Stap Strong Tru Olsem Man i Bin Lukim God!
“Tru, yumi man i no inap lukim God long ai, tasol Moses i mekim wankain pasin olsem man i bin lukim God, na em i stap strong tru.”—HIBRU 11:27.
1. Long bikpela tok Jisas i bin mekim long maunten, em i tok wanem long God na yumi kirap nogut long en?
JEHOVA em God yumi no inap lukim. Taim Moses i askim Jehova long em i ken lukim bikpela lait bilong pes bilong Em, Jehova i tok: “Yu no inap lukim pes bilong mi, long wanem, sapos wanpela man i lukim pes bilong mi bai em i dai.” (Kisim Bek 33:20) Na aposel Jon i tok: “I no gat wanpela man i bin lukim God. Nogat tru.” (Jon 1:18) Taim Jisas Krais i stap man long graun, em tu i no inap lukim God. Tasol long bikpela tok em i bin mekim long maunten, Jisas i tok: “Ol manmeri bel bilong ol i klin, em ol i ken amamas. Bai ol i lukim God.” (Matyu 5:8) Wanem insait bilong dispela tok bilong Jisas?
2. Bilong wanem yumi no inap lukim God long ai tru tru bilong yumi?
2 Baibel i kamapim klia olsem God em i wanpela Spirit yumi no inap lukim. (Jon 4:24; Kolosi 1:15; 1 Timoti 1:17) Olsem na Jisas i no tok olsem yumi ol man bilong graun inap lukim God long ai tru tru bilong yumi, nogat. Tru, ol Kristen God i bin makim ol bai lukim God Jehova long heven taim ol i kirap bek long matmat na kamap olsem spirit. Tasol ol manmeri em “bel bilong ol i klin” na ol i wet long kisim laip i stap oltaim long graun, ol tu inap “lukim” God. Olsem wanem ol inap mekim olsem?
3. Olsem wanem ol man inap lukim long tingting sampela pasin bilong God?
3 Yumi save lain long sampela pasin bilong Jehova taim yumi lukim gut ol samting em i bin wokim. Sapos yumi mekim olsem, bai yumi kirap nogut long strong bilong em, na bai yumi tokaut olsem em i God, Man bilong wokim olgeta samting. (Hibru 11:3; KTH 4:11) Aposel Pol i tok: “Stat long taim God i mekim kamap olgeta samting na i kam inap nau, ol man i lukim ol samting em i bin wokim. Long dispela rot ol man inap save long sampela pasin bilong God i stap hait. Ol inap save long as bilong pasin bilong God, na ol inap save long bikpela strong bilong en i stap oltaim oltaim.” (Rom 1:20) Olsem na tok bilong Jisas long ol man inap lukim God i makim tu olsem long tingting ol inap lukim sampela pasin bilong Jehova. Bilong lukim samting olsem, yumi mas i gat stretpela save, na yumi lukim long ai bilong “tingting.” (Efesus 1:18) Ol tok na pasin bilong Jisas, dispela tu i kamapim long ples klia planti samting bilong God. Olsem na Jisas i tok: “Man i lukim mi, em i lukim Papa.” (Jon 14:9) Pasin bilong Jisas i olsem piksa tru bilong pasin bilong Jehova. Olsem na taim yumi kisim save long i stap bilong Jisas na ol tok em i bin autim, yumi inap lukim long tingting sampela pasin bilong God.
Mas Pilim Tru Ol Samting Bilong Spirit
4. Olsem wanem planti man long nau i kamapim olsem ol i no save pilim ol samting bilong spirit?
4 Long nau i no planti man i gat pasin bilong bilip na pilim tru ol samting bilong spirit, nogat tru. Pol i tok: “Planti man ol i no bilip.” (2 Tesalonaika 3:2) Planti ol i tingting tasol long ol samting ol yet i laik mekim, na ol i no bilip long God. Ol i bihainim pasin bilong sin na ol i no save pilim ol samting bilong spirit, olsem na ol i no inap lukim em long ai bilong tingting bilong ol, long wanem, aposel Jon i tok: “Man i mekim pasin nogut, em i no bin lukim God.” (3 Jon 11) Ol i no inap lukim God long ai tru tru bilong ol, olsem na ol i mekim pasin i olsem God i no save lukim ol samting ol i mekim. (Esekiel 9:9) Ol i ting ol samting bilong spirit i samting nating tasol, olsem na ol i no inap “save gut long God.” (Sindaun 2:5) I olsem Pol i tok: “Man i no gat Holi Spirit [olsem “man bilong tingim ol samting bilong graun tasol,” NW ] em i no inap kisim ol presen bilong Spirit bilong God, long wanem, em i save ting ol dispela presen i kranki samting tasol. . . . Ol man i gat Holi Spirit, ol tasol inap skelim na save tru long ol dispela presen.”—1 Korin 2:14.
5. Ol man bilong tingim ol samting bilong spirit ol i save long wanem samting?
5 Tasol sapos yumi man bilong tingim ol samting bilong spirit, bai yumi save olsem: Tru, Jehova i no wok long painim sampela rong long yumi, tasol taim yumi gat sampela tingting na laik nogut na yumi kirap mekim ol dispela pasin, em i save long dispela. Tru tumas, “Bikpela i save lukim olgeta samting yumi mekim, na em i glasim gut olgeta pasin bilong yumi.” (Sindaun 5:21) Sapos yumi pundaun na mekim sin, bel bilong yumi bai kirapim yumi long tanim bel na askim Jehova long lusim rong bilong yumi, long wanem, yumi laikim em tru na yumi no laik mekim em i bel hevi.—Song 78:41; 130:3.
Wanem Samting i Mekim Yumi Stap Strong?
6. Olsem wanem yumi ken i stap strong tru?
6 Tru, ai bilong yumi i no inap lukim Jehova, tasol yumi no ken lusim tingting olsem em i save lukim yumi. Sapos yumi save olsem em i stap tru, na yumi bilip tru olsem em i save stap klostu long olgeta man i singaut long em, dispela bai helpim yumi long i stap strong—bai yumi bilip strong long em na yumi no surik liklik. (Song 145:18) Yumi inap i stap wankain olsem Moses, em Pol i tok long em olsem: “Moses i bilip long God, olsem na em i kirap na i lusim Isip. King bilong Isip i belhat long em, tasol em i no pret long dispela king. Tru, yumi man i no inap lukim God long ai, tasol Moses i mekim wankain pasin olsem man i bin lukim God, na em i stap strong tru.”—Hibru 11:27.
7, 8. Wanem samting i mekim na Moses i no pret long sanap long ai bilong king?
7 God i bin givim wok long Moses long kisim ol Israel i go lusim wok kalabus long Isip, olsem na planti taim Moses i mas go sanap long ai bilong king nogut bilong Isip na i gat planti bikman bilong lotu na bilong ami ol i stap. Ating insait long haus king ol i bin sanapim planti imis. Tasol maski i no gat wanpela man inap lukim Jehova, long tingting bilong Moses Em i stap tru tru—i no olsem ol dispela imis em ol i makim ol god bilong Isip i no gat laip. Em nau, yumi save long as na Moses i no pret long king!
8 Wanem samting i mekim na Moses i no pret long go sanap planti taim long ai bilong king? Baibel i tok “Moses em i man bilong daunim em yet, na i no gat wanpela man long dispela graun i save daunim em yet inap olsem Moses.” (Namba 12:3) Moses i pilim tru ol samting bilong spirit na em i bilip tru olsem God i stap wantaim em, na dispela i givim strong long Moses na em inap sanap long ai bilong king nogut bilong Isip na stap olsem maus bilong dispela Man ‘yumi no inap lukim.’ Long nau, ol man i save “lukim” dispela God yumi no inap lukim long ai tru, ol i mekim wanem bilong kamapim klia olsem ol i bilip long em?
9. Wanem wanpela rot bilong yumi ken stap strong yet i go?
9 Wanpela rot bilong kamapim klia pasin bilong bilip na i stap strong olsem yumi lukim dispela Man em ai tru bilong yumi i no inap lukim, em yumi mas autim tok na no ken pret, maski ol man i mekim nogut long yumi. Jisas i toksave long ol disaipel olsem: “Olgeta man bai i bel nogut tru long yupela, long wanem, nem bilong mi em i stap long yupela.” (Luk 21:17) Na em i tok moa: “Wokboi i no winim bikman bilong en. Sapos ol i bin mekim nogut long mi, orait ol bai i mekim nogut long yupela tu.” (Jon 15:20) Na stret olsem Jisas i bin tok, bihain liklik long taim em i dai ol man i kirap mekim nogut long ol disaipel—ol i tok long bagarapim ol, na putim ol long kalabus, na paitim ol. (Aposel 4:1-3, 18-21; 5:17, 18, 40) Maski planti man i kirap mekim nogut long ol, ol aposel na ol narapela disaipel bilong Jisas ol i wok yet long autim gutnius na i no pret.—Aposel 4:29-31.
10. Taim yumi bilip strong olsem Jehova i save was long yumi na lukautim yumi, olsem wanem dispela i helpim yumi long mekim wok autim tok?
10 Olsem Moses, lain bilong Jisas bilong pastaim ol i no pret long ol planti planti birua ol inap lukim long ai bilong ol. Ol disaipel bilong Jisas ol i bilip long God, olsem na taim ol man i mekim nogut tru long ol, ol inap karim dispela hevi na sanap strong. Yes, ol i stap strong olsem ol i lukim dispela Man yumi no inap lukim. Long nau, sapos yumi tingting oltaim olsem Jehova i save was long yumi na lukautim yumi, dispela bai strongim yumi na yumi no pret long autim tok bilong Kingdom. Baibel i tok: “Sapos man i pret long ol arapela man, pret bilong en i olsem wanpela umben em i taitim pinis na i pasim em yet. Tasol sapos man i bilip strong long Bikpela, bai em i stap gut.” (Sindaun 29:25) Olsem na yumi no save pret long ol man bai mekim nogut long yumi na yumi surik long autim tok, na yumi no sem long dispela wok bilong yumi. Bilip bilong yumi i kirapim yumi long autim tok long ol lain i sindaun klostu long yumi, na ol wanwok na wanskul, na ol narapela man.—Rom 1:14-16.
God i Stiaim Lain Bilong Em
11. Olsem Pita na Jut i tok, olsem wanem sampela i bin bung wantaim kongrigesen Kristen ol i kamapim klia olsem ol i no tingim liklik ol samting bilong spirit?
11 Bilip i helpim yumi long lukim Jehova olsem Man bilong stiaim oganaisesen bilong em long graun. Olsem na yumi no wok long skelim skelim ol man i holim bikpela wok insait long kongrigesen. Aposel Pita na brata bilong Jisas, em Jut, i mekim tok lukaut long sampela man i no save tingim liklik ol samting bilong spirit na ol i tok nogut long ol man i holim bikpela wok namel long ol Kristen. (2 Pita 2:9-12; Jut 8) Tasol yu ting ol dispela man bilong sutim tok bai mekim kain tok nogut olsem long ai bilong Jehova sapos ol inap lukim em tru tru? Nogat, a? Tasol ol i no inap lukim God long ai bilong ol, olsem na ol dispela man bilong tingim ol samting bilong graun tasol ol i no tingting olsem Em bai skelim pasin bilong ol.
12. Yumi mas mekim wanem kain pasin long ol man i go pas long lukautim kongrigesen?
12 Tru, olgeta man insait long kongrigesen Kristen ol i no gutpela olgeta. Ol man i mekim wok elda ol i save popaia na sampela taim dispela inap givim hevi long yumi yet. Tasol Jehova i save mekim wok long ol dispela kain man olsem wasman bilong ol sipsip bilong em. (1 Pita 5:1, 2) Ol man na meri i save tingim ol samting bilong spirit ol i luksave olsem dispela em i wanpela rot bilong Jehova long stiaim lain bilong em. Olsem na yumi ol Kristen i save abrusim pasin bilong skelim skelim na toktok planti long wok bilong ol elda, na yumi daun long pasin God i bin putim bilong stiaim lain bilong em. Taim yumi bihainim tok bilong ol man i go pas long lukautim yumi, yumi soim olsem yumi lukim dispela Man em ai tru bilong yumi i no inap lukim.—Hibru 13:17.
Lukim God Olsem Nambawan Tisa
13, 14. Bilong lukim Jehova olsem Nambawan Tisa, yu ting yu mas mekim wanem?
13 I gat narapela samting tu em yumi mas lukim long ai bilong spirit. Aisaia i tok profet olsem: “Bai yupela i lukim em [“Nambawan Tisa bilong yupela,” NW ] long ai bilong yupela.” (Aisaia 30:20) Yumi mas i gat strongpela bilip bambai yumi inap lukim Jehova olsem Man i save skulim yumi long rot bilong oganaisesen bilong em long graun. (Matyu 24:45-47) Bilong lukim God olsem Nambawan Tisa bilong yumi, i no olsem yumi stadi gut long Baibel na go oltaim long ol miting Kristen na em tasol. Yumi mas kisim na mekim wok long olgeta samting bilong spirit em God i save givim long yumi. Olsem: Yumi mas putim yau moa yet long ol tok bilong soim rot long yumi em Jehova i givim long rot bilong Jisas, na bai yumi no slek long bihainim dispela tok na lusim olgeta.—Hibru 2:1.
14 Sampela taim yumi mas wok strong tru na bai ol kaikai bilong spirit inap helpim gut yumi. Olsem: Ating sampela taim yumi save ritim hariap hariap sampela stori bilong Baibel em yumi hatwok long kisim gut. Na taim yumi ritim nius Wastaua na Kirap, ating yumi save kalapim sampela stori, long wanem, yumi les long ol kain stori olsem. O taim yumi stap long ol miting Kristen, ating yumi save larim tingting bilong yumi i wokabaut. Tasol yumi inap putim gut tingting i go long ol tok bilong miting sapos yumi wok strong long kisim gut as bilong ol dispela tok. Sapos yumi tenkyu tru long skul yumi kisim long ol samting bilong spirit, yumi kamapim olsem yumi tingim Jehova em i Nambawan Tisa bilong yumi.
Jehova Bai Skelim Pasin Bilong Yumi
15. Olsem wanem sampela i bin mekim olsem Jehova i no inap lukim ol?
15 Nau long dispela “taim bilong las de” pasin nogut i go bikpela tru, olsem na yumi mas bilip strong long dispela Man yumi no inap lukim. (Daniel 12:4) Pasin giaman na stil samting, na pasin pamuk, ol i go bikpela long olgeta hap. Tasol yumi mas tingting olsem Jehova i save lukim ol samting yumi mekim, maski ol man i no inap lukim yumi. Sampela i bin lusim tingting long dispela samting. Taim ol narapela man i no lukim ol, ating ol i save mekim ol pasin i no stret wantaim ol lo bilong Baibel. Olsem: Taim wanpela traim i kamap bilong pulim ol long lukim ol stori nogut na piksa nogut i gat sem, em ol i save kamap long Intenet, televisen, na ol kain samting olsem, ol i no save sakim dispela traim. Ol inap lukim ol dispela kain samting insait long rum bilong ol yet, olsem na sampela i bin mekim olsem Jehova i no inap lukim pasin bilong ol.
16. Wanem samting bai helpim yumi long bihainim ol lo bilong Jehova?
16 I gutpela yumi tingim tok bilong aposel Pol, em i tok: “Yumi olgeta wan wan bai yumi mas tokim God long as bilong olgeta pasin yumi bin mekim.” (Rom 14:12) Yumi mas save gut olsem: Olgeta taim yumi mekim sin, yumi mekim sin long Jehova. Sapos yumi save long dispela samting, dispela bai helpim yumi long bihainim ol lo bilong em na abrusim ol pasin i no stret. Baibel i tok: “I no gat wanpela samting God i bin wokim, em inap hait long pes bilong God. Nogat tru. Olgeta samting i op olgeta na i stap ples klia tru long ai bilong God. Na God tasol bai i skelim olgeta pasin yumi mekim.” (Hibru 4:13) Tru, God bai skelim olgeta pasin yumi mekim, tasol yumi save laikim tumas Jehova na long dispela as yet yumi mekim laik bilong em na bihainim ol stretpela lo bilong em, a? Olsem na yumi mas tingting gut taim yumi laik skelim wanem ol samting bai yumi mekim bilong kisim amamas, na ol pasin yumi mekim long ol meri, o meri i mekim long ol man.
17. Jehova i gat wanem kain tingting na em i save lukluk long yumi?
17 Jehova i save tingting tru long yumi, tasol i no olsem em i wetim yumi i mekim sampela popaia bambai em i ken givim strafe long yumi, nogat. Long pasin sori em i save tingim yumi na lukluk long yumi, olsem wanpela papa i laik praisim ol pikinini bilong em i save bihainim tok bilong em. Yumi save Papa bilong yumi long heven i amamas long yumi bilip strong long em na em “i save mekim gut tru long ol man i wok long painim em,” na dispela save i mekim gut bel bilong yumi! (Hibru 11:6) Olsem na yumi mas bilip strong long Jehova na yumi ‘mas i gat wanpela tingting tasol, em long bihainim laik bilong em.’—1 Stori 28:9.
18. Jehova i save lukluk long yumi na em i lukim pasin bilong yumi long i stap gut long em, olsem na long Baibel yumi kisim wanem gutpela tok bilong strongim yumi?
18 Sindaun 15:3 i tok: “Bikpela i save lukim olgeta samting i kamap long olgeta hap. Em i lukim ol gutpela man na ol man nogut tu.” Tru tumas, Jehova i save lukluk long ol man nogut na em i mekim ol samting long ol i stret long pasin bilong ol. Tasol sapos yumi insait long lain bilong “ol gutpela man,” yumi ken save tru olsem Jehova i save lukim ol pasin yumi mekim bilong i stap gut long em. Taim yumi save olsem ‘hatwok yumi save mekim long Bikpela, em bai i no inap lus nating,’ na Jehova i no ken ‘lusim tingting long ol gutpela wok yumi bin mekim,’ dispela i save strongim tru bilip bilong yumi!—1 Korin 15:58; Hibru 6:10.
Singautim Jehova Long Skelim Yumi
19. Pasin bilong bilip strong long Jehova i save helpim yumi olsem wanem?
19 Yumi ol wokman bilong Jehova i stap gut long em, yumi olsem gutpela samting tru long ai bilong em. (Matyu 10:29-31) Maski yumi no inap lukim em, yumi inap tingim em olsem Man i stap tru tru, na yumi ken ting pasin bilong pas gut wantaim em i gutpela samting tru. Taim yumi gat dispela kain tingting long Papa bilong yumi long heven, dispela i save helpim yumi long planti samting. Strongpela bilip i helpim yumi na long ai bilong Jehova bel bilong yumi i stap stret na bel i no gat tok. Na sapos pasin bilong yumi long bilip i no gat giaman long en, bai yumi no mekim hait sampela pasin nogut. (1 Timoti 1:5, 18, 19) Pasin bilong yumi long bilip strong long God na i no surik liklik, em i stap olsem gutpela piksa na em inap strongim ol narapela. (1 Timoti 4:12) Na tu, kain bilip olsem i save kirapim yumi long mekim pasin God i orait long en, na dispela i amamasim bel bilong Jehova.—Sindaun 27:11.
20, 21. (a) Bilong wanem yumi laik bai ai bilong Jehova i stap long yumi? (b) Olsem wanem yumi ken bihainim tok bilong Song 139:23, 24?
20 Sapos yumi gat gutpela tingting na save tru, bai yumi amamas long Jehova i was long yumi. Yumi laik bai em i lukim yumi, na tu yumi laik bai em i glasim gut tingting na pasin bilong yumi. Taim yumi beten, yumi ken singautim Jehova long skelim gut bel na tingting bilong yumi na lukim olsem i gat sampela tingting i no stret i stap long bel bilong yumi o nogat. Em inap helpim yumi long karim ol hevi bilong yumi na stretim sampela pasin em yumi gat wok long stretim. Olsem na Devit, man bilong raitim Song, em i tok: “God, skelim mi gut na bai yu save long olgeta tingting i stap long bel bilong mi. . . . Skelim mi gut, nogut sampela tok giaman i stap long tingting bilong mi. Na yu mas bringim mi long rot bilong kisim laip bilong i stap gut oltaim oltaim.”—Song 139:23, 24.
21 Devit i askim Jehova long skelim em gut, nogut sampela pasin o “tok giaman” i stap long tingting na bel bilong em. Olsem Devit, yumi tu i laik bai God i skelim bel bilong yumi, nogut yumi gat sampela tingting i no stret, a? Olsem na yumi mas askim Jehova long skelim bel bilong yumi. Tasol olsem wanem sapos yumi bel hevi long wanpela rong yumi bin mekim na yumi tingting planti, o i gat wanpela pasin giaman i stap long bel bilong yumi? Sapos olsem, orait yumi mas wok yet long beten strong long Jehova, na long pasin daun yumi larim spirit holi bilong em na tok bilong em long Baibel i stiaim yumi. Yumi ken bilip tru olsem em bai harim beten bilong yumi na helpim yumi long bihainim rot i bringim yumi long laip i stap oltaim oltaim.—Song 40:11-13.
22. Yumi mas i gat wanem strongpela tingting long dispela Man yumi no inap lukim?
22 Tru tumas, Jehova bai givim laip i stap oltaim long yumi sapos yumi mekim ol samting em i laik bai yumi mas mekim. Na tu, yumi mas tokaut long strong na bikpela namba bilong em, olsem aposel Pol i bin mekim taim em i tok: “Em i King bilong olgeta taim. Em i no save dai, na yumi manmeri yumi no inap lukim em. Em wanpela tasol em i God tru. Olsem na oltaim oltaim yumi olgeta i mas givim biknem long em na em i mas i stap namba wan tru. I tru.” (1 Timoti 1:17) Yes, oltaim yumi mas daun long Jehova na tingim em tru. Na maski wanem samting i kamap, yumi no ken surik liklik—yumi mas tingting strong olsem yumi bai wok yet long i stap strong tru olsem yumi lukim dispela Man em yumi no inap lukim long ai tru bilong yumi.
Bai Yu Bekim Olsem Wanem?
• Olsem wanem ol man inap lukim God?
• Sapos yumi tingim Jehova i stap tru tru, bai yumi mekim wanem kain pasin taim ol man i mekim nogut long yumi?
• Wanem insait bilong dispela tok, yumi lukim Jehova olsem Nambawan Tisa bilong yumi?
• Bilong wanem yumi mas i gat laik long Jehova i skelim yumi?
[Piksa long pes 18]
Moses i no pret long king, na em i mekim pasin olsem em inap lukim Jehova, em dispela God yumi no inap lukim
[Piksa long pes 21]
Yumi no ken mekim pasin i olsem Jehova i no inap lukim ol samting yumi mekim
[Piksa long pes 23]
Yumi wok strong long kisim save long God, long wanem, yumi lukim em olsem Nambawan Tisa bilong yumi