Husat Bai Kirap Bek? Ol Bai Stap We?

LONG tupela sapta i kamap paslain long dispela, yumi bin ritim stori bilong hamas man em ol i bin kirap bek?— Inap faipela. Hamas ol i pikinini?— Tripela. Na namba foa man Baibel i kolim em olsem yangpela man. Yu ting dispela i soim wanem samting?—

Em i soim olsem God i save laikim ol pikinini na ol yangpela. Tasol em bai kirapim bek planti arapela man tu. Olsem wanem? Ol man i mekim gutpela pasin, God bai kirapim bek ol tasol?— Yumi inap ting olsem. Tasol planti man i no bin kisim save long tok tru bilong God Jehova na Pikinini bilong em. Olsem na ol i mekim ol pasin nogut, long wanem, ol i bin lainim ol samting i no stret. Yu ting Jehova bai kirapim bek ol kain man olsem?—

Baibel i tok: “God bai i kirapim bek ol man i dai pinis, em ol stretpela man na ol man nogut wantaim.” (Aposel 24:15) Bilong wanem God bai kirapim bek ol man nogut, o ol man i no bin mekim stretpela pasin?— Long wanem, ol i no bin i gat rot long kisim save long Jehova na ol samting em i laik ol man i mas mekim.

Yu ting God bai kirapim bek ol man long wanem taim?— Tingim gen taim Lasarus i bin i dai na Jisas i tok promis long susa bilong em, Marta, olsem: “Brata bilong yu bai i kirap bek.” Marta i tok: “Mi save, em bai i kirap bek long las de, long dispela taim olgeta manmeri bai i kirap bek.” (Jon 11:​23, 24) Wanem mining bilong dispela tok bilong Marta olsem Lasarus bai kirap bek long “las de”?—

Marta i bin harim tok promis bilong Jisas, olsem: ‘Olgeta manmeri i stap long matmat ol bai lusim matmat na i kam ausait.’ (Jon 5:​28, 29) Olsem na “las de” i makim dispela taim God bai kirapim bek olgeta manmeri em i tingim ol. Dispela las de i no wanpela de i gat 24 aua long en, nogat. Em bai inap wan tausen yia. Baibel i tok long dispela de ‘God bai kotim ol manmeri.’ Ol manmeri God i kirapim bek ol, ol tu i insait long dispela lain em bai kotim ol.​—Aposel 17:31; 2 Pita 3:8.

Tingim bikpela amamas bai kamap long dispela de! Insait long dispela de i olsem wan tausen yia, planti milion man i dai pinis ol bai kirap bek. Jisas i kolim dispela ples ol bai kirap bek na kisim laip long en, olsem Paradais. Yumi ken stori long Paradais bai stap we na em i wanem kain ples.

Inap olsem tripela aua paslain long Jisas i dai long diwai pos, em i toktok long Paradais long man i stap long diwai pos klostu long em. Ol i laik kilim dispela man, long wanem, em i bin mekim ol pasin nogut. Tasol taim em i lukluk long Jisas na i harim tok ol man i mekim long Em, em i kirap bilip long Jisas. Olsem na dispela man nogut i tok: “Jisas, taim yu kamap king, yu ken tingting long mi.” Jisas i tokim em: “Mi tok tru long yu nau, bai yu stap wantaim mi long Paradais.”​—Luk 23:​42, 43, NW.

Wanem mining bilong dispela tok bilong Jisas? Paradais i stap we?— Tingim dispela. Long pastaim tru, Paradais i bin stap we?— Tingim, God i bin givim wanpela ples paradais long namba wan man, Adam, na meri bilong em na bai ol i ken stap long en long dispela graun. Nem bilong dispela ples em gaden Iden. I gat ol animal long dispela gaden, tasol ol i no bagarapim man. Na i gat ol diwai i karim planti prut i swit tru, na i gat wanpela bikpela wara tu. Em i gutpela ples tru bilong i stap long en!​—Stat 2:​8-​10.

Olsem na taim yumi ritim stori bilong dispela man nogut bai stap long Paradais, yumi mas piksaim long tingting olsem dispela graun i kamap gutpela ples tru bilong i stap long en. Olsem wanem? Jisas bai stap long Paradais hia long graun wantaim dispela man em bipo em i man nogut?— Nogat. Yu save bilong wanem Jisas bai i no stap long graun?—

Jisas bai mekim wok King long heven na bosim Paradais long graun. Olsem na dispela tok olsem Jisas bai stap wantaim dispela man i makim olsem em bai kirapim em bek na lukautim em. Tasol bilong wanem Jisas bai larim wanpela man em bipo em i man nogut i stap long Paradais?— Yumi ken painimaut dispela samting.

Paslain long dispela man nogut i toktok long Jisas, yu ting em i save long ol samting God i tingting pinis long mekim?— Nogat. Em i bin mekim ol pasin nogut, long wanem, em i no bin save long tok tru bilong God. Long Paradais em bai kisim save long ol samting God i tingting pinis long mekim. Long dispela taim em bai i gat rot long kamapim klia olsem em i laikim tru God na mekim laik bilong Em.

Olsem wanem? Olgeta man i kirap bek bai ol i stap long Paradais long graun?— Nogat. Yu save bilong wanem i olsem?— Sampela bai kirap bek na stap wantaim Jisas long heven. Ol bai mekim wok king wantaim em na bosim Paradais long graun. Yumi ken stori long olsem wanem yumi save long dispela.

Long nait paslain long Jisas i dai, em i tokim ol aposel bilong em olsem: ‘Long haus bilong Papa bilong mi long heven i gat planti rum bilong i stap long en, na mi go bilong redim ples bilong yupela.’ Na Jisas i tok promis long ol olsem: “Bai mi kam bek na kisim yupela i go i stap wantaim mi. Na ples mi stap long en, yupela tu bai i stap long en wantaim mi.”​—Jon 14:​2, 3.

Jisas i go we taim em i kirap bek pinis?— Yes, em i go bek long heven bilong i stap wantaim Papa bilong em. (Jon 17:​4, 5) Olsem na Jisas i tok promis long ol aposel na ol arapela disaipel bilong em olsem em bai kirapim bek ol na bai ol i ken i stap wantaim em long heven. Ol bai mekim wanem wantaim Jisas?— Baibel i tok ol disaipel i “kirap bek long dispela namba wan taim,” ol bai stap long heven na bosim graun olsem “king wantaim Krais long dispela 1,000 yia.”​—KTH 5:​10; 20:6; 2 Timoti 2:​12.

Hamas manmeri bai “kirap bek long dispela namba wan taim” na mekim wok king wantaim Jisas?— Jisas i tokim ol disaipel bilong em olsem: “Yupela liklik lain sipsip, yupela i no ken pret. Papa bilong yupela em i tok pinis long em bai i stap king bilong yupela na givim kingdom bilong en long yupela.” (Luk 12:32) Baibel i kolim hamas stret i insait long dispela “liklik lain sipsip,” em ol bai kirap bek na stap wantaim Jisas long Kingdom bilong em long heven. Baibel i tok inap “144,000 manmeri” bai kirap bek na go long heven.​—KTH 14:​1, 3.

Hamas manmeri bai stap long Paradais long graun?— Baibel i no kamapim dispela. Tasol God i bin tokim Adam na Iv taim ol i stap long gaden Iden long ol i mas kamapim ol pikinini na go sindaun long olgeta hap bilong graun. Tru, ol i no bin mekim olsem. Tasol God bai stretim ol samting na bai ol samting em i bin tingting pinis long mekim bai kamap, olsem ol gutpela man bai sindaun long olgeta hap bilong graun.​—Stat 1:​28; Aisaia 45:18; 55:11.

Tingim bikpela amamas ol man bai kisim taim ol i stap long Paradais! Graun olgeta bai kamap olsem wanpela gutpela ples gaden. Bai i gat planti pisin na ol animal na kain kain diwai na plaua. I no gat man bai kisim pen bilong sik, na i no gat man bai i dai. Olgeta man bai pren gut wantaim. Sapos yumi laik i stap oltaim long Paradais, nau em taim bilong redi long mekim olsem.