Askim

Baptais bilong helpim man i dai pinis em wanem samting?

Taim aposel Pol i stori long kirap bek na kisim laip long heven, em i tok: “Sapos ol man i dai pinis, ol i no inap kirap bek, orait long wanem as tru sampela man i save kisim baptais bilong helpim ol man i dai pinis? Sapos ol i no inap kirap bek, orait bilong wanem ol man i save kisim baptais bilong helpim ol?”​​—⁠1 Korin 15:⁠29.

Olsem wanem? Tok bilong Pol i makim olsem ol man i stap laip ol inap kisim baptais bilong helpim ol man i dai pinis em ol i no bin baptais? Long Buk Baibel na sampela Baibel moa ating yumi inap kisim kain tingting olsem. Tasol taim yumi skelim gut sampela ves moa long Baibel, na tok Grik Pol i yusim long raitim Baibel, yumi kisim save olsem tok bilong Pol i no makim dispela samting. Tok bilong em i makim olsem ol Kristen, em God i bin makim ol long spirit holi, ol i baptais, o go insait tru, long rot bilong holimpas bilip i go inap long ol i dai, olsem Krais i bin mekim. Bihain, ol bai kirap bek na kisim laip long heven olsem em i bin mekim.

Baibel i strongim dispela tingting. Long pas Pol i salim long ol Rom, em i tok: “Yumi bin pas wantaim Krais Jisas na kisim baptais, na long dispela pasin yumi olgeta i bin pas wantaim dai bilong em.” (Rom 6:⁠3) Long pas em i salim long ol Filipai, Pol i tok long em yet olsem: “Mi laik poromanim [Krais] long pasin bilong karim pen. Na mi laik holim wankain tingting olsem em i bin holim long taim em i dai, na mi ting mi tu mi bai kirap bek long matmat.” (Filipai 3:​10, 11) Pol i laik tok olsem ol disaipel bilong Krais God i bin makim, ol i go insait long wanpela rot we ol i mas holimpas bilip taim traim i painim ol​—⁠dai tu inap painim ol long olgeta de⁠—na bihain ol bai dai, na kirap bek na kisim laip long heven.

Ol dispela skripsa na sampela skripsa moa, em ol i stori long dai na ol man i bin kisim baptais, ol i stori long ol man i stap laip ol i baptais pinis na i no long ol man i dai pinis. Pol i givim dispela tok tu long ol wanlain Kristen God i bin makim: “Long taim yupela i kisim baptais, yupela i pas wantaim Krais, na God i planim yupela long matmat wantaim Krais. Na yupela i bilip long wok God i bin mekim bilong kirapim Krais long matmat, na long taim yupela i kisim baptais em i kirapim bek yupela wantaim Krais.”​​—⁠Kolosi 2:​12.

Hap tok Grik hy·perʹ, em long 1 Korin 15:29 long sampela Baibel ol i tanim olsem “bilong helpim,” yumi ken tanim tu olsem “bilong kamap.” Baibel New World Translation of the Holy Scriptures i tanim dispela ves na bai i stret wantaim ol narapela ves, olsem na ol i tanim stret olsem: “Long wanem as na sampela man i kisim baptais bilong kamap man i dai pinis? Sapos ol man i dai pinis i no inap kirap bek, bilong wanem ol i kisim baptais bilong kamap man i dai pinis?”