Jehova i No Save Les Kwik Long Man

“Mi God na mi as bilong marimari na sori. Na mi no save belhat kwik. Mi save laikim tru olgeta manmeri.”​​—⁠KISIM BEK 34:⁠6.

1, 2. (a) Pasin bilong Jehova olsem em i no les kwik long man, dispela i bin helpim husat bipo? (b) Pasin bilong i no les kwik long man i olsem wanem?

OL MAN long taim bilong Noa, na ol Israel i bin wokabaut long ples drai nating wantaim Moses, na ol Juda long taim bilong Jisas, sindaun bilong ol i narapela narapela. Tasol olgeta i bin kisim helpim long wanpela gutpela pasin bilong Jehova​—⁠em i no save les kwik long man. Dispela pasin i bin helpim sampela long abrusim bagarap na stap laip. Na pasin bilong Jehova olsem em i no les kwik long man, em inap helpim yumi tu long abrusim bagarap.

² Pasin bilong i no les kwik long man i olsem wanem? Wanem taim Jehova i save kamapim dispela pasin? Na bilong wanem em i mekim olsem? Dispela pasin bilong “i no les kwik long man,” i olsem man i no les long karim hevi bilong rong narapela i mekim o i laik skrapim bel bilong em, na em i no les long wetim man i kamap wanbel gen wantaim em. Olsem na dispela gutpela pasin i gat wok bilong en. Em i gat wok long helpim man i bin rongim narapela. Tasol pasin bilong i no les kwik long narapela, i no makim olsem man i orait long rong narapela i mekim long em, nogat. Em i mekim dispela pasin, olsem i no les kwik long narapela, i go inap long taim dispela pasin i mekim pinis wok bilong en, o i no gat as moa bilong karim hevi em narapela i givim long em.

 3. I gat wanem as na Jehova i no bin les kwik long ol man? Em bai mekim dispela pasin i go inap long wanem taim?

³ Tru, ol man bilong graun inap mekim dispela pasin bilong no les kwik long narapela, tasol Jehova i stap nambawan piksa tru bilong dispela pasin. Insait long ol yia i go pinis, kirap long taim sin i mekim na ol man i stap longwe long Man bilong wokim ol, Jehova i bin isi long ol man na wokim rot bilong ol man i tanim bel pinis ol i ken go klostu long em. (2 Pita 3:9; 1 Jon 4:​10) Tasol taim pasin bilong em olsem em i no les kwik long man em i mekim pinis wok bilong en, orait nau God bai kirap na bagarapim ol bikhetman i mekim rong na em bai pinisim dispela pasin nogut bilong nau.​​—⁠2 Pita 3:⁠7.

Ol Narapela Pasin Bilong God

 4. (a) Long Ol Skripsa Hibru, dispela tok “i no les kwik long man” em i olsem wanem? (Na lukim sta.) (b) Profet Nahum i stori olsem wanem long Jehova? Dispela i kamapim wanem samting long pasin bilong Jehova olsem em i no save les kwik long man?

⁴ Long Ol Skripsa Hibru i gat tupela tok Hibru, insait tru bilong en i olsem “longpela bilong nus,” na em i makim pasin bilong “i no les kwik long man,” na long Buk Baibela ol i tanim olsem “i no save belhat kwik” o “i no save kros hariap.” Profet Nahum i toktok long dispela pasin bilong God olsem em i no les kwik long man, na em i tok: “Bikpela i no save kros hariap. Tasol em i strongpela God, na oltaim em i mekim save long ol man i gat asua.” (Nahum 1:⁠3) Olsem na pasin bilong Jehova olsem em i no les kwik long man, dispela i no makim olsem em i no gat strong na em bai larim man i mekim rong i go inap long olgeta taim bihain, nogat. Tupela pasin bilong God olsem em i no save belhat kwik na em i gat bikpela strong tu, dispela i soim olsem em i no save les kwik long man, long wanem, em i gat pasin bilong bosim gut bel. Em i gat strong long mekim save long man i mekim rong, tasol em i no kirap na mekim olsem, long wanem, em i laik givim rot long dispela man long stretim pasin bilong em. (Esekiel 18:​31, 32) Olsem na taim Jehova i no les kwik long man, dispela i kamapim olsem em i save laikim tru ol man na em i save bihainim gutpela tingting long ol wok em i mekim long strong bilong em.

 5. Pasin bilong Jehova olsem em i no save les kwik long man, olsem wanem dispela i stret wantaim stretpela pasin bilong em?

⁵ Pasin bilong Jehova olsem em i no les kwik long man, dispela i stret tu wantaim stretpela pasin bilong em. Em i tokim Moses: “Mi God na mi as bilong marimari na sori. Na mi no save belhat kwik [o, i no save les kwik long man]. Mi save laikim tru olgeta manmeri, na mi save bihainim olgeta tok bilong mi.” (Kisim Bek 34:⁠6) Planti yia bihain long dispela, Moses i mekim singsing i litimapim nem bilong Jehova, olsem: “Pasin bilong en i gutpela na stretpela tasol.” (Lo 32:⁠4) Tru tumas, ol pasin bilong Jehova olsem marimari, na i no les kwik long man, na stretpela pasin, olgeta dispela pasin i wok gut wantaim.

Taim Bikpela Tait i No Yet

 6. Wanem samting i kamapim klia olsem Jehova i no bin les kwik long ol tumbuna pikinini bilong Adam na Iv?

⁶ Long Iden, Adam na Iv i bikhet long God na dispela i mekim na ol i no pas gut moa wantaim gutpela Man bilong wokim ol, em Jehova. (Stat 3:​8-​13, 23, 24) Dispela i mekim na ol pikinini bilong ol i kisim sin, na pasin kranki, na dai. (Rom 5:​17-​19) Tasol maski namba wan man na meri i bikhet na mekim rong, Jehova i larim tupela i kamapim pikinini. Bihain, em i mekim gutpela pasin sori na wokim rot bambai ol tumbuna pikinini bilong Adam na Iv inap kamap wanbel wantaim em. (Jon 3:​16, 36) Aposel Pol i tok: “Yumi stap yet olsem ol manmeri bilong mekim sin, na Krais i dai bilong helpim yumi. Long dispela pasin God i bin soim yumi olsem, em i laikim yumi moa yet. . . . Pikinini Bilong God i dai bilong pinisim pasin birua na mekim yumi i kamap wanbel wantaim God.”​​—⁠Rom 5:​8-​10.

 7. Taim Bikpela Tait i no yet, Jehova i mekim wanem bilong soim olsem em i no les kwik long ol man? I gat wanem as na i stret Jehova i bin bagarapim dispela lain i stap paslain long taim bilong Bikpela Tait?

⁷ Long taim bilong Noa, Jehova i bin kamapim pasin olsem em i no les kwik long man. Wan handet yia samting paslain long Bikpela Tait, “[God] i lukim pasin nogut i kamap long olgeta hap bilong graun. Em i no lukim wanpela gutpela lain manmeri i stap. Nogat. Olgeta lain manmeri i wok long mekim ol pasin nogut tasol.” (Stat 6:​12) Tasol inap liklik hap taim, Jehova i isi long ol. Em i tok: “Mi no ken larim spirit bilong mi i stap long ol oltaim. Nau bai mi larim ol i stap laip inap 120 krismas tasol, na bai ol i dai.” (Stat 6:⁠3) Dispela 120 yia i givim rot long gutpela man Noa long kamapim ol pikinini, na taim em i kisim save long samting God i laik mekim, em i wokim wanpela sip na toksave long ol man long Bikpela Tait bai kamap. Aposel Pita i tok: “Long taim bilong Noa, pasin nogut i wok long kamap bikpela tru, tasol God i no bekim kwik. Nogat. Em i wet i go [olsem i no les kwik long ol] inap Noa i wokim pinis sip bilong en. Na liklik lain tasol, inap 8-pela manmeri, ol i bin i go antap long sip na bikpela wara i karim ol i go na God i kisim bek ol na ol i stap gut.” (1 Pita 3:​20) Tru, ol man i no lain stret bilong Noa ol “i no tingim” tok bilong em. (Matyu 24:​38, 39, Nupela Testamen) Tasol long dispela samting Noa i mekim​—⁠em i wokim sip na inap planti yia em i “tokaut long stretpela pasin”​—⁠Jehova i givim rot long ol man long tanim bel na lusim ol pasin nogut bilong ol na kirap mekim wok bilong Em. (2 Pita 2:⁠5; Hibru 11:⁠7) Bihain em i bagarapim ol dispela lain nogut na i stret em i mekim olsem.

Em i No Les Kwik Long Ol Israel

 8. Olsem wanem yumi ken tok Jehova i no les kwik long ol Israel?

⁸ Inap planti yia​—⁠winim tru 120 yia​—⁠Jehova i no les kwik long lain Israel. Ol i stap lain stret bilong God inap 1,500 yia, na planti taim insait long dispela hap taim ol i traim pasin bilong em olsem em i no save les kwik long man. Sampela wik tasol bihain long God i wokim mirakel bilong kisim bek ol long Isip, ol i kirap lotuim imis​—⁠ol i no tingim liklik dispela Man bilong kisim bek ol. (Kisim Bek 32:⁠4; Song 106:21) Insait long 40 yia bihain long dispela, ol Israel i save toktok planti long kaikai Jehova i givim ol long ples wesan nating, na ol i kros long Moses and Aron na Jehova, na pamuk wantaim ol haiden, na lotuim god Bal. (Namba 11:​4-6; 14:​2-4; 21:5; 25:​1-3; 1 Korin 10:​6-​11) Jehova inap kilim i dai lain bilong em olgeta, na i stret em i mekim olsem, tasol em i no mekim​—⁠em i marimari long ol.​​—⁠Namba 14:​11-​21.

 9. Long taim bilong ol Hetman na ol king, olsem wanem Jehova i kamapim pasin olsem em i no les kwik long man?

⁹ Long taim bilong ol Hetman, planti taim ol Israel i kirap na lotuim ol imis. Taim ol i mekim olsem, Jehova i larim ol birua i kam na daunim ol. Tasol taim ol i tanim bel na singaut long em i helpim ol, em i marimari long ol na kamapim ol hetman bilong kisim bek ol. (Hetman 2:​17, 18) Insait long bikpela hap taim ol king i bosim ol Israel, wan wan king tasol i lotu long Jehova wanpela tasol. Na taim ol gutpela king i bosim ol, long dispela taim tu ol Israel i save bungim lotu i tru wantaim lotu giaman. Taim Jehova i kamapim ol profet bilong tokim ol long ol i no ken lotuim ol god giaman, ol Israel i no save harim tok bilong ol​—⁠ol i bihainim tok bilong ol pris nogut na ol profet giaman. (Jeremaia 5:​31; 25:​4-7) Na tu, ol Israel i mekim nogut long ol gutpela profet bilong Jehova na kilim sampela i dai. (2 Stori 24:​20, 21; Aposel 7:​51, 52) Tasol Jehova i wok yet long marimari long ol.​​—⁠2 Stori 36:⁠15.

Em i Mekim Yet

10. Jehova i larim ol man i mekim rong i go inap long wanem taim?

¹⁰ Tasol ol samting i bin kamap bipo i soim olsem, God i no inap larim man i mekim rong i go inap olgeta taim, nogat. Long 740 B.C.E., em i larim ol Asiria i kam daunim 10-pela lain bilong Israel na kisim ol i go long narapela kantri. (2 King 17:​5, 6) Na em i larim ol Babilon i daunim 2-pela lain bilong Juda na bagarapim Jerusalem na tempel bilong en long 607 B.C.E.​​—⁠2 Stori 36:​16-​19.

11. Taim Jehova i givim strafe long lain bilong em, olsem wanem em i kamapim dispela pasin olsem em i no les kwik long man?

¹¹ Tasol taim Jehova i givim strafe long Israel na Judah, long dispela taim tu em i no les kwik long ol. Long rot bilong profet Jeremaia, Jehova i tok profet olsem em bai kisim bek lain bilong em. Em i tok: “Mi makim pinis 70 yia bilong Babilon i stap gut. Na bihain long dispela, bai Babilon i bagarap. Na long dispela taim bai mi tingim yupela na bringim yupela i kam bek long Jerusalem, bilong inapim promis bilong mi. . . . Bai mi larim yupela i kam klostu long mi. Na bai mi mekim yupela i stap gut gen. Na bai mi kisim yupela long olgeta hap na long olgeta kantri mi bin rausim yupela i go long en. Na bai mi bringim yupela i kam bek long dispela ples bipo yupela i bin i stap long en.”​​—⁠Jeremaia 29:​10, 14.

12. Taim hap lain Juda i kam bek long kantri Juda, olsem wanem yumi save God yet i stiaim ol samting i kamap bilong redi long Mesaia i kam?

¹² Liklik hap lain namel long ol Juda i stap kalabus, ol i kam bek long kantri Juda na kirapim gen lotu bilong Jehova long tempel ol i wokim gen long Jerusalem. Bilong kamapim laik bilong Jehova, dispela hap lain bai kamap olsem “wara bilong nait” i save mekim ol samting i kamap gutpela. Na ol bai kamap olsem wanpela “laion” i gat strong na i no pret. (Maika 5:​7, 8) Ating dispela laspela tok i bin kamap tru long taim bilong ol Makabi​—⁠ol Juda aninit long famili Makabi i bin rausim ol birua long Graun Bilong Promis na dediketim gen tempel, em ol birua i bin mekim i kamap doti. Dispela samting i lukautim gut graun na tempel na bai narapela liklik hap lain i stap gut long God bai ol inap amamas long Pikinini bilong God taim em i kamap long dispela hap olsem Mesaia.​—⁠Daniel 9:⁠25; Luk 1:​13-​17, 67-​79; 3:​15, 21, 22.

13. Bihain long taim ol Juda i kilim i dai Pikinini bilong em, olsem wanem Jehova i kamapim olsem em i no les kwik long ol?

¹³ Bihain long taim ol Juda i kilim i dai Pikinini bilong God, long dispela taim tu Jehova i no les kwik long ol. Inap 3-pela yia hap moa rot i op yet long ol Juda tasol i ken kam insait long lain pikinini spirit bilong Abraham. (Daniel 9:​27)b Paslain long yia 36 C.E. na bihain tu long dispela yia, sampela Juda ol i kam insait long dispela lain. Olsem na bihain Pol i tok: “Nau long dispela taim tu i gat hap lain i stap, [em] God i bin marimari long ol na makim ol bilong em yet.”​​—⁠Rom 11:⁠5.

14. (a) Long 36 C.E., singaut i go long husat bilong kam insait long lain pikinini spirit bilong Abraham? (b) Pol i gat wanem tingting long pasin Jehova i bihainim long makim ol man bilong lain Israel bilong spirit?

¹⁴ Long 36 C.E., rot i op long namba wan taim long ol man i no bilong lain Juda o bilong ol narapela lain i bihainim lotu Juda, long ol i ken kam insait long lain pikinini spirit bilong Abraham. Ol man i kam insait long dispela lain ol tu i kisim marimari bilong Jehova. (Galesia 3:​26-​29; Efesus 2:​4-7) Gutpela tingting na save em i as na Jehova i bin marimari long ol man bambai em i ken inapim namba olgeta bilong lain Israel bilong spirit. Pol i pilim tru dispela gutpela pasin bilong Jehova na em i tok: “Olaman! Ol gutpela pasin bilong God na tingting na save bilong en i pulap tru, na i daun tumas olsem solwara! Yumi man i no inap tru long painim as bilong olgeta tingting bilong en.”​​—⁠Rom 11:​25, 26, 33; Galesia 6:​15, 16.

Em i Tingim Nem Bilong Em

15. Wanem namba wan as na Jehova i no les kwik long man? Bikpela hap taim i mas lus bilong stretim wanem bikpela tok?

¹⁵ I gat wanem as na Jehova i no save les kwik long man? Namba wan bikpela samting, em i laik kamapim nem holi bilong em na kamapim klia olsem i stret em i stap Nambawan Bos. (1 Samuel 12:​20-​22) Satan i bin kamapim wanpela bikpela tok. Em i gat tok long pasin Jehova i bihainim long mekim wok bos. Bilong stretim gut dispela tok long ai bilong olgeta lain long heven na long graun, bikpela hap taim i mas lus. (Jop 1:​9-​11; 42:​2, 5, 6) Olsem na taim lain bilong em i kisim hevi long Isip, Jehova i tokim king bilong Isip: “Mi bin larim yupela i stap olsem bai mi ken soim bikpela strong bilong mi long yupela, na bai ol manmeri i ken tokaut long biknem bilong mi long olgeta hap bilong graun.”​​—⁠Kisim Bek 9:​16.

16. (a) Pasin bilong Jehova olsem em i no les kwik long man, olsem wanem dispela i opim rot bilong kamapim wanpela lain bilong holim nem bilong em? (b) Wanem samting bai mekim holi nem bilong Jehova na kamapim klia olsem i stret em i stap Nambawan Bos?

¹⁶ Dispela tok Jehova i givim long king bilong Isip, aposel Pol i kamapim gen taim em i toktok long pasin bilong Jehova, olsem em i no save les kwik long man, na wok dispela pasin i mekim long litimapim nem bilong Em. Bihain Pol i tok: “Ol sospen bilong kisim pe nogut ol i redi pinis long bagarap, tasol em i larim ol na em i wet longtaim long brukim ol. Long wanem, em i laik bai olgeta man i ken save long bikpela lait na strong bilong en, na long gutpela sindaun tru em i laik givim long ol sospen bilong kisim marimari. . . . Ol dispela sospen bilong kisim marimari, em yumi ol manmeri God i bin singautim. Na yumi no kam long lain bilong Juda tasol. Nogat. Yumi kam long ol arapela lain tu. Long buk bilong profet Hosea, God i bin tok olsem, ‘Dispela ol manmeri bipo ol i no lain bilong mi, bai mi kolim ol lain bilong mi.’ ” (Rom 9:​17, 22-​25) Jehova i no bin les kwik long ol, olsem na em inap kam long ol man bilong ol narapela lain na kisim “wanpela lain i holim nem bilong em.” (Aposel 15:​14, NW ) Aninit long Het bilong ol, Jisas Krais, ol dispela “manmeri” ol i bilong kisim Kingdom em Jehova bai mekim wok long en bilong mekim holi nem bilong Em na kamapim klia olsem i stret em i stap Nambawan Bos.​​—⁠Daniel 2:​44; 7:​13, 14, 27; KTH 4:​9-​11; 5:​9, 10.

Bilong Kisim Bek Ol Man

17, 18. (a) Yumi mekim wanem na bai i olsem yumi toktok planti long pasin bilong Jehova olsem em i no save les kwik long man? (b) Yumi mas i gat wanem tingting long pasin bilong Jehova olsem em i no save les kwik long man?

¹⁷ Kirap long taim ol man i mekim sin na i kam inap nau, Jehova i bin kamapim klia olsem em i no save les kwik long man. Paslain long taim bilong Bikpela Tait, em i no les kwik long ol man na dispela i mekim na hap taim i stap bilong Noa i ken toksave long ol na wokim sip bilong kisim bek ol. Tasol taim dispela pasin isi i mekim pinis wok bilong en, orait nau Bikpela Tait i kamap. Na i wankain tu long nau. Jehova i bin isi long ol man longpela taim pinis, winim ol yia em sampela man i ting em bai isi long ol. Tasol yumi no ken bel hevi long dispela. Sapos olsem, dispela bai olsem yumi toktok planti long pasin bilong God olsem em i no save les kwik long man. Pol i kamapim askim olsem: “God i save mekim gutpela pasin long yu, na em i wetim yu longpela taim, na em i no save bekim pe nogut long yu kwiktaim. Dispela gutpela pasin bilong God, ating yu lukim em i olsem samting nating, a? God i laik bai yu tanim bel, olsem na em i mekim gutpela pasin long yu.”​​—⁠Rom 2:⁠4.

¹⁸ Yumi no inap save God i mas isi long yumi i go inap hamas yia na bai em i ken orait long yumi na yumi no lus. Pol i tokim yumi: ‘Yumi mas pret na guria na wok strong long kisim tru dispela presen em i makim bilong yumi.’ (Filipai 2:​12) Aposel Pita i tokim ol wanlain Kristen: “Bikpela i no save wok isi isi long kamapim samting em i bin promis long mekim, olsem sampela man i save tok. Nogat. Tasol em i no laik bai wanpela man i lus. Em i laik bai olgeta man i mas tanim bel, olsem na em i isi long yupela na em i wet i stap yet.”​​—⁠2 Pita 3:⁠9.

19. Yumi ken mekim wanem na bai pasin bilong Jehova olsem em i no les kwik long man em i ken helpim yumi?

¹⁹ Olsem na yumi no ken les long pasin bilong Jehova long mekim ol samting. Yumi mas tingim dispela tok bilong Pita, olsem Jehova i ‘wet yet na em i isi long yumi, long wanem, em i laik kisim bek yumi.’ Em i laik kisim bek husat? Em yumi yet wantaim planti ol narapela ol i no harim yet “gutnius bilong kingdom.” (2 Pita 3:​15; Matyu 24:14) Kain tingting olsem bai helpim yumi long pilim tru gutpela pasin bilong Jehova olsem em i no save les kwik long man, na dispela bai kirapim yumi long no ken les kwik long ol narapela.

[Ol Futnot]

Yu Inap Stori Long Dispela?

• Long Baibel, pasin olsem “i no les kwik long man” i olsem wanem?

• Olsem wanem Jehova i bin kamapim olsem em i no bin les kwik long man paslain long taim bilong Bikpela Tait, na taim ol Juda i lusim pinis kalabus long Babilon, na long taim bilong ol aposel?

• I gat wanem as na Jehova i no bin les kwik long man?

• Yumi mas i gat wanem tingting long pasin bilong Jehova olsem em i no save les kwik long man?

[Piksa long pes 9]

Paslain long taim bilong Bikpela Tait, Jehova i no les kwik long ol man na dispela i bin givim rot long ol long tanim bel

[Piksa long pes 10]

Bihain long ol i daunim Babilon, pasin bilong Jehova olsem em i no les kwik long man i bin helpim ol Juda

[Piksa long pes 11]

Long taim bilong ol aposel, pasin bilong Jehova olsem em i no les kwik long man, dispela i bin helpim ol Juda na ol man i no Juda

[Ol Piksa long pes 12]

Ol Kristen long nau i save mekim gutpela wok long pasin bilong Jehova olsem em i no save les kwik long man