Lukaut Long “Maus Bilong Ol Arapela Man”
“Ol i no save bihainim ol arapela man. Nogat. Sapos narapela man i singautim ol, ol sipsip bai i ranawe long em, long wanem, ol i no save long maus bilong ol arapela man.”—JON 10:5.
1, 2. (a) Maria i mekim wanem taim Jisas i kolim nem bilong em? Dispela stori i kamapim klia wanem tok Jisas i bin mekim pastaim? (b) Wanem samting i helpim yumi long i stap klostu long Jisas?
JISAS i kirap bek pinis, na em i lukim wanpela meri i sanap klostu long matmat bilong em. Jisas i save gut long em. Em Maria bilong Makdala. Klostu tupela yia i go pinis, Jisas i bin rausim ol spirit nogut long em. Kirap long dispela taim em i bin raun wantaim Jisas na ol aposel bilong lukautim ol long ol samting ol i mas kisim. (Luk 8:1-3) Tasol long dispela de Maria i krai i stap, em i bel hevi tru, long wanem, em i bin lukim Jisas i dai na nau bodi bilong em i no stap moa! Olsem na Jisas i askim em: “Meri, bilong wanem yu krai? Yu laik painim husat?” Maria i ting em i man bilong bosim gaden, na em i tok: “Bikman, sapos yu bin kisim em i go, yu mas tokim mi long ples yu putim em, na bai mi go kisim em.” Nau Jisas i tok: “Maria.” Wantu em i harim pasin bilong Jisas long kolim nem bilong em. Em i amamas tru na singaut: “Tisa.” Na em i holimpas Jisas.—Jon 20:11-18.
2 Dispela stori i kamapim klia tok Jisas i bin mekim sampela mun paslain. Jisas i tok em i olsem wanpela wasman na ol disaipel ol i olsem sipsip, em i tok wasman i save singautim ol sipsip bilong em na kolim nem bilong ol na ol i save long maus bilong em. (Jon 10:3, 4, 14, 27, 28) Tru tumas, olsem sipsip i save long wasman bilong em, olsem tasol Maria i bin save long Wasman bilong em, em Krais. Na i wankain tu long ol disaipel bilong Jisas long nau. (Jon 10:16) Olsem yau bilong sipsip inap save long maus bilong wasman bilong em na i helpim em long stap klostu long em, pasin bilong yumi long skelim gut ol samting bilong spirit i save helpim yumi long bihainim gut lek bilong Gutpela Wasman bilong yumi, Jisas Krais.—Jon 13:15; 1 Jon 2:6; 5:20.
3. Tok piksa bilong Jisas long banis sipsip i kamapim wanem ol askim?
3 Tasol dispela tok piksa i soim olsem sipsip inap save long maus bilong pren bilong em na birua bilong em tu. Dispela em i bikpela samting, long wanem, yumi gat ol birua i save yusim kain kain trik. Ol birua i husat? Ol i save mekim wanem? Olsem wanem yumi inap lukautim yumi yet? Bilong kisim save long dispela, yumi mas harim ol arapela tok Jisas i mekim long tok piksa bilong em long banis sipsip.
“Man i No Save Go Insait Long Dua”
4. Olsem tok piksa long wasman i kamapim, ol sipsip i bihainim husat, na ol i no bihainim husat?
4 Jisas i tok: “Man i save go insait long dua, em i wasman bilong sipsip. Wasman bilong dua em i save opim dua long dispela man. Na ol sipsip ol i save harim maus bilong em. Em i save kolim nem bilong ol wan wan sipsip bilong em yet, na em i kisim ol i go ausait. Em i bringim olgeta sipsip bilong en i go ausait pinis, orait em i save wokabaut i go pas long ol. Na ol sipsip i save long maus bilong en, olsem na ol i bihainim em i go. Ol i no save bihainim ol arapela man. Nogat. Sapos narapela man i singautim ol, ol sipsip bai i ranawe long em, long wanem, ol i no save long maus bilong ol arapela man.” (Jon 10:2-5) Jisas i kolim dispela tok “maus” 3-pela taim. Tupela taim em i stori long maus bilong wasman, tasol namba tri taim em i stori long “maus bilong ol arapela man” o maus bilong ol man yumi no save long ol. Jisas i stori long wanem kain man?
5. Bilong wanem yumi no mekim gutpela pasin long dispela kain man Jon sapta 10 i stori long en?
5 Jisas i no stori long man em yumi laik mekim gutpela pasin long em—em wanpela tok i kam long tok ples ol i bin raitim Baibel long en na mining bilong en i olsem “laikim tru ol man bilong narapela ples.” (Hibru 13:2) Long tok piksa bilong Jisas, dispela man i no wanpela man ol i singautim em i kam. Em “i no save go insait long dua bilong banis bilong sipsip, tasol em i kalapim banis long narapela hap na i go insait.” Em “i stilman na man bilong pulim ol samting bilong ol arapela man.” (Jon 10:1) Husat i namba wan man i bin kamap stilman na man bilong pulim ol samting bilong ol arapela man em Baibel i kolim? Em Satan. Yumi kisim dispela save long Buk Stat.
Namba Wan Taim Bilong Harim Maus Bilong Arapela Man
6, 7. Wanem sampela pasin bilong Satan i wankain olsem pasin bilong dispela arapela man long tok piksa bilong Jisas long Jon sapta 10?
6 Stat 3:1-5 i stori long olsem wanem ol man i bin harim maus bilong arapela man long namba wan taim. Ol ves hia i stori olsem Satan i bin toktok wantaim namba wan meri, Iv, long rot bilong wanpela snek na mekim tok gris long em. Long dispela stori, ol samting Satan i bin mekim i soim olsem long planti rot em i wankain olsem dispela man long tok piksa bilong Jisas long Jon sapta 10. Yumi ken skelim ol samting i wankain.
7 Jisas i tok dispela arapela man i no kam stret long ol sipsip, nogat, em i kam baksait long ol. Satan tu i no bin kam stret long Iv, em i kam long rot bilong wanpela snek. Dispela pasin trik bilong Satan i kamapim tru em i wanem kain man—wanpela stilman na man bilong giaman na trik. Man i go insait long banis sipsip i laik stilim sipsip bilong papa bilong banis. Na em i man nogut tru, winim stilman, long wanem, em i laik ‘kilim i dai na bagarapim’ ol sipsip. (Jon 10:10) Satan tu em i wanpela stilman. Taim em i giamanim Iv, i kain olsem em i stilim pasin bilong Iv long i stap aninit long God. Na tu, Satan i bringim indai long olgeta man bilong graun. Olsem na em i man bilong kilim i dai man.
8. Olsem wanem Satan i bin paulim tok na laik bilong Jehova?
8 Pasin giaman bilong Satan i stap ples klia long pasin bilong em long paulim tok na laik bilong Jehova. Em i askim Iv: “Ating God i tambuim yutupela long kaikai pikinini bilong olgeta diwai bilong gaden, a?” Satan i giaman olsem em i kirap nogut long dispela tok, i olsem em i tok: ‘Olsem wanem God i ken mekim kain tok olsem?’ Na em i tok moa: “Sapos yutupela i kaikai pikinini bilong dispela diwai, bai ai bilong yutupela i op . . . God i save long dispela.” Lukim dispela tok bilong em: “God i save long dispela.” I olsem Satan i laik tok: ‘Mi save long tingting bilong God. Mi save long laik bilong em, na laik bilong em i samting nogut.’ (Stat 2:16, 17; 3:1, 5) Sori tru, Iv na Adam i no sakim maus bilong dispela arapela man. Nogat. Ol i bihainim tok bilong em na dispela i kamapim bikpela hevi long ol yet na long olgeta tumbuna pikinini bilong ol.—Rom 5:12, 14.
9. Bilong wanem yumi save yumi bai harim maus bilong ol arapela man long nau?
9 Satan i bihainim wankain pasin long giamanim ol manmeri bilong God long nau. (KTH 12:9) Em i “papa tru bilong pasin bilong tok giaman,” na ol man i bihainim pasin bilong em na i laik giamanim ol wokboi bilong God, ol i pikinini bilong em. (Jon 8:44) Yumi laik skelim sampela rot yumi save harim maus bilong ol arapela man long nau.
Olsem Wanem Yumi Harim Maus Bilong Ol Long Nau
10. Wanem wanpela rot bilong harim maus bilong ol arapela man?
10 Ol tingting giaman. Aposel Pol i tok: “No ken larim ol narakain narakain tok i pulim bel bilong yupela, na mekim yupela i lusim rot bilong God.” (Hibru 13:9) Em wanem kain tok? Dispela tok inap ‘mekim yumi i lusim rot,’ olsem na yumi save Pol i stori long ol tok em inap bagarapim yumi long ol samting bilong spirit. Husat i autim dispela kain tok? Pol i tokim wanpela lain elda Kristen: “Sampela man bilong yupela yet bai i kirap na mekim tok giaman nabaut, bilong pulim ol manmeri bilong God i go bihainim ol.” (Aposel 20:30) Tru tumas, samting i kamap long taim bilong Pol i save kamap long nau. Sampela i bin insait long kongrigesen Kristen tasol nau ol i laik giamanim ol sipsip long rot bilong mekim “tok giaman nabaut,” olsem tok em hap bilong en tasol i tru na ol tok i giaman stret. Olsem aposel Pita i tok, ol i “mekim planti tok giaman”—em ol tok i luk olsem em i tru, tasol em i no inap helpim man.—2 Pita 2:3.
11. Olsem wanem tok bilong 2 Pita 2:1, 3 i kamapim klia pasin na laik bilong ol apostet?
11 Pita i mekim sampela tok moa i kamapim klia pasin bilong ol apostet taim em i tok “bai ol i hait na kamapim ol kain kain tok giaman namel long yupela . . . bilong bagarapim bilip bilong yupela.” (2 Pita 2:1, 3) Olsem stilman long tok piksa bilong Jisas i no go insait long dua, “em i kalapim banis long narapela hap na i go insait,” olsem tasol ol apostet i hait na mekim ol samting. (Galesia 2:4; Jut 4) Ol i laik mekim wanem? Pita i tok: ‘Ol bai pulim samting bilong yu.’ Maski ol apostet i tok ol i laik mekim wanem, laik tru bilong ol em bilong ‘stilim, kilim i dai, na bagarapim’ ol man. (Jon 10:10) Lukaut gut long ol kain man olsem!
12. (a) Olsem wanem yumi inap harim maus bilong ol arapela man long rot bilong ol poroman? (b) Olsem wanem pasin giaman bilong Satan na bilong ol arapela man i wankain?
12 Ol poroman nogut. Yumi inap harim maus bilong ol arapela man long rot bilong ol poroman bilong yumi. Ol poroman nogut i nogutim moa yet ol yangpela. (1 Korin 15:33) Tingim, Satan i bin toktok long Iv tasol—krismas na save bilong em i liklik long krismas na save bilong Adam. Em i kirapim Iv long bilip olsem Jehova i pasim em tumas long sampela samting, tasol dispela i no tru. Jehova i laikim tru ol man na em i wok long lukautim ol. (Aisaia 48:17) I wankain long nau, ol man i laik kirapim yupela ol yangpela long ting olsem papamama Kristen bilong yupela i pasim yupela tumas long sampela samting. Kain man olsem inap mekim wanem long yupela? Wanpela yangpela meri Kristen i tok: “Inap liklik haptaim ol klasmeit i mekim na bilip bilong mi i no strong tumas. Ol i wok long tok olsem lotu bilong mi i pasim mi tumas na i gat ol strongpela lo.” Tasol tru tru, ol papamama bilong yupela i laikim yupela tumas. Olsem na taim ol klasmeit i laik kirapim yupela long no ken trastim papamama bilong yupela, no ken bilipim tok giaman olsem Iv i bin mekim.
13. Devit i bin bihainim wanem savetingting? Wanem wanpela rot yumi inap bihainim pasin bilong em?
13 Devit, man bilong raitim song, i stori olsem long ol poroman nogut: “Mi no save raun wantaim ol man nogut. Mi no save wokabaut wantaim ol man bilong giaman [“ol man i haitim pasin tru bilong ol,” NW ].” (Song 26:4) Em nau, yu luksave long dispela pasin bilong ol kain man olsem? Ol i laik haitim pasin tru bilong ol—wankain olsem Satan i bin hait na mekim toktok long rot bilong snek. Long nau, sampela man nogut i haitim pasin tru na laik tru bilong ol long rot bilong Intenet. Long Intenet ol man bilong mekim pasin sem i giaman olsem ol i yangpela man bilong trikim na pulim ol yangpela long mekim pasin nogut. Yupela ol yangpela, plis lukaut gut tru, nogut yupela i kisim bagarap long samting bilong spirit.—Song 119:101; Sindaun 22:3.
14. Olsem wanem sampela taim ol niuspepa na TV samting i save kamapim ol tok bilong ol man i birua long tok i tru?
14 Sutim tok giaman. Sampela nius ripot i save tok stret long ol samting bilong ol Witnes Bilong Jehova, tasol sampela taim ol niuspepa na TV samting i larim ol birua bilong tok i tru i sutim tok giaman long ol Witnes. Olsem: Long wanpela kantri wanpela nius ripot i bin giaman na tok ol Witnes i bin sapotim gavman bilong Hitler long taim bilong Wol Woa 2. Long narapela kantri, wanpela ripot i sutim tok olsem ol Witnes i bin bagarapim sampela haus lotu. Long planti kantri liklik ol nius ripot i sutim tok long ol Witnes olsem ol i no laik bai ol dokta i helpim pikinini bilong ol, na ol Witnes i orait long ol wanbilip bilong ol i ken mekim ol bikpela rong tru. (Matyu 10:22) Maski ol nius ripot i tok olsem, ol man i gat gutpela bel na ol i save long yumi, ol i save ol dispela tok ol man i sutim long yumi em i giaman tasol.
15. Bilong wanem i no savepasin long bilipim olgeta tok yumi harim o ritim long ol niuspepa na TV samting?
15 Yumi mas mekim wanem sapos yumi harim tok ol kain man olsem i sutim long ol Witnes? Em i gutpela long bihainim tok bilong Sindaun 14:15: “Ol man i gat liklik save tasol, ol i save bilipim olgeta kain tok. Tasol man i gat gutpela tingting, em i save was gut long ol pasin em i mekim.” I no savepasin long bilipim olgeta tok yumi ritim o harim long niuspepa na TV samting. Yumi save i no olgeta nius ripot i save giaman, tasol yumi save “dispela graun olgeta em i stap aninit long strong bilong Satan.”—1 Jon 5:19.
“Traim Olgeta Tok”
16. (a) Olsem wanem pasin bilong ol sipsip tru i soim olsem tok bilong Jisas long Jon 10:4 em i tru? (b) Baibel i kirapim yumi long mekim wanem?
16 Tasol olsem wanem yumi inap save yumi toktok wantaim wanpela pren o wanpela birua? Jisas i tok ol sipsip i save bihainim wasman, long wanem, ol “i save long maus bilong en.” (Jon 10:4) I no lukluk bilong wasman i mekim na ol sipsip i bihainim em; em maus bilong em. Wanpela buk i stori long ol hap bilong Midel-Is i stori long wanpela man i kam raun long dispela hap na em i tok ol sipsip i luksave long klos bilong wasman, i no long maus bilong em. Wanpela wasman i tok ol sipsip i save long maus bilong wasman. Bilong kamapim klia tok bilong em, wasman i senisim klos wantaim dispela man bilong narapela ples. Man hia i putim klos bilong wasman na em i singautim ol sipsip, tasol ol i no bihainim em. Ol i no save long maus bilong em. Tasol taim wasman i singautim ol, maski em i putim narapela klos, wantu ol sipsip i kam long em. Olsem na man inap luk olsem em i wanpela wasman, tasol dispela i no mekim na ol sipsip bai bihainim em. I olsem ol sipsip i skelim maus bilong man i singaut long ol wantaim maus bilong wasman. Baibel i tokim yumi long mekim wankain samting—“traim olgeta spirit [“tok,” NW ], bai yupela i ken save, ol i kam long God, o nogat.” (1 Jon 4:1; 2 Timoti 1:13) Wanem samting bai helpim yumi long mekim olsem?
17. (a) Yumi kisim save long maus bilong Jehova long wanem rot? (b) Yumi save long Jehova na dispela inapim yumi long mekim wanem?
17 Olsem na taim yumi save gut moa long maus bilong Jehova o tok bilong em, orait em i isi moa long luksave long maus bilong ol arapela man. Baibel i soim olsem wanem yumi kisim dispela kain save. Baibel i tok: “Taim yupela i wokabaut . . . em bai i stap baksait long yupela na em bai i tokim yupela long rot yupela i mas bihainim.” (Aisaia 30:21) Dispela tok i stap baksait i kam long Tok Bilong God. Olgeta wan wan taim yumi ritim Tok Bilong God, i olsem yumi harim maus bilong Bikpela Wasman bilong yumi, Jehova. (Song 23:1) Olsem na taim yumi wok long stadi long Baibel, yumi save gut moa long maus bilong God. Pasin bilong save gut tru long em i mekim na wantu yumi inap save long maus bilong ol arapela man.—Galesia 1:8.
18. (a) Bilong save gut long maus bilong Jehova yumi mas mekim wanem samting moa? (b) Olsem Matyu 17:5 i tok, bilong wanem yumi mas bihainim maus bilong Jisas?
18 Bilong save gut long maus bilong Jehova yumi mas mekim wanem samting moa? Yumi no ken harim tok tasol, yumi mas bihainim tok. Lukim gen Aisaia 30:21. Baibel i tok: “Rot yupela i mas bihainim.” Yes, long rot bilong stadi long Baibel, yumi harim tok bilong Jehova bilong stiaim yumi. Em i tok: “Bihainim.” Jehova i laik bai yumi bihainim tok yumi harim. Olsem na long rot bilong bihainim samting yumi lainim, yumi soim olsem yumi no harim nating maus bilong Jehova, nogat, yumi harim tru. (Lo 28:1) Sapos yumi bihainim maus bilong Jehova bai yumi bihainim maus bilong Jisas tu, long wanem, Jehova yet i tokim yumi long mekim olsem. (Matyu 17:5) Jisas, em Gutpela Wasman, i tokim yumi long mekim wanem? Em i skulim yumi long kamapim ol disaipel na trastim “wokboi i gat gutpela tingting.” (Matyu 24:45; 28:18-20) Yumi bihainim maus bilong em na bai yumi kisim laip oltaim.—Aposel 3:23.
“Ol Sipsip Bai i Ranawe Long Em”
19. Yumi mas mekim wanem taim yumi harim maus bilong ol arapela man?
19 Orait yumi mas mekim wanem taim yumi harim maus bilong ol arapela man? Yumi mas mekim wankain samting ol sipsip i save mekim. Jisas i tok: “Ol sipsip bai i ranawe long em, long wanem, ol i no save long maus bilong ol arapela man.” (Jon 10:5) Pasin yumi mekim i gat tupela wok. Namba wan, bai yumi “no save bihainim ol arapela man.” Yes, yumi sakim strong ol dispela kain man. Long tok Grik bilong Baibel, dispela tok “i no save” i makim pasin bilong sakim tru samting. (Matyu 24:35; Hibru 13:5) Namba tu, yumi “bai i ranawe long em,” o givim baksait long em. Dispela em i stretpela pasin bilong mekim long ol man husat i skulim ol man long ol samting i no wanbel wantaim maus bilong Gutpela Wasman.
20. Bai yumi mekim wanem taim (a) ol apostet i laik giamanim yumi, (b) ol poroman nogut i laik pulim yumi, (c) ol nius ripot i sutim tok giaman long yumi?
20 Olsem na taim ol man i kamapim ol tingting bilong ol apostet, yumi laik bihainim Tok Bilong God: “Lukaut gut long ol man i save sakim dispela tok yupela i bin kisim na i save mekim ol kain kain toktok na ol pasin bilong brukim sios. Long dispela pasin ol i save mekim ol manmeri bilong sios i pundaun na bagarap. Yupela i mas i stap longwe long ol dispela kain man.” (Rom 16:17; Taitus 3:10) Na tu, ol yangpela Kristen i mas was gut long ol poroman nogut na bihainim tok Pol i bin givim long yangpela Timoti: “Oltaim yu mas givim baksait long olgeta kain laik nogut i save kamap long bel bilong ol yangpela man.” Na taim yumi harim ol tok giaman ol nius ripot i sutim long yumi, bai yumi tingim narapela tok Pol i bin givim long Timoti olsem: “Ol [ol man i putim yau long maus bilong ol arapela man] bai . . . putim yau long ol kain kain stori nating. Tasol yu yet yu mas tingting klia oltaim.” (2 Timoti 2:22; 4:3-5) Maski toktok bilong ol dispela kain man i swit long harim, yumi mas ranawe long olgeta samting em inap bagarapim bilip bilong yumi.—Song 26:5; Sindaun 7:5, 21; KTH 18:2, 4.
21. Ol man i sakim maus bilong ol arapela man inap kisim wanem gutpela prais?
21 Taim ol Kristen God i bin makim ol long holi spirit i sakim maus bilong ol arapela man, ol i bihainim tok bilong Gutpela Wasman i stap long Luk 12:32. Long dispela ves Jisas i tokim ol: “Yupela liklik lain sipsip, yupela i no ken pret. Papa bilong yupela em i tok pinis long em bai i stap king bilong yupela na givim kingdom bilong en long yupela.” Na tu, “ol arapela sipsip” i wet long harim tok bilong Jisas olsem: “Yupela i gat blesing bilong Papa bilong mi. Em i laik mekim gut long yupela. Yupela kam kisim kingdom Papa i bin redim na makim bilong yupela pinis, long taim graun i kamap nupela yet.” (Jon 10:16; Matyu 25:34) Yumi inap kisim gutpela prais tru sapos yumi sakim “maus bilong ol arapela man.”
Yu Tingim Yet?
• Olsem wanem pasin bilong Satan i wankain olsem pasin bilong ol arapela man long tok piksa bilong Jisas long banis sipsip?
• Olsem wanem yumi inap harim maus bilong ol arapela man long nau?
• Olsem wanem yumi ken luksave long maus bilong ol arapela man?
• Yumi mas mekim wanem taim yumi harim maus bilong ol arapela man?
[Piksa long pes 15]
Maria i luksave long Krais
[Piksa long pes 16]
Arapela man i no kam long ol sipsip long pasin i stret
[Piksa long pes 18]
Yumi save mekim wanem taim yumi harim maus bilong ol arapela man?