Sapta 19
Taim Olgeta Man Long Graun i Save Tru Long God
1, 2. Olsem wanem ol man i bagarapim ol samting God i bin wokim?
SAPOS wanpela hapman bilong wokim piksa nau tasol em i wokim wanpela gutpela piksa tru. I stret em i ken amamas long dispela piksa na ting em i nambawan piksa tru! Tasol long nait wanpela birua i bagarapim. Man bilong wokim dispela piksa, bel bilong em i bagarap stret. Em i laik tru bai dispela man nogut i go kalabus! Na em i laik tru bai piksa bilong em inap kamap gutpela gen olsem bilong pastaim.
2 Jehova i olsem dispela man bilong wokim piksa. Em i wokim gutpela samting tru—em dispela graun na ol man i stap long en. Em i wokim pinis namba wan man na meri na em i tok, olgeta samting em i wokim long graun “i gutpela.” (Stat 1:31) Adam tupela Iv i pikinini bilong God yet, na em i laikim tru tupela. Em i tingting long ol bai i stap amamas na i stap gutpela tru oltaim oltaim. Tru, Satan i pulim tupela long mekim pasin bikhet, tasol dispela i no bagarapim olgeta ol samting God i bin wokim; em inap stretim bek.—Stat 3:23, 24; 6:11, 12.
3. Wanem kain laip em i “laip tru”?
3 God i tingting pinis long stretim ol samting. Em i laik tru bai yumi stap gutpela olsem em i laik long pastaim. Yumi save stap sotpela taim tasol na yumi gat planti hevi, tasol dispela i no “laip tru” God i laik bai yumi kisim. Em i laik bai yumi kisim “laip i stap gut oltaim oltaim.”—1 Timoti 6:12, 19.
4, 5. (a) Olsem wanem bai yu inap i stap long Paradais? (b) Bilong wanem yumi mas tingim ol gutpela samting yumi wetim i k amap bihain?
4 Taim yumi kisim save pinis long God, i gat wok yumi mas mekim. (Jems 4:17) Tasol tingim ol blesing yu bai kisim sapos yu bihainim dispela save na yu wok strong long kisim laip i stap oltaim. Long Baibel, God Jehova i stori gut tru long gutpela sindaun bilong ol man long Paradais klostu nau bai kamap long graun. Tru, yumi lain bilong Jehova yumi no tingting long kisim pe tasol; yumi mekim wok bilong God, long wanem, yumi laikim em tru. (Mak 12:29, 30) Na taim yumi mekim wok bilong God, yumi no kisim laip olsem pe. Nogat. Laip oltaim em i presen God i givim long yumi. (Rom 6:23) Gutpela yumi tingim i stap bilong yumi long Paradais, long wanem, dispela bai helpim yumi long tingim gut pasin bilong God Jehova—em i save sori na “mekim gut tru long ol man i wok long painim em.” (Hibru 11:6) Sapos yumi bilip tru long dispela long bel na long tingting, dispela bai helpim yumi long sanap strong na karim ol hevi i painim yumi long dispela graun Satan i bosim.—Jeremaia 23:20.
5 Orait, nau yumi ken tingim gut tok bilong Baibel olsem bihain bai yumi inap i stap oltaim long Paradais long graun. Taim olgeta man long graun i save tru long God, ol bai stap olsem wanem?
BIHAIN LONG ARMAGEDON—PARADAIS BAI KAMAP LONG GRAUN
6. Armagedon em wanem samting? Wanem samting bai painim ol manmeri long Armagedon?
6 Olsem yumi stori pinis, klostu nau bai God Jehova i pinisim dispela taim nogut. Samting Baibel i kolim Armagedon em i klostu pinis. Sampela man i ting dispela tok Armagedon i makim bikpela bagarap bai kamap taim sampela lain i pait na tromoi ol bom nuklia. Tasol nogat; Armagedon i no olsem. Kamapim Tok Hait 16:14-16 i tokaut klia olsem Armagedon em i pait bilong “bikpela de bilong God I Gat Olgeta Strong,” na “ol king bilong olgeta kantri bilong graun” bai insait long dispela pait. Klostu nau Pikinini bilong God Jehova, em God i makim em i stap King, em bai i go kirapim pait. Yumi save tru husat bai winim pait. Olgeta man i birua long Kingdom bilong God na ol i insait long lain nogut bilong Satan, ol bai bagarap. Ol man i stap gut long Jehova ol tasol bai abrusim bagarap.—KTH 7:9, 14, NW; KTH 19:11-21.
7. Taim Krais i bosim graun inap 1,000 yia, Satan na ol spirit nogut bai stap we? Dispela bai helpim ol manmeri olsem wanem?
7 Orait, tingim olsem yu yet yu winim pinis dispela bikpela bagarap. I stap bilong yumi long graun bai i olsem wanem long nupela taim God i kamapim olsem em i tok promis pinis? (2 Pita 3:13) Yumi no ken tingting planti long i stap bilong yumi bai i olsem wanem, long wanem, Baibel yet i tokim yumi; na tok bilong en long ol samting bai kamap i gutpela tru. Baibel i tok, taim Krais Jisas i bosim graun inap 1,000 yia, Satan na ol spirit nogut bai kalabus—bai ol i no inap mekim wanpela samting. Ol dispela spirit nogut i no ken hait moa na kirapim kain kain hevi na wok long pulim yumi long mekim pasin i no stret long ai bilong God. Em gutpela tru!—KTH 20:1-3.
8, 9. Long nupela taim bihain, olsem wanem long ol lek nogut samting na sik na pasin bilong i go lapun?
8 Bihain bai olgeta kain sik i pinis. (Aisaia 33:24) Lek bilong ol lek nogut bai kamap strong na bai ol inap kirap sanap, na wokabaut, na ran, na kalap kalap. Ol yaupas, em longtaim ol i no bin harim wanpela samting, bai ol inap harim ol gutpela krai na pairap bilong ol samting. Ol aipas bai kirap nogut taim ai bilong ol i op na ol inap lukim kala kala na mak bilong ol samting. (Aisaia 35:5, 6) Nau bai ol inap lukim pes bilong ol famili na pren bilong ol! Long dispela taim bai ol i amamas tru na ating inap liklik taim bai aiwara i mekim tudak ai bilong ol.
9 Olaman! Bai i no gat aiglas moa, o stik bilong helpim man long wokabaut, o marasin, o dokta bilong stretim tit, o haus sik! No gat moa wanpela sik bilong tingting o bel hevi bai pinisim amamas bilong ol man. No gat wanpela sik bai bagarapim ol pikinini. Ol lapun bai kamap yangpela gen. (Jop 33:25) Skin bilong yumi bai wok long kamap gutpela na kamap strong. Bai yumi slip gut na taim yumi kirap long moningtaim bai yumi gat nupela strong bilong mekim ol wok bilong yumi na bai yumi amamas long mekim.
10. Ol manmeri i abrusim bagarap long Armagedon ol bai kisim wanem wok?
10 Ol man i winim Armagedon bai i gat planti wok ol i ken amamas long mekim. Bai ol i mekim graun i kamap ples paradais. Bai ol i rausim olgeta samting nogut bilong olpela pasin. Ol gutpela gaden bilas na gaden kaikai bai senisim ol setelmen i gat ol pipia haus nogut na graun ol man i bagarapim pinis. Bai olgeta man i gat gutpela haus i gat ol samting bilong helpim sindaun bilong ol. (Aisaia 65:21) Ol bai wok long skruim ples paradais i go i go na bai olgeta hap bilong graun i kamap gutpela ples olsem God i wokim long gaden Iden. Bai ol manmeri i amamas tru long mekim dispela wok bilong stretim bek graun!
11. Bihain bai ol man i mekim wanem long ol samting bilong graun na ol animal?
11 God yet bai soim rot long ol man na taim ol i mekim dispela wok ol i no ken bagarapim graun o win o wara. Ol manmeri bai stap gut wantaim ol animal. Bai ol i no kilim nating ol animal; bai ol i kirap gen long bosim gut ol samting hia long graun, na bai ol i lukautim gut ol animal. Bai yu lukim ol weldok na pikinini sipsip, ol laion na pikinini bulmakau, ol i kaikai wantaim—na ol animal bilong ples i no ken pret. Liklik pikinini i no ken pret long ol animal bilong bus, na ol man nogut bilong bagarapim ol man, ol i no ken stap na bagarapim bel isi bilong ol man long nupela taim. (Aisaia 11:6-8) Gutaim tru bai kamap!
PASIN BILONG OL MAN BAI SENIS
12. Truim bilong Aisaia 11:9 i kamap olsem wanem long nau? Na truim bilong en bai kamap olsem wanem long Paradais?
12 Aisaia 11:9 i tokaut klia long as na bai i no gat wanpela i mekim nogut long narapela long olgeta hap bilong graun. Em i tok: “Olgeta samting long graun bai i save tru long Bikpela. Dispela save bai inapim olgeta hap graun olsem solwara i inapim mak bilong en olgeta.” Dispela i tok long ol manmeri, long wanem, ol animal i no inap ‘kisim save long Bikpela’ na senisim pasin bilong ol; skin bilong ol i save kirapim ol long mekim ol samting. Tasol save ol man i kisim long Man bilong wokim ol, dispela i save kirapim ol long senisim pasin bilong ol. Ating yu yet yu senisim pinis sampela pasin bilong yu taim yu bihainim save yu kisim long God. Planti milion manmeri i bin mekim olsem. Olsem na truim bilong Aisaia 11:9 i wok long kamap nau namel long ol manmeri i mekim wok bilong Jehova. Tasol em i makim tu wanpela taim bihain na bai ol manmeri long olgeta hap bilong graun i lusim olgeta pasin olsem bilong animal na pasin bilong pait, na bai ol i sindaun gut wantaim inap long olgeta taim bihain.
13. Wanem bikpela wok bilong skulim ol man bai kamap long graun?
13 Taim olgeta manmeri long graun i save tru long God, em bai gutpela taim tru! King Krais Jisas na ol 144,000 i mekim wok king wantaim em, ol bai bosim wanpela bikpela wok bilong skulim ol man. Bai i gat ol nupela “buk” bilong mekim wok long en. Yumi ken ting em sampela buk i gat ol lo na tok bilong God long en bilong skulim olgeta manmeri i stap long graun. (KTH 20:12) Bai ol manmeri i lain long sindaun gut wantaim; ol i no ken lain moa long pait. Olgeta samting bilong pait bai pinis olgeta. (Song 46:9) Ol manmeri i stap long nupela taim ol bai lain long mekim gutpela pasin sori long ol narapela man, na tingim gut ol, na givim gutnem long ol.
14. Taim olgeta man i pas wantaim olsem wanpela bikpela famili, wanem kain pasin bai kamap long graun?
14 Olgeta manmeri bai pas gut wantaim olsem wanpela bikpela famili. Bai i no gat wanpela samting inap pasim ol long i stap wanbel olsem ol brata brata. (Song 133:1-3) No gat wok moa long lokim ol haus bilong pasim ol stilman. Olgeta manmeri bai i stap isi long bel bilong ol, na long haus bilong ol, na long olgeta hap bilong graun.—Maika 4:4.
AMAMAS BILONG TAIM BILONG KIRAP BEK
15. Wanem tupela lain bai kirap bek long graun?
15 Long Taim Bilong Wan Tausen Yia, ol man i dai pinis bai kirap bek. Ol man long laik bilong ol yet ol i rongim spirit holi o strong bilong God, olsem ol i sakim wok bilong spirit o ol i sakim rot spirit i soim long ol na ol i no tanim bel, ol i no ken kirap bek. (Matyu 23:15, 33; Hibru 6:4-6) Tru, God yet bai skelim husat man i mekim kain rong olsem. Tasol i gat tupela lain i narapela narapela kain bai ol i kirap bek—em “ol stretpela man na ol man nogut.” (Aposel 24:15) Ol bai kirap bek long taim stret bilong ol, olsem na yumi ken save, ol stretpela man bai kirap bek pastaim, em ol manmeri i bin i stap gut long wok bilong Jehova.—Hibru 11:35-39.
16. (a) Husat sampela “stretpela man” ol bai kirap bek long graun? (b) Yu yet yu laik bungim wanem man o meri bilong bipo em i bin stap gut long God? Bilong wanem yu laik bungim dispela man o meri?
16 Ol wokboi bilong Jehova bai i no harim tok moa olsem bikpela pait o bikpela bagarap i kamap na ol manmeri i dai. Bai ol i harim gutpela tok olsem ol man i dai pinis ol i kirap bek. Bai yumi amamas tru long harim tok long ol bilipman bilong bipo olsem Abel, Enok, Noa, Abraham, Sara, Jop, Moses, Rahap, Rut, Devit, Elaija, Esta, i kirap bek. Bai ol inap stori gut tru long ol samting i bin kamap long bipo na dispela bai kamapim klia moa yet ol stori bilong Baibel long ol samting i bin kamap! Ol dispela stretpela man bilong bipo na ol stretpela man i dai long dispela taim nau bai ol tu i laik tru long save long pinis bilong dispela graun bilong Satan, na olsem wanem Jehova i bin mekim holi nem bilong em na kamapim klia olsem em i Nambawan Bikpela King.
17. Ol manmeri i bin stap gut long God bai ol i mekim wanem bilong helpim ol narapela i kirap bek?
17 Ol dispela gutpela manmeri i kirap bek pastaim ol inap helpim tru ol narapela lain i kirap bek, em ol milion milion “man nogut,” taim ol i lusim kalabus bilong i dai. Planti ol i no bin save long Jehova. Satan “i bin pasim tingting bilong ol.” (2 Korin 4:4) Tasol ol wok nogut bilong Satan bai pinis. Ol man nogut bai kirap bek long graun i kamap gutpela pinis na i gat gutaim i stap. Taim ol i kirap bek, ol manmeri i sekanim ol, ol i redi pinis long skulim ol long Jehova na Pikinini bilong em, em King Krais Jisas. Ol milion milion manmeri i kirap bek bai ol i kisim save long Man bilong wokim ol na bai ol i givim bel long em. Long dispela taim bai olgeta man long graun i save tru long God, na i no gat kain taim olsem i bin kamap bipo.
18. Taim ol famili na pren bilong yu i kirap bek, bai yu pilim olsem wanem?
18 Bel bilong yumi bai amamas tru taim ol man i dai pinis ol i kirap bek! Birua bilong yumi, em dai, i bin givim hevi long yumi olgeta. Taim sik o lapun o birua o bagarap i painim wanpela long famili o gutpela pren bilong yumi na em i dai, bel bilong yumi i save bagarap stret, a? Orait, tingim bikpela amamas bai kamap taim narapela i bungim gen narapela long Paradais. Ol mama na papa, ol pikinini man na pikinini meri, ol pren na famili, bai narapela i ran i go holimpas narapela na bai ol i amamas nogut tru na ol i lap na krai wantaim.
KAMAP GUTPELA OLGETA!
19. Wanem mirakel bai kamap long Taim Bilong Wan Tausen Yia?
19 Long Taim Bilong Wan Tausen Yia wanpela gutpela mirakel tru bai kamap. Ating ol manmeri bai amamas moa yet long dispela samting, winim olgeta narapela gutpela samting i kamap long Taim Bilong Wan Tausen Yia. Jehova bai givim tok long Pikinini bilong em long mekim wok long ofa bilong em bilong helpim olgeta wan wan man na meri i stap gut long Em na bihainim tok. Long dispela rot olgeta sin bai tekewe na ol manmeri bai kamap gutpela olgeta.—1 Jon 2:2; KTH 21:1-4.
20. (a) Olsem wanem long i stap bilong ol manmeri em ol i kamap gutpela olgeta? (b) Ol man i winim Armagedon na ol man i kirap bek, wanem taim bai ol i kisim laip tru?
20 Gutpela olgeta! Olsem wanem long i stap bilong ol manmeri i kamap gutpela olgeta? I stap bilong ol bai kamap gutpela tru olsem bilong Adam na Iv taim tupela i no bikhet yet long God Jehova. Long skin, na tingting, na bel, na pasin, na long ol samting bilong spirit—long olgeta samting—ol manmeri i kamap gutpela olgeta bai ol inapim tru mak God i putim. Tasol olsem wanem? Bai olgeta manmeri i kamap wankain olgeta? Nogat tru! Jehova i wokim ol diwai na plaua na animal i kain kain—dispela i lainim yumi olsem em i laikim ol samting i kain kain. Olsem na ol manmeri i kamap gutpela olgeta bai ol i gat ol pasin bilong ol yet na narapela narapela save ol inap mekim wok long en. Bai olgeta i stap amamas olsem God i laikim long pastaim. Kamapim Tok Hait 20:5 i tok: “Ol arapela manmeri i dai pinis, ol i no kisim laip long dispela taim. Ol i mas wetim dispela 1,000 yia i pinis pastaim.” Olsem bikpela lain i winim Armagedon, ol manmeri i kirap bek ol tu bai kisim laip tru, olsem laip bai pulap tru long ol, taim ol i kamap gutpela olgeta na i no gat sin moa.
21. (a) Taim Krais i bosim graun inap 1,000 yia pinis, wanem samting bai kamap? (b) Bihain tru wanem samting bai painim Satan na olgeta lain i bihainim em?
21 Ol manmeri i kamap gutpela olgeta, i gat laspela traim bai painim ol. Taim dispela 1,000 yia i pinis, Satan na ol spirit nogut bai lusim hul i no gat as na Jehova bai larim ol i traim wanpela taim moa long pulim ol man long lusim Em. Sampela bai i no laikim tru God; bai ol i bihainim ol laik nogut. Tasol God bai pinisim kwik dispela pasin bikhet. Em bai kilim i dai ol dispela manmeri i tingim laik bilong ol yet tasol, na Satan wantaim ol spirit nogut. Olgeta man i mekim pasin nogut bai ol i pinis olgeta.—KTH 20:7-10.
BAI YU MEKIM WANEM?
22. Yu wet long mekim wanem long Paradais?
22 Olgeta manmeri i laikim tumas God Jehova na ol i stap long Paradais long graun, bai ol inap i stap oltaim oltaim. Man! Ol bai kisim bikpela amamas tru, a? Na yu tu inap kisim dispela amamas. Tingim gutpela musik na piksa na ol narapela gutpela samting ol manmeri i gutpela olgeta ol bai wokim—em bai winim tru ol gutpela samting ol man i wokim nau long dispela taim! Bai ol i gutpela olgeta na bai ol i stap oltaim oltaim, olsem na ol inap mekim ol gutpela wok tru. Tingim ol samting bai yu inap mekim taim yu kamap gutpela olgeta. Tingim tu bikpela save yu na ol narapela manmeri bai kisim long ol samting Jehova i bin wokim—ol bikpela samting olsem ol bilion bilion lain sta i stap long ples antap na i go inap long ol liklik liklik samting tru. Olgeta wok ol manmeri i mekim bai amamasim moa yet bel bilong gutpela Papa bilong yumi Jehova.—Song 150:1-6.
23. Olsem wanem na long Paradais ol man i no ken les long i stap bilong ol?
23 Long dispela taim bai ol man i no les long i stap bilong ol. Long olgeta taim bai i gat planti samting moa ol i ken kisim save long en, long wanem, bai ol i no pinis long kisim save long God. (Rom 11:33) Inap long olgeta taim bihain bai i gat sampela samting moa yumi ken kisim save long en, na ol nupela samting tu. (Saveman 3:11) Bai yu wok yet long kisim save long God Jehova na bai yu stap laip i go i go—i no bilong sampela yia tasol—bai yu stap laip oltaim oltaim!—Song 22:26.
24, 25. Bilong wanem yu mas kirap nau na bihainim save yu kisim long God?
24 Yumi redi long wok strong na lusim olgeta samting bambai yumi inap kisim dispela gutpela sindaun long Paradais long graun, a? Tru tumas! Jehova i givim ki long yu bilong opim dua bambai yu inap kisim dispela gutpela sindaun bilong bihain. Dispela ki em save yu kisim long God. Bai yu mekim wok long dispela ki?
25 Sapos yu laikim tumas Jehova, bai yu amamas long bihainim laik bilong em. (1 Jon 5:3) Taim yu bihainim laik bilong em bai yu kisim planti blesing! Sapos yu bihainim save yu kisim long God, dispela inap helpim yu long i stap amamas nau long dispela taim bilong planti hevi. Na bihain bai yu kisim gutpela pe tru, long wanem, dispela save i bringim man long laip oltaim! Nau em i gutpela taim bilong kirap mekim wok. Tingting strong olsem yu bai bihainim save yu bin kisim long God. Kamapim bel bilong yu, yu laikim tumas Jehova. Litimapim nem holi bilong em na kamapim long ples klia olsem Satan em i man bilong giaman. Sapos yu mekim olsem, God Jehova, em i As bilong gutpela tingting na gutpela save, em bai amamas long yu na belgut tru long yu. (Jeremaia 31:3; Sefanaia 3:17) Na em bai laikim yu tru i go inap long olgeta taim bihain!
TRAIM SAVE BILONG YU
Wanem kain laip em i “laip tru”?
Bihain long Armagedon, wanem samting bai kamap long graun?
Husat ol bai kirap bek long graun?
Olsem wanem ol manmeri bai kamap gutpela olgeta? Wanem laspela traim bai painim ol?
Yu wetim wanem gutpela samting bilong Paradais?
[Piksa long pes 188, 189]
Yu laik i stap long Paradais, long taim olgeta man long graun i save tru long God?