Sakim Spirit Bilong Graun Em Pasin Bilong En i Wok Long Senis
“Mipela i no bin kisim spirit bilong dispela graun. Nogat. Mipela i kisim Spirit i kam long God.”—1 KORIN 2:12.
1. Ol tok giaman Iv i bilipim i bin mekim wanem long em?
“SNEK i giamanim mi.” (Jenesis 3:13, Jenesis) Namba wan meri Iv, i mekim dispela sotpela tok bilong kamapim as na em i kirap bikhet long God Jehova. Tok bilong em i tru, tasol dispela i no mekim na em i no gat asua long rong em i bin mekim. Bihain spirit bilong God i kirapim aposel Pol long tok: “Meri i bilipim tok giaman.” (1 Timoti 2:14) Em i bilipim tok giaman olsem em i ken sakim tok na kaikai prut tambu na dispela bai helpim em long kamap wankain olsem God. Na tu giaman i mekim na em i no save husat tru i bin giamanim em. Em i no save dispela snek i stap olsem maus bilong Satan.—Stat 3:1-6.
2. (a) Satan i save mekim wanem long nau bilong giamanim ol man? (b) “Spirit bilong graun” em wanem samting? Wanem ol askim bai yumi skelim nau?
2 Kirap long taim bilong Adam tupela Iv na i kam, Satan i wok yet long giamanim ol man. Em i wok long “giamanim olgeta manmeri bilong graun.” (KTH 12:9) Pasin bilong em long giamanim ol man i no senis. Em i no save mekim toktok long rot bilong snek moa, tasol em i save wok hait yet long ol narapela rot. Long rot bilong ol samting bilong kisim amamas, ol niuspepa samting, na long ol narapela rot, Satan i giamanim ol man long bilip olsem ol i no gat wok long bihainim gutpela tok bilong God na dispela gutpela tok i no save helpim ol. Wok Satan i mekim bilong giamanim ol man i mekim na ol man bilong olgeta hap i kisim pasin bilong bikhet long ol lo na stiatok bilong Baibel. Baibel i kolim dispela pasin olsem “spirit bilong dispela graun.” (1 Korin 2:12) Dispela spirit i gat strong long bosim ol bilip, tingting, na pasin bilong wokabaut bilong ol man i no save long God. Dispela spirit i kamap ples klia olsem wanem? Na yumi ken mekim wanem bilong sakim ol pasin nogut dispela spirit i save kamapim? Orait nau yumi ken stori long dispela.
Stretpela Pasin i Wok Long Pinis
3. Bilong wanem dispela “spirit bilong graun” i kamap ples klia moa yet long taim bilong yumi?
3 Long nau, dispela “spirit bilong graun” i kamap ples klia moa yet. (2 Timoti 3:1-5) Ating yu luksave pinis olsem stretpela pasin i wok long pinis. Baibel i stori long as na dispela samting i kamap. Bihain long Kingdom Bilong God i kamap pinis long 1914, woa i bin kirap long heven. Satan na ol ensel nogut i lus long woa na ol ensel bilong God i tromoim ol i go daun long graun. Satan em i belhat nogut tru na em i mekim save moa yet long giamanim olgeta man. (KTH 12:1-9, 12, 17) Em i mekim olgeta samting em inap long mekim bilong “paulim tu ol manmeri God i makim bilong em yet.” (Matyu 24:24) Yumi ol manmeri bilong God i namba wan lain Satan i laik paulim. Em i wok long bagarapim pasin bilong yumi long tingim ol samting bilong spirit na bai Jehova i no orait moa long yumi na yumi lus long kisim laip oltaim.
4. Ol wokboi bilong Jehova i gat wanem tingting long Baibel? Dispela graun i gat wanem tingting long Baibel?
4 Satan i laik daunim tok bilong Baibel, em dispela gutpela buk i save lainim yumi long Man Bilong Wokim yumi. Ol wokboi bilong Jehova i laikim na tingim tru Baibel. Yumi save em Tok Bilong God em spirit bilong Em i kamapim, i no tok bilong ol man. (1 Tesalonaika 2:13; 2 Timoti 3:16) Graun Satan i bosim i laik bai yumi kisim narapela tingting. Olsem: Tok i go pas long wanpela buk i biruaim Baibel i tok: “Baibel i no ‘holi,’ na em i no ‘tok bilong God.’ Ol santu, em spirit bilong God i kirapim ol, ol i no bin raitim Baibel, nogat. Ol pris i laik kisim bikpela nem na namba ol i bin raitim.” Ol man husat i bilipim kain tok olsem inap kisim tingting kranki olsem ol i fri long lotuim God long pasin ol i laikim—o ol i no gat wok long lotuim em.—Sindaun 14:12.
5. (a) Wanpela man bilong raitim buk i tok wanem long lotu Juda na lotu Kristen? (b) Olsem wanem sampela tingting bilong ol man bilong graun long nau i narapela kain long tok bilong Baibel? (Lukim tu blok i stap long neks pes.)
5 Pasin bilong biruaim Baibel long ples klia na long pasin hait, na pasin bilong ol man bilong tupela maus husat i tok ol i sapotim Baibel, dispela i mekim na planti man i no orait long lotu, em ol lotu i save yusim Baibel. Ol niuspepa samting na ol saveman i wok long biruaim lotu. Wanpela man bilong raitim ol buk i tok: “Planti man i no gat gutpela tingting long lotu Juda na lotu Kristen. Sampela i ting ol i bihainim ol tingting bilong bipo; sampela i ting dispela tingting bilong bipo i pasim ol man long kamap bikpela long tingting na i pasim ol man long kisim save long ol samting bilong saiens. Pastaim ol man i pilim olsem lotu em i samting nating, tasol nau ol i tok bilas na mekim pasin birua long lotu.” Planti taim dispela pasin birua i kirap long ol man husat i no bilip olsem God i stap na “tingting bilong ol i kamap longlong.”—Rom 1:20-22.
6. Ol man bilong graun i gat wanem tingting long ol pasin sem God i no orait long en?
6 Olsem na yumi no kirap nogut olsem ol man i wok long go longwe moa long ol pasin God i makim bilong bihainim. Olsem: Baibel i tok pasin bilong ol man long mekim pasin sem wantaim ol narapela man em i “pasin nogut.” (Rom 1:26, 27) Na tu Baibel i tok ol man i save mekim pasin pamuk na trabel long ol maritmeri ol bai i no inap go insait long Kingdom Bilong God. (1 Korin 6:9) Tasol long planti kantri ol man i orait long ol dispela pasin na long ol buk, nius, singsing, TV na vidio ol i kamapim olsem ol dispela pasin em i gutpela tru. Ol man husat i tok ol dispela kain pasin i no gutpela, ol narapela man i tok ol i strong tumas long ol man, na ol i skelim ol, na tingting bilong ol i no stret wantaim gutpela tingting bilong nau. Ol i no ting olsem ol lo bilong God i makim olsem God i tingim ol, nogat. Ol man bilong graun i ting ol dispela lo i olsem ol rotblok i pasim ol long kisim amamas na long mekim laik bilong ol yet.—Sindaun 17:15; Jut 4.
7. Wanem ol askim yumi mas askim yumi yet?
7 Yumi stap namel long ol man ol i wok long strong moa long birua long God, olsem na yumi laik bihainim savepasin na skelim tingting bilong yumi na wanem ol pasin o ol lo yumi ting em i bikpela samting. Em i gutpela sapos yumi tingting gut na beten skelim yumi yet na sekim olsem isi isi yumi no wok long lusim ol lo na tingting bilong Jehova. Ating yumi ken askim yumi yet olsem: ‘Mi save kisim amamas long ol samting em sampela yia i go pinis mi no laik lukim o mekim? Mi save orait liklik long ol pasin God i nolaik tru long en? Mi no ting ol samting bilong spirit em i bikpela samting olsem bipo mi bin tingim? Wokabaut na sindaun bilong mi i soim olsem mi putim ol samting bilong Kingdom i stap namba wan long laip bilong mi?’ (Matyu 6:33) Taim yumi skelim yumi yet olsem, dispela bai helpim yumi long sakim spirit bilong graun.
‘Nogut Yumi Slek na Lusim Olgeta’
8. Olsem wanem man inap lusim Jehova isi isi?
8 Long ol wanwok Kristen, aposel Pol i bin tok: “Dispela tok yumi harim pinis, yumi mas holim strong long tingting na bihainim gut. Nogut yumi slek long bihainim dispela tok na yumi lusim olgeta.” (Hibru 2:1) Wanpela sip i trip na i no bihainim gut rot i no inap kamap long hap em i laik go long en. Sapos wanpela kepten i no tingim gut win na tait, sip bilong em inap trip i go abrusim gutpela pasis na sip i go pas long rip. Olsem tasol, sapos yumi no tingim gut ol gutpela tok i tru bilong Baibel, yumi inap slek na lusim Jehova na bagarap long samting bilong spirit, olsem sip i bruk long rip. Bilong kain bagarap i painim yumi, i no olsem yumi mas sakim tok i tru olgeta. I no gat planti man ol i kirap wantu na long laik bilong ol yet ol i sakim Jehova. Planti taim isi isi ol bai insait long sampela samting i pulim tingting bilong ol na ol i no tingim gut Tok Bilong God. Isi isi tru, ol i kirap mekim sin. Kain olsem wanpela kepten i slip i stap, ol dispela kain man i no kirap kwik na bagarap i painim ol.
9. Jehova i bin givim wanem ol blesing long Solomon?
9 Tingim samting i painim Solomon. Jehova i makim em i stap king bilong Israel. God i larim Solomon i wokim tempel na i kirapim em long raitim sampela hap bilong Baibel. Tupela taim Jehova i toktok wantaim em na givim em planti mani kago, biknem, na bel isi na gutaim i stap taim em i stap king. Na winim ol narapela samting, Jehova i givim bikpela savetingting long Solomon. Baibel i tok: “God i givim planti gutpela tingting na save long Solomon. Em i gat planti save tumas olsem wesan long nambis na man i no inap kaunim. Gutpela tingting na save bilong en i winim save bilong ol saveman bilong hap sankamap na bilong ol saveman bilong Isip.” (1 King 4:21, 29, 30; 11:9) Yumi inap ting olsem Solomon bai stap gut long God, winim ol narapela man. Tasol isi isi Solomon i kirap lotuim ol god giaman. Olsem wanem dispela samting i bin kamap?
10. Wanem tok Solomon i no bin bihainim? Wanem samting i kamap long dispela?
10 Solomon i save gut tru long Lo Bilong God. Yumi ken ting olsem em i bin skelim gut tru ol tok God i givim long ol king bilong Israel long bihainim. Wanpela bilong ol dispela tok em olsem: “I tambu long king i maritim planti meri, long wanem, ol bai i mekim em i givim baksait long Bikpela.” (Lo 17:14, 17) Tasol maski dispela tok i klia tru, Solomon i bin kisim 700 meri na 300 namba tu lain meri. Planti bilong ol dispela meri i save lotuim ol god giaman. Yumi no save long as na Solomon i bin kisim planti meri na yumi no save em i mekim wanem tok bilong kamapim olsem samting em i mekim i stret. Samting yumi save long en i olsem, em i no bihainim tok bilong God. Na hevi i painim em i wankain stret olsem Jehova i bin tok lukaut long en. Baibel i tok: “Ol dispela meri bilong [Solomon] i pulim tingting bilong en i go long ol giaman god.” (1 King 11:4) Isi isi savetingting God i bin givim em i lus. Em i olsem wanpela sip i trip i go. Bihain, laik bilong Solomon long amamasim ol dispela meri haiden i winim laik bilong em long bihainim tok na amamasim God. Sori tru, long wanem, Solomon yet i bin raitim dispela tok: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.”—Sindaun 27:11.
Spirit Bilong Graun i Gat Strong
11. Ol samting yumi putim long tingting i save mekim wanem long tingting bilong yumi?
11 Samting i painim Solomon i lainim yumi olsem yumi no ken ting yumi save long tok i tru, na dispela i mekim na ol tingting bilong dispela graun i no inap paulim tingting bilong yumi. Kaikai tru yumi kisim i save mekim samting long bodi bilong yumi, na olsem tasol ol samting yumi putim long tingting, olsem kaikai bilong tingting, i save mekim samting long tingting bilong yumi. Ol samting yumi putim long tingting i bosim tingting na pasin bilong yumi. Ol bikpela kampani i save long dispela, olsem na ol i tromoi planti bilion dola long olgeta yia bilong grisim ol man long baim ol samting bilong ol. Ol i save yusim ol tok na ol piksa i kleva tru long kirapim laik bilong ol man long baim samting. Ol i save i no inap ol man i lukim ol dispela tok na piksa wanpela o tupela taim tasol na nau ol bai hariap long baim samting. Nogat. Tasol taim ol man i lukim planti taim, dispela i mekim na ol i gat laik long baim dispela samting. Ol dispela toksave bilong kampani i save wok—sapos nogat, ol bai i no inap tromoi bikpela mani long kamapim ol. Em i gat bikpela strong long pulim na bosim tingting na pasin bilong ol man.
12. (a) Satan i save pulim o bosim tingting bilong ol man long wanem rot? (b) Wanem samting i soim olsem em inap pulim tingting bilong ol Kristen?
12 Olsem kampani i mekim tok gris bilong kirapim ol man long baim samting, Satan i save kamapim tingting bilong em long ol rot we i luk nais na em samting bilong amamas. Em i save, isi isi em inap kirapim ol man long bihainim tingting bilong em. Long rot bilong ol samting bilong painim amamas na long ol narapela rot tu, Satan i giamanim ol man na kirapim ol long bilip olsem gutpela samting em i nogut, na samting nogut em i gutpela. (Aisaia 5:20) Na tu, wok bilong Satan long giamanim ol man i bin pundaunim sampela Kristen tru. Baibel i tok lukaut olsem: “Holi Spirit i tok klia olsem, long dispela taim i laik kamap bihain sampela man bai i lusim bilip bilong ol, long wanem, ol bai i putim yau long tok bilong ol spirit bilong giaman na ol spirit nogut na bihainim tok bilong ol. Ol man bilong giaman bai i autim dispela tok giaman long ol manmeri. Tingting bilong ol dispela man i paul tru, na ol i no pilim moa sin bilong ol.”—1 Timoti 4:1, 2; Jeremaia 6:15.
13. Wanem samting o husat i olsem ol poroman nogut? Ol poroman i save mekim wanem long yumi?
13 Spirit bilong graun inap pulim yumi olgeta. Ol win na tait bilong dispela graun Satan i bosim i gat strong. Baibel i tokim yumi olsem: “Yupela i no ken larim ol arapela man i giamanim yupela. . . . ‘Sapos yumi poroman wantaim ol man nogut, bai ol i bagarapim gutpela pasin bilong yumi.’ ” (1 Korin 15:33) Olgeta kain samting na olgeta man inap i stap olsem poroman nogut—insait long kongrigesen tu—sapos ol i bihainim spirit bilong graun. Sapos yumi tok pasin bilong poromanim ol man nogut i no inap bagarapim yumi, orait yumi mas tok pasin bilong poromanim ol gutpela man i no inap helpim yumi. Em i stret? Nogat! Em i no stret! Baibel i tokaut klia long dispela, em i tok: “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.”—Sindaun 13:20.
14. Long wanem ol rot yumi inap sakim spirit bilong graun?
14 Bilong sakim spirit bilong graun, yumi mas poroman wantaim ol man i gat gutpela tingting—ol man i mekim wok bilong Jehova. Yumi mas tingting long ol samting i save strongim bilip bilong yumi. Aposel Pol i tok: “Oltaim yupela i mas tingting tasol long ol pasin i tru na ol pasin i gutpela long ol man i mekim na ol stretpela pasin na ol klinpela pasin na ol naispela samting na ol samting i gutpela tru na olgeta pasin i nambawan tru na olgeta pasin yumi save amamas tru long lukim ol man i mekim.” (Filipai 4:8) Yumi stap fri long makim wanem samting yumi laik mekim, olsem na yumi ken makim ol samting yumi laik tingting long en. Gutpela sapos olgeta taim yumi tingting long ol samting em bai helpim yumi long i go klostu moa long Jehova.
Spirit Bilong God i Strong Moa
15. Olsem wanem ol Kristen long taun Korin bilong bipo ol i narapela kain long ol narapela man bilong dispela taun?
15 Holi spirit bilong God i save stiaim ol Kristen tru na ol i narapela kain long ol man em spirit bilong graun i giamanim ol. Pol i tokim kongrigesen long Korin: “Mipela i no bin kisim spirit bilong dispela graun. Nogat. Mipela i kisim Spirit i kam long God, bai mipela i ken save long olgeta presen God i bin givim long mipela.” (1 Korin 2:12) Spirit bilong graun i pulap long taun Korin bilong bipo. Ol man long dispela hap i insait tru long pasin pamuk, olsem na taim ol man i tok “mekim olsem ol Korin,” mining bilong en i olsem “mekim pasin pamuk.” Satan i bin pasim tingting bilong ol dispela man. Olsem na ol i no save liklik o ol i gat liklik save tasol long God tru. (2 Korin 4:4) Tasol long rot bilong holi spirit, Jehova i opim ai bilong sampela Korin, na ol i kisim save long tok i tru. Spirit bilong em i kirapim na stiaim ol long kamapim ol bikpela senis long laip bilong ol na bai Jehova i ken orait long ol na blesim ol. (1 Korin 6:9-11) Spirit bilong graun em i strong, tasol spirit bilong Jehova em i strong moa.
16. Olsem wanem yumi inap kisim na holimpas spirit bilong God?
16 Em i wankain long nau. Holi spirit bilong Jehova i gat bikpela strong, winim strong bilong olgeta narapela samting long heven na graun. Na em i save givim nating holi spirit long ol man i bilip na askim em long givim. (Luk 11:13) Bilong kisim spirit bilong God yumi mas sakim spirit bilong graun na mekim narapela samting tu. Yumi mas stadi oltaim long Tok Bilong God na bihainim tok bilong en long laip bilong yumi na bai spirit bilong yumi—olsem tingting bilong yumi—i wanbel long tingting bilong Em. Sapos yumi mekim olsem, orait Jehova bai strongim yumi long sakim ol samting Satan i mekim bilong bagarapim yumi long samting bilong spirit.
17. Olsem wanem samting i bin painim Lot inap mekim isi bel bilong yumi?
17 Ol Kristen i no bilong dispela graun, tasol ol i stap namel long ol man bilong dispela graun. (Jon 17:11, 16) Yumi no inap abrusim spirit bilong graun olgeta, long wanem, yumi wok wantaim o sindaun wantaim ol man husat i no laikim God na ol pasin bilong em. Lot i bin stap namel long ol Sodom. Olsem wanem? Yumi pilim wankain olsem Lot, em i “bel hevi tru” na bel bilong em i pen tru long ol pasin bilong sakim lo ol man bilong Sodom i mekim? (2 Pita 2:7, 8) Sapos olsem, bel bilong yumi ken i stap isi. Jehova i bin lukautim na kisim bek Lot, na em inap mekim wankain samting long yumi. Gutpela Papa i lukim na em i save long sindaun bilong yumi, na em inap helpim na strongim yumi long i stap strong long samting bilong spirit. (Song 33:18, 19) Sapos yumi wetim em, trastim em, na singaut long em, em bai helpim yumi long sakim spirit bilong graun, maski sindaun bilong yumi i gat bikpela hatwok.—Aisaia 41:10.
18. Bilong wanem yumi mas tingim tru pasin bilong yumi long pas gut wantaim Jehova?
18 Ol manmeri bilong dispela graun i stap longwe long God na Satan i giamanim ol, tasol yumi ol manmeri bilong Jehova i save long tok i tru, em wanpela blesing. Olsem na yumi kisim wanpela kain amamas na bel isi ol man bilong dispela graun i no gat. (Aisaia 57:20, 21; Galesia 5:22) Yumi pilim tru samting yumi wetim—laip oltaim long Paradais—long dispela hap spirit bilong graun bai i no stap long en. Yumi mas tingim tru pasin bilong yumi long pas gut wantaim God na strong long stretim ol pasin i wok long mekim na isi isi yumi lusim samting bilong spirit. Yumi laik i go klostu moa long Jehova, na em bai helpim yumi long sakim spirit bilong graun.—Jems 4:7, 8.
Yu Inap Stori Long Dispela?
• Satan i bin mekim wanem bilong giamanim ol man?
• Yumi mas mekim wanem na bai yumi no lusim Jehova isi isi?
• Wanem samting i soim olsem spirit bilong graun i gat bikpela strong?
• Olsem wanem yumi inap kisim na holimpas spirit i kam long God?
[Sat long pes 11]
SAVETINGTING BILONG GRAUN—SAVETINGTING BILONG GOD
No gat wanpela tok i tru olgeta—man wan wan inap makim wanem tok i tru.
“Tok bilong yu [God] i tru olgeta.”—Jon 17:17.
Bilong save long wanem samting i stret na wanem samting i no stret, bihainim tingting bilong bel.
“Bel bilong olgeta man i save tingting oltaim long mekim pasin giaman. Tingting bilong man em i nogut tru.”—Jeremaia 17:9.
Mekim ol samting yu yet yu laik mekim.
“Mipela man i no inap bosim wokabaut bilong mipela yet na bihainim ol rot mipela i laikim.”—Jeremaia 10:23.
As tru bilong amamas em bilong holim planti samting bilong skin.
“Pasin bilong laikim tumas mani em i as bilong olgeta pasin nogut.”—1 Timoti 6:10.
[Piksa long pes 10]
Isi isi Solomon i lusim lotu i tru na em i kirap lotuim ol god giaman
[Piksa long pes 12]
Olsem kampani i mekim tok gris bilong kirapim ol man long baim samting, Satan i save grisim ol man long insait long spirit bilong graun. Olsem wanem? Yu save sakim?