“Go Mekim Olgeta Lain Manmeri i Kamap Disaipel”

“God i givim mi bikpela namba na strong bilong bosim olgeta samting long heven na long graun. Olsem na yupela i mas i go mekim olgeta lain manmeri i kamap disaipel bilong mi.”​—⁠MATYU 28:​18, 19.

1, 2. (a) Jisas i givim wanem wok long lain bilong em? (b) Bai yumi skelim wanem ol askim i stret long tok Jisas i givim?

EM YIA 33 C.E., taim bilong kol i pinis na ol disaipel bilong Jisas i bung long wanpela maunten long Galili. Bikpela bilong ol i kirap bek pinis na klostu nau bai em i go long heven, tasol pastaim em i laik tokim ol long wanpela bikpela samting. Jisas i laik givim wanpela wok long ol. Em wanem wok? Ol disaipel i ting wanem long en? Na olsem wanem dispela wok i bikpela samting long yumi long nau?

² Tok Jisas i mekim i stap long Matyu 28:​18-20: “God i givim mi bikpela namba na strong bilong bosim olgeta samting long heven na long graun. Olsem na yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela. Harim. Mi save stap wantaim yupela olgeta de, i go inap long dispela taim i pinis.” Jisas i tok long “bikpela namba na strong bilong bosim olgeta samting,” “olgeta lain,” “olgeta tok,” na “olgeta de.” Tok Jisas i givim​—⁠em dispela fopela bikpela tok i insait long en​—⁠ol i kamapim sampela bikpela askim yumi ken sotim olsem: bilong wanem? long wanem hap? wanem tok? na wanem taim? Bai yumi skelim ol askim wan wan.a

“God i Givim Mi Bikpela Namba na Strong Bilong Bosim Olgeta Samting”

 3. Bilong wanem yumi mas bihainim tok bilong Jisas long kamapim ol disaipel?

³ Namba wan, bilong wanem yumi mas bihainim tok long kamapim ol disaipel? Jisas i tok: “God i givim mi bikpela namba na strong bilong bosim olgeta samting long heven na long graun. Olsem na yupela i mas i go mekim olgeta lain manmeri i kamap disaipel bilong mi.” Dispela tok “olsem na” i soim klia wanpela bikpela as na yumi mas bihainim dispela tok. Yumi mas bihainim, long wanem, tok i kam long Jisas, na em i gat “namba na strong bilong bosim olgeta samting.” Namba na strong bilong em i bikpela olsem wanem?

 4. (a) Namba bilong Jisas i bikpela olsem wanem? (b) Namba Jisas i holim i mas kirapim yumi long ting wanem long tok bilong kamapim ol disaipel?

⁴ Jisas i gat namba long bosim kongrigesen bilong em, na kirap long 1914 i kam, em i gat namba long bosim Kingdom Bilong God i kamap nupela. (Kolosi 1:13; KTH 11:15) Em i nambawan ensel, olsem na em i bosim lain ami bilong planti handet milion ensel i stap long heven. (1 Tesalonaika 4:16; 1 Pita 3:22; KTH 19:​14-16) Papa bilong em i makim em long pinisim “olgeta gavman na olgeta strongpela spirit” i birua long ol stretpela stiatok. (1 Korin 15:​24-26; Efesus 1:​20-23) Namba Jisas i holim i no long bosim ol man i stap laip tasol. Em i “man bilong harim kot bilong ol man i stap laip na bilong ol man i dai pinis” na God i givim strong long em long kirapim bek ol man i dai pinis. (Aposel 10:42; Jon 5:​26-28) Em nau, yumi mas tingim tok bilong Man i kisim bikpela namba olsem, em i nambawan bikpela samting. Olsem na yumi soim rispek na yumi amamas long bihainim tok bilong Krais long “i go mekim olgeta lain manmeri i kamap disaipel.”

 5. (a) Pita i bihainim tok bilong Jisas olsem wanem? (b) Pita i bihainim tok bilong Jisas na dispela i kamapim wanem blesing?

⁵ Long kirap bilong wok bilong em, Jisas i skulim ol disaipel long wanpela rot i gutpela tru bilong soim olsem sapos ol i luksave long namba bilong em na bihainim tok bilong em dispela bai kamapim ol blesing. Wanpela taim em i tokim Pita, man bilong kisim pis: “Pul i go namel long wara, na tromoi ol umben i go daun bilong kisim pis.” Pita i gat strongpela tingting olsem i no gat pis, olsem na em i tokim Jisas: “Bikman, long nait mipela i wok hat tru i go inap tulait, na mipela i no kisim wanpela pis.” Tasol long pasin daun Pita i tok moa: “Tasol bai mi bihainim tok bilong yu na tromoi ol umben.” Bihain long Pita i bihainim tok bilong Krais em i kisim “bikpela lain pis.” Pita i kirap nogut tru, em i “brukim skru klostu long lek bilong Jisas na i tok: ‘Bikpela, yu lusim mi na yu go. Mi man bilong sin.’ ” Tasol Jisas i tok, “Yu no ken pret. Nau yu wok long kisim pis, tasol bihain bai yu wok long kisim ol manmeri i kam long mi.” (Luk 5:​1-10; Matyu 4:18) Dispela stori i givim wanem save long yumi?

 6. (a) Stori bilong kisim pis i kamapim wanem pasin bilong bihainim tok em Jisas i laikim? (b) Olsem wanem yumi inap bihainim pasin bilong Jisas?

⁶ Jisas i givim wok long Pita, Andru, na ol arapela aposel long “kisim ol manmeri” olsem man i kisim pis, em i no mekim dispela tok paslain long ol i bin kisim planti pis tru, nogat, em i bin mekim bihain long ol i bin kisim pis. (Mak 1:​16, 17) Jisas i no ting ol man i mas bihainim nating tok bilong em. Em i bin helpim Pita na Andru long luksave klia long as na ol i mas bihainim tok bilong em. Ol i bin bihainim tok na tromoi umben olsem Jisas i tok na gutpela samting tru i kamap, olsem tasol taim ol i bihainim tok bilong Jisas long ‘kisim ol man,’ dispela tu bai kamapim ol nambawan gutpela samting. Ol i bilip tru long tok bilong Jisas, olsem na ol i bihainim tok. Pinis bilong stori i olsem: “Orait ol i pul i go sua, na ol i lusim olgeta samting bilong ol, na ol i bihainim Jisas.” (Luk 5:11) Long nau, taim yumi kirapim ol man long insait long wok bilong kamapim ol disaipel, yumi bihainim pasin bilong Jisas. Yumi no ting ol man i mas bihainim nating tok bilong yumi, nogat; yumi kamapim ol tok i soim klia bilong wanem ol i mas bihainim dispela tok bilong Krais.

As Yumi Mekim Wok na Stretpela Astingting

7, 8. (a) Wanem sampela arapela tok bilong Baibel i olsem as na yumi autim tok bilong Kingdom na kamapim ol disaipel? (b) Wanem skripsa i kirapim yu long mekim yet wok autim tok? (Lukim sta.)

⁷ Yumi save long namba Krais i holim, olsem na yumi autim tok bilong Kingdom na kamapim ol disaipel. Wanem sampela arapela tok bilong Baibel i olsem as na yumi mekim dispela wok, em yumi ken kamapim long ol man yumi laik kirapim ol long mekim ol gutpela wok? Tingim tok sampela strongpela Witnes bilong ol narapela narapela kantri i mekim, na tingim olsem wanem ol skripsa ol i kamapim i helpim tok bilong ol.

⁸ Roy, em i baptais long 1951: “Taim mi bin dediket long Jehova, mi bin promis long mekim wok bilong em inap oltaim oltaim. Mi laik truim tok bilong mi.” (Song 50:14; Matyu 5:37) Heather, em i baptais long 1962: “Taim mi tingim ol samting Jehova i bin mekim bilong helpim mi, mi laik kamapim bikpela tenkyu bilong mi long rot bilong mekim gut wok bilong em.” (Song 9:​1, 9-11; Kolosi 3:15) Hannelore, em i baptais long 1954: “Long olgeta wan wan taim mipela mekim wok autim tok, ol ensel i helpim mipela​—⁠em i wanpela spesel samting tru!” (Aposel 10:​30-33; KTH 14:​6, 7) Honor, em i baptais long 1969: “Long taim Jehova i kotim ol man, mi no laik bai wanpela long hap bilong mi i ken sutim tok long Jehova na ol Witnes bilong em olsem ol i no mekim gut wok, ol i no ken tok, ‘Mi no bin harim wanpela i tok lukaut!’ ” (Esekiel 2:5; 3:​17-19; Rom 10:​16, 18) Claudio, em i baptais long 1974: “Taim yumi autim tok, yumi stap ‘long ai bilong God’ na ‘wanbel wantaim Krais.’ Tingim! Taim yumi autim tok yumi poromanim ol nambawan gutpela Pren bilong yumi.”​—⁠2 Korin 2:17.b

 9. (a) Olsem wanem stori bilong Pita na ol arapela aposel long kisim pis i soim olsem stretpela astingting i mas kirapim man long bihainim tok bilong Krais? (b) Wanem samting i mas kirapim man long bihainim God na Krais long nau? Bilong wanem i olsem?

⁹ Na tu, stori bilong kisim pis i soim olsem stretpela astingting i mas kirapim man long bihainim tok bilong Krais; em pasin laikim. Taim Pita i tok, “Lusim mi na yu go. Mi man bilong sin,” Jisas i no lusim em, na em i no tok Pita i mekim sin. (Luk 5:⁠8) Jisas i no stretim Pita taim em i askim Jisas long lusim em. Long gutpela pasin Jisas i tok: “No ken pret.” I no stret sapos pret em i astingting bilong man i bihainim tok bilong Krais. Jisas i tokim Pita olsem em yet wantaim ol poroman bilong em ol bai helpim wok bilong kisim ol manmeri olsem ol i kisim pis. Na long nau tu yumi no pretim man o mekim narapela tok i bagarapim bel, olsem semim o kotim em, bilong fosim em long bihainim tok bilong Krais. Man i givim bel long bihainim tok, long wanem, em i laikim tru God na Krais, dispela tasol i mekim Jehova i belgut.​—⁠Matyu 22:⁠37.

“Mekim Olgeta Lain Manmeri i Kamap Disaipel”

10. (a) Wanem tok Jisas i givim long ol disaipel i makim olsem ol i gat wanpela bikpela wok long mekim? (b) Ol disaipel i gat wanem tingting long wok Jisas i givim ol?

¹⁰ Namba tu askim long dispela tok Krais i givim em i olsem: Long wanem hap stret ol i mas mekim dispela wok bilong kamapim ol disaipel? Jisas i tokim ol lain bilong em: “Mekim olgeta lain manmeri i kamap disaipel.” Paslain long taim bilong Jisas, i no gat tok long ol man bilong ol arapela kantri i kam long Israel bilong lotuim Jehova. (1 King 8:​41-43) Planti manmeri Jisas i autim tok long ol i bilong lain Juda, tasol nau em i tokim lain bilong em long go long ol manmeri bilong olgeta lain. Pastaim hap bilong ol disaipel long kisim pis, o autim tok long en i olsem wanpela liklik wara​—⁠ol Juda bilong skin​—⁠tasol klostu nau bai ol i kisim pis long “solwara,” em ol manmeri bilong olgeta lain. Em i wanpela bikpela wok bilong ol disaipel long mekim, tasol ol i amamas long bihainim tok bilong Jisas. Klostu long 30 yia bihain long dai bilong Jisas, aposel Pol inap tok olsem ol i autim gutnius pinis long ol man bilong Juda na long “olgeta manmeri i stap long graun.”​—⁠Kolosi 1:⁠23.

11. ‘Hap bilong kisim pis’ i go bikpela olsem wanem kirap long 1900 na i kam?

¹¹ Long taim bilong yumi tu, yumi lukim hap bilong yumi long autim tok long en i go bikpela moa. Long yia 1900, ‘hap bilong kisim pis’ em long sampela kantri tasol. Tasol ol lain bilong Krais i stap long dispela taim ol i bihainim pasin bilong ol Kristen long taim bilong ol aposel na ol i wok strong long surikim hap ol i autim tok long en. (Rom 15:20) Long 1930 samting, ol i wok long kamapim ol disaipel long 100 kantri samting. Long nau hap bilong yumi long ‘kisim pis’ em long 235 kantri.​—⁠Mak 13:⁠10.

“Bilong Olgeta Tok Ples”

12. Tok profet bilong Sekaraia 8:23 i makim wanem bikpela wok?

¹² Wok bilong kamapim disaipel long olgeta hap bilong graun em i bikpela wok, ol i mas autim tok long bikpela eria tru na ol i mas mekim wok long kain kain tok ples. Long rot bilong profet Sekaraia, Jehova i tok profet olsem: “Long dispela taim 10-pela man bilong ol longwe ples [“bilong olgeta tok ples,” NW ] bai i kam holim wanpela Juda man na bai ol i tok olsem, ‘Mipela i harim olsem God i stap wantaim yupela Juda. Olsem na mipela i laik kamap wanlain wantaim yupela.’ ” (Sekaraia 8:23) Long bikpela truim bilong dispela tok profet, dispela “Juda man” i makim lain remnan bilong ol Kristen God i makim, na “10-pela man” i makim “planti manmeri tru.”c (KTH 7:​9, 10; Galesia 6:16) Dispela planti manmeri tru, olsem bikpela lain bilong ol disaipel bilong Krais ol bai i stap long planti kantri, na olsem Sekaraia i tok, ol i bilong planti tok ples. Olsem wanem? Ol samting i painim lain bilong God long nau i soim olsem dispela samting i kamap? Yes, em i kamap.

13. (a) Wanem senis long samting bilong tok ples i painim lain bilong God long taim bilong yumi? (b) Olsem wanem wokboi i gat gutpela tingting i tingim planti man moa em ol i laikim ol kaikai bilong spirit long kain kain tok ples? (Lukim blok “Ol Buk na Nius Bilong Ol Aipas.”)

¹³ Long olgeta 5-pela 5-pela Witnes Bilong Jehova long 1950, 3-pela i mekim tok Inglis olsem tok ples bilong ol. Long 1980 dispela namba i senis na 2-pela bilong olgeta 5-pela 5-pela Witnes i mekim tok Inglis, na long nau long olgeta 5-pela 5-pela Witnes, tok Inglis em i tok ples bilong wanpela tasol bilong ol. Wokboi i gat gutpela tingting i mekim wanem long dispela senis i kamap? Ol i kamapim ol kaikai bilong spirit long planti tok ples moa. (Matyu 24:45) Olsem: Long 1950 ol i wokim ol buk na nius bilong yumi long 90 tok ples, tasol long nau dispela namba i go bikpela inap long 400. Olsem wanem? Wok bilong tingim ol man bilong kain kain tok ples i kamapim gutpela samting? Yes! I gat samting olsem 5,000 pipel bilong “olgeta tok ples” ol i kamap disaipel bilong Krais long olgeta wan wan wik bilong yia! (KTH 7:⁠9) Na namba i go bikpela yet. Long sampela kantri “umben” i wok long kisim planti pis yet!​—⁠Luk 5:6; Jon 21:⁠6.

Wok Autim Tok i Kamapim Amamas—⁠Yu Inap Insait Long En?

14. Olsem wanem yumi ken helpim ol man long teritori bilong yumi em ol i mekim narapela tok ples? (Lukim blok “Tok Ples Bilong Ol Yaupas na Wok Bilong Kamapim Disaipel.”)

¹⁴ Long planti ples i gat ol man bilong ol narapela kantri i kam i stap, olsem na i gat wok long kamapim ol disaipel bilong “olgeta tok ples” long ples yet. (KTH 14:⁠6) Yumi ken mekim wanem bilong helpim ol man i stap long teritori bilong yumi na tok ples bilong ol i no wankain olsem tok ples bilong yumi? (1 Timoti 2:⁠4) I olsem samting yumi yusim i mas stret long pis yumi laik kisim. Soim ol man ol buk na nius long tok ples bilong ol yet. Sapos inap, stretim rot long wanpela Witnes husat i mekim tok ples bilong ol long i go lukim ol. (Aposel 22:⁠2) Long nau em i isi moa long stretim samting olsem, long wanem, planti Witnes i lainim pinis wanpela tok ples i no bilong ol yet na bai ol inap helpim ol man bilong narapela kantri i kamap disaipel bilong Krais. Ol ripot i soim kain wok olsem bilong helpim ol man i kamapim amamas.

15, 16. (a) Wanem ol ekspiriens i soim olsem wok bilong helpim ol lain bilong narapela tok ples i kamapim gutpela samting? (b) Yumi laik tingim wanem ol askim long wok bilong autim tok long ol man bilong narapela tok ples?

¹⁵ Tingim tupela stori bilong Netelan we ol i autim tok bilong Kingdom long 34 tok ples. Tupela marit Witnes i bin volantia long i go na kamapim ol disaipel namel long ol man i mekim tok ples Polan. Planti i laik harim tok, olsem na man i pilim olsem em i mas lusim sampela wok skin na bai em i gat wanpela de moa long wik we em inap stadi long Baibel wantaim ol man i laik kisim save. I no longtaim na tupela marit i lukautim 20 Baibel stadi long olgeta wik. Ol i tok: “Wok autim tok bilong mipela i mekim mipela i amamas tru.” Ol man bilong kamapim ol disaipel i amamas moa yet taim ol lain i harim tok i tru bilong Baibel long tok ples bilong ol yet i soim olsem ol i tenkyu long dispela. Olsem: Long wanpela miting ol i mekim long tok ples Vietnam, wanpela lapun man i sanap na askim sapos i orait long em i mekim sampela tok. Em i laik krai taim em i tokim ol Witnes: “Tenkyu long hatwok yupela i mekim bilong lainim strongpela tok ples bilong mi. Mi amamas tru long kisim save long ol gutpela samting tru bilong Baibel long taim mi lapun pinis.”

¹⁶ Olsem na yumi no kirap nogut long ol man i wok wantaim ol kongrigesen bilong narapela tok ples ol i pilim olsem ol i kisim planti gutpela samting. Tupela marit bilong Briten i tok: “Wok autim tok long teritori bilong ol man bilong narapela tok ples i gat gutpela amamas tru long en winim planti narapela wok bilong Kingdom mipela i bin mekim insait long 40 yia i go pinis.” Yu inap stretim sindaun bilong yu na bai yu inap insait long dispela wok autim tok i save kirapim tru tingting? Sapos yu skul yet, yu inap lainim wanpela tok ples bilong redi long mekim kain wok olsem? Dispela inap opim rot long yu long kisim amamas na planti gutpela blesing. (Sindaun 10:22) Yu ken toktok wantaim papamama bilong yu long dispela samting.

Mekim Long Kain Kain Rot

17. Yumi ken mekim wanem bilong bungim planti manmeri moa long teritori bilong kongrigesen bilong yumi yet?

¹⁷ Tru, planti bilong yumi i no gat rot long tromoi “umben” bilong yumi long hap we ol man i mekim narapela tok ples. Tasol ating yumi inap bungim planti man moa long teritori bilong kongrigesen bilong yumi yet. Bai yumi mekim olsem wanem? Yumi no gat wok long senisim tok yumi autim, tasol yumi ken senisim rot yumi save bihainim. Long planti hap, planti man moa i wok long sindaun long ol haus i gat planti sekiuriti. Na planti ol arapela i no stap long taim yumi autim tok long ol haus. Olsem na ating yumi mas tromoi “umben” bilong yumi long narapela narapela taim na long ol narapela narapela hap. Long dispela rot yumi bihainim Jisas. Em i bin painim rot long toktok wantaim ol manmeri i stap long kain kain hap.​—⁠Matyu 9:9; Luk 19:​1-10; Jon 4:​6-15.

18. Olsem wanem wok autim tok long kain kain hap i karim gutpela kaikai? (Lukim blok “Helpim Ol Bisnis Lain Long Kamap Disaipel.”)

¹⁸ Long sampela hap bilong graun, wok bilong autim tok long wanem wanem hap ol manmeri i stap long en em i bikpela samting long wok bilong kamapim ol disaipel. Ol man i save gut long wok bilong kamapim ol disaipel ol i bin wok strong moa long autim tok long kain kain hap. Ol pablisa i save autim tok long ol haus, tasol long nau ol i autim tok tu long ol ples balus, ol ofis, long stua, ples bilong putim ka, bas stop, long rot, ol pak, long nambis, na long sampela narapela hap. Planti bilong ol nupela baptais Witnes long Hawaii i bin harim tok i tru long kain hap olsem. Taim yumi autim tok long kain kain rot, dispela i helpim yumi long inapim tru wok Jisas i givim yumi long kamapim ol disaipel.​—⁠1 Korin 9:​22, 23.

19. Long stadi i kamap bihain bai yumi stori long wanem tupela samting bilong wok Jisas i givim long yumi?

¹⁹ Tok bilong Jisas long kamapim ol disaipel i karamapim ol askim olsem bilong wanem na long wanem hap yumi mas mekim dispela wok, tasol tu, em i helpim yumi long save long yumi mas autim wanem tok na mekim wok i go inap long wanem taim. Stadi i kamap bihain bai stori long dispela tupela samting bilong wok Jisas i givim long yumi.

[Ol Futnot]

“Lainim Ol Long Bihainim Olgeta Tok Mi Bin Givim Long Yupela”

“Go mekim olgeta lain manmeri i kamap disaipel bilong mi . . . lainim ol long bihainim olgeta tok mi bin givim long yupela.”​—⁠MATYU 28:​19, 20.

 1. Disaipel Filip na man Itiopia i toktok long wanem samting?

MAN Itiopia i bihainim longpela rot na i kam long Jerusalem. Long dispela hap em i lotuim God em i laikim tru, em Jehova. Na tu, em i laikim tumas Tok Bilong God. Taim em i stap long karis bilong em na i laik go bek long ples, em i wok long ritim buk bilong profet Aisaia, na long dispela taim Filip, wanpela disaipel bilong Krais, i bungim em. Filip i askim man Itiopia: “Yu save long as bilong dispela tok yu ritim?” Na man i tok: “Sapos i no gat man i tokim mi long as bilong dispela tok, orait bai mi inap save olsem wanem?” Filip i bin helpim dispela sumatin bilong Baibel long kamap wanpela disaipel bilong Krais.​—⁠Aposel 8:​26-39.

 2. (a) Olsem wanem bekim bilong man Itiopia em i bikpela samting? (b) Yumi bai skelim wanem tupela askim i stret long tok bilong Krais long kamapim ol disaipel?

² Bekim bilong man Itiopia em i samting bilong tingim. Em i tok: ‘Sapos i no gat man i tokim mi, bai mi inap save olsem wanem?’ Yes, wanpela i mas skulim em. Dispela i kamapim klia olsem wanem wanpela tok Jisas i givim long taim em i stori long wok bilong kamapim ol disaipel em i bikpela samting tru. Em wanem tok? Bilong painim bekim, yumi laik skelim yet tok bilong Jisas i stap long Matyu sapta 28. Stadi paslain long dispela i mekim bikpela stori long tupela askim olsem bilong wanem? na long wanem hap? Nau bai yumi skelim tupela narapela askim i stret long tok bilong Krais long kamapim ol disaipel​—⁠wanem tok? na wanem taim?

“Lainim Ol Long Bihainim Olgeta Tok Mi Givim”

 3. (a) Man i kamap wanpela disaipel bilong Jisas Krais olsem wanem? (b) Wok bilong kamapim ol disaipel i makim tu wok bilong lainim ol long wanem samting?

³ Wanem tok em yumi laik skulim ol narapela long en bilong helpim ol long kamap disaipel bilong Krais? Jisas i tokim lain bilong em: “Go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela.” (Matyu 28:​19, 20) Olsem na yumi mas skulim ol man long ol tok Krais i givim.a Tasol wanem samting tru bai helpim man i lainim ol tok bilong Jisas long kamap wanpela disaipel, na long stap olsem inap oltaim? Tok bilong Jisas i kamapim klia wanpela bikpela samting. Tingim, em i no bin tok: ‘Lainim ol long olgeta tok mi givim.’ Nogat. Jisas i bin tok: “Lainim ol long bihainim olgeta tok mi givim.” (Matyu 19:17) Tok hia i makim wanem samting?

 4. (a) Bilong bihainim wanpela tok, man i mas mekim wanem? (b) Stori long olsem wanem yumi lainim man long bihainim tok bilong Krais.

⁴ Bilong bihainim wanpela tok i olsem man i mas “stretim wokabaut bilong em” na bai em inap mekim samting tok i makim. Olsem na bai yumi mekim wanem bilong skulim man long bihainim ol tok Krais i givim? Tingim olsem wanem wanpela tisa bilong lainim man long draiv i skulim ol stiuden bilong em long bihainim ol lo bilong rot. Ating tisa i skulim ol stiuden long ol lo bilong draivim ka long taim ol i stap long klasrum. Tasol bilong skulim ol stiuden bilong em long bihainim ol dispela lo, em i mas givim skul long ol long taim ol yet i draiv na traim mekim ol samting ol i bin lainim. Olsem tasol taim yumi stadi wantaim ol manmeri long Baibel, yumi skulim ol long ol samting Krais i tokim yumi long mekim. Tasol yumi gat wok tu long soim rot long ol long taim ol i traim long bihainim ol dispela tok long wokabaut bilong ol na long wok autim tok. (Jon 14:15; 1 Jon 2:⁠3) Olsem na bilong inapim ol samting Krais i tokim yumi long mekim yumi mas stap olsem tisa na man bilong soim rot. Taim yumi mekim olsem, yumi bihainim pasin bilong Jisas na Jehova yet.​—⁠Song 48:14; KTH 7:⁠17.

 5. Ating i gat wanem as na man i stadi long Baibel i surik long bihainim tok bilong Krais long kamapim ol disaipel?

⁵ Wok bilong skulim ol narapela long bihainim tok bilong Jisas i makim tu wok bilong helpim ol long bihainim tok long kamapim ol disaipel. Ating sampela em yumi stadi wantaim ol long Baibel bai pret long mekim. Maski sapos ol bin mekim planti wok long sampela lotu bilong Kristendom, no ken ting ol tisa bilong lotu bilong ol bilong bipo i bin lainim ol long kamapim ol disaipel. Sampela hetman bilong lotu i tokaut olsem ol lotu bilong Kristendom i pundaun tru long wok bilong lainim ol sipsip bilong ol long autim tok. Saveman bilong Baibel, em John R. W. Stott, i stori long tok bilong Jisas long go na helpim olgeta kain man long kamap disaipel, em i tok: “Yumi no mekim samting dispela tok i makim, na dispela em i nambawan bikpela hevi bilong ol evanjelikal Kristen long wok evanjelis long nau.” Em i tok moa: “Yumi save stap longwe long man na autim tok long em. Sampela taim yumi luk olsem ol man i sanap long nambis na singaut bikmaus long helpim man i laik dring wara na dai. Yumi no daiv i go insait long wara bilong kisim bek ol. Yumi pret, nogut wara i mekim na yumi wet.”

 6. (a) Olsem wanem yumi ken bihainim pasin bilong Filip long taim yumi wok long helpim wanpela Baibel sumatin? (b) Olsem wanem yumi ken kamapim olsem yumi tingim sumatin long taim em i kirap long mekim wok autim tok?

⁶ Sapos long bipo wanpela em yumi stadi wantaim em long Baibel i bin insait long wanpela lotu we ol lain bilong en i pret long autim tok, ating bai em i hatwok long daunim dispela pret na bihainim tok bilong Krais long kamapim ol disaipel. Em i mas i gat helpim. Olsem na yumi no ken les kwik taim yumi skulim na soim rot long em long pasin i helpim save bilong em i go bikpela na i kirapim em long mekim wok, kain olsem tok bilong Filip i bin givim save long man Itiopia na i kirapim em long kisim baptais. (Jon 16:13; Aposel 8:​35-38) Na tu, yumi laik skulim ol sumatin bilong Baibel long bihainim tok long kamapim ol disaipel na dispela i kirapim yumi long stap wantaim ol na soim rot long ol long namba wan taim ol i autim tok long Kingdom.​—⁠Saveman 4:​9, 10; Luk 6:⁠40.

“Olgeta Tok”

 7. Taim yumi skulim ol narapela long “bihainim olgeta tok” dispela i makim olsem yumi lainim ol long wanem tupela lo?

⁷ Yumi no save skulim ol nupela disaipel long kamapim ol disaipel na em tasol. Jisas i bin tokim yumi long lainim ol man long “bihainim olgeta” tok bilong em. Dispela i makim tu tupela nambawan bikpela lo​—⁠long laikim tru God na long laikim tru ol man. (Matyu 22:​37-39) Olsem wanem bai yu skulim nupela disaipel long bihainim dispela tupela lo?

 8. Mekim tok piksa long olsem wanem tisa i ken skulim nupela disaipel long kamapim pasin laikim.

⁸ Tingim tok piksa bilong stiuden i lain long draiv. Taim em i draiv raun long rot na tisa i stap wantaim em, em i lain, tok bilong tisa i lainim em, na tu em i lukluk long ol narapela draiva na dispela i lainim em. Ating tisa i tokim stiuden long lukim gutpela pasin wanpela draiva i mekim taim em i givim spes long narapela draiva; o draiva i tingim ol narapela na daunim hetlait bilong ka; o draiva husat i helpim narapela em ka bilong em i bagarap long rot. Kain pasin olsem i lainim stiuden long ol gutpela samting em i ken mekim long taim em i draiv. Olsem tasol wanpela nupela disaipel i stap long rot i go long laip, em i kisim save long tisa bilong em na long gutpela pasin em i lukim long kongrigesen.​—⁠Matyu 7:​13, 14.

 9. Olsem wanem wanpela nupela disaipel i lain long man i mas mekim wanem bilong bihainim tok long kamapim pasin laikim?

⁹ Olsem: Ating Baibel sumatin i lukim wanpela papa o mama wanpis i taitim bun tru long kam long Haus Kingdom wantaim ol liklik pikinini bilong em. O wanpela meri i kam long olgeta miting maski em i hatwok long daunim bel hevi, wanpela lapun wanpis husat i save strong long kalap long bas na bihain wokabaut i go long Haus Kingdom maski skin i no strong, o wanpela yangpela i insait long wok bilong klinim Haus Kingdom. Ating Baibel sumatin i lukim wanpela elda long kongrigesen husat i save go pas long autim tok maski em i gat planti wok insait long kongrigesen. Ating em i bungim wanpela Witnes i gat sampela bagarap long skin na i no inap lusim haus, tasol Witnes hia i save strongim ol lain i kam lukim em long samting bilong spirit. O sumatin i lukim tupela marit i mekim bikpela wok long stretim ol samting na bai ol inap lukautim lapun papamama bilong ol. Em nau, nupela disaipel i lukim ol dispela pasin ol Kristen i kamapim, olsem pasin bilong mekim gut long ol arapela na helpim ol, na long dispela rot em i lain long man i mas mekim wanem bilong bihainim tru tok bilong Krais long laikim tru God na ol arapela, na moa yet ol wanbilip. (Sindaun 24:32; Jon 13:35; Galesia 6:10; 1 Timoti 5:​4, 8; 1 Pita 5:​2, 3) Long dispela rot, olgeta wan wan long kongrigesen Kristen inap​—⁠i mas​—⁠stap olsem tisa na man bilong soim rot.​—⁠Matyu 5:⁠16.

“I Go Inap Long Dispela Taim i Pinis”

10. (a) Bai yumi mekim wok bilong kamapim ol disaipel i go inap long wanem taim? (b) Olsem wanem Jisas em i stap olsem gutpela piksa long pasin bilong inapim wok?

¹⁰ Yumi mas mekim wok bilong kamapim ol disaipel i go inap long wanem taim? Yumi mas mekim i go inap long pasin bilong dispela graun i pinis. (Matyu 28:20) Bai yumi inapim dispela wok Jisas i tok long mekim? Olsem wanpela kongrigesen bilong olgeta hap bilong graun, yumi strong long mekim olsem. Long ol yia i go pinis, yumi bin amamas long lusim taim, strong, na mani samting bilong yumi bilong painim ol man em “bel bilong ol i gutpela tru.” (Aposel 13:48) Long nau, insait long wanpela yia ol Witnes Bilong Jehova i lusim moa long 3 milion aua long olgeta wan wan de bilong autim tok bilong Kingdom na kamapim ol disaipel long olgeta hap. Yumi mekim olsem, long wanem, yumi bihainim pasin bilong Jisas long mekim wok. Em i bin tok: “Kaikai bilong mi, em long bihainim laik bilong em na long pinisim wok em i bin givim mi.” (Jon 4:34) Yumi tu i gat bikpela laik long mekim olsem. (Jon 20:21) Yumi no laik statim tasol dispela wok Jisas i givim long yumi, nogat; yumi laik pinisim.​—⁠Matyu 24:13; Jon 17:⁠4.

11. Wanem samting i kamap long sampela brata na sista Kristen bilong yumi? Yumi mas givim wanem askim long yumi yet?

¹¹ Tasol yumi sori long lukim sampela bilong ol wanbilip bilong yumi i no strong moa long samting bilong spirit, olsem na ol i no wok strong moa o ol i no bihainim moa tok bilong Krais long kamapim ol disaipel. Olsem wanem? I gat rot we yumi inap helpim ol long bung gen wantaim kongrigesen na insait gen long wok bilong kamapim ol disaipel? (Rom 15:1; Hibru 12:12) Pasin Jisas i bin mekim bilong helpim ol disaipel bilong em long taim ol i no gat strong i makim samting yumi inap mekim long nau.

Soim Olsem Yu Tingim Ol

12. (a) Paslain long Jisas i dai, ol aposel i bin mekim wanem? (b) Jisas i bin mekim wanem long ol aposel bilong em, maski ol i bin kamapim olsem ol i no strong long sampela samting?

¹² Long taim wok bilong Jisas long graun i laik pinis, na dai bilong em i kam klostu tru, ol aposel i bin ‘lusim Jisas na ranawe.’ Olsem Jisas i bin tok profet long en, ol i ‘go nabaut long ples bilong ol.’ (Mak 14:50; Jon 16:32) Jisas i bin mekim wanem long ol poroman bilong em, em ol i no stap strong tumas long samting bilong spirit? Bihain liklik long em i kirap bek, Jisas i bin tokim sampela lain bilong em: “No ken pret. Yutupela go tokim ol brata bilong mi long ol i mas i go long Galili. Ol bai i lukim mi long dispela hap.” (Matyu 28:10) Maski ol aposel i bin kamapim olsem ol i no strong long sampela samting, Jisas i kolim ol yet olsem ol “brata bilong mi.” (Matyu 12:49) Jisas i bilip yet long ol. Long dispela rot, Jisas i marimari long ol na lusim rong bilong ol, wankain olsem Jehova i save marimari long man na lusim rong bilong em. (2 King 13:23) Olsem wanem yumi ken bihainim pasin bilong Jisas?

13. Yumi mas i gat wanem tingting long ol lain i no strong moa long samting bilong spirit?

¹³ I stret yumi wari long ol lain i no wok strong olsem bipo o ol i lusim pinis wok autim tok. Yumi tingim yet pasin laikim ol dispela wanbilip i bin kamapim long bipo​—⁠sampela i bin mekim inap planti yia tru. (Hibru 6:10) Tru tumas yumi sori long ol i no poromanim yumi moa. (Luk 15:​4-7; 1 Tesalonaika 2:17) Tasol yumi ken mekim wanem bilong kamapim olsem yumi tingim ol?

14. Olsem Jisas i bin mekim, yumi inap helpim man i no strong olsem wanem?

¹⁴ Ol aposel i bel hevi i stap na Jisas i tokim ol long i go long Galili na ol bai lukim em long dispela hap. I olsem Jisas i singautim ol long kam long wanpela spesel miting. (Matyu 28:10) Na long nau tu, yumi kirapim ol lain i no strong long samting bilong spirit long kam long ol miting bilong kongrigesen Kristen, na yumi no mekim long wanpela taim tasol. Singaut bilong Jisas i karim kaikai, long wanem, “ol 11-pela disaipel i wokabaut i go long Galili, na ol i kamap long dispela maunten Jisas i bin tok bai ol i mas i go long en.” (Matyu 28:16) Yumi amamas tru taim lain i no strong long samting bilong spirit i bihainim singaut bilong yumi na kirap long kam long ol miting gen!​—⁠Luk 15:⁠6.

15. Olsem wanem yumi ken bihainim Jisas long tok welkam long ol lain i no strong long taim ol i kam long miting?

¹⁵ Bai yumi mekim wanem taim wanpela Kristen i no strong i kam long Haus Kingdom? Jisas yet i bin mekim wanem taim em i lukim ol aposel bilong em​—⁠inap sotpela taim bilip bilong ol i no strong​—⁠ol i kam long ples bilong bung? “Jisas i kam klostu” long ol na toktok wantaim ol. (Matyu 28:18) Em i no stap longwe na lukluk tasol long ol, nogat, em i bin wokabaut i go long ol. Tingim bel isi ol aposel i bin pilim taim Jisas i go pas long toktok wantaim ol! Yumi tu i laik go pas na amamas long tok welkam long ol man i no strong long samting bilong spirit em ol i wok long kam bek long kongrigesen Kristen.

16. (a) Pasin Jisas i bin mekim long ol lain bilong em i lainim yumi long wanem samting? (b) Olsem wanem yumi ken bihainim tingting bilong Jisas long ol man i no strong? (Lukim sta.)

¹⁶ Jisas i bin mekim wanem samting moa? Namba wan, em i mekim toksave: “God i givim mi bikpela namba na strong bilong bosim olgeta samting.” Namba tu, em i givim wanpela wok long mekim: “Go mekim olgeta lain manmeri i kamap disaipel.” Namba tri, em i mekim tok promis: “Mi save stap wantaim yupela olgeta de.” Tasol yu luksave long wanem samting Jisas i no bin mekim? Em i no bin kotim ol disaipel long ol samting ol i pundaun long en na long ol i gat tupela tingting. (Matyu 28:17) Samting Jisas i mekim i wok gut? Yes. I no longtaim na ol aposel i wok gen long ‘skulim ol manmeri na autim gutnius.’ (Aposel 5:42) Taim yumi bihainim wankain tingting bilong Jisas long ol man i no strong na mekim wankain pasin olsem em i bin mekim long ol, ating yumi tu inap lukim wankain gutpela samting i kamap long kongrigesen bilong yumi.b​—⁠Aposel 20:⁠35.

“Mi Save Stap Wantaim Yupela Olgeta De”

17, 18. Wanem tok bilong strongim yumi i stap insait long dispela tok, “Mi save stap wantaim yupela olgeta de”?

¹⁷ Laspela tok Jisas i mekim, “Mi stap wantaim yupela olgeta de,” em i strongim ol man i wok long inapim wok Krais i givim bilong kamapim ol disaipel. Maski ol birua i mekim wanem bilong sakim wok bilong yumi long autim tok bilong Kingdom na maski ol i sutim kain kain tok giaman long yumi, i no gat as na yumi pret. Bilong wanem? Long wanem Jisas, lida bilong yumi, em i holim “bikpela namba na strong bilong bosim olgeta samting long heven na graun,” em i stap wantaim yumi bilong helpim yumi!

¹⁸ Tok promis bilong Jisas olsem “mi save stap wantaim yupela olgeta de,” dispela tu i bikpela samting i mekim gut tru bel bilong yumi. Taim yumi wok long bihainim tok bilong Krais long kamapim ol disaipel, i gat taim bilong yumi long stap amamas, tasol tu, i gat taim we yumi stap bel hevi. (Sindaun 14:10) Sampela bilong yumi i gat taim we yumi bel sori long wanpela yumi laikim tru i dai. (Stat 23:2; Jon 11:​33-36) Sampela i karim hevi long lapun, taim helt na strong i no gutpela olsem bipo. (Saveman 12:​1-6) Na sampela i gat taim we pasin bilong i stap bel hevi i daunim ol tru. (Aisaia 61:⁠2) Na planti moa bilong yumi i karim bikpela hevi long sot long mani samting. Tasol maski i gat ol hevi olsem, yumi mekim yet wok autim tok, long wanem, Jisas i stap wantaim yumi long “olgeta de,” dispela i makim tu ol de we yumi bagarap tru long ol bikpela hevi.​—⁠Matyu 11:​28-30.

19. (a) Tok bilong Jisas long kamapim ol disaipel i karamapim wanem ol samting? (b) Wanem samting i inapim yumi long mekim dispela wok Krais i givim long yumi?

¹⁹ Olsem yumi lukim long dispela stadi na stadi yumi skelim pinis, tok bilong Jisas long kamapim ol disaipel em i karamapim olgeta samting. Jisas i tokim yumi bilong wanem na long wanem hap yumi mas mekim dispela wok. Na tu, em i tokim yumi long samting yumi mas skulim ol man long en na long yumi mas mekim dispela wok i go inap long wanem taim. Tru, i gat hatwok long inapim dispela bikpela wok. Tasol Krais i holim bikpela namba na em i sapotim yumi na em i stap wantaim yumi, olsem na yumi inap tru long mekim! Yu wanbel long dispela samting, laka?

[Ol Futnot]