Epril​​—⁠Taim Bilong Wok Strong Tru

¹ Ol wik klostu long taim bilong mekim Memorial em taim bilong lain bilong Jehova long tingim tingim ol samting. Em taim bilong tingim indai bilong Krais i mekim wanem ol samting na tingim ol samting God i tok long kamapim long rot bilong blut bilong Jisas. Taim yu tingting bek long Epril 19 long yia i go pinis, yu tingim wanem samting? Yu inap tingim pes bilong ol man yu bin lukim long dispela apinun? planti samting bilong spirit yumi kisim long taim bilong Memorial? ol bikpela tok bilong Baibel yumi harim na ol beten yumi pilim tru long bel? Ating yu tingting strong olsem yu bai mekim ol samting bilong kamapim olsem yu pilim tru pasin sori Jehova na Jisas i mekim long yu. Dispela kain pasin bilong tingim tingim ol samting i mekim wanem long yu long nau?

² Yumi save ol manmeri bilong Jehova i save mekim sampela samting moa bilong tok tenkyu na ol i no toktok tasol. (Kl 3:​15, 17) Long Epril long yia i go pinis, yumi bin mekim bikpela wok moa bilong autim tok bilong kamapim olsem yumi tenkyu long Jehova long em i bin opim rot bilong yumi ken kisim laip. Namba bilong ol painia haptaim long Papua Niugini i go antap inap 41 pesen, na dispela namba i winim olgeta taim bipo. Amamas bilong yumi i go bikpela taim yumi lukim planti nupela Baibel-stadi i kirap na bikpela lain tru i kam long Memorial, winim olgeta taim bipo!

³ Tru tumas, taim yumi bilip tru long ol samting yumi wetim, dispela i kirapim yumi long mekim wok. Em kain olsem aposel Pol i bin tok: “God bilong i stap oltaim, em i man bilong kisim bek olgeta manmeri, na em i kisim bek tru yumi manmeri i bilip long em. Yumi bilip tru long em na yumi wetim em i mekim gut tru long yumi, olsem na olgeta taim yumi save mekim hatwok tru.”​—⁠1 Ti 4:⁠10.

⁴ Long Memorial bilong dispela yia, yu bai mekim wanem bilong kamapim bilip bilong yu long samting Jehova i mekim bilong helpim yu long kisim laip? Long Epril long yia i go pinis, inap 3,288 man bilong autim tok bilong Kingdom i putim ripot. Olsem wanem? Yumi inap winim dispela namba long dispela Epril? Yumi inap winim dispela mak. Tasol olgeta pablisa i mas wok​—⁠ol pablisa i baptais pinis o i no baptais yet. Ating planti nupela i winim mak bilong insait long dispela wok. Olsem na taim yu stretim ol samting bilong wok strong tru long Epril, yu ken tingim tu rot bilong kirapim ol narapela​—⁠wok wantaim ol nupela na ol pablisa i no save gut tumas long autim tok.

⁵ Helpim Sampela Long Kirap Autim Tok Gen: Sapos yu save long sampela i no bin mekim wok autim tok inap wanpela o tupela mun, yu ken strongim ol na askim ol long wok wantaim yu. Sapos sampela long kongrigesen i no autim tok moa, ol elda bai wok strong long go lukim ol na kirapim ol long autim tok gen long Epril.

⁶ Yumi olgeta i mas wok yet long askim Jehova long givim spirit bilong em long strongim yumi long mekim wok bilong em. (Lu 11:13) Yumi mas mekim wanem bilong kisim dispela spirit? Kaunim Tok Bilong God em spirit bilong em i kamapim. (2 Ti 3:​16, 17) Na tu, yumi mas “harim gut dispela tok Holi Spirit i autim long ol sios,” na go long olgeta 5-pela miting. (KTH 3:⁠6) Nau em i gutpela taim long helpim ol man i slek na ol man i no autim tok moa na bai pasin bilong ol long stadi i kamap gutpela moa na ol bai kisim pasin bilong go oltaim long ol miting. (Sng 50:23) Taim yumi helpim ol dispela lain, yumi yet tu i mas stap strong long ol samting bilong spirit. Tasol yumi mas mekim sampela samting moa.

⁷ Aposel Pita i tok olsem God i save givim spirit holi bilong em long ol “manmeri i bihainim tok bilong em.” (Ap 5:32) Wanpela samting yumi mekim bilong bihainim tok, em yumi “autim tok long ol manmeri na tokaut klia.” (Ap 1:8; 10:42) Tru, yumi mas i gat spirit bilong God bilong strongim yumi long autim tok, tasol taim yumi kamapim olsem yumi gat laik long amamasim Jehova, em bai helpim yumi moa yet. Em nau, yumi no ken ting pasin bilong bihainim tok em i liklik samting!

⁸ Helpim Ol Yangpela: Olsem wanem? Yupela ol papamama i bin lukim olsem ol pikinini bilong yupela i gat laik long tokim ol narapela long tok i tru? Ol i save go wantaim yupela long autim tok? Pasin bilong ol i gutpela? Sapos olsem, i no gat as na ol i mas wet, a? Toktok wantaim wanpela brata bilong Komiti Bilong Lukautim Wok Bilong Kongrigesen bilong save pikinini bilong yu i winim mak bilong kamap pablisa long dispela Epril o nogat. (Lukim buk Lo, pes 99, 100.) Yu mas save olsem pikinini bilong yu inap insait tru long litimapim nem bilong Jehova long taim bilong Memorial long dispela yia.​—⁠Mt 21:​15, 16.

⁹ Wanpela mama Kristen long Jojia, Amerika, long olgeta taim em i save strongim pikinini meri bilong em long tokim ol narapela long Jehova. Long yia i go pinis, taim dispela liklik meri i autim tok wantaim mama bilong em, em i tilim buklet Yumi Mas Mekim Wanem? long wanpela man na em i stori liklik long tok i stap long pes 2. Dispela man i askim em: “Yu gat hamas krismas?” Em i tok: “Seven.” Dispela man i kirap nogut long harim pikinini i kamapim gut ol tok. Dispela man i save long tok i tru taim em i yangpela, tasol em i no bin tingting tumas long bihainim tok i tru. I no longtaim ol i mekim Baibel-stadi wantaim dispela man, meri bilong em, na pikinini meri bilong em.

¹⁰ Planti yangpela ol i pablisa pinis, na yumi amamas long ol i bung wantaim yumi bilong mekim wok autim tok. Ol dispela yangpela i ken kirapim na strongim ol narapela yangpela i gat wankain krismas olsem bilong ol. Na tu, mun Epril em i gutpela taim bilong ol famili i ken strongim pasin bilong ol long pas gut wantaim na kamap strong long samting bilong spirit taim ol i autim tok wantaim. Ol het bilong famili i mas i go pas long mekim olsem.​​—⁠Snd 24:⁠3.

¹¹ Helpim Ol Nupela: Olsem wanem long ol nupela em yu save stadi wantaim ol long Baibel? Ol tu inap helpim dispela bikpela wok long Epril? Ating ol i kamapim pinis laik bilong ol long tokim ol narapela long ol samting ol i lainim taim yu stadi wantaim ol long buk Save sapta 2, paragraf 22, o sapta 11, paragraf 14. Sapos klostu yu bai pinisim buk, orait redi long toktok gut long dispela samting taim yu kamap long sapta 18, paragraf 8, em i tok: “Ating yu laik tru long tokim ol famili na pren na ol narapela long ol tok yu kisim save long en. Ating yu kirap pinis long mekim olsem. Jisas tu i bin autim gutnius long ol man long kain kain taim na ples. (Lu 10:​38, 39; Jo 4:​6-15) Nau yu laik mekim sampela wok moa bilong autim tok, a?” Olsem wanem? Ol man yu stadi wantaim ol i gat laik long mekim olsem?

¹² Sumatin bilong yu i save bilip long Tok Bilong God? Em i save bihainim ol lo bilong Baibel? Em i senisim pasin bilong em na bai i stret wantaim ol lo bilong God? Em i save go long ol miting bilong kongrigesen? Em i laik mekim wok bilong God Jehova? Sapos em i mekim olsem i gutpela sapos yu kirapim em long toktok wantaim ol elda, na bai ol i ken skelim em i winim mak pinis long kamap pablisa i no baptais o nogat, na bai em inap wok wantaim yu long Epril. (Lukim buk Lo pes 97-99.) Long dispela rot em bai pilim ol samting oganaisesen bilong Jehova i mekim bilong helpim em long mekim wok bilong Jehova.

¹³ Tru, sampela sumatin i save kamap strong hariap na sampela nogat. Olsem na planti i bihainim tok bilong Wok Kingdom bilong Jun 2000, pes 4, paragraf 5, 6, na ol i stadi long namba 2 buk wantaim ol man i laikim tok i tru, tasol ol i mas kisim sampela helpim moa bilong ol i ken insait tru long wok. Yumi no save les kwik tasol yumi ting ol dispela man i gat gutpela bel ol bai kamap gutpela disaipel bilong Krais, ‘maski insait long sotpela taim o longpela taim.’ (Ap 26:29) Tasol sapos ol dispela mun yu bin stadi wantaim kain man olsem em i “longpela taim,” ating taim bilong Memorial em i gutpela taim long sumatin i ken kamapim klia olsem em i pilim tru ofa bilong Krais, a?

¹⁴ Rot Bilong Helpim Ol Long Autim Tok: Taim yumi skelim pasin bilong Jisas long lainim ol narapela, yumi lain long planti samting long pasin bilong helpim ol man i winim mak long kirap mekim wok autim tok. Em i no painim wanpela lain man tasol na tokim ol aposel long kirap toktok wantaim ol, nogat. Pastaim em i kolim as na ol disaipel i mas mekim wok autim tok, em i kirapim ol long beten, na em i givim 3-pela bikpela samting long ol: Em i makim poroman bilong wok wantaim, makim wanpela teritori, na ol tok ol bai autim. (Mt 9:​35-38; 10:​5-7; Mk 6:7; Lu 9:​2, 6) Yu tu i ken mekim olsem. Maski yu helpim pikinini bilong yu yet, o wanpela nupela sumatin, o wanpela pablisa i no bin putim ripot inap sampela mun, orait em i gutpela long wok strong tru long bihainim ol dispela tok.

¹⁵ Stori Long As na Em i Mas Autim Tok: Helpim man long save olsem em i bikpela samting long mekim wok autim tok. Yu mas amamas taim yu stori long dispela wok. Stori long ol ekspiriens i soim ol samting kongrigesen i mekim long wok autim tok. Bihainim pasin em Jisas i stori long en long Matyu 9:​36-​38. Kirapim dispela pablisa o dispela man i lusim wok autim tok inap longtaim long beten askim Jehova long helpim em long mekim wok autim tok, na long wok ol i mekim long olgeta hap i ken kamap gutpela.

¹⁶ Kirapim Man Long Tingim Planti Rot i Op Bilong Autim Tok: Tokim em olsem em inap bung wantaim Buk-Stadi grup bilong autim tok long ol haus. Tokim em long autim tok long ol wanblut na ol wantok na ol wanwok o wanskul long taim bilong malolo. Taim yu raun long ol PMV, yu ken soim olsem yu tingim ol man i sindaun klostu long yu na kirap toktok wantaim ol. Taim yumi kirap toktok gut wantaim ol man, planti taim rot i op long yumi ken autim tok long ol. Tru tumas, i gat planti rot yumi inap autim bilip bilong yumi long ol narapela “long olgeta de.”​—⁠Sng 96:​2, 3.

¹⁷ Ating i gutpela long yu na dispela nupela pablisa i kirap hariap long wok wantaim long autim tok long ol haus. Sapos yu putim mak long mekim bikpela wok bilong autim tok long Epril, yu mas tingting long i go long olgeta haus bilong teritori ol i makim bilong yu, maski em i liklik o bikpela. Taim yu pinis long autim tok na yu laik go long haus, o taim yu go long ol miting o ol narapela ples, ating yu bai lukim olsem i gat man i stap long wanpela haus em pastaim i no gat man long en o yu lukim wanpela man em bipo em i gat laik long harim tok em i stap long haus. Sapos i stret, go toktok liklik wantaim em long taim i gutpela long mekim olsem. Dispela bai mekim na yu pilim olsem wok bilong yu i kamap gutpela na yu amamas long autim tok.

¹⁸ Redim Wanpela Tok i Kirapim Man: Wanpela pablisa i gat laik long autim tok bilong Kingdom, tasol ating em bai tingting planti long pasin bilong em long toktok wantaim ol man, na em bai tingting planti moa yet sapos em i nupela o em i no bin autim tok inap longtaim. Em i gutpela samting tru long lusim taim bilong helpim ol nupela na ol man i no bin autim tok inap longtaim long ol i ken redi gut. Yumi inap lain long sampela gutpela pasin bilong toktok long rot bilong Miting Bilong Wok na ol bung bilong wok autim tok, tasol em i bikpela samting long yumi yet i mas redi gut.

¹⁹ Olsem wanem yu ken helpim ol nupela long redi long mekim wok autim tok? Soim ol long pasin bilong tilim ol magasin, kamapim sotpela tok i no hatwok long mekim! Askim ol long tingim wanpela stori long nius samting em planti man long teritori i tingting long en, na painim wanpela tok long nupela magasin i stret long dispela stori. Yutupela i ken traim dispela pasin bilong tilim nius na kwiktaim mekim wok long en long autim tok.

²⁰ Mekim Ol Samting Bambai Lain Bilong Yumi Inap Go Bikpela: Long yia i go pinis namba bilong ol man i kam long Memorial long Papua Niugini i winim 16,000. Averes bilong ol pablisa i putim ripot i winim 3,000. Dispela i makim olsem 13,000 manmeri i kam em ol man i gat laik long kam long dispela bikpela bung na ol i bin harim wanpela bikpela tok bilong Baibel. Ol i bungim sampela bilong yumi, na ating dispela i bin kirapim ol tru. Planti bilong ol dispela man i save mekim gutpela tok long yumi, na ol i save givim kontribiusen bilong helpim wok bilong Kingdom long olgeta hap, na ol i save mekim tok bilong helpim yumi taim ol narapela i laik daunim yumi. Dispela bikpela lain i kam bung i makim olsem bihain namba bilong yumi inap i go antap. Yumi ken mekim wanem bilong helpim ol dispela lain long kisim sampela save moa?

²¹ Planti nupela i save kam long Memorial, long wanem, wanpela bilong yumi i bin singautim ol long kam. Olsem na i gat wanpela man ol i save long em i stap long dispela bung. Sapos yumi singautim wanpela man na em i kam, yumi gat wok long go tok amamas long em i kam na helpim em long kisim gut save long dispela bung. Haus bung bai i pulap, olsem na helpim em long painim ples bilong sindaun. Givim Baibel bilong yu long em, na tokim em long singsing wantaim yu long buk singsing bilong yu. Bekim ol askim em inap kamapim. Gutpela pasin bilong yu long tingim em inap mekim na em i gat laik long harim tok. Tru, yumi olgeta i insait long dispela wok​—⁠sapos yumi lukim wanpela nupela man, yumi go tok amamas long em, na toktok liklik wantaim em bilong save long em.

²² Taim man i kam long Memorial dispela inap kirapim tru tingting bilong em. Em i kam long miting na ating dispela i makim olsem taim em i bin go long ol narapela lotu em i no kisim ol samting em i bin wok long painim, na ol tok yumi kamapim i kirapim tingting bilong em long skelim gut ol tok. Tok i stori long gutpela pe bilong Jisas long baim bek yumi inap kirapim tru tingting bilong man i no bin save long bikpela pasin sori bilong Jehova. Ating em bai luksave olsem yumi narapela kain, yumi gat gutpela bel, mekim pasin pren, laikim ol narapela, na mekim pasin daun. Haus bung bilong yumi i no wankain liklik long ol samting em i bin lukim long ol narapela haus lotu, em ol i save putim ol imis na ol i mekim ol bilaspasin i no gat as tru bilong en. Ol nupela man bai luksave olsem ol man i kam bung ol i bilong kain kain sindaun, na i no gat pasin bilong singaut long mani. Ol samting ol i lukim inap kirapim ol long kam bek.

²³ Bihain long Memorial, yumi mas redi long i go na lukim olgeta nupela man i bin kam bung na helpim ol moa. Sapos yu bin singautim ol nupela i kam, yu gat wok long helpim ol. Paslain long ol i go, yu mas toksave long ol long ol narapela miting i save kamap long Haus Kingdom. Sapos yu save long nem bilong pablik-tok bai kamap long wik bihain, tokim ol long dispela. Toksave long ol long taim na hap wanpela Buk-Stadi i stap klostu long ol i kamap. Bihain yu ken givim wanpela buk Nambawan Man Tru long ol, na soim ol long sapta yumi bai stadi long en long wik i kirap long Epril 30.

²⁴ Stretim rot bilong i go lukim ol long haus bilong ol. Givim buklet Yumi Mas Mekim Wanem? na buk Save long ol, em ol dispela buk i helpim ol long save long ol as tok bilong Baibel. Sapos ol i no stadi yet, askim ol long stadi long Baibel. Tokim ol long kaunim buklet Mekim Wok Bilong God, em dispela buklet i stori gut long wok yumi mekim olsem wanpela oganaisesen. Sapos inap, singautim ol long kam lukim ol video bilong yumi, olsem video Our Whole Association of Brothers. Stretim rot long ol i ken bungim ol narapela long kongrigesen. Long ol mun bihain, go lukim ol dispela nupela; askim ol long kam long miting taim wasman sekit i kam lukim kongrigesen o long taim bilong kibung sekit o bikpela de kibung. Helpim ol long kamapim olsem ol inap long “kisim laip i stap gut oltaim”!​​—⁠Ap 13:⁠48.

²⁵ Ol Samting Ol Elda i Ken Mekim: Bilong yumi inap mekim bikpela wok long Epril, em i bikpela samting tru long ol elda i mas stretim gut ol samting. Sampela pablisa i save bel hevi, long wanem, ol i wok strong tru bilong bung wantaim grup tasol ol i autim tok wanpela aua samting na teritori i pinis. Olsem wanem? Yupela inap stretim gut ol samting na bai ol pablisa i ken autim tok long ol haus long moning olgeta? Sapos yu wasman bilong Buk-Stadi, wokim lista bilong ol samting yu inap mekim bilong helpim olgeta long grup bilong yu long insait long dispela bikpela wok. I gat sampela i kam long grup bilong yupela em ol i yangpela, nupela, ol i autim tok long wan wan mun tasol, o ol i no autim tok moa? Askim ol sapos ol papamama, ol painia, o ol narapela pablisa i bin painim rot bilong helpim ol o nogat. Mekim sampela samting yu inap mekim bilong helpim ol. Long wanpela kantri, wanpela sista i bin lusim wok autim tok inap sampela taim insait long 2-pela yia, tasol em i autim tok 50 aua long mun Epril long yia i go pinis. Wanem samting i bin helpim em? Em i tok ol elda i bin i go lukim em long haus na strongim em.

²⁶ Ol elda na ol wokman i mas wok wantaim bilong stretim ol samting na bai i gat inap teritori, ol magasin, na ol buk bilong mekim wok long en long Epril. Olsem wanem? Yupela inap stretim rot bilong mekim sampela bung moa bilong autim tok? Sapos inap, orait mekim toksave long dispela samting. Na bikpela samting tru, long taim yu mekim beten bilong yu yet o long miting, askim Jehova long blesim dispela mun bilong yumi long mekim bikpela wok bilong Kingdom.​—⁠Ro 15:​30, 31; 2 Te 3:⁠1.

²⁷ Long ol miting long olgeta wik, ol elda i ken askim ol pablisa long tingim wok painia na beten askim God long helpim ol long skelim ol inap insait long wok painia haptaim o nogat. Taim rot i op, ol wokman na ol elda i ken toktok long ol narapela long ol i ken mekim mun Epril i kamap wanpela mun i gutpela tru, winim ol narapela mun. Ating sampela elda na wokman inap mekim wok painia long dispela mun. Long yia i go pinis, long Papua Niugini, long 4-pela kongrigesen winim 30 pablisa i bin mekim wok painia haptaim long Epril. Yumi save ol elda i bin kirapim ol pablisa long givim bel long mekim wok painia.

²⁸ Amamas Bilong Givim Bel Long Autim Tok: Wanem ol blesing yumi kisim taim yumi wok strong tru long autim tok? (1 Ti 4:​10) Wanpela em olsem, ol brata sista bai pilim tru olsem narapela i laikim tru ol narapela na pas gut wantaim ol taim ol i kirap insait moa yet long mekim wok autim tok.

²⁹ Long wanpela kantri, wanpela yangpela brata i no inap wokabaut gut em i laik tru long mekim bikpela wok long Epril long yia i go pinis. Em i skelim gut ol samting na em i kisim helpim long mama bilong em na long ol brata sista bilong spirit, na em i mekim gutpela wok long Epril olsem painia haptaim. Em i pilim olsem wanem long dispela wok? Em i tok: “Long namba wan taim long i stap bilong mi, mi pilim olsem mi wanpela man i gat strongpela skin.”

³⁰ Yumi save Jehova i save blesim tru ol man i tingim tru wok ol i kisim bilong tokaut long wok king bilong em. (Sng 145:​11, 12) Taim yumi tingim indai bilong Bikpela bilong yumi, yumi save olsem ol man i bihainim pasin bilong God bai kisim planti blesing moa long bihain. Aposel Pol i bin wetim tru taim bilong kisim prais bilong laip i stap oltaim. Tasol em i save olsem em i no ken sindaun nating tasol na tingting long kisim dispela laip. Em i tok: “Long olgeta bikpela strong Krais i save givim mi, mi save hatwok tru long mekim dispela wok.” (Ko 1:29) Long rot bilong Jisas, Jehova i givim strong long Pol na em inap mekim wok bilong helpim ol man long kisim laip, na Em inap mekim olsem long yumi tu long nau. Olsem wanem? Dispela samting bai painim yu long Epril long dispela yia?

[Blok long pes 3]

Yu Inap Strongim Husat Long Autim Tok Long Epril?

Pikinini bilong yu?

Wanpela Baibel-stadi?

Wanpela i no save autim tok moa?