Lain Bilong God i Mas Laikim Pasin Bilong Mekim Gut Long Man
“Bikpela i tokim yumi pinis . . . yumi mas bihainim stretpela pasin, na laikim tru ol arapela man [“laikim pasin bilong mekim gut long man,” NW], na daunim tingting bilong yumi yet na i stap wanbel wantaim God.”—MAIKA 6:8.
1, 2. (a) Bilong wanem yumi no ken kirap nogut long tok bilong Jehova olsem lain bilong em i mas mekim gut long ol man? (b) Gutpela yumi skelim wanem ol askim?
JEHOVA em i God bilong mekim gut long man. (Rom 2:4; 11:22) Namba wan man na meri, Adam na Iv, i mas amamas tru long dispela pasin! Long gaden Iden, ol i stap namel long ol samting i soim olsem God i mekim gut long ol man, em ol inap kisim amamas long ol dispela samting. Na i kam inap long nau God i mekim gut long olgeta man, maski sampela em ol man i no save tok tenkyu na ol man nogut.
2 God i wokim man i kamap olsem em yet, olsem na ol man inap tru long kamapim ol pasin bilong God. (Stat 1:26) Yumi no kirap nogut long tok bilong Jehova olsem yumi mas kamapim pasin bilong mekim gut long man. Olsem Maika 6:8 i tok, lain bilong God i mas “laikim pasin bilong mekim gut long man.” Tasol dispela pasin em i wanem samting? Olsem wanem em i poroman wantaim ol arapela pasin bilong God? Ol man inap kamapim pasin bilong mekim gut long man, olsem na bilong wanem graun i pulap long hatpela pasin na ol hevi? I gat wanem as na yumi ol Kristen i mas wok strong long mekim dispela pasin long ol arapela?
Mekim Gut Long Man, Em i Wanem Samting?
3. Bai yu stori olsem wanem long pasin bilong mekim gut long man?
3 Mekim gut long man i olsem yu mekim ol samting i soim olsem yu tingim i stap bilong em. Yu kamapim dispela pasin taim yu mekim samting bilong helpim man na givim gutpela tok long em. I makim olsem yu mekim gutpela pasin long man na yu no givim hevi long em. Man bilong mekim gut long ol arapela em i gat pasin pren, pasin isi, gutpela pasin, na em i pilim hevi bilong man. Em i tingim gut ol arapela na redi long givim samting. Aposel Pol i tokim ol Kristen: “Yupela i mas sori tru long ol arapela na mekim gut long ol. Yupela i mas daunim yupela yet na mekim pasin isi long ol man, na yupela i no ken belhat kwik long ol man i rongim yupela.” (Kolosi 3:12) Olsem na mekim gut long man i bikpela samting long olgeta Kristen tru.
4. Olsem wanem Jehova i bin go pas long mekim gut long man?
4 God Jehova i go pas long mekim gut long man. Olsem Pol i tok, ‘God i laikim yumi na mekim gutpela pasin long yumi. Na taim dispela pasin bilong en i kamap ples klia, em yet i kisim bek yumi. Em i wasim yumi na yumi kamap olsem ol nupela pikinini, na holi spirit i givim nupela laip long yumi.’ (Taitus 3:4, 5) God i yusim blut bilong Jisas bilong “wasim,” o mekim i kamap klin, ol Kristen em holi spirit i makim, dispela i makim olsem em i yusim ofa bilong Krais bilong helpim ol. Na ol i kamap nupela long rot bilong holi spirit, ol i kamap “nupela man tru” na stap olsem pikinini bilong God em holi spirit i makim ol. (2 Korin 5:17) Na tu, God i laikim na mekim gut long “planti manmeri tru” em ol i bin “wasim ol klos bilong ol long blut bilong Pikinini Sipsip, na ol klos i kamap waitpela.”—KTH 7:9, 14; 1 Jon 2:1, 2.
5. Bilong wanem ol man em spirit bilong God i stiaim wokabaut bilong ol, ol i mas mekim gut long man?
5 Pasin bilong helpim man, o mekim gut long man, em i wanpela pasin holi spirit bilong God i save kamapim. Pol i tok: ‘Holi Spirit i save kirapim yumi long laikim ol arapela, amamas, stap bel isi, i no belhat kwik, helpim ol man, mekim gutpela pasin, wokabaut stret oltaim, stap isi, na daunim laik bilong olpela bel.’ (Galesia 5:22, 23) Olsem na, ol man em spirit bilong God i stiaim wokabaut bilong ol, ol i mas mekim gut long man, laka?
I No Makim Olsem Man i No Strong
6. Wanem samting i mekim na pasin bilong mekim gut long man i makim olsem man i no gat strong? Bilong wanem i olsem?
6 Sampela i ting pasin bilong mekim gut long man i makim olsem man i no gat strong. Ol i ting man i mas mekim hatpela pasin na bai ol arapela i ken lukim strong bilong em. Tasol dispela tingting i no stret. Bilong mekim gut long ol arapela, man i mas i gat strong. Na em i mas i gat strong na bai em i no mekim gut long man long taim i no stret long mekim. Pasin bilong mekim gut long man em i wanpela pasin holi spirit bilong God i kamapim, olsem na dispela i no inap makim olsem man i no gat strong na em i no gat tok long pasin i no stret, nogat. Tasol pasin bilong mekim gut long man long taim em i no stret long mekim, dispela i makim olsem man i no gat strong na i kirapim em long orait long pasin i no stret.
7. (a) Olsem wanem Eli i soim olsem em i no strong? (b) Bilong wanem ol elda i mas was gut, nogut ol i marimari long man long taim i no stret long mekim?
7 Tingim hetpris bilong Israel, em Eli. Em i no stretim tupela pikinini man bilong em, Hopni na Finias, ol i mekim wok pris long haus sel bilong God. Ol i no amamas long hap bilong ofa em Lo Bilong God i makim bilong ol, ol i tokim wokman long kisim sampela abus long man i laik givim ofa, paslain long gris bilong abus i smok long alta. Tupela pikinini bilong Eli i pamuk wantaim ol meri i wok long dua bilong haus sel bilong God. Tasol Eli i no rausim Hopni na Finias long wok, nogat, em i krosim ol liklik tasol. (1 Samuel 2:12-29) Yumi no kirap nogut olsem long dispela taim “Bikpela i no bin givim planti tok long ol Israel.” (1 Samuel 3:1) Ol elda Kristen i mas was gut, nogut ol i marimari long man long taim i no stret long mekim na nau dispela man i bagarapim kongrigesen. Man i bihainim tru pasin bilong mekim gut long man, em i no inap orait long ol tok na pasin nogut i brukim lo bilong God.
8. Olsem wanem Jisas i bin kamapim pasin bilong mekim gut long ol arapela?
8 Man i stap gutpela piksa, em Jisas Krais, i no gat wanpela taim em i mekim gut long man long taim i no stret long mekim olsem. Em i nambawan man bilong mekim gut long ol arapela. Olsem: ‘Em i sori tru long ol manmeri, long wanem, ol i stap nogut tru, olsem ol sipsip i no gat wasman.’ Ol manmeri i gat gutpela bel ol i no pret long toktok wantaim Jisas o long bringim ol pikinini bilong ol i kam long em. Tingim pasin sori na pasin bilong mekim gut long man em i bin kamapim taim em i ‘holim ol pikinini na askim God long mekim gut long ol.’ (Matyu 9:36; Mak 10:13-16) Jisas i save mekim gut long man, tasol tu em i strong long mekim ol pasin Papa bilong em long heven i tok em i stret. I no gat wanpela taim Jisas i orait long pasin nogut, strong em i kisim long God i inapim em long tokaut long asua bilong ol hetman bilong lotu em ol i man bilong tupela maus. Olsem Matyu 23:13-26 i tok, planti taim em i kolim tok olsem: “Yupela saveman bilong lo na yupela Farisi, yupela lukaut. Yupela i man bilong tupela maus.”
Mekim Gut Long Man na Sampela Arapela Pasin Bilong God
9. Olsem wanem pasin bilong mekim gut long man i poroman wantaim pasin bilong i no belhat kwik na gutpela pasin?
9 Mekim gut long man i poroman wantaim sampela arapela pasin em spirit bilong God i save kamapim. Olsem “pasin bilong i no belhat kwik” na “gutpela pasin.” Em nau, man i laik mekim gut long ol arapela em i kamapim dispela pasin taim em i no belhat kwik. Na tu, em i isi long ol man husat i no bihainim pasin bilong mekim gut long ol arapela. Mekim gut long man i wankain liklik olsem gutpela pasin, long wanem, planti taim man i kamapim long rot bilong mekim ol samting bilong helpim ol arapela. Sampela taim, tok Grik em Baibel i yusim bilong makim “mekim gut long man” ol inap tanim olsem “gutpela pasin.” Ol Kristen long taim bilong ol aposel i kamapim dispela pasin na i mekim ol haiden i kirap nogut tru, olsem Tertullian i tok, ol haiden i kolim ol lain i bihainim Jisas ‘ol manmeri bilong mekim gut long ol man.’
10. Olsem wanem pasin bilong mekim gut long man i poroman wantaim pasin laikim?
10 Pasin laikim i poroman wantaim pasin bilong mekim gut long man. Jisas i tok long ol disaipel bilong em olsem: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Pol i tok long dispela pasin laikim olsem: “Man i save givim bel bilong en long ol arapela [“mekim pasin laikim,” NW ] em i no save kros kwik na bekim pasin nogut ol i mekim long em. Nogat. Em i save mekim gutpela pasin long olgeta man.” (1 Korin 13:4) Na tu, pasin bilong mekim gut long man i poroman wantaim gutpela-pasin-sori. Tok Hibru ol i tanim olsem “gutpela-pasin-sori” i makim pasin bilong laikim tru na givim bel long wanpela samting na i stap olsem i go inap long taim dispela samting i mekim pinis wok bilong en. Jehova i kamapim gutpela-pasin-sori long kain kain rot. Em i kamapim dispela pasin long rot bilong kisim bek man na lukautim man.—Song 6:4; 40:11; 143:12.
11. Gutpela-pasin-sori bilong God i strongim yumi olsem wanem?
11 Gutpela-pasin-sori bilong Jehova i pulim ol man i kam long em. (Jeremaia 31:3) Taim ol wokboi bilong God i mas i gat man i helpim ol o kisim bek ol, ol i save olsem God bai mekim gutpela-pasin-sori long ol. Ol i no bilip nating long dispela samting. Olsem na ol i beten na bilip tru olsem man bilong raitim song husat i tok: “Tasol mi bilip bai yu marimari long mi oltaim. Na mi amamas long yu bai helpim mi.” (Song 13:5) Pasin laikim bilong God i stap olsem tasol, olsem na ol wokboi bilong em inap bilip olgeta long em. Dispela tok i strongim ol: “Bikpela i no inap lusim ol manmeri bilong en. Tru tumas, em i no inap givim baksait long ol manmeri bilong en.”— Song 94:14.
Bilong Wanem Hatpela Pasin i Pulap?
12. Wok bos nogut i bin kirap long wanem taim? Olsem wanem dispela wok bos i kamap?
12 Samting i bin kamap long gaden Iden i helpim yumi long bekim askim hia. Bihain liklik long taim God i wokim ol man, wanpela spirit i kirap bihainim pasin bilong tingim em yet na hambak, em i mekim samting bilong kamap bos bilong graun. Olsem na em i kamap “hetman i save bosim dispela graun,” em hetman nogut. (Jon 12:31) Bihain em i kisim nem Satan, nambawan birua bilong God na man wantaim. (Jon 8:44; KTH 12:9) Laik bilong em long bosim ol samting olsem gutpela wok king bilong Jehova i bosim, dispela i kamap ples klia sotpela taim bihain long God i wokim Iv. Olsem na wok bos nogut i kamap taim Adam i givim baksait long wok bos bilong God, em i sakim pasin bilong God long mekim gut long em. (Stat 3:1-6) Tasol i no olsem Adam na Iv i bosim ol yet, Satan, man bilong tingim em yet na hambak, em i stap bos bilong ol.
13-15. (a) Wanem sampela samting i kamap taim man i sakim wok bos bilong Jehova? (b) Bilong wanem hatpela pasin i pulap long dispela graun?
13 Tingim sampela hevi dispela i kamapim. Adam na Iv i raus long hap bilong graun em i wanpela paradais. Pastaim ol i stap long gutpela hap i no hatwok long kisim gutpela kumu na prut, bihain ol i stap ausait long gaden Iden na karim hevi. God i bin tokim Adam: ‘Yu bin harim tok bilong meri bilong yu na kaikai pikinini bilong dispela diwai mi bin tambuim yu long kaikai. Olsem na nau bai mi bagarapim graun, na ol kaikai bai i no inap kamap gut long en. Oltaim bai yu wok hat tru bilong mekim kaikai i kamap long graun. Ol rop i gat nil na ol gras nogut bai i kamap na karamapim gaden bilong yu.’ Tok bilong nogutim graun i makim olsem wok bilong planim na kisim kaikai bai i hatwok tru. Ol tumbuna bilong Adam i pilim tru hevi bilong dispela graun i gat ol gras nogut na nil long en, olsem na papa bilong Noa, em Lamek, em i tok long ‘graun Bikpela i bin mekim strongpela tok long bagarapim na ol i mas hatwok tru long mekim kaikai i kamap gut.’—Stat 3:17-19; 5:29.
14 Pastaim Adam na Iv i stap bel isi, tasol bihain ol i stap wantaim hevi. God i tokim Iv: “Bai mi givim yu bikpela hevi long taim yu gat bel. Na bai yu gat bikpela pen long taim yu karim pikinini. Tasol bai yu gat bikpela laik yet long man bilong yu, na bai em i bosim yu.” Bihain, Kein, namba wan pikinini bilong Adam na Iv, em i mekim hatpela pasin na kilim i dai brata bilong em Abel.—Stat 3:16; 4:8.
15 Aposel Jon i tok: “Graun olgeta em i stap aninit long strong bilong Satan.” (1 Jon 5:19) Olsem bos bilong graun, ol manmeri long nau i kamapim ol pasin nogut olsem pasin bilong tingim ol yet na pasin hambak. Olsem na yumi no kirap nogut long hatpela pasin i pulap long graun! Tasol em bai i no inap stap olsem tasol. Jehova bai stretim ol samting na bai pasin sori na pasin bilong mekim gut long man i stap taim Kingdom bilong em i bosim ol samting, hatpela pasin, nogat.
Ol Man i Stap Aninit Long Kingdom Bai Mekim Gut Long Arapela
16. Bilong wanem pasin bilong mekim gut long man i bikpela samting long wok bos bilong God long rot bilong Krais Jisas? Dispela i makim olsem yumi mas mekim wanem?
16 Jehova na King em i makim bilong bosim Kingdom Bilong Em, Krais Jisas, i putim mak olsem lain ol i bosim i mas i gat nem olsem ol i man bilong mekim gut long ol arapela. (Maika 6:8) Jisas Krais i helpim yumi long save olsem wanem pasin bilong mekim gut long man i bikpela samting long wok bos God i givim em. (Hibru 1:3) Yumi ken luksave long dispela samting taim Jisas i kamapim asua bilong ol hetman bilong lotu giaman, ol i putim planti hevi long ol manmeri. Em i tok: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela. Yupela kisim save long mi na aninit long tok bilong mi, . . . long wanem, mi save mekim pasin isi long ol man na mi save daunim mi yet. Na bai ol samting i no ken givim hevi long yupela na bai yupela i kisim malolo. . . . Na samting mi givim yupela bilong karim, em i no hevi.” (Matyu 11:28-30) Planti hetman bilong graun, maski ol i hetman bilong lotu o bilong narapela samting, ol i save daunim strong bilong ol manmeri long rot bilong planti tumas lo na ol kain kain wok nating. Tasol samting Jisas i tok lain bilong em i mas mekim, dispela i stret long samting ol i mas i gat na long strong bilong ol. Wok bos bilong em i givim nupela strong na mekim gut tru long man! Dispela i kirapim yumi long bihainim pasin bilong em na mekim gut long ol arapela, a?—Jon 13:15.
17, 18. Bilong wanem yumi ken bilip tru olsem ol lain i wok king wantaim Krais long heven na ol wokman bilong em long graun ol bai kamapim pasin bilong mekim gut long man?
17 Tok Jisas i mekim long ol aposel i soim olsem wanem wok bos bilong Kingdom Bilong God bai i narapela olgeta long wok bos bilong ol man. Baibel i tok ol disaipel i tok pait long husat em i namba wan bilong ol. Na Jisas i tokim ol olsem: “Yupela i save, ol king bilong ol arapela lain i save strong tumas long bosim ol lain bilong ol. Na ol bikman bilong ol i save strong tumas long ol manmeri i mas bihainim olgeta tok bilong ol. Tasol dispela pasin i no ken i stap namel long yupela. Nogat. Man i laik i stap bikman namel long yupela, em i mas i stap wokman bilong yupela.” Na em i tok moa: “Husat em i namba wan? Ating man i sindaun kaikai o wokman i sutim kaikai na bringim i kam long en? Namba wan em dispela man i sindaun kaikai, em tasol. Tasol mi stap namel long yupela olsem wokman bilong helpim yupela.”—Matyu 20:25, 26; Luk 22:24-27.
18 Ol hetman bilong graun i laik kamapim olsem ol i bikman long rot bilong “strong tumas long” ol manmeri na long rot bilong kisim ol biknem, ol i ting ol biknem olsem i mekim na ol i winim ol man ol i bosim. Tasol Jisas i tok bikman tru em man i helpim ol arapela—olsem givim bel na wok oltaim long mekim olsem. Ol lain bilong mekim wok king wantaim Krais long heven o mekim wok bilong em hia long graun, ol i mas wok strong long bihainim pasin daun bilong em na pasin bilong em long mekim gut long man.
19, 20. (a) Jisas i tok wanem bilong kamapim olsem pasin bilong Jehova long mekim gut long man em i bikpela tru? (b) Yumi ken mekim wanem bilong bihainim pasin bilong Jehova long mekim gut long man?
19 Yumi ken skelim narapela gutpela tok Jisas i givim. Bilong soim olsem pasin bilong Jehova long mekim gut long man i bikpela tru, Jisas i tok: “Sapos yupela i laikim tasol ol man i save laikim yupela, orait husat bai i ting yupela ol gutpela manmeri? Ol man bilong mekim sin ol tu i save laikim ol man i laikim ol. Na sapos yupela i mekim gutpela pasin long ol man i mekim gutpela pasin long yupela, orait husat bai i ting yupela ol gutpela manmeri? Ol man bilong mekim sin ol tu i save mekim wankain pasin. . . . Tasol yupela i mas laikim ol birua bilong yupela. Yupela i mas mekim gutpela pasin long ol. . . . Yupela i mekim olsem, na bihain bai yupela i gat bikpela pe moa, na bai yupela i stap pikinini bilong God Antap Tru. Em i save mekim gutpela pasin tu long ol man i no save tenkyu long em na long ol man nogut. Yupela i mas sori long ol man, olsem Papa bilong yupela em i save sori long ol.”—Luk 6:32-36.
20 Man i mekim gut long ol arapela olsem God i save mekim, em i no tingim em yet. Em i no ting narapela i mas bekim bek sampela samting long em. Jehova i mekim gut long man na “mekim san bilong en i kamap antap long ol man nogut na long ol gutpela man wantaim.” (Matyu 5:43-45; Aposel 14:16, 17) Bilong bihainim pasin bilong Papa bilong yumi long heven, yumi no mekim nogut long ol man i no tok tenkyu, nogat, yumi mekim gutpela pasin long ol, na yumi mekim olsem long ol man i bin birua long yumi tu. Taim yumi mekim gut long man, yumi soim Jehova na Jisas olsem yumi laik stap taim Kingdom Bilong God i bosim graun, long dispela taim olgeta manmeri bai bihainim pasin bilong mekim gut long man na ol arapela pasin bilong God.
Bilong Wanem Yumi Mas Kamapim Dispela Pasin?
21, 22. Bilong wanem yumi mas kamapim pasin bilong mekim gut long man?
21 Mekim gut long man em i bikpela samting long wanpela Kristen tru. Em i soim olsem spirit bilong God i stap long yumi. Na tu, taim yumi kamapim pasin bilong mekim gut long man, yumi bihainim God Jehova na Krais Jisas. Na em wanpela pasin yumi mas bihainim sapos yumi laik stap taim Kingdom Bilong God i bosim graun. Olsem na, yumi mas laikim tumas pasin bilong mekim gut long man na lain long kamapim dispela pasin.
22 Olsem wanem yumi ken kamapim pasin bilong mekim gut long man? Neks stadi bai stori long dispela.
Bai Yu Bekim Olsem Wanem?
• Pasin bilong mekim gut long man em i wanem samting?
• Bilong wanem hatpela pasin i pulap long graun?
• Olsem wanem yumi save pasin bilong mekim gut long man bai stap strong taim Kingdom Bilong God i bosim graun?
• Bilong wanem pasin bilong mekim gut long man i bikpela samting long ol man i laik stap taim Kingdom Bilong God i bosim graun?
[Piksa long pes 13]
Ol elda Kristen i mas givim bel long mekim gut long lain sipsip
[Piksa long pes 15]
Ol wokboi bilong Jehova inap bilip tru long gutpela-pasin-sori bilong Jehova long taim bilong hevi
[Ol Piksa long pes 16]
Jehova i mekim gut long ol man na larim san i lait na ren i pundaun long olgeta manmeri