Ol Wokboi Bilong Jehova i Save Amamas
“Ol manmeri i save, ol i stap rabis tru long ol samting bilong God, em ol i ken amamas.”—MATYU 5:3.
1. Amamas tru tru em wanem samting, na i kamapim wanem samting?
LAIN bilong Jehova i tingim amamas bilong ol i wanpela gutpela samting tru. Man bilong raitim song, em Devit, i tok: “Ol manmeri i putim Bikpela i stap God bilong ol, ol . . . i ken amamas.” (Song 144:15) Man i amamas, em i save pilim olsem em i stap gut. Yumi amamas tru tru—long tingting na long bel—taim yumi save olsem Jehova i orait long yumi. (Sindaun 10:22) Dispela amamas i kamapim olsem yumi pas gut wantaim Papa bilong yumi long heven na yumi save yumi bihainim laik bilong em. (Song 112:1; 119:1, 2) Jisas i kolim 9-pela as na yumi ken amamas. Taim yumi skelim ol dispela as long dispela stadi na long stadi i kamap bihain long dispela, dispela bai helpim yumi long save olsem yumi inap stap amamas tru sapos yumi stap gut long mekim wok bilong God Jehova, em i man bilong “amamas.”—1 Timoti 1:11.
Yumi Save Yumi Mas Kisim Ol Samting Bilong Spirit
2. Long wanem taim Jisas i bin toktok long pasin bilong amamas? Wanem namba wan hap bilong dispela tok bilong em?
2 Long 31 C.E., Jisas i mekim wanpela bikpela tok em planti man i save long en. Sampela i kolim olsem Bikpela Tok Long Maunten, long wanem, Jisas i autim dispela tok antap long wanpela maunten. Raunwara Galili i stap daunbilo. Gutnius Matyu i raitim i tok: “Jisas i lukim ol bikpela lain manmeri i kam, na em i go antap long maunten. Em i sindaun, na ol disaipel bilong en i kam long em. Na Jisas i skulim ol disaipel olsem, ‘Ol manmeri i save, ol i stap rabis tru long ol samting bilong God, em ol i ken amamas. Ol dispela manmeri bai i kisim ol gutpela samting bilong kingdom bilong heven.’ ” Long Baibel New World Translation, namba wan hap bilong dispela tok bilong Jisas i olsem: “Ol manmeri i save ol i mas kisim ol samting bilong spirit, ol i ken amamas.”—Matyu 5:1-3.
3. Sapos yumi gat pasin daun, olsem wanem dispela bai helpim yumi long stap amamas?
3 Long dispela bikpela tok em i mekim long maunten, Jisas i kamapim olsem man bai amamas, winim bilong bipo, sapos em i save em i mas kisim ol samting bilong spirit. Ol Kristen i gat pasin daun, na ol i save ol i gat sin, ol i save krai long Jehova i ken lusim ol rong bilong ol long rot bilong ofa bilong Krais bilong baim bek ol man. (1 Jon 1:9) Long dispela rot, bel na tingting bilong ol bai stap isi na ol i kisim amamas tru. “Sapos God i lusim pinis rong bilong wanpela man, na i rausim sin bilong em, dispela man i ken amamas.”—Song 32:1; 119:165.
4. (a) Yumi ken mekim wanem bilong soim olsem yumi save yumi yet na ol arapela i mas kisim ol samting bilong spirit? (b) Taim yumi save yumi mas kisim ol samting bilong spirit, wanem samting i helpim amamas bilong yumi i go bikpela moa?
4 Taim yumi save yumi mas kisim ol samting bilong spirit, dispela i save kirapim yumi long ritim Baibel long olgeta de, na kisim kaikai bilong spirit em “wokboi i gat gutpela tingting” i save givim long yumi “long taim bikman i makim,” na go oltaim long ol miting Kristen. (Matyu 24:45; Song 1:1, 2; 119:111; Hibru 10:25) Pasin bilong laikim tru ol arapela i mekim na yumi save ol man i mas kisim ol samting bilong spirit na yumi givim bel long autim gutnius bilong Kingdom na skulim ol man long en. (Mak 13:10; Rom 1:14-16) Pasin bilong autim ol tok i tru bilong Baibel long ol arapela i save givim amamas long yumi. (Aposel 20:20, 35) Na dispela amamas i save go bikpela moa taim yumi tingim tingim long bel ol gutpela samting bilong Kingdom na ol gutpela blesing dispela Kingdom bai kamapim. “Liklik lain sipsip,” em ol Kristen God i bin makim, ol i wet long kisim laip oltaim long heven insait long Kingdom gavman bilong Krais. (Luk 12:32; 1 Korin 15:50, 54) “Ol arapela sipsip” ol i gat tingting long kisim laip oltaim long Paradais long graun aninit long dispela Kingdom gavman.—Jon 10:16; Song 37:11; Matyu 25:34, 46.
Rot na Ol Man i Krai i Ken Amamas
5. (a) Wanem mining bilong dispela tok “ol manmeri i krai i stap”? (b) Taim ol man i krai i stap, wanem samting i mekim gut bel bilong ol?
5 Long narapela tok bilong Jisas long as na man i ken amamas, i gat tupela tok i olsem pait wantaim. Em i tok: “Ol manmeri i krai i stap, em ol i ken amamas. God bai i mekim gut bel bilong ol.” (Matyu 5:4) Olsem wanem man i ken krai na amamas tu long wankain taim? Bilong kisimgut mining bilong dispela tok bilong Jisas, yumi mas tingim wanem kain krai em i stori long en. Disaipel Jems i tok yumi gat sin na dispela em i wanpela as na yumi mas krai. Em i tok: “Yupela man bilong sin, bel bilong yupela i mas kamap klin, olsem man i wasim han bilong en na i kamap klin. Yupela man i gat tupela tingting, yupela i mas rausim dispela tingting nogut long bel bilong yupela. Yupela i mas bel hevi na krai planti. Yupela man i lap nau, yupela i mas senisim dispela pasin bilong lap, na yupela i mas krai. Yupela man i amamas nau, yupela i mas senisim dispela pasin bilong amamas, na yupela i mas bel hevi tru. Yupela i mas daunim yupela yet long ai bilong Bikpela. Sapos yupela i mekim olsem, orait Bikpela bai i litimapim yupela.” (Jems 4:8-10) Ol man i krai, long wanem, ol i gat sin, taim ol i kisim save olsem God bai lusim ol rong bilong ol sapos ol i bilip long ofa bilong Krais na tanim bel tru na bihainim laik bilong Em, dispela i save mekim gut bel bilong ol. (Jon 3:16; 2 Korin 7:9, 10) Orait nau ol inap pas gut wantaim Jehova na ol i ken tingting long kisim laip oltaim na mekim wok bilong God na litimapim nem bilong em. Dispela i givim bikpela amamas long ol.—Rom 4:7, 8.
6. I gat wanem as na sampela i krai i stap? Wanem samting i mekim gut bel bilong ol?
6 Dispela tok bilong Jisas i makim tu ol man i krai long ol pasin nogut i stap long graun. Jisas i kamapim tok profet bilong Aisaia 61:1, 2 na em i tok dispela i makim em yet: “Spirit bilong God, Bikpela i kam i stap long mi, long wanem, Bikpela yet i kapsaitim wel long het bilong mi bilong makim mi bilong i go bringim gutpela tok bilong en long ol rabisman. Na em i salim mi i kam long pinisim bel hevi bilong ol man i stap wantaim bikpela wari . . . Na em i salim mi long strongim bel bilong ol manmeri i sori na i krai.” Dispela em wanpela wok ol Kristen God i bin makim na ol i stap yet long graun ol tu i mas mekim, na ol poroman bilong ol, em “ol arapela sipsip,” i save helpim ol long mekim dispela wok. Olgeta i insait long wanpela wok i kain olsem putim mak long pes bilong ol “manmeri i bel nogut na i wari long olgeta dispela pasin nogut ol wantok i save mekim insait long taun [em apostet Jerusalem, i makim Kristendom].” (Esekiel 9:4) “Gutnius bilong kingdom” i mekim gut bel bilong ol dispela man i krai i stap. (Matyu 24:14) Ol i amamas long kisim save olsem klostu nau dispela taim nogut Satan i bosim em bai pinis na Jehova bai kamapim wanpela nupela taim long graun na stretpela pasin tasol bai stap long en.
Daunim Nem Bilong Ol Yet
7. Pasin bilong “daunim nem bilong ol yet” i no makim wanem samting?
7 Long Bikpela Tok Long Maunten, Jisas i tok moa olsem: “Ol manmeri i save daunim nem bilong ol yet, em ol i ken amamas. Bai God i givim olgeta graun long ol.” (Matyu 5:5) Sampela man i ting olsem taim man i daunim nem bilong em yet, olsem mekim pasin isi, em i no gat bun. Tasol dispela tingting i no stret. Wanpela saveman bilong Baibel i stori long insait bilong tok ol i tanim, “daunim nem bilong ol yet,” o pasin isi, na em i tok: “Man i gat [pasin isi] em i save bosim gut bel. Dispela pasin i no makim olsem man i no gat bun na em i stap nating tasol, nogat. Dispela pasin i gat strong long en em man i bosim gut.” Jisas i tok long em yet olsem: “Mi save mekim pasin isi long ol man na mi save daunim mi yet.” (Matyu 11:29) Tasol maski Jisas i man bilong pasin isi, em i strong long sambai long pasin i stret.—Matyu 21:12, 13; 23:13-33.
8. Pasin isi i poroman wantaim wanem pasin? Bilong wanem yumi mas i gat dispela pasin taim yumi mekim ol samting wantaim ol arapela?
8 Em nau, pasin isi i poroman wantaim pasin bilong bosim gut bel. Long lista aposel Pol i kamapim long ‘ol pasin holi spirit i kirapim ol man long mekim,’ dispela tupela pasin—pasin isi na pasin bilong bosim gut bel—i stap wantaim. (Galesia 5:22, 23) Bilong kisim pasin isi, yumi mas kisim helpim long holi spirit. Pasin isi em i wanpela gutpela pasin Kristen em i save helpim yumi long stap wanbel wantaim ol man insait na ausait long kongrigesen. Pol i tok: “Yupela i mas kisim olkain pasin olsem. Yupela i mas sori tru long ol arapela na mekim gut long ol. Yupela i mas daunim yupela yet na mekim pasin isi long ol man, na yupela i no ken belhat kwik long ol man i rongim yupela. Sapos wanpela man namel long yupela em i gat tok long narapela brata i bin mekim rong long em, orait em i mas karim dispela hevi na lusim sin bilong dispela brata.”—Kolosi 3:12, 13.
9. (a) Olsem wanem na i no long ol man tasol yumi kamapim pasin isi? (b) Ol manmeri i daunim nem bilong ol yet, olsem wanem ‘God i givim graun’ long ol?
9 Tasol i no long ol man tasol yumi kamapim pasin isi, nogat. Taim yumi amamas long daun long wok king bilong Jehova, yumi kamapim olsem yumi gat pasin isi. Nambawan gutpela piksa bilong dispela pasin, em Jisas Krais—taim em i stap long graun em i save mekim pasin isi na em i daun tru long laik bilong Papa bilong em. (Jon 5:19, 30) Jisas i nambawan man God i givim graun long em, long wanem, em i dispela King God i bin makim bilong bosim dispela graun. (Song 2:6-8; Daniel 7:13, 14) Em bai mekim dispela wok wantaim 144,000 “brata” bilong em, em God i kisim ol namel long “olgeta manmeri bilong graun” bilong i “stap king na bosim ol manmeri bilong graun.” (Rom 8:17; KTH 5:9, 10; 14:1, 3, 4; Daniel 7:27) Krais na ol wanwok king bilong em ol bai bosim planti milion manmeri i gat pasin olsem bilong sipsip, na long dispela lain tok profet bilong dispela song bai i gat gutpela truim bilong en: “Ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.”—Song 37:11; Matyu 25:33, 34, 46.
Laikim Tumas Stretpela Pasin
10. Ol man i “laikim tumas long bihainim stretpela pasin,” wanem wanpela samting ol i ken mekim na bai God i ken inapim dispela laik bilong ol?
10 Narapela amamas Jisas i kolim taim em i mekim tok long dispela maunten long Galili, i olsem: “Ol manmeri i laikim tumas long bihainim stretpela pasin, long wankain pasin olsem man i hangre tru na i laikim tumas long kisim kaikai na i dai long wara, em ol i ken amamas. Bai God inapim ol tru.” (Matyu 5:6) Jehova i makim stretpela rot ol Kristen i mas bihainim. Olsem na ol manmeri i laikim tumas stretpela pasin ol i laik tru bai God i ken stiaim ol. Ol i save ol i gat sin na pasin kranki na ol i laikim tumas bai ol i ken stap gut long ai bilong Jehova. Ol i amamas tru taim ol i ritim Tok Bilong God na kisim save olsem sapos ol i tanim bel na askim God long lusim rong bilong ol long rot bilong ofa bilong Krais bilong baim bek ol man, bai ol i gat rot long kamap stretpela man long ai bilong God!—Aposel 2:38; 10:43; 13:38, 39; Rom 5:19.
11, 12. (a) Ol Kristen God i bin makim ol, ol i kamap stretpela man olsem wanem? (b) Olsem wanem God bai inapim ol poroman bilong ol Kristen God i bin makim, em ol i laikim tumas stretpela pasin?
11 Jisas i tok ol dispela kain man bai amamas, long wanem, God bai “inapim ol tru.” (Matyu 5:6) Ol Kristen God i bin makim ol long holi spirit long “stap king” wantaim Krais long heven, God i kolim ol “stretpela manmeri” bilong kisim laip. (Rom 5:1, 9, 16-18) Jehova i kisim ol olsem ol pikinini bilong em long spirit. Ol i kamap wanwok bilong Krais, na ol bai mekim wok olsem king na pris long Kingdom gavman bilong em long heven.—Jon 3:3; 1 Pita 2:9.
12 Ol poroman bilong ol Kristen God i bin makim, God i no tokaut yet na kolim ol stretpela man bilong kisim laip. Tasol ol i bilip long blut bilong Krais i bin kapsait, olsem na Jehova i tingim ol olsem stretpela man. (Jems 2:22-25; KTH 7:9, 10) Ol i stap stretpela man olsem pren bilong Jehova na long taim bilong “bikpela hevi” em bai lukautim ol na ol bai stap gut. (KTH 7:14) Na God bai mekim narapela samting tu bilong inapim ol dispela man ol i laikim tumas stretpela pasin. Aninit long “nupela skai,” ol bai kamap hap bilong nupela graun i gat “stretpela pasin tasol i stap long en.”—2 Pita 3:13; Song 37:29.
Ol Manmeri i Marimari Long Ol Arapela
13, 14. Wanem sampela samting yumi ken mekim bilong soim pasin marimari long ol arapela? Dispela bai helpim yumi olsem wanem?
13 Jisas i tok moa: “Ol manmeri i save marimari long ol arapela, em ol i ken amamas. Bai God i marimari long ol.” (Matyu 5:7) Long ol samting bilong lo, pasin marimari em samting jas i mekim taim em i isi long man i mekim rong na em i no givim bikpela strafe long em olsem lo i makim. Tasol long Baibel, hap tok Grik ol i tanim olsem “marimari” em inap makim pasin bilong tingim gut o sori long arapela—kain pasin olsem i save helpim man i gat hevi. Olsem na ol man i gat pasin marimari, ol i save mekim sampela wok bilong kamapim sori bilong ol. Long tok piksa Jisas i mekim long gutpela man Samaria, dispela man i stap gutpela piksa tru bilong man i “sori” na marimari long man i gat hevi.—Luk 10:29-37.
14 Bilong yumi ken kisim dispela amamas i save kamap long rot bilong marimari long ol arapela, yumi mas mekim sampela wok bilong helpim ol man i sot. (Galesia 6:10) Jisas i sori long ol manmeri em i lukim. “Em i sori tru long ol, long wanem, ol i olsem ol sipsip i no gat wasman. Na em i stat long givim planti tok long ol.” (Mak 6:34) Jisas i save olsem nambawan bikpela samting man i mas kisim em ol samting bilong spirit. Yumi tu i ken sori na marimari long ol arapela taim yumi helpim ol long kisim samting ol i mas i gat—em “gutnius bilong kingdom.” (Matyu 24:14) Na tu, yumi ken helpim ol wanbilip Kristen i lapun, na ol meri man bilong ol i dai pinis, na ol pikinini papamama bilong ol i dai pinis, na “strongim bel bilong ol man i save pret [“bel hevi,” NW ].” (1 Tesalonaika 5:14; Sindaun 12:25; Jems 1:27) Dispela bai givim amamas long yumi, na tu, Jehova bai marimari long yumi.—Aposel 20:35; Jems 2:13.
Bel i Klin na Ol i No Kros na Pait
15. Olsem wanem bel i ken stap klin na yumi mekim i dai ol kros na pait?
15 Jisas i kamapim namba 6 na namba 7 amamas olsem: “Ol manmeri bel bilong ol i klin, em ol i ken amamas. Bai ol i lukim God. Ol manmeri i save mekim dai ol kros na pait, em ol i ken amamas. Bai ol i kolim ol pikinini bilong God.” (Matyu 5:8, 9) Man i gat klinpela bel em i save bihainim stretpela pasin, na tu, em i stap klin long ol samting bilong spirit—em i tingting long Jehova wanpela tasol na mekim wok bilong em. (1 Stori 28:9; Song 86:11) Ol man i save wok long mekim i dai ol kros na pait ol i save wanbel wantaim ol brata Kristen bilong ol, na ol arapela tu. (Rom 12:17-21) Ol i “wok long kamap wanbel wantaim ol arapela manmeri, na [ol i] mas strong long bihainim dispela pasin.”—1 Pita 3:11.
16, 17. (a) Bilong wanem ol i kolim ol Kristen God i bin makim olsem “pikinini bilong God”? Olsem wanem na ol i “lukim God”? (b) Olsem wanem “ol arapela sipsip” i “lukim God”? (c) Long wanem rot na long wanem taim bai “ol arapela sipsip” i kamap “pikinini bilong God”?
16 Long ol man i mekim i dai ol kros na pait na bel bilong ol i klin, God i tok promis long ol olsem “bai ol i kolim ol pikinini bilong God” na “bai ol i lukim God.” Ol Kristen God i bin makim, Jehova i kisim ol olsem “pikinini” bilong em taim ol i stap yet long graun. (Rom 8:14-17) Taim ol i kirap bek bilong i stap wantaim Krais long heven, ol i mekim wok long ai bilong Jehova na ol i lukim Em.—1 Jon 3:1, 2; KTH 4:9-11.
17 “Ol arapela sipsip” em ol i save mekim i dai ol kros na pait, ol tu i mekim wok bilong Jehova aninit long Gutpela Wasman, Krais Jisas, em i kamap “Papa” bilong ol “bilong i stap oltaim oltaim.” (Jon 10:14, 16; Aisaia 9:6) Ol man husat i winim laspela traim long pinis bilong Wan Tausen Yia Bilong Krais i Stap King, Jehova bai kisim ol i stap “pikinini” bilong em long graun. (Rom 8:21; KTH 20:7, 9) Ol i wetim dispela samting, na ol i kolim Jehova Papa bilong ol, long wanem, ol i dediketim laip bilong ol long em—ol i save em i Man Bilong Givim Laip long ol. (Aisaia 64:8) Olsem Jop na Moses bilong bipo, ol i bilip na i olsem ol i “lukim God.” (Jop 42:5; Hibru 11:27) Long ai bilong “tingting” bilong ol na long rot bilong stretpela save ol i bin kisim long God, ol inap lukim ol gutpela pasin bilong Jehova na ol i wok strong long bihainim ol dispela gutpela pasin long rot bilong bihainim laik bilong em.—Efesus 1:18; Rom 1:19, 20; 3 Jon 11.
18. Olsem Jisas i tok taim em i stori long 7-pela samting i as na man i ken amamas, husat i save kisim amamas tru tru long nau?
18 Yumi stori pinis olsem ol man i save ol i mas kisim ol samting bilong spirit, ol man i krai, ol man i daunim nem bilong ol yet, ol man i laikim tumas stretpela pasin, ol man bel bilong ol i klin, na ol man i mekim i dai kros na pait, ol dispela kain man i save kisim amamas tru tru long mekim wok bilong Jehova. Tasol kirap long bipo i kam inap nau, ol man i bin birua na mekim nogut tru long ol kain man olsem. Olsem wanem? Dispela i save daunim amamas bilong ol? Stadi i kamap bihain long dispela bai stori long dispela askim.
Sampela Askim
• Wanem amamas i kam long man i save olsem em i mas kisim ol samting bilong spirit?
• Wanem samting i mekim gut bel bilong man i krai?
• Yumi mekim wanem na yumi soim olsem yumi gat pasin isi?
• Bilong wanem yumi mas marimari long ol arapela, na bel i mas klin, na yumi mas mekim i dai ol kros na pait?
[Piksa long pes 10]
“Ol manmeri i save ol i mas kisim ol samting bilong spirit, ol i ken amamas”
[Ol Piksa long pes 10]
“Ol manmeri i laikim tumas long bihainim stretpela pasin, . . . ol i ken amamas”
[Piksa long pes 10]
“Ol manmeri i save marimari long ol arapela, em ol i ken amamas”