Husat i Gutpela Lida Tru Bilong Nau?

Long 1940, bikpela hevi bilong wok lida i kamap insait long gavman bilong Inglan. David Lloyd George, em i gat 77 krismas, em i harim ol tok resis i go i kam insait long palamen. Em i bin stap lida na helpim Inglan long winim Wol Woa 1, na em i bin mekim wok politik inap planti yia, olsem na em inap glasim gut wok bilong ol bikman insait long gavman. Long wanpela tok em i mekim long Palamen long Me 8, em i tok: “Kantri bilong yumi i redi long lusim olgeta samting sapos em i gat gutpela lida, na sapos Gavman i kamapim klia wanem samting tru em i laik mekim, na sapos kantri i bilip tru olsem ol man bilong bosim kantri ol i wok strong long mekim gut wok bilong ol.”

TOK bilong Lloyd George i kamapim klia tingting bilong ol man, olsem ol i laik bai ol lida bilong ol i gat save long mekim wok na ol i wok strong long stretim ol samting. Wanpela meri bilong mekim ol wok eleksen em i tok: “Taim ol man i vot long makim presiden, ol i vot long wanpela man ol i ting ol inap putim laip bilong ol, na i stap bilong ol bilong bihain, na ol pikinini bilong ol long han bilong em.” Em nau, bilong i stap gut long dispela wok, lida i gat bikpela hatwok tru. Bilong wanem?

Long wanem, ol hevi bilong graun i hatwok tru long stretim. Olsem: Wanem lida i gat gutpela tingting na save na bikpela strong tru inap long pinisim olgeta kain pasin raskol na ol woa bilong graun? Husat namel long ol lida bilong nau em i gat planti mani samting na bikpela pasin sori bambai em i ken inapim ol manmeri long olgeta samting ol i mas kisim, olsem kaikai, gutpela wara, na ol marasin na dokta samting? Husat i gat save na strongpela tingting bilong lukautim ol samting bilong graun na mekim i kamap gutpela gen? Husat i gat save na strong na em inap tru long mekim ol samting bambai olgeta manmeri i ken i stap longtaim tru na i stap amamas?

Man Bilong Graun i No Inap Mekim

Tru, sampela lida i bin mekim sampela gutpela wok bilong helpim ol man. Tasol ol inap i stap sampela yia tasol long wok bilong ol​—⁠na husat bai senisim ol? Wanpela lida i bin mekim gutpela wok tru, em King Solomon bilong Israel, em i bin tingim dispela askim na em i tok: “Mi save pinis, mi bai lusim ol dispela samting mi bin hatwok long kamapim, na man i senisim mi bai i kisim. . . . Na dispela man bai i senisim mi, mi no save bai em i saveman o longlong man. Tasol em bai i bosim olgeta samting mi bin hatwok long kamapim long gutpela save bilong mi. Dispela pasin tu i no gat as bilong en.”​—⁠Saveman 2:​18, 19.

Solomon i no save, man i senisim em bai skruim gutpela wok bilong em i go moa o em bai bagarapim ol gutpela wok em i bin mekim. Long tingting bilong Solomon, pasin bilong senisim ol olpela lida na putim nupela, dispela “i no gat as bilong en.” Sampela Baibel i tanim dispela hap tok olsem “i no inap kamapim gutpela samting,” o “i kranki,” o “em i pasin longlong.”

Sampela taim, ol man i save mekim pait bilong subim ol lida long lusim wok na bai nupela lida i senisim ol. Sampela lida i gat save long mekim gut wok, ol man i bin kilim ol i dai taim ol i mekim yet wok bilong ol. Abraham Lincoln, em wanpela presiden bilong Amerika ol man i litimapim nem bilong em, em i bin tok: “Ol i bin makim mi bilong mekim wanpela bikpela wok insait long gavman inap long sotpela taim, na nau, long ai bilong yupela, mi kisim namba bilong holim wanpela strong em liklik taim bai i pinis.” Na tru tumas, wok bilong em i stap sotpela taim tasol. Presiden Lincoln i bin wok strong long helpim ol man na em i gat laik long helpim ol moa, tasol em i bosim kantri inap 4-pela yia tasol. Long kirap bilong namba tu taim bilong em long stap presiden, wanpela man i kilim em i dai, long wanem, em i laik bai nupela lida i senisim em.

Na maski i gat sampela man i gutpela lida tru, ol i no inap save, i stap bilong ol long bihain bai i olsem wanem. Olsem na yu ting i gutpela sapos yu bilip olsem ol inap helpim yu tru na bai i stap bilong yu long bihain i gutpela? Baibel i tok: “Ol king na ol man bilong graun i no inap kisim bek yu. Olsem na nogut yu bilip long ol. Taim ol i dai ol i tanim i kamap graun gen. Na long dispela taim ol i no inap mekim olgeta samting ol i bin tok long mekim.”​—⁠Song 146:​3, 4.

Tru, ating sampela man bai i no wanbel long dispela tok olsem yumi no ken bilip long ol lida bilong graun. Tasol Baibel i no tok bai i no gat wanpela gutpela lida bilong i stap longtaim. Aisaia 32:1 i tok: “Harim. I gat wanpela king bai i kamap, na . . . bihainim gutpela na stretpela pasin tasol na bosim gut ol manmeri.” God Jehova, em Man Bilong Wokim yumi, em i putim pinis “wanpela king,” olsem Lida, na klostu nau bai em i bosim dispela graun wantaim olgeta samting bilong en. Dispela lida em i husat? Tok profet bilong Baibel i tokaut klia long em.

Em i Gat Save Inap Tru

Inap tu tausen yia i go pinis, ensel i tokim wanpela yangpela meri Juda, nem bilong em Maria: “Yu bai kisim bel na karim wanpela pikinini man. Na yu mas kolim nem bilong en Jisas. Em bai i stap bikman. Na bai ol i kolim em Pikinini bilong God Antap Tru. Na God bai i putim em i stap king olsem tumbuna bilong en Devit. Em bai i stap king bilong ol lain bilong Jekop oltaim. Na wok king bilong en bai i no inap pinis.” (Luk 1:​31-33) Tru tumas, Jisas bilong Nasaret em dispela King Baibel i tok profet long en.

Planti lotu ol i save wokim piksa bilong Jisas olsem wanpela bebi, o man i no bin kaikai gut na i bun nating, o man i save larim ol birua i mekim nogut long em na em i no sakim ol. Ol dispela kain piksa i no save kirapim ol man long bilip tru long Jisas olsem wanpela gutpela King. Tasol dispela Jisas Krais em Baibel i stori long en, em i go bikpela na i kamap strongpela man i save givim bel long mekim ol wok. Na em i gat ol narapela pasin i inapim em tru long i stap lida bilong ol man. (Luk 2:52) Orait nau yumi ken stori long sampela gutpela pasin tru bilong em.

Jisas i stap gut olgeta long God. Pasin na wokabaut bilong em i stret olgeta, olsem na long ai bilong ol man em inap tokim ol birua olsem sapos ol i ting em i bin mekim wanpela rong, orait ol i mas kamapim dispela rong. Ol i no inap. (Jon 8:46) Em i no man bilong tupela maus, olsem na ol tok em i skulim ol man long en i kirapim planti man i gat gutpela bel long kamap disaipel bilong em.​—⁠Jon 7:46; 8:​28-30; 12:⁠19.

Jisas i givim bel olgeta long mekim wok bilong God. Em i strong tumas long pinisim wok God i bin givim long em, olsem na i no gat wanpela birua​​—⁠wanpela man o wanpela spirit nogut⁠​—⁠inap pasim em. Na maski ol man i mekim nogut tru long em, dispela i no pretim em. (Luk 4:​28-30) Maski em i bin mekim bikpela wok na skin i les, o em i hangre, em i no bel hevi na lusim wok bilong God. (Jon 4:​5-16, 31-34) Na maski ol pren bilong em i lusim em, em i no surik long mekim ol wok bilong em.​—⁠Matyu 26:​55, 56; Jon 18:​3-9.

Jisas i tingim tumas ol man. Em i bin givim kaikai long ol man i hangre. (Jon 6:​10, 11) Em i bin mekim gut bel bilong ol man i bel hevi. (Luk 7:​11-15) Em i oraitim ol aipas na ol inap lukluk, na ol yaupas ol inap harim, na em i oraitim sik bilong ol man. (Matyu 12:22; Luk 8:​43-48; Jon 9:​1-6) Em i strongim bel bilong ol aposel em ol i save wok strong. (Jon, sapta 13-​17) Em i kamapim klia olsem em i “gutpela wasman” i save tingim tru ol sipsip bilong em.​—⁠Jon 10:​11-14.

Jisas i amamas long mekim wok. Em i bin wasim lek bilong ol aposel bilong skulim ol long wanpela bikpela samting. (Jon 13:​4-15) Graun i pas long lek bilong em tu taim em i wokabaut na autim gutnius bilong Kingdom long ol rot bilong Israel i gat planti das long en. (Luk 8:⁠1) Na taim em i tingting long malolo long “wanpela hap i no gat man,” em i kirap skulim bikpela lain manmeri ol i kam bilong harim sampela tok moa bilong em. (Mak 6:​30-34) Em nau, em i stap olsem gutpela piksa bilong olgeta Kristen long pasin bilong wok strong.​—⁠1 Jon 2:⁠6.

Jisas i pinisim wok God i bin givim long em na em i lusim dispela graun. Em i bin stap gut long wok bilong em, olsem na God Jehova i givim gutpela prais long em, olsem wok king na laip i stap oltaim oltaim long heven. Baibel i stori long Jisas em i bin kirap bek pinis, olsem: “Krais i kirap bek pinis long matmat, olsem na bai em i no ken i dai moa. Dai i no gat strong moa bilong daunim em.” (Rom 6:⁠9) Yu ken bilip tru olsem em i nambawan Lida tru bilong ol man, i no gat narapela lida olsem. Taim Krais Jisas i kirap bosim olgeta samting long graun, bai i no gat wok long givim namba na strong long narapela man, na i no gat wok long putim narapela lida olsem senis bilong em. Ol i no inap rausim em o kilim em i dai taim em i holim yet dispela wok, na i no gat wanpela senis bai kamap na bagarapim ol gutpela wok em i bin mekim. Tasol yumi laik save, em bai mekim wanem samting tru bilong helpim ol man?

Samting Nupela Lida Bai Mekim

Song 72 i gat sampela tok profet long olsem wanem dispela nambawan gutpela King bilong i stap oltaim oltaim em bai mekim wok bilong em. Ves 7 na 8 i tok: “Taim em i stap yet ol manmeri i ken bihainim stretpela pasin tasol. Taim mun i lait yet, planti gutpela samting i ken kamap. Em bai i stap king na bosim olgeta manmeri long hap bilong solwara i stap klostu na i go inap long solwara i stap longwe. Na mak bilong graun bilong en i ken stat long wara Yufretis na i go inap long olgeta hap bilong graun.” Taim em i bosim graun, ol manmeri bai i gat bel isi na gutpela sindaun inap oltaim oltaim. Em bai bagarapim olgeta samting bilong pait na rausim long bel bilong man olgeta laik bilong mekim pait. Ol man nau ol i wok long bagarapim ol narapela olsem laion, o ol i mekim pasin long ol man olsem ol animal bea i gat bikpela kros, ol bai senisim tru pasin bilong ol. (Aisaia 11:​1-9) Bel isi na gutaim bai stap long olgeta hap.

Song 72 i tok moa long ves 12 i go 14 olsem: “Em i save helpim ol rabisman i singaut long em. Na ol manmeri i sot long ol samting na i no gat helpim, orait em yet bai i helpim ol. Em i save sori long ol manmeri i no gat strong na i stap rabis. . . . Sapos ol man nogut i laik daunim ol na bagarapim ol, em i save kisim bek ol. Em i save laikim ol tumas na em i mekim olsem.” Ol man i stap tarangu na ol rabisman na man i no gat helpim, ol bai insait long wanpela bikpela famili i stap amamas, na ol bai stap wanbel aninit long King Jisas Krais. Pen na bel hevi i no ken painim ol moa​—⁠ol bai stap amamas tasol.​—⁠Aisaia 35:⁠10.

Ves 16 i tok promis olsem: “Planti rais na wit samting i ken kamap long ol gaden bilong ol manmeri.” Long nau planti milion manmeri ol i stap hangre. Pasin politik na mangal long mani, dispela i mekim na ol i no save tilim kaikai inap long ol lain i hangre, na ol i no tilim stret, olsem na planti tausen manmeri​—⁠na moa yet ol pikinini⁠—ol i save dai long hangre. Tasol taim Jisas Krais i bosim graun, dispela hevi bai pinis. Graun bai kamapim planti gutpela kaikai. Olgeta man bai i gat kaikai inap tru long ol.

Olsem wanem long yu? Yu laik kisim ol dispela gutpela samting bai kamap long wok bilong dispela gutpela Lida? Sapos olsem, mipela laik kirapim yu long kisim save long dispela Lida liklik taim bai bosim olgeta samting long graun. Ol Witnes Bilong Jehova bai amamas long helpim yu long kisim dispela save. Bai yu no ken bel hevi na ting dispela i no inap kamap, long wanem, God Jehova yet i tok long Pikinini bilong em: “Mi makim pinis dispela man bilong i stap king. Mi yet mi putim em i stap long Saion, dispela maunten bilong mi yet.”​—⁠Song 2:⁠6.

[Blok long pes 5]

WANTU NAMBA BILONG OL I TEKEWE

Sapos wanpela lida i kamapim bel isi na gutpela sindaun liklik long ol manmeri bilong kantri, ol bai rispek long em na sambai long em. Tasol sapos i gat wanpela as na ol man i no bilip moa long em, ating i no longtaim na namba bilong em bai tekewe na narapela lida bai senisim em. Orait nau bai yumi kamapim sampela samting i mekim na wantu ol strongpela lida i mas lusim wok bilong ol.

No gat gutpela sindaun. Klostu long yia 1800, planti man bilong Frans i mas tromoi bikpela takis tru tasol ol i sot long kaikai. Dispela hevi na sampela hevi moa i mekim na Bikpela Pait Bilong Frans i kamap, na long 1793 ol i kilim i dai King Louis Namba 16.

Woa. Wol Woa 1 i pinisim wok lida bilong sampela strongpela king tru bilong graun. Olsem: Long 1917, dispela woa i mekim na ol i sot tru long kaikai long St. Petersburg, Rasia, na dispela i mekim na bikpela pait i kamap insait long kantri. Ol i rausim King Nicholas Namba 2 na ol Komiunis i kirap bosim kantri. Long Novemba 1918, Jemani i laik sekan na pinisim pait, tasol Frans, Inglan, Rasia na Amerika ol i laik pait yet inap long taim Jemani i senisim gavman. Olsem na Empera Wilhelm Namba 2 bilong Jemani i mas lusim kantri na go sindaun long Netelan.

Ol i laikim ol narapela narapela kain gavman. Long 1989, ol i rausim gavman Komiunis long Rasia. Ol gavman i gat bikpela strong tru olsem maunten ston, ol i pundaun taim lain bilong ol i sakim pasin Komiunis na kamapim ol narapela kain gavman.

[Ol Piksa long pes 7]

Jisas i bin givim kaikai long ol man i hangre, na oraitim sik bilong ol, na em i stap olsem gutpela piksa ol Kristen i ken bihainim

[Piksa Kredit Lain long pes 4]

Lloyd George: Photo by Kurt Hutton/Picture Post/Getty Images