Yu “Laik” Helpim Ol Narapela?
1 Jisas i laikim tru ol man. Taim wanpela lepraman i askim Jisas long helpim em, Jisas i putim han long dispela man na em i tok: “Mi laik. Yu kamap klin.” (Mk. 1:40-42) Long wanem ol rot yumi inap bihainim pasin bilong Jisas long helpim ol narapela?
2 Ol Man i Laik Harim Tok: Olgeta wan wan long kongrigesen i gat wok long helpim ol man i laik harim tok long kamap ol manmeri i lotuim Jehova. Taim ol nupela man i kam long ol miting, tok gude long ol na kisim save long ol. Painim rot bilong strongim ol. Tok amamas long ol tok ol i bekim long ol miting, na tu, long hatwok ol i mekim bilong bihainim ol stiatok bilong Baibel long i stap bilong ol. Helpim ol long save olsem ol i ken kisim ol gutpela pren insait long kongrigesen.
3 Ol Wanbilip: Yumi gat wok long helpim ol “arapela manmeri i bilip long Bikpela” na yumi inap mekim olsem long planti rot. (Ga. 6:10) Planti ol i karim hevi bilong sik samting. Taim yu go lukim ol bilong strongim ol, pasin bilong yu long prenim ol inap helpim ol, na ating yu inap mekim ol narapela samting tu bilong helpim ol. Ating sampela ol i gat ol narapela hevi long i stap bilong ol. Kamapim olsem yu tingim gut ol na putim gut yau long tok bilong ol na strongim ol. (1 Te. 5:14) Yumi mas wok gut wantaim ol elda tu taim ol i mekim ol wok bilong ol. (Hi. 13:17) Taim yumi kamapim pasin bilong amamas long helpim ol narapela, yumi inap “helpim” tru ol wanbilip bilong yumi.—Kl. 4:11.
4 Famili: Yumi mas wok strong long bihainim pasin bilong Jisas long tingim gut ol man insait long famili bilong yumi yet. Pasin bilong tingim gut narapela i save kirapim ol papamama long ‘stretim gut ol pikinini bilong ol na skulim ol long tok bilong Bikpela.’ (Ef. 6:4) Ol pikinini tu inap kamapim pasin bilong tingim gut narapela na redim kwik ol samting bilong mekim famili-stadi, o bilong go long ol miting bilong kongrigesen, o wok autim tok. Ol pikinini i bikpela pinis ol i ken bihainim pasin sori bilong Jisas na helpim papamama long karim ol hevi ol i kisim taim ol i go lapun. Long ol dispela rot na ol narapela rot tu, yumi olgeta inap mekim pasin “God i laikim” long famili bilong yumi yet.—1 Ti. 5:4.
5 Taim yumi bihainim pasin bilong Jisas long helpim ol narapela, ating yumi inap daunim ol hevi na mekim famili bilong yumi yet na kongrigesen i pas gut wantaim. Na bikpela samting moa yet, yumi litimapim nem bilong Jehova, “em i as bilong olgeta pasin marimari na pasin sori.”—2 Ko. 1:3.