Ol Man i Askim
Olsem Wanem? Ol Witnes Bilong Jehova i Save Bilip Long Olpela Testamen?
Ol Witnes Bilong Jehova i tingim Baibel olsem Tok Bilong God na ol i bilip olsem Olpela Testamen wantaim Nupela Testamen i hap bilong Baibel. Tasol ol i mekim wok long nem stret bilong dispela tupela hap bilong Baibel, em “Ol Skripsa Hibru” na “Ol Skripsa Grik.” Ol i mekim olsem, long wanem, long pastaim tru ol i bin raitim Olpela Testamen long tok Hibru na Nupela Testamen long tok Grik.
Tasol sampela man em ol i tok ol i Kristen, ol i no laik bilip long Olpela Testamen. Ol i tok God long Olpela Testamen em i God bilong belhat na em i save orait long man i kilim i dai narapela man, ol woa, na ol pasin bilong em i no olsem bilong God i gat stretpela pasin na pasin sori em Nupela Testamen i stori long en. Na ol i tok Olpela Testamen i stori tasol long lotu Juda olsem na ol tok bilong en i no inap helpim ol Kristen. Tasol lo bilong God i stap long Lo 12:32 i tok long no ken skruim o lusim wanpela lo bilong em, olsem na yu ting ol dispela tok ol man i kamapim i gutpela as na ol man i ken sakim 75 pesen bilong Baibel?
Long 50 C.E. samting taim Kristen aposel Pol i go lukim ol manmeri bilong Tesalonaika long Grik, “em i toktok wantaim ol long ol tok i stap long buk bilong God. Em i autim as bilong tok bilong God na i tokim ol olsem, ‘Dispela man God i makim bilong kisim bek ol manmeri bilong en, em i mas karim pen na i dai, na bihain em i mas kirap bek.’ ” (Aposel 17:1-3) Sampela man i harim tok bilong em ol i kamap Kristen, na bihain Pol i tokim ol olsem: “Taim yupela i kisim tok bilong God long maus bilong mipela, yupela i no kisim olsem tok bilong man. Nogat. Yupela i kisim olsem tok tru bilong God.” (1 Tesalonaika 2:13) Long taim Pol i go long Tesalonaika, i luk olsem ol i bin raitim Gutnius Bilong Matyu tasol, na ol i no bin raitim yet ol arapela buk bilong Ol Skripsa Grik. Olsem na “ol tok i stap long buk bilong God” em Pol i bin yusim bilong “autim as bilong tok bilong God,” em ol tok bilong Ol Skripsa Hibru.
Ol man bilong raitim ol tok bilong Ol Skripsa Grik, ol i kolim stret ol tok i stap long Ol Skripsa Hibru inap olsem 320 taim, na ol i kamapim sampela arapela tok bilong Ol Skripsa Hibru inap sampela handet taim. Bilong wanem i olsem? Long wanem, “olgeta tok bipo ol i bin raitim long buk bilong God, em ol i bin raitim bilong skulim yumi. Dispela tok i bilong strongim bel bilong yumi na mekim yumi sanap strong na wetim God i kisim yumi.” (Rom 15:4) Dispela i kamapim klia olsem man husat i bilip long olgeta tok bilong Baibel em inap kisim bikpela helpim long dispela.
Isi isi God i wok long tokaut long ol samting em bai mekim, na Ol Skripsa Grik, em Ol Skripsa Hibru i as bilong planti tok bilong en, ol i stori long ol dispela samting. Tasol Ol Skripsa Grik i no daunim strong bilong ol tok i stap long Ol Skripsa Hibru, nogat. Profesa Herbert H. Farmer, long Cambridge Yunivesiti, i tok ‘bilong kliagut long fopela Gutnius, yumi mas tingim tu ol samting i bin kamap long ol man i stap aninit long kontrak bilong Lo, olsem i stap long Olpela Testamen.’
Tru, Tok Bilong God i no save senis, tasol maski i olsem “rot bilong ol stretpela man i lait olsem san i kamap long moningtaim, na lait i wok long kamap strong moa, inap long belo.” (Sindaun 4:18) Long rot bilong bungim Ol Skripsa Grik wantaim Ol Skripsa Hibru, God i helpim ol man long kisim sampela save moa long ol samting em i tingting pinis long mekim, tasol dispela i no daunim ol tok bilong Ol Skripsa Hibru. Ol Skripsa Hibru na Ol Skripsa Grik i hap bilong “tok bilong Bikpela i save stap oltaim oltaim.”—1 Pita 1:24, 25.