Wok Yet Long Mekim Gutpela Pasin

“Yupela i mas mekim [“yet,” NW] gutpela pasin.”​​—LU. 6:​35.

1, 2. Bilong wanem planti taim i hatwok long mekim gutpela pasin long ol narapela?

ATING planti taim i hatwok long mekim gutpela pasin long ol narapela. Ol manmeri em yumi soim pasin laikim long ol, ating ol i no soim pasin laikim long yumi. Maski yumi wok strong long helpim ol long rot bilong ‘autim gutnius bilong God’ na Pikinini bilong em, ating ol i les long harim tok o ol i no tenkyu. (1 Ti. 1:11) Sampela “i stap birua bilong diwai . . . bilong Krais.” (Fl. 3:18) Yumi ol Kristen i mas mekim wanem kain pasin long ol?

² Jisas Krais i bin tokim ol disaipel bilong em: “Yupela i mas laikim [“yet,” NW] ol birua bilong yupela. Yupela i mas mekim [“yet,” NW] gutpela pasin long ol.” (Lu. 6:35) Orait nau yumi ken skelim gut dispela tok. Yumi inap kisim helpim tu long sampela narapela tok Jisas i bin mekim long wok bilong mekim gutpela pasin long ol narapela.

“Laikim Ol Birua Bilong Yupela”

 3. (a) Long toktok bilong yu yet, stori long tok bilong Jisas long Matyu 5:​43-​45. (b) Long taim bilong ol aposel, ol hetman bilong lotu Juda i gat wanem tingting long ol lain Juda na ol lain i no Juda?

³ Long Bikpela Tok Long Maunten, Jisas i tokim ol manmeri long ol i mas laikim ol birua bilong ol na beten askim God long marimari long ol man i mekim pasin nogut long ol. (Ritim Matyu 5:​43-​45.) Ol manmeri i bin stap long dispela taim em ol Juda, em ol i bin save long lo bilong God olsem: “Yu no ken bekim rong wanpela wantok bilong yu i mekim long yu, na yu no ken kros oltaim long em. Yu mas laikim tru ol wantok olsem yu laikim yu yet. Mi Bikpela, mi tok pinis.” (Wkp. 19:18) Ol hetman bilong lotu Juda long taim bilong ol aposel ol i bin ting olsem dispela tok “wantok” i makim ol Juda tasol. Lo Bilong Moses i tok ol Israel i mas i stap longwe long ol narapela lain, tasol isi isi ol i kisim tingting olsem olgeta man i no Juda ol i birua, na ol Juda i mas nolaik tru long ol.

 4. Ol disaipel bilong Jisas i mas mekim wanem kain pasin long ol birua bilong ol?

⁴ Tasol Jisas i tok: “Yupela i mas laikim [“yet,” NW] ol birua bilong yupela, na yupela i mas beten bai God i marimari long ol man i save mekim pasin nogut long yupela.” (Mt. 5:44) Ol disaipel bilong em i mas mekim gutpela pasin long olgeta man i birua long ol. Luk, man bilong raitim Gutnius, i kamapim tok bilong Jisas olsem: “Mi tokim yupela ol man i save harim tok bilong mi, yupela i mas laikim [“yet,” NW] ol birua bilong yupela, na yupela i mas mekim gutpela pasin long ol man i save bel nogut long yupela. Na sapos sampela man i tok long God i ken bagarapim yupela, yupela i mas askim God long mekim gut long ol. Na yupela i mas beten bai God i marimari long ol man i mekim nogut long yupela.” (Lu. 6:​27, 28) Olsem ol manmeri long taim bilong ol aposel em ol i bin bihainim tok bilong Jisas, yumi save “mekim gutpela pasin long ol man i save bel nogut” long yumi, olsem taim ol i birua long yumi, yumi save mekim gutpela pasin long ol. “Sapos sampela man i tok long God i ken bagarapim” yumi, yumi save “askim God long mekim gut long ol,” olsem yumi save toktok long ol long gutpela pasin. Na yumi “beten bai God i marimari long ol man i mekim nogut” long yumi, olsem bagarapim skin bilong yumi o long sampela narapela rot ol i “mekim nogut” long yumi. Ol dispela prea i soim olsem yumi laikim ol birua bilong yumi, long wanem, yumi askim Jehova long ol i ken senisim tingting bilong ol na mekim ol samting bilong Jehova i ken orait long ol.

5, 6. Bilong wanem yumi mas laikim ol birua bilong yumi?

⁵ Bilong wanem yumi mas soim pasin laikim long ol birua bilong yumi? Jisas i tok: “Bai yupela i stap pikinini bilong Papa bilong yupela em i stap long heven.” (Mt. 5:45) Sapos yumi bihainim dispela tok, bai yumi kamap “pikinini” bilong God, long wanem, yumi bihainim pasin bilong Jehova, em “i save mekim san bilong en i kamap antap long ol man nogut na long ol gutpela man wantaim. Na em i save mekim ren i kam daun long ol stretpela man na long ol man bilong mekim pasin i no stret tu.” Olsem Luk i tok, God “i save mekim gutpela pasin tu long ol man i no save tenkyu long em na long ol man nogut.”​​—Lu. 6:35.

⁶ Jisas i kamapim klia olsem em i bikpela samting long ol disaipel i mas ‘laikim [“yet,” NW] ol birua bilong ol,’ na em i tok: “Sapos yupela i laikim tasol ol man i save laikim yupela, bai yupela i kisim wanem pe? Ol man bilong kisim takis, ol tu i save mekim wankain pasin. Na sapos yupela i givim gude long ol brata bilong yupela tasol, bai yupela i winim ol arapela man long wanem samting? Ol haiden tu i save mekim olsem.” (Mt. 5:​46, 47) Sapos yumi laikim tasol ol man i laikim yumi, bai yumi no inap kisim “pe,” olsem God bai amamas long yumi. Ol man bilong kisim takis, em planti man i nolaik tru long ol, ol tu i laikim ol man i laikim ol.​​—Lu. 5:​30; 7:​34.

 7. Bilong wanem yumi no winim ol narapela man sapos yumi tok gude tasol long “ol brata” bilong yumi?

⁷ Taim ol Juda i bin bungim wanpela man na tok gude, wanpela tok ol i save mekim em “bel isi.” (Lu. 10:​5, 6; Jo. 20:19) Olsem ol i laik bai dispela man i gat gutpela sindaun na stap gut long helt. Sapos yumi tok gude tasol long ol man i olsem “ol brata” bilong yumi, yumi no “winim” ol narapela man. Olsem Jisas i tok, “ol haiden” tu i save mekim olsem.

 8. Jisas i kirapim ol man long mekim wanem taim em i tok, “Yupela i mas i stap stretpela manmeri tru”?

⁸ Sin ol i kisim long Adam i mekim na ol disaipel bilong Krais i no gutpela olgeta. (Ro. 5:12) Tasol Jisas i pinisim dispela hap bilong tok bilong em olsem: “Yupela i mas i stap stretpela manmeri tru, olsem Papa bilong yupela i stap long heven em i stap stretpela tru.” (Mt. 5:48) Long dispela rot em i kirapim ol man long bihainim pasin bilong ‘Papa bilong ol i stap long heven,’ em Jehova, long mekim moa yet pasin laikim​—olsem laikim ol birua bilong ol tu. God i laik yumi mas mekim wankain pasin.

Bilong Wanem Yumi Mas Lusim Rong Bilong Narapela?

 9. Wanem insait bilong tok olsem: “Lusim ol rong bilong mipela”?

⁹ Yumi wok yet long mekim gutpela pasin, taim yumi marimari na lusim rong narapela i bin mekim long yumi. Long beten Jisas i bin mekim i gat tok olsem: “Yu ken lusim ol rong bilong mipela, olsem mipela i save lusim ol rong ol arapela i mekim long mipela.” (Mt. 6:12) Gutnius Luk i Raitim i soim olsem ol dispela “rong” Jisas i toktok long en i makim ol sin, em i tok: “Yu ken lusim ol sin bilong mipela, long wanem, mipela i save lusim ol rong ol arapela i bin mekim long mipela.”​​—Lu. 11:4.

10. Olsem wanem yumi ken bihainim pasin bilong God long lusim rong bilong narapela?

¹⁰ Yumi mas bihainim pasin bilong God, em i save lusim rong bilong ol man i tanim bel. Aposel Pol i tok: “Yupela i mas mekim gutpela pasin long ol arapela Kristen na givim bel bilong yupela long ol. Yupela i mas lusim sin bilong ol, olsem God i lusim sin bilong yupela long nem bilong Krais.” (Ef. 4:32) Man bilong raitim song, Devit, i tok: “Bikpela i save sori moa yet long yumi na oltaim em i marimari long yumi. Em i no save belhat kwiktaim, na em i save laikim tru yumi. . . . Yumi bin mekim planti pasin nogut, na em inap bekim bikpela hevi long yumi, tasol em i no save mekim olsem. . . . Hap bilong sankamap em i no klostu long hap bilong san i go daun. Em i longwe tru. Olsem tasol God i save rausim sin bilong yumi na sin i stap longwe tumas. Papa i save sori long ol pikinini bilong en. Olsem tasol Bikpela i save sori long ol manmeri i pret long em. Em i save olsem em i bin kisim graun na wokim yumi na em i tingim yumi i olsem das tasol.”​​—Sng. 103:​8-​14.

11. God i save lusim rong bilong husat?

¹¹ Ol man i mas lusim rong bilong ol narapela pastaim, na nau God inap lusim rong bilong ol. (Mk. 11:​25, 26) Jisas i kamapim klia dispela samting, na i tok moa: “Sapos yupela i lusim rong bilong ol arapela manmeri, orait Papa bilong yupela long heven em bai i lusim rong bilong yupela tu. Tasol sapos yupela i no lusim rong bilong ol arapela manmeri, orait Papa bilong yupela em tu bai i no lusim ol rong bilong yupela.” (Mt. 6:​14, 15) Tru tumas, God i lusim tasol rong bilong ol man i save lusim rong bilong ol narapela. Na wanpela rot long wok yet long mekim gutpela pasin em long bihainim tok bilong Pol olsem: “Bikpela em i lusim pinis sin bilong yupela, na olsem tasol yupela tu i mas lusim sin bilong ol arapela.”​​—Kl. 3:13.

“No Ken Skelim Pasin Bilong Ol Arapela”

12. Jisas i tok wanem long pasin bilong skelim ol narapela?

¹² Long Bikpela Tok Long Maunten, Jisas i tokaut long narapela rot long mekim gutpela pasin long ol narapela. Em i tokim ol man olsem ol i no ken skelim pasin bilong ol narapela, na em i mekim wanpela gutpela tok piksa bilong kamapim klia dispela samting. (Ritim Matyu 7:​1-5.) Orait nau yumi ken skelim mining bilong tok bilong Jisas olsem: “No ken skelim pasin bilong ol arapela.”

13. Olsem wanem ol manmeri i harim tok bilong Jisas i ken “lusim sin” bilong ol man?

¹³ Gutnius Matyu i Raitim i kamapim tok bilong Jisas olsem: “Yupela i no ken skelim pasin bilong ol arapela na tok ol i man nogut. Nogut God i mekim wankain pasin long yupela tu.” (Mt. 7:1) Luk i kamapim tok bilong Jisas olsem: “Yupela i no ken skelim pasin bilong ol arapela na tok ol i man nogut. Nogut God i mekim wankain pasin long yupela tu. Yupela i mas lusim sin bilong ol man, na bai God i lusim sin bilong yupela.” (Lu. 6:37) Ol Farisi long taim bilong ol aposel i bin skelim strong ol man, na ol tok bilong ol tumbuna i no stret wantaim ol tok Baibel i as bilong en. Ol manmeri i harim tok bilong Jisas na ol i bin mekim olsem, ol i mas lusim “pasin bilong skelim ol arapela.” Ol i mas “lusim sin” bilong ol man, olsem ol i mas fogivim ol rong bilong ol narapela. Aposel Pol i givim wankain tok long pasin bilong lusim rong bilong ol narapela, olsem yumi stori pinis long dispela paragraf.

14. Taim ol disaipel bilong Jisas i lusim rong bilong ol narapela, dispela bai kirapim ol long mekim wanem?

¹⁴ Taim ol disaipel bilong Jisas i lusim rong bilong ol narapela, dispela bai kirapim ol man long lusim rong bilong ol. Jisas i tok: “God bai i skelim pasin bilong yupela long wankain pasin olsem yupela i save mekim long ol arapela man. Na skel yupela i save givim long ol arapela man, long dispela skel tasol God bai i bekim long yupela.” (Mt. 7:2) Pasin yumi mekim long ol narapela, dispela kain pasin ol bai mekim long yumi.​​—Ga. 6:7.

15. Olsem wanem Jisas i kamapim olsem i no stret long skelim skelim brata?

¹⁵ Jisas i kamapim klia olsem i no stret long skelim skelim ol narapela, em i tok: “Bilong wanem yu lukim liklik hap pipia i stap long ai bilong brata bilong yu, tasol yu no tingim bikpela plang i stap long ai bilong yu yet? Sapos plang i stap long ai bilong yu yet, orait olsem wanem na yu inap tokim brata bilong yu, ‘Brata, mi laik kamautim pipia i stap long ai bilong yu’?” (Mt. 7:​3, 4) Man i save skelim skelim narapela em i save lukim liklik popaia long “ai” bilong brata bilong em. I olsem dispela kain man i ting brata bilong em i no gat gutpela tingting. Maski popaia i liklik​—olsem liklik hap pipia​—man i save skelim narapela i tok olsem em i laik “kamautim pipia” long ai bilong brata. Em i giaman na i tok em i laik helpim brata long tingting gut.

16. Bilong wanem yumi ken tok ol Farisi i gat “bikpela plang” long ai bilong ol?

¹⁶ Ol bikman bilong lotu Juda i bin skelim strong ol narapela. Olsem: Krais i bin oraitim wanpela man aipas, na taim dispela man i tok God i bin salim Jisas i kam, ol Farisi i tok: “Pasin bilong sin i pas tru long yu, stat long taim mama i karim yu na i kam inap nau. Na yu laik skulim mipela, a?” (Jo. 9:​30-​34) Long pasin bilong tingim gut ol samting bilong spirit na long save bilong skelim gut ol samting, i olsem ol Farisi i gat “bikpela plang” long ai bilong ol yet na ol i aipas olgeta. Olsem na Jisas i tok: “Yu man bilong giaman, pastaim yu mas kamautim bikpela plang i stap long ai bilong yu yet. Na bihain bai yu inap lukluk gut na kamautim liklik hap pipia i stap long ai bilong brata bilong yu.” (Mt. 7:5; Lu. 6:42) Sapos yumi tingting strong long mekim gutpela pasin long ol narapela na mekim gut long ol, bai yumi no skelim strong ol narapela na long olgeta taim yumi ting olsem brata i no mekim gut ol samting. Nogat. Yumi save olsem yumi sinman, olsem na yumi no laik skelim skelim wanbilip bilong yumi.

Pasin Yumi Mas Mekim Long Ol Narapela

17. Matyu 7:12 i tok yumi mas mekim wanem pasin long ol narapela?

¹⁷ Long Bikpela Tok Long Maunten, Jisas i kamapim olsem God i olsem wanpela papa bilong ol wokman bilong Em na i save harim beten bilong ol. (Ritim Matyu 7:​7-​12.) Jisas i kamapim dispela stiatok: “Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol.” (Mt. 7:12) Sapos yumi mekim dispela pasin, long dispela rot tasol yumi ken kamapim olsem yumi disaipel tru bilong Jisas Krais.

18. Olsem wanem “lo” i kamapim olsem yumi mas mekim wankain pasin long ol narapela olsem yumi laik ol i mekim long yumi?

¹⁸ Jisas i tokaut pinis olsem yumi mas mekim wankain pasin long ol narapela olsem yumi laik ol bai mekim long yumi, na em i tok moa: “Dispela em i as tok bilong lo, na em i as bilong tok bilong ol profet.” Sapos yumi mekim pasin long ol narapela olsem Jisas i tok, yumi mekim ol samting i stret wantaim tingting bilong “lo”​—em ol tok i stap long ol buk bilong Baibel kirap long Buk Stat i go long Buk Lo. Ol dispela buk i kamapim laik bilong God long kamapim wanpela pikinini bai pinisim ol samting nogut, na tu, ol i kamapim Lo God i bin givim long lain Israel long rot bilong Moses long 1513 B.C.E. (Stt. 3:​15) Lo i tokaut klia olsem ol Israel i mas mekim stretpela pasin, no ken mekim wantok pasin, na ol i mas mekim gutpela pasin long ol taranguman na long ol manmeri bilong ol arapela ples i stap long kantri bilong ol.​​—Wkp. 19:​9, 10, 15, 34.

19. Olsem wanem “ol profet” i soim olsem yumi mas mekim gutpela pasin?

¹⁹ Taim Jisas i toktok long “ol profet,” em i tingim ol buk bilong ol profet long Ol Skripsa Hibru. Ol i gat ol tok profet bilong Mesaia i kamap tru long Krais yet. Ol dispela rait i kamapim tu olsem God i mekim gut long lain bilong em taim ol i mekim ol samting i stret long ai bilong em na mekim gutpela pasin long ol narapela. Olsem: Tok profet bilong Aisaia i givim tok long ol Israel olsem: “Bikpela i tok olsem, ‘Yupela ol manmeri bilong mi, yupela i mas mekim gutpela na stretpela pasin tasol . . . Ol manmeri i strong long bihainim gutpela pasin na i bihainim gut lo . . . na i no save mekim pasin nogut, ol i ken amamas. Mi bai mekim gut long ol.’ ” (Ais. 56:​1, 2) Tru tumas, God i laik bai lain bilong em i mas wok yet long mekim gutpela pasin.

Oltaim Mekim Gutpela Pasin Long Ol Narapela

20, 21. Bikpela lain manmeri i mekim wanem taim ol i harim Bikpela Tok Long Maunten em Jisas i mekim? Bilong wanem i gutpela yu mas tingim tingim long bel dispela tok?

²⁰ Nau yumi skelim sampela bikpela tok Jisas i bin mekim long Bikpela Tok Long Maunten. Tasol yumi ken pilim gut tingting bilong ol dispela man i bin harim tok bilong em long dispela taim. Baibel i tok: “Jisas i autim pinis ol dispela tok, orait ol bikpela lain manmeri ol i kirap nogut tru long skul bilong en. Long wanem, em i no skulim ol olsem ol saveman bilong lo i save mekim. Nogat. Em i skulim ol olsem man i gat namba.”​​—Mt. 7:​28, 29.

²¹ Tru tumas, Jisas Krais em i “Man bilong givim gutpela tingting tru” em Baibel i tok profet long em. (Ais. 9:6) Bikpela Tok Long Maunten i kamapim klia olsem Jisas i save tru long tingting bilong Papa bilong em long ol samting. Orait yumi bin skelim pinis sampela tok, tasol long dispela tok bilong Jisas i gat planti tok moa, olsem rot bilong i stap amamas tru, abrusim pasin pamuk, mekim stretpela pasin, ol samting yumi mas mekim bilong kisim gutpela samting long bihain, na planti narapela tok. Gutpela yu beten na ritim gen Matyu sapta 5 i go 7. Tingim tingim long bel ol gutpela tok Jisas i bin mekim long dispela bikpela tok. Bihainim ol tok Krais i bin mekim long Bikpela Tok Long Maunten. Long dispela rot bai yu inap amamasim Jehova, mekim stretpela pasin long ol narapela, na wok yet long mekim gutpela pasin.

Bai Yu Bekim Olsem Wanem?

• Yumi mas mekim wanem pasin long ol birua bilong yumi?

• Bilong wanem yumi mas lusim rong bilong ol narapela?

• Jisas i tok wanem long pasin bilong skelim ol man?

• Matyu 7:12 i tok yumi mas mekim wanem kain pasin long ol narapela?

[Rait long pes 10]

Yu save bilong wanem Jisas i tok: “No ken skelim pasin bilong ol arapela”?

[Piksa long pes 8]

Bilong wanem yumi mas beten long God i ken marimari long ol man i mekim nogut long yumi?

[Piksa long pes 10]

Long olgeta taim yu save mekim wankain pasin long ol narapela olsem yu laik ol i mekim long yu?