Ripot Long Wok Bilong Kingdom

Painim Ol Man Long Ples Wok Bilong Ol

WANEM samting bilong ol aposel Matyu, Pita, Andru, Jems, na Jon, em i wankain? Jisas i bin singautim ol taim ol i stap long ples wok bilong ol. Pita, Andru, Jems na Jon i bin bisi long wok bisnis bilong ol long kisim pis taim Jisas i singautim ol, em i tok: ‘Yupela kam bihainim mi.’ Matyu i bin stap long ofis bilong baim takis taim Jisas i singautim em long kamap disaipel bilong em.​—⁠Matyu 4:​18-21; 9:⁠9.

Autim tok long ol man long ples wok bilong ol inap kamapim ol gutpela samting. Ol Witnes Bilong Jehova long Japan i luksave long dispela, na i no longtaim i go pinis na ol i bin stretim rot bilong autim tok long ol man long ples wok. Wanem samting i bin kamap? Insait long sampela mun tasol, ol i mekim planti tausen gobek na kirapim 250 samting Baibel stadi. Tingim ol dispela ekspiriens i bin kamap.

Wanpela man bilong autim tok fultaim long Tokyo i bungim wanpela maneja bilong wanpela haus kaikai husat i bin toktok wantaim wanpela Witnes taim em i skulmangi inap 30 yia i go pinis. Maski maneja i no kliagut long samting Witnes i stori long em long dispela taim bipo, em i kirap long laikim tok bilong Baibel. Nau dispela laik bilong em i kirap gen, na em i amamas long stadi long Baibel long rot bilong buk Save i Bringim Man Long Laip Oltaim.a Na tu, em i kirapim wanpela sediul bilong em yet bilong ritim Baibel long olgeta nait paslain long em i slip.

Wanpela painia salim i go long wanpela ofis. Maneja i no stap, tasol yangpela meri i bekim telefon bilong maneja i askim Witnes: “Yu laik toktok wantaim mi?” Tupela i toktok liklik long telefon, na meri i kam ausait na tok em i gat laik long ritim Baibel. Painia salim i stretim rot long go bek wantaim wanpela Baibel na kirapim Baibel stadi wantaim em, na ol i stadi long wanpela pak klostu long ples wok, long moningtaim paslain long meri i go long wok.

Long narapela ofis, wanpela man i lukim wanwok bilong em i kisim Wastaua na Kirap!, tasol wantu em i tromoi tupela nius taim Witnes i lusim ofis. Taim dispela man i go long haus em i tokim meri bilong em husat i Witnes long samting i bin kamap, na em i tok sapos Witnes i bin toktok long em, em bai harim liklik. Pikinini meri bilong em i harim hait stori bilong em na i stori long dispela samting long wanpela Witnes i save autim tok long dispela bisnis teritori. Wantu Witnes i go long ofis em man bilong sista i wok long en na kirapim Baibel stadi wantaim em. I no longtaim na em i kirap go long ol miting long olgeta Sande.

Autim tok long ples wok i kamapim ol narapela gutpela samting tu. Planti pablisa long Japan i kamap saveman bilong mekim ol gobek long ol stua, faktori, na ol ofis. Na tu, long dispela rot bilong autim tok ol i bungim planti manmeri em ol i bin lusim wok autim tok na kirapim stadi wantaim ol. Gutpela samting tru i bin kamap. I no longtaim i go pinis na wanpela kongrigesen long sentral Tokyo i bin mekim 108 Baibel stadi. Dispela namba em i dabol long yia i go pinis.

[Futnot]