Laip Stori

Mipela i Amamas Long Givim Mipela Yet Olsem Ofa

Stori bilong Marian na Rosa Szumiga

Song 54:6 i tok: “Bikpela, mi save laikim tumas long givim ofa long yu.” Dispela tok i bin stiaim i stap bilong Marian Szumiga na meri bilong em, Rosa em ol i save stap long Frans. I no longtaim i go pinis ol i stori long wok bilong Jehova ol i mekim.

MARIAN: Papamama bilong mi ol i bin lusim Polan na kam sindaun long Frans. Ol i bilong lotu Katolik. Papa i no bin i go long skul, tasol long taim bilong Wol Woa 1, em i bin lain long rit na rait taim em i stap soldia. Papa em wanpela man bilong pret long God, tasol planti taim pasin bilong sios i mekim na Papa i bel hevi.

I gat wanpela samting em i no inap lusim tingting long en. Wanpela taim long taim bilong dispela pait, wanpela pris i kam long hap em Papa na ol narapela soldia i stap long en. Taim wanpela bom i pundaun klostu na pairap, dispela pris i pret na em i paitim hos bilong em long kruse na bai hos i ken ran hariap. Papa i kirap nogut olsem wanpela “wokman” bilong God i mekim wok long wanpela samting i holi bambai em i ken ranawe hariap. Maski em i lukim dispela samting na ol samting nogut bilong pait, em i bilip strong yet long God. Em i save tok olsem God i bin helpim em long kam bek gut long haus bihain long pait.

“Liklik Polan”

Long 1911, Papa i maritim wanpela yangpela meri long wanpela ples i stap klostu. Nem bilong em Anna Cisowski. Bihain liklik long pait, long 1919, Papa na Mama i lusim Polan na i go long Frans na Papa i wok long wanpela main bilong kisim blakpela ston ol i kolim kol. Mama i karim mi long Mas 1926 long Cagnac-les-Mines, long hap saut-wes bilong Frans. Bihain papamama i go sindaun long wanpela hap em planti lain bilong Polan i stap long en long Loos-en-Gohelle, klostu long Lens long hap not bilong Frans. Man bilong wokim bret i bilong Polan, man bilong salim mit i bilong Polan, na pris tu i bilong Polan. Olsem na yumi no kirap nogut olsem ol i kolim dispela hap Liklik Polan. Papamama bilong mi i insait long planti wok bilong komiuniti. Papa i save stretim rot bilong mekim ol pilai i gat musik na singsing. Na em i save toktok wantaim pris tu, tasol em i no amamas taim pris i save tokim em olsem, “I gat planti samting i stap hait.”

Wanpela taim long 1930, tupela meri i paitim dua long haus bilong mipela. Tupela i Sumatin Bilong Baibel, em nem bilong ol Witnes Bilong Jehova long dispela taim. Papa i kisim wanpela Baibel long ol, em wanpela buk longtaim tru em i bin i gat laik long ritim. Na tu, Papa na Mama i kirap kwik long ritim ol buk bilong Baibel em dispela tupela meri i lusim wantaim ol. Papamama i pilim tru ol samting ol i ritim insait long ol dispela buk. Maski ol i bisi, papamama i kirap i go long ol miting bilong ol Sumatin Bilong Baibel. Papa i wok long toktok yet wantaim pris, tasol ol i no wanbel long planti samting, na wanpela taim pris i kros na i tok sapos papamama i wok long bung yet wantaim ol Sumatin Bilong Baibel, em bai rausim susa bilong mi, Stéphanie long katekismo. Papa i tokim em: “Yu no ken wari. Kirap long nau na i go, pikinini meri bilong mi na ol narapela pikinini bilong mipela bai kam wantaim mipela long ol miting bilong ol Sumatin Bilong Baibel.” Papa i lusim lotu Katolik, na long 1932, papamama bilong mi i kisim baptais. Long dispela taim i gat 800 pablisa bilong Kingdom tasol long Frans.

Rosa: Papamama bilong mi i bilong Hangari na olsem famili bilong Marian, ol i sindaun long hap not bilong Frans bilong wok long main bilong kisim blakpela ston. Mama i karim mi long 1925. Long 1937, wanpela Witnes Bilong Jehova, nem bilong em Auguste Beugin o mipela i save kolim em Papa Auguste, i kirap long bringim nius Wastaua long tok ples Hangari i kam long papamama. Tupela i laikim ol tok i stap long magasin, tasol tupela i no kamap Witnes Bilong Jehova.

Maski mi yangpela, mi pilim tru ol tok mi ritim long Wastaua, na tambu bilong Papa Auguste, Suzanne Beugin, em i helpim mi gut. Papamama i orait long em i kisim mi i go long ol miting. Bihain, taim mi kirap wok, Papa i no amamas long mi save go long ol miting long ol Sande. Maski em i gutpela man, em i toktok planti olsem, “Yu no save stap long haus namel long wik na long ol Sande yu save go long ol miting!” Tasol mi save go yet long ol miting. Olsem na wanpela taim, Papa i tok: “Kisim olgeta samting bilong yu na lusim dispela haus!” Em biknait na mi gat 17 krismas tasol, na mi no save mi bai go we. Mi go long haus bilong Suzanne, na mi krai nogut tru. Mi stap wantaim Suzanne inap wanpela wik na bihain Papa i salim susa bilong mi i kam kisim mi go bek long haus. Mi meri bilong sem, tasol tok i stap long 1 Jon 4:18 i helpim mi long sanap strong. Dispela skripsa i tok “pasin bilong laikim ol arapela i kamap strong pinis insait long laip bilong wanpela man, orait dispela i save rausim pasin bilong pret.” Long 1942 mi kisim baptais.

Wanpela Gutpela Samting Mi Kisim

Marian: Mi kisim baptais long 1942 wantaim ol susa bilong mi, Stéphanie, Mélanie na brata bilong mi, Stéphane. Long haus, famili bilong mipela i save stori olgeta taim long Baibel. Taim mipela i sindaun long tebol, Papa i save ritim Baibel long mipela long tok Polan. Long nait papamama i save stori long mipela long ol samting i painim ol taim ol i autim tok bilong Kingdom. Dispela ol samting i skulim mipela long laikim Jehova na bilip long em moa yet. Sik i mekim na Papa i no wok moa, tasol em i wok yet long lukautim mipela long ol samting bilong spirit na bilong skin.

Papa nau i gat haptaim bilong em, olsem na wanpela taim long olgeta wik em i save mekim Baibel stadi wantaim ol yangpela bilong kongrigesen long tok Polan. Long dispela skul mi lain long ritim tok Polan. Papa i save helpim ol yangpela long ol narapela samting tu. Wanpela taim Brata Gustave Zopfer, em i bin lukautim wok bilong ol Witnes Bilong Jehova long Frans long dispela taim, em i kam lukim kongrigesen bilong mipela, na Papa i stretim rot bilong ol yangpela long singsing wantaim na wokim drama bilong Baibel long bikpela kaikai em King Belsasar i bin mekim na wanpela han i rait long banis. (Daniel 5:​1-31) Louis Piéchota, i makim Daniel long drama, bihain em i bin sanap strong taim ol Natsi i mekim nogut long em.a Em dispela kain sindaun mipela ol pikinini i kamap bikpela long en. Mipela i luksave olsem oltaim papamama bilong mipela i givim bel tru long mekim ol samting bilong spirit. Nau, mi luksave olsem em wanpela gutpela samting bilong spirit papamama i givim mipela.

Taim Wol Woa 2 i kirap long 1939, ol i tambuim wok autim tok bilong ol Witnes Bilong Jehova long Frans. Wanpela taim, ol i kam sekim ples mipela i sindaun long en. Ol soldia bilong Jeman i raunim olgeta haus. Papa i bin wokim wanpela hul aninit long kabot, na mipela i haitim sampela buk bilong Baibel insait long dispela hul. Tasol sampela buklet Fascism or Freedom i stap insait long wanpela kabot. Kwiktaim Papa i kisim ol dispela buklet na haitim insait long poket bilong wanpela saket i hangamap i stap long banis. Tupela soldia na wanpela polis bilong Frans i sekim haus bilong mipela. Mipela i wari na wet tasol. Wanpela soldia i kirap sekim ol klos i hangamap i stap, na i no longtaim em i kam insait long haus kuk, em hap mipela i stap, na em i holim long han bilong em ol buklet. Em i lukluk long mipela, na putim ol buklet antap long tebol na em i go sekim ol narapela hap bilong haus. Kwiktaim mi kisim ol buklet na putim insait long wanpela kabot em ol soldia i bin sekim pinis. Dispela soldia i no askim mipela long ol dispela buklet​—⁠i olsem em i lusim tingting pinis long ol!

Insait Long Wok Autim Tok Fultaim

Long 1948, mi tingting long insait long wok bilong Jehova fultaim olsem painia. Sampela de bihain, mi kisim wanpela pas long brens ofis bilong ol Witnes Bilong Jehova long Frans. Dispela pas i gat asainmen bilong mi long mekim wok painia long Kongrigesen Sedan, klostu long Beljam. Papamama i amamas long lukim mi mekim wok bilong Jehova long dispela rot. Tasol Papa i tok olsem wok painia i no isi. I gat hatwok long en. Tasol em i tok olgeta taim ol bai amamas long lukim mi na sapos mi gat hevi em bai helpim mi. Maski papamama bilong mi i no gat planti mani, ol i baim wanpela nupela baiskol bilong mi. Mi holim yet risit bilong dispela baiskol, na taim mi lukim, aiwara i save pulap long ai bilong mi. Papa na Mama i dai long 1961, tasol mi tingim yet ol gutpela tok bilong Papa; ol i bin strongim mi na mekim gut bel bilong mi long ol dispela yia mi mekim wok bilong Jehova.

Narapela i save strongim mi, em wanpela sista Kristen i gat 75 krismas long Kongrigesen Sedan, nem bilong em Elise Motte. Long taim bilong san, mi save go long ol ples i stap longwe bilong autim tok, na Elise i save kalap long tren na i kam bungim mi bilong autim tok long dispela hap. Tasol wanpela taim ol wokman bilong tren i straik na Elise i no inap go bek long haus. Wanpela rot tasol mi inap tingim bilong kisim em i go bek, em long rot bilong baiskol bilong mi, tasol em i mas sindaun long ples bilong putim kago​—⁠dispela i no gutpela ples sindaun. Long de bihain, mi bringim wanpela pilo i kam wantaim na kisim Elise long haus bilong em. Em i no kisim tren moa, na mani bilong baim tren em i save baim ti samting bilong mitupela long belo. Husat bai ting olsem baiskol bilong mi bai stap olsem PMV?

Planti Wok Moa

Long 1950, ol i askim mi long mekim wok olsem wasman sekit long hap not bilong Frans. Mi gat 23 krismas tasol, olsem na pastaim mi tingting planti. Mi ting olsem brens ofis i popaia! Kain kain askim i kamap long tingting bilong mi: ‘Mi winim mak bilong spirit na skin bilong mi i gat strong inap long mekim dispela wok? Olsem wanem mi inap lain long ol narapela narapela ples slip long olgeta wik?’ Narapela samting tu em, taim mi gat 6-pela krismas, mi bin kisim wanpela kain sik bilong ai ol i kolim divergent strabismus. Dispela sik i mekim wanpela ai bilong mi i tanim. Mi save sem long dispela, na tingting planti long ol narapela bai ting olsem wanem long mi. Mi amamas tru olsem long dispela taim mi kisim helpim long Stefan Behunick, em i bin winim Skul Gileat. Ol i bin rausim Brata Behunick long Polan, long wanem, em i mekim wok autim tok olsem na Sosaiti i makim nupela ples bilong em long mekim wok, em long Frans. Mi pilim tru pasin bilong em long sanap strong. Em i daun tru long Jehova na pilim tru tok i tru. Sampela i ting em i strong tumas long mi, tasol mi lainim planti samting long em. Pasin bilong em long i no pret i helpim mi.

Wok sekit i mekim na mi kisim sampela gutpela ekspiriens long wok autim tok. Long 1953, ol i askim mi long go lukim wanpela man nem bilong en Mista Paoli, em i stap long hap saut bilong Paris na em i save kisim sabskripsen bilong Wastaua. Mi go bungim em, na mi kisim save olsem em i bin ritaia long ami na em i amamas long ritim Wastaua. Em i tokim mi olsem bihain long em i ritim wanpela stori long wanpela nupela Wastaua i stori long Memorial bilong tingim indai bilong Krais, em yet i mekim Memorial na bihain em i ritim Buk Song i go inap em i slip. Mipela stori long apinun olgeta. Paslain long mi lusim em, mipela i toktok liklik long baptais. Bihain mi singautim em long kam long kibung sekit bilong mipela i kamap long 1954. Em i kam, na em wanpela bilong 26 man i kisim baptais long dispela kibung. Ol kain ekspiriens olsem i save mekim mi i amamas.

Rosa: Long Oktoba 1948, mi kirap mekim wok painia. Bihain long mi mekim wok long Anor, klostu long Beljam, ol i makim mi long mekim wok long Paris, wantaim narapela painia, em Irène Kolanski (nau Leroy). Mipela i stap long wanpela liklik rum long Saint-Germain-des-Près em i stap namel long siti. Mi bin kamap bikpela long bus, olsem na mi kirap nogut long ol man bilong Paris. Mi ting olsem olgeta bilong ol i gat save. Tasol taim mi autim tok long ol, mi luksave olsem ol i no narapela kain long ol arapela man. Planti taim ol man bilong was long geit i save rausim mipela, na i hatwok long kirapim Baibel stadi. Maski i olsem, sampela man i amamas long harim tok mipela i mekim.

Long wanpela kibung sekit long 1951, wanpela brata i mekim inteviu long mi na Irène long wok painia bilong mipela. Yu ting husat i mekim inteviu long mipela? Wanpela yangpela wasman sekit em nem bilong em Marian Szumiga. Mipela i bin bung wanpela taim long bipo, tasol bihain long dispela kibung, mipela i kirap raitim pas i go i kam. Planti samting bilong mitupela i wankain, mipela i bin baptais long wankain yia na kamap painia long wankain yia tu. Tasol bikpela samting tru, em mitupela wantaim i gat laik long mekim yet wok bilong God long olgeta de. Olsem na bihain long mipela i beten na skelim gut ol samting, mipela i marit long Julai 31, 1956. Taim mi marit, nau sindaun bilong mi i senis. Mi kamap meri marit na tu mi mas raun wantaim Marian long wok sekit, dispela i makim olsem long olgeta wik mipela i mas i stap long narapela narapela haus. Pastaim, dispela i hatwok, tasol i gat planti gutpela samting i painim mipela.

Ol Gutpela Blesing

Marian: Long ol yia i go pinis, mipela i helpim wok bilong redim sampela kibung. Mi tingim yet wanpela kibung i kamap long 1966, long Bordeaux. Long dispela taim, ol i tambuim wok bilong ol Witnes Bilong Jehova long Potugal. Olsem na ol i mekim program bilong kibung tu long tok Potugal bilong ol Witnes bilong Potugal em ol i kam long Frans. Planti handet bratasista Kristen bilong mipela long Potugal i kam, tasol i gat hevi long ples slip. Haus bilong ol Witnes long Bordeaux i no bikpela tumas inap long ol i kam slip, olsem na mipela i rentim wanpela haus piksa i stap nating na mekim em i kamap olsem rum slip. Mipela i rausim olgeta sia, na mipela kisim wanpela keten i stap long pletfom bilong haus piksa na pasim long namel bilong haus na em i kamap tupela rum slip, wanpela bilong ol brata na wanpela bilong ol sista. Mipela wokim ples waswas, na putim ol gras antap long plua simen, na karamapim long sel. Olgeta i amamas long dispela ol samting mipela i stretim.

Bihain long kibung, mipela i go lukim ol brata na sista bilong mipela long ples slip bilong ol. Olgeta lain i amamas tru. Pasin bilong ol long sanap strong maski ol man i bin birua tru long ol inap planti yia, dispela pasin bilong ol i strongim tru mipela! Taim kibung i pinis na ol i laik go bek, mipela olgeta i krai.

Narapela gutpela samting i bin kamap tupela yia paslain long dispela, long 1964, taim ol i askim mi long mekim wok olsem wasman distrik. Long dispela taim tu mi tingting planti, mi inap tru long mekim dispela wok o nogat. Tasol mi tokim mi yet olsem, ol brata i makim mi long mekim dispela wok i ting olsem mi inap mekim dispela wok na ol i makim mi. Mi wok wantaim ol narapela wasman raun na dispela i helpim mi. Mi lainim planti samting long ol. Planti bilong ol i stap gutpela piksa long pasin bilong isi na i no les kwik, em ol pasin i bikpela samting long ai bilong Jehova. Mi kisim save olsem, sapos yumi lain long wet na stap isi, Jehova bai helpim yumi.

Long 1982 brens ofis i askim mitupela long lukautim tu wanpela liklik grup i gat 12 pablisa bilong Polan, long Boulogne-Billancourt long arere bilong taun Paris. Mipela i kirap nogut long dispela. Mi save long ol tok tiokratik long tok Polan, tasol mi hatwok long mekim ol sentens. Tasol gutpela pasin bilong ol dispela brata long wok gut wantaim mi, dispela i helpim mi. Long nau, i gat olsem 170 pablisa i stap long dispela kongrigesen, na i gat klostu 60 painia. Bihain mi na Rosa i raun lukim tu ol grup na kongrigesen i mekim tok Polan long Ostria, Denmak, na Jemani.

Sindaun i Senis

Pasin bilong raun lukim ol kongrigesen em i hap bilong laip bilong mipela, tasol sik i mekim na mipela i mas lusim dispela wok long 2001. Mipela i painim wanpela flet long taun Pithiviers, em hap we susa bilong mi Ruth i stap long en. Brens ofis i makim mipela long mekim wok painia salim long dispela kongrigesen na ol i daunim mak bilong aua mipela i mas winim na bai i stret long sindaun bilong mipela.

Rosa: Namba wan yia bihain long mipela i lusim wok sekit i hatwok long mi. Dispela senis i kamap wantu tasol na mi pilim olsem mi no inap mekim wanpela gutpela samting. Bihain mi tokim mi yet olsem: ‘Yu inap long mekim wok long taim na strong yu gat yet long mekim wok olsem painia.’ Long nau, mi amamas long wok wantaim ol narapela painia long kongrigesen bilong mipela.

Oltaim Jehova i Save Lukautim Mipela

Marian: Mi tenkyu long Jehova olsem Rosa i bin stap poroman bilong mi long dispela 48 yia. Long ol yia mipela i mekim wok bilong wasman raun, em i bin helpim mi gut. I no gat wanpela taim mi harim em i tok, ‘Mi laik mitupela lusim wok sekit na i gat haus bilong mipela yet.’

Rosa: Sampela taim wanpela bai tokim mi olsem: “Sindaun bilong yupela i no gutpela. Yupela i save stap long haus bilong ol narapela.” Tasol dispela “gutpela sindaun” em wanem kain sindaun? Planti taim yumi mekim planti samting em ol dispela samting inap pasim yumi long mekim ol wok bilong spirit. Ol samting yumi mas i gat, em gutpela bet, wanpela tebol, na sampela narapela samting em yumi mas i gat. Taim mipela i mekim wok painia, mipela i no gat planti samting bilong skin, tasol mipela i gat olgeta samting mipela i mas i gat bilong mekim wok bilong Jehova. Sampela taim sampela i save askim mi olsem, “Bai yu mekim wanem taim yu go lapun na yu no gat haus bilong yu yet na yu no kisim pensen.” Mi save kamapim tok bilong Song 34:10: “Ol manmeri i bihainim Bikpela ol i no save sot long ol gutpela samting.” Oltaim Jehova i save lukautim mipela.

Marian: Tru tumas! Jehova i bin givim mipela planti samting. Olsem: Long 1958, ol i makim mi bilong i go long kibung intenesenel long New York. Tasol mipela i no gat mani bilong baim tiket bilong Rosa. Wanpela taim long nait wanpela brata i givim mipela wanpela envelop i gat dispela rait antap long en, “New York.” Presen i stap insait long pas i helpim Rosa long i go wantaim mi!

Mitupela Rosa i no bel hevi long ol yia mipela i lusim bilong mekim wok bilong Jehova. Mipela i no lusim wanpela samting tasol mipela i kisim planti samting​—⁠mipela i belgut na amamas long mekim wok bilong God fultaim. Jehova em wanpela gutpela God tru. Mipela i bin lain long bilip olgeta long em, na mipela i laikim em moa yet. Sampela brata Kristen bilong mipela i dai, long wanem, ol i stap gut long Jehova. Tasol mi bilip olsem insait long ol yia i kam i go, wanpela man inap mekim bikpela wok long i stap bilong em long olgeta wan wan de long mekim wok bilong Jehova. Mitupela Rosa i bin wok strong long mekim olsem i kam inap nau, na em samting mipela i laik mekim long bihain.

[Futnot]

[Piksa long pes 20]

François na Anna Szumiga na ol pikinini bilong ol, Stéphanie, Stéphane, Mélanie, na Marian long 1930 samting. Marian i sanap antap long sia

[Piksa long pes 22]

Antap: Tilim ol buk bilong Baibel long maket long Armentières, long hap not bilong Frans long 1950

[Piksa long pes 22]

Han kais: Stefan Behunick na Marian long 1950

[Piksa long pes 23]

Marian na Rosa long de paslain long tupela i marit

[Piksa long pes 23]

Rosa (namba wan long han kais) na painia poroman bilong em Irène (namba foa long han kais), ol i wok long toksave long wanpela kibung long 1951

[Piksa long pes 23]

Planti taim mipela i raun long baiskol tasol taim mipela i mekim wok sekit