Mekim Pasin Long Man Olsem Yu Laik Em i Mekim Long Yu—Em Samting Bilong Olgeta Lain

“Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol.”​​—⁠Matyu 7:​12.

JISAS KRAIS i kolim dispela tok taim em i mekim bikpela tok bilong em antap long maunten, klostu 2,000 yia i go pinis. Ol man i bin mekim planti tok long dispela tok bilong Jisas. Ol i bin tok em i “as tru bilong ol tok bilong Baibel,” na “i nambawan gutpela samting Kristen i mas mekim long narapela,” na “i wanpela bikpela lo bilong stiaim tingting.” Planti man long olgeta hap ol i save long dispela gutpela lo: Mekim pasin long narapela olsem yu laik bai em i mekim long yu.

Tasol ol lain i tok ol i Kristen, i no dispela lain tasol i save long dispela lo. Lotu Juda, na lotu Buda, na ol saveman bilong ol Grik, ol tu i bin kolim kain lo olsem. Long hap bilong Is na long ol narapela hap tu, planti man i save long wanpela tok bilong Konfusas, em ol lain long hap bilong Is ol i ting em i nambawan tisa na saveman tru. Long buk The Analects, em namba tri bilong Fopela Buk bilong Konfusas, kain tingting olsem bilong dispela tok i kamap 3-pela taim. Bilong bekim askim bilong ol sumatin, tupela taim Konfusas i tok: “Pasin yu no laik bai ol narapela i mekim long yu, yu no ken mekim long ol.” Taim wanpela sumatin bilong em, Zigong, i tok hambak olsem “Pasin mi no laik bai ol narapela i mekim long mi, mi tu mi no laik mekim long ol,” tisa i tokim em: ‘Tru, tasol em samting yu no inap yet long mekim.’

Taim yumi ritim dispela tok, yumi kisim save olsem tok bilong Konfusas em i narapela kain liklik long dispela tok Jisas i mekim bihain. Konfusas i kolim samting man i no ken mekim. Jisas i kolim samting man i mas mekim. Olsem na man i bihainim dispela gutpela lo Jisas i kolim, em i mas kirap na mekim sampela wok bilong helpim narapela. Orait olsem wanem sapos olgeta man i kirap na bihainim dispela tok bilong Jisas na tingim ol narapela, na helpim ol, na mekim olsem long olgeta de? Ating bai graun i gutpela ples bilong i stap long en, a? Tru tumas, bai i olsem.

Tasol maski ol tok bilong dispela lo i makim pasin yumi mas mekim, o pasin yumi no ken mekim, bikpela samting i olsem: Ol man long ol narapela narapela taim na ples na sindaun ol i bin laikim tru kain tingting em dispela lo i kamapim. Dispela i kamapim klia olsem dispela tok Jisas i kolim em samting bilong olgeta lain long olgeta hap, maski ol i bin stap long wanem wanem taim.

Askim yu yet: ‘Mi laik bai ol narapela i tingim mi, na mekim stretpela pasin long mi? Mi laik stap long wanpela taim we ol man i no save tingting nogut long ol man bilong narapela skin, na i no gat pasin raskol na pait? Mi laik insait long wanpela famili em narapela i tingim tru narapela?’ Ating i no gat wanpela man bai tok nogat long dispela, a? Tasol long nau, i no planti man i gat kain sindaun olsem. Long tingting bilong planti man, kain samting olsem i no inap kamap.

Sampela i No Bihainim

Long bipo yet na i kam inap nau, i gat kain kain pasin nogut ol man i bin mekim long ol narapela na ol i no bin tingim ol liklik, olsem: Ol i kisim ol lain long Afrika na salim ol olsem wokboi nating; salim ol man i go long ol banis kalabus nogut bilong ol Natsi bilong i dai tasol; subim ol pikinini long wok leba; na long planti kantri, bagarapim na pinisim wanpela lain olgeta.

Long nau, ol man bilong dispela graun i save tingim ol yet tasol. Ol i no laik helpim ol narapela sapos ol i mas mekim long wanpela taim i no stret long ol yet o i pasim ol long mekim ol samting ol i ting i stret ol i ken mekim. (2 Timoti 3:​1-5) I gat wanem as na planti man i save tingim ol yet tasol, na mekim nogut tru long ol narapela na i no pilim hevi bilong ol? Dispela i olsem, long wanem, ol i save sakim dispela gutpela lo Jisas i kolim. Ol i ting em wanpela lo bilong bipo na i no gutpela long bihainim long nau, maski planti man i save long en. Ol man i tok ol i bilip long God, ol tu i gat kain tingting olsem. Na taim yumi skelim ol samting i kamap long nau yumi save, pasin bilong ol man long tingim ol yet tasol bai kamap bikpela moa yet.

Olsem na yumi mas tingim ol dispela bikpela askim: Yumi mas mekim wanem bilong bihainim dispela gutpela lo? I gat sampela man long nau ol i save bihainim? Bai wanpela taim i kamap na olgeta man i bihainim dispela lo? Bilong kisim stretpela bekim long ol dispela askim, plis ritim stori i kamap bihain long dispela.

[Piksa long pes 3]

Konfusas na sampela moa i bin skulim ol man long wanpela tok i kain olsem dispela gutpela lo Jisas i kolim

Mekim Pasin Long Man Olsem Yu Laik Em i Mekim Long Yu—Dispela i Save Wok Gut

Planti man i ting Jisas yet i bin kamapim dispela gutpela lo​—⁠mekim pasin long narapela olsem yu laik bai em i mekim long yu​—⁠tasol Jisas i tok: “Dispela tok mi givim yupela, em i no bilong mi yet. Nogat. Em i bilong God, em i bin salim mi na mi kam.”​—⁠Jon 7:​16.

TRU TUMAS, as bilong dispela lo na ol narapela tok Jisas i bin lainim ol man long en, em dispela Man i bin salim Jisas i kam, em God Jehova.

Long pastaim tru God i gat laik long olgeta manmeri i mas mekim pasin long narapela olsem ol i laik bai dispela man i mas mekim long ol. God i stap gutpela piksa tru olsem man i tingim ol narapela, na dispela i kamap klia long pasin bilong em long wokim man na meri: “God i wokim ol manmeri na ol i kamap olsem God yet.” (Stat 1:​27) Olsem na God i wokim man na meri na bai ol i gat sampela pasin bilong em yet bambai ol inap i stap bel isi, na amamas, na sindaun gut wantaim​—⁠inap long olgeta taim bihain. Na sapos ol i skulim gut maus bilong bel em God i bin givim long ol, dispela bai stiaim ol long mekim pasin long narapela olsem ol i laik bai em i mekim long ol.

Ol i Kirap Tingim Ol Yet Tasol

Pastaim i stap bilong ol man i gutpela tru, olsem na wanem samting i mekim na hevi i kamap? Ol i kirap na tingim ol yet tasol. Klostu olgeta manmeri i save long samting em namba wan man na meri i bin mekim, olsem Baibel long Stat sapta 3 i stori long en. Wanpela birua bilong olgeta stretpela lo bilong God, em Satan, em i kirapim Adam na Iv long sakim wok bos bilong Jehova na bihainim tingting na laik bilong ol yet tasol. Pasin ol i mekim, olsem ol i bikhet na tingim ol yet tasol, dispela i mekim nogut long tupela yet wantaim olgeta pikinini bilong ol em bihain bai ol i kamapim. Dispela i kamapim long ples klia olsem pasin bilong bikhet na sakim dispela lo bilong Jisas, em i save kamapim samting nogut. Olsem: “Wanpela man i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.”​​—⁠Rom 5:​12.

Maski planti manmeri i sakim ol gutpela pasin sori bilong God Jehova, em i no lusim ol. Olsem: Jehova i givim Lo long lain Israel bilong stiaim ol. Lo God i givim long ol i lainim ol long mekim pasin long narapela olsem ol i laik bai em i mas mekim long ol. Lo i tokim ol long pasin ol i mas mekim long ol wokboi nating, na ol pikinini i no gat papa, na ol meri em man bilong ol i dai pinis. Em i tokim ol long pasin ol i mas mekim taim narapela i paitim narapela o stilim samting bilong em, o stilim wanpela man na karim i go haitim. I gat ol lo bilong i stap klin em ol i mas bihainim, nogut sik i kalap long ol narapela. Na i gat ol lo bilong bosim maritpasin samting. Jehova i kamapim wanpela tok i olsem as bilong dispela Lo. Em i tokim ol Israel: “Yu mas laikim tru ol wantok olsem yu laikim yu yet.” Bihain Jisas i kamapim dispela tok. (Wok Pris 19:18; Matyu 22:​39, 40) Na tu, Lo i tokaut long pasin ol Israel i mas mekim long ol man bilong narapela kantri i stap namel long ol. Lo i tok: “Yupela i no ken mekim pasin nogut long man bilong narapela kantri i stap long ples bilong yupela, long wanem, bipo yupela yet i bin i stap long Isip na yupela i save gut long pasin bilong ol manmeri i no i stap long as ples.” Olsem na ol Israel i mas pilim tru hevi bilong ol taranguman na mekim gutpela pasin sori long ol.​​—⁠Kisim Bek 23:9; Wok Pris 19:34; Lo 10:⁠19.

Taim lain Israel i bihainim gut Lo, Jehova i mekim gut long ol. Taim Devit na Solomon i mekim wok king, dispela lain i gat gutpela sindaun na ol i belgut na amamas. Baibel i tok: “Ol manmeri bilong Juda na Israel i bikpela lain tumas, inap olsem wesan bilong nambis. Ol i sindaun gut na ol i gat kaikai na dring na ol i amamas . . . na i no gat wanpela samting nogut i kamap long ol.”​​—⁠1 King 4:​20, 25.

Tasol sori tru, gutpela sindaun na bel isi bilong dispela lain i no stap longpela taim. Tru, ol Israel i holim Lo God i givim long ol, tasol ol i no bihainim​—⁠ol i tingim ol yet tasol na dispela i pasim ol long tingim ol narapela. Dispela samting, wantaim pasin bilong tromoi bilip, em i mekim na bikpela hevi i painim olgeta wan wan bilong dispela lain. Bihain, long yia 607 B.C.E., Jehova i larim ol Babilon i kam na bagarapim kingdom bilong Juda, na taun Jerusalem, na gutpela tempel tu. Bilong wanem? “Yupela i no bin bihainim tok bilong mi. Olsem na harim. Mi Bikpela, bai mi singautim olgeta lain bilong hap not. Na tu, bai mi singautim wokman bilong mi, em King Nebukatnesar bilong Babilon. Na bai mi bringim ol dispela lain i kam bilong bagarapim dispela graun na bilong bagarapim ol arapela lain manmeri i stap klostu long dispela graun. Mi bai larim ol lain bilong hap not i bagarapim ol olgeta, na bai ol i bagarap i stap oltaim. Na taim ol arapela lain manmeri i lukim, ol bai i kirap nogut tru na i pret moa yet.” (Jeremaia 25:​8, 9) Em nau, ol i kisim bikpela hevi tru, long wanem, ol i lusim pasin bilong lotu tru long Jehova!

Gutpela Piksa Long Bihainim

Tasol taim Jisas i lainim ol man long mekim pasin long narapela olsem ol i laik bai dispela man i mekim long ol, em yet i bihainim dispela lo. Em i tingim tru ol narapela na i laik helpim ol. (Matyu 9:​36; 14:14; Luk 5:​12, 13) Wanpela taim, klostu long taun Nain, Jisas i lukim wanpela meri, man bilong em i dai pinis, em i wokabaut namel long wanpela lain i karim skin bilong pikinini man bilong em i dai pinis na meri i krai long em​—⁠em i gat dispela wanpela pikinini tasol. Baibel i tok: “Bikpela i lukim dispela meri, na em i sori tru long em.” (Luk 7:​11-​15) Buk Vine’s Expository Dictionary of Old and New Testament Words i tok, insait bilong dispela tok “sori tru” i olsem “bel i pilim tru.” Jisas i pilim tru bel sori bilong em, na dispela i kirapim Jisas long helpim em. Taim Jisas i kirapim bek dispela pikinini na “givim em bek long mama bilong en,” meri wanpis em i amamas tru!

Na tu, Jisas i tingim laik bilong God na em i orait long kisim pen na givim laip bilong em olsem ofa bambai ol man inap lusim kalabus bilong sin na dai. Long dispela pasin Jisas i mekim, em i stap gutpela piksa tru olsem man i bihainim dispela lo: Mekim pasin long narapela olsem yu laik bai em i mekim long yu.​​—⁠Matyu 20:28; Jon 15:13; Hibru 4:​15.

Wanpela Lain Em Ol i Bihainim Dispela Lo

Olsem wanem? I gat sampela man long taim bilong yumi em ol i bihainim tru dispela lo, olsem mekim pasin long ol narapela olsem yumi laik bai ol i mekim long yumi? I gat, na ol i save bihainim tu long taim i no stret long ol. Olsem: Long taim bilong Namba Tu Pait, long Jemani em ol Natsi i bosim, ol Witnes Bilong Jehova i holimpas bilip bilong ol long God na laikim tumas ol narapela​—⁠ol i no lusim dispela lo. Taim Gavman i kirapim ol man long bel nogut na mekim nogut long olgeta man bilong lain Juda, ol Witnes i bihainim yet dispela lo. Long ol banis kalabus nogut tu, ol i wok yet long tingim ol narapela. Maski ol yet i sot, ol i givim kaikai bilong ol long ol Juda na ol man i no Juda, em ol i hangre nogut tru. Na tu, taim Gavman i tokim ol long kisim gan na kilim i dai ol narapela, ol i no mekim, olsem ol yet i no laik bai ol dispela man i kilim ol i dai. Ol i no ken kilim i dai ol man ol i mas laikim ol olsem ol i laikim ol yet, a? Olsem na ol Natsi i salim planti Witnes i go long ol banis kalabus nogut tru na kilim i dai sampela.​​—⁠Matyu 5:​43-​48.

Nau yu wok long ritim dispela stori, na yu inap mekim olsem, long wanem, sampela man i bin bihainim dispela gutpela lo. Ol Witnes Bilong Jehova i save olsem planti man long nau i kisim bikpela hevi na pen na ol i no gat gutpela samting bilong wetim i kamap. Olsem na ol Witnes yet i kirap na helpim ol dispela man long kisim save long ol gutpela samting ol inap wetim i kamap na ol tok bilong soim rot long ol em Baibel i kamapim. Dispela wok i insait long wanpela wok ol i mekim long olgeta hap bilong graun bilong lainim ol man. Wanem samting i kamap long dispela? Olsem Aisaia 2:​2-4 i tok profet, Jehova i bin ‘skulim ol lain,’ winim 6 milion manmeri long olgeta hap, ‘long ol pasin em i laik bai ol i mas mekim, na bai ol i ken wokabaut long rot em yet i makim.’ Long tok piksa, i olsem ol i bin lain long ‘paitim ol bainat bilong ol i kamap olsem ol ain bilong brukim graun, na paitim ol spia bilong ol i kamap olsem ol naip.’ Ol i bin kisim bel isi tru long dispela taim bilong hevi.

Olsem Wanem Long Yu Yet?

Tingim ol pen na hevi em pasin bilong sakim dispela lo i bin kamapim, kirap long taim pasin bikhet i kamap long Iden, em Satan i as bilong en. Klostu nau, Jehova bai kamapim bikpela senis. Em bai mekim olsem wanem? “Pikinini Bilong God i bin kamap ples klia bilong bagarapim na rausim wok bilong Satan.” (1 Jon 3:⁠8) Dispela samting bai kamap taim Kingdom bilong God i bosim graun, em dispela Kingdom i stap long han bilong Jisas Krais, em dispela man i bin lainim ol narapela long dispela gutpela lo na em yet i bin bihainim.​​—⁠Song 37:​9-​11; Daniel 2:​44.

King Devit bilong Israel bilong bipo i tok: “Bipo mi yangpela, na nau mi lapun pinis, tasol mi no lukim God i givim baksait long wanpela stretpela man. Na mi no lukim ol pikinini bilong stretpela man i sot long kaikai, na i raun askim ol arapela man long givim kaikai long ol. Nogat tru. Oltaim stretpela man i save marimari na givim planti samting long ol arapela manmeri.” (Song 37:​25, 26) Ating bai yu wanbel long tok olsem planti man long nau ol i save strong long kisim planti samting​—⁠ol i no save “marimari na givim planti samting long ol arapela,” a? Pasin bilong bihainim dispela gutpela lo bilong Jisas inap kamapim bel isi tru, long wanem, dispela pasin inap helpim ol long kisim ol gutpela blesing long nau na long bihain, aninit long Kingdom bilong God. Kingdom bilong God bai pinisim olgeta kain pasin nogut na pasin bilong ol man long tingim ol samting bilong ol yet tasol. Wok bilong ol man long bosim graun em bai pinis, na God bai kamapim wanpela nupela taim. Long dispela nupela taim, olgeta man bai amamas long bihainim dispela gutpela lo.​​—⁠Song 29:11; 2 Pita 3:​13.

[Ol Piksa long pes 4, 5]

Jisas i lainim ol man long mekim pasin long narapela olsem ol i laik bai dispela man i mekim long ol, na Jisas yet i bin mekim olsem

[Ol Piksa long pes 7]

Sapos yumi mekim pasin long narapela olsem yumi laik bai em i mekim long yumi, dispela inap kamapim bel isi tru