Tingting Strong Long Autim Gut Tru Dispela Gutnius

“Em i tokim mipela long autim tok long ol manmeri na stori gut tru.”​—AP. 10:​42, NW.

 1. Taim Pita i toktok long ai bilong Kornilius, em i tok ol aposel i bin kisim wanem wok?

WANPELA ofisa bilong ami bilong Itali i bungim ol wanblut na pren bilong em long harim tok long bikpela senis bai kamap long pasin God i save mekim long ol manmeri. Dispela man i pret long God em Kornilius. Aposel Pita i tokim dispela lain man olsem ol aposel i kisim tok “long autim tok long ol manmeri na stori gut tru” long Jisas. Wok autim tok bilong Pita i karim planti kaikai. Ol narapela lain i no bin katim skin i kisim holi spirit bilong God, ol i kisim baptais, na rot i op long ol i ken kamap king long heven wantaim Jisas. Wok bilong Pita long autim gut tru dispela gutnius i karim gutpela kaikai tru!​—Ap. 10:​22, 34-​48.

 2. Olsem wanem yumi save dispela tok bilong mekim wok autim tok i no go long 12-pela aposel tasol?

² Dispela samting i kamap long 36 C.E. Inap tupela yia paslain long dispela, wanpela samting i bin kamap na i senisim tru laip bilong wanpela birua bilong lotu Kristen. Sol bilong Tarsus i wok long i go long Damaskus taim Jisas i kamap long em na i tok: “Go insait long taun. Bihain bai wanpela man i tokim yu long ol samting yu mas mekim.” Jisas i tokim disaipel Ananaias olsem Sol bai autim tok “long ol arapela lain manmeri na long ol king, na long ol Israel tu.” (Ritim Aposel 9:​3-6, 13-​20.) Taim Ananaias i stap wantaim Sol, em i tok: ‘God bilong ol tumbuna bilong yumi em i bin makim yu bai yu ken autim tok bilong en long olgeta manmeri.’ (Ap. 22:​12-​16) Sol, bihain em i kisim nem Pol, i ting olsem wanem long wok em i kisim bilong autim tok?

Em i Autim Gut Tru Dispela Gutnius!

 3. (a) Nau bai yumi skelim gut wanem samting? (b) Ol elda bilong Efesus i mekim wanem taim ol i kisim tok long Pol? Ol i stap gutpela piksa long wanem samting?

³ Em bai gutpela tru long stadi gut long olgeta samting Pol i bin mekim bihain long dispela, tasol nau yumi ken skelim gut tok Pol i bin mekim long yia 56 C.E., olsem i stap long Buk Aposel sapta 20. Pol i mekim dispela tok klostu long pinis bilong namba tri raun bilong wok misineri bilong em. Em i bin lusim sip long Miletus, em wanpela taun klostu long nambis bilong solwara Ijien, na em i singautim ol elda bilong kongrigesen Efesus long kam. Efesus i stap longwe inap 50 kilomita samting, tasol rot i gat planti baut long en, olsem na rot i longpela moa. Ating yu ken piksaim long tingting amamas bilong ol elda bilong Efesus taim ol i kisim tok bilong Pol. (Skelim Sindaun 10:28.) Tasol ol i mas stretim ol samting na bai ol i ken i go long Miletus. Olsem wanem? Sampela bilong ol i mas kisim malolo long wok o pasim stua bilong ol? Planti Kristen long nau i save mekim olsem bambai ol i no ken lus long harim wanpela tok bilong kibung distrik i save kamap long olgeta yia.

 4. Pol i bin mekim wanem taim em i stap long Efesus inap sampela yia?

⁴ Yu ting Pol i mekim wanem long Miletus long dispela tripela o fopela de paslain long ol elda i kam? Sapos yu Pol, yu bai mekim wanem? (Skelim Aposel 17:​16, 17.) Ol tok Pol i mekim long ol elda bilong Efesus i helpim yumi long save long bekim bilong dispela askim. Em i stori long pasin bilong em long autim tok insait long planti yia, na long taim em i bin autim tok long Efesus long bipo. (Ritim Aposel 20:​18-​21.) Em i save olsem olgeta bai wanbel long tok bilong em, olsem na em i tok: “Yupela yet i save long ol pasin mi bin mekim long namba wan taim mi kamap long Esia, . . . oltaim mi bin autim tok strong.” Yes, em i strong long mekim wok em i bin kisim long Jisas. Olsem wanem em i mekim olsem long Efesus? Wanpela rot, em i go long ol hap we planti Juda i stap long en na em i autim tok long ol. Luk i tok taim Pol i stap long Efesus long yia 52-​55 C.E. samting, em i “toktok wantaim ol [man] na em i kirapim tingting bilong ol” insait long haus lotu bilong ol Juda. Taim ol Juda i “pasim bel strong tumas na ol i no bilip,” Pol i kirap long tingim ol narapela man, na em i go stap long narapela hap bilong taun na em i autim tok yet. Olsem na em i autim tok long ol Juda na Grik i stap long dispela bikpela taun.​—Ap. 19:​1, 8, 9.

5, 6. Olsem wanem yumi ken save olsem taim Pol i autim tok long ol haus em i autim tok long ol man i no bilip?

⁵ Sampela husat i kamap Kristen, bihain ol i winim mak bilong kamap elda, em ol dispela elda Pol i bin toktok long ol long Miletus. Pol i kirapim ol long tingim pasin em i bin bihainim, em i tok: “Mi no surik long autim olkain gutpela tok inap long helpim yupela. Na long ol bung bilong ol manmeri na long olgeta haus bilong yupela tu, mi bin skulim yupela.” Long nau, sampela man i tok dispela tok bilong Pol i makim olsem em i go lukim ol wanbilip bilong strongim ol. Tasol nogat. Dispela tok ‘skulim ol man long ol bung na long olgeta haus’ i makim wok bilong autim tok long ol man i no bilip. Dispela i kamap klia long tok em i mekim bihain. Pol i tok em i bin autim tok ‘long ol Juda na long ol Grik, long ol i mas tanim bel i go long God, na ol i mas bilip long Bikpela bilong yumi Jisas.’ Em nau, Pol i bin autim tok long ol man i no bilip, em ol man husat i mas tanim bel na bilip long Jisas.​—Ap. 20:​20, 21.

⁶ Wanpela saveman i skelim gut Ol Skripsa Grik, em i stori long Aposel 20:20 olsem: “Pol i stap tripela yia long Efesus. Em i go long olgeta haus, o em i autim tok long olgeta manmeri (Aposel sapta 20 ves 26). Dispela ves i kamapim olsem Baibel i as bilong wok bilong autim tok long ol haus na long ol bung bilong ol manmeri.” Maski em i bin go long olgeta wan wan haus​—olsem dispela saveman i tok​—o nogat, Pol i laik bai ol elda bilong Efesus i no ken lusim tingting long pasin bilong em long autim tok na ol samting wok bilong em i bin kamapim. Luk i tok: “Olgeta manmeri i stap long provins Esia ol i harim tok bilong Bikpela, em ol Juda na ol Grik wantaim.” (Ap. 19:10) Tasol olsem wanem “olgeta manmeri” long Esia inap harim? Na dispela inap makim wanem samting long wok autim tok bilong yumi?

 7. Wok autim tok bilong Pol i helpim ol man i harim tok bilong em, na i helpim husat moa?

⁷ Pol i autim tok long ol haus na long ol ples bung samting, na long dispela rot planti man i harim tok em i autim. Yu ting olgeta man husat i harim dispela tok i stap bek long Efesus? Nogat. Ating sampela i bin go long ol narapela hap bilong mekim wok bisnis, o bilong i stap klostu long ol wanblut, o bilong painim gutpela ples bilong sindaun long en. Long ol dispela wankain as planti man long nau i bin go sindaun long ol narapela hap; ating yu tu i bin mekim olsem. Na tu, long dispela taim bipo, ol manmeri bilong ol narapela hap ol i kam long Efesus bilong visitim ol famili na pren o bilong mekim wok bisnis. Taim ol i stap long Efesus, ating ol i bin bungim Pol o harim tok em i autim. Wanem samting bai kamap taim ol i go bek long ples bilong ol? Ol man husat i bin kisim tok i tru, ol bai autim tok. Ating sampela i no kamap bilipman, tasol ol inap tokim ol narapela long ol samting ol i bin harim taim ol i stap long Efesus. Olsem na ol wanblut, ol neiba, o ol kastama i harim tok i tru, na ating sampela i bilip long en. (Skelim Mak 5:14.) Dispela i soim olsem wok autim tok bilong yu inap kamapim wanem samting?

 8. Ating long wanem rot ol manmeri long hap bilong Esia i bin harim tok i tru?

⁸ Long taim Pol i bin mekim wok bilong em long Efesus long bipo, em i tok ‘rot i op long em na em i gat bikpela wok.’ (1 Ko. 16:​8, 9) Em wanem rot, na olsem wanem rot i op long em? Pol i mekim yet wok bilong em long Efesus, na dispela rot ol man i harim gutnius. Tingim Kolosi, Laodisia, na Hierapolis, em tripela taun i lusim Efesus na i go. Pol i no bin go long ol dispela taun, tasol gutnius i go long ol dispela ples. Epafras i bilong dispela hap. (Kl. 2:1; 4:​12, 13) Olsem wanem? Epafras i bin harim Pol i autim tok long Efesus na em i kamap wanpela Kristen? Baibel i no stori long dispela. Tasol taim Epafras i autim tok long ples bilong em, ating em i bin stap olsem mausman bilong Pol na autim tok. (Kl. 1:7) Insait long ol yia Pol i autim tok long Efesus, ating dispela gutnius i go long taun Filadelfia, Sardis, na Taiataira.

 9. (a) Pol i gat wanem bikpela laik tru? (b) Wanem yiateks bilong 2009?

⁹ Olsem na i gat as tru na ol elda bilong Efesus i ken bilip long dispela tok bilong Pol i stap long Aposel 20:24 (NW): “Laip bilong mi i no nambawan bikpela samting long mi. Mi laik tru long bihainim yet dispela rot mi wokabaut long en na pinisim wok mi bin kisim long Bikpela Jisas. Em wok bilong autim gut tru dispela gutnius bilong bikpela pasin helpim bilong God.” Dispela ves i gat gutpela tok bilong yiateks bilong 2009 i kirapim yumi long mekim wok: Autim gut tru dispela gutnius.

Autim Gut Tru Dispela Gutnius Long Nau

10. Olsem wanem yumi save yumi tu i mas autim gut tru dispela gutnius?

¹⁰ Dispela tok long “autim tok long ol manmeri na stori gut tru” i no go long ol aposel tasol. Nogat. Taim Jisas husat i kirap bek pinis i toktok long ol disaipel i bung long Galili, ating ol inap 500, em i tok: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela.” Dispela tok i go long olgeta Kristen tru long nau, olsem tok bilong Jisas i kamapim klia. Em i tok: “Harim. Mi save stap wantaim yupela olgeta de, i go inap long dispela taim i pinis.”​—Mt. 28:​19, 20.

11. Ol Witnes Bilong Jehova i gat nem long mekim wanem bikpela wok?

¹¹ Ol Kristen i givim bel long wok ol i bihainim yet dispela tok, ol i wok strong long “autim gut tru dispela gutnius.” Nambawan rot bilong mekim olsem em long rot Pol i bin tokim ol elda bilong Efesus long en​—autim tok long ol haus. Long wanpela buk long 2007, David G. Stewart, Jr. i stori long pasin bilong mekim gut wok autim tok. Em i tok: “Pasin bilong ol Witnes Bilong Jehova long skulim ol man long pasin bilong autim bilip bilong ol long ol narapela man em i gutpela tru, winim pasin bilong [sanap long pletfom long haus lotu na tokim ol man long autim tok]. Long planti Witnes Bilong Jehova, pasin bilong autim bilip bilong ol long ol narapela man i wanpela wok ol i amamas tru long mekim.” Wanem samting i bin kamap long wok bilong ol? “Long 1999, mi bin askim ol man long tupela biktaun bilong Isten Yurop, na inap 2 i go 4 pesen tasol bilong ol i tok ol misineri bilong lotu Momon i bin kam long haus bilong ol na toktok wantaim ol. Winim 70 pesen i tok ol Witnes Bilong Jehova i bin go long haus bilong ol na toktok wantaim ol, na planti i tok ol Witnes i bin mekim olsem inap planti taim.”

12. (a) Bilong wanem yumi save go “planti taim” long haus bilong ol man long teritori bilong yumi? (b) Yu inap kamapim wanpela ekspiriens we tingting bilong man i senis long tok yumi autim?

¹² Ating dispela samting i bin painim planti man long hap bilong yu tu. Na ating yu yet i bin insait long dispela wok. Taim yu “go long haus” bilong ol man na autim tok, yu bin toktok wantaim ol man, ol meri, na ol yangpela. Ating sampela i no bin harim tok maski yu bin go long haus bilong ol inap “planti taim.” Na ating sampela i bin putim yau inap liklik taim, taim yu kamapim wanpela ves o tok bilong Baibel. Tasol long sampela man yu bin autim gut tok, na ol i bilip long dispela tok. Olgeta dispela samting inap kamap taim yumi “autim gut tru dispela gutnius.” Olsem yu save, i gat planti stori bilong ol man husat i no laik harim tok taim ol Witnes i go long haus bilong ol inap “planti taim,” tasol bihain senis i kamap. Ating sampela samting i painim ol o wanpela long famili, na dispela i mekim na bel na tingting bilong ol i redi long kisim tok i tru. Nau ol i brata na sista bilong yumi. Olsem na no ken givap, maski yu no bin painim planti man i laik harim tok. Yumi save olsem i no olgeta man bai kam insait long tok i tru, nogat. Tasol God i laik bai yumi givim bel long mekim yet wok bilong autim gut tru dispela gutnius.

Yumi No Save Wanem Samting Bai Kamap

13. Olsem wanem wok autim tok bilong yumi inap karim kaikai na yumi no save long en?

¹³ Ol gutpela samting wok autim tok bilong Pol i kamapim i no painim tasol ol man em yet i bin helpim ol long kamap Kristen. Nogat. Em wankain long wok autim tok bilong yumi. Yumi strong long autim tok oltaim long ol haus, na yumi laik autim tok long planti man. Yumi autim gutnius long ol neiba, wanwok, wanskul, na wanblut. Olsem wanem? Yumi save long olgeta samting wok bilong yumi i kamapim? Ating sampela man bai harim na bilip hariap long tok yumi autim. Tasol long sampela man, ol sid bilong tok i tru i stap tasol inap sampela haptaim, na bihain ol sid i go daun long bel bilong man na karim kaikai. Na maski sapos dispela samting i no kamap, ol man yumi toktok long ol, ol inap tokim ol narapela long tok yumi autim, ol samting yumi bilip long en, na long pasin bilong yumi. Em nau, ol inap mekim na ol sid bilong tok i tru i go long ol man i gat gutpela bel na i laik harim tok.

14, 15. Wok autim tok bilong wanpela brata i kamapim wanem samting?

¹⁴ Tingim ekspiriens bilong Ryan na meri bilong em, Mandi, em tupela i sindaun long Florida, Amerika. Long ples wok bilong em, Ryan i autim tok long wanpela wanwok. Dispela man i bin kamap bikpela insait long lotu Hindu, na em i pilim tru pasin bilong Ryan long bilas gut na toktok gut. Ryan i toktok wantaim em long kirap bek na ol man i dai pinis i stap olsem wanem. Long wanpela nait long Janueri, dispela man i askim meri bilong em, Jodi, sapos em i save long ol Witnes Bilong Jehova. Jodi i wanpela Katolik, na em i tok em i save long wanpela samting tasol bilong ol Witnes, olsem ol i save “autim tok long ol haus.” Orait, Jodi i taipim “Jehovah’s Witnesses” long Intenet, na em i painim Web sait bilong yumi em www.watchtower.org. Inap sampela mun Jodi i ritim ol tok i stap long dispela Web sait, olsem Baibel na ol stori em i laik kisim save long en.

¹⁵ Bihain, Jodi i bungim Mandi, em tupela i mekim wok nes. Mandi i amamas long bekim ol askim bilong Jodi. Bihain liklik, ol i stori long planti tok bilong Baibel. Jodi i orait long stadi long Baibel. I no longtaim na em i kirap go long Haus Kingdom. Long Oktoba, Jodi i kamap pablisa i no baptais, na em i kisim baptais long Februeri. Em i tok: “Nau mi save long tok i tru, na laip bilong mi i gat as tru bilong en na mi stap amamas.”

16. Ekspiriens bilong brata long Florida i soim wok bilong yumi long autim gut tru dispela gutnius inap kamapim wanem samting?

¹⁶ Ryan i no ting wok bilong em long autim tok long wanpela man bai mekim na wanpela meri i kam insait long tok i tru. Tru, long dispela taim, Ryan i kisim save long samting wok bilong em long “autim gut tru dispela gutnius” i kamapim. Tasol ating yu autim tok long wanpela haus, long ples wok, long skul, o long kain kain taim na ples, na yu no save olsem long dispela rot ol man em yu yet i no toktok wantaim ol, ol i kisim save long tok i tru. Pol i no save long olgeta samting wok autim tok bilong em i kamapim long “provins Esia,” na olsem tasol ating yu no inap save long olgeta gutpela samting wok bilong yu long autim gut tru dispela gutnius inap kamapim. (Ritim Aposel 23:11; 28:23.) Tasol em i bikpela samting long yu wok yet long mekim olsem!

17. Yu tingting strong long mekim wanem long 2009?

¹⁷ Long 2009, gutpela sapos yumi olgeta i tingim tru wok bilong yumi long autim tok long ol haus na long ol narapela rot tu. Long dispela rot, bai yumi inap mekim wankain tok olsem Pol: “Laip bilong mi i no nambawan bikpela samting long mi. Mi laik tru long bihainim yet dispela rot mi wokabaut long en na pinisim wok mi bin kisim long Bikpela Jisas. Em wok bilong autim gut tru dispela gutnius bilong bikpela pasin helpim bilong God.”

Bai Yu Bekim Olsem Wanem?

• Olsem wanem aposel Pita na aposel Pol na ol narapela long taim bilong ol i bin autim gut tru dispela gutnius?

• Bilong wanem wok autim tok bilong yumi inap kamapim planti samting moa em yumi no save long en?

• Wanem yiateks bilong 2009? Bilong wanem yu ting dispela yiateks i stret?

[Rait long pes 19]

Yiateks bilong 2009 em: Autim gut tru dispela gutnius.​—Ap. 20:24.

[Piksa long pes 17]

Ol elda bilong Efesus i save long pasin bilong Pol long autim tok long ol haus

[Piksa long pes 18]

Wok bilong yu long autim gut tru dispela gutnius bai kamapim wanem ol samting?