“Mi Soim Pasin Long Yupela”
“Yupela i kamap Kristen longpela taim pinis, na inap yupela i wok long skulim ol arapela long ol tok bilong God.”—HIBRU 5:12.
1. I gat wanem as na Kristen inap ting tok bilong Hibru 5:12 i sutim em liklik?
OLSEM WANEM? Taim yu ritim as skripsa bilong dispela stori, yu pilim olsem dispela tok i sutim yu liklik? Sapos olsem, orait i no yu wanpela tasol. Yumi ol disaipel bilong Krais i save olsem yumi mas mekim wok tisa. (Matyu 28:19, 20) Yumi save taim i sot pinis, olsem na yumi mas mekim gut dispela wok inap tru long skel bilong yumi. Na tu, yumi save olsem wok tisa bilong yumi inap helpim ol man yumi lainim long abrusim bagarap na i stap laip! (1 Timoti 4:16) Olsem na yumi mas askim yumi yet: ‘Mi gutpela tisa? Olsem wanem mi inap mekim gut moa dispela wok?’
2, 3. (a) Wanpela tisa i tok wanem samting i nambawan bikpela samting long mekim gut wok tisa? (b) Jisas i soim wanem pasin long yumi long mekim wok tisa?
2 I no olsem dispela samting i mas mekim na yumi bel hevi, nogat. Sapos yumi tingim wok tisa i olsem samting yumi mas lain gut long mekim na em tasol, ating bai yumi pilim olsem i hatwok tumas long mekim gut dispela wok. Tasol pasin bilong save gut long mekim wok tisa, dispela i no nambawan bikpela samting, nogat; i gat wanpela samting i bikpela moa. Tingim tok wanpela tisa i bin raitim long wanpela buk i stori long dispela samting: “Bilong mekim gutpela wok tisa, i no olsem yumi mas save gut long kain kain pasin o stail bilong mekim, nogat. . . . Bilong mekim gut wok tisa, man i mas i gat pasin sori. Dispela em i bikpela samting.” Tru, em i tingim wok tisa long ol skul samting. Tasol ating tok bilong em inap stret moa long wok tisa em yumi ol Kristen i save mekim. Olsem wanem dispela i olsem?
3 Man i stap olsem gutpela piksa yumi ken bihainim long mekim wok tisa, em Jisas Krais, na em i tokim ol disaipel: “Mi soim pasin long yupela.” (Jon 13:15) Jisas i tok long em i stap gutpela piksa long mekim pasin daun, tasol insait tu long dispela pasin em i soim long yumi, em dispela nambawan bikpela wok em i mekim taim em i stap long graun—em wok bilong lainim ol man long gutnius bilong Kingdom bilong God. (Luk 4:43) Orait, sapos yu mas makim wanpela tok tasol bilong makim wok bilong Jisas, ating bai yu tingim dispela tok “laikim tru,” a? (Kolosi 1:15; 1 Jon 4:8) Jisas i laikim tru Papa bilong em long heven, Jehova, winim ol narapela samting. (Jon 14:31) Tasol Jisas em i wanpela tisa, olsem na i gat tupela samting moa em i laikim. Em i laikim tru ol tok i tru em i skulim ol man long en, na em i laikim tru ol man em i skulim. Orait nau yumi ken stori gut moa long dispela tupela samting bilong dispela pasin em i soim long yumi.
Longtaim Tru Jisas i Bin Laikim Tru Ol Tok i Tru Bilong God
4. Olsem wanem Jisas i bin kisim pasin bilong laikim tru ol tok bilong Jehova?
4 Tingting bilong tisa long ol tok em i skulim ol sumatin long en, dispela inap mekim bikpela samting long wok tisa bilong em. Sapos em i no pilim tru ol tok em i skulim ol man long en—olsem em i mekim nating tasol—dispela bai kamap ples klia na ol sumatin tu i no inap pilim dispela tok. Tasol Jisas i no gat dispela kain tingting long ol gutpela tok i tru bilong Jehova na Kingdom em i bin skulim ol man long en. Jisas i laikim tumas ol dispela tok. Em i bin kisim dispela pasin bilong laikim tru ol tok i tru, taim em i bin stap olsem sumatin. Taim Jisas i no kam daun yet long graun, inap longpela taim tru em i bin stap long heven na em i bin givim bel tru long kisim save. Aisaia 50:4, 5 i tok: “God, Bikpela i bin skulim mi long gutpela pasin bilong toktok, olsem na mi inap mekim gutpela tok bilong strongim bel bilong ol manmeri i no gat strong. Olgeta moning em i save mekim mi i laikim tumas long harim ol nupela samting em i laik skulim mi long en. Bikpela i opim yau bilong mi long harim tok bilong em.”
5, 6. (a) Wanem samting i bin painim Jisas taim em i kisim baptais? Dispela i mekim wanem long em? (b) Olsem wanem Jisas na Satan i stap narapela narapela kain long pasin bilong mekim wok long Tok Bilong God?
5 Taim Jisas i wok long go bikpela hia long graun, em i wok yet long laikim tumas ol gutpela tingting na save bilong God. (Luk 2:52) Bihain, taim em i kisim baptais, wanpela samting i narapela kain i painim em. Luk 3:21 i tok, “Heven i op.” Orait nau Jisas inap tingting bek long i stap bilong em bipo long heven. Bihain, em i stap tambu long kaikai inap 40 de long ples i no gat man. Yumi ken ting olsem em i bin kisim bikpela amamas tru long tingim tingim dispela taim em i bin stap long heven na planti taim Jehova i skulim em. Tasol i no longtaim na samting i kamap bilong traim pasin bilong em long laikim tru ol tok i tru bilong God.
6 Taim Jisas i hangre na skin bilong em i les olgeta, Satan i traim em. Dispela tupela pikinini bilong God i narapela narapela kain tru! Tupela i kamapim sampela tok bilong Ol Skripsa Hibru, tasol tingting bilong tupela long Tok Bilong God em i narapela narapela kain olgeta. Satan i paulim Tok Bilong God—em i mekim wok nogut long en bilong helpim em yet. Dispela bikhetman i no laikim tru ol tok i tru bilong God—em i daunim ol dispela tok. Tasol Jisas i laikim tru Tok Bilong God na em i was gut long ol wok em i mekim long en taim em i kamapim ol tok bilong bekim long Satan. Maski Jisas i bin stap longpela taim tru paslain long namba wan taim ol man i bin raitim ol tok bilong Baibel, em i save daun long ol dispela tok. Em ol gutpela tok i tru i bin kam long Papa bilong em long heven! Em i tokim Satan, ol dispela tok bilong Jehova i bikpela samting tru, winim kaikai. (Matyu 4:1-11) Em nau, Jisas i laikim tru olgeta tok i tru Jehova i bin skulim em long en. Tasol taim Jisas i mekim wok tisa, em i mekim wanem bilong soim olsem em i laikim tru ol dispela tok?
Jisas i Laikim Tru Ol Tok i Tru Em i Skulim Ol Man Long En
7. I gat wanem as na Jisas i no kamapim sampela tok bilong em yet bilong skulim ol man long en?
7 Jisas i laikim tru ol tok i tru em i skulim ol man long en, na olgeta taim dispela samting i kamap ples klia. Em inap kamapim sampela tingting bilong em yet. Em i gat planti save na gutpela tingting. (Kolosi 2:3) Tasol olgeta taim em i tokim ol man, olgeta tok em i skulim ol long en, i no bilong em yet. Em i bilong Papa bilong em long heven. (Jon 7:16; 8:28; 12:49; 14:10) Em i laikim tumas ol tok i tru i bin kam long God, olsem na em i no gat tingting long senisim wantaim ol tingting bilong em yet.
8. Taim Jisas i kirap mekim wok bilong em, em i mekim wanem bilong soim ol disaipel ol i mas kamapim tok bilong Baibel taim ol i skulim ol man?
8 Taim Jisas i kirap mekim wok bilong em hia long graun, kwiktaim em i kamapim wanpela pasin ol disaipel i mas bihainim. Tingim samting em i mekim long namba wan taim em i tokim lain bilong God olsem em i dispela Mesaia God i bin tok promis long en. Yu ting em i kamap long ai bilong ol man, na tokaut olsem em i Krais, na bihain mekim ol mirakel bilong kamapim klia dispela samting? Nogat. Em i go long haus lotu, we ol i save ritim ol tok bilong Buk Bilong God. Em i ritim tok profet bilong Aisaia 61:1, 2, na em i tok dispela tok i tru i makim em yet. (Luk 4:16-22) Ol planti mirakel bilong em i kamapim klia olsem Jehova i orait long em na helpim em. Tasol em i save kamapim tok bilong Baibel taim em i skulim ol man.
9. Long ol samting em i mekim wantaim ol Farisi, Jisas i mekim wanem bilong soim olsem em i laikim tru Tok Bilong God?
9 Taim ol man bilong lotu i sutim tok long Jisas, em i no tok pait wantaim ol, maski em inap winim ol long toktok. Em i larim Tok Bilong God i daunim tok bilong ol. Tingim dispela taim ol Farisi i tok ol disaipel bilong Jisas i bin brukim lo bilong Sabat taim ol i wokabaut namel long gaden wit na ol i kisim sampela pikinini bilong wit na ol i kaikai. Jisas i bekim tok long ol: “Ating yupela i no bin ritim dispela stori long samting Devit i bin mekim bipo?” (Matyu 12:1-5) Tru, ating ol dispela man i bin ritim stori bilong dispela samting long 1 Samuel 21:1-6. Tasol sapos olsem, orait ol i no bin lainim wanpela bikpela samting bilong en. Jisas yet i bin ritim dispela stori, tasol em i bin mekim sampela samting moa. Em i bin tingim gut dispela stori na pilim tru. Em i laikim tru ol stiatok Jehova i laik skulim ol man long en long rot bilong dispela stori. Olsem na em i mekim wok long dispela stori, na long wanpela lo bilong Moses tu, bilong kamapim klia gutpela tingting bilong Lo. Na pasin bilong laikim tru Tok Bilong God i bin kirapim Jisas long bekim tok long ol bikman bilong lotu em ol i laik paulim nabaut ol tok bilong God bilong helpim tingting bilong ol yet o haitim tok bilong God aninit long planti tok bilong ol tumbuna.
10. Olsem wanem Jisas inapim ol tok profet i toktok long pasin bilong skulim man?
10 Jisas i laikim tru ol tok i tru em i skulim ol man long en, olsem na em i no skulim ol man na bai ol i ken kolim kolim nating ol tok, nogat. Ol tok profet God i bin kirapim ol man long raitim, ol i makim olsem Mesaia bai mekim ‘tok i gutpela tasol.’ (Song 45:2) Jisas inapim ol dispela tok profet long rot bilong mekim ol tok i kirapim tru tingting bilong ol man—taim em i skulim ol man long ol tok i tru em i laikim tumas, em i save autim “ol gutpela tok” i swit long yau bilong ol. (Luk 4:22) Ating pes bilong em i lait, na ai bilong em i lait tumas taim em i toktok. Ol man i amamas tru long harim em i toktok, na em i stap gutpela piksa tru bilong yumi ken bihainim taim yumi toktok wantaim ol man long ol samting yumi kisim save pinis long en!
11. Jisas i save gut long mekim wok tisa, tasol olsem wanem dispela i no mekim na em i tingim em yet i bikpela man tru?
11 Jisas i save gut long ol tok i tru bilong God na em i save gut tru long pasin bilong toktok, tasol yu ting dispela i mekim na em i tingim em yet i bikpela man tru? Planti tisa bilong dispela graun i kain olsem. Tasol tingim: Jisas i gat gutpela tingting na save i kamapim olsem em i pret na daun long God. Man i gat dispela kain tingting na save em i no ken hambak, long wanem, “ol man i gat gutpela tingting i save daunim ol yet.” (Sindaun 11:2) Na i gat narapela samting i mekim na Jisas i no hambak o mekim pasin antap.
Jisas i Laikim Tru Ol Man Em i Skulim
12. Olsem wanem Jisas i soim olsem em i no laik bai ol disaipel i pret long em?
12 Jisas i laikim tru ol man, na dispela i save kamap ples klia long wok tisa bilong em. Wok tisa bilong ol man i gat pasin antap, dispela i save pretim ol man, tasol wok tisa bilong Jisas i no save mekim olsem. (Saveman 8:9) Taim Pita i lukim pinis wanpela mirakel bilong Jisas, Pita i kirap nogut tru, na em i brukim skru klostu long lek bilong Jisas. Tasol Jisas i no laik bai ol disaipel i pret long em. Em i tok, “Yu no ken pret” na em i tokim Pita long gutpela wok tru bilong kamapim ol disaipel em Pita bai insait long en. (Luk 5:8-10) Jisas i laik bai pasin bilong ol disaipel long laikim tru ol tok i tru bilong God i kirapim ol—pasin bilong pret long tisa bilong ol, nogat.
13, 14. Jisas i bin mekim wanem bilong soim olsem em i pilim tru hevi bilong ol man?
13 Jisas i sori long ol man na pilim tru hevi bilong ol, na dispela tu i save soim olsem em i laikim tru ol man em i skulim. “Em i lukim ol bikpela lain manmeri, na em i sori tru long ol, long wanem, tingting bilong ol i paul nabaut, na ol i stap nogut tru, olsem ol sipsip i no gat wasman.” (Matyu 9:36) Em i pilim tru hevi bilong ol na dispela i kirapim em long helpim ol.
14 Tingim narapela taim Jisas i bin kamapim sori bilong em. Wanpela meri i save karim blut oltaim, em i go klostu long Jisas na putim han long klos bilong em, na sik bilong em i pinis. Jisas i pilim sampela strong i lusim em i go, tasol em i no lukim husat i bin kamap orait gen. Em i strong long painim dispela meri. Bilong wanem? I no bilong krosim em long brukim Lo Bilong Moses o ol lo bilong ol saveman bilong lo na ol Farisi, olsem meri i ting em bai mekim, nogat. Jisas i tokim em: “Pikinini, yu bilip long mi, olsem na yu kamap orait gen. Yu go, na bel bilong yu i ken i stap isi. Sik bilong yu i ken pinis.” (Mak 5:25-34) Tingim dispela tok i makim olsem Jisas i sori long dispela meri. Em i no tok, “Sik bilong yu i ken pinis,” na em tasol, nogat. Em i tok: “Yu go, na bel bilong yu i ken i stap isi.” Long dispela ves, Mak i kamapim wanpela tok em insait bilong en i olsem “wipim.” Ol i save mekim wok long wip bilong givim bikpela pen long man. Jisas i laik tokaut olsem em i save dispela sik i bin givim bikpela hevi long meri—ating bikpela pen long skin na long bel bilong em. Jisas i pilim tru hevi bilong em.
15, 16. Wanem sampela samting i bin kamap na i soim olsem Jisas i bin wok long painim ol gutpela pasin long ol man?
15 Jisas i save wok long painim ol gutpela pasin long ol man, na dispela tu i soim olsem em i laikim tru ol man. Tingim samting i bin kamap taim em i lukim Nataniel, em bihain em i kamap wanpela aposel. “Jisas i lukim Nataniel i kam long em, na em i tok olsem, ‘Lukim. Dispela man i kam, em i man tru bilong Israel. I no gat wanpela giaman tok o giaman pasin i stap long em.’ ” Long rot bilong mirakel, Jisas i bin lukim bel bilong Nataniel na kisim planti save long em. Tru, Nataniel i no gutpela olgeta. Em i gat sampela pasin kranki, wankain olsem yumi olgeta i gat. Olsem: Taim em i kisim save long Jisas, em i bin tokaut: “Ating wanpela gutpela samting em inap kamap long Nasaret, a?” (Jon 1:45-51) I gat planti pasin bilong Nataniel Jisas inap kamapim, tasol em i tingim wanpela gutpela samting, em stretpela pasin bilong em.
16 Na olsem tasol, taim wanpela kepten bilong ami—ating em i wanpela man bilong Rom—em i kam na askim Jisas long mekim orait wokboi bilong em i gat sik, Jisas i save dispela soldia i bin mekim sampela rong. Ol kepten bilong ami long taim bilong Jisas ol i bin insait long planti pasin bilong bagarapim man, na kilim man i dai, na lotuim ol god giaman. Tasol Jisas i tingim wanpela gutpela samting—em strongpela bilip bilong dispela man. (Matyu 8:5-13) Bihain, taim Jisas i toktok wantaim wanpela man nogut i hangamap long pos diwai klostu long em, Jisas i no krosim em long ol pasin nogut bipo em i bin mekim, nogat; em i strongim bel bilong em na tokim em long ol gutpela samting inap painim em long bihain. (Luk 23:43) Jisas i save sapos em i kamapim ol samting nogut bilong ol man, dispela bai mekim ol i bel hevi. Em i wok long painim gutpela samting long ol, na dispela i bin kirapim planti long stretim pasin bilong ol.
Em i Amamas Long Helpim Ol Man
17, 18. Taim Jisas i orait long kisim wok bilong kam hia long graun, em i mekim wanem bilong soim olsem em i amamas long helpim ol narapela?
17 Narapela samting i kamapim klia olsem Jisas i laikim tru ol man em i skulim, i olsem: Em i amamas long mekim wok bilong helpim ol. Long taim em i stap long heven na i no kam daun yet long graun, Pikinini bilong God i save amamas long ol manmeri. (Sindaun 8:30, 31) Em “Tok,” o mausman, bilong Jehova, olsem na ating em i bin mekim planti wok bilong helpim ol man. (Jon 1:1) Tasol bilong lainim gut moa ol man, em i lusim bikpela namba em i holim long heven na “i kamap olsem wokboi nating.” (Filipai 2:7; 2 Korin 8:9) Taim Jisas i stap long graun, em i no ting ol man i mas mekim wok bilong helpim em yet. Nogat. Em i tok: “Pikinini Bilong Man i no bin i kam bilong ol man i ken mekim wok bilong helpim em. Nogat. Em i kam bilong helpim ol, na bilong givim laip bilong em bilong baim bek planti manmeri.” (Matyu 20:28) Jisas inapim tru ol dispela tok.
18 Long pasin daun Jisas i mekim wok bilong helpim ol man em i skulim—em i redi long givim em yet long helpim ol. Em i wokabaut raun inap planti handet kilomita long Graun Bilong Promis bambai em inap autim tok long planti man. Ol saveman bilong lo na ol Farisi ol i gat pasin antap. Tasol Jisas i no olsem. Em i gat pasin daun na ol man i no pret long go toktok wantaim em. Kain kain man—bikman, soldia, loya, meri, pikinini, rabisman, sikman, na man ol narapela i givim baksait long em—ol i amamas long go klostu long em, ol i no pret. Tru, Jisas em i gutpela olgeta, tasol em i gat skin bilong man long graun, olsem na em i save hangre na skin i les. Tasol taim skin i les o em i mas malolo o stap isi na beten, long dispela kain taim tu em i putim laik bilong ol narapela i go pas long laik bilong em yet—Mak 1:35-39.
19. Olsem wanem Jisas i soim pasin daun, pasin isi, na gutpela pasin long ol disaipel bilong em?
19 Jisas i amamas tu long mekim wok bilong helpim ol disaipel bilong em. Em i mekim olsem taim em i skulim ol na mekim long gutpela pasin na pasin isi. Taim ol i no kisim kwik sampela tok, em i no les kwik long ol o krosim ol, nogat. Em i wok long painim ol nupela rot bilong helpim ol long kisim gut ol tok. Olsem: Planti taim ol disaipel i bin tok pait long husat i namba wan namel long ol. Planti taim, i go inap nait paslain long em i dai, Jisas i mekim wok long ol nupela rot bilong skulim ol long pasin daun ol i mas mekim long ol narapela. Long dispela samting bilong pasin daun, wankain olsem long olgeta narapela samting, Jisas inap tru long tok: “Mi soim pasin long yupela.”—Jon 13:5-15; Matyu 20:25; Mak 9:34-37.
20. Wanem pasin bilong skulim ol man i mekim Jisas i narapela kain long ol Farisi? I gat wanem as na dispela pasin i gutpela tru?
20 Tingim, Jisas i no tokim ol disaipel long dispela pasin ol i mas bihainim na em tasol, nogat; em i “soim” dispela pasin long ol. Long pasin bilong em, em i skulim ol. Em i no mekim ol tok bilong daunim ol, olsem em i antap long ol na em i bikpela man tumas long mekim ol samting em i tokim ol long mekim, nogat. Dispela em pasin bilong ol Farisi. Jisas i tok long ol olsem: “Ol i save mekim planti tok, tasol ol yet ol i no save bihainim.” (Matyu 23:3) Long pasin daun Jisas i soim ol disaipel long olsem wanem ol inap bihainim ol tok bilong em—bilong soim ol olsem, em yet i save bihainim ol dispela tok. Olsem na taim em i strongim ol sumatin long ol i no ken wok long bungim planti samting bilong skin, ol i no paul long mining bilong dispela tok. Ol inap lukim long ai samting em i tok long en: “Ol weldok i gat hul long graun, na ol pisin i gat haus bilong ol. Tasol Pikinini Bilong Man em i no gat ples bilong slip.” (Matyu 8:20) Long pasin daun Jisas i soim pasin ol disaipel i mas bihainim, na long dispela rot em i mekim wok bilong helpim ol.
21. Bai yumi stori long wanem samting long stori i kamap bihain long dispela?
21 Tru tumas, Jisas em i nambawan bikpela Tisa i bin stap long graun! Em i laikim tru ol tok em i skulim ol man long en, na em i laikim tru ol man em i skulim, na dispela samting i bin kamap ples klia long olgeta man i gat gutpela bel em ol i bin lukim em na harim ol tok em i autim. Na i kamap ples klia long yumi ol manmeri long nau i kisim save long pasin em i bin mekim. Tasol olsem wanem yumi inap bihainim dispela gutpela pasin bilong Krais? Stori i kamap bihain long dispela bai toktok long dispela askim.
Bai Yu Bekim Olsem Wanem?
• Wanem samting i nambawan bikpela samting long mekim gut wok tisa? Husat i kamapim ples klia dispela samting?
• Jisas i mekim wanem bilong soim olsem em i laikim tru ol tok i tru em i skulim ol man long en?
• Jisas i mekim wanem bilong soim olsem em i laikim tru ol man em i skulim?
• Wanem sampela samting i soim olsem Jisas i gat pasin daun na em i gat laik long helpim ol man em i skulim?
[Piksa long pes 12]
Jisas i mekim wanem bilong soim olsem em i laikim tru ol stiatok i stap long Tok Bilong God?