Bihainim Bilip Bilong Ol

Em i Stap Gut Long Bikman Maski Ol Traim i Painim Em

PITA i tingting planti na lukluk i go long pes bilong ol man i harim tok bilong Jisas. Ol i stap long haus lotu long Kaperneam. Haus bilong Pita i stap long dispela taun, na wok bisnis bilong em long kisim pis i stap long dispela hap long nambis bilong raunwara Galili, na planti pren bilong em, famili, na ol man em i save wok bisinis wantaim ol, ol tu i stap long dispela hap. Yumi ken ting, Pita i gat laik tru long ol man bilong dispela taun i tingim Jisas olsem em yet i save tingim, na ol tu i ken amamas tru long lain long Kingdom Bilong God long rot bilong dispela Bikpela Tisa. Tasol ating dispela i no kamap long dispela de we Jisas i kam long taun.

Planti i no putim yau moa. Sampela i toktok planti na sakim tok Jisas i autim. Tasol samting i bagarapim moa yet bel bilong Pita em pasin bilong sampela disaipel bilong Jisas. Pes bilong ol i no lait moa taim ol i lain long ol bikpela samting, ol i kisim ol nupela save, na ol i no amamas moa long lain long tok i tru. Nau pes bilong ol i drai, na ol i bel nogut. Sampela i tokaut olsem tok bilong Jisas i hevi tumas. Ol i no laik harim moa tok bilong em na ol i lusim haus lotu​—⁠na ol i lusim tu Jisas na i no bihainim em moa.

Em taim nogut long Pita na long ol aposel. Pita i no kliagut long tok Jisas i bin mekim long dispela de. Em i luksave olsem sapos i no gat wanpela man i kamapim mining bilong tok bilong Jisas, i gat as na ol man i no amamas long ol dispela tok. Tasol Pita bai mekim wanem? Dispela i no namba wan taim we samting i traim pasin bilong em long i stap gut long Bikman bilong em, na i no laspela taim dispela samting i kamap. Orait nau yumi laik save olsem wanem bilip i bin helpim Pita long winim ol traim na stap gut long Bikman.

Stap Gut Long Bikman Taim Ol Narapela i Lusim Em

Planti taim Pita i kirap nogut long samting Jisas i mekim. Samting Bikman bilong em i save mekim na ol tok bilong Em i narapela kain long samting ol man i ting Em bai mekim. Wanpela de paslain tasol long dispela, Jisas i bin wokim mirakel na givim kaikai long planti tausen man. Olsem na ol manmeri i laik mekim em i kamap king. Tasol planti i kirap nogut taim em i lusim ol na tokim ol disaipel bilong em long kalap long wanpela bot na go long Kaperneam. Taim ol disaipel i raun long wara long nait, ol i kirap nogut long lukim Jisas i wokabaut long biksi bilong raunwara Galili, na dispela i skulim Pita olsem bilip em i bikpela samting.a

Long moningtaim, ol i kisim save olsem ol manmeri i bin bihainim ol i go long narapela sait bilong raunwara. Tasol i no hangre long ol tok i tru bilong Baibel i kirapim ol long mekim olsem, nogat, ol i gat strongpela laik long lukim Jisas i wokim gen mirakel na kamapim kaikai. Jisas i krosim ol, long wanem, ol i tingting tasol long kisim ol samting bilong skin. Ol i toktok yet long dispela samting long haus lotu long Kaperneam we Jisas i kamapim gen sampela tok ol i no ting em bai kamapim bilong skulim ol long wanpela bikpela tok i tru, tasol i hatwok long ol i kliagut long en.

Jisas i no laik bai ol man i tingim em olsem rot bilong kisim kaikai bilong skin tasol, nogat, em i laik bai ol i mas tingim em olsem helpim i kam long God​—⁠olsem laip na i dai bilong em olsem man inap givim laip oltaim long ol. Olsem na em i kamapim wanpela tok piksa. Em i tok em yet i olsem mana, olsem dispela bret i kam daun long heven long taim bilong Moses. Taim sampela i no amamas long dispela tok, em i kamapim narapela tok piksa. Em i tokim ol man olsem sapos ol i laik kisim laip, orait ol i mas kaikai bodi na dringim blut bilong em. Taim em i mekim dispela tok, ol i tokaut strong olsem tok bilong em i hevi tumas. Sampela i tok: “Dispela tok em i hevi tumas. Husat inap long harim?” Planti disaipel bilong Jisas tu ol i lusim em na i no bihainim em moa.b​​—⁠Jon 6:​48-60, 66.

Pita bai mekim wanem? Ating em tu i kirap nogut long tok bilong Jisas. Em i no kliagut yet olsem Jisas i mas i dai bilong mekim laik bilong God. Tasol yu ting Pita i laik lusim Jisas olsem ol dispela disaipel husat i bin lusim Jisas long dispela de? Nogat; wanpela bikpela samting i mekim na Pita i narapela kain long ol. Em wanem samting?

Jisas i lukluk i go long ol aposel bilong em na em i tok: “Ating yupela tu i laik lusim mi na i go?” (Jon 6:67) Em i toktok long ol 12-pela aposel, tasol Pita i kirap long toktok. Planti taim dispela samting i kamap. Ating Pita i gat bikpela krismas moa, winim ol narapela. Maski i olsem, planti taim Pita i go pas long tokaut long ol samting; em i no save surik long kamapim tingting bilong em. Long dispela taim em i kamapim tingting bilong em long wanpela gutpela tok em planti man i save tingim: “Bikpela, bai mipela i go long husat? Tok bilong yu tasol i save givim laip i stap gut oltaim oltaim.”​—⁠Jon 6:⁠68.

Ating dispela tok i sutim tru bel bilong yu, a? Pita i bilip long Jisas na dispela i helpim em long kisim wanpela gutpela pasin tru​—⁠em pasin bilong stap gut long Bikman. Pita i luksave olsem i no gat narapela Man Bilong Kisim Bek ol man, Jisas tasol inap mekim, na em i kisim bek ol man long rot bilong ol tok bilong em​—⁠ol tok bilong em long Kingdom Bilong God. Pita i bin save olsem maski i gat sampela samting em i kirap nogut long en, i no gat narapela hap em inap go long en sapos em i laik bai God i orait long em na em inap kisim laip oltaim.

Olsem wanem? Yu gat wankain tingting? Sori tru, planti manmeri long nau ol i tok ol i laikim tru Jisas tasol ol i no stap gut long em. Sapos man i laik i stap gut long Krais, em i mas i gat wankain tingting olsem Pita long ol tok bilong Jisas. Yumi mas lainim ol dispela tok, kliagut long insait bilong en, na bihainim long i stap bilong yumi​—⁠maski yumi kirap nogut long ol dispela tok, long wanem, ol i narapela kain long tingting o laik bilong yumi yet. I gat wanpela rot tasol long kisim laip oltaim em Jisas i laik yumi ken kisim, em yumi mas i stap gut long em.

Pita i Stap Gut Maski Bikman i Stretim Em

I no longtaim bihain long dispela taim we ol i bin bisi tru, Jisas i kisim ol aposel bilong em na sampela disaipel i go long longpela rot i go long hap not. Maunten Hermon i stap long hap not tru bilong Graun Bilong Promis na i gat ais antap long en, na sampela taim ol man i stap long raunwara Galili ol inap lukim dispela maunten. Taim ol dispela lain i wok long kam klostu, maunten i luk bikpela moa, na ol i wokabaut i go antap long ol ples klostu long Sisaria Filipai.c Ol i stap long dispela naispela ples, na ol inap lukim planti hap bilong Graun Bilong Promis long hap saut, orait nau Jisas i kamapim wanpela bikpela askim long dispela lain.

Jisas i laik save: “Ol manmeri i save tok, mi husat tru?” Yumi inap piksaim olsem Pita i lukluk long ai bilong Jisas, na em i pilim tru gutpela pasin na bikpela save bilong Bikman bilong em. Jisas i laik save long tingting bilong ol manmeri em ol i harim tok bilong em; ol i gat wanem tingting long ol samting ol i bin lukim na harim. Ol disaipel bilong Jisas i bekim dispela askim, na ol i kamapim sampela tingting kranki bilong ol man long Jisas em i husat tru. Tasol Jisas i laik save long sampela samting moa. Ol disaipel em ol i pas gut wantaim em, ol tu i gat wankain tingting kranki? Em i askim ol: “Yupela yet i tok mi husat?”​—⁠Luk 9:​18-22.

Long dispela taim gen, Pita i bekim kwik tok. Em i kamapim klia tingting i stap long bel bilong planti man. Em i tok: “Yu dispela man God i bin makim bilong kisim bek ol manmeri bilong en. Yu Pikinini Bilong God i gat laip.” Yumi ken piksaim olsem Jisas i amamas na i smail long Pita na i tok amamas long em. Jisas i tokim Pita gen olsem God Jehova​—⁠na i no ol man​—⁠i kamapim dispela bikpela tok i tru long ol man i bilip tru. Pita inap luksave long wanpela bikpela tok i tru em Jehova i bin kamapim​—⁠husat tru em dispela Mesaia, olsem Krais, em Jehova i bin tok promis long salim em i kam.​—⁠Matyu 16:​16, 17.

Wanpela tok profet bilong bipo i tok dispela Krais em dispela ston ol kamda i ting em i nogut na ol i rausim. (Song 118:22; Luk 20:17) Jisas i tingim ol dispela tok profet, na em i kamapim olsem Jehova bai wokim kongrigesen antap long dispela ston, em nau tasol Pita i bin tokaut long en.d Orait nau em i givim sampela bikpela wok long Pita insait long dispela kongrigesen. Em i no tokim Pita olsem em i winim ol narapela aposel, olsem sampela i bin ting, nogat, tasol em i givim bikpela wok long em. Em i givim Pita “ol ki bilong kingdom.” (Matyu 16:19) Em wok bilong Pita long opim rot i go long Kingdom Bilong God long 3-pela narapela narapela lain​—⁠pastaim long ol Juda, bihain long ol Samaria, na laspela long ol man bilong ol narapela lain, olsem ol lain i no Juda.

Tasol Jisas i tok ol man i kisim planti samting, ol i mas bekim planti samting, na dispela tok i kamap ples klia long samting i painim Pita. (Luk 12:48) Jisas i kamapim sampela bikpela tok i tru long Mesaia, na insait long dispela tok em i stori tu long em bai karim planti pen na i dai long Jerusalem. Pita i bel hevi long harim dispela tok. Em i kisim Jisas i go long arere na i krosim Jisas olsem: “Bikpela, nogat tru. Dispela samting i no inap kamap long yu.”​—⁠Matyu 16:​21, 22.

Pita i laik mekim gutpela pasin, olsem na ating em i kirap nogut long bekim bilong Jisas. Jisas i givim baksait long Pita, na lukluk i go long ol narapela disaipel​—⁠ating ol tu i bin i gat wankain tingting​—⁠na em i tok: “Satan, yu go baksait long mi. Yu laik pasim rot bilong mi. Yu no bihainim tingting bilong God. Nogat. Yu bihainim tingting bilong ol man tasol.” (Matyu 16:23; Mak 8:​32, 33) Tok bilong Jisas i bilong givim gutpela skul long yumi olgeta. Em isi tru long yumi bihainim tingting bilong ol man na i no bihainim tingting bilong God. Sapos olsem, maski yumi laik helpim narapela, yumi inap kamap olsem man i helpim laik bilong Satan na i no helpim laik bilong God. Pita i mekim wanem?

Pita i save, Jisas i no tingim em olsem em i Satan tru, nogat. Jisas i no bin toktok long Pita long wankain pasin olsem em i bin toktok long Satan. Long Satan, Jisas i bin tok: “Satan, yu klia”; long Pita em i tok: “Go baksait long mi.” (Matyu 4:10) Jisas i no sakim dispela aposel​—⁠em i lukim planti gutpela samting long em​—⁠tasol Em i stretim tingting kranki bilong Pita long dispela samting. I no hatwok long save olsem Pita i no ken i stap long fran bilong Bikman bilong em olsem samting bilong pundaunim em, nogat, em i mas i go baksait long Jisas na bihainim em.

Olsem wanem? Pita i tok pait, kros, o em i bel hevi? Nogat; long pasin daun em i larim Jisas i stretim em. Long dispela taim gen em i stap gut long Jisas. Olgeta man i bihainim Krais, sampela taim ol i mas kisim tok bilong stretim ol. Sapos long pasin daun yumi orait long tok bilong stretim yumi na lain long en, yumi inap go klostu moa long Jisas Krais na Papa bilong em, God Jehova.​—⁠Sindaun 4:⁠13.

Stap Gut Long Bikman na Kisim Gutpela Samting

I no longtaim na Jisas i mekim narapela tok: “Mi tok tru long yupela, sampela man i sanap hia bai ol i no i dai yet, na bai ol i lukim Pikinini Bilong Man i kam olsem king.” (Matyu 16:28) Yumi ken ting olsem Pita i laik save tru long dispela tok. Wanem mining bilong dispela tok bilong Jisas? Ating Pita i ting, nau tasol em i kisim strongpela tok bilong stretim em na nogut dispela i makim olsem em i no inap kisim dispela gutpela blesing.

Tasol wanpela wik samting bihain, Jisas i kisim Jems, Jon, na Pita i go long wanpela “maunten i antap moa”​—⁠ating em maunten Hermon, i stap sampela kilomita longwe long ol. Ating em nait, long wanem, ai bilong 3-pela man hia i hevi tru na ol i laik slip. Tasol taim Jisas i beten, wanpela samting i kamap na dispela i rausim aislip bilong ol.​—⁠Matyu 17:1; Luk 9:​28, 29, 32.

Long ai bilong ol, bodi bilong Jisas i senis na kamap narakain. Pes bilong em i kirap lait, i go inap long pes i lait olsem san. Klos bilong em i kamap waitpela tru. Orait nau tupela man i kamap na i stap wantaim Jisas, wanpela i makim Moses na narapela i makim Elaija. Ol i toktok wantaim em ‘long ol samting em bai mekim long Jerusalem, na em bai i lusim dispela graun na i go’​—⁠olsem em i toktok long indai na kirap bek bilong em. I klia tru olsem Pita i mekim tok kranki taim em i tokaut olsem dispela samting nogut i no inap painim Jisas!​—⁠Luk 9:​30, 31.

Pita i pilim olsem em i mas insait long dispela driman. I luk olsem Moses na Elaija i laik lusim Jisas, olsem na Pita i tok: “Tisa, yumi stap hia, em i gutpela. Mipela i ken wokim tripela haus win, wanpela bilong yu, na wanpela bilong Moses, na wanpela bilong Elaija.” Yumi ken save olsem dispela tupela man i stap long driman, em tupela wokman bilong Jehova em ol i bin dai longtaim pinis, ol i no gat wok long wanpela haus win. Pita i no kliagut long tok em i mekim. Tasol olsem wanem? Gutpela pasin bilong Pita i kirapim yu long laikim em?​—⁠Luk 9:⁠33.

Long dispela nait yet, Pita na Jems na Jon i kisim narapela gutpela samting. Wanpela klaut i karamapim ol antap long maunten. Long dispela klaut ol i harim wanpela nek​—⁠em nek bilong God Jehova! Em i tok: “Dispela em i Pikinini bilong mi. Mi makim em pinis bilong mekim wok bilong mi. Yupela harim tok bilong em.” Orait nau dispela driman i pinis, na ol yet tasol i stap wantaim Jisas long maunten.​—⁠Luk 9:​34-36.

Dispela driman i wanpela gutpela presen long Pita​—⁠na long yumi tu! Planti yia bihain em i tok long dispela gutpela samting em i bin lukim long dispela nait olsem, “long ai bilong mipela yet, mipela i bin lukim lait na strong bilong God,” olsem em i lukim piksa bilong Jisas olsem bikpela King long heven. Dispela driman i bin strongim planti tok profet long Baibel na bilip bilong Pita, na redim em long karim ol hevi bai kamap long em. (2 Pita 1:​16-19) Dispela driman inap helpim yumi, wankain olsem i bin helpim Pita, sapos yumi stap gut long Bikman em Jehova i bin makim bilong bosim yumi, kisim skul long em, redi long larim em i stretim yumi, na long pasin daun yumi wok long bihainim em long olgeta wan wan de.

[Ol Futnot]

[Blok/Piksa long pes 28]

Husat Em Dispela Ston?

“Mi tokim yu olsem. Yu Pita, na bai mi wokim sios bilong mi antap long dispela ston.” (Matyu 16:18) Planti man i ting, dispela tok Jisas i bin mekim long aposel Pita i makim olsem Pita i as bilong sios, olsem kongrigesen Kristen. Misin Katolik i skulim ol man olsem Jisas i bin givim namba long Pita bilong bosim ol narapela aposel, i olsem Jisas i mekim em i kamap namba wan pop. Olsem na ol i raitim tok bilong Matyu 16:18 long tokples Latin long ol bikpela leta tru i winim sais bilong wanpela man, long haus lotu Saint Peter’s Basilica long Rom.

Olsem wanem? Jisas i laik tok olsem Pita em dispela ston we Jisas bai wokim kongrigesen antap long en? Nogat. Orait, yumi ken skelim 3-pela as na yumi ken save tru long dispela samting. Namba wan, ol narapela aposel i stap long taim Jisas i bin mekim dispela tok na ol i no kisim dispela tingting long tok bilong Jisas. Sapos Jisas i givim Pita dispela bikpela namba long ai bilong ol, orait i no gat as na bihain ol i tok pait planti taim long husat bilong ol i namba wan. (Mak 9:​33-35; Luk 22:​24-26) Namba tu, bihain aposel Pol i kamapim olsem dispela ston em Jisas Krais yet, na i no Pita. (1 Korin 3:11; 10:⁠4) Namba tri, planti yia bihain Pita yet i soim olsem em i no ting em i dispela ston, nogat. Em i tok Jisas i dispela “namba wan ston” ol profet i bin tokaut long em inap longtaim pinis, na God yet i bin makim em.​—⁠1 Pita 2:​4-8.

Tasol sampela i tok strong olsem nem bilong Pita i makim “Ston,” olsem na Jisas i bin makim Pita olsem dispela ston. Tasol tru tru, nem bilong Pita i no makim “ston” olsem dispela ves i kolim. Nem bilong Pita i makim “Wanpela Hap Ston.” Olsem na wanem mining bilong dispela tok bilong Jisas? I olsem Jisas i tokim Pita: “Yu, em man mi kolim Pita, olsem Ston, yu bin luksave long husat tru i dispela ‘ston,’ em Krais, em man bai stap olsem as bilong kongrigesen Kristen.” Man! Pita i kisim gutpela blesing tru long helpim wok bilong kamapim dispela bikpela tok i tru.

[Piksa long pes 24, 25]

Pita i stap gut long Bikman maski Bikman i bin stretim em

[Piksa long pes 26]

Pita i stap gut long Bikman na em i kisim gutpela blesing long lukim driman