Lukautim Pasin i Makim Olsem Yumi Kristen
“Jehova i tok: ‘Yupela i witnes bilong mi.’ ”—AISAIA 43:10, NW.
1. Jehova i save bringim wanem kain manmeri i kam long em?
TAIM yu stap long wanpela Haus Kingdom, lukluk gut long ol manmeri i stap. Yu lukim husat i stap long dispela haus bilong lotuim God? Ating bai yu lukim ol yangpela i givim bel long kisim savetingting bilong Baibel. (Song 148:12, 13) Na tu, ating bai yu lukim ol papa, em ol i wok strong long bihainim tok bilong God, maski ol i stap namel long ol man i save bagarapim sindaun bilong ol famili. Ating yu bai lukim ol lapun yumi laikim tumas, maski ol hevi bilong i go lapun i painim ol, ol i wok yet long truim dediket ol i bin mekim long Jehova. (Sindaun 16:31) Olgeta i laikim tru Jehova. Na Jehova i bringim ol i kam pas gut wantaim em. Pikinini Bilong God i bin tok: “I no gat wanpela man inap i kam long mi long laik bilong em yet. Nogat. Papa i mas kirapim tingting bilong en na bringim em i kam long mi.”—Jon 6:37, 44, 65.
2, 3. Bilong wanem em i hatwok long holim strong pasin i makim olsem yumi Kristen?
2 Yumi amamas long i stap wantaim ol manmeri husat Jehova i orait long ol na em i blesim ol, a? Tasol long dispela ‘taim bilong planti hevi nogut tru’ i hatwok tru long holim strong pasin bilong mekim ol samting i makim yumi Kristen. (2 Timoti 3:1) Dispela em i tru moa yet long ol yangpela em ol i go bikpela insait long ol famili Kristen. Wanpela yangpela i tok: “Maski mi bin go long ol miting Kristen, mi no bin makim ol mak bilong spirit mi laik winim, na mi no tingting strong long mekim wok bilong Jehova.”
3 Sampela i gat laik tru long mekim wok bilong Jehova, tasol tingting bilong ol wanlain, tingting bilong graun, na laik nogut bilong skin inap pulim tingting bilong ol. Taim ol kain samting olsem i wok strong long pulim yumi, dispela inap mekim na isi isi yumi inap lusim pasin i makim olsem yumi Kristen. Olsem: Planti man long nau i ting ol lo bilong stretpela pasin em Baibel i as bilong en, ol i samting bilong bipo yet na ol i no stret long taim bilong yumi. (1 Pita 4:4) Sampela i ting olsem yumi no gat wok long lotuim God long pasin God yet i makim. (Jon 4:24) Long pas em i raitim long ol Efesus, Pol i tok long “pasin” bilong dispela graun, o bikpela tingting i save kirapim strong ol man bilong dispela graun long mekim ol samting. (Efesus 2:2) Dispela pasin, o tingting, i save pulim ol man long bihainim tingting bilong ol man husat i no save long Jehova.
4. Olsem wanem Jisas i strongim yumi long lukautim pasin bilong yumi i makim olsem yumi Kristen?
4 Tasol yumi ol yangpela na lapun wokboi bilong Jehova i dediket pinis i save em i samting nogut long lusim pasin i makim olsem yumi Kristen. Yumi ken kisim stretpela tingting long pasin i makim olsem yumi Kristen long rot bilong save long ol lo bilong Jehova na ol samting em i laik bai yumi mekim. Dispela i stret, long wanem, God i wokim yumi i kamap kain olsem em yet. (Stat 1:26; Maika 6:8) Baibel i tok piksa olsem pasin bilong yumi i makim olsem yumi Kristen i kain olsem ol klos yumi werim na olgeta man i ken lukim. Jisas i tok lukaut long taim bilong yumi: “Harim. Wantu bai mi kam long yupela olsem ol stilman i save kam. Olsem na sapos man i no slip, na em i putim ol klos samting bilong en i stap klostu long em, orait dispela man i ken amamas, long wanem, em bai i no inap wokabaut as nating na ol manmeri bai i no inap lukim sem bilong en.”a (KTH 16:15) Yumi no laik lusim ol pasin Kristen bilong yumi na larim pasin bilong dispela graun bilong Satan i bosim yumi. Sapos kain samting olsem i kamap, orait i olsem yumi lusim ol dispela “klos.” Kain samting olsem em i nogut na bai yumi kisim sem long dispela samting.
5, 6. Bilong wanem yumi mas stap strong long ol samting bilong spirit?
5 Pasin bilong tingim tru pasin i makim olsem yumi Kristen i mekim bikpela samting long laip bilong yumi. Bilong wanem i olsem? Long wanem, sapos man i lotuim Jehova i no tingim tru pasin i makim olsem em i Kristen, dispela inap mekim na em i paul nabaut long rot em i bihainim na ol mak em i laik winim. Planti taim Baibel i tok lukaut long kain tingting olsem. Disaipel Jems i tok: “Man i gat tupela tingting, em i olsem solwara win i sakim na i kirap nabaut. Kain man olsem i no ken ting Bikpela bai i givim wanpela samting long em. Nogat. Tingting bilong dispela man em i bruk nabaut, na long olgeta pasin em i mekim, em i no save bihainim wanpela rot tasol.”—Jems 1:6-8; Efesus 4:14; Hibru 13:9.
6 Olsem wanem yumi ken lukautim pasin i makim olsem yumi Kristen? Wanem samting inap helpim yumi long tingim moa yet gutpela wok yumi holim, olsem ol man i lotuim God Antap Tru? Plis tingim ol tok i kamap bihain.
Strongim Pasin i Makim Olsem Yu Kristen
7. Bilong wanem i gutpela long askim Jehova long skelim yumi?
7 Olgeta taim wok long strongim pasin bilong yu long pas gut wantaim Jehova. Nambawan samting tru Kristen i holim em pasin bilong em long pas gut wantaim God. (Song 25:14; Sindaun 3:32) Sapos yumi kirap long kisim tupela tingting long pasin i makim yumi olsem Kristen, orait em i taim bilong skelim gut pasin bilong yumi long pas gut wantaim Jehova. Man bilong raitim song i tok: “God, traim olgeta pasin bilong mi. Na skelim bel na tingting bilong mi.” (Song 26:2) Bilong wanem i bikpela samting God i skelim yumi olsem? Long wanem, yumi yet i no inap skelim gut laik na tingting i stap insait tru long bel bilong yumi. Jehova tasol inap save long ol laik, tingting na ol samting yumi pilim long bel bilong yumi.—Jeremaia 17:9, 10.
8. (a) Taim Jehova i traim yumi, olsem wanem dispela inap helpim yumi? (b) Wanem samting i bin helpim yu long kamap strongpela Kristen moa?
8 Taim yumi askim Jehova long skelim yumi, i olsem yumi askim em long traim yumi. Em inap larim ol samting i kamap i kamapim tru laik na bel bilong yumi. (Hibru 4:12, 13; Jems 1:22-25) Yumi mas amamas long ol kain traim olsem, long wanem, dispela i givim rot long yumi long kamapim tru pasin bilong yumi long i stap gut long Jehova. Ol kain traim olsem inap helpim yumi long save olsem ‘yumi stap gut na yumi no sot long wanpela pasin bilong God’ o nogat. (Jems 1:2-4) Na taim ol dispela traim i painim yumi, yumi inap kamap strong moa long samting bilong spirit.—Efesus 4:22-24.
9. Bilong wanem yumi yet i mas stadi na bilipim tru tok i tru bilong Baibel? Stori long dispela.
9 Yu yet i mas stadi na bilipim tru tok i tru bilong Baibel. Pasin i makim olsem yumi wokboi bilong Jehova i no inap stap strong sapos save bilong Baibel i no as bilong en. (Filipai 1:9, 10) Olgeta wan wan Kristen—yangpela na lapun—i mas skelim gut tru ol samting em i bilip long en bilong save tru olsem tok i tru bilong Baibel i as bilong ol dispela bilip o nogat. Pol i bin kirapim ol wanbilip olsem: “Yupela i mas skelim gut olgeta tok na pasin. Na yupela i mas holimpas ol gutpela pasin.” (1 Tesalonaika 5:21) Ol yangpela Kristen husat i stap insait long ol famili i save pret long God ol i mas save olsem ol i no inap stap Kristen tru long bilip bilong papamama bilong ol. Papa bilong Solomon, em Devit, i tokim Solomon olsem, yu mas save “long God bilong papa bilong yu. Na yu mas wok strong tru long bihainim laik bilong em.” (1 Stori 28:9) I no inap long yangpela Solomon i lukluk tasol long pasin papa bilong em i bihainim bilong kisim strongpela bilip long Jehova. Em yet i mas wok long kisim save long Jehova, na em i bin mekim olsem. Em i tokim God: “Mi laik bai yu givim gutpela tingting na save long mi. Orait na bai mi ken bosim gut ol dispela manmeri.”—2 Stori 1:10.
10. Bilong wanem i no gat rong long kamapim ol askim em stretpela laik na tingting i as bilong ol?
10 Save em i as bilong strongpela bilip. Pol i tok: “Yumi harim tok bilong God na dispela i kirapim bilip.” (Rom 10:17) Wanem mining bilong dispela tok? Taim yumi kisim kaikai long Tok Bilong God, bilip bilong yumi long Jehova, ol tok promis bilong em, na long oganaisesen bilong em i kamap strong moa. Taim yumi kamapim ol gutpela askim em stretpela laik na tingting i as bilong ol, yumi inap kisim ol bekim i save strongim yumi. Na tu, long Rom 12:2 Pol i tok: “Yupela inap long save tru long laik bilong God. Bai yupela i save long ol pasin i gutpela na long ol pasin God i laikim tumas na long ol pasin i inap tru na i stret olgeta.” Olsem wanem yumi inap mekim olsem? Yumi ken mekim olsem taim yumi “kisim [“stretpela,” NW ] save long tok tru.” (Taitus 1:1) Spirit bilong Jehova inap helpim yumi long kisimgut ol tok i hatwok long kisim. (1 Korin 2:11, 12) Taim yumi hatwok long kliagut long sampela tok, yumi mas beten askim God long helpim yumi. (Song 119:10, 11, 27) Jehova i laik bai yumi kisimgut Tok bilong em, bilipim na bihainim dispela tok. Em i amamas long ol askim em stretpela laik na tingting i as bilong ol.
Strong Long Amamasim God
11. (a) Wanem laik bilong yumi man inap givim hevi long yumi? (b) Olsem wanem yumi inap kisim strong bilong sakim strong bilong ol wanlain long pulim yumi?
11 Wok long amamasim God, ol man nogat. Yumi man i gat laik long i stap insait long wanpela lain. Dispela em i hap bilong ol samting i makim yumi i husat. Olgeta man i mas i gat ol pren, na yumi save amamas long insait long wanpela lain. Long taim yumi stap yangpela—na bihain tu—strong bilong ol wanlain long pulim yumi em i strong tru, na dispela inap kirapim strong yumi long bihainim pasin bilong ol o amamasim ol. Tasol ol pren na ol wanlain i no save tingim tru yumi long olgeta taim. Sampela taim ol i laik bai ol i gat man i ken poromanim ol long mekim pasin nogut tasol. (Sindaun 1:11-19) Taim Kristen i larim ol wanlain i pulim em long mekim samting i no stret, em i laik haitim olsem em i Kristen. (Song 26:4) Aposel Pol i tok: “No ken bihainim pasin bilong ol man bilong dispela graun.” (Rom 12:2, The Jerusalem Bible) Jehova i save givim yumi strong yumi mas kisim bilong sakim strong bilong ol man i laik pulim yumi long bihainim pasin bilong ol.—Hibru 13:6.
12. Wanem stiatok na pasin bilong husat inap strongim yumi long sanap strong taim ol man i laik pulim yumi?
12 Taim strong bilong ol wanlain long pulim yumi i laik bagarapim pasin i makim olsem yumi Kristen, yumi mas tingim: Pasin bilong i stap gut long God em i bikpela samting moa, winim tingting bilong ol man na ol pasin em planti man i save bihainim. Wanpela gutpela stiatok bilong bihainim i stap long Kisim Bek 23:2: “Sapos ol planti man i mekim pasin nogut, orait maski long bihainim pasin bilong ol.” Taim klostu olgeta Israel i gat tupela tingting long strong bilong Jehova long truim ol tok promis bilong Em, Kalep i strong long em i no ken bihainim ol. Em i bilip tru olsem ol tok promis bilong God bai kamap tru, na long dispela rot em i kisim ol gutpela samting. (Namba 13:30; Josua 14:6-11) Olsem wanem? Yu tu i redi long sakim tingting bilong ol man, bilong lukautim pasin bilong yu long pas gut wantaim God?
13. Bilong wanem yumi ken tok olsem em i savetingting long tokaut olsem yumi Kristen?
13 Tokaut olsem yu wanpela Kristen. Bilong holimpas pasin i makim olsem yumi Kristen, yumi no ken wok tasol long sakim ol man i laik pulim yumi. Yumi mas mekim sampela samting moa. Long taim bilong Esra, taim ol birua i laik pasim ol long mekim laik bilong Jehova, ol Israel i stap gut long God i bin tok: “Mipela i wokboi bilong God i save bosim heven na graun.” (Esra 5:11) Sapos yumi save tingting planti long ol pasin na tok bilong ol man i birua long yumi, dispela inap mekim na yumi pret na yumi no inap mekim wanpela samting. Pasin bilong traim long amamasim olgeta man bai pasim yumi long mekim gutpela wok. Olsem na no ken pret long ol. Em i gutpela long tokaut klia olsem yu wanpela Witnes Bilong Jehova. Long pasin i soim rispek na i soim olsem yu strong long bilip bilong yu, stori long ol samting yu pilim olsem em i bikpela samting, ol bilip bilong yu, na tingting bilong yu olsem wanpela Kristen. Tokim ol narapela olsem yu strong long bihainim ol lo bilong Jehova long stretpela pasin. Tokaut klia olsem yu no inap lusim pasin Kristen tru. Kamapim long ples klia olsem yu amamas long stretpela pasin yu save bihainim. (Song 64:10) Pasin bilong sanap olsem strongpela Kristen inap strongim yu, lukautim yu, na kirapim sampela long kisim save long Jehova na ol manmeri bilong em.
14. Olsem wanem? Taim ol man i tok bilas o birua long yumi, yumi mas bel hevi long dispela? Stori long dispela.
14 Tru, sampela inap tok bilas long yu o birua long yu. (Jut 18) Sapos ol narapela i no amamas taim yu stori long bilip bilong yu, no ken bel hevi. (Esekiel 3:7, 8) Maski yu strong long autim tok long ol man i no gat laik long bilip, ol i no inap bilip. Tingim Fero. Maski em i lukim wanem ol hevi o mirakel, na nambawan pikinini bilong em i dai, em i no bilip olsem Moses em i mausman bilong Jehova. Olsem na no ken larim ol man i pretim yu. Sapos yumi bilip na trastim God dispela bai helpim yumi na bai yumi no pret long ol man.—Sindaun 3:5, 6; 29:25.
Lain Long Ol Samting i Kamap Pinis, Redi Gut Long Bihain
15, 16. (a) Yumi bin kisim wanem ol samting bilong spirit? (b) Olsem wanem pasin bilong skelim Tok Bilong God na tingim ol samting bilong spirit yumi bin kisim inap helpim yumi?
15 Tingim tru ol samting bilong spirit yu bin kisim. Ol Kristen bai kisim helpim taim ol i skelim Tok Bilong God na tingim ol samting bilong spirit ol i bin kisim. Sampela ol gutpela samting bilong spirit yumi kisim em: Tok i tru bilong Baibel, hop bilong yumi long laip oltaim, na biknem yumi kisim long makim maus bilong God taim yumi autim gutnius. Olsem wanem? Yu inap luksave long wok bilong yu yet insait long lain Witnes bilong em, em lain God i makim bilong mekim wok bilong kisim bek ol man long rot bilong autim tok bilong Kingdom? Tingim: Em Jehova yet i tokaut olsem: “Yupela i witnes bilong mi.”—Aisaia 43:10.
16 Yu ken askim yu yet olsem: ‘Mi ting ol samting bilong spirit mi kisim em i bikpela samting olsem wanem? Mi ting em i bikpela samting, olsem na em i stap nambawan samting long laip bilong mi? Mi tingim tru ol samting bilong spirit mi kisim na dispela i strongim mi long sakim ol traim em inap pundaunim mi na ol samting bilong spirit bai i lus?’ Ol samting bilong spirit yumi kisim i mekim na yumi ken pilim olsem yumi stap gut long ol samting bilong spirit, em wanpela amamas yumi inap pilim insait long oganaisesen bilong Jehova tasol. (Song 91:1, 2) Taim yumi tingim ol bikpela samting i bin kamap long oganaisesen bilong Jehova long nau dispela i lainim yumi olsem i no gat wanpela man o wanpela samting inap bagarapim na pinisim ol manmeri bilong Jehova.—Aisaia 54:17; Jeremaia 1:19.
17. Yumi mas bilip long ol samting bilong spirit yumi kisim, tasol wanem samting moa yumi mas kisim?
17 Tasol yumi no ken bilip long ol samting bilong spirit yumi kisim na em tasol, nogat. Yumi wan wan i mas kisim pasin bilong pas gut wantaim God. Pol i bin wok strong long helpim ol Kristen long Filipai long kisim strongpela bilip, na bihain em i tokim ol: “Orait, ol pren bilong mi, oltaim yupela i save bihainim tok bilong mi, na nau tu yupela i mas mekim olsem. Yupela i no ken bihainim tok long taim mi stap wantaim yupela tasol. Nogat. Nau mi stap longwe, na yupela i mas bihainim gut tru. God i kisim bek yupela pinis, na nau yupela i mas pret na guria na wok strong long kisim tru dispela presen em i makim bilong yupela.” (Filipai 2:12) Yumi no ken bilip olsem narapela man bai kisim bek yumi.
18. Olsem wanem ol wok Kristen i ken strongim pasin i makim olsem yumi Kristen?
18 Givim bel long mekim ol wok Kristen. Ol man i tok “wok man i mekim inap makim em i wanem kain man o em i husat.” Ol Kristen bilong nau i bin kisim bikpela wok long tokaut olsem Kingdom Bilong God i kamap pinis. Pol i tok: “God i salim mi i go bilong mekim wok namel long yupela, na mi save amamas tru long dispela wok mi mekim.” (Rom 11:13) Wok bilong yumi long autim tok i makim yumi i stap narakain long ol man bilong dispela graun, na taim yumi mekim dispela wok dispela i save strongim pasin i makim olsem yumi Kristen. Taim yumi givim bel long mekim ol arapela wok tiokratik, olsem ol miting Kristen, sanapim ol haus lotu, helpim ol man i sot, na ol kain samting olsem, dispela i strongim pasin i makim olsem yumi Kristen.—Galesia 6:9, 10; Hibru 10:23, 24.
Ol Blesing Bilong i Stap Kristen
19, 20. (a) Wanem ol gutpela samting i painim yu yet, long wanem, yu wanpela Kristen? (b) Wanem samting i as na yumi save long yumi husat tru?
19 Lusim liklik haptaim long tingim ol gutpela samting yumi kisim, long wanem, yumi Kristen tru. Jehova i luksave long yumi wan wan. Profet Malakai i bin tok: “Ol manmeri i save stap aninit long Bikpela na i harim tok bilong en, ol i toktok long ol yet, na Bikpela i harim toktok bilong ol. Na Bikpela i tok, na long heven ol i raitim wanpela buk i gat nem bilong ol manmeri i save stap aninit long Bikpela na i tingting long em oltaim.” (Malakai 3:16) Yumi inap i stap pren bilong God. (Jems 2:23) Laip bilong yumi i gat as tru bilong en na yumi gat ol gutpela mak yumi laik winim. Na yumi gat hop long laip oltaim.—Song 37:9.
20 Tingim: Em samting bilong God long skelim yu husat tru na yu gutpela samting olsem wanem, i no samting bilong ol narapela man. Ating sampela bai bihainim tingting bilong man long skelim yumi, em tingting bilong ol i no gutpela tumas. Tasol pasin laikim bilong God na pasin bilong em long tingim yumi wan wan i mekim na yumi pilim olsem yumi gutpela samting tru—yumi bilong em. (Matyu 10:29-31) Na tu, pasin laikim yumi gat long God i save mekim na yumi pilim olsem yumi man i gat namba na em i stiaim laip bilong yumi. “Sapos wanpela man i givim bel bilong em long God, orait God i save tru long dispela man.”—1 Korin 8:3.
[Futnot]
a Ating ol dispela tok i stori long wok bilong ofisa bilong pletfom bilong tempel long Jerusalem. Long taim bilong was long nait, em bai raun long tempel bilong luksave olsem ol gad Livai ol i ai op o ol i slip i stap. Sapos gad em i slip i stap, ofisa bai paitim em long stik na em inap kukim klos bilong em long paia bilong semim em.
Yu Inap Tingim?
• Bilong wanem em i bikpela samting long ol Kristen long lukautim pasin i makim olsem ol i Kristen?
• Olsem wanem yumi ken strongim pasin i makim olsem yumi Kristen?
• Taim yumi mas makim husat yumi laik amamasim, yumi ken skelim wanem ol samting bilong helpim yumi long makim stret?
• Olsem wanem pasin bilong tingim tru pasin i makim olsem yumi Kristen inap mekim bikpela samting long laip bilong yumi?
[Ol Piksa long pes 21]
Pasin bilong givim bel long mekim ol wok Kristen inap strongim pasin i makim olsem yumi Kristen