:29; 18:37) Jisas i bihainim stret pasin bilong Papa bilong em, na pasin daun bilong Jehova tu, na em i redi long mekim ol samting God i askim em long mekim. Dispela em i nambawan gutpela piksa bilong wanpela man i bin mekim pasin daun na pasin laikim. Tasol i no olgeta man i amamas long pasin daun bilong Jisas. Ol birua bilong em i ting em i wanpela “man nating.” (Daniel 4:17) Tasol aposel Pol i no olsem. Em i luksave olsem ol wanbilip bilong em i mas bihainim pasin bilong Jisas na dispela i mas kirapim ol long mekim pasin daun long ol wanbilip.—1 Korin 11:1; Filipai 2:3, 4.
7, 8. (a) Olsem wanem Jisas i lain long mekim pasin daun? (b) Jisas i tok wanem long ol lain em ol inap kamap disaipel bilong em?
7 Pol i kamapim klia dispela gutpela pasin bilong Jisas, na em i tok: “Yupela i mas holim wankain tingting olsem Krais Jisas i bin holim. . . . Em i kamap olsem wokboi nating. Em i kamap olsem man na ol man i lukim em i stap man tru. Na em i daunim em yet na i bihainim tok bilong God, i go inap long em i dai, yes, inap long em i dai long diwai.”—Filipai 2:5-8.
8 Ating sampela i laik save, ‘Olsem wanem Jisas i lain long mekim pasin daun?’ Em i kisim dispela pasin, long wanem, inap longtaim tru em i bin stap wantaim Papa bilong em long heven, na taim God i wokim olgeta samting em i mekim wok olsem “saveman i bosim wok.” (Sindaun 8:30) Taim Adam na Iv i bikhet long gaden Iden, dispela Pikinini Bilong God inap lukim gutpela pasin daun Papa bilong em i mekim long ol sinman. Olsem na taim em i stap long graun, Jisas i bihainim tru pasin daun bilong Papa bilong em na em i tokim ol disaipel: “Yupela kisim save long mi na aninit long tok bilong mi, olsem yupela i kisim plang ol i save putim long nek bilong ol bulmakau bilong ol i ken pulim ol samting. Yupela kisim save long mi, long wanem, mi save mekim pasin isi long ol man na mi save daunim mi yet. Na bai ol samting i no ken givim hevi long yupela na bai yupela i kisim malolo.”—Matyu 11:29; Jon 14:9.
9. (a) Jisas i laikim wanem pasin bilong ol pikinini? (b) Jisas i kisim wanpela liklik pikinini na em i skulim ol disaipel long wanem samting?
9 Jisas i gat pasin daun, olsem na ol liklik pikinini i no pret long em. Ol i amamas long i go long em. Na Jisas yet i kamapim olsem em i laikim ol pikinini na em i tingim ol. (Mak 10:13-16) Jisas i laikim wanem pasin bilong ol pikinini? Ol i gat sampela gutpela pasin em ol disaipel bilong em i no bin kamapim long olgeta taim. Ol liklik pikinini i save tingim olsem ol bikpela man i winim ol. Dispela i kamap klia long pasin bilong ol long givim planti askim. Tru tumas, sapos yumi skelim ol pikinini wantaim ol bikpela man, ol pikinini i amamas long lain long ol samting na ol i no save hambak tumas olsem ol bikpela man. Wanpela taim, Jisas i kisim wanpela liklik pikinini na em i tokim ol disaipel bilong em olsem: “Mi tok tru long yupela, sapos yupela i no senis na kamap olsem ol liklik pikinini, bai yupela i no inap i go insait long kingdom bilong heven.” Na em i tok moa: “Man i daunim em yet na i kamap olsem dispela liklik pikinini, dispela man bai i gat biknem tru long kingdom bilong heven.” (Matyu 18:3, 4) Jisas i kolim wanpela lo olsem: “Man i litimapim nem bilong em yet, bai God i daunim em. Tasol man i daunim em yet, bai God i litimapim em i go antap.”—Luk 14:11; 18:14; Matyu 23:12.
10. Bai yumi skelim wanem ol askim?
10 Dispela lo i kamapim sampela bikpela askim. Wanpela samting inap helpim yumi long kisim laip oltaim em yumi mas kisim pasin daun, tasol bilong wanem sampela taim i hatwok long ol Kristen long mekim pasin daun? Bilong wanem i hatwok long daunim pasin antap na mekim pasin daun taim ol traim i painim yumi? Na wanem samting bai helpim yumi long kisim pasin daun?—Jems 4:6, 10.
As na i Hatwok Long Mekim Pasin Daun
11. Bilong wanem yumi no ken kirap nogut long yumi hatwok long mekim pasin daun?
11 Sapos yu pilim olsem i hatwok long mekim pasin daun, yu mas save olsem i no yu tasol i pilim olsem. Long 1920, dispela nius i stori long tok bilong Baibel olsem yumi mas i gat pasin daun, na i tok: “Bikpela i ting pasin daun i bikpela samting, olsem na dispela i mas kirapim ol trupela disaipel long kamapim dispela pasin long olgeta de.” Na nius i tok moa: “Maski planti taim Baibel i tokim yumi long bihainim pasin daun, olgeta man i gat sin, olsem na ol man i kamap lain bilong Bikpela na wok long bihainim rot em i makim, em i hatwok long ol long mekim pasin daun, winim ol narapela pasin.” Dispela i kamapim wanpela as na i hatwok long ol Kristen tru long mekim pasin daun—sin i mekim na yumi gat bikpela laik long ol narapela i litimapim nem bilong yumi. Dispela i olsem, long wanem, yumi pikinini bilong Adam na Iv, em ol i bin tingim laik bilong ol yet tasol.—Rom 5:12.
12, 13. (a) Olsem wanem ol pasin bilong dispela graun inap pasim ol Kristen long mekim pasin daun? (b) Husat i mekim na i hatwok moa yet long yumi kamapim pasin daun?
12 Yumi stap namel long ol manmeri bilong dispela graun em ol i laik kirapim yumi long winim ol narapela, na dispela i narapela as na i hatwok long yumi long mekim pasin daun. Planti manmeri bilong dispela graun i laik inapim “pasin bilong bel kirap na aigris na bikhet.” (1 Jon 2:16) Ol disaipel bilong Jisas i no ken larim ol dispela laik nogut bilong graun i bosim ol, nogat, ol i mas tingting tasol long bihainim laik bilong God.—Matyu 6:22-24, 31-33; 1 Jon 2:17.
13 Namba tri as na i hatwok long kisim na kamapim pasin daun em olsem: Satan, em as bilong pasin antap, em i bosim dispela graun. (2 Korin 4:4; 1 Timoti 3:6) Satan i save kirapim ol man long mekim ol pasin nogut. Olsem: Em i laik Jisas i lotuim em na em bai givim “olgeta strongpela kantri bilong dispela graun wantaim ol gutpela samting bilong ol” long Jisas. Jisas i gat pasin daun na em i sakim dispela samting Satan i laik givim long em. (Matyu 4:8, 10) Na olsem tasol, Satan i laik pulim ol Kristen long kisim biknem. Tasol ol Kristen i gat pasin daun ol i wok strong long bihainim pasin bilong Jisas, na ol i litimapim nem bilong God na givim biknem long em.—Mak 10:17, 18.
Kisim na Kamapim Pasin Daun
14. Stori long pasin bilong man i giaman na ‘daunim em yet.’
14 Long pas aposel Pol i raitim long ol Kolosi, em i givim tok lukaut olsem ol man i no ken mekim nating pasin daun bambai ol narapela i litimapim nem bilong ol. Pol i tok dispela pasin i olsem ol man i giaman na ‘daunim ol yet.’ Ol man husat i save giaman na mekim olsem ol i gat pasin daun, ol i no man bilong tingim ol samting bilong spirit. Ol dispela man i gat pasin antap. (Kolosi 2:18, 23) Jisas i stori long sampela man i mekim kain pasin olsem. Em i tokaut long rong bilong ol Farisi, ol i save mekim ol beten na tambu long kaikai na luk sore bai ol man i ken lukim ol. Bilong God i ken orait long beten bilong yumi, yumi mas mekim pasin daun taim yumi beten.—Matyu 6:5, 6, 16.
15. (a) Yumi ken mekim wanem bilong holimpas pasin bilong daunim yumi yet? (b) Husat i olsem gutpela piksa long mekim pasin daun?
15 God Jehova na Jisas Krais i nambawan gutpela piksa bilong mekim pasin daun na dispela i helpim ol Kristen long holimpas pasin bilong daunim ol yet. Bilong mekim olsem ol i mas stadi oltaim long Baibel na ol buk bilong Baibel em “wokboi i gat gutpela tingting” i save kamapim. (Matyu 24:45) Kain stadi olsem i bikpela samting long ol wasman Kristen bambai ol “i no ken litimapim nem bilong [ol] yet na daunim” ol brata. (Lo 17:19, 20; 1 Pita 5:1-3) Tingim ol manmeri i bin kisim ol gutpela blesing, long wanem, ol i gat pasin daun. Em ol manmeri olsem Rut, Hana, Elisabet, na planti narapela manmeri. (Rut 1:16, 17; 1 Samuel 1:11, 20; Luk 1:41-43) Na tingim tu ol planti man i gat namba na long pasin daun ol i mekim wok bilong Jehova, olsem Devit, Josaia, Jon Bilong Baptais, na aposel Pol. (2 Stori 34:1, 2, 19, 26-28; Song 131:1; Jon 1:26, 27; 3:26-30; Aposel 21:20-26; 1 Korin 15:9) Na i gat planti manmeri insait long kongrigesen Kristen long nau em ol i gat pasin daun. Taim ol Kristen tru i tingim tingim long bel ol dispela manmeri, dispela bai helpim ol long “stap aninit long ol arapela manmeri bilong God.”—1 Pita 5:5.
16. Olsem wanem wok bilong autim tok i helpim yumi long mekim pasin daun?
16 Na tu, pasin bilong autim tok long olgeta taim inap helpim yumi long mekim pasin daun. Pasin bilong daunim yumi yet inap helpim yumi long mekim gut wok bilong autim tok taim yumi bungim ol man long haus o long ol narapela ples. Na em inap helpim yumi moa yet sapos ol man bilong haus i no amamas long harim tok o ol i toktok strong long yumi. Planti taim ol i sutim tok long ol bilip bilong yumi, na pasin daun inap helpim ol Kristen long bekim ol askim “long tok isi na long gutpela pasin.” (1 Pita 3:16) Sampela wokman bilong God ol i bin go sindaun long narapela hap na helpim ol man i gat narapela pasin na sindaun. Ating ol kain wokman olsem i mas mekim pasin daun na lainim nupela tok ples bambai ol i ken helpim gut ol man em ol i laik autim gutnius long ol. Man! Ol i mekim gutpela wok tru, a?—Matyu 28:19, 20.
17. Yumi mas i gat pasin daun bilong mekim wanem ol wok Kristen?
17 Planti ol i mekim pasin daun na ol i inapim ol wok Kristen bilong ol, na ol i putim laik bilong ol narapela i go pas long laik bilong ol yet. Olsem: Wanpela papa Kristen i mas mekim pasin daun na bai em i ken lusim haptaim bilong em yet bilong redim na mekim gut Baibel stadi wantaim ol pikinini bilong em. Pasin daun i helpim tu ol pikinini long litimapim nem bilong papamama bilong ol na bihainim tok bilong ol, maski papamama i sinman. (Efesus 6:1-4) Ol meri marit em man bilong ol i no wanbilip, planti taim ol samting i painim ol we ol i mas mekim pasin daun na bai ol inap “wokabaut stret na aninit tru” long man bilong ol bambai ol i ken helpim em long kisim tok i tru. (1 Pita 3:1, 2) Na tu, pasin daun na pasin bilong daunim sampela laik bilong yumi yet inap helpim yumi taim yumi lukautim papamama i sik na lapun.—1 Timoti 5:4.
Pasin Daun i Save Stretim Hevi
18. Olsem wanem pasin daun inap helpim yumi long stretim hevi?
18 Olgeta wokman bilong God long graun ol i gat sin. (Jems 3:2) Sampela taim hevi o tingting kranki inap kamap namel long tupela Kristen. Sampela taim i gat as na narapela i kros long narapela. Planti taim ol i ken stretim dispela hevi taim ol i bihainim tok olsem: “Sapos wanpela man namel long yupela em i gat tok long narapela brata i bin mekim rong long em, orait em i mas karim dispela hevi na lusim sin bilong dispela brata. Bikpela em i lusim pinis sin bilong yupela, na olsem tasol yupela tu i mas lusim sin bilong ol arapela.” (Kolosi 3:13) Tru, i no isi long bihainim dispela tok, tasol pasin daun bai helpim yumi long mekim olsem.
19. Yumi mas tingim wanem samting taim yumi toktok long wanpela i bin bagarapim bel bilong yumi?
19 Ating sampela taim Kristen i pilim olsem wanpela hevi i bikpela tumas na em i no inap lusim tingting long en. Sapos olsem, pasin daun bai helpim em long toktok wantaim man i rongim em na tingting long kamap wanbel. (Matyu 18:15) Wanpela as na sampela taim ol hevi i stap yet namel long ol Kristen em, long wanem, wanpela o tupela wantaim i gat pasin antap na ol i no laik tokaut olsem ol i bin mekim rong. O hevi i stap yet, long wanem, man i go pas long toktok long narapela bilong stretim hevi em i mekim long pasin olsem em yet i stretpela man na em i toktok planti long narapela. Tasol sapos ol i gat pasin daun, dispela bai helpim gut ol long stretim hevi.
20, 21. Wanem wanpela bikpela helpim bilong mekim pasin daun?
20 Wanpela bikpela samting bilong helpim yumi long kisim pasin daun em yumi mas beten askim God long helpim yumi na givim holi spirit long yumi. Tasol tingim, “God i save marimari . . . [na givim holi spirit tu] long ol man i daunim ol yet.” (Jems 4:6) Olsem na sapos yu gat wanpela hevi wantaim wanpela wanbilip, beten askim Jehova long helpim yu long mekim pasin daun na tokaut long rong yu bin mekim na dispela i kamapim hevi, maski em liklik o bikpela rong. Sapos narapela i bagarapim bel bilong yu na em i tok, “Mi sori tru,” orait nau long pasin daun yu mas lusim rong bilong em. Sapos i hatwok long mekim olsem, beten askim Jehova long helpim yu long rausim pasin antap i stap long bel bilong yu.
21 Yumi save olsem pasin daun i save helpim yumi long planti samting, olsem na dispela i mas kirapim yumi long kisim na holimpas dispela gutpela pasin. Bilong helpim yumi, God Jehova na Jisas Krais i stap olsem gutpela piksa tru! No ken lusim tingting long tok bilong God olsem: “Sapos yu daunim yu yet na yu stap aninit long Bikpela, bai yu gat planti mani samting na biknem, na bai yu stap gut.”—Sindaun 22:4.
Sampela Tok Bilong Tingim Gut
• Husat i olsem nambawan gutpela piksa bilong mekim pasin daun?
• Bilong wanem i hatwok long kisim pasin daun?
• Wanem samting inap helpim yumi long mekim pasin daun?
• Bilong wanem em i bikpela samting long holimpas pasin daun?
[Piksa long pes 26]
Jisas i gat pasin daun
[Piksa long pes 28]
Ol manmeri bilong dispela graun i save kirapim ol man long winim ol narapela
[Kredit Lain]
WHO photo by L. Almasi/K. Hemzǒ
[Piksa long pes 29]
Pasin daun i save helpim yumi long autim tok long ol man yumi no save long ol
[Ol Piksa long pes 30]
Pasin bilong daunim yumi yet na laikim narapela inap stretim hevi
[Ol Piksa long pes 31]
I gat planti rot ol Kristen inap kamapim pasin daun