Ol Kristen i Mas Kamapim Glori Bilong Jehova
“Yupela i ken amamas. Ai bilong yupela i save lukim ol samting. Na yau bilong yupela i save harim tok.”—MATYU 13:16.
1. Taim yumi tingim pasin ol Israel i bin mekim long Moses long maunten Sainai, dispela i kamapim wanem askim?
LAIN Israel i bung long maunten Sainai na i gat as tru long ol i go klostu long Jehova. Em i bin kisim bek ol long han bilong kantri Isip. Em i bin lukautim ol long kaikai na wara long ples drai nating. Bihain, em i helpim ol long winim ami bilong ol Amalek. (Kisim Bek 14:26-31; 16:2–17:13) Taim ol i kem long ples drai nating klostu long maunten Sainai, klaut i pairap na laitning i sut nabaut na ol i pret nogut tru na guria i stap. Bihain ol i lukim Moses i lusim maunten Sainai i kam daun, na pes bilong em i kamapim glori bilong Jehova na i lait. Tasol ol Israel i no ting em i gutpela samting na ol i tingim glori bilong God, nogat, ol i surik long Moses. “Ol i pret na ol i no laik i go klostu long [Moses].” (Kisim Bek 19:10-19; 34:30) Bilong wanem ol i pret long lukim glori bilong Jehova, em Man i bin mekim planti samting bilong helpim ol?
2. Yu ting bilong wanem ol Israel i pret long lukim glori bilong God em pes bilong Moses i kamapim?
2 I luk olsem as na ol Israel i pret em ol samting i bin kamap long ol paslain liklik long dispela taim. Taim ol i bikhet na wokim wanpela bulmakau gol, God i givim strafe long ol. (Kisim Bek 32:4, 35) Olsem wanem? Ol i larim dispela strafe i skulim ol na ol i amamas long kisim? Nogat, klostu olgeta i no tingim dispela samting. Klostu long taim em i laik dai, Moses i kamapim gen ol samting i bin kamap long taim ol i bin wokim dispela bulmakau gol na ol narapela taim ol Israel i bin bikhet. Em i tokim ol olsem: “Yupela i sakim tok bilong em, na yupela i no bilipim em o bihainim tok bilong em. Nogat tru. Long taim mi stat long wok wantaim yupela i kam inap nau, yupela i save bikhet long God.”—Lo 9:15-24.
3. Moses i save bihainim wanem kain pasin long haitim pes bilong em?
3 Tingim samting Moses i mekim taim ol Israel i pret. Baibel i tok: “Moses i tokim ol pinis, orait em i kisim hap laplap na i haitim pes bilong en. Tasol taim Moses i go insait long haus sel bilong toktok wantaim Bikpela, em i save rausim dispela hap laplap inap em i kam ausait gen. Em i kam ausait pinis, orait em i tokim ol manmeri long olgeta samting Bikpela i bin tokim em. Na ol manmeri i lukim pes bilong Moses i lait. Moses i tokim ol pinis, orait em i save haitim pes inap long taim em i go bek bilong toktok gen wantaim Bikpela.” (Kisim Bek 34:33-35) Bilong wanem Moses i haitim pes sampela taim? Yumi inap kisim wanem save long dispela? Bekim bilong dispela tupela askim i ken helpim yumi long skelim pasin bilong yumi long pas gut wantaim Jehova.
Ol i Lus Long Mekim Samting
4. Aposel Pol i kamapim wanem mining bilong pasin bilong Moses long haitim pes?
4 Aposel Pol i tok as na Moses i mas haitim pes em samting bilong tingting na bel bilong ol Israel yet. Pol i tok: “Pes bilong Moses i lait tumas, na ol Israel i no inap lukluk long pes bilong en . . . Tingting bilong ol Israel i pas tru.” (2 Korin 3:7, 14) Tarangu! Jehova i bin makim lain Israel olsem lain bilong em yet, na em i laik bai ol i kam klostu long em. (Kisim Bek 19:4-6) Tasol ol i no laik lukluk long glori bilong God. Long bel na tingting ol i no kirap givim bel long lotuim Jehova, i kain olsem ol i givim baksait long em.
5, 6. (a) Wanem samting i bin kamap long taim bilong ol aposel na dispela i kain olsem samting i bin kamap long ol Israel long taim bilong Moses? (b) Olsem wanem ol man i harim tok bilong Jisas i narapela kain long ol man i no bin harim tok?
5 Samting i wankain i bin kamap long taim bilong ol aposel. Taim Pol i kamap Kristen, nupela kontrak i senisim pinis kontrak bilong Lo. Jisas Krais, em Man i Winim Moses, em i namelman bilong dispela nupela kontrak. Long toktok na pasin, Jisas i kamapim tru glori bilong Jehova. Pol i stori long Jisas, em i kirap bek pinis, olsem: “Dispela Pikinini em i soim bikpela lait bilong God na em i lait moa yet long yumi, na em i wankain tru olsem God yet.” (Hibru 1:3) Ol Juda i gat bikpela samting ol inap mekim! Ol inap harim Pikinini Bilong God yet i stori long tok bilong givim laip oltaim! Tasol sori tru, klostu olgeta man Jisas i bin autim tok long ol, ol i no harim. Jisas i stori long ol na em i kolim tok profet Jehova i bin kamapim long Aisaia: “Bel bilong dispela lain manmeri i pas pinis, na yau bilong ol i les long harim toktok, na ol i pasim pinis ai bilong ol, nogut ai bilong ol i lukim wanpela samting, na yau bilong ol i harim tok, na bel bilong ol i save long as bilong tok, na ol i tanim bel na kam bek long mi na mi mekim ol i kamap orait gen.”—Matyu 13:15; Aisaia 6:9, 10.
6 Pasin bilong ol Juda na pasin bilong ol disaipel bilong Jisas i narapela kain tru. Jisas i stori long ol disaipel olsem: “Yupela i ken amamas. Ai bilong yupela i save lukim ol samting. Na yau bilong yupela i save harim tok.” (Matyu 13:16) Ol Kristen tru i gat bikpela laik long save long Jehova na mekim wok bilong em. Ol i amamas long mekim laik bilong em, em dispela laik Baibel i kamapim. Long dispela as ol Kristen God i bin makim ol i kamapim glori bilong Jehova long ol wok Kristen bilong nupela kontrak bilong ol, na lain arapela sipsip i save mekim wankain samting.—2 Korin 3:6, 18.
As na Sampela i No Klia Long Gutnius
7. Bilong wanem yumi no kirap nogut olsem klostu olgeta man i sakim gutnius?
7 Olsem yumi lukim pinis, long taim bilong Jisas na long taim bilong Moses, klostu olgeta Israel i bin sakim gutpela samting ol inap mekim. Em i wankain long taim bilong yumi. Klostu olgeta man i sakim gutnius yumi autim. Yumi no kirap nogut long dispela. Pol i tok: “Sapos sampela lain i no klia long as bilong dispela gutnius mipela i save autim, em ol dispela lain i stap long rot bilong hel [“bagarap,” NW ] tasol. Satan, em giaman god bilong dispela graun, em i bin pasim tingting bilong ol dispela man i no bilip.” (2 Korin 4:3, 4) Satan i wok long haitim gutnius, na planti man i haitim gutnius long ol yet, long wanem, ol i no laik harim.
8. Olsem wanem tingting bilong planti manmeri i pas? Yumi ken mekim wanem na dispela samting i no painim yumi?
8 Tingting bilong planti manmeri i pas, long wanem, ol i no save long gutnius. Baibel i tok long ol manmeri bilong dispela graun olsem “save bilong ol i olsem tudak. Ol i no gat save tru, na bel bilong ol i pas, olsem na ol i stap ausait long laip bilong God.” (Efesus 4:18) Pol, em wanpela man i save gut long Lo, na paslain long em i kamap Kristen, em i no gat trupela save na tingting bilong em i pas, na dispela i mekim na em i mekim nogut long kongrigesen bilong God. (1 Korin 15:9) Tasol Jehova i bin kamapim tok i tru long em. Pol i tok: “Jisas Krais i laik bai olgeta manmeri i ken save gut olsem, em i man bilong isi tru long ol man bilong mekim sin. Olsem na em i sori long mi pastaim, na mi stap olsem piksa, bai olgeta manmeri i ken lukim samting em i bin mekim long mi, na ol tu ol i ken bilip long em na kisim laip i stap gut oltaim oltaim.” (1 Timoti 1:16) Wankain olsem Pol, planti man husat bipo ol i biruaim tok i tru bilong God nau ol i mekim wok bilong Em. Dispela em i gutpela as na yumi wok yet long autim tok long ol man i birua long yumi. Pasin bilong stadi oltaim long Baibel na kisimgut mining bilong en, bai pasim yumi long mekim samting yumi no save em i no stret na nau Jehova i no amamas long yumi.
9, 10. (a) Ol Juda long taim bilong ol aposel i bin mekim wanem na dispela i soim olsem tingting bilong ol i pas na ol i no gat laik long lain? (b) Olsem wanem? I gat wankain samting i kamap insait long Kristendom long nau? Stori long dispela.
9 Planti man i no kliagut long ol samting bilong spirit, long wanem, tingting bilong ol i pas na ol i no gat laik long lain. Planti Juda i sakim Jisas na skul em i givim long ol man, long wanem, ol i strong long bihainim Lo Bilong Moses. Tasol i no olgeta man i gat dispela tingting. Olsem: Bihain long Jisas i kirap bek, “planti pris tu ol i bihainim tok bilong God na ol i bilip.” (Aposel 6:7) Tasol maski i olsem, Pol i stori long klostu olgeta Juda, olsem: “Yes, olgeta taim ol i ritim lo bilong Moses, i gat hap laplap i pasim tingting bilong ol, i kam inap long nau.” (2 Korin 3:15) Pol i save long tok Jisas i bin givim long ol hetman bilong lotu Juda: “Yupela i ting tok i stap long buk bilong God i save givim yupela laip i stap gut oltaim oltaim. Olsem na yupela i save wok long ritim na skelim olgeta tok i stap long buk bilong God. Tasol buk bilong God tu i save tokaut long mi.” (Jon 5:39) Ol skripsa ol i wok long ritim na skelim i mas helpim ol long luksave olsem Jisas em i Mesaia. Tasol ol Juda i gat tingting bilong ol yet, na Pikinini Bilong God husat i wokim ol mirakel, em yet i no inap senisim tingting bilong ol.
10 I wankain long planti manmeri insait long Kristendom long nau. Olsem ol Juda long taim bilong ol aposel, “ol i strong tumas long bihainim pasin God i laikim. Tasol ol i no klia gut long laik tru bilong God, na ol i mekim.” (Rom 10:2) Maski sampela i stadi long Baibel, ol i no laik bilipim tok bilong en. Ol i no laik bilip olsem Jehova i yusim lain wokboi i gat gutpela tingting, em God i makim ol long holi spirit, long skulim ol manmeri bilong em. (Matyu 24:45) Yumi kliagut olsem Jehova i wok long skulim ol manmeri bilong em na isi isi ol i kisim save long tok i tru bilong God. (Sindaun 4:18) Yumi larim Jehova i skulim yumi, na long dispela rot yumi kisim save long laik bilong em na long samting em i tingting pinis long mekim.
11. Olsem wanem pasin bilong bilip tasol long ol samting yu gat laik long bilipim i wok long haitim tok i tru?
11 Sampela i save bilip tasol long ol samting ol i gat laik long bilipim, na dispela i pasim tingting bilong ol. Baibel i tok profet olsem sampela man bai tok bilas long ol manmeri bilong God na long tok ol i autim long Jisas i kam i stap pinis. Aposel Pita i tok: “Ol i no laik tingting gut na save long dispela samting,” olsem God i kamapim bikpela tait wara long graun long taim bilong Noa. (2 Pita 3:3-6) Na long wankain pasin, planti man husat ol i tok ol i Kristen ol i bilip olsem Jehova i save kamapim pasin marimari, gutpela pasin, na lusim rong bilong man; tasol ol i no tingim o ol i no bilipim olsem Jehova bai mekim save long ol man i gat asua. (Kisim Bek 34:6, 7) Ol Kristen tru i save wok strong long kliagut long ol tok Baibel i mekim.
12. Olsem wanem ol pasin tumbuna i bin pasim tingting bilong ol man?
12 Pasin tumbuna i save pasim tingting bilong planti man husat i go long lotu. Long ol lida bilong lotu long taim bilong em, Jisas i bin tok: “Long dispela pasin yupela i save daunim tok bilong God na litimapim pasin yupela i bin kisim long ol tumbuna.” (Matyu 15:6) Ol Juda i givim bel long kamapim bek lotu i tru taim ol i lusim kalabus long Babilon na ol i go bek long ples, tasol ol pris i kisim pasin antap na ol i tingim ol yet i stretpela man. Ol i kirap mekim nating ol bikpela de bilong lotu, ol i no givim biknem long God. (Malakai 1:6-8) Long taim bilong Jisas, ol saveman na ol Farisi i bin putim planti lo bilong ol tumbuna i go insait long Lo Bilong Moses. Jisas i tokaut klia olsem ol dispela man ol i man bilong tupela maus bikos ol i no inap luksave long ol stretpela stiatok, em ol i stap olsem as bilong Lo. (Matyu 23:23, 24) Ol Kristen tru i mas was gut na no ken larim ol lo bilong lotu bilong ol tumbuna, em ol man i kamapim, long pasim ol long mekim lotu i klin na tru.
“Mekim Wankain Pasin Olsem Man i Bin Lukim God”
13. Moses i bin lukim sampela hap glori bilong God long wanem tupela rot?
13 Taim em i stap long maunten Moses i askim long lukim glori bilong God, na em i lukim hap glori bilong Jehova. Taim em i go insait long haus lotu sel em i no save pasim laplap long pes. Moses i bilip tru long God na em i laik tru long mekim laik bilong Em. Tru em i bin lukim hap glori bilong Jehova long driman samting, tasol paslain long dispela em i bin lukim God long ai bilong bilip. Baibel i tok Moses “i mekim wankain pasin olsem man i bin lukim God, na em i stap strong tru.” (Hibru 11:27; Kisim Bek 34:5-7) Pes bilong em i bin lait inap haptaim na dispela i kamapim glori bilong God, tasol tu em i kamapim glori bilong God taim em i wok long helpim ol Israel long save long Jehova na lotuim em.
14. Olsem wanem Jisas i bin lukim glori bilong God? Jisas i gat bikpela laik long mekim wanem?
14 Long heven, paslain long taim God i bin wokim ol samting bilong ples antap, Jisas i bin lukim stret glori bilong God. (Sindaun 8:22, 30) Insait long dispela bikpela haptaim, pasin bilong laikim tru narapela i kamap namel long tupela. God Jehova i bin kamapim olsem em i laikim tru dispela Pikinini em i bin wokim paslain long olgeta narapela samting. Jisas i mekim wankain samting na em i tokaut long em i laikim tru God, Man i bin givim laip long em. (Jon 14:31; 17:24) Bikpela pasin laikim i stap namel long Papa na Pikinini. Olsem Moses, Jisas i amamas long kamapim glori bilong Jehova long ol samting em i lainim ol man long en.
15. Ol Kristen i mekim wanem bilong tingim glori bilong God?
15 Olsem Moses na Jisas, ol Witnes bilong God long nau hia long graun ol i laik tru long tingim glori bilong Jehova. Ol i no bin givim baksait long gutnius. Aposel Pol i tok: “Sapos man i tanim bel i go long Bikpela [bilong mekim laik bilong em], orait God i save rausim dispela hap laplap i bin pasim tingting bilong en.” (2 Korin 3:16) Yumi save stadi long Baibel bikos yumi laik mekim laik bilong God. Jisas Krais em i Pikinini Bilong Jehova na King God i makim pinis, na yumi amamas long glori pes bilong em i kamapim, na yumi laik bihainim pasin bilong em. Olsem Moses na Jisas, yumi kisim gutpela wok bilong autim tok, na lainim ol narapela long dispela gutpela God yumi save lotuim.
16. Bilong wanem em i wanpela gutpela samting yumi save long tok i tru?
16 Jisas i beten olsem: “Papa, . . . mi tenkyu long yu, long wanem, yu bin haitim ol dispela samting long ol man i gat gutpela tingting na save, na yu bin soim long ol man i stap olsem ol liklik pikinini tasol.” (Matyu 11:25) Jehova i save helpim ol man i gat gutpela bel na pasin daun long kliagut long ol samting em i tingting pinis long mekim na long ol pasin bilong em. (1 Korin 1:26-28) Em i save lukautim yumi, na em i save skulim yumi long mekim ol samting i save helpim yumi long stap gut tru. Yumi laik mekim wok long olgeta samting em inap helpim yumi long i go klostu long Jehova, na amamas long ol samting em i givim bilong helpim yumi long save gut tru long em.
17. Olsem wanem yumi inap save moa yet long ol pasin bilong Jehova?
17 Pol i tokim ol Kristen God i bin makim: “Yumi olgeta, yumi no gat samting i haitim pes bilong yumi. Olsem na bikpela lait [“glori,” NW ] bilong Bikpela i kam long yumi, na yumi kamap olsem glas bilong lukluk i save sutim dispela lait [“glori,” NW ] i go long ol arapela manmeri. Oltaim yumi save kisim dispela lait [“glori,” NW ] moa moa yet, na dispela i senisim yumi, na yumi kamap olsem piksa bilong Bikpela yet.” (2 Korin 3:18) Maski yumi bai kisim laip long heven o long graun, taim yumi save moa long Jehova—ol pasin bilong em olsem Baibel i kamapim—yumi wok long kamap wankain olsem em. Sapos yumi tingim tru laip, wok autim tok, na ol samting Jisas Krais i bin skulim ol man long en, orait bai yumi kamapim moa yet ol pasin bilong Jehova. Yumi kisim bikpela amamas long save olsem yumi givim biknem long God bilong yumi, em glori bilong em yumi gat laik long kamapim!
Yu Inap Tingim?
• Bilong wanem ol Israel i pret long lukim glori bilong God em pes bilong Moses i kamapim?
• Long wanem ol rot gutnius “i no klia” long taim bilong ol aposel na long taim bilong yumi?
• Olsem wanem yumi kamapim glori bilong God?
[Piksa long pes 19]
Ol Israel i no inap long lukim pes bilong Moses
[Ol Piksa long pes 21]
Olsem Pol, planti man husat bipo ol i bin biruaim tok i tru bilong God nau ol i mekim wok bilong Em
[Ol Piksa long pes 23]
Ol wokboi bilong Jehova i save amamas long kamapim glori bilong God