Jisas i Kamapim “Savetingting Bilong God”

1-3. Ol neiba bilong Jisas long bipo i ting olsem wanem long tok Jisas i lainim ol long en? Ol i no luksave long wanem samting bilong em?

OL MANMERI i kirap nogut. Yangpela man Jisas i sanap long ai bilong ol long haus lotu na i skulim ol. Ol i save gut long em—em i bin go bikpela long taun bilong ol, na inap planti yia em i bin wok long hap bilong ol olsem wanpela kapenta. Ating sampela ol i stap long ol haus Jisas i bin wok wantaim ol narapela long sanapim, o ol i mekim wok gaden long ol tul Jisas i bin wokim long han bilong em yet.a Tasol ol bai ting wanem long ol tok dispela man i bin mekim wok kapenda i skulim ol long en?

² Planti man husat i harim tok bilong em ol i kirap nogut na tok: “Man ya i kisim we dispela savetingting”? Tasol ol i tok tu olsem: “Em dispela kapenta, pikinini bilong Maria.” (Matyu 13:54-58; Mak 6:1-3) Sori tru, ol neiba bilong Jisas long bipo i tok, ‘Dispela kapenta i wanpela man bilong hia tasol, kain olsem yumi.’ Maski Jisas i kamapim savetingting long tok bilong em, ol man i sakim em. Ol i no save olsem savetingting em i kamapim em i no bilong em yet.

³ Orait, Jisas i kisim we dispela savetingting? Em i tok: “Tok mi skulim ol man long en i no bilong mi, em bilong man i salim mi i kam.” (Jon 7:16) Aposel Pol i tok olsem Jisas “i kamapim savetingting bilong God.” (1 Korin 1:30) Savetingting bilong Jehova i kamap klia long rot bilong Pikinini bilong em, Jisas. Olsem na Jisas inap tok: “Mi na Papa i wanpela.” (Jon 10:30) Nau yumi ken skelim 3-pela rot em Jisas i kamapim “savetingting bilong God.”

 4. (a) Jisas i autim wanem bikpela tok? Bilong wanem dispela tok i bikpela samting tru? (b) Bilong wanem oltaim tok bilong Jisas i gutpela long bihainim na i helpim tru ol man?

⁴ Pastaim tingim ol tok Jisas i lainim ol man long en. Bikpela tok em i autim em “gutnius bilong Kingdom.” (Luk 4:43) Dispela em i bikpela samting tru, long wanem, Kingdom i gat wok long mekim holi nem bilong Jehova—dispela i makim tu gutnem bilong em olsem King i gat stretpela pasin— na long kamapim ol blesing long ol man inap oltaim oltaim. Long ol tok Jisas i lainim ol man long en, em i givim ol gutpela tok i helpim sindaun bilong ol man. Em i soim olsem em i dispela “Man Bilong Givim Gutpela Tingting Tru” em Baibel i tok profet long em. (Aisaia 9:6) Tru tumas, tok bilong em i gutpela tasol. Em i save gut long Tok na laik bilong God, em i save gut long pasin bilong ol man, na em i laikim ol tru. Olsem na oltaim tok bilong em i gutpela long bihainim na i helpim tru ol man i harim dispela tok. “Ol tok bilong [Jisas] i bringim man i go long laip oltaim.” Yes, taim man i bihainim tok bilong Jisas, God bai kisim em bek.​—Jon 6:68.

 5. Jisas i stori long wanem sampela samting long Bikpela Tok Long Maunten?

⁵ Bikpela Tok Long Maunten i kamapim tru gutpela savetingting i stap long ol tok bilong Jisas. Ating man inap kamapim dispela tok i stap long Matyu 5:3–7:27 insait long 20 minit. Tasol tok bilong em i no helpim ol man long bipo tasol—dispela tok i stret long ol man i bin harim long namba wan taim Jisas i bin kamapim, na i stret long ol man long nau tu. Jisas i stori long planti samting, olsem rot bilong stap gut wantaim ol narapela (5:23-26, 38-42; 7:1-5, 12), rot bilong bihainim stretpela pasin (5:27-32), na pasin man i mas bihainim na bai laip i gat as bilong en (6:19-24; 7:24-27). Tasol Jisas i no tokim ol tasol long savetingting em i wanem samting, nogat; em i soim klia dispela samting long rot bilong stori gut, skelim ol tok, na kamapim klia olsem dispela tok i gutpela.

6-8. (a) Jisas i kamapim wanem ol tok i soim olsem yumi mas sakim pasin bilong tingting planti? (b) Wanem samting i soim olsem tok bilong Jisas i kamapim savetingting i kam long God?

⁶ Tingim gutpela tok bilong Jisas long pasin bilong tingting planti long ol samting bilong skin, olsem Matyu sapta 6 i kamapim. Jisas i tok: “Lusim pasin bilong tingting planti long laip bilong yupela, olsem yupela bai kaikai wanem samting na dring wanem samting o bai yupela i werim wanem samting.” (Ves 25) Kaikai na laplap em samting yumi mas kisim, na i stret yumi tingting long olsem wanem yumi inap kisim ol dispela samting. Tasol Jisas i tokim yumi long “lusim pasin bilong tingting planti” long ol dispela samting.b Bilong wanem em i tok olsem?

⁷ Orait putim yau taim Jisas i toktok gut long ol dispela samting. Jehova i givim laip na bodi long yumi, olsem na em inap tru long givim kaikai na bai yumi ken stap laip, na klos bilong yumi ken karamapim skin, a? (Ves 25) Sapos God i givim kaikai long ol pisin na gutpela bilas long ol plaua, em bai lukautim moa yet ol man i save lotuim em! (Ves 26, 28-30) Na pasin bilong tingting planti i no inap helpim yumi. Em i no inap skruim liklik haptaim moa long laip bilong yumi.c (Ves 27) Olsem wanem yumi ken sakim pasin bilong tingting planti? Jisas i tokim yumi: Wok yet long putim lotu bilong God i stap namba wan long laip bilong yumi. Ol man i mekim olsem ol i ken bilip tru olsem Papa bilong ol long heven bai “givim” olgeta samting ol i mas kisim. (Ves 33) Na Jisas i givim wanpela gutpela tok i helpim tru yumi—tingim hevi bilong wan wan de tasol. Bilong wanem yumi laik bungim ol hevi bilong tumora wantaim ol hevi bilong nau? (Ves 34) Na tu, i no gat as long tingting planti tumas long ol samting yumi no save em bai kamap o nogat. Taim yumi bihainim ol kain gutpela tok olsem, dispela inap helpim yumi long abrusim planti pen na hevi nau long dispela taim nogut.

⁸ Tru tumas, gutpela tok Jisas i givim i helpim ol man long nau wankain olsem em i bin helpim ol man long taim Jisas i mekim dispela tok inap 2,000 yia i go pinis. Dispela i kamapim klia savetingting i kam long God, a? Ol man i givim sampela gutpela tok bilong helpim man, tasol bihain ol dispela tok i kamap olpela na ol i mas stretim dispela tok o senisim olgeta. Tasol ol tok bilong Jisas i gutpela na i helpim ol man i kam inap nau. Yumi no kirap nogut long dispela, long wanem, dispela Man Bilong Givim Gutpela Tingting Tru em i autim “ol tok bilong God.”​—Jon 3:34.

 9. Sampela soldia i tok wanem long tok bilong Jisas? Bilong wanem tok bilong ol i stret olgeta?

⁹ Namba tu rot bilong Jisas long kamapim savetingting bilong God em pasin bilong em long skulim ol man. Wanpela taim sampela soldia em ol bikman i bin salim ol bilong holim Jisas, ol i kam bek nating, na ol i tok: “I no gat wanpela man i bin mekim kain tok olsem, nogat tru.” (Jon 7:45, 46) Dispela tok i stret olgeta. Jisas i “bilong ples antap,” em i gat bikpela save tru em i ken mekim wok long en, winim olgeta man i bin stap long graun. (Jon 8:23) Pasin bilong em long skulim ol man i winim tru olgeta narapela man. Tingim tupela pasin bilong dispela Tisa i gat savetingting.

10, 11. (a) Bilong wanem yumi kirap nogut long pasin bilong Jisas long yusim ol tok piksa? (b) Planti taim Jisas i kolim wanem kain ol sotpela stori? Wanem sotpela stori i soim olsem ol stori bilong Jisas i gutpela rot bilong skulim ol man?

¹⁰ Gutpela wok long ol tok piksa. Baibel i tok: “Long rot bilong ol tok piksa Jisas i [toktok] long bikpela lain manmeri. Tru tumas, long rot bilong ol tok piksa tasol em i save toktok wantaim ol.” (Matyu 13:34) Yumi kirap nogut long save bilong em long skulim ol man long ol bikpela tok i tru long rot bilong ol samting bilong olgeta de. Olsem: Ol fama i planim pikinini kaikai, ol meri i redi long wokim bret, ol pikinini i pilai long ples maket, ol man bilong kisim pis i pulim ol umben i kam, ol wasman bilong sipsip i painim ol sipsip i lus—dispela em ol samting ol man i harim tok bilong em i bin lukim planti taim. Taim wanpela i stori long ol bikpela tok i tru wantaim ol samting ol man i save pinis long en, kwiktaim ol dispela tok i tru i go insait long tingting na bel.​—Matyu 11:16-19; 13:3-8, 33, 47-50; 18:12-14.

¹¹ Planti taim Jisas i kolim ol sotpela stori i lainim ol man long wanpela gutpela pasin o wanpela samting bilong spirit. Ol man inap kisim gut na tingim ol sotpela stori, winim ol tok em mining bilong en i no stap ples klia, olsem na ol stori i mekim na ol tok Jisas i skulim ol man long en i no lus. Long planti sotpela stori, Jisas i kamapim ol tok piksa i stori long Papa bilong em na ol man i no inap lusim tingting hariap long en. Olsem: Yumi olgeta inap kliagut long mining bilong tok piksa bilong pikinini i bin lusim papa. Olsem: Taim wanpela man husat i bin lusim stretpela pasin i tanim bel tru, Jehova bai sori long em na orait long em i kam bek.​—Luk 15:11-32.

12. (a) Jisas i mekim wok long wanem kain askim taim em i skulim ol man? (b) Olsem wanem Jisas i pasim maus bilong ol man i gat tok long namba bilong em?

¹² Kamapim gut ol askim. Jisas i mekim wok long ol askim bilong kirapim ol man long wokim tingting bilong ol yet, skelim bel bilong ol, o wokim ol disisen. (Matyu 12:24-30; 17:24-27; 22:41-46) Taim ol bikman bilong lotu i gat tok long Jisas i kisim namba long God o nogat, Jisas i tok: “Namba Jon i kisim long baptaisim ol man, dispela namba i kam long heven o i kam long ol man?” Ol i kirap nogut long dispela askim, na ol i toktok namel long ol yet olsem: “Sapos yumi tok, ‘Long heven,’ bai em i tok, ‘Orait bilong wanem yupela i no bilipim em?’ Tasol yumi no ken tok, ‘Long ol man.’” Bikos “ol i pret long tok olsem, long wanem, ol manmeri i tingim Jon olsem wanpela profet.” Olsem na ol i bekim tok olsem, “Mipela i no save.” (Mak 11:27-33; Matyu 21:23-27) Dispela askim bilong Jisas i kamapim klia tingting nogut i stap long bel bilong ol na ol i no inap mekim wanpela tok.

13-15. Olsem wanem stori bilong man Samaria i kamapim savetingting bilong Jisas?

¹³ Sampela taim Jisas i bungim ol bikpela askim wantaim ol tok piksa. Taim wanpela loya bilong lain Juda i askim Jisas long em i mas mekim wanem bilong kisim laip oltaim, Jisas i tokim em long tingim Lo Bilong Moses em dispela Lo i tokim man long laikim tru God na ol narapela. Man ya i laik kamapim olsem em i gat stretpela pasin, na em i askim olsem: “Dispela narapela mi mas laikim, em i husat?” Jisas i bekim long rot bilong wanpela stori. Wanpela man Juda i wokabaut i go na ol stilman i paitim em nogut tru na em i hap indai na ol i lusim em long rot. Tupela Juda i kam, pastaim wanpela pris i kam na bihain wanpela Livai. Tupela i abrusim em tasol. Tasol bihain wanpela man Samaria i kam. Em i sori tru long man Juda, em i pasim sua bilong em na long gutpela pasin em i karim em i go long wanpela haus pasindia we em inap stap na kamap orait gen. Bilong pinisim stori, Jisas i askim loya: “Yu ting husat bilong dispela 3-pela man i mekim pasin laikim long dispela man i kisim hevi long ol raskol?” Man i bekim olsem: “Em man i mekim pasin marimari long em.”​—Luk 10:25-37.

¹⁴ Olsem wanem dispela stori i kamapim savetingting bilong Jisas? Long taim bilong Jisas, ol Juda i ting ol i mas laikim ol wanlain Juda tasol, em ol man i save bihainim ol pasin tumbuna bilong ol—ol Samaria nogat. (Jon 4:9) Sapos Jisas i bin mekim stori long man Samaria i kisim bagarap na man Juda i helpim em, yu ting dispela bai pinisim pasin bilong tingting nogut long ol Samaria? Jisas i bihainim savetingting na stori olsem man Samaria i lukautim gut man Juda. Tingim tu askim Jisas i kamapim long pinis bilong stori bilong helpim dispela loya long kliagut long pasin bilong laikim narapela i makim wanem samting. I olsem loya i bin askim: ‘Husat man em i ken soim gutpela pasin long em?’ Tasol Jisas i askim em: “Yu ting husat bilong dispela 3-pela man i mekim pasin laikim long dispela man.” Jisas i no kirapim loya long tingim man i kisim helpim long narapela, em man ol i bin paitim, Jisas i kirapim em long tingim man i givim helpim, em man Samaria. Man i laikim ol narapela em baigo pas long soim gutpela pasinlong ol, maski ol i bilong wanem lain. Jisas i kamapim gut tok em i laik bai man i kliagut long en.

¹⁵ Olsem na i gat as na ol man i kirap nogut tru long “pasin bilong em long skulim ol man” na ol i laik stap wantaim em. (Matyu 7:28, 29) Wanpela taim “bikpela lain manmeri” i stap wantaim em inap 3-pela de, na ol i no kaikai!​—Mak 8:1, 2.

16. Long wanem rot Jisas i kamapim klia olsem savetingting bilong God i stiaim em?

¹⁶ Namba tri rot bilong Jisas long kamapim savetingting bilong Jehova em long wokabaut bilong em. Savetingting i helpim tru man, na i kamapim ol gutpela samting. Disaipel Jems i tok: “Husat namel long yupela i gat savetingting”? Jems i bekim askim bilong em yet na tok: “Pasin bilong em long wokabaut stret, na ol samting em i mekim i mas kamapim” klia dispela. (Jems 3:13) Pasin bilong Jisas i “kamapim” klia olsem savetingting bilong God i stiaim em. Orait nau yumi ken tingim olsem wanem em i skelim gut ol samting, long wokabaut bilong em na pasin em i mekim long ol narapela.

17. Wanem ol samting i soim olsem Jisas i gat stretpela tingting long ol samting?

¹⁷ Olsem wanem? Yu bin lukim olsem ol man i no save skelim gut ol samting, planti taim ol i strong tumas long wanpela samting na i no bihainim gutpela tingting? Yes, man i mas i gat savetingting na bai em inap bihainim stretpela tingting. Jisas i bihainim savetingting bilong God, olsem na em i gat stretpela tingting long ol samting. Em i putim wok bilong Jehova i stap namba wan long laip bilong em. Em i bisi tru long mekim wok bilong autim gutnius. Em i tok: “Long dispela as na mi kam.” (Mak 1:38) Ol samting bilong skin i no namba wan bikpela samting long em; i luk olsem em i no gat planti samting bilong skin. (Matyu 8:20) Tasol em i no sakim olgeta samting bilong amamas. Olsem Papa bilong em, em “God bilong amamas,” Jisas em i man bilong amamas na em i mekim ol samting bilong helpim ol narapela long stap amamas. (1 Timoti 1:11; 6:15) Taim em i go long wanpela kaikai bilong marit—kain bung olsem i gat musik, singsing, na amamas—em i no go bilong pasim ol man long kisim amamas, nogat. Taim wain i pinis, em i tanim wara i kamap gutpela wain, em wanpela dring i save “mekim bel bilong man i amamas.” (Buk Song 104:15; Jon 2:1-11) Planti man i singautim Jisas long kaikai wantaim ol na em i go, na planti taim em i skulim ol man long kain taim olsem.​—Luk 10:38-42; 14:1-6.

18. Olsem wanem ol samting Jisas i mekim long ol disaipel i kamapim klia em i save skelim gut ol samting?

¹⁸ Ol samting Jisas i mekim long ol narapela i kamapim klia olsem pasin bilong em long skelim gut ol samting em i gutpela olgeta. Gutpela save bilong em long pasin bilong man i mekim na em i gat stretpela tingting long ol disaipel. Em i save olsem ol i no gutpela olgeta. Tasol em i luksave long ol gutpela pasin bilong ol. Em i lukim ol samting ol dispela man em Jehova i bin kirapim ol i kam long em ol inap mekim. (Jon 6:44) Maski ol i gat pasin kranki, Jisas i redi long bilip long ol. Bilong soim dispela samting, em i tilim sampela bikpela wok i go long ol disaipel. Em i givim ol wok bilong autim gutnius, na em i bilip olsem ol inap mekim dispela wok. (Matyu 28:19, 20) Buk Aposel i kamapim klia olsem ol i stap gut long wok em i bin tokim ol long mekim. (Aposel 2:41, 42; 4:33; 5:27-32) Tru tumas, Jisas i bin bihainim savetingting taim em i bilip long ol.

19. Olsem wanem Jisas i soim olsem em i “man bilong pasin isi na pasin daun”?

¹⁹ Olsem Sapta 20 i bin kamapim, Baibel i soim olsem pasin daun na pasin isi i poroman wantaim savetingting. Jehova i stap olsem nambawan gutpela piksa long dispela samting. Tasol olsem wanem long Jisas? Em i gutpela tru long lukim pasin daun Jisas i kamapim taim em i stap wantaim ol disaipel. Jisas i gutpela olgeta, olsem na em i winim ol tru. Tasol em i no daunim ol disaipel. I no gat wanpela taim em i mekim ol long pilim olsem ol i samting nating o ol i no inap mekim gut wok, nogat. Em i tingim mak bilong strong bilong ol, na em i no les kwik maski ol i gat pasin kranki. (Mak 14:34-38; Jon 16:12) Ol pikinini tu i no pret long em. Ol i laik go klostu long em, long wanem, ol i pilim olsem em i “man bilong pasin isi na pasin daun.”​—Matyu 11:29; Mak 10:13-16.

20. Olsem wanem Jisas i soim olsem em i redi long bihainim tingting bilong meri bilong narapela lain em pikinini bilong em i gat spirit nogut?

²⁰ Jisas i bihainim pasin daun bilong God long wanpela narapela bikpela rot. Em i isi long ol man, o redi long bihainim sampela tingting bilong ol taim pasin marimari i opim rot long mekim olsem. Olsem: Tingim taim wanpela meri bilong narapela lain i askim em long oraitim pikinini meri bilong em i gat spirit nogut. Long tripela rot, Jisas i soim olsem em bai no helpim em. Namba wan, em i no laik bekim tok long em; namba tu, em i tokaut stret olsem em i bin kam bilong helpim ol Juda, ol man bilong narapela lain, nogat; na namba tri, em i mekim wanpela tok piksa i kamapim klia dispela samting. Tasol dispela meri i no givap, na dispela i kamapim klia olsem em i gat strongpela bilip. Taim dispela narapela kain samting i kamap, Jisas i mekim wanem? Em i mekim samting em i bin tok em bai no inap mekim. Em i oraitim pikinini bilong dispela meri. (Matyu 15:21-28) Em i gat pasin daun tru, a? Na tingim, pasin daun em i bikpela samting bilong savetingting.

21. Bilong wanem yumi mas traim long bihainim pasin, toktok, na ol pasin bilong Jisas long mekim ol samting?

²¹ Yumi ken amamas tru long ol Gutnius i kamapim ol tok na pasin bilong man em savetingting bilong em i winim olgeta narapela man! Yumi mas tingim olsem Jisas i bihainim stret pasin bilong Papa bilong em. Taim yumi bihainim pasin, toktok, na pasin bilong Jisas long mekim ol samting, yumi bihainim savetingting i kam long God. Long sapta i kamap bihain, yumi bai lukim olsem wanem yumi ken bihainim savetingting bilong God long laip bilong yumi.