Ol Man i Dai Pinis Yu Ting Ol Inap Helpim Yumi?
YUMI olgeta i mas kisim ol samting bilong skin, na ol samting bilong spirit tu. Olsem na planti man i kamapim ol askim: Yumi stap bilong mekim wanem? Bilong wanem pen na hevi i painim ol man? Taim yumi dai, wanem samting i painim yumi? Bilong painim bekim bilong ol dispela askim, planti man i gat gutpela bel i save go lukim glasman—ol i laik toktok wantaim man i dai pinis.
Long planti kantri ol man i bilip long pasin bilong toktok wantaim man i dai pinis ol i bin kamapim lotu bilong ol yet. Long Brasil, inap 4,000,000 i bihainim ol tok em saveman Hyppolyte Léon Denizard Rivail bilong Frans i bin skulim ol man long en. Long ol buk em i raitim, em i no raitim nem tru bilong em—em i raitim olsem Allan Kardec. Long 1854, em i kirap kisim save long dispela pasin bilong toktok wantaim man i dai pinis. Bihain em i givim askim long ol glasman bilong ol narapela narapela kantri, na bekim bilong ol em i raitim long wanpela buk (The Book of Spirits), ol i prinim long 1857. Em i raitim tupela buk moa (The Mediums’ Book na The Gospel According to Spiritism).
Sampela i ting dispela pasin bilong toktok wantaim man i dai pinis em i samting bilong posin marila samting o pasin bilong lotu long Satan. Tasol ol man i bihainim tok bilong Allan Kardec ol i tok ol bilip bilong ol i no insait liklik long ol dispela samting. Ol buk bilong ol i save kamapim sampela tok bilong Baibel, na ol i tok Jisas em ‘man bilong soim rot long olgeta man.’ Ol i tok samting Jisas i skulim ol man long en, em i olsem ‘lo tru bilong God.’ Allan Kardec i ting ol buk i stori long pasin bilong toktok wantaim man i dai pinis, ol i olsem namba 3 rot God i bin mekim wok long en bilong kamapim lo bilong em long ol man. Namba wan na namba tu rot, em ol tok Moses na Jisas i bin skulim ol man long en.
Dispela lotu we ol man i toktok wantaim ol man i dai pinis em i pulim planti man, long wanem, ol lain i bihainim dispela lotu ol i bilip olsem narapela i mas laikim tru narapela na mekim kain kain gutpela wok. Wanpela bilip bilong ol i olsem: ‘Bilong God i ken kisim bek yumi, yumi mas mekim ol gutpela wok.’ Planti ol i mekim wok bilong helpim sindaun bilong ol man, na ol i helpim wok bilong ol haus sik na skul samting. Yumi save ol dispela wok ol i mekim em i gutpela. Tasol olsem wanem taim yumi skelim bilip bilong ol wantaim ol tok bilong Jisas i stap long Baibel? Orait nau yumi ken skelim tupela bilong ol dispela bilip: samting i painim man i dai pinis, na as bilong pen na hevi i painim ol man.
Wanem Samting Bai Painim Man i Dai Pinis?
Planti man bilong dispela lotu ol i bilip olsem taim man i dai em i save kamap nupela gen long narapela bodi. Wanpela buk bilong ol i tok: “Dispela bilip olsem taim man i dai em i kamap gen long narapela bodi, em i stret wantaim tingting bilong yumi long stretpela kot bilong God, na dispela bilip inap helpim yumi long save wanem samting bai kamap bihain, na i strongim bilip bilong yumi long ol samting yumi wetim. I no gat narapela bilip i helpim yumi olsem.” Ol i bilip olsem man i gat wanpela tewel, na taim man i dai, tewel i save lusim bodi—wankain olsem bataflai i save lusim karamap bilong en. Ol i bilip olsem, bihain, tewel bilong dispela man bai kamap gen long narapela bodi bambai ol rong em i bin mekim taim em i stap laip bipo i ken tekewe. Tasol em i no inap tingim bek ol dispela rong. Wanpela buk (The Gospel According to Spiritism) i tok: “God i ting i gutpela sapos man i no ken tingim bek ol rong em i bin mekim taim em i stap laip bipo.”
Allan Kardec i tok: “Sapos man i sakim dispela tok olsem tewel bilong man i save kamap gen long narapela bodi, orait em i sakim ol tok bilong Krais tu.” Tasol Jisas i no bin stori liklik long dispela bilip, nogat. (Lukim “Yu Ting Baibel i Tok Man i Dai Pinis Em i Kamap Nupela Gen Long Narapela Bodi?” long pes 22.) Jisas i lainim ol man olsem man i dai pinis bai kirap bek. Taim Jisas i stap long graun, em i kirapim bek 3-pela man—pikinini man bilong wanpela meri wanpis long Nain, na pikinini meri bilong wanpela hetman bilong haus lotu, na gutpela pren bilong em, Lasarus. (Mak 5:22-24, 35-43; Luk 7:11-15; Jon 11:1-44) Orait nau yumi ken stori long wanpela bilong dispela 3-pela kirap bek na bai yumi ken save long dispela tok bilong “kirap bek” em Jisas i toktok long en.
Kirap Bek Bilong Lasarus
Jisas i harim tok long pren bilong em Lasarus i gat sik. Tupela de bihain, em i tokim ol disaipel: “Pren bilong yumi Lasarus i slip. Tasol mi bai go na kirapim em.” Ol disaipel i ting Lasarus i slip tru, olsem na Jisas i tok klia long ol: “Lasarus i dai pinis.” Taim Jisas i kamap long matmat, Lasarus i bin stap long matmat inap 4-pela de pinis. Jisas i tokim ol long rausim ston i pasim ai bilong matmat. Em i singaut: “Lasarus, yu kam ausait.” Orait nau wanpela gutpela samting tru i kamap. “Lasarus i kirap bek na i kam ausait. Lek na han na pes bilong en ol i bin karamapim long laplap. Na nau Jisas i tokim ol olsem, ‘Lusim laplap na larim em i wokabaut.’ ”—Jon 11:5, 6, 11-14, 43, 44.
Em nau, dispela i narapela kain long dispela bilip olsem tewel bilong man i dai pinis i save kamap gen long narapela bodi. Jisas i tok dispela Lasarus i dai pinis, em i slip tasol, em i no save long wanpela samting. Olsem Baibel i tok, ‘em i no bin mekim wanpela samting em i bin tok long mekim.’ Em i ‘no save long wanpela samting.’ (Song 146:4; Saveman 9:5) Dispela Lasarus i kirap bek, em i no narapela man em tewel bilong Lasarus i pas wantaim bodi bilong em, nogat. Pasin na tingting bilong em, na krismas bilong em, i wankain stret olsem bipo, na em inap tingim bek olgeta samting em i bin lainim na mekim taim em i no i dai yet. Em i kirap gen long mekim ol samting wankain olsem em i bin mekim taim em i no dai yet, na em i bung gen wantaim ol wanblut i bin krai sori long em i dai.—Jon 12:1, 2.
Bihain, Lasarus i dai gen. Orait, kirap bek bilong em i mekim wanem wok? Dispela kirap bek wantaim tupela kirap bek moa Jisas i mekim, em i strongim bilip bilong yumi long tok promis bilong God olsem long taim Em yet i makim, Em bai kirapim bek ol gutpela wokboi bilong Em. Ol dispela mirakel i strongim tru dispela tok bilong Jisas: “Kirap bek, em mi yet. Na laip, em mi yet. Na man i bilip long mi, maski sapos em i dai, em bai i stap laip yet.”—Jon 11:25.
Jisas i toktok long dispela kirap bek bilong bihain, na em i tok: “Taim i laik kamap na olgeta manmeri i stap long matmat ol bai i harim maus bilong [mi], na ol bai i lusim matmat na i kam ausait. Ol manmeri i bin mekim gutpela pasin, ol bai i kirap bek na i stap laip. Na ol manmeri i bin mekim pasin nogut, ol bai i kirap bek na i kamap long kot na kot bai i tok olsem, ol i mas bagarap.” (Jon 5:28, 29) Wankain olsem Lasarus, ol dispela man Jisas bai kirapim bek ol, ol i man i dai pinis. Taim ol i kirap bek, tewel i no save pas gen wantaim bodi i kirap bek, em dispela bodi i bin tanim i kamap gris bilong graun na ating gras samting i bin pulim dispela gris i go insait, nogat. Man bilong wokim heven na graun em i gat olgeta gutpela tingting na save, na olgeta strong, olsem na em inap tru long kirapim bek man i dai pinis.
Dispela tok bilong kirap bek, olsem Jisas Krais i bin skulim ol man long en, em i kamapim klia olsem God i laikim tru olgeta man wan wan, a? Tasol olsem wanem long dispela namba tu askim em pastaim yumi bin toktok long en?
I Gat Wanem As na Pen na Hevi i Painim Ol Man?
Samting man i no gat gutpela tingting i mekim, o samting man nogut i mekim, planti taim dispela em i as na pen na hevi i painim ol man. Tasol olsem wanem long ol hevi na bagarap em ol man yet i no as tru bilong en? Olsem: Wanem samting i mekim na bagarap i painim ol man, olsem taim bikpela guria o bikpela win samting i kamap? I gat wanem as na taim mama i karim pikinini, pikinini i gat sampela bagarap long skin? Allan Kardec i ting ol dispela samting i olsem wanpela strafe. Em i tok: “Sapos yumi kisim hevi, orait ating yumi bin mekim wanpela rong. Sapos em wanpela rong yumi no bin mekim long taim yumi stap laip nau, orait yumi ken tok em wanpela rong yumi bin mekim long taim yumi stap laip bipo.” Ol man i bilip long pasin bilong toktok wantaim man i dai pinis, ol i lain long beten olsem: “Bikpela, pasin bilong Yu i stret olgeta. I stret long mi kisim dispela sik Yu givim long mi . . . Mi orait long kisim dispela sik olsem samting bilong tekewe ol rong mi bin mekim taim mi stap laip bipo, na bilong kamapim klia olsem mi bilip na stap aninit long gutpela laik bilong Yu.”—The Gospel According to Spiritism.
Yu ting Jisas i lainim ol man olsem? Nogat. Jisas i save long dispela tok bilong Baibel: “Taim nogut i save painim yumi olgeta.” (Saveman 9:11) Em i save olsem sampela taim ol samting nogut i save kamap nating tasol. Ol dispela samting i no olsem strafe bilong ol rong, nogat.
Tingim dispela samting i bin kamap taim Jisas i stap long graun. “Jisas i wokabaut i go, na em i lukim wanpela man aipas. Taim mama i karim em, em i aipas pinis. Na ol disaipel bilong Jisas i askim em, ‘Tisa, husat i mekim sin na taim mama i karim dispela man em i kamap aipas? Dispela man yet i mekim sin, o papamama bilong en i mekim sin?’ ” Bekim bilong Jisas i givim save long yumi. “Dispela man i no mekim sin, na papamama bilong en tu i no mekim sin. Nogat. Dispela samting i bin kamap bai ol manmeri i ken lukim samting i kamap long dispela man, na wok bilong God i ken kamap ples klia long ol. Jisas i tok olsem na em i spet long graun. Na em i tanim spet wantaim graun, na i putim dispela graun long ai bilong dispela aipas. Na Jisas i tokim em olsem, ‘Yu go waswas long hul wara Siloam.’ . . . Orait dispela aipas em i go na i waswas. Na taim em i kam bek, em inap lukim gut ol samting.”—Jon 9:1-3, 6, 7.
Tok bilong Jisas i soim olsem i no asua bilong dispela man o bilong papamama bilong em na em i kamap aipas, nogat. Jisas i no helpim dispela tingting olsem dispela man i kisim strafe long sin em i bin mekim long taim em i stap laip bipo. Tru, Jisas i save olgeta man i bin kisim sin. Tasol sin ol i kisim, em sin bilong Adam—ol i no bin mekim sin taim mama i no karim yet ol na ol i kisim dispela, nogat. Adam i mekim sin, na long dispela as, olgeta man i gat sin na kisim sik na dai. (Jop 14:4; Song 51:5; Rom 5:12; 9:11) Bilong stretim dispela hevi, God i salim Jisas i kam long graun. Jon Bilong Baptais i tok long Jisas olsem: “Em i Pikinini Sipsip Bilong God. Em i kam bilong rausim sin bilong olgeta manmeri bilong graun.”—Jon 1:29.a
Na Jisas i no tok God yet i bin mekim dispela man i kamap aipas bambai bihain Jisas i ken kam na oraitim em, nogat. Sapos God i bin mekim olsem, bai yumi tok God i bin mekim pasin nogut, a? Na tu, kain pasin olsem i no inap litimapim nem bilong God. Jisas i wokim mirakel na oraitim dispela aipas na bai “ol manmeri i ken lukim samting i kamap long dispela man, na wok bilong God i ken kamap ples klia long ol.” Olsem planti mirakel moa Jisas i wokim bilong oraitim sikman, dispela mirakel i kamapim klia olsem God i sori tru long ol man em pen na hevi i painim ol, na i kamapim klia olsem em bai truim tok promis bilong Em long pinisim olgeta sik na hevi long taim Em yet i bin makim.—Aisaia 33:24.
Em nau, nau yumi save olsem Papa bilong yumi long heven i save givim “ol gutpela samting long ol man i prea long em”—em i no as bilong pen na hevi—na dispela save i mekim gut bel bilong yumi, a? (Matyu 7:11) Taim ol aipas i lukluk, na ol yaupas i harim toktok, na ol lek nogut i wokabaut na kalap na ran, dispela bai litimapim nem bilong God Antap Tru!—Aisaia 35:5, 6.
Inapim Yumi Long Ol Samting Bilong Spirit
Jisas i tok: “Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.” (Matyu 4:4) Em nau, taim yumi kaunim Baibel na bihainim ol pasin i stret wantaim long en, dispela i save inapim yumi long ol samting bilong spirit. Pasin bilong lukim glasman bilong toktok wantaim man i dai pinis, dispela i no inap helpim tru yumi long ol samting bilong spirit. Tru tumas, em wanpela pasin God i no orait liklik long en—long lo em Allan Kardec i tok em i namba wan lo God i kamapim long ol man, God i tok em i nolaik tru long dispela pasin.—Lo 18:10-13.
Planti man, na ol man bilong dispela lotu i save toktok wantaim man i dai pinis, ol i save olsem God em i Nambawan Bikpela i save stap oltaim oltaim, na em i gutpela olgeta, na em i save mekim gut long ol man, na em i bihainim gutpela pasin na pasin i stret. Tasol Baibel i kamapim planti samting moa. Baibel i tok em i gat wanpela nem bilong em yet, em Jehova, na olsem Jisas i bin litimapim dispela nem, yumi tu i mas mekim olsem. (Matyu 6:9; Jon 17:6) Na Baibel i soim olsem God em i wanpela man tru em ol man bilong graun inap pas gut wantaim em. (Rom 8:38, 39) Taim yumi kaunim Baibel, yumi kisim save olsem God i save mekim pasin marimari. “Yumi inap kisim pe nogut bilong sin bilong yumi, tasol em i no save givim dispela pe nogut long yumi. Yumi bin mekim planti pasin nogut, na em inap bekim bikpela hevi long yumi, tasol em i no save mekim olsem.” (Song 103:10) Long rot bilong Baibel, Bikpela King Jehova i kamapim klia olsem em i Man bilong pasin sori, na em i Nambawan Bikpela, na em i save isi long ol man. Em i save soim rot long ol man i bihainim tok bilong em na em i lukautim ol. Bilong kisim “laip bilong i stap gut oltaim,” yumi mas kisim save long Jehova na long Pikinini bilong em, Jisas Krais.—Jon 17:3.
Baibel i tokim yumi long olgeta samting bilong laik bilong God yumi mas save long en, na long ol samting yumi mas mekim sapos yumi laik bai God i ken amamas long yumi. Sapos yumi skelim gut Baibel, bai yumi kisim gutpela bekim bilong ol askim bilong yumi. Na tu, Baibel i soim yumi wanem pasin i stret na wanem pasin i no stret, na i kamapim ol tok i helpim yumi long wetim ol gutpela samting i kamap. Em i tok, klostu nau God ‘bai mekim drai wara i stap long ai bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo bai pinis olgeta.’ (KTH 21:3, 4) Long rot bilong Jisas Krais, Jehova bai helpim ol man long lusim sin na ol pasin kranki ol i bin kisim long Adam, na ol man i bihainim tok ol bai kisim laip oltaim long Paradais long graun. Long dispela taim, God bai inapim ol man long olgeta samting bilong skin na bilong spirit ol i mas kisim.—Song 37:10, 11, 29; Sindaun 2:21, 22; Matyu 5:5.
[Futnot]
a Bilong kisim save long olsem wanem dai na sin i kamap, lukim sapta 6 bilong buk Save i Bringim Man Long Laip Oltaim, em ol Witnes Bilong Jehova i wokim.
[Blok long pes 22]
YU TING BAIBEL I TOK MAN I DAI PINIS EM I KAMAP NUPELA GEN LONG NARAPELA BODI?
Olsem wanem? I gat wanpela tok long Baibel i helpim dispela tingting olsem taim man i dai em i save nupela kamap gen long narapela bodi? Tingim sampela ves ol man i bilip long dispela tok ol i bin mekim wok long en:
“Olgeta profet, na buk bilong lo tu, ol i bin autim tok bilong God inap long taim Jon i kamap. . . . Buk bilong God i tok olsem profet Elaija i mas i kam, em i tok long Jon tasol.”—Matyu 11:13, 14.
Olsem wanem? Jon Bilong Baptais em Elaija tasol i kamap nupela gen? Taim ol i askim Jon, “Ating yu Elaija, a?” Jon i bekim tok klia: “Nogat.” (Jon 1:21) Tasol ensel i bin tok profet olsem Jon “bai i kisim pasin na strong bilong Elaija” na i go pas long Mesaia. (Luk 1:17; Malakai 4:5, 6) Em nau, Jon Bilong Baptais em i Elaija long dispela samting tasol: Em bai mekim wok wankain olsem bilong Elaija.
“Sapos man i no kamap nupela gen, em i no inap lukim kingdom bilong God. Yu no ken kirap nogut long dispela tok mi tokim yu, ‘Yupela i mas kamap nupela gen.’ ”—Jon 3:3, 7.
Bihain, wanpela aposel i tok: “[God] i gat bikpela sori long yumi, na em i kirapim Jisas Krais long matmat, na long dispela rot God i givim yumi nupela laip. Na dispela nupela laip i strongim yumi long wetim em i inapim tru ol gutpela samting em i laik givim long yumi.” (1 Pita 1:3, 4; Jon 1:12, 13) Em nau, taim Jisas i toktok long kamap nupela gen, em i toktok long nupela laip ol disaipel bai kisim taim ol i stap laip yet—em i no toktok long samting i kamap taim ol i dai.
“Taim man i dai, em i stap laip oltaim: taim ol de God i makim bilong mi i stap long Graun em i pinis, bai mi wet, long wanem, bai mi kamap gen.”—Jop 14:14, olsem i stap long buk The Gospel According to Spiritism.
Buk Baibel i kamapim dispela Jop 14:14 olsem: “Ol manmeri i dai pinis, ating ol i no inap kisim laip gen. . . . Bai mi wet i stap inap long taim yu makim bilong mi i stap long dispela ples, em i pinis.” Kaunim sampela tok moa long dispela hap. Bai yu lukim olsem man i dai pinis em i wet long ples bilong ol man i dai pinis inap long ‘taim God i makim bilong em i stap long dispela ples em i pinis.’ (Ves 13-14) Taim ol i wet i stap, ol i no stap moa, ol i pinis olgeta. “Man i dai pinis em i pinis olgeta, na taim man i bagarap, em i no stap moa.”—Jop 14:10, Bagster’s “Septuagint.”
[Piksa long pes 21]
Ol man i dai pinis bai kirap bek na dispela i kamapim klia olsem God i save tingim tru yumi wan wan
[Ol Piksa long pes 23]
God bai pinisim olgeta pen na hevi i painim ol man