Askim

Taim bilong kisim kaikai bilong gaden i kirap long taim olgeta man Israel i stap long bung bilong Ol Bikpela De Bilong Bret i No Gat Yis, olsem na husat i kisim namba wan bali long gaden na bringim i kam long haus bilong God?

Lo Bilong Moses i tokim ol Israel: “Tripela taim long wanpela yia olgeta man tasol bilong yupela i mas i kam lotu long Bikpela long dispela wanpela ples bilong lotu. Dispela tripela taim i olsem, Ol Bikpela De Bilong Bret I No Gat Yis, na Bikpela De Bilong Amamas Long Kisim Kaikai Long Gaden, na Ol Bikpela De Bilong I Stap Long Haus Win.” (Lo 16:16) Kirap long taim bilong King Solomon, ples God i makim em tempel long Jerusalem.

Namba wan bilong dispela 3-pela bung bilong lotu i kamap long mun Mas o Epril. Em i bung bilong Ol Bikpela De Bilong Bret i No Gat Yis, na em i kirap long de bihain long ol i wokim Pasova long Nisan 14 na i stap 7-pela de i go inap long Nisan 21. Namba 2 de bilong dispela bung, em Nisan 16, i makim kirap bilong namba wan taim bilong yia long kisim kaikai long gaden, olsem kalenda bilong lotu i makim. Long dispela de, hetpris i mas kisim “namba wan mekpas” bali na “mekim i go i kam long ai bilong [God]” long haus lotu. (Wok Pris 23:​5-​12) Lo i tok olgeta man i mas i stap long dispela bung, olsem na husat i save kisim bali bilong mekim dispela ofa?

Dispela tok long givim namba wan kaikai bilong gaden long Jehova olsem ofa long Ol Bikpela De Bilong Bret i No Gat Yis, i go long lain Israel olgeta. Lo i no tok olgeta wan wan i mas kirapim wok bilong kisim kaikai bilong gaden na bringim namba wan kaikai long haus lotu, olsem ofa bilong em yet, nogat. Ol i mas makim sampela tasol bilong lain Israel long mekim olsem. Olsem na ol i ken salim sampela man i go long wanpela gaden bali i stap klostu long Jerusalem bilong katim mekpas bali bilong dispela Ol Bikpela De Bilong Bret i No Gat Yis. Buk Encyclopaedia Judaica i tok long dispela olsem: “Sapos bali i redi pinis, ol i save kisim long gaden i stap klostu long Jerusalem; sapos nogat, ol inap kisim long narapela hap bilong Israel. Tripela man i save katim, na olgeta wan wan i gat naip na basket bilong em yet.” Orait nau ol i bringim wanpela mekpas bali i kam long hetpris, na em i givim olsem ofa long Jehova.

Dispela lo long ol Israel i mas kisim namba wan kaikai bilong gaden na givim olsem ofa, em i gutpela rot bilong ol Israel i ken tok tenkyu long God long em i bin mekim gut long graun na kaikai bilong gaden bilong ol. (Lo 8:​6-​10) Tasol samting i bikpela moa, dispela ofa ol i mekim long bikpela de bilong lotu em i ‘piksa bilong ol gutpela samting i laik kamap bihain.’ (Hibru 10:⁠1) Jisas i bin kirap bek long matmat long Nisan 16 bilong 33 C.E., em de bilong ofaim namba wan kaikai bilong gaden long Jehova. Aposel Pol i tok long Jisas olsem: “Krais i dai pinis, na tru tumas God i bin kirapim em bek. Em i kirap paslain long ol arapela man i dai pinis, olsem namba wan kaikai i redi long gaden. . . . Tasol yumi olgeta bai yumi kirap bek na kisim laip long taim bilong yumi yet. Namba wan em Krais. Na bihain, taim em i kam bek, yumi olgeta lain bilong en bai yumi kirap bek.” (1 Korin 15:​20-​23) Dispela namba wan mekpas bali em hetpris i mekim i go i kam long ai bilong Jehova, i olsem piksa na i makim Jisas Krais i kirap bek pinis​—⁠em namba wan man bilong kirap bek long matmat bilong kisim laip i stap oltaim oltaim. Olsem na Jisas i opim rot bambai ol manmeri bilong graun i ken lusim kalabus bilong sin na indai.

[Piksa Kredit Lain long pes 26]

© 2003 BiblePlaces.com